ಅವಸ್ವರ್ 4
ದೋನ್ ದಿಸಾಂ ನಂತರ್ ಕಾಡ್ದಿನಾಲ್ ಮಾರೊಟ್ಟಾ ಆಪ್ಲ್ಯಾ ಒಫಿಸಾಂತ್ ತಾಚ್ಯಾ ಜೈತ್ ಮೆಜಾ ಪಾಟ್ಲ್ಯಾನ್ ಬಸೊನ್ ಮೊನ್ಸಿಜ್ಞೊರ್ ಬ್ಲೇಸ್ ಮೆರ್ಡಿತಾ ಸಂಗಿ ಉಲವ್ನ್ ಆಸ್ಲೊ. ಮನಾಧಿಕ್ ಬಾಪಾಂಕ್ ರಾತಿಂ ಬರಿ ನೀದ್ ಪಡ್ಲ್ಲಿ ಆನಿ ಹಾಳ್ವಾಯೆಚೊ ನಾಸ್ಟೊ ತಿರ್ಸುನ್ ತೊ ಖುಶಾಲ್ಭರಿತ್ ದಿಸ್ತಾಲೊ. ತಾಚೆಂ ತೆಂ ಉಭಾರ್ ಪಾಕ್ಯಾಚೆಂ ಕೂಡ್, ತಾಂತು ಸಜಯಿಲ್ಲಿ ಕಾರ್ಪೆಟ್, ವೊಣ್ತಿಚೆರ್ ಉಮ್ಕಾಳೊನ್ ಆಸ್ಲೆಲೆ ಪೇಯ್ಟಿಂಗ್ಸ್, ಪೊಟ್ರೆಟಿ ಇತ್ಯಾದಿ ತಾಚಿ ಕಲಾಭಿರೂಚ್ ಪಾಚಾರ್ತಾಲಿ.
ಮಾನಾಧಿಕ್ ಬಾಪಾಂ ಸಂಗಿ ತುಲನ್ ಕೆಲ್ಯಾರ್ ಮೊನ್ಸಿಜ್ಞೊರ್ ಮೆರ್ಡಿತ್ ಚಿಂವಂಡ್ ಜಾಲ್ಲ್ಯಾ ಕೊಬ್ವಾ ಕುಡ್ಕ್ಯಾ ಬರಿಂ ದಿಸ್ತಾಲೊ. ತಾಚ್ಯಾ ಆಂಗಾ ವಯ್ಲೊ ಲೋಬ್ ಕಾಡಿಯೆಕ್ ಶಿರ್ಕಾಯ್ಲೆಲ್ಯಾ ಬೆರ್ಚಪ್ಪಾ ಬರಿಂ ದಿಸ್ತಾಲೊ. ತಾಚ್ಯಾ ಕುಡಿರ್ ಬಿಲ್ಕುಲ್ ಜಿವ್ಸಾಣ್ ದಿಸಾನಾತಿ. ವೊಂಠಾಂ ದೆಗಾನಿಂ ಲಾಂಬ್ ಗೆರೆ ಉಟೊನ್ ದಿಸ್ತಾಲೆ. ಬೋವ್ ಯಾಂತ್ರಿಕ್ ತಾಳ್ಯಾನ್ ತೊ ಸಾಂಗಾಲಾಗ್ಲೊ: ಮ್ಹಜೆ ಸಾಮ್ಕಾರ್ ಚಡ್ ಮ್ಹಳ್ಯಾರ್ ಬಾರಾ ಮಯ್ನೆ ಆಸ್ತಿತ್ ಮಾನಾಧಿಕ್ ಬಾಪಾನೊಂ. ಹಾಂತು ಸಕ್ರೀಯ್ ವಾವ್ರಾಕ್ ಚಡ್ ಮ್ಹಳ್ಯಾರ್ ಸ ಮಯ್ನೆ ಲಾಬೊಂಕ್ ಆಸಾತ್.
ಕಾಡ್ದಿನಾಲಾನ್ ಮೊವಾಳಾಯೆನ್ ಮ್ಹಳೆಂ: ತುಜೆ ಲಾಗೊನ್ ಹಾಂವ್ ಮಸ್ತು ದೂಕ್ ಪಾವ್ತಾಂ ಮೊನ್ಸಿಜ್ಞೊರ್ ಮೆರ್ಡಿತ್. ಅಕ್ರೆಕ್ ಆಮ್ಕಾಂ ಸರ್ವಾಂಕ್ ಮೊರೊಂಕ್ ಆಸ್ತೆಲೆಂ ಮ್ಹಳ್ಳೆಂ ಖರೆಂ ತರೀ ಮರಣ್ ಏಕ್ ಅಘಾತಾಚೊ ವಿಷಯ್ಚ್ ಮ್ಹಣ್ಯೆತ್.
ಮೆರ್ಡಿತ್ ಸುಕೊ ಹಾಸೊ ಹಾಸ್ಲೊ. ತರೀ, ಸಕ್ಟಾಂ ವರ್ನಿ ಪಯ್ಲೆಂ ಆಮಿ ಮರ್ಣಾಕ್ ತಯಾರ್ ರಾವಾಜಾಯ್ಚ್. ತಾಣೆ ಮ್ಹಳೆಂ.
ತಶೆಂ ಮ್ಹಣ್ಚೆಂ ಸಾರ್ಕೆಂ ನ್ಹಯ್! ಕಾಡ್ದಿನಾಲ್ ಮಾರೊಟ್ಟಾನ್ ತಕ್ಲಿ ಹಾಲಾಯ್ಲಿ. ಅಮಿಂ ಆಮ್ಕಾಂ ವಿಶೇಸ್ ರಚ್ನಾಂ ಮ್ಹಣ್ ಸಮ್ಜೊಂಚೆ ನ್ಹಯ್. ಸಕ್ಟಾಂ ಬರಿಂ ಆಮಿಂಯ್ ರಗ್ತಾ ಮಾಸಾಚೆ ಮ್ಹನಿಸ್. ಆಮ್ಕಾ ಪಾತ್ಕಿ ಜಾವ್ನ್ ಜಿಯೆಂವ್ಚ್ಯಾಕೀ ಬರೆ ಮ್ಹನಿಸ್ ಜಾವ್ನ್ ಜಿಯೆಂವ್ಕ್ ಚಡ್ ಅವ್ಕಾಸ್ ಆಸ್ತಾತ್ ತೆಂ ನೀಜ್ ತರೀ ಆಮಿಂ ಹ್ಯಾ ದೋನ್ ಗೆರ್ಯಾಂ ಮಧೆಂ ಆಸಾಂವ್. ಯಾಜಕ್ಪಣ್ ಎಕ್ಲ್ಯಾಕ್ ಸಾಂತಿಪಣಾಕ್ ಚಡಯ್ತಾ ಮ್ಹಣ್ಚೆಂ ಬೆಷ್ಟೆಂ. ಪುಣ್ ಲಾಯಿಕಾಂ ವರ್ನಿ ಆಮ್ಕಾಂ ಆಮ್ಚೊ ಆತ್ಮೊ ಸಾಂಬಾಳುಂಕ್ ಕಷ್ಟ್ ಮಾರ್ತಾತ್. ಲಾಯಿಕಾನ್ ತಾಚ್ಯಾ ಕುಟ್ಮಾ ಖಾತಿರ್ ತ್ಯಾಗ್ ಕರಿಜೆ ಪಡ್ತಾ, ಮೋಗ್ ದೀಜೆ ಪಡ್ತಾ, ಆನಿ ಸಹನಾಶೀಲತಾ ದಾಕಾಯ್ಜೆ ಪಡ್ತಾ. ಆಮ್ಚ್ಯಾ ಪಾತ್ಕಾಂಚಿ ಸಂಖ್ಯಾ ಉಣಿ ಆಸೊಂಕ್ ಪುರೊ ಪುಣ್ ನಿಮಾಣೆ ಆಮ್ಚೆಂ ಮೌಲ್ಯ್ ಉಣೆಂಚ್ ಮ್ಹಣ್ಯೆತ್.
ಹಾಂವ್ ಆಂತರಿಕ್ ಜಾವ್ನ್ ಪೊಕೊಳ್ ಮ್ಹನಿಸ್. ಪ್ರಾಜಿತ್ ಕರ್ಚೆಂ ತಸಲೆಂ ವಾಯ್ಟ್ ಹಾಂವೆ ಆಧಾರುಂಕ್ ನಾ. ಗರ್ವ್ ಭಗ್ಚೆಂ ತಸಲೆಂ ಬರೆಂಯೀ ಕರುಂಕ್ ನಾ! ಝಜ್ಚೆ ತಸಲೆ ವಿಷಯ್ ಜಾಂವ್, ಝಜ್ಲ್ಲೆ ಮಾವ್ಯೀ ಮ್ಹಜೆ ಥೈಂ ನಾಂತ್. ಬ್ಲೇಸ್ ಮೆರ್ಡಿತ್ ಮ್ಹಣಾಲೊ.
ಕಾಡ್ದಿನಾಲ್ ಮಾರೊಟ್ಟಾ ಆರಾಮಾಯೆನ್ ಕದೆಲಾಕ್ ವೊಣ್ಕೊನ್ ಬಸ್ಲೊ ಅನಿ ಆಪ್ಲ್ಯಾ ಗೊವ್ಳಿಕ್ ಮುದಿಯೆಚ್ಯಾ ಹಳ್ದುವ್ಯಾ ಫಾತ್ರಾಚೆರ್ ಬೋಟ್ ಭಂವ್ಡಾಯ್ಲಾಗ್ಲೊ. ತುಜಿ ಖುಶಿ ತರ್, ಹಾಂವ್ ತುಕಾ ಸುಟ್ಕಾ ದಿತಾಂ. ತುಂವೆ ತುಜೆ ಉರ್ಲ್ಲೆ ದೀಸ್ ಆರಾಮಾಯೆನ್ ಸಾರ್ಯೆತ್. ತಾಣೆ ಚಿಂತುನ್ ಮ್ಹಳೆಂ.
ಬ್ಲೇಸ್ ಮೆರ್ಡಿತಾನ್ ’ನಾ’ ಮ್ಹಣ್ಚೆ ಬರಿಂ ತಕ್ಲಿ ಹಾಲಾಯ್ಲಿ. ತುಮ್ಚಿ ದಯಾಳಾಯ್ ವ್ಹರ್ತಿ ಮಾನಧಿಕ್ ಬಾಪಾ. ಪುಣ್ ಹಾಂವ್ ಕ್ರಿಯಾಳ್ ಆಸೊಂಕ್ ಆಶೆತಾಂ.
ಪುಣ್ ಏಕ್ ದೀಸ್ ತುಂವೆ ಥಾಂಬಾಜಾಯ್ ಪಡ್ತೆಲೆಂ. ಉಪ್ರಾಂತ್?
ಹಾಂವ್ ಆಸ್ಪತ್ರೆಕ್ ಭರ್ತಿ ಜಾತಾಂ. ತ್ಯಾ ನಂತರ್... ತಾಣೆ ಹಾರ್ವಾಲ್ಲ್ಯಾ ಬಾಶೆನ್ ಹಾತ್ ಉಸಯ್ಲೆ. Finita la commedia! (ನಾಟಕ್ ಸಂಪ್ಲೊ!) ಹಾಂವೆ ವಿಚಾರ್ಚೆಂ ಚಡಿತ್ ಜಾಲೆಂ ಮ್ಹಣ್ ತುಮ್ಕಾಂ ಭಗಾನಾತ್ಲ್ಯಾರ್ ಬಾಪಾನೊಂ, ಮ್ಹಾಕಾ ತುಮ್ಚ್ಯಾ ಇಗರ್ಜಿಂತ್ಚ್ ನಿಕೆಪಿಜೆ.
ಕಾಡ್ದಿನಾಲ್ ಮಾರೊಟ್ಟಾ ಬ್ಲೇಸ್ ಮೆರ್ಡಿತಾಚಿ ನಿಮಾಣಿ ಆಶಾ ಆಯ್ಕೊನ್ ಭಾವುಕ್ ಜಾಲೊ. ತಾಚ್ಯಾ ಧೈರಾ ಥೈಂ ತಾಕಾ ಅಭಿಮಾನ್ ಭರೊನ್ ಆಯ್ಲೊ. ತೊ ಆಪ್ಲ್ಯಾ ಕಾಲ್ವಾರಿ ಥೈಂ ಇಂಗ್ಲಿಷ್ ಘನತೆನ್ ಮೆಟಾ ಕಾಡುನ್ ಆಸ್ಲೊ. ತುಂವೆ ಕೆದ್ನಾಂಯ್, ತುಂವೆ ಚಿಂತ್ಲ್ಲೆ ಪ್ರಾಸ್, ಆನಿ ಆಮಿಂ ವಿಚಾರ್ಲ್ಲೆ ಪ್ರಾಸ್ ಚಡ್ತಿಕ್ ದಿಲಾಂಯ್ ಮ್ಹಜಾ ಇಷ್ಟಾ. ತಾಣೆ ವೊಳೂ ಮ್ಹಳೆಂ. ತುಂವೆ ಆತಾಂಯ್, ಎಕಾ ವಿಶೇಸ್ ರಿತಿನ್ ಮ್ಹಾಕಾ ಕುಮಕ್ ಕರ್ಯೆತ್.. ತೊ ಘಡಿಭರ್ ರಾವೊನ್ ಚಿಂತುಂಕ್ ಪಡ್ಲೊ. ಉಪ್ರಾಂತ್ ಮ್ಹಣಾಲೊ, ಹ್ಯಾ ವರ್ವಿಂ ತುಂವೆ, ಎಕಾ ರಿತಿನ್ ತುಜಿ ಯೀ ಮಜತ್ ಕರುವ್ಯೆತ್.
ಕಾಡ್ದಿನಾಲ್ ಮಾರೊಟ್ಟಾನ್ ತಾಕಾ ವಾಲೆಂತಾಚ್ಯಾ ಭಿಸ್ಪಾಚ್ಯಾ ಪತ್ರಾಚಿ ಗಜಾಲ್ ಆನಿ ಜಿಯಾಕೊಮೊ ನೆರೊನ್ ಹಾಚೆ ವಿಶಿಂ ಸಂಕ್ಷಿಪ್ತಾಯೆನ್ ಕಳಯ್ಲೆಂ ಆನಿ ತಾಕಾ ’ಸೈತಾನಾಚೊ ವಕೀಲ್’ ಜಾಂವ್ಕ್ ಮನ್ ಆಸಾಗಿ ಮ್ಹಣೊನ್ ವಿಚಾರ್ಲೆಂ.
ಮೊನ್ಸಿಜ್ಞೊರ್ ಬ್ಲೇಸ್ ಮೆರ್ಡಿತಾನ್, ಎಕಾ ವೃತ್ತಿಪರ್ ವಕೀಲಾ ಬರಿಂ ಕಾಡ್ದಿನಾಲಾಚಿಂ ಉತ್ರಾಂ ಚೀತ್ ದೀವ್ನ್ ಆಯ್ಕಾಲಿಂ. ತಾಚ್ಯಾ ದೊಳ್ಯಾಂನಿ ಏಕ್ ಅಥ್ವೊಚ್ ಪ್ರಕಾಸ್ ತಶೆಂ ತಾಚ್ಯಾ ತೊಂಡಾರ್ ತಾಂಬ್ಸೊ ರಂಗ್ ಚರೊನ್ ಯೆಂವ್ಚೊ ಕಾಡ್ದಿನಾಲ್ ಮಾರೊಟ್ಟಾನ್ ದೆಕ್ಲೊ. ಕಾಡ್ದಿನಾಲಾನ್ ಸಾಂಗೊಂಕ್ ಆಸ್ಚೆಂ ತಿರ್ಸಾಲ್ಲೆಂಚ್ ಬ್ಲೇಸ್ ಮೆರ್ಡಿತ್ ಮ್ಹಣಾಲೊ: ಹ್ಯಾ ಪ್ರಕರಣಾಂತ್ ಮ್ಹಾಕಾ ರಾಜಕೀಯಾಚೊ ವಾಸ್ ಮಾರ್ತೇ ಆಸ್ಚೊ ದಿಸ್ತಾ! ಹೆಂ ಮ್ಹಾಕಾ ಬರೆಂ ಲಾಗ್ತೆತ್ ನಾ!
ಇಗರ್ಜ್ಮಾತೆ ಭಿತೆರ್ ಘಡ್ಚಾ ಸರ್ವ್ ಗಜಾಲಿಂ ಥಾವ್ನ್ ರಾಜಕೀಯ್ ಮೆಕ್ಳೆಂ ಕರುಂಕ್ ಜಾಯ್ನಾ ಮೆರ್ಡಿತ್! ಕಾಡ್ದಿನಾಲಾನ್ ತಾಕಾ ಉಗ್ಡಾಸ್ ದಿಲೊ. ಮ್ಹನಿಸ್, ಅಮರ್ ಆತ್ಮೊ ಆಸ್ಚಿ ರಾಜಕೀಯ್ ಮನ್ಜಾತ್. ತಾಕಾ ತುಂ ವಿಭಜಿತ್ ಕರುಂಕ್ ಸಕ್ಚೊ ನಾಂಯ್. ತಶೆಂಚ್ ಪವಿತ್ರ್ಸಭೆಕ್ಯೀ ತುಂವೆ ಸಮಗ್ರ್ ಜಾವ್ನ್ ಪಳೆಜೆ ಶಿವಾಯ್, ಇತ್ಲೆಂ ರಾಜಕೀಯ್, ಇತ್ಲೆಂ ಸಾಮಾಜಿಕ್ ಆನಿ ಇತ್ಲೆಂ ಆಧ್ಯಾತ್ಮಿಕ್ ಮ್ಹಣೊನ್ ವಿವಿಂಗಡ್ ಕರುಂಕ್ ಜಾಯ್ನಾ! ಇಗರ್ಜ್ಮಾತಾ ಸಾಂಸಾರಿಕ್ ಗಜಾಲಿಂಕ್ ಆಧ್ಯಾತ್ಮಿಕ್ ಸ್ಪರ್ಶ್ ದಿತಾ. ಉಧಾಹರಣಾಕ್ ಆಮಿ ಎಕಾ ಸಾಂತಾಕ್ ಟೆಲಿವಿಶನಾಚೊ ಪಾತ್ರೊನ್ ಮ್ಹಣೊನ್ ವೊಲಾಯ್ತಾಂವ್. ಹಾಚೊ ಅರ್ಥ್ ಕಿತೆಂ? ಎಕಾ ಪುರಾತನ್ ಸತಾಕ್ ನವೊ ಸಂಕೇತ್. ಹರ್ ಏಕ್ ಕಾನೂನಾತ್ಮಕ್ ಚಟುವಟಿಕಾ ಬರ್ಯಾಕ್ ಯೀ ಗಳ್ಸಿವ್ಯೆತ್ ತಶೆಂಚ್ ವಾಯ್ಟಾಕ್ ಯೀ.
ಸಾಂತಾಂಚಿ ಖಾತಡ್ ಯೀ ಸಾಂತಿಪಣಾಚ್ಯಾ ಪವಿತ್ರತೆಕ್ ಮಾರಕ್ ಜಾಯ್ತ್! ಮೆರ್ಡಿತ್ ಮ್ಹಣಾಲೊ. ಮ್ಹಜಾ ಅಭಿಪ್ರಾಯೆ ಫರ್ಮಾಣೆ ಕೆಲೆಂಡ್ರಾರ್ ಸಾಂತಾಂಕ್ ಭರ್ಚ್ಯಾಕೀ ತಾಂಕಾ ಭಾಯ್ರ್ ಧವರ್ಲ್ಯಾರ್ ಬರೆಂ. ದುಸ್ರೆಂ, ಹ್ಯಾ ತನ್ಕೆಚೊ ವೇಳ್ ಯೀ ಸಮಂಜಸ್ ನ್ಹಯ್. ನೆರೊನಾಕ್ ಕೊಮ್ಯುನಿಸ್ತಾನಿಂ ಜಿವೆಶಿಂ ಮಾರ್ಲ್ಲೊ. ಆಮಿಂ ಕಿತೆಂ ಕರುನ್ ಆಸಾಂವ್? ಪ್ರಾಂತೀಯ್ ಚುನಾವಾಂತ್ ಏಕ್ ದೋನ್ ಬಸ್ಕಾ ಜಿಕುಂಕ್ ಹೆಂ ಸರ್ಕಸ್? ವ ಮಾಡ್ತಿರ್ಪಣಾಚೆಂ ಜೈತ್?’
ಕಾಡ್ದಿನಾಲಾಚೆ ತಾಂಬ್ಡೆ ವೋಂಠ್ ವ್ಯಂಗ್ಯಾನ್ ದೊಡ್ಲೆ.
ಮ್ಹಾಕಾ ದಿಸ್ತಾ ಆಮ್ಚಾ ಭಿಸ್ಪಾಕ್ ಎಕಾ ಫಾತ್ರಾಕ್ ದೊನೀ ಸುಕ್ಣಿಂ ಜಾಯ್! ಥೊಡ್ಯಾ ಮಟ್ಟಾಕ್ ತಾಕಾ ಲಾಬ್ತೆಲಿಂಯ್ ಮ್ಹಣ್ಯೆತ್. ತನ್ಕಿ ನಿರಾಕರ್ಸುಂಕ್ ಆಮ್ಕಾಂ ಅಧಿಕಾರ್ ನಾ. ಮುಕ್ಲೆಂ ಹಂತ್ ಜಾವ್ನಾಸಾ ಭಿಸ್ಪಾಚ್ಯಾ ಕೊಡ್ತಿಂತ್ ಭಾಗೆವಂತ್ ಮ್ಹಣೊನ್ ಪಾಸಾರ್ಚಿ ಪ್ರಕ್ರಿಯಾ.
ತಶೆಂ ಜಾಲ್ಲೆಂಚ್ ಇಟಲಿಂತ್ಲಿಂ ಸರ್ವ್ ವಾರ್ತಾಪತ್ರಾಂ ಹಿ ಖಬರ್ ಛಾಪುಂಕ್ ಸುರು ಕರ್ತೆಲಿಂ. ತಶೆಂ ಟ್ರಾವೆಲ್ ಏಜೆನ್ಸಿ ವಾಲೆಂತಾಕ್ ಪ್ರವಾಸ್ ಆಯೋಜಿತ್ ಕರುಂಕ್ ಲಾಗ್ತೆಲಿಂ. ಆಮಿಂ ಹೆಂ ಆಡಾಂವ್ಕ್ ಜಾಯ್ನಾ!
ಪುಣ್ ಆಮಿಂ ತೆಂ ನಿಯಂತ್ರಣಾರ್ ಧವರ್ಯೆತ್. ತ್ಯಾಚ್ ದೆಕುನ್ ಆಮ್ಚ್ಯಾ ಗೊವ್ಳಿಬಾಪಾಕ್ ತಾಣೆ ವಿಚಾರ್ಲೆಲ್ಲೆಂ ದೀಂವ್ಕ್ ಹಾಂವೆ ಚಿಂತ್ಲಾಂ. ತ್ಯಾಚ್ ಕಾರಣಾ ಲಾಗೊನ್ ತುಕಾ ’ಸೈತಾನಾಚೊ ವಕೀಲ್’ ಜಾ ಮ್ಹಣೊನ್ ಹಾಂವ್ ವಿಚಾರುನ್ ಆಸಾಂ.
ಮ್ಹಾಕಾ ಕಳ್ಳೆಂ ನಾ!
ಕಾಡ್ದಿನಾಲ್ ಬಾಪ್ ಆಪ್ಲೆಂ ಉಭಾರ್ ಕದೆಲ್ ಪಾಟಿಂ ಲೊಟುನ್ ಉಭಿ ರಾವ್ಲೊ ಆನಿ ಜನೆಲಾ ಕುಶಿಕ್ ಚಲೊನ್ ಗೆಲೊ. ತಾಣೆ ಜನೆಲಾಚಿಂ ದಾಟ್ ಕರ್ಟನಾಂ ದೆಗೆಕ್ ಸರಯ್ಲಿಂ. ಸಾಕಾಳಿಂಚ್ಯಾ ಸುರ್ಯಾಚೆಂ ವೋತ್ ಕುಡಾಂತ್ ಭರ್ಲೆಂ. ತೊ, ಥೊಡೊ ವೇಳ್ ಸಕಯ್ಲ್ ವೊಡ್ತಾಕ್ಚ್ ಪಳೆವ್ನ್ ರಾವ್ಲೊ ಆನಿ ನಂತರ್ ಕರುಣಾಭರಿತ್ ತಾಳ್ಯಾನ್ ಮ್ಹಣಾಲಾಗ್ಲೊ:
ಮೊನ್ಸಿಜ್ಞೊರ್ ತುಂ ಹ್ಯಾ ವಗ್ತಾ ಮಾನಸಿಕ್ ಸಂಘರ್ಶಾಂತ್ ಸಾಂಪಾಡ್ಲಾಯ್ ಮ್ಹಣ್ ಚಿಂತಾಂ. ತುಂ, ರೊಮಾಂತ್ಲ್ಯಾ, ಆಮ್ಚೆ ಬರಿಂಚ್ ಕದೆಲಾಕ್ ಚಿಡ್ಕಾಲ್ಲೊ ಆಡಳ್ತೆದಾರ್. ಇಗರ್ಜಿಚ್ಯಾ ಅಧಿಕಾರಿಶಾಹಿಂತ್ ಆಸ್ಲೆಲ್ಯಾಂತ್ ಕಾಂಯ್ ಉಣೆಪಣ್, ವ ಅವ್ಮರ್ಯಾದ್ ನ್ಹಯ್, ತರೀ ತುಕಾ ಗೊವ್ಳಿಕ್ ವಾವ್ರಾಚೊ ಅನುಭವ್ ಬಿಲ್ಕುಲ್ ನಾ. ತೆಂ ಉಣೆಪಣ್ ತುಂ ಆತಾಂ ಅವ್ಚಿತ್ ಭಗುನ್ ಆಸಾಯ್. ಆಮ್ಕಾಂ ದೆವಾ ಲಾಗ್ಗಿಂ ಸಂಪರ್ಕ್ ಜೊಡುನ್ ದಿಂವ್ಚ್ಯಾ ಆಮ್ ಲೊಕಾಚೊ ಸಂಪರ್ಕ್ ಆಮ್ಕಾಂ ನಾ ಜಾಲಾ. ಆಮಿ ಭವಾಡ್ತ್ ಮ್ಹಳ್ಳಲೊ ಸುಕ್ಯಾ ಬೌಧ್ಧಿಕ್ ಮಟ್ಟಾಕ್ ದೆಂವಯ್ಲಾ. ಕಿತ್ಯಾಕ್, ಭವಾಡ್ತ್, ಆಮ್ ಲೊಕಾಂಚ್ಯಾ ಜೀವನಾ ಸ್ತರಾರ್ ತೊ ಕಸೊ ಗಳ್ಸತಾ ಮ್ಹಳ್ಳೆಂ ಆಮಿ ನೆಣಾಂವ್. ಆಮಿಂ ದಯಾಳಾಯ್, ಮೋಗ್ ಆನಿ ಭ್ಯೆಂ ಹೊಗ್ಡಾವ್ನ್ ಘೆತ್ಲಾಂ. ಹ್ಯಾ ತನ್ಕೆ ಲಾಗೊನ್ ತುಂವೆ ಇಟೆಲಿಚ್ಯಾ ಎಕಾ ಅತೀ ದುಬ್ಳ್ಯಾ ಪ್ರದೇಶಾಕ್ ವಚಾಜೆ ಪಡ್ತೆಲೆಂ. ತುಂ ತ್ಯಾ ಸರ್ಲ್ಲ್ಯಾ ವೆಕ್ತಿಚೆಂ ಜಿವಿತ್ ತಾಚೆ ಸಂಗಿ ಜಿಯೆಲ್ಲ್ಯಾಂಚ್ಯಾ ಸಂದರ್ಶನಾಚ್ಯಾ ಆಧಾರಾರ್ ಪುನರ್ ರೂಪಿತ್ ಕರ್ತಾಯ್. ತುಂ, ಬೋವ್ ಸಾದ್ಯಾ, ದುಬ್ಳ್ಯಾ ಆನಿ ಅನಕ್ಷರಸ್ತ್, ನೆಣಾರಿ ಲೊಕಾ ಮಧೆಂ ಜಿಯೆತೆಲೊಯ್. ಬಹುಶಾಃ ತಾಂಚೆ ಥಾವ್ನ್ ತುಜಾ ಕುಸ್ಕೆಲ್ಲ್ಯಾ ಚೇತನಾಚ್ಯಾ ಪಿಡೆಕ್ ವಕಾತ್ ಮೆಳೊಂಕ್ ಪುರೊ.
ಮ್ಹಜಿ ಪಿಡಾ ತರೀ ಕಸಲಿ ಬಾಪಾನೊಂ?
ಮೊನ್ಸಿಜ್ಞೊರ್ ಬ್ಲೇಸ್ ಮೆರ್ಡಿತಾಚ್ಯಾ ವದನಾರ್ ಉದೆಲ್ಲಿ ಅಸಹಾಯಕತಾ, ಮುಗ್ಧತಾ ಕಾಡ್ದಿನಾಲ್ ಮಾರೊಟ್ಟಾಚ್ಯಾ ಕಾಳ್ಜಾಕ್ ತೊಪ್ಲಿ. ಕಾಡ್ದಿನಾಲ್ ವೊಡ್ತಾ ವಯ್ಲಿ ದೀಶ್ಟ್ ಕಾಡ್ನ್ ಪಾಟಿಂ, ಮೆರ್ಡಿತಾ ಕುಶಿಕ್ ಘುಂವ್ಲೊ. ಮೆರ್ಡಿತ್ ಕದೆಲಾರ್ ಎಕಾ ನಿರ್ಜೀವ್ ಮೂರ್ತೆ ಬರಿಂ ಗಳ್ಲ್ಲೊ. ತಾಣೆ ಆಪ್ಲೆಂ ಮುಕಮಳ್ ದೊನೀ ತಳ್ ಹಾತಾನಿಂ ಲಿಪಯಿಲ್ಲೆಂ. ಕಾಡ್ದಿನಾಲ್ ಗಂಭೀರಾಯೆನ್ ಸಾಂಗಾಲಾಗ್ಲೊ:
ತುಜಾ ಜಿಣ್ಯೆಂತ್ಲೊ ಪಾಶಾಂವ್ ನಿಂವೊನ್ ಗೆಲಾ ಮ್ಹಜಾ ಪುತಾ ಮೆರ್ಡಿತ್. ತುಂವೆ ಎಕಾ ಸ್ತ್ರೀಯೆಚೊ ಮೋಗ್ ಕರುಂಕ್ನಾಯ್, ನಾ ಎಕಾ ಭುರ್ಗ್ಯಾಕ್ ಉಕಲ್ನ್ ಏಕ್ ಉಮೊ ದಿಲಾಯ್, ನಾ ಎಕಾ ದಾದ್ಲ್ಯಾಚೊ ದ್ವೇಷ್. ತುಂ ಮ್ಹನ್ಶಾ ಕುಟ್ಮಾಕ್ ಎಕ್ಲೊ ಅಪರಿಚಿತ್ ಜಾವ್ನಾಸಾಯ್. ತುಂವೆ ತುಜಾ ಜಿಣಿಯೆ ಥಾವ್ನ್ ಕಿತೆಂಯ್ ವಿಚಾರುಂಕ್ ನಾ, ದೀಂವ್ಕ್ ಯೀ ನಾ. ಹೊ ತುಂವೆಚ್ ತುಜೆಚ್ ಮರ್ಜೆನ್ ರಚ್ಲ್ಲೊ ಖುರಿಸ್. ಹಾಂಗಾಚ್ ತುಜೆ ದುಬಾವ್ ಅನಿ ಭಿರಾಂತ್ ಸುರು ಜಾಲ್ಯಾ. ಕಿತ್ಯಾ, ಜೊ ಕೋಣ್ ಆಪ್ಲ್ಯಾ ಪೆಲ್ಯಾಚೊ ಮೋಗ್ ಕರುಂಕ್ ಸಕಾನಾ, ತೊ ದೆವಾಚೊಯ್ ಮೋಗ್ ಕರುಂಕ್ ಸಕಾನಾ.
ಮೋಗ್ ಕಸೊ ಕರ್ಚೊ ಬಾಪಾನೊಂ?
ಗರ್ಜೆನ್. ಮಾರೊಟ್ಟಾನ್ ಮ್ಹಳೆಂ. ಕುಡಿಚಿ ತಶೆಂ ಆತ್ಮ್ಯಾಚಿ ಗರ್ಜ್.
ಹಾಂವ್ ಮಸ್ತು ಪುರಾಸ್ಲಾಂ ಬಾಪಾನೊಂ. ಬ್ಲೇಸ್ ಮೆರ್ಡಿತ್ ಉಸ್ಮಡ್ಲೊ.
ಘರಾ ವಚೊನ್ ವಿಶೆವ್ ಘೆ. ಮಾರೊಟ್ಟಾನ್ ಮ್ಹಳೆಂ. ಫಾಲ್ಯಾಂ ಸಾಕಾಳಿಂ ತುಂವೆ ಕೆಲಬ್ರಿಯಾ ಕುಶಿಕ್ ಪಯ್ಣ್ ಕರ್ಯೆತ್. ವಾಲೆಂತಾಚ್ಯಾ ಭಿಸ್ಪಾಕ್ ವಚೊನ್ ಮೇಳ್ ಆನಿ ತುಜೆಂ ಕಾಮ್ ಸುರು ಕರ್.
ತುಮಿಂ ಕಠೋರ್ ಮ್ಹನಿಸ್ ಬಾಪಾನೊಂ. ಮೆರ್ಡಿತ್ ಹುಸ್ಕಾರ್ಲೊ.
ಮ್ಹನಿಸ್ ಸದಾಂ ಮೊರ್ತಾತ್. ಕಾಡ್ದಿನಾಲ್ ಮಾರೊಟ್ಟಾನ್ ನಿಷ್ಟುರಾಯೆನ್ ಮ್ಹಳೆಂ. ಥೊಡೆ ಸಾಲ್ವಾಸಾಂವ್ ಜೊಡ್ತಾತ್ ಆನಿ ಥೊಡೆ ಶಿರಾಪಾಕ್ ಉಂಡಿ ಜಾವ್ನ್ ನಾಸ್ ಜಾತಾತ್. ಪುಣ್ ಇಗರ್ಜಿಚೊ ವಾವ್ರ್ ಮುಂದರೊನ್ ವೆತಾ. ದೆವಾಚ್ಯಾ ನಾಂವೀ ಶಾಂತೆನ್ ಆನಿ ಸಮಧಾನೆನ್ ವಚ್ ಪುತಾ!