१६ जानेर २०२१: वेळाकाळाक सरी जावन आयचो काळ डिजिटल काळ जाला देकून कोंकणी साहित्याक सयत ह्या डिजिटल काळाक वरून वेची गर्ज आसा देकून आमी आतांचें साहित्य डिजिटलीकरण केल्लेपरिंच पाटल्या तेंपाचें कोंकणिंतलें विंचणार साहित्य सयत डिजिटायज करून कोंकणीक लिपी/बोलिच्यो मेरो/गडी उत्रून जागतीक स्थराक पावंवची गर्ज समजून आशावादी प्रकाशनान ’विलफी रेबिंबसाच्यो कथा’ डिजिटायज कर्च्या मिसांवाची सूर्वात जावन आसा केल्लें ’अंतरराश्ट्र्तीय वेबिनार’ जानेर १६ तारिकेर (सन्वारा) सांजेर ४:३० थावन ६:३० पर्यांत चलयलें.
अंतर-राश्ट्रीय पुरसकृत कार्यें नीर्वाहक मानेसत रोनालड ओलिवेरा पडुकोणेच्या सुंकाणपणाखाल सुरू जाल्ल्या ह्या वेबिनाराच्या सूर्वातेर ’डीजिटलीकरणाची गर्ज आनी शेवोटाविशीं उलयीत, १९९१-२ इस्वेंत अजेकार गांवांत विलफी-मीना रेबिंबस हांकां आसा केल्ल्या पर्गट सन्माना वेळार ’विलफी रेबिंबस एक कोंकणिचो प्रवादी’ म्हळ्ळीं वल्ली क्वाड्रसाचीं उत्रां परत यादीक हाडलीं. तशेंच विलफी रेबिंबसाच्या कथेंनी कोंकणी समाजेक कशें प्रभावीत केलां म्हळ्ळेविशीं उल्लेक कर्तच, वल्ली क्वाड्रसान येवकार उलवपांत गोंय अस्मितायेच्या दिसाची पर्बीं पाटवन, देस-विदेस थावन ह्या वेबिनाराक हाजर जाल्ल्या समेसतांक येवकार मागून, कोंकणी समाजेचो शिल्पी - रेबिंबस विलफिच्या नांवार अधुरीं आसलीं भांदपां उभीं जालीं, कोसळ्ळेलीं घरां, फासाळ्ळेलीं कुटमां एक जालीं, विलफी रेबिंबस एक नांव कोंकणी लोकांच्या काळजा-मनांत स्थीर जावन उरलां तर ताचें सादेंपण, खाल्तेंपण ताची भोव व्हड आसत जावनासली म्हणून, कोंकणिच्या अमोलीक साहित्याक लिपियंतर करून डिजिटल माध्यमां मुखांत्र पर्गट कर्चें तशेंच आडियो बुकांनी सयत तें फावो करून संसारभर शिंपडलेल्या कोंकणी लोकाक फावो जांवचेदिशेन डिजिटल (ई) लैबरेरी कर्चें आशावादी प्रकाशनाचें मिसांवाची मटव्यान ओळोक केली.
कार्याचें उग्तावण केल्ल्या मानेसत फेलिक्स लोबो खतार हाणीं अपल्या संधेशांत विलफी रेबिंबसान अपल्या जिण्येक कोंकणी समाझेक समर्पून दिल्लें आनी आतां ताच्या साहित्याक डिजिटलीकरण कर्चें काम खरेंच जावन कोंकणिच्या फुडाराक भोव उपकाराक पडचे तसलें म्हणालो. विलफी रेबिंबसापरिंच हेरांचें अमोलीक साहित्य सयत डिजिटायज कर्चे दिशेन आशावादी प्रकाशन वावर करुंक सुचाव दिलो.
विलफी रेबिंबसाविशीं तशेंच ताच्या कथेंविशीं एक वाचपी जावन अपणाचेर कसलो प्रभाव घाल्लो म्हळ्ळेविशीं उलयिल्ल्या दायजिवरलड.कोमचो प्रधान संपादक मानेसत वाल्टर नंदळिकेन विलफिच्यो काणियो डिजिटायज केल्लेपरिंच विलफिचीं पदां आनी हेर साहित्य सयत डिजिटायज करुंक उलो दिलो.
मानेसत एड्डी सिकेरान विलफी रेबिंबसाच्या एकेका कथेंचेर तशेंच विलफी रेबिंबस कसो एका पदाक/कांताराक बरवंक थोडेपावटीं सगळी रात खर्चून बसतालो म्हळ्ळो विवर दिलो. विलफी रेबिंबस अपल्या जिविता आवदेंत ताणें कोणायकी दुकयिल्लो न्हय बगर मोग आनी मयपासाचान जियेल्लो मनीस आनी कोंकणी समाजेक सदांच मोग दिल्लो महान वेक्ती म्हणालो.
मानेसत हेमाचाऱ्यन विलफी रेबिंबसान बरयिल्ल्या ’पिंत्रां’ कथेचो उल्लेक करून, विलफी रेबिंबस आनी ताच्या कुटमाशवें अपणाक आसल्ल्या भांदाविशीं उलयलो.
मानेसत क्लेरेन्स कैकंबन अपल्या उलवपांत विलफी रेबिंबसाच्या कथेंपरीं तो वेक्ती सयत महान शेगुणांचो म्हणालो.
वीज ई-पत्राचो संपादक दो|आसटीन प्रभून विलफी रेबिंबसाच्या साहित्याक विंचून कोंकणिच्या अमोलीक साहित्याक डिजटायज कर्चें मिसांव हातीं घेतलल्या आशावादी प्रकाशनाक बरें मागून विलफी रेबिंबस स्मारत पयणारी-वीज राश्ट्रीय मट्टाचो दोण लिपिंतलो कोंकणी साहितीक स्पर्धो २०१८ इस्वेंत सुरू जावन २०२० इस्वेंत तीन लिपिंनी हो स्पर्धो चल्लो आनी २०२१ इस्वेंत हो स्पर्धो अंतर-राश्ट्रीय मट्टार चलंवचें घोशण करून कोंकणी साहीत रचप्यांक एक अपुर्भायेची आवकास रचून दिता म्हणालो.
त्ये उपरांत मानेसतीण वीणा रेबिंबस पायसान विलफी रेबिंबसाच्या डिजिटलीकरणाचो एक वांटो; लिपियंतर करून ई-पुसतकारुपार डिजिटल पर्गटणेचें घोशण करून, विलफी रेबिंबसाच्यो कथा कन्नड, नागरी तशेंच रोमी लिपिंनी ई-बुकारुपार डिजिटल माध्यमांत वाचप्यांक फावो जांवच्या मिसांवाचें उग्तावण करून ह्या वावराची सूर्वात केल्ल्या आशावादी प्रकाशनाक बरें मागलें.
मानेसत विश्वास रेबिंबसान त्ये उपरांत डिजिटल आडियो बुकाच्या उग्तावणेचें घोशण करून ’पिंत्रां’ कथेक वल्ली क्वाड्रसाथावन, ’मूगुती’ कथेक क्रिसटोफर नीनासम थावन, तशेंच ’फातिमाचें काजर’ कथेक एड्डी सिकेरिथावन सादरपण जांवचेविशीं पर्गटणीं करून अपले संधेश दिले.
मुखेल सयरे जावन हाजर आसल्या मानेसत जेम्स मेंडोन्सान अपल्या उलवपांत विलफी रेबिंबसासवें अपलो भांद कसलो आसलो आनी कोंकणी समाजेक ताणें दिल्ल्या अमोलीक देणगेचो उडास काडून ताचें साहित्य डिजिटायज कर्चें भोव गर्जेचें मेट काडल्ल्या आशावादी प्रकाशानाक कोंकणी समाजेन पाटिंबो दीवंक उलो दिलो.
मुखेल सयरो मानेसत जोसेफ मथायसान विलफी रेबिंबसाच्या एकेका पदां/कांतारांनी कशेंच कोंकणी समाजेक कथा सांगून समाजीक सुध्रापाक प्रेरीत केलें, दिशा दिली म्हळ्ळेविशीं उलवन, कोंकणिंतलें अमोलीक साहित्य डिजिटायज कर्चेदिशेन हें मेट भळवंत जांवदी आनी त्या पासत म्हजो पाटिंबो केदनांय आसतलो म्हणालो.
मानेसत वेंकटेश बाळिगान अपलो संधेश दिवून विलफी रेबिंबसाच्या ’मोग तुजो कितलो आशेलों’ कांतारान कशें जात-मत लेकिनासतां कोंकणी लोकांच्या जिबेर आज पाशत तें कांतार आनी एकेक सब्ध परत उच्चार करुंक लायता म्हणालो.
त्ये उपरांत कोंकणिंतलें पयलें डिजिटल साहित्यीक जर्नल ’पयणारी’चो दुस्रो अंको उग्तावण कर्यें चल्लें. आशावादी प्रकाशनाचो सह-संपादक मा|जेसन पिंटोन ’पयणारी’ साहित्यीक जर्नलाचेर उलवन. कोंकणी समाज आज सभार रितिच्या विघ्नांक भगून आसा आनी ह्या संधर्भार सर्व कोंकणी लोकांनी जात-लिपी-बोलिच्यो गडी उत्रून कोंकणिचो फुडार मतिंत धरून त्या दिशेन वावर कर्ची गर्ज समजून जोक्तीं पावलां काडच्या आशावादी प्रकाशनाच्या ’यदहां जीवमी, अहमाशांसे (जीव आसताशर भर्वसतां)’ ध्येयाचो उल्लेक केलो.
मानेसत मेलवीन रोड्रिगसान त्ये उपरांत पयणारी जर्नलाक लोकार्पण करून हो पयणारी, कोंकणी लोकांच्या काळजांनी कोंकणी भासेची ग्रेसत-काय पाचारुंक सकुंदी म्हणून ’कोंकण समाजेचो चमत्कारीक अत्मो विलफी रेबिंबसाच्या साहित्याक डिजिटायज करुंक मुकार सरल्ल्या आशावादी प्रकाशनाच्या कामाक जायत मागलें’
त्ये उपरांत बाय दो|जयंती नायक हिच्या ’तिची काणी’ म्हळ्ळें पुसतकाचें लोकार्पण काऱ्यें चल्लें. दो|पूर्णानंद चारिच्या सुंकाणपणाखाल चलल्ल्या ह्या काऱ्यांत मानेसत शैलेंद्र मेहतान जयंती बायेची सविसतार ओळोक कर्तच मानेसत वसंत सावंतान जयंती नायकाच्या कथेंचेर खोलायेन उलवप केलें. गोकूळदास प्रभून पुसतकाक लोकार्पण करून अपलो संधेश दिलो. दो|जयंती नायकान अपल्या उलवपांत समेसतांक धिन्वास पाटवन ’जागतीक कोंकणी मान मनशां समोर, विलफी रेबिंबसाच्या डिजिटल साहितीक वावराच्या ह्या सुवाळ्यार अपणाचें पुसतक लोकार्पण जांवचें अपणाक भोव गवरवाचें म्हणाली.
कोंकणी सर्दार मानेसत बसती वामन शेणय, मा|बा|रोयसन फेर्नांडीस, मानेसत एच्चेम, मानेसत विल्सन किन्निगोळी, मानेसत दिनेश कोरेया, मानेसतीण कन्सेपटा फेर्नांडीस आळव, मानेसत आर.एस.भासकर मानेसत गोपिनाथ आनी देस-विदेस थावन सभार कोंकणी मुखेली हाजर आसून अपले संधेश दिले.
वल्ली क्वाड्रसान धिन्वास पाटयले.
