[Khobor] Konknni Sahiteachem Digitization

16 Zaner 2021: Vellakallak sori zaun aicho kall ddijittol kall zala dekun konknni sahiteak soit hea ddijittol kallak vorun vechi gorz asa dekun ami atanchem sahity ddijittolikoronn kel'leporinch pattlea tempachem konknnintlem vinchnnar sahity soit ddijittaiz korun konknnik lipi/bolicheo mero/goddi utrun zagotik sthorak paumvchi gorz somzun Ashawadi prokaxonan ’Wilfy Rebimbusacheo kotha’ ddijittaiz korchea misamvachi suro‍vat zaun asa kel'lem ’Ontor‌raxttrti-i vebinar’ zaner 16 tariker (sonvara) sanjer 4:30 thaun 6:30 poro‍eant choloilem.

Ontor-raxttri-i puroskrit karo‍yem niro‍vahok manest Ronaldd Olivera Padukonnechea sunkann‍ponnakhal suru zal'lea hea vebinarachea suro‍vater ’ddijittolikoronnachi gorz ani xevottavixim uloyit, 1991-2 isvent ojekar gamvant Wilfy-Meena Rebimbus hankam asa kel'lea poro‍gott sonmana vellar ’Wilfy Rebimbus ek konknnicho provadi’ mholl'llim Valley Quadrosachim utram porot yadik haddlim. Toxench Wilfy Rebimbusachea kothemni konknni somajek koxem probhavit kelam mholl'llevixim ul'lek kortoch, vol'li kvaddrosan yeukar uloupant gõy osmitayechea disachi poro‍bim pattoun, des-vides thaun hea vebinarak hazor zal'lea somestank yeukar magun, konknni somajecho xilpi - Rebimbus vilfichea namvar odhurim aslim bhandpam ubhim zalim, kosoll'llelim ghoram, fasall'llelim kuttmam ek zalim, Wilfy Rebimbus ek namv konknni lokanchea kallza-monant sthir zaun urlam tor tachem sademponn, khaltemponn tachi bhovo vhodd ast zaunasli mhonnun, konknnichea omolik sahiteak lipiyontor korun ddijittol madhyomam mukhantr poro‍gott korchem toxench addio bukamni soit tem favo korun somsar‌bhor ximpoddlelea konknni lokak favo zamvchedixen ddijittol (i) loibreri korchem Ashawadi prokaxonachem misamvachi mottvean ollok keli.

Karo‍eachem ugtaunn kel'lea manest Felix Lobo Qatar hannim oplea sondhexant Wilfy Rebimbusan oplea jinnyek konknni somajhek somorpun dil'lem ani atam tachea sahiteak ddijittolikoronn korchem kam' khorench zaun konknnichea fuddarak bhovo upkarak poddche tosolem mhonnalo. Wilfy Rebimbusaporinch heranchem omolik sahity soit ddijittaiz korche dixen Ashawadi prokaxon vaur korunk suchavo dilo.

Wilfy Rebimbusavixim toxench tachea kothemvixim ek vachpi zaun opnnacher kosolo probhavo ghal'lo mholl'llevixim uloyil'lea daijiworld.com prodhan sompadok manest Walter Nandaliken Wilfycheo kannio ddijittaiz kel'leporinch vilfichim podam ani her sahity soit ddijittaiz korunk ulo dilo.

Manest Eddie Sequeiran Wilfy Rebimbusachea ekeka kothencher toxench Wilfy Rebimbus koso eka podak/kantarak borounko thoddepauttim soglli rat khorchun bostalo mholl'llo vivor dilo. Wilfy Rebimbus oplea jivita audent tannem konnaiki dukoyil'lo nhoi bogor mog ani moipasachan jiel'lo monis ani konknni somajek sodanch mog dil'lo mohan vekti mhonnalo.

Manest Hemacharyan Wilfy Rebimbusan boroyil'lea ’pintram’ kothecho ul'lek korun, Wilfy Rebimbus ani tachea kuttmaxovem opnnak as‍l'lea bhandavixim uloilo.

Manest klerens koikombon oplea uloupant Wilfy Rebimbusachea kothemporim to vekti soit mohan xegunnancho mhonnalo.

Viz i-potracho sompadok Do|Austin Prabhun Wilfy Rebimbusachea sahiteak vinchun konknnichea omolik sahiteak ddizottaiz korchem misamv hatim ghetlolea Ashawadi Prakashanak borem magun Wilfy Rebimbus smarot poinnari-viz raxttri-i mott'ttacho donn lipintolo konknni sahitik spordho 2018 isvent suru zaun 2020 isvent tin lipimni ho spordho chol'lo ani 2021 isvent ho spordho ontor-raxttri-i mott'ttar cholomvchem ghoxonn korun konknni sahit rochpeank ek opurbhayechi aukas rochun dita mhonnalo.

Tye uprant manestinn Veena Rebimbus Paisan Wilfy Rebimbusachea ddijittolikoronnacho ek vantto; lipiyontor korun i-pustokarupar ddijittol porgottnnechem ghoxonn korun, Wilfy Rebimbusacheo kotha kon'nodd, nagori toxench romi lipimni i-bukarupar ddijittol madhyomant vachpeank favo zamvchea misamvachem ugtaunn korun hea vaurachi suro‍vat kel'lea Ashawadi Prakashanak borem maglem.

Manest Vishwas Rebimbusan tye uprant ddijittol addio bukachea ugtaunnechem ghoxonn korun ’pintram’ kothek vol'li kvaddrosathaun, ’muguti’ kothek kristtofor ninasom' thaun, toxench ’Fatimachem kazor’ kothek edd'ddi sikerithaun sador‌ponn zamvchevixim porgottnnim korun ople sondhex dile.

Mukhel soire zaun hazor aslea manest James Mendoncan oplea uloupant Wilfy Rebimbusasovem oplo bhand koslo aslo ani konknni somajek tannem dil'lea omolik denngecho uddas kaddun tachem sahity ddijittaiz korchem bhovo gorjechem mett kadd‌l'lea Ashawadi prokaxanak konknni somajen pattimbo diunko ulo dilo.

Mukhel soiro manest Joseph Mathiasan Wilfy Rebimbusachea ekeka podam/kantaramni koxench konknni somajek kotha sangun somajik sudhrapak prerit kelem, dixa dili mholl'llevixim uloun, konknnintlem omolik sahity ddijittaiz korchedixen hem mett bhollvont zamvdi ani tea pasot mhozo pattimbo kednam-i astolo mhonnalo.

Manest Venkatesh Balligan oplo sondhex divun Wilfy Rebimbusachea ’mog tuzo kitlo axelom’ kantaran koxem zat-mot lekinastam konknni lokanchea jiber az paxot tem kantar ani ekek sobdh porot uchchar korunk laita mhonnalo.

Tye uprant konknnintlem poilem ddijittol sahityik zornol ’poinnari’cho dusro onko ugtaunn koro‍yem chol'lem. Ashawadi prokaxonacho soho-sompadok Ma|Jason Pinton ’Poinnari’ sahityik zornolacher uloun. Konkonni somaz az sobhar ritichea vighnank bhogun asa ani hea sondhorbhar sorv konknni lokamni zat-lipi-bolicheo goddi utrun konknnicho fuddar motint dhorun tea dixen vaur korchi gorz somzun zoktim paulam kaddchea Ashawadi Prokaxonachea ’Yadaahaam Jeevami, Ahamashanse (jivo astaxor bhoro‍vostam)’ dhyeyacho ul'lek kelo.

Manest Melwyn Rodriguesan tye uprant tin lipiechea poinnari zornolak lokarponn korun ho poinnari, konknni lokanchea kallzamni konknni bhasechi grest-kai pacharunk sokundi mhonnun ’konkonn somajecho chomotkarik otmo Wilfy Rebimbusachea sahiteak ddijittaiz korunk mukar sor‌l'lea Ashawadi Prokaxonachea kamak zait maglem’

tye uprant bai Do|Jayanti Naik hichea ’Tichi Kanni’ mholl'llem pustokachem lokarponn karyem chol'lem. Do|Purnanand Charichea sunkann‍ponnakhal chol‌l'lea hea kareant Manest Shailendra Mehtan Jayanti Bayechi sovistar ollok kortoch Manest Vasant B Sawantan Jayanti Naikachea kothencher kholayen uloup kelem. Gokuldas Prabhun pustokak lokarponn korun oplo sondhex dilo. Do|Jayanti Naikan oplea uloupant somestank dhinvas pattoun ’zagotik konknni man monxam somor, Wilfy Rebimbusachea ddijittol sahitik vaurachea hea suvallear opnnachem pustok lokarponn zamvchem opnnak bhovo gourovachem mhonnali.

Konkonni sordar manest Basti Vaman Shennoy, Ma|Ba|Roysen Fernandes, Manest HM, Manest Wilson Kin'nigolli, Manest Dinesh Correa, Manestinn Monica DSa, Manestinn Concepta Fernandes Alva, Manest R.S.Bhaskar, Manest Gopinath ani des-vides thaun sobhar konknni mukheli hazor asun ople sondhex dile.

Valley Quadrosan dhinvas pattoile.