[ಖಬರ್] ಪಾಂಚ್ ಕೊಂಕಣಿ ಪುಸ್ತಕಾಂಚೆಂ ಉಗ್ತಾವಣ್
ಮಂಗ್ಳುರ್ (ಮಾರ್ಚ್ 20): ಆಶಾವಾದಿ ಪ್ರಕಾಶನಾಚಿಂ ಚ್ಯಾರ್ ಕೊಂಕಣಿ ಪುಸ್ತಕಾಂ ತಶೆಂಚ್ ಕೊಂಕಣ್ಗಾರ್ ಪ್ರಕಾಶನಾಚೆಂ ಏಕ್ ಪುಸ್ತಕ್; ಅಶೆಂ ತೀನ್ ಡಿಜಿಟಲ್ ಇ-ಪುಸ್ತಕಾಂ ಆನಿ ದೋನ್ ಪ್ರಿಂಟ್ ಜಾಲ್ಲ್ಯಾ ಪುಸ್ತಕಾಂಚೆಂ ಉಗ್ತಾವಣ್ ಕಾರ್ಯೆಂ ಮಾರ್ಚ್ 20 ತಾರಿಕೆರ್ ಮಂಗ್ಳುರಾಂತ್ಲ್ಯಾ ವಿಶ್ವ ಕೊಂಕಣಿ ಕೇಂದ್ರಾಂತ್ ಚಲ್ಲ್ಲ್ಯಾ ಸಮಾರೋಹ್ ಕಾರ್ಯಾಂತ್ ಕೊಂಕಣಿಂತ್ ಗ್ಯಾನ್ಪೀಠ್ ಪುರಸ್ಕಾರ್ ಜಿಕ್ಪಿ ಬಾಬ್ ದಾಮೋದರ್ ಮಾವ್ಜೊ ಹಾಣಿಂ ಕೆಲಿಂ. ವಲ್ಲಿ ಕ್ವಾಡ್ರಸಾನ್ ಸಂಪಾದನ್ ಕೆಲ್ಲಿಂ ಹಿಂ ಪುಸ್ತಕಾಂ ಜಾವ್ನಾಸಾತ್;
ಪಡ್ಸಾದ್ (ನಾಗರಿ ಲಿಪಿಯೆಚೆಂ ಪುಸ್ತಕ್: ಆಶಾವಾದಿ ಪ್ರಕಾಶನಾಚೆಂ 50ವೆಂ ಪುಸ್ತಕ್) - ವಲ್ಲಿ ಕ್ವಾಡ್ರಸಾಚ್ಯಾ ಸಂಪಾದಕೀಯಾಂಚೆಂ ತಿಸ್ರೆಂ ಪುಸ್ತಕ್
ನವಿ ದಿಶಾ (ರೋಮಿ ಲಿಪಿಯೆಚೆಂ ಪುಸ್ತಕ್: ಕೊಂಕಣ್ಗಾರ್ ಪ್ರಕಾಶನಾಚೆಂ ಪುಸ್ತಕ್) - ಮೊನಿಕಾ ಡೆ’ಸಾ ಮಥಾಯಸಾಚ್ಯಾ ಕಾಣಿಯಾಂಚೆಂ ಪುಸ್ತಕ್.
ಅಂತರ್ನಾದ್ (ಕವಿತಾ ಜಮೊ: ಬಾಯ್ ಉರ್ಜಿತಾ ಭೊಬೆ ಗೊಂಯ್), ಮನಾಚೆಂ ನಾತೆಂ (ಕವಿತಾ ಜಮೊ: ಬಾಯ್ ಫಿಲೋಮೆನಾ ಸಾಂಫ್ರಾನ್ಸಿಸ್ಕೊ ಮುಂಬಯ್), ಮನ್ಸ್ಫೋಟ್ (ಕವಿತಾ ಜಮೊ: ಬಾಯ್ ಸಿಯಾಲಿನಿ ಫೆರ್ನಾಂಡಿಸ್ ಗೊಂಯ್)
2002-1 ಇಸ್ವೆಂತ್ ಆಶಾವಾದಿ ಪ್ರಕಾಶನಾಚಿ ಸುರ್ವಾತ್ ಕುವೆಯ್ಟಾಂತ್ ಜಾವ್ನ್ ಸಭಾರ್ ಹೆರ್ ಸಾಹಿತಿಂಚಿಂ ಪುಸ್ತಕಾಂ ಪ್ರಕಾಶಿತ್ ಕೆಲ್ಯಾಂತ್. ’ಪಡ್ಸಾದ್’ ಪನ್ನಾಸಾವೆಂ ಪುಸ್ತಕ್. ’ಹಿ ಪಡ್ಸಾದ್ ಅಖ್ಖ್ಯಾ ಕೊಂಕಣಿ ಭಂವಾರಾಕ್ ಪಾವುಂದಿ ಆನಿ ಕೊಂಕಣಿ ಲೊಕಾಂಚ್ಯಾ ಕಾಳ್ಜಾಂ-ಮನಾಂಕ್ ಜಾಗಂವ್ಕ್ ಸಕುಂದಿ’ - ಅಶೆಂ ಪುಸ್ತಕಾಚೆಂ ಉಗ್ತಾವಣ್ ಕೆಲ್ಲ್ಯಾ ಬಾಬ್ ದಾಮೋದರ್ ಮಾವ್ಜೊನ್ ಉಚಾರ್ಲೆಂ.
ಪುಸ್ತಕ್/ಬರಯ್ಣಾರಾಂಚಿ ಒಳೊಕ್:
ಫಿಲೊಮೆನಾ ಸಾಂಫ್ರಾನ್ಸಿಸ್ಕೊ: ಪಾಟ್ಲ್ಯಾ ತೀಸ್-ಚಾಳೀಸ್ ವರ್ಸಾಂ ಥಾವ್ನ್ ಕಥಾ, ಕವಿತಾ ಆನಿ ಲೇಕನಾಂ ಬರವ್ನ್ ನಾಗರಿ, ರೋಮಿ ಲಿಪಿಂತಲ್ಯಾ ಪತ್ರಾಂನಿ ಪರ್ಗಟುನ್ ಆಯ್ಲ್ಯಾಂತ್. ಆಲ್ ಇಂಡಿಯಾ ರೇಡಿಯೊ ತಶೆಂಚ್ ಅಖಿಲ್ ಭಾರತೀಯ್ ಕೊಂಕಣಿ ಪರಿಷದೆಂನಿ ಕವಿತಾ ವಾಚ್ಲ್ಯಾಂತ್. ’ಮ್ಹಜೊ ದಿಶ್ಟಾವೊ (2004)’, ’ವೊಂಪ್ತಾ ತೆಂ ಪಿಕ್ತಾ (2008)’, ’ಟುನ್ಟುನಿಚ್ಯೊ ಕಾಣಿಯೊ (2011)’, ’ಹುಂಬ್ರ್ಯಾವಯ್ಲಿ ಪಣಟಿ (2011)’, ’ಗುಲ್ಮೊಹರ್ (2014)’ ಹಿಂ ಯೆದೊಳ್ ಪ್ರಕಾಶಿತ್ ಜಾಲ್ಲಿಂ ಹಿಚಿಂ ಪುಸ್ತಕಾಂ. ’ಮನಾಚೆಂ ನಾತೆಂ’ ಹಿಚೆಂ ಪಯ್ಲೆಂ ಡಿಜಿಟಲ್ ಪುಸ್ತಕ್ ಜಾವ್ನಾಸುನ್, ಪ್ರಸನ್ನ್ ನಿಡ್ಡೋಡಿ ಮಿರಾರೋಡ್ ಮುಂಬಯ್ ಹಾಣೆಂ ಪ್ರಸ್ತಾವನ್ ಬರಯ್ಲಾಂ.
ಉರ್ಜಿತಾ ಭೊಬೆ: ಪಾಟ್ಲ್ಯಾ ಕಾಂಯ್ ಆಟ್ ವರ್ಸಾಂನಿ ಕೊಂಕಣಿಂತ್ ಕವಿತಾ ಬರವ್ನ್ ಆಯಿಲ್ಲ್ಯಾ ಹಿಚ್ಯೊ ಕವಿತಾ ಕೊಂಕಣಿ ಪತ್ರಾಂನಿ ತಶೆಂಚ್ ಜಾಳಿಜಾಗ್ಯಾಂನಿ ಪರ್ಗಟ್ ಜಾಲ್ಯಾತ್. ಪಯ್ಣಾರಿ-ವೀಜ್ ರಾಶ್ಟ್ರೀಯ್ ಮಟ್ಟಾಚ್ಯಾ ಸಾಹಿತಿಕ್ ಸರ್ತೆಂತ್ ಹಿಚ್ಯಾ ಕವಿತೆಂಕ್ ತಶೆಂಚ್ ಕಥೆಂಕ್ ಇನಾಮಾಂ ಮೆಳ್ಳ್ಯಾಂತ್. ಪಯ್ಣಾರಿ.ಕೊಮ್ ಹಾಣಿಂ ಮಾಂಡುನ್ ಹಾಡ್ಲ್ಲ್ಯಾ ’ಮಯ್ನ್ಯಾಚೊ ಕವಿ’ ಇನಾಮ್ ಸಯ್ತ್ ಹಿಣೆಂ ಜೊಡ್ಲಾಂ. ’ಉರ್ಜಾ ಸ್ರೋತ್ (2017)’ ಹಿಚೆಂ ಯೆದೊಳ್ ಪರ್ಗಟ್ ಜಾಲ್ಲೆಂ ಕವಿತೆಚೆಂ ಪುಸ್ತಕ್. ’ಅಂತರ್ನಾದ್ (ಕನ್ನಡ ಲಿಪಿಯೆಂತ್) 2021 ಇಸ್ವೆಂತ್ ಪರ್ಗಟುನ್ ಆಯಿಲ್ಲೆಂ ಪಯ್ಲೆಂ ಡಿಜಿಟಲ್ ಪುಸ್ತಕ್. ಅಂತರ್ನಾದ್ (ನಾಗರಿ ಲಿಪಿಯೆಂತ್) ಆಸುನ್ ವಲ್ಲಿ ಕ್ವಾಡ್ರಸಾನ್ ಹ್ಯಾ ಪುಸ್ತಕಾಚೆಂ ಪ್ರಸ್ತಾವನ್ ಬರಯ್ಲಾಂ.
ಸಿಯಾಲಿನಿ ಫೆರ್ನಾಂಡಿಸ್: ಗೊಂಯ್ಚ್ಯಾ ಕಾರ್ಮೆಲ್ ಕೊಲೆಜಿಂತ್ ಸಹ-ಪ್ರಾಧ್ಯಾಪಕಿ ಜಾವ್ನ್ ಕಾಮ್ ಕರುನ್ ಆಸ್ಚಿ ಬಾಯ್ ಸಿಯಾಲಿನಿ ಏಖ್ ಗಾವ್ಪಿಣ್, ಕಾರ್ಯೆಂ ಚಲವ್ಪಿ ತಶೆಂಚ್ ಕವಿ. ಹಿಚ್ಯೊ ಕವಿತಾ ಕೊಂಕಣಿ ಪತ್ರಾಂನಿ ತಶೆಂಚ್ ಜಾಳಿಜಾಗ್ಯಾಂನಿ ಪರ್ಗಟ್ ಜಾಲ್ಯಾಂತ್. ’ಮನಸ್ಫೋಟ್’ ಹಿಚೆಂ ಪಯ್ಲೆಂ ಡಿಜಿಟಲ್ ಪುಸ್ತಕ್ ಜಾವ್ನಾಸುನ್ ಬಾಯ್ ರಾಜಶ್ರೀ ಸಯ್ಲ್ ಹಿಣೆಂ ಹ್ಯಾ ಪುಸ್ತಕಾಚೆಂ ಪ್ರಸ್ತಾವನ್ ಬರಯ್ಲಾಂ.
ನವಿ ದಿಶಾ: ರೋಮಿ ಲಿಪಿಯೆಚೆಂ ಹೆಂ ಪುಸ್ತಕ್ ಹ್ಯಾ ಆದಿಂ ಕನ್ನಡ್ ಲಿಪಿಯೆಂತ್ ಪರ್ಗಟುನ್ ಆಯ್ಲಾಂ ಆನಿ ಹ್ಯಾ ಪುಸ್ತಕಾಕ್ 2021 ಇಸ್ವೆಂತ್ ’ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚೆಂ ಉತ್ತೀಮ್ ಪುಸ್ತಕ್ ಪುರಸ್ಕಾರ್ ಲಾಭ್ಲಾ’, ನಾಗರಿ ಲಿಪಿಯೆಂತ್ ಹೆಂಚ್ ಪುಸ್ತಕ್ ಡಿಜಿಟಲ್ ರುಪಾರ್ 2021 ಇಸ್ವೆಂತ್ ಪರ್ಗಟ್ ಜಾಲಾಂ. ವಲ್ಲಿ ಕ್ವಾಡ್ರಸಾನ್ ಹ್ಯಾ ಪುಸ್ತಕಾಕ್ ರೋಮಿ ಲಿಪಿಯೆಂತ್ ಲಿಪಿಯಂತರ್ ಕರುನ್, ಸಂಪಾದಕ್ಪಣ್ ಚಲವ್ನ್ ಹ್ಯಾ ಪುಸ್ತಕಾಚೆಂ ಪ್ರಸ್ತಾವನ್ ಬರಯ್ಲಾಂ. ಪುಸ್ತಕಾಚೆಂ ಮೋಲ್ ರು.150
ಪಡ್ಸಾದ್: ದಾಯ್ಜ್.ಕೊಮ್ (2003-2011), ಪಯ್ಣಾರಿ.ಕೊಮ್ (2015 ಥಾವ್ನ್), ತಶೆಂಚ್ ಆಶಾವಾದಿ ಪ್ರಕಾಶನ್ (2000 ಥಾವ್ನ್) ಸಂಪಾದಕ್ ಜಾವ್ನ್ ವಾವ್ರ್ ಕರ್ಚೊ ವಲ್ಲಿ ಕ್ವಾಡ್ರಸ್ ಮುಂಬಂಯ್ತ್ ವಸ್ತಿ ಕರುನ್ ಆಸ್ಲೆಪರಿಂಚ್ ಗೊಂಯ್, ಕರ್ನಾಟಕಾಂತ್ ಕೊಂಕಣಿ ಕಾರ್ಯಾಂನಿ ಮೆತೆರ್ ಜಾತಾ. ನಾಗರಿ ಲಿಪಿಯೆಂತ್ ಪರ್ಗಟ್ ಜಾಲ್ಲೆಂ ವಲ್ಲಿ ಕ್ವಾಡ್ರಸಾಚೆಂ ಪಯ್ಲೆಂ ಸಂಪಾದಕೀಯ್ ಪುಸ್ತಕ್. ’ಮೊಳ್ಬಾವಯ್ಲಿಂ ಸಪ್ಣಾಂ (2005)’, ’ಮುಖಾ ಮುಖಿ (2017)’ ಹ್ಯಾ ಆದ್ಲಿಂ ಸಂಪಾದಕೀಯ್ ಪುಸ್ತಕಾಂ. ಹ್ಯಾ ಪುಸ್ತಕಾಚೆಂ ಪ್ರಸ್ತಾವನ್ ಬರಯ್ಲಾಂ ಗೋಮಂತಕ್ ಮೀಡಿಯಾಚೊ ದಿರೆಕ್ತೊರ್ ನಾಮ್ನೆಚೊ ಸಾಹಿತಿ ಪತ್ರ್ಕಾರ್ ಬಾಬ್ ರಾಜು ನಾಯ್ಕ್, ತಶೆಂಚ್ ಸಂಪಾದಕ್ ಬಾಬ್ ಶೈಲೇಂದ್ರ ಮೆಹ್ತಾ ಆನಿ ಅಖಿಲ್ ಭಾರತೀಯ್ ಕೊಂಕಣಿ ಪರಿಷದೆಚಿ ಅಧ್ಯಕ್ಷ್ ಬಾಯ್ ಉಶಾ ರಾಣೆ ಹಾಣಿಂ. ಪುಸ್ತಕಾಚೆಂ ಮೋಲ್ ರು.150
