आशावादी प्रकाशन-चो रुप्योत्सव आनी पयणारिचो दशमानोत्सव संभ्रम
दसेंबर १४ (मंगळूर): २००० इस्वेंत कुवेयटांत सुर्वातल्ल्या ’आशावादी प्रकाशन’चो रुप्योत्सव, तशेंच २०१५ इस्वेंत मुंबंयत सुर्वातल्ल्या पयणारी.कोम म्हळ्ळ्या तीन लिपिंच्या कोंकणी साहित्यीक जाळिजाग्याचो दशमानोत्सव - अशें दोडो संभ्रम आयतारा १४ दसेंबर) सकाळीं १० थावन दोनपारां १ पऱ्यांत मंगळूरच्या एम.सी.सी.ब्यांकाच्या पी.एफ.एक्स.सभांगणांत चल्लो. बसती वामन शेणय स्मारक २५ कोंकणी पुसतकांचें लोकार्पण, मौल्याधारीत कोंकणी पत्रिकोध्यमाचो जिविता-आवदेचो पुरसकार तशेंच साहित्य, कला, रंगमंच, भरतनाट्य, समाजसेवा शेतांनी देणगी दिलेल्यांक सन्मान काऱ्यें आनी कन्नड लिपियेंत लिपियंतरण जाल्ल्या कोंकणिच्या पुसतकाचो पयलो पुरसकार ’देवादीन डेनीस डिकुन्हा स्मारक आशावादी लिपियंतरण पुसतक पुरसकार प्रधान’ हीं सर्व ह्या संभ्रमांत आसलें.
कारक्रमाच्या सुर्वातेर प्रसतावन दिलेल्या सूत्र-संचालक लारेन्स विनोद बरबोजा शिर्वा (म्यांचेसटर) हाणें आशावादी प्रकाशन पाटल्या २५ वर्सांनी कोंकणी साहित्य प्रकाशन मात्र न्हय आसतां, साहित्यीक चटुवटिको, साहित्यीक स्पर्दे, अध्ययन कामासाळां, एका संस्थ्यापरीं निरंतर जावन चलवन आयलां, ताचो फळ जावन कोंकणिंत जायते साहित्यीक प्रतिभावंत आज पर्जळतात म्हणालो.
काऱ्याचें उग्तावण मानादीक रोनालड प्रकाश डिसोज अजेकार हाणें कर्तच, आशावादी प्रकाशनाचो स्थापक तशेंच पयणारी.कोम-न संपादक वल्ली क्वाड्रस अजेकार हाणें येवकार उलवप केलें, नाम्नेचो कोंकणी कवी आंड्रू एल. डिकुन्हान ’आशावादी प्रकाशनाची २५ वर्सांची वाट’ विश्यांत सविसतार विवर दितच मानाधीक मेलवीन डिकुन्हान ’पयणारी दशमानोत्सवाचो विशेष अंको (आशावादी-२५)’ लोकार्पण केलो. मुकेल सयरे जावन बाब नंदगोपाल शेणय (विश्व कोंकणी केंद्र, मंगळूर), डो.चंद्रलेख डिसोज (गोवा विध्यापीठाच्या कोंकणी विभागाची आधली मुखेसत), तशेंच बाय कोरीन रासकिन्हा (वैट-डावस) वेदिचेर उपस्थीत आसलीं.
दायज.कोमची सह-संपादकी जावन वावर केल्ली बाय प्रिया सिकवेरा फेरार हिणें सर्व सन्मानितांचीं मानपत्रां वाचलीं. क्लारा अरूण डिकुन्हा (समाज सेवा), इवेट रेमोना पिरेरा (भरतनाट्य), क्रिसटोफर डिसोज नीनासम (रंगमंच), रोहीत सांक्तूस (समाज सेवा), विल्सन डिसोज कय्यार (कला), ग्ल्यानीश मार्टीस अलंगार (साहित्य), बर्नाड जे कोसता कुंदापूर (नाटक आनी डिजिटल पत्रिकोध्यम) हांकां शाल पांग्रावन, यादिसतिका, मानपत्र आनी उडासाची काणीक दीवन मान केलो. आवील रसकीन्हा (मौल्याधारीत कोंकणी पत्रिकोध्यम) हाका जिण्ये आवदेचो पुरसकार, डो.चंद्रलेख डिसोज आनी मानादीक चेतन लोबो थावन दिवयलो. हेच वेळार हांचो तिस्रो कविताजमो ’पावसा थेंबे’ लोकार्पण जालो.
मानाधीक मेलवीन डिकुन्हान अपले संधेश दितच, आवील रसकीन्हा आनी सन्मानितां पयकिंत क्लारा अरूण डिकुन्हा उलयलीं.
अरूण डिसोज अजेकार हाणें सूत्रसंचालन कर्तासतां म्हळें; "शेंभोर आनी तिसांच्याकी चडीत वर्सांचो इतिहास आसच्या कोंकणी पत्रिकोध्यमांत हेंच पयलेपावटीं कोंकणी काणियांचेर समग्र अध्ययनाचीं पुसतकां पर्गटून येंवचीं". साळकाच्या सिरिवंताच्यो कथा (अध्ययन), चल दोन चंद्रांक (अध्ययन), कथाविहान (अध्ययन), कथापाठ (अध्ययन). म्हळ्ळीं च्यार अध्ययन पुसतकां, भृमिदेंतल्यो सावळ्यो (मेलवीन जे. वास), भृमिदेंतली झडती (मेलवीन जे. वास), जिण्ये काणीक (मोनिका डेसा मथायस) म्हळ्ळीं तीन कादंबरिचीं पुसतकां, आमगेल्यो कोंकणी काणियो (जेसन पिंटो), वर्क फ्रोम होम (वल्ली क्वाड्रस), जांबळाचो रूक आनी हेर कथा (क्याथरीन रोड्रिगस), उदकाचो आर्सो (मेलवीन जे. वास) म्हळ्ळीं च्यार कथा संग्रहां, नानुच्या साण्याथावन (नानू मरोल तोट्टाम), मुदल (स्टीवन क्वाड्रस पेर्मुदे), काळीज उसवलां (उदय एन. म्हांबरो) म्हळ्ळीं तीन लेखनांचीं पुसतकां तशेंच उज्वाडाच्ये वेंगेंत (आंड्रू एल. डिकुन्हा), मुरळिचो नाद (प्रसन्न निड्डोडी मुंबय), अंतरमन (उर्जिता भोबे) म्हळ्ळीं तीन कवितासंग्रहां, हीं सर्व आशावादी प्रकाशनान पर्गटलेलीं पुसतकां लोकार्पण जालीं. मायकल डिसोज विशन कोंकणिच्या कुमकेंत ’मुरळिचो नाद’ कवितासंग्रह लोकार्पण जालें.
देवादीन डेनीस डिकुन्हा स्मारक आशावादी लिपियंतरण पुरसकार ’निर्वासीत यात्रिची भंवडी’ कवितासंग्रहाच्या कवी शैलेंद्र मेहताक मेलवीन रोड्रिगस आनी फ्रान्सीस डिकुन्हान शाल पांग्रावन, मानपत्र, यादिसतिका आनी उडासाची काणीक दिली. आंड्रू एल. डिकुन्हान पुरसकाराचो ऐवज रू.२५,००० चेक रुपार हतांतर केली. कवी शैलेंद्र मेहतान अपलीं दोन उत्रां उलयलो.
मेलवीन रोड्रिगस (साहित्य अकाडेमिचो संचालक), अनील लोबो पेर्माय (एम.सी.सी.ब्यांकाचो निर्देशक), डो.एडवर्ड एल. नज्रेत, जुलियाना वेगस, एच्चेम पेर्नाल (संपादक - किटाळ.कोम), विन्सी क्वाड्रस (दल्गादो कोंकणी अकाडेमिचो आधलो अध्यक्ष), ज्यो क्वाड्रस संतेकट्टे. मानाधीक आलवीन सेरावो, एच. आर. आळव, कोन्सेपटा फेर्नांडीस आळव, वायलेट जे. पिरेरा, सावराट भोबे, मच्चा मिलार, मारियेट रसकीन्हा, डेवीड डिसोज अजेकार, जोन पेर्मन्नूर, विलफ्रेड लोबो पडील सयरीं जावन आसलीं. प्रिया सिकवेरा फेरार, जेस्सी लोबो कुलशेकर हाणीं सहकार दिलो.
लोकार्पण जाल्ल्या सर्व पुसतकांच्या लेखकांच्या तर्फेन नानू मरोल तोट्टाम उलयलो. वल्ली क्वाड्रस अजेकार हाणें धिन्वास पाठयले.
Comments
No comments yet. Be the first to say what you thought of it.
Leave a comment