ಕಾಳೊಕಾಚ್ಯಾ ಕೊನ್ಶ್ಯಾರ್

ಜಿಣ್ಯೆಂತ್ ಎಕಾ ವಸ್ತುಚೆ ಜಾಂವ್, ಸಂಬಂಧಾಚೆ ಜಾಂವ್ ಮೋಲ್ ಕಳ್ತಾ ಜೆದ್ನಾಂ ಆಮಿ ತಿ ವಸ್ತ್ ವಾ ಸಂಬಂಧ್ ಹೊಗ್ಡಾವ್ನ್ ಘೆತಾಂವ್ ತೆದ್ನಾಂ. ಮನಿಸ್ ಮುಕಾರ್ ಪಾಂವ್ಚೆಂ ಸ್ವಾಭಾವಿಕ್, ಜಿತ್ಲೊ ಮುಕಾರ್ ತೊ ವೆತಾ ತಿತ್ಲೆಚ್ ಮಾಪಾನ್ ತೊ ಆಪ್ಲ್ಯಾ ಯಾದಿಚ್ಯಾ ಖೊವ್ಳಾಂಕ್ ಪಾಟಿಂ ಸೊಡುನ್ ವೆತಾ. ಹೆಂ ಸೈಂಬಿಕ್, ಸ್ವಾಭಾವಿಕ್.

ಉಲ್ಲಾಳ್‌ಚ್ಯಾ ಪಾನೇರ್ ಫಿರ್ಗಜೆಚೊ ಅರ್ಜುನ್ ಲುವಿಸ್ ಕಾನಡಿ ಭಾಸೆಂತ್ ಆಯ್ಲೆವಾರ್ ಉದೆಲ್ಲೊ ಕಾವ್ಯಾಳ್ ಬೊಂಗೊ, ಅಪ್ಲ್ಯಾ ಪ್ರತಿಭೆಧ್ವಾರಿಂ ಹೆರ್ ಕವಿಂಚೆಂ ಗಮನ್ ಅಪ್ಣಾಶಿಂ ವೊಡುಂಕ್ ಸಕ್ಲಾ, ಕೊಂಕ್ಣೆಂತ್ ಪರ್ಗಟ್ ಜಾಂವ್ಚಿ ತಾಚಿ ಹಿ ಪಯ್ಲಿ ಕವಿತಾ ತರ್‌ಯೀ, ಫುದಿಲ್ಯಾ ದಿಸಾಂನಿ ಅಪುರ್ಭಾಯೆಚಿಂ ಕವಿತಾ ತಾಚೆಥಾವ್ನ್ ವ್ಹಾಳುಂದಿ ಆನಿ ಕೊಂಕ್ಣಿ ಕವಿತಾಶೆತ್ ಗ್ರೇಸ್ತ್ ಕರ್ಚ್ಯಾಕ್ ಕಾರಣ್ ಜಾಂವ್ದಿ ಮ್ಹಣುನ್ ಆಂವ್ಡೆತಾಂ.

ಪಾಯ್ಸ್ ಪಾವ್‌ಲ್ಲ್ಯಾ ಆಪ್ಲ್ಯಾಚಿಂ ವಾಟ್ ರಾಕುನ್ ಆಸ್ಚೆಂ ಸ್ವಾಭಾವಿಕ್. ಹಾಂಗಾಸರ್‌ಯೀ ತಸಲ್ಯಾ ಅತ್ರೆಗಾನ್ ವಾಟ್ ರಾಕ್ಚೆಂ ಏಕ್ ಸ್ವಪಾಣ್ ಆಸಾ, ಉತ್ರಾಂ ಉತ್ರಾಂನಿ ಕಾವ್ಯಾಳ್ ಇಮಾಜಿ ಉಭ್ಯೊ ಕರುನ್ ತುಜಿ ವಾಟ್ ರಾಕುನ್ ಆಸಾಂ ಮ್ಹಣ್ಚೊ ಕವಿ ಕೊಣಾಚಿ ವಾಟ್ ಕಾರುನ್ ಆಸಾ ಮ್ಹಳ್ಳೆಂ ಪಾರ್ಕುಂಕ್ ತುಮ್ಕಾಂಚ್ ಸೊಡ್ತಾಂ.

ಕಾಳೊಕಾಚ್ಯಾ ಕೊನ್ಶ್ಯಾರ್

ಲ್ಹಾನ್‌ಶಿ ವಾತ್ ಪೆಟ್ತಾ ಪಳೆ

ತಿ ಮ್ಹಜ್ಯಾ ಸ್ವಪ್ಣಾಂಚ್ಯಾ

ಕಿಟಳಾಂನಿ ಪೆಟಯಿಲ್ಲಿ

ಮಿಣ್ಕುಂಚಿ ವಾತ್ ತಿ, ದಯಾ ದಾಕಯ್;

ಪಾಲ್ವಯ್ನಾಕಾ..

ದೊಳ್ಯಾಂಕ್ ಪಡ್‌ಲ್ಲೆಂ

ನಿರಾಸ್‌ಪಣಾಚೆಂ ಧಾಂಪಣ್;

ತುವೆಂಚ್ ಕಾಡ್ಚ್ಯಾಕ್ ರಾಕುನ್ ಆಸಾಂ.

ಧವ್ಯಾ ಕೆಸಾಂಕ್

ಕಾಳೊ ರಂಗ್ ಸಾರವ್ನ್,

ತುಜೆಲಾಗಿಂ ನವೊ ಜಾತಾಂ.

ಗೊಬೊರ್ ಪುಸುನ್ ನ್ಹಾವ್ನ್,

ಸಂಪೂರ್ಣ್ ನಿತಳ್ ಜಾತಾಂ.

ಘಾಯೆಲ್ಲ್ಯಾ ಕಾಳ್ಜಾಕ್

ಸಮಧಾನೆಚೊ ಕೊಪೊ ಮಾರುನ್

ವಾಟ್ ರಾಕುನ್ ಆಸಾಂ..

ವ್ಹಡಾ ಅತ್ರೆಗಾನ್

ತುಜಿ ವಾಟ್ ರಾಕುನ್ ಆಸಾಂ..

- ಅರ್ಜುನ್ ಲುವಿಸ್, ಪಾಣೇರ್ (ಉಲ್ಲಾಳ್)

ಅರ್ಜುನ್ ಲುವಿಸ್: ಉಲ್ಲಾಳ್‌ಚ್ಯಾ ಪಾಣೇರ್ ಫಿರ್ಗಜೆಚೊ ಅರ್ಜುನ್ ಲುವಿಸ್ ಕಾನಡಿ ಭಾಸೆಂತ್ ಆಯ್ಲೆವಾರ್ ಉದೆಲ್ಲೊ ಕಾವ್ಯಾಳ್ ಬೊಂಗೊ, ಕೊಂಕ್ಣೆಂತ್ ಸಯ್ತ್ ಆಪ್ಲಿ ಕವಿತಾಪ್ರತಿಭಾ ಘೆವ್ನ್ ಆಯ್ಲಾ. ಕವಿತಾಶಿವಾಯ್ ಲೇಖನಾಂ ಸಯ್ತ್ ಬರಂವ್ಚೆಂ ದೆಣೆಂ ಹಾಕಾ ಆಸಾ.