ಪ್ರೊ|ಪ್ರಜಲ್ ಸಾಖರ್ದಾಂಡೆ: ಗೊಂಯ್ಚಾ ದೆಂಪೆ ಕೊಲೆಜಿಚೊ ಪ್ರಾಧ್ಯಪಕ್ ತಶೆಂಚ್ ಕೊಲೆಜಿಚ್ಯಾ ಇತಿಹಾಸ್ ವಿಭಾಗಾಚೊ ಮುಖೇಸ್ತ್ ಜಾವ್ನ್ ಕಾಮ್ ಕರುನ್ ಆಸ್ಚೊ ಲೇಖಕ್, ಸಂಶೋಧಕ್ ಪ್ರೊ|ಪ್ರಜಲ್ ಸಾಖರ್ದಾಂಡೆಚೊ ನವೊ ಬೂಕ್ Goa Gold Goa Silver her history her heritage from earliest times to 2019 13 ಮಾಯ್ 2019 ವೆರ್ ’ದ ಸುಶೆಗಾದ್ ವಿಲೇಜ್ ವೆಲಿಂಗ್, ಪೋಂಡಾ ಗೊಂಯ್’ ಹಾಂಗಾಸರ್, ಸಾಂಜೆರ್ 5 ವೊರಾಂಚೆರ್ ಮೊಕ್ಳೀಕ್ ಜಾತಲೊ.
ಹಾಚ್ಯಾದಿಂ ಗೊಂಯ್ಚಾ ಇತಿಹಾಸಾಚೆರ್ ಸಭಾರ್ ಬೂಕ್ ಬರಯಿಲ್ಲ್ಯಾ ಹಾಕಾ ಆಯ್ಲೆವಾರ್ ’ಗೊಂಯೆಕಾರ್ಪಣ್ ಪುರಸ್ಕಾರ್’ ಲಾಭ್ಲಾ. ಗೊಂಯ್ಚಾ ’ಗೊಂಯಾಂಕ್ ಸ್ಪೆಶಲ್ ಪ್ರತಿಶ್ಟಾ’ ಲಾಭ್ಚ್ಯಾ ಚಳ್ವಳೆಚೊ ಅಧ್ಯಕ್ಷ್ ಜಾವ್ನ್, ಇತಿಹಾಸ್ ಫೋರಮಾಚೊ ಅಧ್ಯಕ್ಶ್ ಜಾವ್ನ್ ಸಭಾರ್ ಬೂಕ್ ಹಾಚ್ಯಾದಿಂ ಬರಯ್ಲ್ಯಾತ್; Muslim History n Heritage of Goa, Matanhy Saldanha the legend. ಅಂತರ್ರಾಶ್ಟ್ರೀಯ್ ತಶೆಂಚ್ ರಾಜ್ಯ್ ಮಟ್ಟಾಚೆ ಪುರಸ್ಕಾರ್ ಜೊಡ್ಲ್ಯಾತ್. ನವ್ಹಿಂದ್ ಟಾಯ್ಮ್ಸ್ ಪತ್ರಾಚೆರ್ 14 ವರ್ಸಾಂ ಪರ್ಯಾಂತ್ ’ಇತಿಹಾಸಾಚೆರ್ ಅಂಕಣಾಂ’ ಬರಯ್ಲ್ಯಾಂತ್. ಟೆಲೆಫಿಲ್ಮಾಂನಿ ಸಯ್ತ್ ಅಭಿನಯ್ ಕೆಲಾಂ, ಟಿವಿಚೆರ್ ಕಾರ್ಯಿಂ ಚಲಯ್ಲ್ಯಾಂತ್, ಸಭಾರ್ ಕಾಮಾಸಾಳಾಂನಿ ಉಲವ್ಪಿ/ಸಂವಾದಕ್ ಜಾವ್ನ್ ವಾವ್ರ್ ಕೆಲಾ. ಇತಿಹಾಸಾಚೆರ್ ಬಿ.ಎ, ಎಮ್.ಎ. ತಶೆಂಚ್ ಎಮ್.ಫಿಲ್. ಪದ್ವೆಚ್ಯಾ ಪಾಠ್ಬುಕಾಂಕ್ ತಯಾರ್ ಕರ್ಚ್ಯಾ ಸಮಿಚೊ ಸಾಂದೊ.
ಸಾದೆಂ ವೆಕ್ತಿತ್ವ್, ಮಯ್ಪಾಸಿ ಸ್ವಭಾವಾಚೊ ಪ್ರಜಲ್ ಸಾಖರ್ದಾಂಡೆ ಕೊಂಕಣಿ ವಾವ್ರಾಂತ್ ಸಯ್ತ್ ಸಮರ್ಪಿತ್ ವಾವ್ರ್ ಕರುನ್ ಆಸಾ. ಹಾಚಿ ಪತಿಣ್ ಮಾನೆಸ್ತಿಣ್ ಅಂಜು ಸಾಖರ್ದಾಂಡೆ, ದೆಂಪೆ ಕೊಲೆಜಿಚ್ಯಾ ಕೊಂಕಣಿ ವಿಭಾಗಾಚಿ ಮುಖೇಸ್ತ್ ತಶೆಂಚ್ ಪ್ರಾಧ್ಯಾಪಕಿ ಜಾವ್ನಾಸಾ.
