ಬದ್ಲಾವಣ್ (- ವಿಲ್ಮಾ ಬಾರೆಟ್ಟೊ)

ಧಾಂಪಣ್ ಪಡ್ಲಾಂ ಲೊಕಾ ತೊಂಡಾಕ್

ಎಕಾಮೆಕಾಕ್ ವಳ್ಕೊಂಚೆ ಮಾನಾಯ್

ಮಾಸ್ಕ್ ವೋಡುನ್ ಪರ್ಕಿ ಜಾಲ್ಯಾತ್

ಜಾಗೊ ನಾ ತರೀ ಇಗರ್ಜೆ ಬಾಂಕಾರ್

ಎಕಾಮೆಕಾಕ್ ಚಿಡ್ಕೊನ್ ಬಸ್ತಾಲೆ ಪಯ್ಲೆಂ

ಆಜ್ ಹಾಂಕಾ ಪಳೆವ್ನ್ ಬಾಂಕ್ ಹಾಸ್ತಾತ್

’ಜಿವಾಚೆ ಆಶೆನ್ ದೋಗ್‍ಚ್ ಬಸ್ತಾತ್’

ಆಕೇರ್ ಜಾತೆಚ್ ಮೀಸ್ ಲೋಕ್

ಮೆಳ್ತಾಲೆ ಸುಖ್-ದುಖ್ ಉಲಯ್ತ್

ಆಕ್ರೇಚ್ಯಾ ಕಂತಾರಾ ಪಯ್ಲೆಂಚ್ ಆತಾಂ

ಘರಾ ಕುಶಿನ್ ಧಾಂವ್ತಾತ್

ಪಯ್ಲೆಂ ವಚೊಂಕ್ ಅಸಾ ಮಿಸಾ

ಎಕಾ ಥರಾಚಿ ಆತುರಾಯ್

ಆತಾಂ ಜಾಯ್ ಮಿಸಾಕ್ ವಚೊಂಕ್

ಎಕಾ ದಿಸಾಚಿ ತಯಾರಾಯ್

ಆಗ್ಮೆಂತ್ ಶೆಣವ್ನ್ ಖುರ್ಸಾ ಗುರ್ತ್ ಕಾಡುನ್

ಇಗರ್ಜೆ ಭಿತರ್ ಪ್ರವೇಶ್ ತೆದ್ನಾಂ

ಆಗ್ಮೆಂತ್ ನಾಂ ಸ್ಯಾನಿಟಯ್ಸರ್ ಲಾವುನ್

ಭಿತರ್ ಸರ್ಚೊ ಆವೇಶ್ ಆತಾಂ

ಖೊಂಕ್ಲಿ-ಶಿಂಕ್ ಕಾಡ್ಲಿ ತರ್ ಭಿತರ್

ತಕ್ಲಿ ಗುಂವ್ಡಾವ್ನ್ ದೊಳೆ ವಾಟಾರ್‍ನ್ ಲೋಕ್

ಚೊಯ್ತಾತ್ ಎಕಾಮೆಕಾಕ್ ಭಿಂಯಾನ್

ಧಾಡಿತ್ ಮ್ಹಣ್ ವಿಗಾರ್ ನಾಂವ್ ಆಪವ್ನ್ ಭಾಯ್ರ್

- ವಿಲ್ಮಾ ಬಾರೆಟ್ಟೊ. [ಜ್ಯೂನ್, 2020]

ವಿಲ್ಮಾ ಬಾರೆಟ್ಟೊ: ಬಂಟ್ವಾಳ್‌ಚ್ಯಾ ’ಮೊಡಂಕಾಪ್’ ಮುಳಾಚಿ, ಸದ್ದ್ಯಾಕ್ ವಾಲೆನ್ಸಿಯಾಂತ್ ವಸ್ತಿ ಕರ್ಚಿ ಬಾಯ್ ವಿಲ್ಮಾ ಜೋಸ್‌ಲಿನ್ ಬಾರೆಟ್ಟೊ ಡಿ’ಸೋಜ್ ಪಯ್ಲೆಂ ಮಾಲ್ದೀವ್ಸ್ ಉಪ್ರಾಂತ್ ದುಭಯ್ ಅಶೆಂ 17 ವರ್ಸಾಂ ಕಾಮ್ ಕರುನ್ ಆಸ್ಚಿ ಸಾಹಿತಿಕ್ ಆಸಕ್ತ್‌ವಂತ್. ಥೊಡ್ಯಾ ಕವಿತೆಂಕ್ ಸ್ಪರ್ಧ್ಯಾಂನಿ ಇನಾಮಾಂ ಸಯ್ತ್ ಹಿಣೆಂ ಆಪ್ಣಾಯ್ಲ್ಯಾಂತ್.