ವ್ಯಥಾ (- ಅಲ್ಕಾ ಸಿನಾಯ್ ಅಸೊಲ್ಡೇಕರ್)

[ಕವಿತಾ] ವ್ಯಥಾ (- ಅಲ್ಕಾ ಸಿನಾಯ್ ಅಸೊಲ್ಡೇಕರ್)

ಥೆಂಬೆ ಮೆಳುನ್ ಘೊಟ್ ಜಾತಾ, ಘೊಟ್ ಯೆತಾ ಬಾಂಯ್ ಥಾವ್ನ್, ಬಾಂಯೊ ಎಕ್ಟಾಂಯ್ ಜಾತಿತ್ ತರ್ ತಳೆಂ ಜಾತಾ, ತಳೆಂ ವ್ಹಾಳುಂಕ್ ಲಾಗ್ತತ್ ತರ್ ನ್ಹಂಯ್ ಜಾತಾ ಅನಿ ನ್ಹಂಯೊ ಎಕ್ಟಾಂಯ್ ಜಾತಿತ್ ತರ್ ದರ್ಯೊ ಆನಿ ದರ್ಯೊ ಸಾಗೊರ್ ಅಶಿ ಕಾಣಿ ಮುಕಾರ್ ವೆತಾ. ಪುಣ್ ಹಾಂಗಾಸರ್ ಏಕ್ ನ್ಹಂಯ್ ಅನಿ ದರ್ಯೊ ಎಕಾಮೆಕಾ ಉಲಯ್ತಾತ್, ಕಾಂಯ್ ಯುಗಾಂನಿ ತಾಂಕಾಂ ಹೊ ಆಸ್ಪಾವ್ ನಾಸ್ಲೊ, ಪುಣ್ ಆಜ್ ಅಪ್ಲ್ಯಾ ಸ್ವಾರ್ಥಾಕ್ ಲಾಗುನ್ ನ್ಹಂಯ್‌ಕ್ ದರ್ಯಾಸವೆಂ ಮೆಳುಂಕ್ ಸೊಡಿನಾತ್ಲೆ ಮನಿಸ್ ಎಕಾ ವಯ್ರಸಾಚ್ಯಾ ಭಿರಾಂತಿನ್ ಆಪಾಪ್ಲ್ಯಾ ಘರಾಂನಿ ಕಯ್ದ್ ಆಸಾತ್ ಮ್ಹಣ್ಟಕಚ್ ಹಿ ಸಂದಿ ಉದೆಲ್ಯಾ. ಕವಿತೆಂತ್ ಖೂಪ್ ಥೊಡೆ ವಯ್ಚಾರಿಕ್ ವಿಶಯ್ ಆಸಾತ್.

ಬಾಯ್ ಅಲ್ಕಾ ಸಿನಾಯ್ ಅಸೊಲ್ಡೇಕರ್ ಏಕ್ ಕವಿ, ತರ್ಜಣ್‌ಕಾರ್ ತಶೆಂಚ್ ನಿಬಂಧಕಿ. ಹಿಚ್ಯಾ ಕವಿತೆಂತ್ಲಿ ವಯ್ಚಾರಿಕ್ ಕಾಣಿ ಸಮ್ಜುಂಕ್ ಆತಾಂ ತುಕಾಚ್ ಉಲೊ ದಿತಾಂ.

[ಕವಿತಾ] ವ್ಯಥಾ (- ಅಲ್ಕಾ ಸಿನಾಯ್ ಅಸೊಲ್ಡೇಕರ್)

ವ್ಯಥಾ

ದರ್ಯಾನ್ ನ್ಹಂಯಕ್ ವಿಚಾರಲೆಂ

ಮ್ಹಜೆಕಡೆನ್ ಯೆತ್ನಾ

ಕೊಣೆ ಆಡಾಯ್ಲೆಂ ನಾ ತುಕಾ?

ನ್ಹಂಯ್ ಮುಮುರ್ಕ್ಯಾನಿ ಹಾಂಸ್ಲಿ

ಆನೀಕ್ ಖಳ್ಖಳೂನ್ ವ್ಹಾಂವಂಕ್ ಲಾಗ್ಲಿ

ದರ್ಯಾನ್ ಮ್ಹಳೆಂ

ನಿವಾಂತಪಣಾನ್

ದೀಸ್ ಸಾರ್ಯಾ ಆಮಿಂ

ಆಮ್ಚ್ಯಾ ಮದಿಂ

ಆತಾ ಕಾಂಯ್ ದೀಸ್

ಕೊಣೂಚ್ ಯೆವ್ಚೊ ನಾ

ನ್ಹಂಯ್ ಆನಿ ದರ್ಯಾ

ಎಕಾಮೆಕಾ ವಾಂಗ್ಡಾ

ಉಲೊವಂಕ್ ಲಾಗ್ಲಿ

ವರ್ಸಾಂ ವರ್ಸಾಂಚಿ ಘುಸ್ಮಟ್

ಸದಾಂಚ್ ಲೊಕಾಂಚಿ ಗರ್ದಿ

ಉಸಂತ್ ದಿಲಿ ನಾ ಆಮ್ಕಾಂ

ಸ್ವತಂತ್ರಪಣಾಚಿ.

ಕೊಣ್ ನ್ಹಾತಾ, ಕೊಣ್ ಖೆಳ್ಟಾ

ಕೊಣ್ ಆಮ್ಚೆರ್ ಕವಿತಾ ಬರಯ್ತಾ

ಆತಾಂ ಆಮಿ ಉಮೆದೀನ್

ಸಾಂಗಾತಾನ್ ರಾವ್ಯಾ

ಎಕ್ಮೆಕಾಂಕ್ ಸುಖ್- ದುಖ್ಖಾಚಿ

ಗಜಾಲಿ ಸಾಂಗ್ಯಾ

ಮನ್ಶಾಂಚ್ಯೊ ಕಾಣ್ಯೊ ಆತಾಂ

ಪುರೊ ಜಾಲ್ಯೊ

ಮೆಳ್ಟಾ ತೆ ದೀಸ್ ಆಮಿಂ

ಉಮೆದೀನ್ ಸಾರೂಯಾ

- ಅಲ್ಕಾ ಸಿನಾಯ್ ಅಸೊಲ್ಡೇಕರ್ . [ಮಾರ್ಚ್, 2020]

ಅಲ್ಕಾ ಸಿನಾಯ್ ಅಸೊಲ್ಡೇಕರ್ : 2010 ಇಸ್ವೆಚ್ಯಾ ಭಾಶಾಂತರಾಕ್ ಸಾಹಿತ್ಯ ಅಕಾಡೆಮಿಚೊ ಪುರಸ್ಕಾರ್ ಜೊಡ್ಪಿ, ಕವಿತಾ, ತರ್ಜಣ್ ತಶೆಂಚ್ ಬಾಳ್ ಸಾಹಿತ್ಯ್ ಬರಯ್ತಾ. ’ಕಾವ್ಯಕುಂಜ್’ ಹಿಚ್ಯಾ ಕವಿತೆಂಚೆಂ ಪುಸ್ತಕ್ ಪ್ರಕಾಶಿತ್ ಜಾಲಾಂ. ತಶೆಂಚ್ ಬಾಳ್ ಸಾಹಿತ್ಯ್, ನಿಬಂಧ್ ಅಶೆಂ ಹೆರ್ ಪುಸ್ತಕಾಂ ಪ್ರಕಾಶಿತ್ ಜಾಲ್ಯಾಂತ್. ಗೊಂಯಾಂತ್ ವಸ್ತಿ ಕರುನ್ ಆಸ್ಚ್ಯಾ ಹಿಚಿಂ ಬರಪಾಂ ಗೊಂಯ್ಚ್ಯಾ ನೆಮಾಳ್ಯಾಂನಿ ಪರ್ಗಟ್ ಜಾಲ್ಯಾಂತ್.