Dosembr 20: 2000 isvent Kuwaitant suru zal'lea Ashawadi Prakashanachea 20 vorsugecho sombhrom' dosembr 20 tarikechea aitara sanjer 4 thaun 7 poreant ddijittol madhyomacher choloilo.
Ugtaunn kareachem sunkann ghetl'lea Gõychea Shree Mallikarjuna Collegichea Hindi vibhagachi mukhest Do|Rupa Charin yeukar magtoch Valley Quadrasosan oplea svagot uloupant "Ashawadi ani piso - hea donam modhlo ontor eka sutacho, ani hi konkonni pisai opnnak koxi lagli ani survilea disamni oplea somokallin boroupi mitram thaun melll'lea preronn toxench pattimbovixim uloyit, melvin roddrigosachea kamacho toxench progoti prokaxonan ghal'lea probhavacho ul'lek kelo. Hea vis vorsanchea poinnant choddnni ani poddnnent adhar, pattimbo toxench bhorvoso dil'leancho uddas kaddun, ho sombhrom' fokot ekleacho nhoi, bogar somestancho mhonnalo.
Konkonni sordar, Vishv Konkani Kendracho mukhest Basti Vaman Shennoi hannim kareachem ugtaunn korun dil'lea oplea sondexant "Ashavadi Prakashan oxench oplo khollmit natlo konkonni vaur mukharun vorun rupeotsovacho suvallo karyem soit sombhromunk toxench opnnak tantum meter korunk ulo dilo".
Andrew L DCunhan Ashawadi Prakashanachea vis vorsanchea poinnacher kholayen uloun ’Ashawadi Prakashan mhollear Valley Quadrasos, ani vol'lichea borpant toxench chintpant to Ashavadi. Ho vaur eka protixttit somstheachea vauracheaki kaim unno na, hoch vaun zor eka somsthean kel'lo tor tea somstheak mellcho man veglloch asto zo Valley Quadrasosak mellunk na’ mhonnalo. Ashawadi Prakashan mukharun vhorunk Val'lik zokto pattimbo dimvcheak konkonni mukheleamni toxench somstheamni mukar ailear tacho protifoll khonddit zaun konkonnik labhcheant dubhavo na mhonnalo.
HM Pernalan ’Daaiz thaun Poinnari’ oxem oplea uloupant 1990 isvethaun koxi opnnachi ollok Val'lisovem zal'li ani az pason eka kuttmantlea bhabhavamporim ekameka monbhed asunyi ekamekak adhar divun aileamv mhonnalo. Daaiz ani Poinnachi modhem URL matr bodol'lam xivai Val'lik boroupi ani konkonni sahiteacher ascho mog kuskuttachoi bodlunk na. Bodlak daaiz fokot eka lipik simit zaunaslem tor poinnarint tannem vixv veapi zaun bodlun tin lipint sahity porgottchem matr nhoi, poilem fokot borparupar aslem sahity atam addio rupar aikunk soit mellta mhonnalo. Hech vellar somokallin boroupi; melvin roddrigos, anddryu ddi’kunha, kixu barkur, ponchu bonttvall, mauris xantipur koxem fokot boroupi/kovi zaun urunk nastana prokaxok, sompadok zaun her boroupeank sangata ghevun mukar chol'le punn Valley Quadrasosan hem kam' 2003 isvethaunch suru kel'lem mhonnalo.
Mukhel soiro zaun hazor asl'lea Goanews.com'cho sompadok Bab Sandhesh Prabhudesai hannim oplea uloupant; kovidd ma-pidden monxank dhoslem ani bhexttailem punn heach kallar ddijittol madhyom' ek vorodan koxem zalem, ani az Ashawadi Prakashanachea vis vorsanchea vauravixim aikun khorench oxem bhoglem, hem kam' Gõyant zaupak zai aslem punn gõyam bhair zal'lem amkam khup obhimanachem kam'. Ani ami 350 vorsam pattim vochunk sokanamv punn ddijittol madhyomacho thenko ghevun ami 350 vorsam pattim vochunk soktamv ani ek konkonni kuttom' zaun konkonnichea vaddaullekhatir sangata vaur korunk soktamv ani hea dixen bab Valley Quadrasosan oplea tantrik gineanak hater korun mukhelponn gheunko Ashawadi Prakashanak ulo dilo.
Okhil bharoti-i konkonni porixodechi odhyokx Bai Usha Ranen oplea uloupant Ashawadi Prakashanachea vauravi sovistar vollok aikun opnnak oxem bhoglem omi konkonni pasot kel'lem bhovo thoddem. Ani hea pasot Ashawadi Prakashanachea Valley Quadrasosachi thoknnai keli.
Gõy Konkonni okaddemichea ’Ananya’ zornolachi sompadok Bai Do|Jayanti Naikan oplea uloupant; ’Bab Val'lichi ani mhoji ollok so vorsadhim zal'li, jednam tachi ek kotha mhaka pauli ani ti kotha mhaka itli auddli mhollear hamvem fon korun porbim pattoili. Thoddeach tempan hamv konkonni porixodek lagun mumboi paulim ani tednam Valley Quadrasos mhaka mell'llo punn jednam to Gõyam ailo to poilo yetalo gõy konkonni okaddemik ani ami vorangottlem kothevixim uloitoleamv ani tachethaun hamvem parkil'li ek duk zaunasa; ’amchem konkonni sahity grest asa, punn tem lipichea bondoddent bhandun asa, ami tea bondhoddethaun suttka ghemvcheo vatto toyar korizoi’ mhonnun. Ashawadi Prakashanachea vaurak borem magun hem Ashawadi Prakashan khorench konkonni sahitik itihasant ek moilafator mhonnali.
Bai rupa charin ’pustok vimochon’ kareachem sunkann ghetl'lea bai mongllurchea besentt kolejichea potrikodhyom' vibhagachea mukhest bai smita xennoi hichi ollok korun ditoch bai smita xennoi hinnem Ashawadi Prakashanachea vimochon zaunko aschea tin bukanchi toxench boroupeancho ollok korun divonko meanchesttor (yuke) thaun larens vinod barbozak ulo dilo.
Lawrence Vinod Barbozan Monika D’Sachi toxench tichea ’Novi Disha’ pustokachi, Walter Nandalike toxench tachea ’Fanteaparachem Soponn’ pustokachi, ani Stephen Pinto Kuntalpadi toxench tachea ’Kombo ani Zhuz’ pustokachi vollok korun dili.
Manest Joseph Mathaisan ’novi dixa’ pustokachem vimochon korun oplo sondhex divun ’Ashawadi Prakashanan pattlea vis vorsamni kel'lo vaur polleun hamv khoronch vijmit paulom, ani khonddit zaun hea vaurak oplo pattimbo fuddem-i astolo mhonnalo’, Monica Mathiasan oplea uloupant ’monis zor oplea kallzant sintimentam nastana asto tor to eka fatraporim disto, dekun hea sintimentank sahiteachem rup dil'lea mholea kanniank ekttaunko porgott kel'lea Ashawadi Prakashanacho, ani hea pasot pattimbo dil'lea kuttmacho dhinvas kelo’.
Manest Damodor Mauzon ’Fanteaparachem Soponn’ pustokachem vimochon korun oplea sondhexant ’konkonni sahiteant jednam veg-vegollea pranteachem sahity lagim yeta, tednanch konkonni sahiteachi khori tank kollta’ mhonnalo.
Manest Hilary Tellis Bahrainn hannem oplea uloupant Stephen Pintochea vektitvavixim toxench tachea kanniamvixim uloun, heo kannio bukarupar prokaxit kel'lea Ashawadi Prakashanak dhinvaslem. Bai Smita Shennoy hinnem muklea bhagachem sunkann ghetl'lea Gõychea Shree Mallikarjuna kolejichea konkonni vibhagacho mukhest Do|Purnananda Charichi ollok korun dili.
Puroskar ani inamanchea hea vibhagant poilem ’poinnari-viz sahitik spordho’ vixim uloyit't Do|Austin DSouza Prabhun koxem poinnari-viz raxttri-i omtt'ttachea sahityik spordheachi survat korun atam tin vorsam sompoilim, ani fuddem soit konkonnichea ut'tim' sahitink hea spordheant vantto gheunko ulo dilo.
Manest jems menddonsa dubhoi hannim Wilfy Rebimbus smarok poinnari-viz raxttri-i mott'ttachea tisrea sahitik spordheant inamam apnnayil'leanchim namvam ghoxit kelim;
Lekhonam boromvcho vibhag: Lawrence V. Barboza Manchester UK.
Ashawadi Prakashanachea bukancher vimorso boromvcho vibhag: Do|Aravind Shanbaug Kumta ani Prasann Niddodi.
Kovita boromvcho vibhag: poilem inam': Mahadev Gaonkar Gõy (kovita: flettant raupi kovi)
Dusrem inam' - Namdev G. Surtikar Gõy (kovita: vrid'daxrom')
tisrem inam' - Manoj N Kamath Gõy (kovita: arso)
choutem inam' - Prathami Naik Gõy (kovita: xraunnantlo xirxiro)
panchvem inam' - Nita Kurtikar Gõy (kovita: pausachea disamni)
chouto vibhag: mottvi kotha boromvcho - hantum inamam zoddleleanchim namvam
poilem inam' - Nayana Adarkar Gõy (kotha: valmiki)
dusrem inam' - Richard Alvaris Mangalore (kotha: nalisai)
tisrem inam' - Fr.Chetan Lobo uddpi (kotha: korm')
choutem inam' - Sandhesh Bhandekar Karwar (kotha: nirnnoyacho nirnnoi)
panchvem inam' - Taniya Kirtani Gõy (monisponn kai mog)
inamam ghoxit kel'leuprant oplea uloupant manest James Mendoncan; Wilfy Rebimbus tosolea mohan konkonni monxacho uddas kaddun tachea manak ho spordho cholomvchea poinnari-viz karbharink toxench spordheant inamam apnnayil'lea somestank porbim dili.
Tye uprant poinnari.com' hannim 2019 isvechea dosembrant suru kel'lea tisrea moineacho kovi spordheant inamam zoddlelea bhara kovinchim namvam toxench vorsacho kovi ’Nilba Khandekor’ hachem namv Kovi bab melvin roddrigosan ghoxit korun oplo sondhex pattoilo ani sondhex pattoilo.
Gõy yunivorsittichea konkonni vibhagachi adhli mukhest Do|Chandralekha DSouzan ’ontorraxttri-i konkonni chinh International Konkani Icon - 2020’ puroskar ’SKA (South Karana Association) hankam ghoxit korun oplo sondhex dilo.
Tye uprant konkonnintlo poilo ddijittol kotha sadorikoronnacho puroskar De|Freddrik Quadrosachea yadicho puroskar ghoxit zalo.
Freddrik Quadrosachea putan Roshan Quadrosan Fredrik Quadrosachi mottvi ollok korun divun koxem to konkonni lokamni ekameka sangata jieun ekameka adhar korchem soponn dhorun jiel'lo mhonnalo. Manest Eddie Sequeiran hea ddijittol puroskarak ghoxit kelem;
poilem inam' :Christopher DSouza, Ninasom' (kotha: lokddaun)
dusrem inam' : Dony Correa Pernal (kotha: bondhodd)
tisrem inam' (dogank): V.P.Lobo (kotha: soirik), ani jeri ddi’mel'lo bendur (kotha: dhull ti dhull’ch)
choutem inam' (dogank): Linet DSouza (kotha: bomboicho mam') ani Shanti Noronha (kotha: zolmadisachi kannik)
panchvem inam' (dogank): Lawrence V Barboza (kotha: jinnye sutr) ani Queenie Viegas (kotha: lungi)
sovem inam' (dogank): Do|Judy Pinto (kotha: lokx) ani Do|Purnananda Chari (kotha: ek mornachitt)
Do|Purnananda Charin muklo vibhag cholomvchea Bab Shailendra Mehtachi ollok korun ditoch hazor asl'lea manestamni; Sunil DCunha Manchestor, Ma|Pratap Naik, Prakash Padgaonkar Gõy, Gerry DMello Bendur Canada, Concepta Fernandes Alva, Vincy Quadros Gõy, Philomena Samfransisco Mumbai hannim ople sondhex dile.
Bab Shailendra Mehtan dhinvas pattoile.
