ಭಟ್‌ಪಣ್ (- ಶಾಂತನೂ ಅಯ್ಯ)

[ಕವಿತಾ] ಭಟ್‌ಪಣ್ (- ಶಾಂತನೂ ಅಯ್ಯ)

"ಹ್ಯಾ ಸಂಸಾರಾಂತ್ ಜಯ್ತ್ ಜೊಡುಂಕ್ ಸಕ್ಚೊ ಮನಿಸ್ ಚಡ್ ಸಕ್ತೆವಂತ್ ನ್ಹಯ್, ಚಡ್ ಬುಧ್ವಂತ್‌ಯೀ ನ್ಹಯ್, ಪುಣ್ ಜೊ ಮನಿಸ್ ಬದ್ಲಾವಣೆಕ್ ಸರಿ ಕರುನ್ ಅಪ್ಲಿ ಜಿವಿತ್ ಬದ್ಲಿತಾ ತೊ" ಅಶೆಂ ಮ್ಹಣತಾ ಡಾರ್ವಿನ್. ಹಾಂಗಾಸರ್ ಬದಲ್ಚ್ಯಾ ಮನಶಾಚೆಂ ಚಿಂತಪ್, ಜಿವಿತ್, ಸಂಸ್ಕೃತಿ ತಶೆಂಚ್ ಮನಶಾಂ ಮೊಲಾಂ ಹ್ಯಾ ಕವಿತೆಂತ್ ಭೋವ್ ನಾಜೂಕಯೆನ್ ಪಿಂತ್ರಾಯಿಲ್ಲಿಂ ದಿಸುನ್ ಯೆತಾತ್. ಹ್ಯಾ  ಕವಿತೆಂತಲಿ ವಯ್ಚಾರಿಕತಾ ಖರಿಚ್ ಜಾವ್ನ್ ಭೋವ್ ಸೊಭಿತ್ ರಿತಿನ್ ವೆಕ್ತ್ ಕೆಲ್ಲಿ ದಿಸುನ್ ಯೆತಾ.

ಕವಿ ಬಾಬ್ ಶಾಂತನೂ ಅಯ್ಯ ಏಕ್ ಬರೆಂ ತಾಲೆಂತ್. ಗೊಂಯ್ಚ್ಯಾ ಕೆಪೆಂತಲ್ಯಾ ಸರಕಾರಿ ಕೊಲೆಜಿಂತ್ ಮರಾಠಿಂತ್ ಬಿ.ಎ. ಶಿಕುನ್ ಆಸ್ಚ್ಯಾ ಹಾಚ್ಯಾ ಬರಪಾಂಕ್ ಆಧ್ಲ್ಯಾ ವರಸಾಚ್ಯಾ ಪಯ್ಣಾರಿ-ವೀಜ್ ಮಾಂಡುನ್ ಹಾಡ್‌ಲ್ಲ್ಯಾ ವಿಲ್ಫಿ ರೆಬಿಂಬಸ್ ಸ್ಮಾರಕ್ ರಾಶ್ಟ್ರೀಯ್ ಸಾಹಿತಿಕ್ ಸ್ಪರ್ಧ್ಯಾಂತ್ ಇನಾಮ್ ಸಯ್ತ್ ಲಾಭ್ಲಾಂ. ಹ್ಯಾ ಕವಿತೆಚಿ ಸಕತ್ ಸಮ್ಜುಂಕ್ ಆತಾಂ ತುಕಾ ಸೊಡತಾಂ.

[ಕವಿತಾ] ಭಟ್‌ಪಣ್ (- ಶಾಂತನೂ ಅಯ್ಯ)

ಭಟ್‌ಪಣ್

ಆಧುನಿಕ್ ಯುಗಾ ವಾಂಗ್ಡಾ

ಜೀಣ್ ಮ್ಹಜಿ ಬದ್ಲಲಾ

ಲೊಕ್ ಮ್ಹಣ್ಟಾ ಭಟ್‌ಪಣ್ ಮ್ಹಜೆಂ

ಜೊಡ್ಪಾಚೊ ಧಂದೊ ಜಾಲಾ...

ಕೊಣ್ ಮೆಲ್ಯಾರೂಯ್ ಹಾಂವ್ ಜಾಯ್

ಕೊಣಿ ಜಾಲ್ಯಾರೂಯ್ ಹಾಂವ್ ಜಾಯ್

ಶಾಸ್ತ್ರಾ ಪುರಾಣಾತಲೆಂ ಕಾಂಯ್ಚ್ ಕಳ್ನಾ ತರಿ ಲೊಕ್ ಮ್ಹಣ್ಟಾ

ಭಟ್ಮಾಮ್ ಸಗ್ಳೆಂ ಸಾರ್ಖೆಂ ಜಾವ್ಪಾಕ್ ಜಾಯ್...

ಗಾಂವ್ಕಾರಾಲೆ ಭುರ್ಗೆ ಆಮ್ದಾರ್ ಜಾಲೆ

ವೆಳ್ಪಾಲೆಂ ಮಾಮ್ಲೆದಾರ್

ಮ್ಹಜ್ಯಾ ದೆವ್ಳಾಂಕ್ ಭಟ್‌ಪಣಾಚೆ

ಉಕ್ತೆಂ ಆಸಾ ಎಕೂಚ್ ದಾರ್...

ಆಮ್ಚೆಯ್ ಲೊಕ್ ಜಾಲೆ ದೊತೊರ್

ಆರ್ಟೀಒ, ಝೆಡ್ಪಿ ಆನಿ ಪ್ರೊಫೆಸರ್

ಲಕ್ಷ್ಮಿ ಯೆತಾ ಘರಾಂತ್ ಆಡ್ವಾಟೆನ್

ಪೂಣ್ ಅಸ್ತಿತ್ವ್ ಮ್ಹಜೆಂ ಜಾಲೆಂ ಕಾಬಾರ್

ಭಟ್‌ಪಣ್ ಆಯ್ಜ್ ಶೆಣ್ಲಾಂ ಮ್ಹಜೆಂ

ಮ್ಹಜಿ ಶೆತಾ ಭಾಟಾಂಯ್ ನಾ ಜಾಲ್ಯಾ

ಫುಡಾರಾಚೆ ಮಂತ್ರ್ ಮ್ಹಜೆ

ದೆವ್ಳಾಂ ಘಾಟೀಂತ್ ವಿರೂನ್ ಗೆಲಾಂ...

ಗರ್ಭಕುಡೀನ್ ದೆವ್ ಮ್ಹಜೊ

ಸಾಂಗ್ತಾ ಮ್ಹಾಕಾ ಕೆನ್ನಾ ಕೆನ್ನಾ

ಪುಜಾ ಕರ್ ತು ಯಾ ಫಾತ್ರಾಚಿ

ಮನಾಕ್ ಮಾತ್ ಫಾತರ್ ಕರಿ ನಾಕಾ...

ಮನ್ ಮ್ಹಜೆಂ ಘುಸ್ಪಲಾಂ

ಮಮ್ ಮ್ಹಣೂನ್ ನಿರ್ಶೆಲಾಂ

ಆಚ್ಮನ್ ಕರುನ್ ಮುಕಾರ್ ವಚ್ಪಾಕ್

ನಶೀಬುಯ್ ಮಾತ್ಶೆಂ ಖರ್ಶೆಲಾಂ...

ಕೆಶ್ವಾಯ್ ಮಾಧ್ವಾಯ್ ನಾರಾಯ್ಣಾಯ್

ಉತ್ರಾಂ ಮೊನಿ ಜಾಲ್ಯಾಂ

ಮನಾತ್ಲ್ಯಾನ್ ತಸ್ಥಾಸ್ತು ಮ್ಹಣ್ಪಾಕ್

ದಕ್ಷಿಣಾಯ್ ಭೀಕ್ ಜಾಲ್ಯಾ...

ಆಧುನಿಕ್ ಯುಗಾ ವಾಂಗ್ಡಾ

ಜೀಣ್ ಮ್ಹಜಿ ಬದ್ಲಲಾ

ಕೊಣಿ ಆತಾ ಕಿತೆಂಯ್ ಮ್ಹಣು

ಮ್ಹಜಿ ಗಣೆಶ್ ಪುಜಾ ಸೊಪ್ಲಾ

ಸಮಾಜಸೆವಾ ಹೀಚ್ ಇಶ್ವರಸೆವಾ

ಹೊಚ್ ಮ್ಹಜೊ ಮಂತ್ರ್ ಜಾಲಾ...

- ಶಾಂತನೂ ಅಯ್ಯ. [ಮಾರ್ಚ್, 2020]

ಶಾಂತನೂ ಅಯ್ಯ: ಗೊಂಯ್ಚ್ಯಾ ಕೆಪೆಂತಲ್ಯಾ ಸರಕಾರಿ ಕೊಲೆಜಿಂತ್ ಮರಾಠಿಂತ್ ಬಿ.ಎ. ಶಿಕುನ್ ಆಸ್ಚ್ಯಾ ಶಾಂತನೂ ಅಯ್ಯ ಏಕ್ ಕಥಾಕಾರ್, ಕವಿ. ಸಾಹಿತಿಕ್ ಸ್ಪರ್ಧ್ಯಾಂನಿ ಇನಾಮಾಂ ಜೊಡಲ್ಯಾಂತ್. 2019 ವರಸಾಚ್ಯಾ (ಪಯ್ಣಾರಿ-ವೀಜ್ ಹಾಣಿಂ ಮಾಂಡುನ್ ಹಾಡ್‌ಲ್ಲ್ಯಾ) ವಿಲ್ಫಿ ರೆಬಿಂಬಸ್ ಸ್ಮಾರಕ್ ರಾಶ್ಟ್ರೀಯ್ ಸಾಹಿತಿಕ್ ಸ್ಪರ್ಧ್ಯಾಂತ್ ಇನಾಮ್ ಲಾಭ್ಲಾಂ.