dhorlea ami ghorchi vatt

dhorlea ami ghorchi vatt

tollveank fodd, jivit zodd

votant amchi bhajlea fatt

pottak kholli, riti zholli

dolleant dukam zaleat datt

haloun hat, 'mon ki bat'

kitlem sompem nhoi

'atmonirbhor' divonk patth???

ami zatat, ten'nach mortat

zogunk fokt moddim baki

tumche vantte, bhangra gotte

amchi mat chuluy dukhi

lakh kotti, jinn khotti

amcho nhoi ho xobd 'sukhi'

kitlem sompem nhoi

'atmonirbhor' divonk dekhi???

amchi bhukh, amchich chuk

atam tori ailam kollun

amchem moronn, amchem soronn

zolmotanch aileat dallun

amchi jinn, vhoddlo xinn

tumi-i amkam kaddleat pillun

'atmonirbhor' mhonnche poilim

ekdam tori pollouxi vollun???

Ho soim' rochotlea devan zonn ekleak ap-aple porin jiepachi mekllik dilea khori punn te toxi jinn zogta kaim na he ghoddye devak legit khobor aschi na. Inglixent ami mhonntta some people are born with silver spoon in their hand. Kaim zann hatant chandicho chomcho gheun zolmank yeta hi zori gozal khori punn tanchi jinn sukhi va tanchea jinnent kainch komi nasta oxem amkam disot punn tem ghoddye toxem nasot tankai bi koslem tori gozalincho unnou asum yeta. Tanche lagi zaito poiso lot'to aslo tori tachea jivitant sukh astolench oxem mhonnop chukichem zatlem. Zonn ek monxak addkholli par korcheoch poddtta. Jivitache vatter katteari mellttat ti katteari pois korun mukhar vochpachi tank zonn eklean douropak zai. Zoxi dorear sukti ani bhorti yeta techpori monxache jinnent legit choddtti ani demvti yeta. Hem soimache dennem te konnak chukna.

Bai Guadalupe Dias hancheo kovita rosall jinnechi vastovita prokott korpi oxeo. Tancheo kovita somvedonoxil zal'lean vachpeachea monak churko laun vota. ‘atmonirbhor’ hem kovitent jinnechi rit dixtti poddtta. Kosli-i gozal sangpak sopi punn ti aplea jivitant utrun haddpak sopi ni mhonn tanche umalle ukte zatat. Kamam dhondeachea nimtan monis aplo gamv ghordar soddun bhailea gamvat yetat pottachi kholli bhorpak hal upadre sostat. Bhurgim ballank bore toren vaddoupache tanche sopon sopnuch zaun rauta. Halimsoram ji tham' somvsarar patllil'lea taka lagun lok aplea gamv ghora vochpak bhair soril'leache chitr disot astona boryil'li hi kovita vachkak vichar korpak laita. Voir mhonnil'lea promann tancho zolm' astik ghorabeat zaunk na tanchi pottam disouddeachea pogarar cholta. Kam' mell'llear ghorant chul pett'ttoli nazalear pott tekun nhidop hoch ek upai, zolm' ditlea pormexvorak tim ken'nach xinn'na. Kobadd koxtt korun zogop hench te zannant. Oxa tancher ayil'lea arixtta vellar dexacho neta atmonirbhor raupacho sondex dita tor dusreutten he babdde lok gaddi na ghoddo aplea gamvche ani thoim axil'lea tanchea lokamodim vochunk bhair sorta tancher ayil'lea sonkxttanche matui konnak poddunk na punn atmonirbhor zaupacho sondex mat tem divonk onmononat.

Ami zogtat, ten'nach mortat

zogunk fokt moddim baki

he pongtent ayil'leo heo volli konnakoi vichar korpak laitleo kouyitrik ghoddye tancho churko aila tanchi ovdoxa polloun ti mhonntta ami zogtat, ten'nach mortat, tumche vatte, bhangra gotte. Zolm' bhor tanni dukhnni kaddop ani hea netani ani tanchea kouxleacho faido gheupi tanche malok zaun apli jinn fuloili. Toxench fokot boddhayo marop borem kam' kel'leacho fokot avo haddop he soma ni. Hea somvsarant ekachea vatteak soglleo sukhacheo vostu zalear dusre votten zogop mhonnlearuch tanche moronn zal'le asa tanchea noxibant don vellche jeunn mellop kustar zaun boslam oxa vellar atmonirbhor zaupacho sondex mhonnlear gorib lokanchi maril'li fokanddam tharta. Hat voir korun mon ki bat korpak kaim koxtt poddna. Konknnint ek mhonn asa ‘zachem zolltta takach kolltta.’ dekhun fokot tonddacheo fottaxeo mal'leo mhonn zaina teo marchea poili mulla meren paupak zai tancheo gorzo kitem tanka hea sonkxttatolean vattaitole koxe hacher vichar zaupak zai axil'lo to zaunk na oxench mhonnchem poddttolem.

Dusri gozal bai gvadlup ddais mhonnpak sodta ti mhonnlear zonn eklean tanche soxonn kel'lem asa tanchekoddlean vaur korun gheup punn tanta tanchea vaurachem sarke mol farik zaunk naxil'lean tancher hi vell ailea. Zolmotach tanche soronn dallun douril'lem asta oxem mhonnpi kouyitrik kitlo kolloullo hea lokacho hachi zann vachotleak zata. Inglixant anik ek mhonn asa ti mhonnlear put (oneself) in (someone’s) shoes dus-yachea buttant pam-i ghalun polloup mhonnttokir tachea payachem zokh kolltta hanga tanche umalle va dukh oxem somzuchem. Bai gvadlup ddais tanchea jivitaxi ekrup zal'leacho bhas hi kovita korun vota. Jivitant kholayen devon porikxonn kel'leanoch oxi rochna toyar zaupak xokta oxem mhojem mot. Hi somaz probodhon korpi kovita mhonnu yeta. Kovitechem koddve matxem vhodd zalam punn manddaull bori zal'leakaronnan vachpak sopi zata.

H. Manoj, June 2020

Purai namv : Manoj Janardhan Halarnekar ttoponn namv : H Manoj

Zolm' : 19 epril 1966

Namv: ‘xantai’ ghor. Som. 141/ef grin vheli, chikhli gõy

Mo. : 9822441417

Veusai : poilim ovr leddi of ddestero haiskul bogda vasko gõy

hanga xikxok mhonn vaur.

Sodhea Regina Munddi Highshcool Chikhli hanga jextth poryovekxok

zaun asa. Hindi, konknni ani noitik vigonean vixeache geli

29 vorsa odheapon kary korta.

• konknni kovita ani lekh borop auddotto chhond zaun asa.

• ‘monobhavo’ kovita songroh prokaxit zauche vatter asa.

• gõychea nemalleamni borop chalu asa toxench kovitai prokaxit zalea.

• okhil gõy konknni madhyomik xikxok songhttonecho upadhyokx zaun asa.

• {U.A.} yu.E onddoresttendding enalisis hi bhurgea khatir ani xikxokam khatir ‘niti muleam atmosant koxi’ korop hacher adaril'li xikxonnik kareavoll taluka mollar tti.Yol.Yos.Sichea palvan veg-vegllea skulamni ghoddoun haddlea.

• sorv xikxa obhianacho taluka mollar proxikxok natean vaur.

• gõy raxttriy madhyomik xikxa obhianachea mollar proxikxok natean vaur.

• gõy madhyomik ani uchch madhyomik xikxonn monddoll altu betim – porvori, gõy hacho veg-vegllea mollacher vaur.

• chikhli ani bogmallo lains klobachea votin xikxonnkxetrantlea yogdanakhatir bhouman 2011.

• yuva xokti samajik somstha naxik hancho raxttri-i somaz probodhon purskar 2012 cho adrx xikxok purskar.

• rottri klob vasko hancho raxttri-i somaz probodhon purskar 2016 cho adrx xikxok purskar.

• inor vhil klob vasko hancho raxttri-i somaz probodhon purskar 2016 cho adrx xikxok purskar.