ಭಿರಾಂತ್ (- ಮಾಯ್ರನ್ ಜೇಸನ್ ಬಾರೆಟ್ಟೊ)

[ಕವಿತಾ] ಭಿರಾಂತ್  (- ಮಾಯ್ರನ್ ಜೇಸನ್ ಬಾರೆಟ್ಟೊ)

ಅಖ್ಖ್ಯಾ ಸಂಸಾರಾಕ್ ಆಜ್ ಧೊಸುನ್ ಆಸ್ಚಿ ಮಾರೆಕಾರ್ ಪಿಡಾ COVID-19 ನಿವಾರುಂಕ್ ಕೊಣೆಂಚ್ ವ್ಹಕತ್ ಸೊಧುನ್ ಕಾಡುಂಕ್ ನಾ. ಹಿ ಪರಿಗತ್ ಭಿರಾಂತೆಚಿ ತಶೆಂಚ್ ದುಭಾವಾಚಿ. ದುಭಾವ್ ಆಮಿ ಕೆಲ್ಲ್ಯಾ ತಶೆಂಚ್ ಕರುನ್ ಆಸ್ಚ್ಯಾ ಕರಮಾಂಚೆರ್. ಆಮಿ ಪಾತ್ಯೆವ್ನ್ ಆಯಿಲ್ಲ್ಯಾ ಧರಮಾಚೆರ್ ಆನಿ ದೆವಾಂಚೆರ್. ಹೆಚ್ ಚಿಂತಪಾಚೆರ್ ಕವಿತಾ ವಿಣಲ್ಯಾ.

ಮಾಯ್ರನ್ ಜೇಸನ್ ಬಾರೆಟ್ಟೊ ಏಕ್ ಧಾರಮಿಕ್ ಯಾಜಕ್, ಕವಿತಾ, ಕಥಾ ತಶೆಂಚ್ ಲೇಕನಾಂ ತೆ ಬರಯ್ತಾತ್. ತಾಂಚಿಂ ಭಾರಾ ಪುಸ್ತಕಾಂ ಯೆದೊಳ್ ಪ್ರಕಾಶಿತ್ ಜಾಲ್ಯಾಂತ್. ತಾಂತುಂ ಕವಿತೆಚೆಂ ಪುಸ್ತಕ್‌ಯೀ ಆಸಾ. ಹ್ಯಾ ಕವಿತೆಂತಲಿ ಭಿರಾಂತ್ ಸಮ್ಜುಂಕ್ ಆತಾಂ ತುಜೆರ್ ಸೊಡತಾಂ.

[ಕವಿತಾ] ಭಿರಾಂತ್  (- ಮಾಯ್ರನ್ ಜೇಸನ್ ಬಾರೆಟ್ಟೊ)

ಭಿರಾಂತ್

ಹಡ್ಡೆಂ ಫುಲವ್ನ್ ಬಡಾಯ್ ದಾಖವ್ನ್

ಪಟ್-ತಿಡ್ಕೆನ್ ಪಾವ್ಲಾಂ ಫುಡೆಂ ಮಾರ್ಲಿಂ

ಉಠಿಯೆಂತ್ ಭರುನ್ ಹಾಡ್ಟಲಂ ಮ್ಹಣ್

ಜಿದ್ದ್ ದಾಖವ್ನ್ ವಾರ್ಯಾರ್ ಫಾಲಾಂ ಸೊಡ್ಲಿಂ

ಪುಣ್ ಮನಿಸ್ ಖುಯಂ ಚುಕ್ಲೊ ಕಾಯ್?

ಭಿರಾಂಕುಳ್ ಬಾತ್ಮಿ ಆಯ್ಕುನ್ ಚಿತ್ನಾಂ ಗುಸ್ಪಲಿಂ

ಜಿನ್ಸಾವಾರ್ ಮಳಾಂಚೆರ್ ಹಿಕ್ಮತಿನ್ ವಾವ್ರುನ್

ನಾಂವ್, ಮಾನ್, ಪದ್ವಿ, ಮನ್ಶಾನ್ ಜೊಡ್ಲಲಿ

ಕಣಾಚೆಂಚ್ ಸಾಂಗ್ಣೆಂ ಕಾನಾರ್ ಘೆನಾಸ್ತಾನಾಂ

ವ್ಹಡ್ಪಣಾನ್ ಭರನ್ ತಕ್ಲಿ ವಯ್ರ್ ಉಬಾರ್ಲಿ

ಪುಣ್ ಮನಿಸ್ ಖುಯಂ ಚುಕ್ಲೊ ಕಾಯ್?

ಮಾನ್ ಸಕ್ಲಾ ಘಾಲುನ್ ಘರ್ಚಿ ವಾಟ್ ಧರ್ಲಿ

ಮನ್ಶಾ ಲಾಗಿಂ ಸಗ್ಳೆಂ ಆಸುನ್ ಲೆಗಿತ್

ಭಿರಾಂತ್ ಜಿವ್ ಉಚಾಂಬಳಾಯೆನ್ ಭರ್ತಾ

ಕಿತ್ಲೆಯ್ ಸಂದಿರ್ ಪಾರ್ ಕರುನ್ ಪಾಸುನ್

ಗುಸ್ಪಲಲೆಂ ಮನ್ ಮನ್ಶಾಕ್ ಸಾನ್ಡಯ್ತಾ

ಪುಣ್ ಮನಿಸ್ ಖುಯಂ ಚುಕ್ಲೊ ಕಾಯ್?

ದೆವಾ ಮುಖಾರ್ ಲ್ಹಾನ್ ಜಾಯ್ನಾಸ್ತಾನಾಂ ಜಿವ್ ಹೊಗ್ಡಾಯ್ತಾ

ಸಬಾರ್ ರಗಾದುೆನ್ಸಾಂಕ್ ಇಲಾಜ್ ಆಸಾ ಮ್ಹಣ್

ಮನಿಸ್ ಬಳಾನ್ ಫುಡೆಂ ವೆತಾ ಭಿಯೆನಾಸ್ತಾನಾಂ

COVID-19 ರಗಾಕ್ ವಖದ್ ನಾಂ ದೆಖುನ್

ಬಾಬ್ಡೊ ಜಾಲಾ ಕಣಾಕ್ ಲಾಗಿಂ ಘೆನಾಸ್ತಾನಾಂ

ಪುಣ್ ಮನಿಸ್ ಖುಯಂ ಚುಕ್ಲೊ ಕಾಯ್?

ನಸಾಯೆನ್ ಜಿಯೆಲೊ ದುಸ್ರ್ಯಾಂಚೆಂ ಚಿಂತಿನಾಸ್ತಾನಾಂ

ಸುರಕ್ಶಾ ಖಾತಿರ್ ಸರ್ಕಾರಾನ್ ನೆಂಕಾಯ್ದೆ ಕಾಡುನ್

ಸಮಾಜಿಕ್ ಮಿಸಳ್ಣಿ ಪಯ್ಸಾವುಂಕ್ ಪರ್ಜೆ ಲಾಗಿಂ ಮಾಗ್ಲಾ

ಸಮೆಸ್ತ್ ನಾಗ್ರಿಕಾಂಚ್ಯಾ ಬರೆಪಣಾಂ ಪಾಸತ್

ನಿತಳ್ಸಾಣ್ ಆನಿ ಮಾಗ್ಣೆಂ ಕರುಂಕ್ ಹಾತ್ ಜೊಡ್ಲಾ

ಪುಣ್ ಮನಿಸ್ ಖುಯಂ ಚುಕ್ಲೊ ಕಾಯ್?

ಭಿರಾಂತ್ ನಾಸ್ತಾನಾಂ ಹಾಂಗಾ ಥಂಯ್ ಭಂವತ್ ರಾವ್ಲಾ

- ಮಾಯ್ರನ್ ಜೇಸನ್ ಬಾರೆಟ್ಟೊ. [ಮಾರ್ಚ್, 2020]