ಆಂಕ್ಡೊ - 9

ಅಜೀಕ್ ಕಾಂಯ್ ತೀಸ್-ಪನ್ನಾಸ್ ವರ್ಸಾಧಿಂ, ಚಡ್ತಾವ್ ಕೊಲ್ವಾಚೆಂ ವಾ ನಳ್ಯಾಂಚ್ಯಾ ಪಾಕ್ಯಾಂಚ್ಯಾ ಲ್ಹಾಲ್ಹಾನ್ ಘರಾಂನಿ ಜಾಯ್ತೊ ಮನಿಸ್ ಜಿಯೆತಾಲೊ ಆನಿ ಆಪ್ಲ್ಯಾ ಜಾಗ್ಯಾಂತ್ ಭರ್ಪೂರ್ ಮಿನತ್ ಕರ್ನ್ ಜಿಯೆತಾಲೊ. ಜಶೆಂ ಮನಿಸ್ ಜಿಯೆತಾಲೊ ತಶೆಂಚ್ ಗಾಯ್ರಾಂ, ಪೆಟೆ, ಮಾಜ್ರಾಂ, ಕುಂಕ್ಡಾಂ ಆಸ್ತಾಲಿಂ, ಆನಿ ಪೆಟೆ-ಮಾಜರ್-ಗಾಯ್ರಾಂಕ್ ನಾಂವಾಂ ಸಯ್ತ್ ಆಸ್ತಾಲಿಂ, ಆನಿ ತಾಣಿಂ ಉಲಂವ್ಚಿ ವಿಚಿತ್ರ್ ಭಾಸ್ ಆಮ್ಚ್ಯಾ ಅಜ್ಯಾ-ಅಜಿಯೆಕ್ ಕಶಿಗೀ ಸಮ್ಜತಾಲಿ ಆನಿ ಆಮ್ಕಾಂಯ್ ತಿ ಸಮ್ಜಾಂವ್ಕ್ ಪ್ರೇತನ್ ಕರ್ತಾಲಿ. ವ್ಹಯ್ ತಿ ಮೊಗಾಚೊ ಭಾಸ್, ಭರ್ಪೂರ್ ಹುಸ್ಕೊ ಅನಿ ದಯಳಾಯ್ ರಾಜ್ವಟ್ಕಿ ಕರುನ್ ಆಸ್ಚೊ ತೊ ಕಾಳ್.

ಸಗ್ಳ್ಯಾಂನಿ ಮನ್ಶಾಪಣಾಚೊ ಬೊರ್ಗೊಲ್ ಉಟೊನ್ ದಿಸ್ತೆಲ್ಯಾ ಆಯ್ಚ್ಯಾ ಕಾಳಾರ್ ಕೊಲ್ವಾಚಿಂ ಪಾಕಿಂ ಪಳೆಂವ್ಕ್ ಮೆಳ್ಚಿಂನಾಂತ್, ನಳ್ಯಾಚಿಂ ಪಾಕಿಂ ಆಸ್ಚಿಂ ಘರಾಂ ಭೋವ್ ಉಣಿಂ, ಜಯ್ತಾಚೆ ರಾಜ್ ಬಂಗ್ಲೆ, ಪುಣ್ ಬಂಗ್ಲ್ಯಾಂನಿ ರಾಂವ್ಚಿಂ ಬೊಡಾಂ ಭೋವ್ ಥೊಡಿಂ, ಘರಾಂನಿ ಜಿಯೆಂವ್ಚಿಂ ಮನ್ಶಾಂಚ್ ಉಣಿಂ ಆನಿ ತಾಂಕಾಂಯ್ ಎಕಾಮೆಕಾ ಉಲಂವ್ಕ್ ವೇಳ್ ನಾತ್‌ಲ್ಲ್ಯಾ ಕಾಳಾರ್ ಗಾಯ್ರಾಂಕ್ ವಾಗಾನ್ ವೆಲಾಂ ಕುಂಕ್ಡಾಂಕ್ ಕೊಲ್ಯಾಂನಿ ವೆಲಾಂ. ಅಶೆಂ ಅಸ್ತಾನಾ ಹಿ ಕವಿತಾ ವಾಸ್ತವಿಕ್ ಜಾವ್ನ್ ಘೆತೆಲಿಂ ಕೊಣ್ ಸಮ್ಜತೆಲಿಂ ಕೊಣ್ ಮ್ಹಳ್ಳೆಂ ಪಯ್ಲೆಂ ಸವಾಲ್.

ಪುಣ್ ಹ್ಯೇ ಕವಿತೆಂಚ್ ಮಾಜರ್ ಆನಿ ಆವಯ್ ದೋನ್ ಭಳ್ವಂತ್ ಇಮಾಜ್ಯೊ ಫಕತ್ತ್ ಜೀವಿ ಜಾವ್ನ್ ಉರಾನಾಂತ್ ಬಗಾರ್ ತತ್ವಾಂ ಜಾವ್ನ್ ಉದೆತಾತ್ ಆನಿ ಖರೆಂಚ್ಚ್ ಜಾವ್ನ್ ಹ್ಯಾ ಕವಿತೆಚಿ ಗುಂಡಾಯ್ ಪರತ್ ಪರತ್ ಹ್ಯಾ ಕವಿತೆಕ್ ಪೊಟ್ಲುನ್ ಧರುಂಕ್ ಪ್ರೇರಿತ್ ಕರ್ತಾ.

ಆಂಕ್ಡೊ - 9

ಆವಯ್ ಆನಿ ಮಾಜರ್....

ಆವಯ್ನ್ ಮಿನತ್ ಕಾಡ್‍ಲ್ಲ್ಯಾ ಗಾದ್ಯಾಂನಿ

ಆತಾಂ ರಾಜ್ ಕೆಲಾಂ ವ್ಹಾಳಯಾಂಚ್ಯಾ ಪಟ್ಟಾಂನಿ..

ತಿಣೆಂ ಪೊಸ್‌ಲ್ಲೆಂ ಮಾಜರ್

ಆಪ್ಲ್ಯಾ ಪೊಟಾಗ್ರಾಸಾ ಖಾತಿರ್

ಸೊಧುನ್ ಗೆಲಾಂ ಲಾಗ್ಶಿಲೆಂ ಸೆಜಾರ್

ಭರ್ವಸೊ ತಾಕಾ ಮ್ಹಜ್ಯಾ ಆವಯ್ಚೆರ್

ಯೆತೆಲಿ ಮ್ಹಣುನ್ ಆಜ್ ನ್ಹಯ್ ಫಾಲ್ಯಾಂ ತರ್

ಆಟ್ವ್ಯಾ ಕುಶಿನ್ ಬಸ್ಲೆಂ ತರ್‌ಯೀ

ದಿಷ್ಟ್ ತಾಚಿ ಘರಾ ಕುಶಿನ್‌ಂಚ್

ಲೋವ್ ಚೋರ್-ಮಾಜ್ರಾಪರಿಂ ಯೆಂವ್ಚ್ಯಾ ಮ್ಹಜಿಚ್ಚ್

ಬೋಂಟ್ ಕರುಂಕ್ ಆಯಿಲ್ಲೆ ಭಾಸೆನ್.

ಆವಯ್ ಬದ್ಲಾಕ್ ಹಾಂವ್ ಆಯಿಲ್ಲೊಂಚ್

ಘುಂವ್ತಾ ಮ್ಹಜ್ಯಾ ಪಾಂಯಾ ಭಂವಾರಿಂಚ್

ಆನ್ಕಿಟೆಕ್‌ಚ್ಚ್ ನಿಶಾನಿ ಲಾಗಂವ್ಚೆಪರಿಂ

ಅಖ್ರೇಕ್ ಪಾವ್ಟಿಂ ಮಿಶಿಯೊ ಹಾಲವ್ನ್

ರಾಗಾನ್ ದಾಂತ್ ಚಾಬೊನ್ ಪಳೆತಾ

ಕಾಡ್ ಬೀಗ್, ಪುಸ್ ದರ್ನ್

ಎಕ್ ತಣ್‍ಯೀ ಸೊಡಿನಾಸ್ತಾಂ ನಿತಳ್ ಕರ್ ಆಂಗಣ್

ಪಯ್ಲೆಂಚೆಚ್ಚ್ ಭಾಸೆನ್..

ಪಾಟಿಂ ಯೆಂವ್ಚಿಂ ಖುಣಾಂ ದಿಸ್ಲ್ಯಾರ್‌ಚ್ಚ್

ಪಾಂರ್ಕಿತಾ ಧರ್ಣಿಕ್

ಪಾಟ್ಲಾವ್ ಕರುನ್ ಯೆತಾ ಪಯ್ಸ್ ಮ್ಹಣಾಸರ್

ಆಮ್ಚೆ ಮಧೆಂ ಚಡ್ ಅಂತರ್ ಜಾತಚ್ಚ್

ಆವೇಶಾಚೊ ರಾಗ್ ಬಾಕಿ ದವರ್ನ್ ಪಾಟಿಂ ಯೆತಾ

ಸದಾಂಯ್ ರಾತಿಂ ಜಿವಾಚೆ ಭಿರಾಂತೆಪರಿಂ

ಧೊಸ್ತಾ ಆತಾತಾಂ ಮಾಜರ್

ಮೆಲ್ಲ್ಯಾಬರಿಂ ಸ್ವಪಾಣ್

ಕಾವ್ಜೆವ್ನ್ ಘಾಮೆವ್ನ್ ಉಟೊನ್ ಬೊಸ್‌ಲ್ಲೆಕ್

ಮೆಲ್ಲಿ ಆವಯ್‌ಹೀ, ಯಾ ಮಾಜರ್‌ಗಿ

ಗಯ್ರೆಂ ಗಯ್ರೆಂ

ಆವಯ್ ನಿದ್ಲ್ಯಾ ಮ್ಹಜ್ಯಾ ಕುಶಿನ್

ಅಮ್ಕ್ಯಾ-ತ್ಯಾ ಲೊಕಾಚಿ ಫಿಕಿರ್‌ಚ್ ನಾಸ್ತಾಂ

ಖಬರ್ ನಾಸ್ತಾಂ ಹ್ಯಾ ಸಂಸಾರಾವಿಶಿಂ

ಮಾಜ್ರಾಕ್ ಆನಿ ಘರಾಕ್‍ಯೀ

ವಿಸರ್ನ್..

[ಕಾನಡಿ ಮೂಳ್: ರೇಣುಕಾ ರಮಾನಂದ್. ಕೊಂಕ್ಣೆಕ್: ರೋಶು ಬಾಬಾ]

ರೇಣುಕಾ ರಮಾನಂದ್: ಉತ್ತರ ಕನ್ನಡಚ್ಯಾ ’ಅಂಕೋಲಾ’ ತಾಲುಕಾಂತ್ಲ್ಯಾ ಶೆಟಗೇರಿಚಿ ರೇಣುಕಾ ರಮಾನಂದ್, ಎಮ್.ಎ ಶಿಕಪ್ ಜೊಡ್ಲಲಿ ವೃತ್ತೆನ್ ಪ್ರಾಥಮಿಕ್ ಶಿಕ್ಷಕಿ. ಕರ್ನಾಟಕ ಲೇಖಿಕಾಂಚೊ ಸಂಘ್ ಬೆಂಗ್ಳುರ್ ಹಾಂಚೆಥಾವ್ನ್ ’ಗುಡಿಬಂಡೆ ಪೂರ್ಣಿಮಾ ಉದಯೋನ್ಮುಖ ಪ್ರಶಸ್ಥಿ 2014 ಆನಿ 2015’ ಇಸ್ವೆಂತ್ ಹಿಣೆ ಜೊಡ್ಲ್ಯಾತ್, ಸಂಕ್ರಮಣ ಕಾವ್ಯ ಪುರಸ್ಕಾರ್ 2014 ತಶೆಂಚ್ ಜೀವನ ಪ್ರಕಾಶನ ಚಿಕ್ಕಬಳ್ಳಾಪುರ ಹಾಣಿಂ ರಾಜ್ಯ್ ಪಟ್ಟಾಚ್ಯಾ ’ಯುಗಾದಿ ಕವಿತಾಸ್ಪರ್ದೊ 2015’ ಹಾಂತುಂ ಹಿಚ್ಯಾ ಕವಿತೆಕ್ ಪಯ್ಲೆಂ ಇನಾಮ್ ಲಾಭ್ಲಾಂ.