ಚಿಂತಾಪ್ (- ಗ್ಲೇಡಿಸ್ ನೊರೊನ್ಹಾ, ಪಿಯುಸ್‌ನಗರ್)

[ಕವಿತಾ] ಚಿಂತಾಪ್ (- ಗ್ಲೇಡಿಸ್ ನೊರೊನ್ಹಾ, ಪಿಯುಸ್‌ನಗರ್)

ಸಭಾರ್ ಪಾವ್ಟಿಂ ಮನಿಸ್ ಜ್ಯೆ ಕಿತೆಂ ಚಿಂತಾ, ತೆಂ ಘಡಾನಾ, ಬಗರ್ ದುಸ್ರೆಂಚ್ ಘಡ್ತಾ. ಪುಣ್ ಸಂಸಾರಾಚೆಂ ನೇಮ್ ಹೆಂ. ಮನಿಸ್ ಹ್ಯಾ ಸಂಸಾರಾಂತ್ ಫಕತ್ ಬೊಂಬಿಂ, ವ ಕಟ್‌ಪುತ್ಳಿ. ಮನಶಾಂಕ್ ಚಲಯ್ತಲೊ ಎಕ್ಲೊ ಆಸಾ. ತಾಕಾ ಕೊಣ್ ದೇವ್ ಮ್ಹಣತ್ ಆನಿ ಕೊಣ್ ಅನಿ ಕಿತೆಂ ಮ್ಹಣತ್. ಪುಣ್ ಮನಿಸ್ ಮಾತ್ ಚಿಂತ್ಚೆಂ ಕೆದಿಂಚ್ ಸೊಡಿನಾ. ಮನಶಾಕ್ ಚಿಂತಪ್ ಭೋವ್ ಗರ್ಜೆಚೆಂ. ಹ್ಯಾ ಕವಿತೆಂತ್ ಸಯ್ತ್ ತೆಂಚ್ ಚಿಂತಪ್ ಆಸ್ಚೆಂ ಪಳೆವ್ಯೆತ್.

ದೀಸ್ಪಡ್ತೊ ಗ್ರಾಸ್ ಸೊಧುನ್ ಪರ್ಗಾಂವಾಕ್ ಗೆಲ್ಯಾರೀ, ಅಪ್ಲಿ ಆವಯ್ ಭಾಯ್ ವಿಸರ್ನಾಸ್ತಾಂ, ತಿಚೊ ಪೋಸ್ ಕರ್ಚಿ ಜವಾಭ್ದಾರಿ ಪಾಳ್ತೆಲಿಂ ಭೋವ್ ಥೊಡಿಂ. ಬಾಯ್ ಗ್ಲೇಡಿಸ್ ನೊರೊನ್ಹಾ ತಸಲ್ಯಾ ಭೋವ್ ಥೊಡ್ಯಾಂಕ್ ಪಯ್ಕಿಂತ್ಲಿ. ಕುವೆಯ್ಟಾಂತ್ ಭುರ್ಗ್ಯಾಂಕ್ ಕೊಂಕಣಿ ಶಿಕಯ್ತಾ, ವೃತ್ತೆನ್ ಶಿಕ್ಷಕಿ ತಿ ಜಾಲ್ಲೆವರ್ವಿಂ ಭುರ್ಗ್ಯಾಂಕ್ ಕೊಂಕಣಿ ಶಿಕಂವ್ಚಿ ಗರ್ಜ್ ಆನಿ ಮಹತ್ವ್ ಬರೇ ರಿತಿನ್ ಸಮ್ಜಲ್ಲ್ಯಾ ಹಿಚೊ ವಾವ್ರ್ ಥೊಕ್ಣಾಯೆಚೊ.

[ಕವಿತಾ] ಚಿಂತಾಪ್ (- ಗ್ಲೇಡಿಸ್ ನೊರೊನ್ಹಾ, ಪಿಯುಸ್‌ನಗರ್)

ಚಿಂತಾಪ್

ಜಿಣ್ಯೆಂತ್ ಆಮಿಂ ಸದಾಂನೀತ್ ಚಿಂತಾಂವ್

ಚಿಂತುನ್‍ಂಚ್ ಮುಕಾರ್ ಆಮಿಂ ಚಲ್ತಾಂವ್

ಥೊಡೆ ಪಾವ್ಟಿಂ ವಿರಾರ್ ಸಯ್ತ್ ಜಾತಾಂವ್

ಉಪ್ರಾಂತ್ ಪುರಾಸಣ್ ಮತಿಂ ಆಮ್ಚ್ಯಾ ಭೊಗ್ತಾಂವ್

ಚಿಂತುನ್‍ಂಚ್ ಆಕ್ರೇಕ್ ಎಕಾ ನಿರ್ಧಾರಾಕ್ ಪಾವ್ತಾಂವ್

ಆನಿ ಮುಕಾರ್ ಚಿಂತ್ಚೆಂಚ್ ಸದಾಂಕಾಳ್ ಸೊಡ್ತಾಂವ್?

ಭಗ್ತಾ ತೆದ್ನಾಂ ಆಮ್ಚ್ಯಾ ಮತಿಂತ್

ಮತ್ ಕಶಿ ಚಲ್ಚಿ ಜರ್ ಚಿಂತ್ಚೆಂಚ್ ಸೊಡ್ಲ್ಯಾರ್

ಚಿಂತ್ಪಾನ್ಂಚ್ ಮನಿಸ್ ನ್ಹಯ್ ಮುಕಾರ್ ಪಾವ್ತಾ

ಖರೆಂ ರೂಪ್ ತೊ ಆಪ್ಲ್ಯಾ ಜಿಣ್ಯೆಕ್ ದೀಂವ್ಕ್ ಸಕ್ತಾ

ಚಿಂತ್ ಯಾ ನಾ ಚಿಂತ್ ಕಿತೆಂ ಫರಕ್ ಪಡ್ತಾ

ಆನಿ ಹೆಂಚ್ ಚಿಂತುನ್ ತೊ ಜಿಣಿ ಭರ್ ಖರ್ಗಾತಾ?

ಜೀಣ್ ಭರ್ ಆಮಿಂ ಚಿಂತುನ್ಂಚ್ ಆಸ್ತಾಂವ್

ಚಿಂತಾಂವ್ ಆನಿ ಪರತ್ ಪರತ್ ಚಿಂತಾಂವ್

ತರೀ ಪರ್ತ್ಯಾನ್ ಜಿಣ್ಯೆಚೊ ಹಂತ್ ಜೊಡುಂಕ್ ಆಟಾಯ್ತಂವ್

ಹರ್‍ಯೆಕ್ ಪಾವ್ಟಿಂ ಹಾಂವ್ ಚಿಂತಾ ತೆಂಚ್

ಆಯ್ಚ್ಯಾ ದಿಸಾಚ್ಯಾ ಕರ್ನ್ಯಾಂ ವಿಶಿಂ ಮಾತ್ರ್

ಉಪ್ರಾಂತ್ ಸಗ್ಳೆಂ ಸಾರ್ಕೆಂ ಕರ್ತಾಲೊ ಮ್ಹಣ್ ದೇವ್.

- ಗ್ಲೇಡಿಸ್ ನೊರೊನ್ಹಾ, ಪಿಯುಸ್‌ನಗರ್. [ಜ್ಯೂನ್, 2020]

ಗ್ಲೇಡಿಸ್ ನೊರೊನ್ಹಾ, ಪಿಯುಸ್‌ನಗರ್: ಕುಂದಾಪುರಚ್ಯಾ ’ಪಿಯುಸ್ ನಗರ್’ ಗಾಂವ್ಚಿ ಬಾಯ್ ಗ್ಲೇಡಿಸ್ ನೊರೊನ್ಹ, ಪಾಟ್ಲ್ಯಾ ಸಭಾರ್ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಸ್ತಿ ಕರುನ್ ಆಸಾ. ವೃತ್ತೆನ್ ಶಿಕ್ಷಕಿ ಪುಣ್ ಕುವೆಯ್ಟಾಂತ್ ಕೊಂಕಣಿ ವಾವ್ರ್ ಕರ್ತೆಲ್ಯಾಂ ಪಯ್ಕಿಂತ್ ಪ್ರಮುಕ್. ಭುರ್ಗ್ಯಾಂಕ್ ಕೊಂಕಣಿ ಶಿಕಂವ್ಚಿ, ಕೊಂಕಣಿ ಪದಾಂ, ಕಾಣಿಯೊ ಶಿಕಂವ್ಚಿ ಹಿ ಇಂಗ್ಲಿಶ್, ಕನ್ನಡ ತಶೆಂಚ್ ಕೊಂಕಣಿಂತ್ ಸಯ್ತ್ ಬರಯ್ತಾ. ಕುವೆಯ್ಟ್‌ಗಾನಿ ಪರ್ಗಟ್ ಕೆಲ್ಲ್ಯಾ ಝೆಲೊ ವಿಶೇಸ್ ಅಂಕ್ಯಾಂನಿ ತಶೆಂಚ್ ’ಕುಳ್ವಾರ್ಚೆಂ ದಾಯ್ಜ್ (2002)’ ಬುಕಾಂತ್ ಹಿಚಿ ಕವಿತಾ ಪರ್ಗಟ್ಲ್ಯಾ.