Mongllur (March 20): Ashawadi Prokaxonachim chear Konkonni pustokam toxench Konkonn‌gar Prokaxonachem ek pustok; oxem tin dijital i-pustokam ani don printt zal'lea pustokanchem ugtaunn karyem march 20 tariker Mongllurantlea Vishw Konkonni Kendrant chol‌l'lea Somaroh kareant Konkonnint gean‌pitth puroskar jikpi Bab Damodor Mauzo hannim kelim. Valley Quadrosan sompadon kel'lim him pustokam zaunasat;

Podd‌sad (Nagori lipiechem pustok: Ashawadi Prokaxonachem 50vem pustok) - Valley Quadrosachea sompadokiyanchem tisrem pustok

Novi Dixa (Romi lipiechem pustok: Konkonn‌gar Prokaxonachem pustok) - Monika Dsa Mothaisachea kannianchem pustok.

Monachem Natem (kovita zomo: bai filomena samfransisko mumboi), Ontor‌nad (Kovita zomo: Bai Urjita Bhobe Gõy), Mon‌sfott (kovita zomo: bai sialini fernanddis Gõy)

2000-1 isvent Ashawadi Prokaxonachi survat Kuwaitant zaun sobhar her sahitinchim pustokam prokaxit keleant. ’Podd‌sad’ pon'nasavem pustok. ’hi podd‌sad okhkhea Konkonni bhomvarak pavundi ani Konkonni lokanchea kallzam-monank zagounko sokundi’ - oxem pustokachem ugtaunn kel'lea Bab Damodor Mauzon ucharlem.

Pustok/boroinnaranchi ollok:

Filomena Samfransisco: Pattlea tis-challis vorsam thaun kotha, kovita ani lekonam boroun nagori, romi lipintolea potramni porgottun aileant. Al India Radio toxench Okhil Bharoti-i Konkonni Porixodemni kovita vachleant. ’Mhozo Dixttavo (2004)’, ’Vompta Tem Pikta (2008)’, ’Ttun‌ttunicheo Kannio (2011)’, ’Humbreavoili Ponnotti (2011)’, ’Gul‌mohor (2014)’ him yedoll prokaxit zal'lim hichim pustokam. ’Monachem Natem’ hichem poilem digital pustok zaunasun, proson'n nidd'ddoddi mirarodd mumboi hannem prostaun boroilam.

Urjita Bhobe: Pattlea kaim att vorsamni Konkonnint kovita boroun ayil'lea hicheo kovita Konkonni potramni toxench zallizageamni porgott zaleat. Poinnari-viz raxttri-i mott'ttachea sahitik sortent hichea kovitenk toxench kothenk inamam mell'lleant. Poinnari.com' hannim manddun hadd‌l'lea ’Moineacho Kovi’ inam' soit hinnem zoddlam. ’UrzaSrot (2017)’ hichem yedoll porgott zal'lem kovitechem pustok. ’Ontor‌nad (Kannada lipient) 2021 isvent porgottun ayil'lem poilem ddijittol pustok. Ontor‌nad (nagori lipient) asun Valley Quadrosan hea pustokachem prostaun boroilam.

Cialini Fernanddis: Gõychea Carmel Collejint soho-pradheapoki zaun kam' korun aschi bai Cialini ekh gaupinn, karyem choloupi toxench kovi. Hicheo kovita Konkonni potramni toxench zallizageamni porgott zaleant. ’Monosfott’ hichem poilem ddijittol pustok zaunasun bai razoxri soil hinnem hea pustokachem prostaun boroilam.

Novi Dixa: Romi lipiechem hem pustok hea adim Kannada lipient porgottun ailam ani hea pustokak 2021 isvent ’Karnataka Konkonni Sahity Okaddemichem ut'tim' pustok puroskar labhla’, nagori lipient hench pustok digital rupar 2021 isvent porgott zalam. Valley Quadrosan hea pustokak romi lipient lipiyontor korun, sompadok‌ponn choloun hea pustokachem prostaun boroilam. Pustokachem mol ru.150

Podd‌sad: Daaiz.Com (2003-2011), Poinnari.Com (2015 thaun), toxench Ashawadi Prokoxon (2000 thaun) sompadok zaun vaur korcho Valley Quadros Mumbomyt vosti korun asleporinch Gõy, Kornattokant konkonni kareamni meter zata. nagori lipient porgott zal'lem Valley Quadrosachem poilem sompadoki-i pustok. ’Mollbauylim Sopnnam (2005)’, ’Mukhamukhi (2017)’ hea adlim sompadoki-i pustokam. Hea pustokachem prostaun boroilam Gomontok mediacho director namnecho sahiti potr‌kar Bab Raju Naik, toxench sompadok Bab Shailendra Mehta ani Okhil Bharoti-i Konkonni Porixodechi Odhyokx Bai Usha Ranne hannim. Pustokachem mol ru.150

- Amcho Bhatmi