[खबर] सिरिवंताच्या साहित्याचेर राश्ट्रीय मट्टाचें अध्ययन

आशावादी प्रकाशन आनी धेंपे कोलेज गोंय हाणीं मांडून हाडलेल्ली राश्ट्रीय मट्टाच्या वेबिनारांची कथापाठ चोवती शिंकळ जुलाय मयन्याच्या शनिवार सांजेर साडे च्यार थावन स वोरां पऱ्यांत चल्ली. कार्मेल कोलेज, श्री मल्लिकार्जून कोलेज, फा|आग्नेल कोलेज पिलार तशेंच सैंट रोसरी कोलेज हांच्या सहभागित्वांत जुलाय १ तारिकेर धेंपे कोलेजिच्या प्रिन्सिपालान डो|वृंदा बोर्करान उग्तावण केल्ल्या ह्या वेबिनारांत दायजिवरलड हफ्त्याळ्याच्या संपादक मानेसत हेमाचाऱ्य, जेरालड वी. कारलो हासन, काणीक नेमाळ्याचो आधलो संपादक जावनासल्या अवील रासकिन्हान, वीज ई-पत्राच्या संपादक डो|आसटीन प्रभून तशेंच सिरिवंताची धूव क्यारल वेगसान आनी सिरिवंताचो खास मित्र जावनासल्या मा|प्रताप नायक हाणीं सिरिवंताची सविसतार ओळोक करून दिली.

जुलाय ८ तारिकेर सिरिवंताच्या ५२ मोटव्या कथेंचेर तशेंच साळक प्रकाशनाच्या ८८ पुस्तकांची सविसतार ओळोक तशेंच सिरिवंताच्या मोटव्या कथेंचेर खोलायेन केल्लें केल्लें अध्ययन वल्ली क्वाड्रसान सादार केलें.

धेंपे कोलेजिच्या प्राध्यापक बाय विधिता शेटान सूत्र‌संचालन चलयिल्लें वेबिनार जुलाय १५ तारिकेर सिरिवंताच्या मोटव्या काणियांनी असतुरिचो पात्र विश्याचेर खोलायेन अध्ययन केल्लो प्रभंध फेल्सी लोबो देरेबैल हिणें सादर केलो.

धेंपे कोलेजिच्या प्राध्यापक बाय विधिता शेटान सूत्र‌संचालन चलयिल्लें वेबिनार जुलाय २२ तारिकेर सिरिवंताच्या ’जेरी लुवीस’ लिखणेनांवाखाल राकणो पत्रांत चलयिल्ल्या ’जिवितांतलो तमासो’ अंकणांतल्या हास्य बर्पांचेर प्रभंध फ्लाविया आल्बुकर्क हिणें सादर केलो.

जुलाय २९ तारिकेर धेंपे कोलेजिच्या प्रिन्सिपाल प्रो|वृंदा बोर्कराच्या अध्यक्ष‌पणाखाल चल‌ल्ल्या निमाण्या वेबिनारांत ’साळकाच्या सिरिवंताच्यो कथा’ नागरी लिपियेच्या ई-पुस्तकाचें विमोचन डो|चंद्रलेख डिसोज हिणें करून वेग-वेगळ्या लिपिंनी आसच्या अमोलीक कोंकणी साहित्याक लिपियंतर करून आशावादी प्रकाशनान कोंकणीक खूप योग‌दान दिलां, तशेंच कथापाठ म्हळ्ळ्या अध्ययन माध्यमांत कोंकणी साहित्याचें अध्ययन करुंक एक बरीच वेदी तयार केल्या म्हणाली. ’साळकाच्या सिरिवंताच्यो कथा’ कन्नड लिपियेच्या ई-पुसतकाचें विमोचन मा|बा|रिचार्ड रेगोन करून, अपणाक सिरिवंतासवें आसलेल्या भांदाविशीं उलवन, कोंकणी साहित्याक शैक्षणीक पांवडार वरून ताचो पोस कर्च्या आशावादी प्रकाशनाची थोकणाय केली.

डो|आसटीन प्रभून दे|फ्रेड्रीक क्वाड्रस स्मारक आशावादी प्रकाशनाच्या डिजिटल पुरस्कार २०२३ जिकप्यांचीं नांवां पर्गट केलीं; फेल्सी लोबो देरेबैल हिका पयलें इनाम तशेंच फ्लाविया आलबुकर्क हिका दुस्रें इनाम फावो जालें.

हेच संधर्भाचेर हेमाचाऱ्य आनी सहभागित्व जोडपी कोलेजिच्या मुखेसतांनी अपले संधेश दिले. मा|दो|विल्ली डिसिलवान सिरिवंताविशीं उलवन सभार गजाली (ज्यो चडतावांक येदोळ कळीत नात‌ल्ल्यो) वांटून घेतल्यो. धेंपे कोलेजिंत भारतीय भासो विभागाची मुखेसत बाय अंजू साखर‌दांडेन सयऱ्यांची ओळोक करून दिली. वल्ली क्वाड्रसान धिन्वास पाटयले. दीपा रायकर आनी गौरंग भांद्येन ह्या वेबिनाराचें सूत्र संचालन केलें.

सिरिवंताच्या साहित्याचेर अध्ययनाचें कथापाठ शिंकळिचें उग्तावण