[ಖಬರ್] ಆವಾಜಾಚೆಂ ಚಡ್-ಉತಾರ್ ಶಾಸ್ತ್ರ್ ಓನಲಾಯನ್ ವ್ಯಾಖ್ಯಾನ್
ಕೊಂಕ್ಣಿ ಭಾಶಾ ಮಂಡ್ಳಾನ್ ಆವಾಜಾಚೆಂ ಚಡ್-ಉತಾರ್ ಶಾಸ್ತ್ರ್ ಹ್ಯಾ ವಿಶ್ಯಾಚೆರ್ ಎನಲಾಯನ್ ವ್ಯಾಖ್ಯಾನ್ ಆಯೊಜೀತ್ ಕೆಲ್ಲೆ.
ನಾಟ್ಯಕಲಾಕಾರ್ ಕೆತನ್ ಜಾಧವ್ ಹಾಂಣಿ ಹ್ಯಾ ವಿಶ್ಯಾಯೆರ್ ಮಾರ್ಗದ್ರ್ಶನ್ ದಿಲೆಂ. ಶಿಕ್ಷಕಾಂಕ್ ಪಾಠ್ಯಪುಸ್ತಕಾಂಚೆರ್ ಎನಲಾಯನ್ ಸಾಧ್ನಾಂ ತಯಾರ್ ಕರ್ತನಾ ಆದಾರ್ ಜಾವ್ಚೊ ಮ್ಹೂಣ್ ಮಂಡ್ಳಾನ್ ಹೆಂ ವ್ಯಾಖ್ಯಾನ್ ದವ್ರಿಲ್ಲೆಂ. 145 ಜಾಣ್ ಹ್ಯಾ ವ್ಯಾಖಾನಾಂತ್ ವಾಂಟೆಕಾರ್ ಜಾಲ್ಲೆ. ಹೆಂ ವ್ಯಾಖ್ಯಾನ್ ಫೆಸ್ಬೂಕಾರ್ ಲಾಯ್ವ್ಹ್ ಆಶಿಲ್ಲೆಂ.
ಆವಾಜಾಚೊ ಬರೆಂ ತರೆನ್ ವಾಪರ್ ಜಾವ್ಪಾ ಖಾತೀರ್ ರಿಯಾಜಾಚೆಂ ಮ್ಹತ್ವ್ ಖೊಲಾಯೆನ್ ಕೆತನ್ ಜಾಧವ್ ಹಾಂಣಿ ಮಾಂಡ್ಲೆಂ. ಸ್ವರ್ ಆಕಾರ್, ಜಿಬೆಚೊ ವ್ಯಾಯಾಮ್, ಪೆನ್ಸೀಲ್ ವ್ಯಾಯಾಮ್, ಮೊಟ್ಯಾನ್ ವಾಚಪ್, ರೊಬೊಟಿಕ್ ವಾಚಪ್, ಆವಾಜಾಚೊ ಭಾಲೊ ವ್ಯಾಯಾಮ್, ಸ್ವರಾಚೆಂ ಉಚ್ಚಾರಣ್ ಹಾಂಚೆ ಮ್ಹತ್ವ್ ತಾಂಣಿ ವಿಸ್ತಾರಾನ್ ಮಾಂಡ್ಲೆಂ.
ಆವಾಜಾಚೊ ಚಡ್-ಉತಾರ್ ಕರ್ತನಾ ಕಾಂಯ್ ತಂತ್ರಾಂ ಲಕ್ಷಾಂತ್ ದವ್ರಪಾಕ್ ಜಾಯ್ ಹೆ ದೆಖಿ ಸಯ್ತ್ ತಾಂಣಿ ದಾಖೊವ್ನ್ ದಿಲೆ. ವಾಕ್ಯಾಂ ಕುಜ್ಬುಜಪ್, ವಾಕ್ಯಾಂ ಮದಿಂ ಖಂಡ್ ದಿವ್ನ್ ಉಲೊವ್ಪ್, ಧ್ವನಿ, ಆವಾಜ್, ಧ್ವನೀಚಿ ಉಂಚಾಯ್, ಆವಾಜಾಚಿ ಅಭಿವ್ಯಕ್ತಿ ಆನಿ ಗತಿ ಹಾಚೆರ್ ತಾಂಣಿ ಸ್ಪಶ್ಟೀಕರಣ್ ದಿಲೆಂ.
ಶೆವ್ಟಾಕ್ ವ್ಯಾಖ್ಯಾನಾಂತ್ ವಾಂಟೆಕಾರ್ ಜಾಲ್ಲ್ಯಾಂನಿ ವಿಚಾರಿಲ್ಲ್ಯಾ ಪ್ರಸ್ನಾಂಕ್ ತಾಂಣಿ ಜಾಪೊ ದಿಲ್ಯೊ. ಹ್ಯಾ ವಿಶ್ಯಾಚೆರ್ ಮುಖಾರ್ ಕಾರ್ಯಶಾಳಾ ಆಯೊಜೀತ್ ಕರ್ಪಾಚೊ ವಿಚಾರ್ ಮಂಡ್ಳಾಚೊ ಆಸಾ. ವ್ಯಾಖಾನಾಚೆಂ ಸಂಯೊಜನ್ ಕೊಂಕ್ಣಿ ಭಾಶಾ ಮಂಡ್ಳಾಚೆ ವಾಂಗ್ಡಿ ಪುನಮ್ ಬುರ್ಯೆ ಹಾಂಣಿ ಕೆಲೆಂ ಜಾಲ್ಯಾರ್ ಯೆವ್ಕಾರಾಚೆಂ ಉಲೊವ್ಪ್ ಆನಿ ಮಾನೆಸ್ತಾಚಿ ವಳಖ್ ಸಚೀವ್ ಉಲ್ಹಾಸ್ ಗಾಂವ್ಕಾರ್ ಹಾಂಣಿ ಕೆಲಿ. ನಿಮಾಣೆ ಕಡೆನ್ ಮಂಡ್ಳಾಚೆ ವಾಂಗ್ಡಿ ವೆದಿಕಾ ವಾಳ್ಕೆ ಹಾಂಣಿ ಉಪ್ಕಾರ್ ಮಾನ್ಲೆಂ.
