[चिकणीकथा]: गोलडन वाच
[चिकणीकथा]: गोलडन वाच [रोशुबाबा बार्कूर]
मुकल्या हप्त्यांत म्हाका गांवाक वचोंक जाल्ल्यान गांवांत माम्मीक, भयण्यांक, सयऱ्यां-धयऱ्यांक, इषटांक फोन करून "तुमकां कितें हाडुंक जाय" म्हण विचारुंक सुरू केल्लें. भायल्या गांवांत मेळची हरयेक वसत गांवच्या कोंकण्याच्या आंगडिंत मेळतात म्हण हांव जाणा आसल्लों तरी म्हज्या मोगाच्या मनशांक खूश कर्ची दुस्री वाट नातल्ली.
हांवे पयले पावटीं गांवांक वेचें न्हय तरी, दोन वर्सांक एक पावटीं म्हाका दोन महिन्यांची रजा आसल्ल्यान धा वर्सांनी पांचवे पावटीं गांवाक वेची तयाराय जाल्ली. हांवे फोन कर्न विचारल्ल्यां थावन आसल्यो जवाबी आयिल्ल्यो "म्हाका कांय नाकारे पुता, इल्लीं बादाम,पिसता, काजुबियो पुरो".... "म्हाका कांय नाका बाबा, ल्हानशें एक मोबायल पुरो"... "आमकां कांय नाकारे मुन्ना, म्हाका एक कायल आनी अंकलाक एक टार्च आनी भुर्ग्यांक इल्लिशीं चोकलेटां हाडल्यार पुरो".... म्हणोन सगळ्यांची एकेक वसतुचीं पट्टी लांब जावन्ंच आसल्ली. आनी ह्यो पुरा वसतू काणगेतां काणगेतां दोन महिन्यांचो सांबाळ म्हजो कसो काबार जाल्लो कळ्ळेंच ना...!
पूण पप्पाकडे..! व्हय, पप्पाक हांवे लगबग आट वर्सां पयलें सुर्वेच्या रजेर गांवाक येताना फोन करून कितें हाडिजाय म्हण विचारल्लें. पप्पान पयलें कांय नाका म्हळ्ळें तरी, म्हज्या वत्तायेक लागोन "हाडताय जाल्यार एक ’गोलडन कलर वाच’ हाडल्यार पुरो" म्हळ्ळें. पप्पाकडे म्हाका भ्येंगी या दींवची मऱ्यादगी कळाना, म्हजी आनी पप्पाची सळावळ इल्ली उणी आनी गर्जेचेक मात्र आमी उलयतेल्यांव तरी एकामेका थंय मोग मात्र चडच आसल्लो. माम्मिचें जर फोन लागाना जाल्यार मात्र पप्पाक फोनां वेतालीं. आशें आसतां हरयेक पावटीं गांवाक येताना पप्पाक एक ’गोलडन कलर वाच’ हाडची सवय केल्ली. आशें म्हणोन पप्पाकडे कांय चार वाचां येदोळच जमो जाल्लीं!.
पप्पान कांय वाच हाताक बांदल्लें हांवे पळयिल्लें ना, सदांचे ’रब्बर बेल्टाचें’ वाच बांदतालो. फेसता परबेक बांदतालोगी वा पाड जायत म्हण भितर काबाटांत दवरल्यांतगी वा अनी कोणाक तरी दिल्यांतगी म्हळ्ळें हांवे चडीत गुमानाक वरुंक ना, कितेंय करुंदी दिंवचें मात्र म्हजें काम म्हण वोगे जाल्लों.
पूण ह्या पावटिंचो काळ आदल्या बरीं नातल्लो. ह्या पावटीं गांवाक येताना पप्पाक कितें दींव, दीजेगी नाका? दींवचे जाल्यारी कशें आनी ताका विचार्चें जाल्यारी कशें? म्हण चिंतून चिंतून ह्या पावटिंय आदलेबरीं ताचे पर्वणगे विणे ’गोलडन कल्लर वाच’ काणगेलें. आनी गांवाक वेचो दीस आयलो जाल्ल्यान बेगां प्याक कर्न गलफा थावन सुटलों.
कोड्याळ एरपोर्टांत म्हाका आपवन वरुंक कोणी येंवचे नाका म्हण खडक्क ताकीद दिल्ल्यान भायर कोणी दिसलिनांत. एरपोर्ट ट्याक्षी बुक्क करून म्हज्या गांवा कुशीन पयण आरंभ केलें.
सुमार दोन वरांच्या पयणा उपरांत गांवच्या पेंटेंत पावल्ल्या म्हाका एकाच्चाणे कितेंगी उगडास कांतवंक लाग्ताना, दोळे अपापिंच बिजले!. ड्रायवराक फुलांच्या आंगडी लागसार कार रावोंक सांगोन दोन गुलोब घेतले. थंय थावन शीदा आमच्या इगर्जेच्या सिमेत्रीक भेट दीवन, आदल्या वर्सा गांवांक आयिल्ल्या तवळ थोड्या दिसानीं काळजाघात जावन मरण पावल्ल्या म्हज्या पप्पाच्या पोंडार ते दोन गुलोब दवरले. भीजल्ले दोळे पुसून घरा पावलों. घरा सगळ्यांक मेळोन जातेच्च, आमगेर सदां तोटाचें काम कर्च्या रमेशाक आपवन गलफा थावन हाडल्लें "गोलडन कलर वाच" पप्पाच्या नांवी ताका दीवन पप्पाक मतिंत सासणाचो विशेव मागलो!.
***000***
रोशुबाबा बार्कूर: आयलेवार समाजीक जाळिजाग्यांनी तशेंच वेवेगळ्या जाळिजाग्यांनी अनी पत्रांनी थोड्या तेंपाथावन सराग रितीन कविता बरंवचो बार्कूरचो रोशुबाबाचो पयलो कविताजमो ’काळजाउडी’ २०१८ वर्सा पर्गटला. सद्द्याक इस्रेलांत वावर करून आसचो रोशुबाबा एक बरो वाचपी तशेंच काणियेगार जांवची अभिरूच आसचो जावनासा.
