[ವಿಶ್ಲೇಷಣ್] ಆತ್ಮನಿರ್ಭರ್ ಕವಿ: ಗ್ವಾದಲೂಪ್ ಡಾಯಸ್
ಆತ್ಮನಿರ್ಭರ್ (ಕವಿ: ಗ್ವಾದಲೂಪ್ ಡಾಯಸ್)
ಸಂವ್ಸಾರ್ ಮಾಥ್ಯಾರ್, ಭುರ್ಗಿಂ ಖಾಂದಾರ್
ಧರ್ಲ್ಯಾ ಆಮಿ ಘರ್ಚಿ ವಾಟ್
ತಳ್ವ್ಯಾಂಕ್ ಫೊಡ್, ಜಿವೀತ್ ಜಡ್
ವೊತಾಂತ್ ಆಮ್ಚಿ ಭಾಜ್ಲ್ಯಾ ಫಾಟ್
ಪೊಟಾಕ್ ಖಳಿ, ರಿತಿ ಝೊಳಿ
ದೊಳ್ಯಾಂತ್ ದುಕಾಂ ಜಾಲ್ಯಾತ್ ದಾಟ್
ಹಾಲೊವ್ನ್ ಹಾತ್, 'ಮನ್ ಕಿ ಬಾತ್'
ಕಿತ್ಲೆಂ ಸೊಂಪೆಂ ನ್ಹಯ್
'ಆತ್ಮನಿರ್ಭರ್' ದಿವಂಕ್ ಪಾಠ್???
ಆಮಿ ಜಾತಾತ್, ತೆನ್ನಾಚ್ ಮರ್ತಾತ್
ಜಗೂಂಕ್ ಫಕ್ತ್ ಮಡಿಂ ಬಾಕಿ
ತುಮ್ಚೆ ವಾಂಟೆ, ಭಾಂಗ್ರಾ ಗೊಟೆ
ಆಮ್ಚಿ ಮಾತ್ ಚುಲೂಯ್ ದುಖಿ
ಲಾಖ್ ಕೊಟಿ, ಜೀಣ್ ಖೊಟಿ
ಆಮ್ಚೊ ನ್ಹಯ್ ಹೊ ಶಬ್ದ್ 'ಸುಖಿ'
ಕಿತ್ಲೆಂ ಸೊಂಪೆಂ ನ್ಹಯ್
'ಆತ್ಮನಿರ್ಭರ್' ದಿವಂಕ್ ದೆಖಿ???
ಆಮ್ಚಿ ಭೂಖ್, ಆಮ್ಚೀಚ್ ಚೂಕ್
ಆತಾಂ ತರಿ ಆಯ್ಲಾಂ ಕಳೂನ್
ಆಮ್ಚೆಂ ಮರಣ್, ಆಮ್ಚೆಂ ಸರಣ್
ಜಲ್ಮತಾಂಚ್ ಆಯ್ಲ್ಯಾತ್ ದಾಳೂನ್
ಆಮ್ಚಿ ಜೀಣ್, ವ್ಹಡ್ಲೊ ಶೀಣ್
ತುಮೀಯ್ ಆಮ್ಕಾಂ ಕಾಡ್ಲ್ಯಾತ್ ಪಿಳೂನ್
'ಆತ್ಮನಿರ್ಭರ್' ಮ್ಹಣ್ಚೆ ಪಯ್ಲಿಂ
ಎಕ್ದಾಂ ತರಿ ಪಳೊವ್ಶಿ ವಳೂನ್???
ಹೊ ಸೈಮ್ ರಚತ್ಲ್ಯಾ ದೆವಾನ್ ಜಣ್ ಎಕ್ಲ್ಯಾಕ್ ಆಪ್-ಆಪ್ಲೆ ಪರೀನ್ ಜಿಯೆಪಾಚಿ ಮೆಕ್ಳೀಕ್ ದಿಲ್ಯಾ ಖರಿ ಪೂಣ್ ತೆ ತಶಿ ಜಿಣ್ ಜಗ್ತಾ ಕಾಂಯ್ ನಾ ಹೆ ಘಡ್ಯೆ ದೆವಾಕ್ ಲೆಗೀತ್ ಖಬರ್ ಆಸ್ಚಿ ನಾ. ಇಂಗ್ಲಿಶೆಂತ್ ಆಮಿ ಮ್ಹಣ್ಟಾ some people are born with silver spoon in their hand. ಕಾಂಯ್ ಜಾಣ್ ಹಾತಾಂತ್ ಚಾಂದೀಚೊ ಚಮ್ಚೊ ಘೆವ್ನ್ ಜಲ್ಮಾಂಕ್ ಯೆತಾ ಹಿ ಜರಿ ಗಜಾಲ್ ಖರಿ ಪೂಣ್ ತಾಂಚಿ ಜಿಣ್ ಸುಖಿ ವಾ ತಾಂಚ್ಯಾ ಜಿಣೆಂತ್ ಕಾಂಯ್ಚ್ ಕಮಿ ನಾಸ್ತಾ ಅಶೆಂ ಆಮ್ಕಾಂ ದಿಸತ್ ಪೂಣ್ ತೆಂ ಘಡ್ಯೆ ತಶೆಂ ನಾಸತ್ ತಾಂಕಾಯ್ ಬಿ ಕಸ್ಲೆಂ ತರಿ ಗಜಾಲೀಂಚೊ ಉಣವ್ ಆಸುಂ ಯೆತಾ. ತಾಂಚೆ ಲಾಗಿ ಜಾಯ್ತೊ ಪಯ್ಸೊ ಲತ್ತೊ ಆಸ್ಲೊ ತರಿ ತಾಚ್ಯಾ ಜಿವಿತಾಂತ್ ಸುಖ್ ಆಸ್ತಲೆಂಚ್ ಅಶೆಂ ಮ್ಹಣಪ್ ಚುಕಿಚೆಂ ಜಾತ್ಲೆಂ. ಜಣ್ ಎಕ್ ಮನ್ಶಾಕ್ ಆಡ್ಖಳಿ ಪಾರ್ ಕರ್ಚ್ಯೊಚ್ ಪಡ್ಟಾ. ಜಿವಿತಾಚೆ ವಾಟೆರ್ ಕಾಟ್ಯಾರಿ ಮೆಳ್ಟಾತ್ ತಿ ಕಾಟ್ಯಾರಿ ಪಯ್ಸ್ ಕರುನ್ ಮುಖಾರ್ ವಚ್ಪಾಚಿ ತಾಂಕ್ ಜಣ್ ಎಕ್ಲ್ಯಾನ್ ದವ್ರಪಾಕ್ ಜಾಯ್. ಜಶಿ ದರ್ಯಾರ್ ಸುಕ್ತಿ ಆನಿ ಭರ್ತಿ ಯೆತಾ ತೆಚ್ಪರಿ ಮನ್ಶಾಚೆ ಜಿಣೆಂತ್ ಲೆಗೀತ್ ಚಡ್ಟಿ ಆನಿ ದೆಂವ್ತಿ ಯೆತಾ. ಹೆಂ ಸೈಮಾಚೆ ದೆಣೆಂ ತೆ ಕೊಣಾಕ್ ಚುಕ್ನಾ.
ಬಾಯ್ ಗ್ವಾದಲೂಪ್ ಡಾಯಸ್ ಹಾಂಚ್ಯೊ ಕವಿತಾ ರಸಾಳ್ ಜಿಣೆಚಿ ವಾಸ್ತವಿತಾ ಪ್ರಕಟ್ ಕರ್ಪಿ ಅಶ್ಯೊ. ತಾಂಚ್ಯೊ ಕವಿತಾ ಸಂವೆದನಶೀಲ್ ಜಾಲ್ಲ್ಯಾನ್ ವಾಚ್ಪ್ಯಾಚ್ಯಾ ಮನಾಕ್ ಚುರ್ಕೊ ಲಾವ್ನ್ ವತಾ. ‘ಆತ್ಮನಿರ್ಭರ್’ ಹೆಂ ಕವಿತೆಂತ್ ಜಿಣೆಚಿ ರೀತ್ ದಿಶ್ಟಿ ಪಡ್ಟಾ. ಕಸ್ಲೀಯ್ ಗಜಾಲ್ ಸಾಂಗ್ಪಾಕ್ ಸೊಪಿ ಪೂಣ್ ತಿ ಆಪ್ಲ್ಯಾ ಜಿವಿತಾಂತ್ ಉತ್ರುನ್ ಹಾಡ್ಪಾಕ್ ಸೊಪಿ ನಿ ಮ್ಹಣ್ ತಾಂಚೆ ಉಮಾಳೆ ಉಕ್ತೆ ಜಾತಾತ್. ಕಾಮಾಂ ಧಂದ್ಯಾಚ್ಯಾ ನಿಮ್ತಾನ್ ಮನೀಸ್ ಆಪ್ಲೊ ಗಾಂವ್ ಘರ್ದಾರ್ ಸೊಡೂನ್ ಭಾಯ್ಲ್ಯಾ ಗಾಂವಾತ್ ಯೆತಾತ್ ಪೊಟಾಚಿ ಖಳಿ ಭರ್ಪಾಕ್ ಹಾಲ್ ಉಪಾದ್ರೆ ಸೊಸ್ತಾತ್. ಭುರ್ಗಿಂ ಬಾಳಾಂಕ್ ಬರೆ ತರೆನ್ ವಾಡೊವ್ಪಾಚೆ ತಾಂಚೆ ಸಪನ್ ಸಪ್ನೂಚ್ ಜಾವ್ನ್ ರಾವ್ತಾ.
ಹಾಲೀಂಸರಾಂ ಜಿ ಥಾಮ್ ಸಂವ್ಸಾರಾರ್ ಪಾತ್ಳಿಲ್ಲ್ಯಾ ತಾಕಾ ಲಾಗೂನ್ ಲೊಕ್ ಆಪ್ಲ್ಯಾ ಗಾಂವ್ ಘರಾ ವಚ್ಪಾಕ್ ಭಾಯ್ರ್ ಸರಿಲ್ಲ್ಯಾಚೆ ಚಿತ್ರ್ ದಿಸತ್ ಆಸ್ತನಾ ಬರ್ಯಿಲ್ಲಿ ಹಿ ಕವಿತಾ ವಾಚ್ಕಾಕ್ ವಿಚಾರ್ ಕರ್ಪಾಕ್ ಲಾಯ್ತಾ. ವಯ್ರ್ ಮ್ಹಣೀಲ್ಲ್ಯಾ ಪ್ರಮಾಣ್ ತಾಂಚೊ ಜಲ್ಮ್ ಆಸ್ತೀಕ್ ಘರಾಬ್ಯಾತ್ ಜಾವಂಕ್ ನಾ ತಾಂಚಿ ಪೊಟಾಂ ದಿಸವ್ಡ್ಯಾಚ್ಯಾ ಪಗಾರಾರ್ ಚಲ್ತಾ. ಕಾಮ್ ಮೆಳ್ಳ್ಯಾರ್ ಘರಾಂತ್ ಚೂಲ್ ಪೆಟ್ಟಲಿ ನಾಜಾಲ್ಯಾರ್ ಪೊಟ್ ತೆಕುನ್ ನ್ಹೀದಪ್ ಹೊಚ್ ಎಕ್ ಉಪಾಯ್, ಜಲ್ಮ್ ದಿತ್ಲ್ಯಾ ಪರ್ಮೆಶ್ವರಾಕ್ ತಿಂ ಕೆನ್ನಾಚ್ ಶಿಣ್ನಾ. ಕಬಾಡ್ ಕಶ್ಟ್ ಕರುನ್ ಜಗಪ್ ಹೆಂಚ್ ತೆ ಜಾಣಾಂತ್. ಅಶಾ ತಾಂಚೆರ್ ಆಯಿಲ್ಲ್ಯಾ ಆರಿಶ್ಟಾ ವೆಳಾರ್ ದೆಶಾಚೊ ನೆತಾ ಆತ್ಮನಿರ್ಭರ್ ರಾವ್ಪಾಚೊ ಸಂದೆಶ್ ದಿತಾ ತರ್ ದುಸ್ರೆವಟೆನ್ ಹೆ ಬಾಬ್ಡೆ ಲೊಕ್ ಗಾಡಿ ನಾ ಘೊಡೊ ಆಪ್ಲ್ಯಾ ಗಾಂವ್ಚೆ ಆನಿ ಥಂಯ್ ಆಶಿಲ್ಲ್ಯಾ ತಾಂಚ್ಯಾ ಲೊಕಾಮದಿಂ ವಚುಂಕ್ ಭಾಯ್ರ್ ಸರ್ತಾ ತಾಂಚೆರ್ ಆಯಿಲ್ಲ್ಯಾ ಸಂಕ್ಶ್ಟಾಂಚೆ ಮಾತುಯ್ ಕೊಣಾಕ್ ಪಡುಂಕ್ ನಾ ಪೂಣ್ ಆತ್ಮನಿರ್ಭರ್ ಜಾವ್ಪಾಚೊ ಸಂದೆಶ್ ಮಾತ್ ತೆಂ ದಿವಂಕ್ ಅನ್ಮನನಾತ್.
ಆಮಿ ಜಗ್ತಾತ್, ತೆನ್ನಾಚ್ ಮರ್ತಾತ್
ಜಗೂಂಕ್ ಫಕ್ತ್ ಮಡಿಂ ಬಾಕಿ
ತುಮ್ಚೆ ವಾಟೆ, ಭಾಂಗ್ರಾ ಗೊಟೆ
ಆಮ್ಚಿ ಮಾತ್ ಚುಲೂಯ್ ದುಖಿ
ಲಾಖ್ ಕೊಟಿ, ಜೀಣ್ ಖೊಟಿ
ಆಮ್ಚೊ ನ್ಹಯ್ ಹೊ ಶಬ್ದ್ ‘ಸುಖಿ’
ಕಿತ್ಲೆಂ ಸೊಂಪೆಂ ನ್ಹಂಯ್
‘ಆತ್ಮನಿರ್ಭರ್’ ದಿವಂಕ್ ದೆಖಿ ???
ಹೆ ಪಂಗ್ತೆಂತ್ ಆಯಿಲ್ಲ್ಯೊ ಹ್ಯೊ ವಳಿ ಕೊಣಾಕಯ್ ವಿಚಾರ್ ಕರ್ಪಾಕ್ ಲಾಯ್ತ್ಲ್ಯೊ ಕವ್ಯಿತ್ರೀಕ್ ಘಡ್ಯೆ ತಾಂಚೊ ಚುರ್ಕೊ ಆಯ್ಲಾ ತಾಂಚಿ ಅವ್ದಶಾ ಪಳೊವ್ನ್ ತಿ ಮ್ಹಣ್ಟಾ ಆಮಿ ಜಗ್ತಾತ್, ತೆನ್ನಾಚ್ ಮರ್ತಾತ್, ತುಮ್ಚೆ ವಾಟೆ, ಭಾಂಗ್ರಾ ಗೊಟೆ. ಜಲ್ಮ್ ಭರ್ ತಾಣಿ ದುಖ್ಣಿ ಕಾಡಪ್ ಆನಿ ಹ್ಯಾ ನೆತಾನಿ ಆನಿ ತಾಂಚ್ಯಾ ಕೌಶ್ಲ್ಯಾಚೊ ಫಾಯ್ದೊ ಘೆವ್ಪಿ ತಾಂಚೆ ಮಾಲಕ್ ಜಾವ್ನ್ ಆಪ್ಲಿ ಜಿಣ್ ಫುಲಯ್ಲಿ. ತಶೆಂಚ್ ಫಕತ್ ಬಢಾಯೊ ಮಾರಪ್ ಬರೆಂ ಕಾಮ್ ಕೆಲ್ಲ್ಯಾಚೊ ಫಕತ್ ಆವ್ ಹಾಡಪ್ ಹೆ ಸಮಾ ನಿ. ಹ್ಯಾ ಸಂವ್ಸಾರಾಂತ್ ಎಕಾಚ್ಯಾ ವಾಟ್ಯಾಕ್ ಸಗ್ಳ್ಯೊ ಸುಖಾಚ್ಯೊ ವಸ್ತು ಜಾಲ್ಯಾರ್ ದುಸ್ರೆ ವಟೆನ್ ಜಗಪ್ ಮ್ಹಣ್ಲ್ಯಾರುಚ್ ತಾಂಚೆ ಮರಣ್ ಜಾಲ್ಲೆ ಆಸಾ ತಾಂಚ್ಯಾ ನಶೀಬಾಂತ್ ದೊನ್ ವೆಳ್ಚೆ ಜೆವ್ಣ್ ಮೆಳಪ್ ಕುಸ್ತಾರ್ ಜಾವ್ನ್ ಬಸ್ಲಾಂ ಅಶಾ ವೆಳಾರ್ ಆತ್ಮನಿರ್ಭರ್ ಜಾವ್ಪಾಚೊ ಸಂದೆಶ್ ಮ್ಹಣ್ಲ್ಯಾರ್ ಗರೀಬ್ ಲೊಕಾಂಚಿ ಮಾರಿಲ್ಲಿ ಫಕಾಂಡಾಂ ಥಾರ್ತಾ. ಹಾತ್ ವಯ್ರ್ ಕರುನ್ ಮನ್ ಕಿ ಬಾತ್ ಕರ್ಪಾಕ್ ಕಾಂಯ್ ಕಶ್ಟ್ ಪಡ್ನಾ. ಕೊಂಕ್ಣೀಂತ್ ಎಕ್ ಮ್ಹಣ್ ಆಸಾ ‘ಜಾಚೆಂ ಜಳ್ಟಾ ತಾಕಾಚ್ ಕಳ್ಟಾ.’ ದೆಖೂನ್ ಫಕತ್ ತೊಂಡಾಚ್ಯೊ ಫಟಾಶ್ಯೊ ಮಾಲ್ಲ್ಯೊ ಮ್ಹಣ್ ಜಾಯ್ನಾ ತ್ಯೊ ಮಾರ್ಚ್ಯಾ ಪಯ್ಲಿ ಮುಳಾ ಮೆರೆನ್ ಪಾವ್ಪಾಕ್ ಜಾಯ್ ತಾಂಚ್ಯೊ ಗರ್ಜೊ ಕಿತೆಂ ತಾಂಕಾ ಹ್ಯಾ ಸಂಕ್ಶ್ಟಾತಲ್ಯಾನ್ ವಾಟಾಯ್ತಲೆ ಕಶೆ ಹಾಚೆರ್ ವಿಚಾರ್ ಜಾವ್ಪಾಕ್ ಜಾಯ್ ಆಶಿಲ್ಲೊ ತೊ ಜಾವಂಕ್ ನಾ ಅಶೆಂಚ್ ಮ್ಹಣ್ಚೆಂ ಪಡ್ಟಲೆಂ.
ದುಸ್ರಿ ಗಜಾಲ್ ಬಾಯ್ ಗ್ವಾದಲೂಪ್ ಡಾಯಸ್ ಮ್ಹಣ್ಪಾಕ್ ಸೊದ್ತಾ ತಿ ಮ್ಹಣ್ಲ್ಯಾರ್ ಜಣ್ ಎಕ್ಲ್ಯಾನ್ ತಾಂಚೆ ಸೊಶಣ್ ಕೆಲ್ಲೆಂ ಆಸಾ ತಾಂಚೆಕಡ್ಲ್ಯಾನ್ ವಾವ್ರ್ ಕರುನ್ ಘೆವ್ಪ್ ಪೂಣ್ ತಾಂತಾ ತಾಂಚ್ಯಾ ವಾವ್ರಾಚೆಂ ಸಾರ್ಕೆ ಮೊಲ್ ಫಾರೀಕ್ ಜಾವಂಕ್ ನಾಶಿಲ್ಲ್ಯಾನ್ ತಾಂಚೆರ್ ಹಿ ವೆಳ್ ಆಯ್ಲ್ಯಾ. ಜಲ್ಮತಾಚ್ ತಾಂಚೆ ಸರಣ್ ದಾಳೂನ್ ದವ್ರಿಲ್ಲೆಂ ಆಸ್ತಾ ಅಶೆಂ ಮ್ಹಣ್ಪಿ ಕವ್ಯಿತ್ರೀಕ್ ಕಿತ್ಲೊ ಕಳವ್ಳೊ ಹ್ಯಾ ಲೊಕಾಚೊ ಹಾಚಿ ಜಾಣ್ ವಾಚತ್ಲ್ಯಾಕ್ ಜಾತಾ. ಇಂಗ್ಲಿಶಾಂತ್ ಆನೀಕ್ ಎಕ್ ಮ್ಹಣ್ ಆಸಾ ತಿ ಮ್ಹಣ್ಲ್ಯಾರ್ put (oneself) in (someone’s) shoes ದುಸ್-ಯಾಚ್ಯಾ ಬುಟಾಂತ್ ಪಾಂಯ್ ಘಾಲುನ್ ಪಳೊವ್ಪ್ ಮ್ಹಣ್ಟಕೀರ್ ತಾಚ್ಯಾ ಪಾಯಾಚೆಂ ಜೊಖ್ ಕಳ್ಟಾ ಹಾಂಗಾ ತಾಂಚೆ ಉಮಾಳೆ ವಾ ದುಖ್ ಅಶೆಂ ಸಮ್ಜುಚೆಂ. ಬಾಯ್ ಗ್ವಾದಲೂಪ್ ಡಾಯಸ್ ತಾಂಚ್ಯಾ ಜಿವೀತಾಶಿ ಎಕ್ರುಪ್ ಜಾಲ್ಲ್ಯಾಚೊ ಭಾಸ್ ಹಿ ಕವಿತಾ ಕರುನ್ ವತಾ. ಜಿವಿತಾಂತ್ ಖೊಲಾಯೆನ್ ದೆವೊನ್ ಪರಿಕ್ಷಣ್ ಕೆಲ್ಲ್ಯಾನಚ್ ಅಶಿ ರಚ್ನಾ ತಯಾರ್ ಜಾವ್ಪಾಕ್ ಶಕ್ತಾ ಅಶೆಂ ಮ್ಹಜೆಂ ಮತ್. ಹಿ ಸಮಾಜ್ ಪ್ರಬೊಧನ್ ಕರ್ಪಿ ಕವಿತಾ ಮ್ಹಣು ಯೆತಾ. ಕವಿತೆಚೆಂ ಕಡ್ವೆ ಮಾತ್ಶೆಂ ವ್ಹಡ್ ಜಾಲಾಂ ಪೂಣ್ ಮಾಂಡಾವ್ಳ್ ಬರಿ ಜಾಲ್ಲ್ಯಾಕಾರಣಾನ್ ವಾಚ್ಪಾಕ್ ಸೊಪಿ ಜಾತಾ.
ಎಚ್ ಮನೊಜ್, June 2020
[Vixlexonn] Atmonirbhor Kovi: Guadalupe Dias
Atmonirbhor (Kovi: Guadalupe Dias)
somvsar mathear, bhurgim khandar
ವಿಶ್ಲೇಷಕ್
Manoj J Halarnekar
ಮನೊಜ್ ಜನಾರ್ದನ್ ಹಳರ್ಣೇಕರ್
ಟೊಪಣ್ ನಾವ್ : ಎಚ್ ಮನೊಜ್
ಜಲ್ಮ್ : 19 ಎಪ್ರಿಲ್ 1966
ನಾಮೊ : ‘ಶಾಂತಾಇ’ ಘರ್. ಸಂ. 141/ಎಫ್ ಗ್ರೀನ್ ವ್ಹೆಲಿ, ಚಿಖ್ಲಿ ಗೊಂಯ್
ಮೊ. : 9822441417
ವೆವ್ಸಾಯ್ : ಪಯ್ಲಿಂ ಅವ್ರ್ ಲೆಡಿ ಒಫ್ ಡೆಸ್ತೆರೊ ಹಾಯ್ಸ್ಕೂಲ್ ಬೊಗ್ದಾ ವಾಸ್ಕೊ ಗೊಂಯ್
ಹಾಂಗಾ ಶಿಕ್ಷಕ್ ಮ್ಹಣ್ ವಾವ್ರ್.
ಸಧ್ಯಾ ರೆಜಿನಾ ಮುಂಡಿ ಹಾಯ್ಸ್ಕೂಲ್ ಚಿಖ್ಲಿ ಹಾಂಗಾ ಜೆಷ್ಠ್ ಪರ್ಯವೆಕ್ಷಕ್
ಜಾವ್ನ್ ಆಸಾ. ಹಿಂದಿ, ಕೊಂಕ್ಣಿ ಆನಿ ನೈತಿಕ್ ವಿಜ್ಞಾನ್ ವಿಶ್ಯಾಚೆ ಗೆಲಿ
29 ವರ್ಸಾ ಅಧ್ಯಾಪನ್ ಕಾರ್ಯ್ ಕರ್ತಾ.
• ಕೊಂಕ್ಣಿ ಕವಿತಾ ಆನಿ ಲೆಖ್ ಬರಪ್ ಆವ್ಡಟೊ ಛಂದ್ ಜಾವ್ನ್ ಆಸಾ.
• ‘ಮನೊಭಾವ್’ ಕವಿತಾ ಸಂಗ್ರಹ್ ಪ್ರಕಾಶೀತ್ ಜಾವ್ಚೆ ವಾಟೆರ್ ಆಸಾ.
• ಗೊಂಯ್ಚ್ಯಾ ನೆಮಾಳ್ಯಾಂನಿ ಬರಪ್ ಚಾಲು ಆಸಾ ತಶೆಂಚ್ ಕವಿತಾಯ್ ಪ್ರಕಾಶೀತ್ ಜಾಲ್ಯಾ.
• ಅಖಿಲ್ ಗೊಂಯ್ ಕೊಂಕ್ಣಿ ಮಾಧ್ಯಮೀಕ್ ಶಿಕ್ಷಕ್ ಸಂಘ್ಟನೆಚೊ ಉಪಾಧ್ಯಕ್ಷ್ ಜಾವ್ನ್ ಆಸಾ.
• {U.A.} ಯು.ಎ ಅಂಡರಎಸ್ಟೆಂಡೀಂಗ್ ಎನಾಲಿಸಿಸ್ ಹಿ ಭುರ್ಗ್ಯಾ ಖಾತೀರ್ ಆನಿ ಶಿಕ್ಷಕಾಂ ಖಾತೀರ್ ‘ನಿತಿ ಮುಲ್ಯಾಂ ಆತ್ಮಸಾಂತ್ ಕಶಿ’ ಕರಪ್ ಹಾಚೆರ್ ಆದಾರೀಲ್ಲಿ ಶಿಕ್ಷಣೀಕ್ ಕಾರ್ಯಾವಳ್ ತಾಲುಕಾ ಮಳಾರ್ ಟಿ.ಯಲ್.ಯಸ್.ಸೀಚ್ಯಾ ಪಾಲ್ವಾನ್ ವೆಗ್-ವೆಗ್ಳ್ಯಾ ಸ್ಕುಲಾಂನಿ ಘಡೊವ್ನ್ ಹಾಡ್ಲ್ಯಾ.
• ಸರ್ವ್ ಶಿಕ್ಷಾ ಅಭಿಯಾನಾಚೊ ತಾಲುಕಾ ಮಳಾರ್ ಪ್ರಶಿಕ್ಷಕ್ ನಾತ್ಯಾನ್ ವಾವ್ರ್.
• ಗೊಂಯ್ ರಾಷ್ಟ್ರಿಯ್ ಮಾಧ್ಯಮೀಕ್ ಶೀಕ್ಷಾ ಅಭಿಯಾನಾಚ್ಯಾ ಮಳಾರ್ ಪ್ರಶಿಕ್ಷಕ್ ನಾತ್ಯಾನ್ ವಾವ್ರ್.
• ಗೊಂಯ್ ಮಾಧ್ಯಮೀಕ್ ಆನಿ ಉಚ್ಚ್ ಮಾಧ್ಯಮೀಕ್ ಶಿಕ್ಷಣ್ ಮಂಡಳ್ ಆಲ್ತು ಬೆತಿಂ – ಪರ್ವರಿ, ಗೊಂಯ್ ಹಾಚೊ ವೆಗ್-ವೆಗ್ಳ್ಯಾ ಮಳಾಚೆರ್ ವಾವ್ರ್.
• ಚಿಖ್ಲಿ ಆನಿ ಬೊಗ್ಮಾಳೊ ಲಾಯನ್ಸ್ ಕ್ಲಬಾಚ್ಯಾ ವತೀನ್ ಶಿಕ್ಷಣ್ಕ್ಷೆತ್ರಾಂತ್ಲ್ಯಾ ಯೊಗ್ದಾನಾಖಾತೀರ್ ಭೌಮಾನ್ 2011.
• ಯುವಾ ಶಕ್ತಿ ಸಾಮಾಜಿಕ್ ಸಂಸ್ಥಾ ನಾಶಿಕ್ ಹಾಂಚೊ ರಾಷ್ಟ್ರೀಯ್ ಸಮಾಜ್ ಪ್ರಬೊಧನ್ ಪುರಸ್ಕಾರ್ 2012 ಚೊ ಆದರ್ಶ್ ಶಿಕ್ಷಕ್ ಪುರಸ್ಕಾರ್.
• ರೊಟ್ರಿ ಕ್ಲಬ್ ವಾಸ್ಕೊ ಹಾಂಚೊ ರಾಷ್ಟ್ರೀಯ್ ಸಮಾಜ್ ಪ್ರಬೊಧನ್ ಪುರಸ್ಕಾರ್ 2016 ಚೊ ಆದರ್ಶ್ ಶಿಕ್ಷಕ್ ಪುರಸ್ಕಾರ್.
• ಇನರ್ ವ್ಹೀಲ್ ಕ್ಲಬ್ ವಾಸ್ಕೊ ಹಾಂಚೊ ರಾಷ್ಟ್ರೀಯ್ ಸಮಾಜ್ ಪ್ರಬೊಧನ್ ಪುರಸ್ಕಾರ್ 2016 ಚೊ ಆದರ್ಶ್ ಶಿಕ್ಷಕ್ ಪುರಸ್ಕಾರ್.
