आशावादी प्रकाशनाच्या पांचव्या डिजिटल आडियो बुकाचें मोकळीक काऱ्यें
’यदाहं जीवमी, अहमाशंसे (जीव आसतासर भर्वसतां)’ ध्येयाखाल २०००-१ इस्वेंत कुवेयटांत सुर्वातून, येदोळ पासून कोंकणी साहित्याचे वेवेगळे ४६ बूक प्रकाशीत केल्ल्या आशावादी प्रकाशनाचो पांचवो डिजिटल आडियो बूक ’कथामृत (क्लेरेन्स कैकंबच्यो डिजिटल काणियो)’ मोकळीक कार्यें, अगोसत १५ तारिकेर सांजेर ७ वोरांचेर ’पयलें अंतरराश्ट्रीय डिजिटल कोंकणी माध्यमाचेर चल्लें.
कार्याचे सूर्वातेर जेराल येवकार मागून वल्ली क्वाड्रसान अगोसत १० तारिकेर अछानक रितीन अंतरल्ल्या कोंकणी बरवपी, आमचो युवक पत्राचो आधलो संपादक रोबर्ट फूर्टाडो सासतानाच्या अत्म्याक शांती लाभुंक एका मिनुटाचें मवन प्रार्थन केलें. कोंकणी सर्दार मानेसत बसती वामन शेणय हाणीं उग्तावण उलवपांत ’डिजिटल आमचो फुडार देकून बदलून वेच्या काळाक सरी जावन आमी सयत बदलून, आतांच्या युवजणांलागीं कोंकणी साहित्याक वर्ची एक वाट आमी तयार करुंक जाय’ म्हण उलो दिलो.
म्यांचेसटर (यू.के.) थावन लारेन्स वी. बारबोजान डिजिटल बुकांची मटवी वळोक करून २००५ इस्वेंत आशावादी प्रकाशनान डिजिटल रुपार पर्गट केल्ल्या ’सागोराच्या वाटेच्यो झरी’; पयल्या ’ई-बुकाची’, तशेंच हेर च्यार डिजिटल बुकांची माहेत दिली. २०१८ इस्वेच्या नवेंबर १६ तारिकेर ’कथादायज’ नांवाच्या पयल्या डिजिटल आडियो बुकांत वल्ली क्वाड्रसाच्यो २३ मटव्यो काणियो, ’सूर्यो उदेता’ नांवाच्या दूसऱ्या डिजिटल आडियो बुकांत राश्ट्रीय मट्टाच्या २७ काणियेगारांच्यो मटव्यो काणियो, ’मायानगरी’ नांवाच्या तीसऱ्या डीजिटल आडियो बुकांत वल्ली क्वाड्रसाच्यो मुंबयच्यो काणियो, ’सूर्यो उदेला’ नांवाच्या चोवत्या डिजिटल आडियो बुकांत राश्ट्रीय मट्टाच्या २५ काणियेगारांच्यो मटव्यो काणियो आनी ’कथामृत’ नांवाच्या पांचव्या डिजिटल आडियो बुकांत क्लेरेन्स कैकंबच्यो २० मटव्यो काणियो आसात. ’कथाझर’ नांवाच्या सव्या डिजिटल आडियो बुकाक वेगिंच प्रसारीत कर्ची तयाराय चलून आसा म्हणालो.
प्रेम मोरासान प्रमूक उलवप्यांची; केरळ थावन गोकूलदास प्रभू, मंगळूर थावन दो|एडवर्ड एल. नज्रेत, उडपी थावन मा|चेतन कापुचीन, तशेंच गोंय थावन दो|प्रकाश पेर्यंकर (गोंय युनिवर्सिटिच्या कोंकणी विभागाचो मुखेसत) वळोक करून दिली. गोकूलदास प्रभून ’ई-बुकांनी सयत आसली वाचपाची बंदड डिजिटल आडियो बुकांनी ना, डिजिटल आडियो बूक आयकुंची एक सलीस कला आयकुवप्यांक काणी बरी करून समजुंक कुमोक कर्ता देकून काणी सादरकर्पिंनी सब्धांचो जोक्तो उच्छार कर्ची गर्ज आसा जाल्ल्यान त्या त्या प्रांत्याच्या काणियांक सादर करुंक त्या त्या बोलिंच्या सादर कर्पिंनी केल्यार बरें. कोंकणीक आतांच्या युवजणांलागीं वरुंक डिजिटल आडियो एक उत्तीम माध्यम’ म्हणालो. दो|एडवर्ड नज्रेतान कशें आयच्या काळार सर्व भासेंनी वाचप्यांचो संको उणो जावन आयला, आनी प्रिंट माध्यम असकत जावन वेच्या काळार डिजिटल माध्यम एक प्रमूक विकल्प जावन उभें जावन आसा. आनी डिजिटल माध्यमांनी आज कोंकणीक ’गलफाच्या जिविताच्यो काणियो’, ’मुंबय जिविताच्यो काणियो’ आयकुंक मेळतात जाल्ल्यान आमकां आमची समजुणी विसतार करुंक एक वाट उभी जाता’ म्हणालो. मा|चेतन लोबोन जेदनां डिजिटल माध्यमाचेर कोंकणी काणियो प्रसारीत जावंक लागल्यो तवळ थावन चडताव हर्येक काणी आयकून ताचें अस्वादन केल्या. आयच्या काळार दृश्य माध्यमाक चडीत खायस आसा, पूण काणी एक वेगळो प्रकार जाल्ल्यान डिजिटल आडियो बुकारुपार कोंकणी काणियो चडीत लोकांक कोंकणिलागीं हाडच्यांत मजतगार जातलो’ म्हणालो. दो|प्रकाश पेर्यंकरान ’कोंकणी वेवेगळ्या लिपिंनी वांटून गेलां जाल्ल्यान लिपिच्या बंदडेक लागून कोंकणिच्या सर्व लिपिंनी आसचें कोंकणी साहित्य आमकां वाचुंक तशेंच तांचेर अध्ययन करुंक आसच्यो वाटो उण्यो. पूण डिजिटल आडियो बूक ह्या दिशेन भोव महत्वाचें. डिजिटल आडियो बुकांत लिपिचो समस्सो ना देकून हेर लिपिंनी बरयिल्ल्यो उत्तीम काणियो आमकां आयकुंक, समजुंक सलीस जाल्ल्यान साहित्य शिकप्यांक राश्ट्रीय स्थराच्या कोंकणी साहित्याचो अभ्यास करुंक एक अपुर्भायेची संधी.’ म्हणालो
प्रेम मोरासान क्लेरेन्स कैकंबाची मटवी वळोक करून दितच, वल्ली क्वाड्रसान वीस काणियांक सादर केल्ल्या वीस सादरकर्पिंची वळोक करून दितच, मानेसतीण जेन ऐडा पिंटोन ’कथामृत’ डिजिटल आडियो बुकाक डिजिटल मोकळीक कर्तच, क्लेरेन्स कैकंबान अपलीं भगणां उचार्न, चाळीस वर्सां थावन काणियो बरवन आयल्यारी जावंक नातलो अनभोग आतां डीजिटल आडियो बुकांत प्रसारीत जाल्ल्या एका काणियेंत जाल्लो संतोस उचारून, ह्या डिजिटल बुकाक तयार करुंक मिनत केल्ल्या सर्वांचो उपकार बावुडलो.
अमेरिकाथावन दो|आसटीन डी’सोज प्रभून अपल्या उलवपांक ’पयलें अंतरराश्ट्रीय कोंकणी कार्यें चलंवची सूर्वात करून देशाच्या वेवेगळ्या देशांतल्या कोंकणी लोकांक सांगाता मेळुंक आवकास करून दिल्ल्या आशावादी प्रकाशनाचो उपकार बावुडलो’. कोन्सेपटा फेर्नांडीस आळवन ’डिजिटल बुकांक शिक्षण (Academic) संस्थ्यांनी गळसून हाचो बरो फायदो जोडचे गर्जेविशीं उलयली. केनडा थावन जेरी डी’मेल्लो बेंदूर हाणें ’डिजिटल माध्यमांत कोंकणी काणियां मुखांत्र आमी चडीत कोंकणी लोकांलागीं वचुंक एक बरी सूर्वात करून दिता’ म्हणालो.
हें कार्यें मांडून हाडल्ल्या वल्ली क्वाड्रसान उपकार आटवणी केली
