Ab anim nisonn (- Salomi Miyapadav, Mogarnad)

[kovita] Ab anim nisonn (-  Salomi Miyapadav, Mogarnad)

Vellakalla tekid monxajivit bodolta, monxan kaim tempathaun pallun ayil'leo riti rivaji, korneo bodoltat. Somajent kovi matr ek osolem somyb, jem vellakallak sori zaun opli likhnni ukolta ani sor bodlaunnent monxan apnnayil'lea toxench hogddayil'lea monxamolank ukoln dhorta. Hea vellak opurbhayen protinidhitv korcheo kovita Bab Andrew L Dcunha-n boroileat. Tacheach kovitechea probhavant asyet punn ailevar oplea kovitechea denneavorvim okhkhea konkonni kovitaxetant porzollta Bai Salomi Miyapadav (Mogarnadd). Ticheo kovita mottveo punn dirsall mirsangeporim tikxnn. Zoxem dirsall mirsang chableleank lamb kall poreant tondd hulop astaki, toxench hichi mottvi kovita soit vachpeachea kallza-monant jivi urta. Ek bori kovita mhonncheak hich govai.

Gõychi Bai Urjita Bhobhe-n soit ’Mhallo’ mholl'lli opurbhayechi kovita boroyil'li, tantum punzaun dourleleo sobhit yadi asloleo. Hangaxor bai solomichea kovitent soit mhallo asa punn ek nisonn asa. Hea nisnnent choddun bhatennabhitor lipoun kelleasal oplea gorvank khaumvchea abachi doillai khorench zaun vachpeachea kallzak apoddta. Bhovo sompi dischi hi kovita kaim thoddeoxeo kannio sangun vetat ani kovitechea sobhayek att suramni vornnita. Bakichem parkunk tukach soddtam.

[kovita] Ab anim nisonn (-  Salomi Miyapadav, Mogarnad)

Ab anim nisonn

abak bara gorvam

gorvank ek gotto

gotteak ek mhallo

mhalleak ek nisonn!

gorvank bhatenn ghalcheak to

ghoddyen ghoddie

mhalleak choddtalo

natrank ailo dubavo

dekun kelo pattlavo

doyall ab

bhatenna songim

kelleanchi sal‌yi

gorvank khauytalo!

- Salomi Miyapadav, Mogarnad. [Feb, 2025]

Solomi Miyapadav, Mogarnad: Konkonni, Kanoddi bhasemni kovita, chuttukam, pinturam toxench her ritichim borpam boroita. Tinxamvoir kovita boroileant, kovigoxttimni teo sador keleat. Hichea ’Attvo Sur’ kovita songrohak kornattok konkonni sahity okaddemicho puroskar labhla. Hinnem kovigoxttichem odhyokx‌ponn choloilam.