ಆಬ್ ಆನಿ ನಿಸಣ್ (- ಸಲೊಮಿ ಮಿಯಾಪದವ್,ಮೊಗರ್ನಾಡ್)

[ಕವಿತಾ] ಆಬ್ ಆನಿ ನಿಸಣ್ (- ಸಲೊಮಿ ಮಿಯಾಪದವ್,ಮೊಗರ್ನಾಡ್)

ವೆಳಾಕಾಳಾ ತೆಕಿದ್ ಮನ್ಶಾಜಿವಿತ್ ಬದಲ್ತಾ, ಮನ್ಶಾನ್ ಕಾಂಯ್ ತೆಂಪಾಥಾವ್ನ್ ಪಾಳುನ್ ಆಯಿಲ್ಲ್ಯೊ ರಿತಿ ರಿವಾಜಿ, ಕರ್ನ್ಯೊ ಬದಲ್ತಾತ್. ಸಮಾಜೆಂತ್ ಕವಿ ಮಾತ್ರ್ ಏಕ್ ಅಸಲೆಂ ಸಂಯ್ಬ್, ಜೆಂ ವೆಳಾಕಾಳಾಕ್ ಸರಿ ಜಾವ್ನ್ ಅಪ್ಲಿ ಲಿಖ್ಣಿ ಉಕಲ್ತಾ ಆನಿ ಸರ್ ಬದ್ಲಾವಣೆಂತ್ ಮನ್ಶಾನ್ ಆಪ್ಣಾಯಿಲ್ಲ್ಯಾ ತಶೆಂಚ್ ಹೊಗ್ಡಾಯಿಲ್ಲ್ಯಾ ಮನ್ಶಾಮೊಲಾಂಕ್ ಉಕಲ್ನ್ ಧರ್ತಾ. ಹ್ಯಾ ವೆಳಾಕ್ ಅಪುರ್ಭಾಯೆನ್ ಪ್ರತಿನಿಧಿತ್ವ್ ಕರ್ಚ್ಯೊ ಕವಿತಾ ಆಂಡ್ರ್ಯೂ ಎಲ್. ಡಿ’ಕುನ್ಹಾನ್ ಬರಯ್ಲ್ಯಾತ್. ತಾಚ್ಯಾಚ್ ಕವಿತೆಚ್ಯಾ ಪ್ರಭಾವಾಂತ್ ಆಸ್ಯೆತ್ ಪುಣ್ ಆಯ್ಲೆವಾರ್ ಅಪ್ಲ್ಯಾ ಕವಿತೆಚ್ಯಾ ದೆಣ್ಯಾವರ್ವಿಂ ಅಖ್ಖ್ಯಾ ಕೊಂಕಣಿ ಕವಿತಾಶೆತಾಂತ್ ಪರ್ಜಳ್ತಾ ಬಾಯ್ ಸಲೋಮಿ ಮಿಯಾಪದವ್ (ಮೊಗಾರ್ನಾಡ್). ತಿಚ್ಯೊ ಕವಿತಾ ಮೊಟ್ವ್ಯೊ ಪುಣ್ ದಿರ್ಸಾಳ್ ಮಿರ್ಸಾಂಗೆಪರಿಂ ತೀಕ್ಶ್ಣ್. ಜಶೆಂ ದಿರ್ಸಾಳ್ ಮಿರ್ಸಾಂಗ್ ಚಾಬ್ಲೆಲ್ಯಾಂಕ್ ಲಾಂಬ್ ಕಾಳ್ ಪರ್ಯಾಂತ್ ತೊಂಡ್ ಹುಲೊಪ್ ಆಸ್ತಾಕಿ, ತಶೆಂಚ್ ಹಿಚಿ ಮೊಟ್ವಿ ಕವಿತಾ ಸಯ್ತ್ ವಾಚ್ಪ್ಯಾಚ್ಯಾ ಕಾಳ್ಜಾ-ಮನಾಂತ್ ಜಿವಿ ಉರ್ತಾ. ಏಕ್ ಬರಿ ಕವಿತಾ ಮ್ಹಣ್ಚ್ಯಾಕ್ ಹಿಚ್ ಗವಾಯ್.

ಗೊಂಯ್ಚಿ ಬಾಯ್ ಉರ್ಜಿತಾ ಭೊಭೆನ್ ಸಯ್ತ್ ’ಮ್ಹಾಳೊ’ ಮ್ಹಳ್ಳಿ ಅಪುರ್ಭಾಯೆಚಿ ಕವಿತಾ ಬರಯಿಲ್ಲಿ, ತಾಂತುಂ ಪುಂಜಾವ್ನ್ ದವರ್ಲೆಲ್ಯೊ ಸೊಭಿತ್ ಯಾದಿ ಆಸ್ಲಲ್ಯೊ. ಹಾಂಗಾಶರ್ ಬಾಯ್ ಸಲೋಮಿಚ್ಯಾ ಕವಿತೆಂತ್ ಸಯ್ತ್ ಮ್ಹಾಳೊ ಆಸಾ ಪುಣ್ ಏಕ್ ನಿಸಣ್ ಆಸಾ. ಹ್ಯಾ ನಿಸ್ಣೆಂತ್ ಚಡುನ್ ಭಾತೆಣಾಭಿತರ್ ಲಿಪವ್ನ್ ಕೆಳ್ಯಾಸಾಲ್ ಅಪ್ಲ್ಯಾ ಗೊರ್ವಾಂಕ್ ಖಾವಂವ್ಚ್ಯಾ ಆಬಾಚಿ ದಯಳಾಯ್ ಖರೆಂಚ್ ಜಾವ್ನ್ ವಾಚ್ಪ್ಯಾಚ್ಯಾ ಕಾಳ್ಜಾಕ್ ಆಪಡ್ತಾ. ಭೋವ್ ಸೊಂಪಿ ದಿಸ್ಚಿ ಹಿ ಕವಿತಾ ಕಾಂಯ್ ಥೊಡ್ಯೊಶ್ಯೊ ಕಾಣಿಯೊ ಸಾಂಗುನ್ ವೆತಾತ್ ಆನಿ ಕವಿತೆಚ್ಯಾ ಸೊಭಾಯೆಕ್ ಆಟ್ ಸುರಾಂನಿ ವರ್ಣಿತಾ. ಬಾಕಿಚೆಂ ಪಾರ್ಕುಂಕ್ ತುಕಾಚ್ ಸೊಡ್ತಾಂ.

[ಕವಿತಾ] ಆಬ್ ಆನಿ ನಿಸಣ್ (- ಸಲೊಮಿ ಮಿಯಾಪದವ್, ಮೊಗರ್ನಾಡ್)

ಆಬ್ ಆನಿ ನಿಸಣ್

ಆಬಾಕ್ ಬಾರಾ ಗೊರ್ವಾಂ

ಗೊರ್ವಾಂಕ್ ಏಕ್ ಗೊಟೊ

ಗೊಟ್ಯಾಕ್ ಏಕ್ ಮ್ಹಾಳೊ

ಮ್ಹಾಳ್ಯಾಕ್ ಏಕ್ ನಿಸಣ್!

ಗೊರ್ವಾಂಕ್ ಭಾತೆಣ್ ಘಾಲ್ಚ್ಯಾಕ್ ತೊ

ಘಡ್ಯೆನ್ ಘಡಿಯೆ

ಮ್ಹಾಳ್ಯಾಕ್ ಚಡ್ತಾಲೊ

ನಾತ್ರಾಂಕ್ ಆಯ್ಲೊ ದುಬಾವ್

ದೆಕುನ್ ಕೆಲೊ ಪಾಟ್ಲಾವ್

ದಯಾಳ್ ಆಬ್

ಭಾತೆಣಾ ಸಂಗಿಂ

ಕೆಳ್ಯಾಂಚಿ ಸಾಲ್‌ಯೀ

ಗೊರ್ವಾಂಕ್ ಖಾವಯ್ತಾಲೊ!

- ಸಲೊಮಿ ಮಿಯಾಪದವ್, ಮೊಗರ್ನಾಡ್. [ಫೆಬ್ರೆರ್, 2025]

ಸಲೊಮಿ ಮಿಯಾಪದವ್, ಮೊಗರ್ನಾಡ್: ಕೊಂಕಣಿ, ಕಾನಡಿ ಭಾಸೆಂನಿ ಕವಿತಾ, ಚುಟುಕಾಂ, ಪಿಂತುರಾಂ ತಶೆಂಚ್ ಹೆರ್ ರಿತಿಚಿಂ ಬರ್ಪಾಂ ಬರಯ್ತಾ. ತಿನ್ಶಾಂವಯ್ರ್ ಕವಿತಾ ಬರಯ್ಲ್ಯಾಂತ್, ಕವಿಗೋಶ್ಟಿಂನಿ ತ್ಯೊ ಸಾದರ್ ಕೆಲ್ಯಾತ್. ಹಿಚ್ಯಾ ’ಆಟ್ವೊ ಸುರ್’ ಕವಿತಾ ಸಂಗ್ರಹಾಕ್ ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚೊ ಪುರಸ್ಕಾರ್ ಲಾಭ್ಲಾ. ಹಿಣೆಂ ಕವಿಗೋಶ್ಟಿಚೆಂ ಅಧ್ಯಕ್ಷ್‌ಪಣ್ ಚಲಯ್ಲಾಂ.