ಕೋಣ್ ಶ್ರೇಷ್ಟ್

ಸಂಸಾರಾಂತ್ ಅಶಾಂತಿ, ನಾ-ಸೊಸ್ಣಿಕಾಯ್ ಭರುನ್ ವೊಮ್ತೊತಾ ತರ್ ತಾಚೆಂ ಮುಳಾವೆಂ ಕಾರಣ್ ’ಕೊಣ್ ಶ್ರೇಷ್ಟ್’ ಮ್ಹಳ್ಳ್ಯಾ ಚಿಂತ್ಪಾಚೆರ್ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ. ಧರ್ಮ್ ಜಾಂವ್, ಸಂಸ್ಕೃತಿ ಜಾಂವ್, ಭಾಂದ್ ಜಾಂವ್, ದೇಸ್, ಜಾತ್, ಬೊಲಿ, ಲಿಪಿ ಹರ್ಯೆಕಾಂತ್ ’ಹಾಂವ್/ಆಮಿ ಶ್ರೇಷ್ಟ್’ ದೆಕುನ್ ಹೆರಾಂನಿ ಆಮ್ಚೆಂ ಆಯ್ಕಜಾಯ್, ಹೆರಾಂನಿ ಆಮ್ಚೊ ಪಾಟ್ಲಾವ್ ಕರುಂಕ್ ಜಾಯ್ ಮ್ಹಳ್ಳಿಂ ಚಿಂತ್ನಾಂಚ್ ಅಸಲ್ಯಾ ಅಶಾಂತೆಕ್ ಉಭ್ಜಯ್ತಾ.

ಹೆಚ್ಚ್ ಅಪುರ್ಭಾಯೆಚ್ಯಾ ಚಿಂತಪಾಕ್ ಘೆವ್ನ್ ಆಯ್ಲ್ಯಾ ಬಾಯ್ ವಸುಧಾ ಪ್ರಭು, ಜೆದ್ನಾಂ ಹ್ಯಾ ಸಮಾಜಿಕ್ ಅಶಾಂತೆಕ್ ಸೃಷ್ಟಿ ಕರ್ತೆಲ್ಯಾ ಮನ್ಶಾಚಿಂ ಎಕೇಕ್ ಅಂಗಾಂಗ ಎಕಾಮೆಕಾ ’ಹಾಂವ್‌ಚ್ಚ್ ಶ್ರ್‍ಏಷ್ಟ್’ ಮ್ಹಣುಂಕ್ ಧರ್ತಿತ್ ತರ್ ತೆದ್ನಾಂ ಉದೆಲ್ಲ್ಯಾ ಆಂತರಿಕ್ ಸಂಘರ್ಷಾಕ್ ಕಸಲೊ ಪರಿಯಾರ್ ಲಾಭತ್? ಹೆಂ ಏಕ್ ಚಿಂತಾಪ್ ಪುಣ್ ಹ್ಯಾ ಚಿಂತ್ಪಾಭಂವ್ತೊಣಿಂ ಆಟೊವ್ ಕರುಂಕ್ ಹಿ ಕವಿತಾ ಉಜ್ವಾಡ್ ಫಾಂಕಯ್ತಾ ಮ್ಹಳ್ಳೆಂ ತುಂಚ್ ಪಾರ್ಕುನ್ ಘೆ.

ಕೋಣ್ ಶ್ರೇಷ್ಟ್

ದೇಹಾಚೆ ಅಂಗಾಂಗ ಭಿತರಿ ಝಗಡೆ ಜಲ್ಲೆ

ಸಕಡಾನಿ ಸಾಂಗ ತಾಂಗೆಲೆ ಗುಣಗಾನ ಕೆಲ್ಲೆ

ದೊಳೊ ಮ್ಹಣಾಲೊ ಹಾಂವ ಸಕ್ಕಡ ಪಳಯ್ತಾಂ ಹಾಂವ್ ಶ್ರೇಷ್ಟ್

ನಾಕ ಮ್ಹಣ್ತಾ ಹಾಂವ್ ಸಕ್ಕಡ ಆಯ್ಕತಾ ಹಾಂವ್ ಶ್ರೇಷ್ಟ್

ಕಾನ ಮ್ಹಣ್ತ ಹಾಂವ್ ಸಕ್ಕಡ ಆಯ್ಕತಾಂ ಹಾಂವ್ ಶ್ರೇಷ್ಟ್

ಜೇಬ ಮ್ಹಣ್ತಾ ಹಾಂವ್ ಮಸ್ತ ಉಲ್ಲಯ್ತಾಂ ಹಾಂವ್ ಶ್ರೇಷ್ಟ್

ಹಾತು ಮ್ಹಣ್ತಾ ಹಾಂವ ತುಮ್ಕಾಂ ಸಕಡಾಂಕಯೀ ಭಂವ್ಡಾಯ್ತಾಂ ಹಾಂವ ಶ್ರೇಷ್ಟ್

ಹರ್ದೇನ ಹೆಂ ಸಕ್ಕಡ ಆಯ್ಕಲೇ, ಹಾಂಕಾ ಬುದ್ದಿ ಶಿಕೋಚೆ ಮ್ಹಣ್ ಠರಯ್ಲೆಂ

ಹರ್ದೆಂ ಮ್ಹಣಾಲೆಂ; ಪಡ್ತಾಕೀ ನುತ್ತ ಕಿ, ಮೆಗೆಲೆ ಲಬ್‌ಡಬ್ ಬಂದ್ ಕೊರು ಅತ್ತ

ಆಯ್ಕೊನ್ ಸಕ್ಕಡ್ ಭೀವ್ನ್ ಗೆಲ್ಲೆ, ತಾಂಗ ತಾಂಗೆಲೆ ಜಾಗೇರಿ ನುತ ಪಳ್ಳೆ.

- ವಸುಧಾ ಪ್ರಭು [ಮಾರ್ಚ್ 2017]

ವಸುಧಾ ಪ್ರಭು: ವೃತ್ತೆನ್ ಬ್ಯುಟಿಶಿಯನ್ ಜಾವ್ನಾಸ್ಚಿ ಹಿ ಏಕ್ ಅಭಿನೇತ್ರಿ, ಸಭಾರ್ ಕೊಂಕ್ಣಿ ನಾಟಕಾಂನಿ ಹಿಣೆಂ ಪಾತ್ರ್ ಘೆತ್ಲಾ, ಆಯ್ಲೆವಾರ್‌ಲೆಂ ಕೊಂಕ್ಣಿ ಫಿಲ್ಮ್ ’ಆ-ವೈ-ಜಾ-ಸ’ ಪಿಂತುರಾಂತ್ ಹಿಣೆಂ ಮಹತ್ವಾಚೊ ಪಾತ್ರ್ ಘೆತ್ಲಾ. ಕಾನಡಿ ಭಾಸೆಂನಿ ಕಾಂಯ್ ತಿನ್ಶಾಂ ವಯ್ರ್ ಕವಿತಾ/ಚುಟುಕಾಂ ಬರಯಿಲ್ಲ್ಯಾ ಹಿಣೆಂ ಕೊಂಕ್ಣೆಂತ್ ಸಯ್ತ್ ಪನ್ನಾಸಾಂ ವಯ್ರ್ ಕವಿತಾ ಬರಯ್ಲ್ಯಾಂತ್. ಕವಿಸಮ್ಮೇಳನಾಂನಿ ತಶೆಂಚ್ ಆಕಾಶ್‌ವಾಣಿಂತ್ ಹಿಚಿಂ ಕವಿತಾ ಪ್ರಚಾರ್ ಜಾಲ್ಯಾಂತ್.