ಕವಿತಾकविताPoem

Aikunasoli kanni (- Rupali Mauzo Kirtoni)

[kovita] Aikunasoli kanni (- Rupali Mauzo Kirtoni)

’aikunk kalliz asa tor monxak dollech puro. Kananchi gorz na’. Hem somzunk kovimon aschem gorjechem. Hangasor ek pan monxak opurbhayechi kanni sangun veta. Ami horyeka disa soglleamni polletamv panam, jivim, sukim, fantteacher umkollchim, valicher aschim, ruka-zhoddamni aschim panam. Punn kedinch ami tankam aikunk vochunk namv. Vhoi hangasor panam soit uloitat ani kovimon natleleank hem pisantt chintop mholl'lleporim bhogunk puro.

Bai rupali kirtoni ek opurbhayechi kovita gheun ailea. Hea kovitechem chintop adheatmik mhonna, tarkik mhonna va her kitem-i. Punn hea kovitechea ekeka koddveamni aschea kanniek somzunchem preton zorur kora oni oxem ekek kanni vachun gel'leporinch kovitecho osvad kel'lo onbhog tuminch bhoga.

[kovita] Aikunasoli kanni (- Rupali Mauzo Kirtoni)

Aikunasoli kanni

zhoddil'lea panankodde ken'na

barik sannen polloila?

dor eka panant ek kanni lipil'li distoli

dor eka panak ti sangpachi astoli

zhogddot zhogddot ekhadem kosllole aslem

svotHchea sodhant ekhadem poddlem astolem

jinkpa khatir ekhadem harlem astolem

jikhoupa khatir ekhadem tuttlem astolem

dhorun raun ekhadem thoklem astolem

tor novea panank zago korunk

ekhadem pois zala astolem

zhoddil'lea panankodde ken'na

barik sannen polloila?

dor eka panant ek kanni lipil'li distoli

dor eka panak ti sangpachi astoli

konnem dhukl'la astolem

konnem uddoilam astolem

konn ostitva khatir zhujhlam astolem

dor eka panant ek kanni astoli

dor eka panant ti tuka distoli

dor eka panant ti tuka distoli

- Rupali Mauzo Kirtoni. [Dec, 2019]

Rupali Mauzo Kirtoni: Konkonni, Moratthi, Inglix ani Hindint 300 voir kovita boroyil'li bai rupali mauzo kirtoniche Mhojeantolem Hamv (2012), Mollbothaun (2012), Wings - chap book (2012), My mirror - chap book (2017) kovitazome porgottleat. Sauditole te dis (2016) isvent porgottla. Konkonni bhaxa monddoll (gõy) puroskar, TMA Pai xifaros puroskar hika labh‌l'le promuk puroskar.