[ಚಿಕ್ಣಿಕಥಾ]: ಗೋಲ್ಡನ್ ವಾಚ್ [ರೊಶುಬಾಬಾ ಬಾರ್ಕೂರ್]
ಮುಕ್ಲ್ಯಾ ಹಪ್ತ್ಯಾಂತ್ ಮ್ಹಾಕಾ ಗಾಂವಾಕ್ ವಚೊಂಕ್ ಜಾಲ್ಲ್ಯಾನ್ ಗಾಂವಾಂತ್ ಮಾಮ್ಮಿಕ್, ಭಯ್ಣ್ಯಾಂಕ್, ಸಯ್ರ್ಯಾಂ-ಧಯ್ರ್ಯಾಂಕ್, ಇಷ್ಟಾಂಕ್ ಫೊನ್ ಕರುನ್ "ತುಮ್ಕಾಂ ಕಿತೆಂ ಹಾಡುಂಕ್ ಜಾಯ್" ಮ್ಹಣ್ ವಿಚಾರುಂಕ್ ಸುರು ಕೆಲ್ಲೆಂ. ಭಾಯ್ಲ್ಯಾ ಗಾಂವಾಂತ್ ಮೆಳ್ಚಿ ಹರ್ಯೆಕ್ ವಸ್ತ್ ಗಾಂವ್ಚ್ಯಾ ಕೊಂಕ್ಣ್ಯಾಚ್ಯಾ ಆಂಗ್ಡಿಂತ್ ಮೆಳ್ತಾತ್ ಮ್ಹಣ್ ಹಾಂವ್ ಜಾಣಾ ಆಸ್ಲ್ಲೊಂ ತರೀ ಮ್ಹಜ್ಯಾ ಮೊಗಾಚ್ಯಾ ಮನ್ಶಾಂಕ್ ಖುಶ್ ಕರ್ಚಿ ದುಸ್ರಿ ವಾಟ್ ನಾತ್ಲ್ಲಿ.
ಹಾಂವೆ ಪಯ್ಲೆ ಪಾವ್ಟಿಂ ಗಾಂವಾಂಕ್ ವೆಚೆಂ ನ್ಹಯ್ ತರಿ, ದೋನ್ ವರ್ಸಾಂಕ್ ಏಕ್ ಪಾವ್ಟಿಂ ಮ್ಹಾಕಾ ದೋನ್ ಮಹಿನ್ಯಾಂಚಿ ರಜಾ ಆಸ್ಲ್ಲ್ಯಾನ್ ಧಾ ವರ್ಸಾಂನಿ ಪಾಂಚ್ವೆ ಪಾವ್ಟಿಂ ಗಾಂವಾಕ್ ವೆಚಿ ತಯಾರಾಯ್ ಜಾಲ್ಲಿ. ಹಾಂವೆ ಫೊನ್ ಕರ್ನ್ ವಿಚಾರ್ಲ್ಲ್ಯಾಂ ಥಾವ್ನ್ ಆಸಲ್ಯೊ ಜವಾಬಿ ಆಯಿಲ್ಲ್ಯೊ "ಮ್ಹಾಕಾ ಕಾಂಯ್ ನಾಕಾರೆ ಪುತಾ, ಇಲ್ಲಿಂ ಬಾದಾಮ್,ಪಿಸ್ತಾ, ಕಾಜುಬಿಯೊ ಪುರೊ".... "ಮ್ಹಾಕಾ ಕಾಂಯ್ ನಾಕಾ ಬಾಬಾ, ಲ್ಹಾನ್ಶೆಂ ಏಕ್ ಮೊಬಾಯ್ಲ್ ಪುರೊ"... "ಆಮ್ಕಾಂ ಕಾಂಯ್ ನಾಕಾರೆ ಮುನ್ನಾ, ಮ್ಹಾಕಾ ಏಕ್ ಕಾಯ್ಲ್ ಆನಿ ಅಂಕಲಾಕ್ ಏಕ್ ಟಾರ್ಚ್ ಆನಿ ಭುರ್ಗ್ಯಾಂಕ್ ಇಲ್ಲಿಶಿಂ ಚೊಕ್ಲೆಟಾಂ ಹಾಡ್ಲ್ಯಾರ್ ಪುರೊ".... ಮ್ಹಣೊನ್ ಸಗ್ಳ್ಯಾಂಚಿ ಎಕೇಕ್ ವಸ್ತುಚಿಂ ಪಟ್ಟಿ ಲಾಂಬ್ ಜಾವ್ನ್ಂಚ್ ಆಸ್ಲ್ಲಿ. ಆನಿ ಹ್ಯೊ ಪುರಾ ವಸ್ತು ಕಾಣ್ಗೆತಾಂ ಕಾಣ್ಗೆತಾಂ ದೋನ್ ಮಹಿನ್ಯಾಂಚೊ ಸಾಂಬಾಳ್ ಮ್ಹಜೊ ಕಸೊ ಕಾಬಾರ್ ಜಾಲ್ಲೊ ಕಳ್ಳೆಂಚ್ ನಾ...!
ಪೂಣ್ ಪಪ್ಪಾಕಡೆ..! ವ್ಹಯ್, ಪಪ್ಪಾಕ್ ಹಾಂವೆ ಲಗ್ಬಗ್ ಆಟ್ ವರ್ಸಾಂ ಪಯ್ಲೆಂ ಸುರ್ವೆಚ್ಯಾ ರಜೆರ್ ಗಾಂವಾಕ್ ಯೆತಾನಾ ಫೊನ್ ಕರುನ್ ಕಿತೆಂ ಹಾಡಿಜಾಯ್ ಮ್ಹಣ್ ವಿಚಾರ್ಲ್ಲೆಂ. ಪಪ್ಪಾನ್ ಪಯ್ಲೆಂ ಕಾಂಯ್ ನಾಕಾ ಮ್ಹಳ್ಳೆಂ ತರೀ, ಮ್ಹಜ್ಯಾ ವತ್ತಾಯೆಕ್ ಲಾಗೊನ್ "ಹಾಡ್ತಾಯ್ ಜಾಲ್ಯಾರ್ ಏಕ್ ’ಗೋಲ್ಡನ್ ಕಲರ್ ವಾಚ್’ ಹಾಡ್ಲ್ಯಾರ್ ಪುರೊ" ಮ್ಹಳ್ಳೆಂ. ಪಪ್ಪಾಕಡೆ ಮ್ಹಾಕಾ ಭ್ಯೆಂಗೀ ಯಾ ದೀಂವ್ಚಿ ಮರ್ಯಾದ್ಗೀ ಕಳಾನಾ, ಮ್ಹಜಿ ಆನಿ ಪಪ್ಪಾಚಿ ಸಳಾವಳ್ ಇಲ್ಲಿ ಉಣಿ ಆನಿ ಗರ್ಜೆಚೆಕ್ ಮಾತ್ರ್ ಆಮಿ ಉಲಯ್ತೆಲ್ಯಾಂವ್ ತರೀ ಎಕಾಮೆಕಾ ಥಂಯ್ ಮೋಗ್ ಮಾತ್ರ್ ಚಡ್ಚ್ ಆಸ್ಲ್ಲೊ. ಮಾಮ್ಮಿಚೆಂ ಜರ್ ಫೊನ್ ಲಾಗಾನಾ ಜಾಲ್ಯಾರ್ ಮಾತ್ರ್ ಪಪ್ಪಾಕ್ ಫೊನಾಂ ವೆತಾಲಿಂ. ಆಶೆಂ ಆಸ್ತಾಂ ಹರ್ಯೆಕ್ ಪಾವ್ಟಿಂ ಗಾಂವಾಕ್ ಯೆತಾನಾ ಪಪ್ಪಾಕ್ ಏಕ್ ’ಗೋಲ್ಡನ್ ಕಲರ್ ವಾಚ್’ ಹಾಡ್ಚಿ ಸವಯ್ ಕೆಲ್ಲಿ. ಆಶೆಂ ಮ್ಹಣೊನ್ ಪಪ್ಪಾಕಡೆ ಕಾಂಯ್ ಚಾರ್ ವಾಚಾಂ ಯೆದೊಳ್ಚ್ ಜಮೊ ಜಾಲ್ಲಿಂ!.
ಪಪ್ಪಾನ್ ಕಾಂಯ್ ವಾಚ್ ಹಾತಾಕ್ ಬಾಂದ್ಲ್ಲೆಂ ಹಾಂವೆ ಪಳಯಿಲ್ಲೆಂ ನಾ, ಸದಾಂಚೆ ’ರಬ್ಬರ್ ಬೆಲ್ಟಾಚೆಂ’ ವಾಚ್ ಬಾಂದ್ತಾಲೊ. ಫೆಸ್ತಾ ಪರ್ಬೆಕ್ ಬಾಂದ್ತಾಲೊಗಿ ವಾ ಪಾಡ್ ಜಾಯ್ತ್ ಮ್ಹಣ್ ಭಿತರ್ ಕಾಬಾಟಾಂತ್ ದವರ್ಲ್ಯಾಂತ್ಗಿ ವಾ ಅನಿ ಕೊಣಾಕ್ ತರೀ ದಿಲ್ಯಾಂತ್ಗಿ ಮ್ಹಳ್ಳೆಂ ಹಾಂವೆ ಚಡಿತ್ ಗುಮಾನಾಕ್ ವರುಂಕ್ ನಾ, ಕಿತೆಂಯ್ ಕರುಂದಿ ದಿಂವ್ಚೆಂ ಮಾತ್ರ್ ಮ್ಹಜೆಂ ಕಾಮ್ ಮ್ಹಣ್ ವೊಗೆ ಜಾಲ್ಲೊಂ.
ಪುಣ್ ಹ್ಯಾ ಪಾವ್ಟಿಂಚೊ ಕಾಳ್ ಆದ್ಲ್ಯಾ ಬರಿಂ ನಾತ್ಲ್ಲೊ. ಹ್ಯಾ ಪಾವ್ಟಿಂ ಗಾಂವಾಕ್ ಯೆತಾನಾ ಪಪ್ಪಾಕ್ ಕಿತೆಂ ದೀಂವ್, ದೀಜೆಗೀ ನಾಕಾ? ದೀಂವ್ಚೆ ಜಾಲ್ಯಾರೀ ಕಶೆಂ ಆನಿ ತಾಕಾ ವಿಚಾರ್ಚೆಂ ಜಾಲ್ಯಾರೀ ಕಶೆಂ? ಮ್ಹಣ್ ಚಿಂತುನ್ ಚಿಂತುನ್ ಹ್ಯಾ ಪಾವ್ಟಿಂಯ್ ಆದ್ಲೆಬರಿಂ ತಾಚೆ ಪರ್ವಣ್ಗೆ ವಿಣೆ ’ಗೋಲ್ಡನ್ ಕಲ್ಲರ್ ವಾಚ್’ ಕಾಣ್ಗೆಲೆಂ. ಆನಿ ಗಾಂವಾಕ್ ವೆಚೊ ದೀಸ್ ಆಯ್ಲೊ ಜಾಲ್ಲ್ಯಾನ್ ಬೇಗಾಂ ಪ್ಯಾಕ್ ಕರ್ನ್ ಗಲ್ಫಾ ಥಾವ್ನ್ ಸುಟ್ಲೊಂ.
ಕೊಡ್ಯಾಳ್ ಏರ್ಪೋರ್ಟಾಂತ್ ಮ್ಹಾಕಾ ಆಪವ್ನ್ ವರುಂಕ್ ಕೊಣಿ ಯೆಂವ್ಚೆ ನಾಕಾ ಮ್ಹಣ್ ಖಡಕ್ಕ್ ತಾಕಿದ್ ದಿಲ್ಲ್ಯಾನ್ ಭಾಯ್ರ್ ಕೋಣೀ ದಿಸ್ಲಿನಾಂತ್. ಏರ್ಪೋರ್ಟ್ ಟ್ಯಾಕ್ಶಿ ಬುಕ್ಕ್ ಕರುನ್ ಮ್ಹಜ್ಯಾ ಗಾಂವಾ ಕುಶಿನ್ ಪಯ್ಣ್ ಆರಂಭ್ ಕೆಲೆಂ.
ಸುಮಾರ್ ದೋನ್ ವರಾಂಚ್ಯಾ ಪಯ್ಣಾ ಉಪ್ರಾಂತ್ ಗಾಂವ್ಚ್ಯಾ ಪೇಂಟೆಂತ್ ಪಾವ್ಲ್ಲ್ಯಾ ಮ್ಹಾಕಾ ಎಕಾಚ್ಚಾಣೆ ಕಿತೆಂಗಿ ಉಗ್ಡಾಸ್ ಕಾಂತಂವ್ಕ್ ಲಾಗ್ತಾನಾ, ದೊಳೆ ಅಪಾಪಿಂಚ್ ಬಿಜ್ಲೆ!. ಡ್ರಾಯ್ವರಾಕ್ ಫುಲಾಂಚ್ಯಾ ಆಂಗ್ಡಿ ಲಾಗ್ಸಾರ್ ಕಾರ್ ರಾವೊಂಕ್ ಸಾಂಗೊನ್ ದೋನ್ ಗುಲೊಬ್ ಘೆತ್ಲೆ. ಥಂಯ್ ಥಾವ್ನ್ ಶೀದಾ ಆಮ್ಚ್ಯಾ ಇಗರ್ಜೆಚ್ಯಾ ಸಿಮೆತ್ರಿಕ್ ಭೆಟ್ ದೀವ್ನ್, ಆದ್ಲ್ಯಾ ವರ್ಸಾ ಗಾಂವಾಂಕ್ ಆಯಿಲ್ಲ್ಯಾ ತವಳ್ ಥೊಡ್ಯಾ ದಿಸಾನಿಂ ಕಾಳ್ಜಾಘಾತ್ ಜಾವ್ನ್ ಮರಣ್ ಪಾವ್ಲ್ಲ್ಯಾ ಮ್ಹಜ್ಯಾ ಪಪ್ಪಾಚ್ಯಾ ಪೊಂಡಾರ್ ತೆ ದೋನ್ ಗುಲೊಬ್ ದವರ್ಲೆ. ಭಿಜ್ಲ್ಲೆ ದೊಳೆ ಪುಸುನ್ ಘರಾ ಪಾವ್ಲೊಂ. ಘರಾ ಸಗ್ಳ್ಯಾಂಕ್ ಮೆಳೊನ್ ಜಾತೆಚ್ಚ್, ಆಮ್ಗೆರ್ ಸದಾಂ ತೊಟಾಚೆಂ ಕಾಮ್ ಕರ್ಚ್ಯಾ ರಮೇಶಾಕ್ ಆಪವ್ನ್ ಗಲ್ಫಾ ಥಾವ್ನ್ ಹಾಡ್ಲ್ಲೆಂ "ಗೋಲ್ಡನ್ ಕಲರ್ ವಾಚ್" ಪಪ್ಪಾಚ್ಯಾ ನಾಂವಿ ತಾಕಾ ದೀವ್ನ್ ಪಪ್ಪಾಕ್ ಮತಿಂತ್ ಸಾಸ್ಣಾಚೊ ವಿಶೇವ್ ಮಾಗ್ಲೊ!.
***000***
ರೋಶುಬಾಬಾ ಬಾರ್ಕುರ್: ಆಯ್ಲೆವಾರ್ ಸಮಾಜಿಕ್ ಜಾಳಿಜಾಗ್ಯಾಂನಿ ತಶೆಂಚ್ ವೆವೆಗ್ಳ್ಯಾ ಜಾಳಿಜಾಗ್ಯಾಂನಿ ಅನಿ ಪತ್ರಾಂನಿ ಥೊಡ್ಯಾ ತೆಂಪಾಥಾವ್ನ್ ಸರಾಗ್ ರಿತಿನ್ ಕವಿತಾ ಬರಂವ್ಚೊ ಬಾರ್ಕುರ್ಚೊ ರೋಶುಬಾಬಾಚೊ ಪಯ್ಲೊ ಕವಿತಾಜಮೊ ’ಕಾಳ್ಜಾಉಡಿ’ 2018 ವರ್ಸಾ ಪರ್ಗಟ್ಲಾ. ಸದ್ದ್ಯಾಕ್ ಇಸ್ರೇಲಾಂತ್ ವಾವ್ರ್ ಕರುನ್ ಆಸ್ಚೊ ರೋಶುಬಾಬಾ ಏಕ್ ಬರೊ ವಾಚ್ಪಿ ತಶೆಂಚ್ ಕಾಣಿಯೆಗಾರ್ ಜಾಂವ್ಚಿ ಅಭಿರುಚ್ ಆಸ್ಚೊ ಜಾವ್ನಾಸಾ.
ಹೆರ್ ಚಿಕ್ಣಿಕಥಾ
