ಘಟ್ಟ್ ಮುಳಾಂ, ತಾಠ್ ಮಾನ್ (- ರುಪಾಲಿ ಮಾವ್ಜೊ ಕೀರ್ತನಿ)

[ಕವಿತಾ] ಘಟ್ಟ್ ಮುಳಾಂ, ತಾಠ್ ಮಾನ್(- ರುಪಾಲಿ ಮಾವ್ಜೊ ಕೀರ್ತನಿ)

ಜಿವಿತ್ ಮ್ಹಣ್ತಚ್ ಆಶಾ-ನಿರಾಶಾ, ಸುಕ್-ದೂಕ್, ಬರೆಂ-ವಾಯ್ಟ್ ಏಕ್ ಸಾರ್ಕೆಂ ಆಸಾನಾ, ಪುಣ್ ಹಾಂಗಾಸರ್ ಗರ್ಜೆಚೆಂ ಮ್ಹಳ್ಯಾರ್ ದರೇಕ್ಲ್ಯಾ ಮನ್ಶಾಕ್ ಫಕತ್ ಏಕ್ ಸಾರ್ಕೆಂ ಮೆಳಾನಾ, ಕೊಣ್ ಆಸಾ ಜೊ ಫಕತ್ ಸುಕ್, ಆಶಾ, ಬರೆಂಚ್ ಘೆವ್ಪಾಕ್ ಹ್ಯಾ ಸಂಸಾರಾಂತ್ ಆಯಿಲ್ಲೊ? ವ ಕೊಣ್ ಆಸಾ ಜೊ ಫಕತ್ ನಿರಾಶಾ, ದೂಕ್ ಆನಿ ವಾಯ್ಟ್ ಭೊಗ್ತಲೊ? ದೆಕುನ್ ಸಕತ್-ಅಸಕ್ತ್ ದೊನ್ ಪೊಂತಾಂ ಜಿವಿತ್ ಮ್ಹಳ್ಳ್ಯಾ ಹೊಡ್ಯಾಕ್. ದೊನ್‌ಯೀ ಗರ್ಜೆಚಿಂ. ಹ್ಯಾ ದೊನಾಂಕ್ ಜೊ ಕೊಣ್ ಬ್ಯಾಲೆನ್ಸ್ ಕರುನ್ ಜಿಯೆಂವ್ಕ್ ಸಕ್ತಾ ತೊಚ್ ಸಮಧಾನೆನ್ ಜಿಯೆಂವ್ಕ್ ಸಕ್ತಾ.

ಸಂಸಾರಾಂತ್ ಸರವಾಂಕ್ ಸಂತೊಸ್, ಬರೆಂ ದಿಂವ್ಚೆಂ ಚಿಂತಪ್ ಜೆದ್ನಾಂ ಅಪ್ಲ್ಯಾ ಮನಾಂತ್ ನಾ, ತೆದ್ನಾಂ ಮನಿಸ್ ಕಿತ್ಲೊ ಗ್ರೇಸ್ತ್ ಆಸುನ್‌ಯೀ ಲಾಚಾರ್ ಆನಿ ಗರಿಬ್. ಪುಣ್ ಜೆದ್ನಾಂ ಹೆರಾಂಕ್ ಬರೆಂಚ್ ದಿಂವ್ಚೆಂ ಚಿಂತಪ್ ಆಸಾ ತೆದ್ನಾಂ ಏಕ್ ಜಾಡ್ ಸಯ್ತ್ ಪಾವ್ತಾ. ಇಂಗ್ಲಿಶಾಂತ್ ಏಕ್ ಸಾಂಗಣಿ ಆಸಾ; Never underestimate your strength, never overestimate your weakness.. ಮನಶಾಕ್ ಫಕತ್ ಆಪ್ಲ್ಯಾ ಸಕ್ತೆವಿಶಿಂ ಮಾತ್ರ್ ನ್ಹಯ್, ಅಪ್ಲ್ಯಾ ಅಶಕ್ತೆವಿಶಿಂ ವಾ ಉಣೆಂಪಣಾವಿಶಿಂ ಸಯ್ತ್ ಸಮ್ಜಣಿ ಆಸ್ಚಿ ಭೋವ್ ಗರ್ಜೆಚಿ. ಜೆದ್ನಾಂ ಹಿ ಸಮ್ಜಣಿ ಆಸಾ ತೆದ್ನಾಂ ತೊ ಮನಿಸ್ ಅಪ್ಲ್ಯಾ ಜಿವಿತ್ ಏಖ್ ರೂಕ್ ಕರುನ್ ಜಿಯೆತಾ, ತಾಂತುಂ ಕೊಣಾಕ್ ಸಾವಳಿ, ಕೊಣಾಕ್ ಘೊಂಟೆರ್ ಆನಿ ಕೊಣಾಕ್ ಫುಲ್-ಫಳಾಂ ದಿಂವ್ಕ್ ಸಕ್ತಾ. ಪುಣ್ ಹ್ಯಾ ಸರ್ವಾಂಕ್ ಗರ್ಜೆಚೆಂ ಅಪ್ಲಿ ಬುನ್ಯಾದ್ ಘಟ್ ಕರ್ಚಿ. ಜೆದ್ನಾಂ ಪಾಳಾಂಚ್ ಸಾರ್ಕಿಂ ರೊಂಬ್ಲಿಂನಾಂತ್ ತೆದ್ನಾಂ ತೊ ರೂಕ್ ಎಕಾಚ್ ವಾರ್ಯಾಕ್ ಧರ್ಣಿಕ್ ಶೆವ್ಟತಾ. ಸೊಂಪೆಂ ಪುಣ್ ಭೋವ್ ಅಪುರ್ಭಾಯೆಚೆ ವಿಚಾರ್ ಹ್ಯಾ ಕವಿತೆಂತ್ ಬಾಯ್ ರುಪಾಲಿ ಮಾವ್ಜೊ ಕಿರ್ತನಿನ್ ವೆಕ್ತ್ ಕೆಲ್ಲೆ ದಿಸುನ್ ಯೆತಾತ್.

[ಕವಿತಾ] ಘಟ್ಟ್ ಮುಳಾಂ, ತಾಠ್ ಮಾನ್(- ರುಪಾಲಿ ಮಾವ್ಜೊ ಕೀರ್ತನಿ)

ಘಟ್ಟ್ ಮುಳಾಂ, ತಾಠ್ ಮಾನ್

ಮ್ಹಾಕಾ ಸದಾಂಚ್ ದಿಸ್ತಾ, ಹಾಂವ್

ಝಾಡ್ ಆಸೂಂಕ್ ಜಾಯ್ ಆಸ್ಲೆಂ

ಮಾತ್ಯೆಂತ್ ಘಟ್ಟ್ ಮುಳಾಂ ಧರೂನ್

ತಾಠ್ ಉಬೆಂ ರಾವ್ತಾ ಆಸ್ಲೆಂ

ಖಾಂದ್ಯಾಂರ್ ಮ್ಹಜ್ಯಾ ಖೆಳಯ್ತ್ ಪಾನಾಂ

ಫುಲಾಂ, ಫಳಾಂ ಧೊಲಯ್ತಾ ಆಸ್ಲೆಂ

ವತಾಂತ್ ಕಿತ್ಲೆಂಯ್ ತಾಪ್ಲೆಂ ತರಿ

ಶಿತಳ್ ಭೊಂವ್ತಣ್ ರಚ್ತಾ ಆಸ್ಲೆಂ

ಆಲಾಶಿರೊ ದಿವ್ಚೆ ಖಾತೀರ್

ಸದಾಂಚ್ ತಯಾರ್ ಆಸ್ತಾ ಆಸ್ಲೆಂ

ವಾಟ್ಸುರ್ಯಾಂಕ್ ವಿಸಂವ್ ಘೆವಂಕ್

ಸಾವ್ಳಿ ಪಾತ್ಲಾವನ್ ಬಸ್ತಾ ಆಸ್ಲೆಂ

ಆಂಗಾರ್ ಘಾವೆ ಘೆತ್ಲೆ ತರಿ

ಪಾನಾಂ ಸಳ್ಸಳಾವನ್ ಹಾಂಸ್ತಾಸಲೆಂ

ಮುಳಾಂತ್ ಪಡಿಲ್ಲೊ ಚಿಕೊಲ್ ಲೆಗೀತ್

ಸಾರ್ಯಾ ರೂಪಾಂತ್ ಬದ್ಲತಾ ಆಸ್ಲೆಂ

ವಾದ್ಳಾ ಸುಲೂಸ್ ಲಾಗ್ಲಿ ಜಾಲ್ಯಾರ್

ಮುಳಾಂ ರೊಂಬೂನ್ ರಾವ್ತಾ ಆಸ್ಲೆಂ

ವಾರ್ಯಾಕ್ ಘುಸ್ಪಾವನ್ ಮ್ಹಜ್ಯಾಂತ್, ಹಾಂವ್

ವಾರ್ಯಾ ವಾಂಗ್ಡಾ ಧೊಲ್ತಾ ಆಸ್ಲೆಂ

ಫುಲ್ಚೆಂ ಫಳ್ಚೆಂ ಥಾಂಬ್ಲೆಂ ಮ್ಹೂಣ್

ಉಪ್ಕರಾ ಪಡ್ಚೆಂ ಥಾಂಬ್ಚೆಂ ನಾಸ್ಲೆಂ

ಪಾನಾಂ ಲೆಗೀತ್ ಝಡ್ಲಿಂ ಜಾಲ್ಯಾರ್

ಮಾನ್ ತಾಠ್ ಧರ್ತಾ ಆಸ್ಲೆಂ

ಜಾತಾ ತಶೆಂ ಜಾತಾ ತಿತ್ಲೆಂ

ಜಾಯ್ ತಾಕಾ ದಿತಾ ಆಸ್ಲೆಂ

ಖರೆಂಚ್ ಸದಾಂ ದಿಸ್ತಾ, ಹಾಂವ್

ಝಾಡ್ ಆಸೂಂಕ್ ಜಾಯ್ ಆಸ್ಲೆಂ

ಕರ್ತಾಂ ಕರ್ತಾಂ ವಿಚಾರ್ ಅಸೊಚ್

ಮನಾಂತ್ ಮ್ಹಜ್ಯಾ ಯೆವ್ನ್ ವತಾ

ಜಾಲೆಂ ಬಿ ನಾ ಮು ಝಾಡ್ ಹಾಂವ್,

ಮನ್ ಮ್ಹಜೆಂ ಚಿಂತೂಂಕ್ ಲಾಗ್ತಾ

ಖರ್ ಇತ್ಸಾ ಆಸ್ಲಿ ಜಾಲ್ಯಾರ್,

ದಿಸ್ತಾ ತೆಂ ಖಂಯ್ ಖರೆಂ ಜಾತಾ

ಘಟ್ಟ್ ಮುಳಾಂ ರೊಂಬೂನ್

ತಾಠ್ ಮಾನೆನ್ ತೆನ್ನಾ ಹಾಂವ್,

ಹಾಂವ್ಚ್ ಝಾಡ್ ಆಸ್ಲ್ಯಾವರಿ ಉಬೆಂ ರಾವ್ತಾಂ

- ರುಪಾಲಿ ಮಾವ್ಜೊ ಕೀರ್ತನಿ. [ಫೆಬ್ರೆರ್, 2020]