[खबर] पांच कोंकणी पुसतकांचें उग्तावण
मंगळूर (मार्च २०): आशावादी प्रकाशनाचीं च्यार कोंकणी पुसतकां तशेंच कोंकणगार प्रकाशनाचें एक पुसतक; अशें तीन डिजिटल ई-पुसतकां आनी दोन प्रिंट जाल्ल्या पुसतकांचें उग्तावण काऱ्यें मार्च २० तारिकेर मंगळुरांतल्या विश्व कोंकणी केंद्रांत चलल्ल्या समारोह काऱ्यांत कोंकणिंत ग्यानपीठ पुरसकार जिकपी बाब दामोदर मावजो हाणीं केलीं. वल्ली क्वाड्रसान संपादन केल्लीं हीं पुसतकां जावनासात;
पडसाद (नागरी लिपियेचें पुसतक: आशावादी प्रकाशनाचें ५०वें पुसतक) - वल्ली क्वाड्रसाच्या संपादकीयांचें तिस्रें पुसतक
नवी दिशा (रोमी लिपियेचें पुसतक: कोंकणगार प्रकाशनाचें पुसतक) - मोनिका डे’सा मथायसाच्या काणियांचें पुसतक.
अंतरनाद (कविता जमो: बाय उर्जिता भोबे गोंय), मनाचें नातें (कविता जमो: बाय फिलोमेना सांफ्रान्सिसको मुंबय), मनस्फोट (कविता जमो: बाय सियालिनी फेर्नांडीस गोंय)
२०००-१ इस्वेंत आशावादी प्रकाशनाची सुर्वात कुवेयटांत जावन सभार हेर साहितिंचीं पुसतकां प्रकाशीत केल्यांत. ’पडसाद’ पन्नासावें पुसतक. ’ही पडसाद अख्ख्या कोंकणी भंवाराक पावुंदी आनी कोंकणी लोकांच्या काळजां-मनांक जागवंक सकुंदी’ - अशें पुसतकाचें उग्तावण केल्ल्या बाब दामोदर मावजोन उचारलें.
पुसतक/बरयणारांची ओळोक:
फिलोमेना सांफ्रान्सिसको: पाटल्या तीस-चाळीस वर्सां थावन कथा, कविता आनी लेकनां बरवन नागरी, रोमी लिपिंतल्या पत्रांनी पर्गटून आयल्यांत. आल इंडिया रेडियो तशेंच अखील भारतीय कोंकणी परिषदेंनी कविता वाचल्यांत. ’म्हजो दिश्टावो (२००४)’, ’वोंप्ता तें पिक्ता (२००८)’, ’टूनटुनिच्यो काणियो (२०११)’, ’हुंबऱ्यावयली पणटी (२०११)’, ’गूलमोहर (२०१४)’ हीं येदोळ प्रकाशीत जाल्लीं हिचीं पुसतकां. ’मनाचें नातें’ हिचें पयलें डिजिटल पुसतक जावनासून, प्रसन्न निड्डोडी मिरारोड मुंबय हाणें प्रसतावन बरयलां.
उर्जिता भोबे: पाटल्या कांय आट वर्सांनी कोंकणिंत कविता बरवन आयिल्ल्या हिच्यो कविता कोंकणी पत्रांनी तशेंच जाळिजाग्यांनी पर्गट जाल्यात. पयणारी-वीज राश्ट्रीय मट्टाच्या साहितीक सर्तेंत हिच्या कवितेंक तशेंच कथेंक इनामां मेळ्ळ्यांत. पयणारी.कोम हाणीं मांडून हाडल्ल्या ’मयन्याचो कवी’ इनाम सयत हिणें जोडलां. ’उर्जा स्रोत (२०१७)’ हिचें येदोळ पर्गट जाल्लें कवितेचें पुसतक. ’अंतरनाद (कन्नड लिपियेंत) २०२१ इस्वेंत पर्गटून आयिल्लें पयलें डिजिटल पुसतक. अंतरनाद (नागरी लिपियेंत) आसून वल्ली क्वाड्रसान ह्या पुसतकाचें प्रसतावन बरयलां.
सियालिनी फेर्नांडीस: गोंयच्या कार्मेल कोलेजिंत सह-प्राध्यापकी जावन काम करून आसची बाय सियालिनी एख गावपीण, काऱ्यें चलवपी तशेंच कवी. हिच्यो कविता कोंकणी पत्रांनी तशेंच जाळिजाग्यांनी पर्गट जाल्यांत. ’मनस्फोट’ हिचें पयलें डिजिटल पुसतक जावनासून बाय राजश्री सयल हिणें ह्या पुसतकाचें प्रसतावन बरयलां.
नवी दिशा: रोमी लिपियेचें हें पुसतक ह्या आदीं कन्नड लिपियेंत पर्गटून आयलां आनी ह्या पुसतकाक २०२१ इस्वेंत ’कर्नाटक कोंकणी साहित्य अकाडेमिचें उत्तीम पुसतक पुरसकार लाभला’, नागरी लिपियेंत हेंच पुसतक डिजिटल रुपार २०२१ इस्वेंत पर्गट जालां. वल्ली क्वाड्रसान ह्या पुसतकाक रोमी लिपियेंत लिपियंतर करून, संपादकपण चलवन ह्या पुसतकाचें प्रसतावन बरयलां. पुसतकाचें मोल रू.१५०
पडसाद: दायज.कोम (२००३-२०११), पयणारी.कोम (२०१५ थावन), तशेंच आशावादी प्रकाशन (२००० थावन) संपादक जावन वावर कर्चो वल्ली क्वाड्रस मुंबंयत वसती करून आसलेपरिंच गोंय, कर्नाटकांत कोंकणी काऱ्यांनी मेतेर जाता. नागरी लिपियेंत पर्गट जाल्लें वल्ली क्वाड्रसाचें पयलें संपादकीय पुसतक. ’मोळबावयलीं सपणां (२००५)’, ’मुखा मुखी (२०१७)’ ह्या आदलीं संपादकीय पुसतकां. ह्या पुसतकाचें प्रसतावन बरयलां गोमंतक मीडियाचो दिरेक्तोर नाम्नेचो साहिती पत्रकार बाब राजू नायक, तशेंच संपादक बाब शैलेंद्र मेहता आनी अखील भारतीय कोंकणी परिषदेची अध्यक्ष बाय उशा राणे हाणीं. पुसतकाचें मोल रू.१५०
[Khobor] Panch Konkonni Pustokanchem Ugtaunn
