ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ನಿರ್ಭಾಗ್ಯಾಚೆಂ ಸ್ವಪಾಣ್
ಅವಸ್ವರ್ 9
ಜೆಸ್ಸಿಚೆಂ ಕಾಗದ್ ಮೆಲ್ವಿನಾನ್ ವಾಚುಂಕ್ ಆರಂಭ್ ಕೆಲೆಂ -
"ಮ್ಹಜ್ಯಾ ಅಧಿಕ್ ಮೊಗಾಚ್ಯಾ ಮೆಲ್ವಿನ್,
ಹಾಂವ್ ಬರ್ಯಾ ಥರಾನ್ ಕಾರ್ಕಳ್ ಯೇವ್ನ್ ಪಾವ್ಲಿಂ. ಸದಾಂಚ್ಯಾಬರಿ ಆತಾಂ ಕ್ಲಾಸ್ ಪ್ರಾರಂಭ್ ಜಾಲ್ಯಾ. ಮ್ಹಾಕಾ ಆತಾಂ ಕಸಲಿಚ್ ಖಂತ್ ದಿಸಾನಾ. ಕಿತ್ಯಾಕ್ ಮ್ಹಜ್ಯಾ ಸಂಗಿಂ ಹಾಂವ್ ತುಜೊ ಮೋಗ್ ಹಾಡ್ನ್ ಆಯ್ಲ್ಯಾಂ. ಪುಣ್ ಮ್ಹಾಕಾ ಅಧಿಕ್ ಬೆಜಾರಾಯ್ ಆನಿಂ ದುಃಖ್ ಬೊಗ್ತಾ ಮೆಲ್ವಿನ್...... ತುಕಾ ಸೊಡ್ನ್ ಹಾಂವ್ ಇತ್ಲಿ ಪಯ್ಸ್ ಆಯ್ಲ್ಯಾಂ ಮ್ಹಣೊನ್. ಮ್ಹಜೆಂ ಕಾಳಿಜ್ ದಿಸಾಚಿ ಹರ್ ಘಡಿ ತುಜ್ಯಾ ವಿಶ್ಯಾಂತ್ ನಿಯಾಳ್ತಾ. ತುಜ್ಯಾವಿಣೆಂ ಮ್ಹಾಕಾ ಎಕ್ಸುರ್ಪಣ್ ಸೊಸುಂಕ್ ತಾಂಕಾನಾ ಮೆಲ್ವಿನ್. ಆಮಿಂ ಸಾಂಗಾಂತಾ ಮೆಳ್ಲ್ಲೊ ವೇಳ್ ಭೋವ್ ಥೊಡೊ ಆನಿಂ ಆತಾಂ ತುಕಾ ಕಂಯ್ ಏಕ್ ಪಾವ್ಟಿಂ ಪಳೆಯಾಂಶೆಂ ಅತ್ರೆಗ್ ಭೊಗ್ತಾ.
ಮ್ಹಜ್ಯಾ ಪ್ರೀತಿಚ್ಯಾ ಮೆಲ್ವಿನ್.....ಆಮ್ಚೊ ಮೋಗ್ ಸುರ್ಯೊ ಉದೆತಾನಾ ಫುಲೊನ್ ಸುವಾದ್ ಫಾಂಕ್ಚ್ಯಾ ಫುಲಾಬರಿ ಸದಾಂಚ್ ಜಿವೊ ಉರೊಂದಿ. ಸಂಸಾರಾಂತ್ಲಿಂ ಖಂಯ್ಚಿಂಚ್ ರಚ್ನಾಂ ಆಮ್ಚೆಂ ಮಧೆಂ ವೆಗ್ಳಾಚಾರ್ ಹಾಡುಂಕ್ ಸಕಾನಾ ಜಾಂವ್ದಿತ್. ಮೆಲ್ವಿನ್....ಹರ್ಯೇಕ್ ಘಡಿ ತುಕಾ ಹಾಂವ್ ಚಿಂತ್ತಾ. ತುಜ್ಯಾ ವಿಷ್ಯಾಂತ್ ಬರಿಂ ಚಿಂತ್ನಾಂ ಮಾತ್ರ್ ಮತಿಂತ್ ದವರ್ತಾಂ. ತುಜೊ ಮೋಗ್ ಮ್ಹಜೆರ್ ಆಸ್ತಾ ಪರ್ಯಾಂತ್ ಹಾಂವ್ ಭಾಗಿ.
ಚಡ್ ಬರಂವ್ಕ್ ಮ್ಹಾಕಾ ಕಳಾನಾ ಮೆಲ್ವಿನ್. ಹಾಂತುಂ ಸಬಾರ್ ಚುಕಿ ಆಸ್ತಿತ್. ತುಂ ತ್ಯೊ ವ್ಹಡ್ ಮನಾನ್ ಸುಧಾರ್ಸುನ್ ವ್ಹರ್. ತುಜ್ಯಾ ಜಾಪಿಕ್ ಹಾಂವ್ ಅತುರಾಯೆನ್ ರಾಕ್ತಾಂ. ತುಜೆಂ ಲಿಸಾಂವ್ ಬರ್ಯಾ ಥರಾನ್ ಶಿಕ್. ಚಡ್ ತುಕಾ ಕಿತೆಂ ಬರಂವ್? ತುಂ ಸಕ್ಕಡ್ ಜಾಣಾಂಯ್. ಮ್ಹಜ್ಯಾ ಅಲ್ಪ್ಯಾಚಿ ಬೂದ್ಬಾಳ್ ಹಾಂವೆಂ ತುಕಾ ಸಾಂಗ್ಚಿಂ ನಹಿಂ. ಮೆಲ್ವಿನ್, ಕಾಗ್ದಾಕ್ ಜರೂರ್ ಜಾಪ್ ಪಾಟಯ್. ತುಜ್ಯಾ ಮೊಗಾಂತ್ ಸದಾಂಚ್ ಥಿರ್ ರಾಂವ್ಚೆಂ.
ಸದಾಂಚ್ ತುಜೆಂ
ಜೆಸ್ಸಿ.
’ಸುರ್ಯೊ ಉದೆತಾನಾ ಫುಲೊನ್ ಪ್ರಕಾಸ್ಚೆಂ ಫುಲ್...’ ಮ್ಹಣಾಲೊ ಮೆಲ್ವಿನ್ ತಾಚ್ಯಾ ಇತ್ಲ್ಯಾಕ್. ಕಸಲಿ ಸುಂದರ್ ಸರ್ ತಾಣೆಂ ದಿಲ್ಲಿ. ತ್ಯಾ ಅವ್ಯಕ್ತ್ ಮೊಗಾಕ್ ಎಕಾ ಫುಲಾಕ್ ತಾಣೆಂ ಸರಿ ಕೆಲ್ಲೆಂ. ’ಸುರ್ಯೊ ಸದಾಂಚ್ ಉದೆತಾಲೊ. ಆನಿಂ ತಾಚ್ಯಾ ಯೆಣ್ಯಾನ್ ತಳ್ಯಾಂತ್ಲೆಂ ಸಾಳಕ್ ಸದಾಂಚ್ ಸಂತೊಸ್ ಪಾವ್ತೆಲೆಂ. ಉದ್ಯಾನಾಂತ್ಲೆಂ ಫುಲ್ ವಾರ್ಯಾರ್ ಧಲ್ತೆಲೆಂ. ತಸೊಚ್ ಆಮ್ಚೊ ಮೋಗ್ ಸದಾಂಚ್ ಜಿವೊ ಉರ್ತೊಲೊ ಆನಿಂ ಚಡ್ತೊಲೊ ಚಿಂತ್ಲೆಂ ಮೆಲ್ವಿನಾನ್.
ತಾಣೆಂ ತಕ್ಷಣ್ ಜೆಸ್ಸಿಕ್ ಏಕ್ ಲಾಂಬ್ ಕಾಗದ್ ಬರೈಲೆಂ. ಆಪ್ಣಾಚ್ಯಾ ಕಾಳ್ಜಾಚೆ ಉಮಾಳೆ, ತಳ್ಮಳೆ ಆನಿಂ ಸಗ್ಳಿಂ ಬೊಗ್ಣಾಂ ತ್ಯಾ ಸಾಂಜೆರ್ಚ್ ಮೆಲ್ವಿನಾನ್ ತೆಂ ಕಾಗಾದ್ ತಪ್ಪಾಲಾಕ್ ಘಾಲೆಂ. ಜೆಸ್ಸಿಚ್ಯಾ ಕಾಗ್ದಾಚಿ ಸಂಗತ್ ಗಿಬ್ಬಾಕ್ ಸಾಂಗೊಂಕ್ ತೊ ವಿಸರ್ಲೊನಾ.
ಕೊಲೆಜಿ ಥಾವ್ನ್ ಸಾಂಜೆರ್ ಸುಟ್ಲ್ಲೊ ತೊ ಘರಾ ಪಾವ್ತಾನಾ ಜೆಸ್ಸಿಚ್ಯಾ ಅವೈಚೊ ಉಗ್ಡಾಸ್ ಆಯ್ಲೊ ತಾಕಾ. ತಾಂಗೆರ್ ವೊಚನಾಸ್ತಾಂ ಸಬಾರ್ ದೀಸ್ ಜಾಲ್ಲೆಂ. ತಶೆಂ ಕಾಫಿ ಪಿಯೆವ್ನ್ ತೊ ತಾಂಚ್ಯಾ ಜ್ಯಾಲಾಂತ್ ಪಾವ್ತಾನಾ ಸೊಪ್ಯಾರ್ ಪಾನ್ಪೊಡ್ ಧಾಡಾವ್ನ್ ಆಸ್ಲ್ಲ್ಯಾ ವ್ಹಡ್ಲಿಮಾಂಯ್ನ್ ದೆಖ್ಲೆಂ. ".....ಓ ಯೆ ಪುತಾ ಆಜ್ ಆಮ್ಗೆರ್ ಯೇವ್ಕ್ ತುಕಾ ವಾಟ್ ಮೆಳ್ಳಿ ಮ್ಹಣ್ ದಿಸ್ತಾ. ಪಳೆಯಾಂ, ಮ್ಹಾತಾರಿ ದೊಗಾಂ ಜೀವಂತ್ ಆಸಾತ್ ವ ನಾಂ ತೆಂ ಪಳೆಂವ್ಕ್ ತರಿ ತುಕಾ ಪುರ್ಸತ್ ಮೆಳೊಂಕ್ ನಾ" ತಿ ದುರ್ಸಾಲಿ.
ಮೆಲ್ವಿನಾನ್ ತಕ್ಲಿ ಪಂದಾ ಘಾಲ್ನ್ ಮ್ಹಳೆಂ -"ಮಾಂಯ್, ಯೇಂವ್ಕ್ ಪಾವ್ಟ್ ಜಾಲಿನಾ. ಘರಾಂತೀ ಮಸ್ತ್ ಕಾಮ್ ಆಸ್ಲ್ಲೆಂ. ತುಂ ಕಶಿ ಆಸಾಯ್? ಮಾವ್ಶಿ ಕಶಿ ಆಸಾ?"
"ಹಾಂ, ಮಾವ್ಶಿ ಆತಾಂ ಹುಶಾರ್ ಆಸಾ. ಅಂಗಾರ್ ಆಸ್ಲ್ಲೊ ತಾಪ್ ಆತಾಂ ಸುಟ್ಲಾಂ. ಹಾಂವೆಂ ಹ್ಯಾ ಮ್ಹಾತರ್ಯಾ ಪ್ರಾಯೆರ್ ಕಿತ್ಲೆ ದೊಳೆ ಕಾಡ್ನ್ ರಾಕ್ಲ್ಯಾರೀ ತುಜಿ ಸಾವ್ಳಿಯಿ ದಿಸ್ಲಿನಾ. ದೆವಾಚ್ಯಾ ದಯೆನ್ ತಿಕಾ ತಾಪ್ ಆತಾಂ ನಾ ಮ್ಹಣ್ಯಾಂ. ಬಿತರ್ ರಾಂದ್ಪಾರ್ ಆಸಾ ಮಾಗ್ಗಿ"
"ಜೆಸ್ಸಿಚೆಂ ಕಾಗದ್ ಆಯ್ಲಾಂಗಿ?
"ಹಾಂ. ಸಾಂಗ್ಲ್ಲ್ಯಾಬರಿ ವ್ಹಯ್. ಪುಣ್ ತೆಂ ವಾಚುನ್ ಸಮಾ ಸಾಂಗ್ತೊಲೊ ಕೊಣ್ ಆಸಾ? ದೆಕುನ್ಂಚ್ ತುಕಾ ಹಾಂವ್ ರಾಕ್ತಾಲಿಂ. ಮಾಗ್ಗಿ......ಆಳೆ ಮೆಲ್ವಿನ್ ಆಯ್ಲಾ. ಜೆಸ್ಸಿಚೆಂ ಕಾಗದ್ ಹೆವ್ಶಿನ್ ಹಾಡ್...." ವ್ಹಡ್ಲಿಮಾಂಯ್ನ್ ಉಲೊ ಕೆಲೆಂ.
ಥೊಡ್ಯಾ ವೆಳಾನ್ ಮಾಗ್ಗಿಬಾಯ್ ಭಾಯ್ರ್ ಆಯ್ಲಿ. ತಿ ಜೀವಾಂತ್ ಕಠಿಣ್ ಆಸ್ಕತ್ ಜಾಲ್ಲಿ ದಿಸ್ತಾಲಿ. "ಹುಂ.... ಆಯ್ಲೊಯ್ಗಿ ಮೆಲ್ವಿ? ಹಾಂವೆಂ ಚಿಂತ್ಲ್ಲೆಂ ತುಂ ಕಾಂಯ್ ಆಮ್ಗೆರ್ ಯೆಂವ್ಚೊನಾಂಯ್ ಮ್ಹಣ್, ತುಕಾ ಮ್ಹಜೊ ರಾಗ್ ಆಯ್ಲಾ ಕೊಣ್ಣಾ ಮ್ಹಣೊನ್" ಉಲೈಲಿ ತಿ.
"ರಾಗ್ ಕಿತ್ಯಾಕ್ ಮಾವ್ಶೆ? ಖಂಯ್ಚ್ಯಾ ಕಾರಣಾಕ್ ಹಾಂವೆಂ ತುಮ್ಚೆರ್ ರಾಗ್ ಕರ್ಚೊ? ಪಳೆಯಾಂ ಮಾವ್ಶೇ ತೆಂ ಕಾಗದ್ ದಿ" ಆಶೆಂ ಸಾಂಗೊನ್ ಮೆಲ್ವಿನಾನ್, ಜೆಸ್ಸಿಚೆಂ ಕಾಗದ್ ಘೆತ್ಲೆಂ ಆನಿಂ ಬರೈಲ್ಲಿ ಖಬಾರ್ ವಾಚುನ್ ಸಾಂಗ್ಲಿಂ. ಆವಯ್ಚ್ಯಾ ಭಲಾಯ್ಕೆ ವಿಶ್ಯಾಂತ್ ವಯ್ರ್ ವಯ್ರ್ ಸವಲಾಂ ಘಾಲ್ಲಿಂ ಜೆಸ್ಸಿನ್.
"ಹಾಂ.. ಆತಾಂ ಹಾಕಾ ಜಾಪ್ ದೀಂವ್ಕ್ ಕಿತೆಂ ಕರ್ಚೆಂ ಪುತಾ?" ಮಾಗ್ಗಿಬಾಯೆನ್ ವಿಚಾರ್ಲೆಂ.
"ಹಾಂವ್ ಜಾಪ್ ಬರೈತಾಂ. ಹಾಡ್ಲ್ಲೆಂ ಕಾಗಾದ್ ಆಸಾಗಿ?" ಮೆಲ್ವಿನಾನ್ ಮ್ಹಳೆಂ.
"ಕಾಗದ್ ನಾಮೂ. ಹಾಂವ್ ತುಕಾ ಪಯ್ಶೆ ದಿತಾ. ತುಂ ಫಾಲ್ಯಾಂ ಸಕಾಳಿಂ ಪೋಸ್ಟಾಂತ್ಲೆಂ ಘೆವ್ನ್ ತುಂಚ್ ಏಕ್ ಕಾಗದ್ ಬರವ್ನ್ ಘಾಲ್" ಮ್ಹಣಾಲಿ ತಿ ಪೊತ್ಯೆಕ್ ಹಾತ್ ವರ್ನ್.
"ನಾಕಾ ಮಾವ್ಶೆ. ಪಯ್ಶೆ ತುಂ ದೀನಾಕಾ" ಉಬೊ ರಾವೊನ್ ಮೆಲ್ವಿನಾನ್ ಮ್ಹಳೆಂ. "ಆಮ್ಗೆರ್ ಕವರಾಂ ಹಾಡ್ಲೆಲಿಂ ಆಸಾತ್. ಆಜ್ಚ್ ರಾತಿಂ ಕಾಗದ್ ಬರೈತಾಂ. ಕಿತೆಂ ಬರೈಜಾಯ್ ಮಾವ್ಶೆ?"
"ವಿಶೇಷ್ ಕಾಂಯ್ನಾ ಪುತಾ. ಹಾಂವ್ ಆತಾಂ ಬರಿಂ ಆಸಾ. ವಕಾತ್ ಹಾಡ್ಲಾಂ. ಮ್ಹಜೆ ವಿಶ್ಯಾಂತ್ ಕಾಂಯ್ ಖಂತ್ ಕರ್ನಾಕಾ ಮ್ಹಣ್ ಬರಯ್..."
"ಜಾಯ್ತ್ ತರ್. ವೆತಾಂ ಮಾವ್ಶೆ. ವ್ಹಡ್ಲಿಮಾಂಯ್, ವೆತಾಂ ಹಾಂವ್. ದೇವ್ ಬರಿ ರಾತ್ ದೀಂವ್" ತಾಣೆಂ ಮೆಟ್ ಭಾಯ್ರ್ ದವರ್ಲೆಂ.
"ಬರೆಂ ಪುತಾ. ಫಾಲ್ಯಾಂ ಸಾಂಜೆಇತ್ಲ್ಯಾಕ್ ಆಮ್ಗೆರ್ ಯೇಂವ್ಕ್ ಪಳೆ" ವ್ಹಡ್ಲಿಮಾಂಯ್ ಮ್ಹಣಾಲಿ. ತಿಕಾ ’ಹೂ’ ಮ್ಹಣೊನ್ ಮೆಲ್ವಿನ್ ಕಾಳೊಕ್ ಜಾಂವ್ಚ್ಯಾ’ದಿಂ ಘರಾ ಪಾವ್ಲೊ.
ಥೊಡೆ ದೀಸ್ ಪಾಶಾರ್ ಜಾಲೆ. ಜೆಸ್ಸಿ ಥಾವ್ನ್ ಏಕ್ ದೀಸ್ ಕಾಗದ್ ಆಯ್ಲೆಂ ಮೆಲ್ವಿನಾಕ್. ತೆಂ ವಾಚ್ತಚ್ ತಾಕಾ ಜಾಲ್ಲೆಂ ಆಜ್ಯಾಪ್ ಸಾಂಗೊನ್ ತುದಿ ಕರುಂಕ್ ನಜೊ. ತಾಣೆಂ ಗಿಬ್ಬಾ ವಿಶ್ಯಾಂತ್ ಜೆಸ್ಸಿಕ್ ಪಯ್ಲೆಂಚ್ ಬರೈಲೆಂ. ಜೆಸ್ಸಿನ್ ಕಾಗ್ದಾರ್ ಯೆತಾ ತ್ಯಾ ಮಂಗ್ಳುರಾ ಖಂಡಿತ್ ಮೆಲ್ವಿನಾನ್ ಆನಿಂ ಗಿಬ್ಬಾನ್ ಕಾರ್ಕಳಾಕ್ ಭಾಯ್ರ್ ಸರೊಂಕ್ಜಾಯ್ ಮ್ಹಣ್ ತಿಳ್ಸಿಲೆಂ. ಸಾಂಗಾತಾಚ್ ಬಸ್ಸಾಚ್ಯಾ ಖರ್ಚಾಕ್ ಧಾ ರುಪಯ್ ಮನಿಯಾರ್ಡರ್ ಕೆಲ್ಯಾತ್ ಮ್ಹಳ್ಳೆಂ ವಾಚ್ತಾನಾ ಮೆಲ್ವಿನ್ ನಿಜಾಯ್ಕಿ ಘಾಬರ್ಲೊ.
"ಜೆಸ್ಸಿ ಮ್ಹಾಕಾ ಪಯ್ಶೆ ಧಾಡ್ತಾ ತರೀ ಕಿತ್ಯಾಕ್ ಗಿಬ್ಬಾ?" ಗಿಬ್ಬಾಕ್ ಹಿ ಸಂಗತ್ ಕಳೊವ್ನ್ ತೊ ವಿಚಾರಿಲಾಗ್ಲೊ. "ಜೊಡ್ಲ್ಲಿ ಜೋಡ್ ಮ್ಹಾಕಾಚ್ ಖಾವಂವ್ಚಿ ಆಲೋಚನ್ಗಿ ತಾಚಿ? ಪೋಯ್ರ್ಚ್ ತಾಣೆಂ ವೀಸ್ ರುಪಯ್ ದಿಲ್ಲೆ. ಹೆಂ ಮ್ಹಾಕಾ ಬಿಲ್ಕುಲ್ ಪಸಂದ್ ನಾ"
ಹಾಸೊನ್ ಗಿಬ್ಬಾ ಮ್ಹಣಾಲೊ - "ಘಡ್ಬಡ್ನಾಕಾ ಮೆಲ್ವಿನ್. ಜೆಸ್ಸಿಕ್ ತುಜ್ಯಾ ವಯ್ರ್ ಆಸ್ಚ್ಯಾ ವಿಶೇಷ್ ಮೊಗಾಚೊ ಘುರ್ತ್ ವೊ. ತೆಂ ನಹಿಂ ತರ್, ಖರ್ಚಾಕ್ ತುಕಾ ಖಂಯ್ಚೆ ಪಯ್ಶೆ ಮೆಳ್ತಿತ್? ಘರ್ಚಿಂ ದಿತಿತ್ಗಿ?"
"ಪಯ್ಶಾಂಕ್ ಲಾಸ್ ವರ್ನ್" ಗಂಭೀರ್ ಜಾಲೊ ತೊ. "ಮ್ಹಾಕಾ ಬಿಲ್ಕುಲ್ ಜೆಸ್ಸಿಚೆ ಪಯ್ಶೆ ಘೆಂವ್ಕ್ ಖುಶಿ ನಾ. ಹಾಂವ್ ಜೆಸ್ಸಿಚೊ ಮೋಗ್ ಕರ್ತಾ, ನಹಿಂ ತಾಚ್ಯಾ ಪಯ್ಶಾಂಚೊ"
"ತುಜಿ ಖುಶಿ...." ತಿತ್ಲೊಚ್ ಗಂಭೀರ್ ಜಾಲೊ ಗಿಬ್ಬಾ. "ಹಾಂವೆಂ ಮ್ಹಣ್ಚೆಂ ತುಂ ವಿದ್ಯಾರ್ಥಿ ಆನಿಂ ತೆಂ ಜೊಡಿರ್ ಆಸ್ತಾನಾ, ತಾಚೆ ಪಯ್ಶೆ ತುವೆಂ ಘೆತ್ಲ್ಲ್ಯಾಂತ್ ಬಾಧಕ್ ಕಿತೆಂ? ಫಾಲ್ಯಾಂ ತುಂಯ್ ಕಾಮಾಕ್ ಲಾಗ್ತೊಲೊಯ್, ಉಪ್ರಾಂತ್ ಕಾಜಾರಾಚ್ಯಾ ಬಾಂದಾಂತ್ ತುಮಿಂ ಎಕ್ವೊಟ್ತೆಲ್ಯಾತ್. ತೆದಾಳಾ ಎಕಾಮೆಕಾಕ್ ದಿಂವ್ಚ್ಯಾಂತ್ ಆನಿಂ ಘೆಂವ್ಚ್ಯಾಂತ್ ನಾತ್ಲ್ಲೊ ಬೇದ್, ಉಬ್ಜಾನಾತ್ಲ್ಲಿ ದಾಕ್ಶೆಣ್ ಆತಾಂ ಕಿತ್ಯಾಕ್? ಜೆಸ್ಸಿಕ್ ತುವೆಂ ಉತಾರ್ ದಿಲಾಂಯ್. ತಾಕಾ ತುಂ ಕಾಂಯ್ ಸಾಂಗ್ಚೊನಾಂಯ್"
ಗಿಬ್ಬಾಚ್ಯಾ ಉತ್ರಾಂಕ್ ಮೆಲ್ವಿನ್ ಮಾಂದ್ಲೊ ತರೀ, ಪಯ್ಶೆ ಘೆಂವ್ಕ್ ತಾಚೆ ಮನ್ ಖಂಡಿತ್ ಆಯ್ಕಾಲ್ನಾ. ತ್ಯಾ ವಿಶಯಾಚೆರ್ ತಾಣಿ ಚರ್ಚೆ ತಿತ್ಲ್ಯಾರ್ಚ್ ಬಂದ್ ಕೆಲೆ.
ಸನ್ವಾರಾ ದೀಸ್ ಮೆಲ್ವಿನಾಕ್ ಮನಿಯಾರ್ಡರ್ ಮೆಳ್ಳೆಂ. ತ್ಯಾ ಆದಿಂಚ್ ಕಾರ್ಕಳ್ ಪೆಸ್ತಾಕ್ ವೊಚೊಂಕ್ ಗಿಬ್ಬಾನ್ ಆನಿಂ ತಾಣೆಂ ಘರ್ಚ್ಯಾಂಚಿ ಕಬ್ಲಾತ್ ಘೆತ್ಲ್ಲಿ. ಜಿಲ್ಲಿಬಾಯೆನ್ ಪಯ್ಲೆಂ ಮೆಲ್ವಿನಾಕ್ ಪರ್ವಣ್ಗಿ ದಿಲಿನಾ. ತಿಕಾ ಕಶೆಂಯ್ ಪುಸ್ಲಾವ್ನ್, ಬಾಪಾಯ್ಕ್ ಮಂತ್ರಾಂ ಘಾಲ್ನ್ ತಾಣಿಂ "ಜಾಯ್ತ್" ಮ್ಹಣಾಶೆಂ ಕರಿಜಾಯ್ ಜಾಲ್ಯಾರ್ ಮೆಲ್ವಿನಾನ್ ಜಾಯ್ತಿ ವಾಂವ್ಟ್ ಕಾಡ್ಚಿ ಪಡ್ಲಿ.
ಮಾಗ್ಗಿಬಾಯೆಕ್ ಮೆಲ್ವಿನ್ ಕಾರ್ಕಳಾಕ್ ವೆತಾ ಮ್ಹಣ್ ಸಂತೊಸ್ ಜಾಲ್ಲೊ. "ಆಮಿಂಯಿ ಯೆತ್ಯಾಂವ್ ಆಸ್ಲ್ಲ್ಯಾಂವ್ ಪುತಾ. ಕರ್ಚೆಂ ಕಿತೆಂ? ಜಿವಾಕ್ಚ್ ಭಲಾಯ್ಕಿ ಸಾರ್ಕಿನಾ ನಹಿಂವೆ? ತುಂ ವಚೊನ್ ಯೆ. ಜೆಸ್ಸಿ ತುಕಾ ಕಾರ್ಕಳ್ ಮೆಳೊಂಕ್ ಪುರೊ. ತೆಂ ಆಯ್ಲ್ಯಾರ್, ತುಮ್ಕಾಂ ರಾತ್ಚೆಂ ರಾವೊಂಕ್ ಆಸ್ರೊಯಿ ಮೆಳ್ತೊಲೊ. ಆಮ್ಚಿಂ ಆದ್ಲಿಂ ಧನಿಯಾಂ ಬರಿಂ ಮನ್ಶಾಂ. ತುಕಾ ರಾವೊಂಕ್ ನಾ ಮ್ಹಣ್ಚಿಂನಾಂತ್" ತಿ ಸಾಂಗಾಲಾಗ್ಲಿ.
ಜೆಸ್ಸಿನ್ಂಚ್ ವತ್ತಾಯೆನ್ ಆಪ್ಣಾಕ್ ಕಾರ್ಕಳ್ ಆಪಯಿಲ್ಲಿ ಸಂಗತ್ ಆನಿಂ ಮೊಗಾಚಿ ಖಬಾರ್ ತಿಕಾ ಕಳ್ಲ್ಲಿ ಜಾಲ್ಯಾರ್ ಕಿತೆಂ ಮ್ಹಣ್ತಿಂಗಿ ಮ್ಹಣ್ ಚಿಂತುನ್ ಮೆಲ್ವಿನಾಕ್ ಮತಿಂತ್ಚ್ ಹಾಸೊಂಕ್ ಆಯ್ಲೆಂ.
"ಜಾಯ್ತ್ ಮಾವ್ಶೆ, ಅದ್ರುಷ್ಟಾನ್ ಜೆಸ್ಸಿ ಮೆಳಾತ್ ಜಾಲ್ಯಾರ್, ರಾತ್ಚಿ ರಾಂವ್ಚಿ ಖಂತ್ ಪರಿಹಾರ್ ಜಾತೆಲಿ. ನಾ ಜಾಲ್ಯಾರ್ ಕಿತೆಂ ಕರ್ಯೆತಾ? ಇಗರ್ಜೆಚ್ಯಾ ಆಂಗ್ಣಾಂತ್ ನಿದ್ಚೆಂ" ಮ್ಹಳೆಂ ತಾಣೆಂ ಜಿವ್ಯೊ ಫಟಿ ಮಾರ್ನ್.
"ಹಾಂ, ಆಯಿಲ್ಲೊ ಚಡ್ತಾವ್ ಲೋಕ್ ಥಂಯ್ಚ್ ರಾವ್ತಾ. ಬರ್ಯಾ ಥರಾನ್ ವಚೊನ್ ಯೆ. ಕಾರ್ಕಳ್ ಥಾವ್ನ್ ಆಮ್ಕಾಂ ಕಿತೆಂ ಹಾಡ್ತಾಯ್ ಪಳೆತಾಂ" ವ್ಹಡ್ಲಿಮಾಂಯ್ ಮ್ಹಣಾಲಿ.
"ಕಾರ್ಕಳ್ಚ್ ಹಾಡ್ನ್ ಯೆತಾಂ ವ್ಹಡ್ಲಿಮಾಂಯ್. ಆಶೆಂ ಮ್ಹಣೊನ್ ಹಾಸಾತ್ತ್ ಘರ್ಚ್ಯಾ ವಾಟೆಕ್ ಲಾಗ್ಲೊ.
ಸನ್ವಾರಾಚ್ ತಾಣೆಂ ಜೆಸ್ಸಿಕ್ ಕಾಗದ್ ಬರವ್ನ್ ಘಾಲೆಂ. ಗಿಬ್ಬಾ ಆನಿಂ ಆಪುಣ್ ಮಂಗ್ಳರಾ ಸಕಾಳಿಂ ಸಾತ್ ವೊರಾಂಚ್ಯಾ ಬಸ್ಸಾರ್ ಬಸೊನ್ ಕಾರ್ಕಳಾಕ್ ಯೆತೆಲ್ಯಾಂವ್ ಮ್ಹಣ್ ತಾಣೆಂ ಬರಯಿಲ್ಲೆಂ ಸೊಮಾರಾಂ ಸಾಂಜೆರ್ ಕ್ಲಾಸ್ ಜಾತಚ್, ಸದಾಂಚ್ಯಾಬರಿ ಗಿಬ್ಬಾ ಆನಿಂ ಮೆಲ್ವಿನ್ ಕಾಫಿ ಪಿಯೆವ್ನ್ ಹೊಟೆಲಾಂತ್ಲೆಂ ಭಾಯ್ರ್ ಆಯ್ಲೆ.
"ಗಿಬ್ಬಾ, ತರ್ ಫಾಲ್ಯಾಂ ಸಕಾಳಿಂ ಸಾಡೆ-ಸ ವೊರಾಂಚೆರ್ ಹಂಪನ್ಕಟ್ಟಾ ಬಸ್ಸ್ ಸ್ಟೆಂಡಾಂತ್ ಹಾಜರ್ ಜಾ. ವೇಳ್ ಕರಿನಾಕಾ ಹಾಂ" ಮ್ಹಣಾಲೊ ಮೆಲ್ವಿನ್.
"ಜಾಯ್ತ್. ಹೆಂ ಮೆಲ್ವಿನ್, ಸಾಧ್ಯ್ ಜಾಲ್ಯಾರ್ ಖರ್ಚಾಕ್ ಥೊಡೆ ಪಯ್ಶೆ ಹಾಡ್ತಾಂ" ಮ್ಹಣಾಲೊ ಗಿಬ್ಬಾ.
"ನಾಕಾ ಗಿಬ್ಬಾ.....ಮ್ಹಜೆಲಾಗಿಂ ಪಯ್ಶೆ ಆಸಾತ್. ಬಾಬಾನ್ಯಿ ಟಿಕೆಟಿಚೊ ಖರ್ಚ್ ದಿತಾಂ ಮ್ಹಳಾಂ"
"ಬರೆಂ ತರ್, ಹಾಂವ್ ಚಲ್ತಾಂ" ಆಶೆಂ ಮ್ಹಣೊನ್ ಮೆಲ್ವಿನಾಚಿ ರಜಾ ಘೆವ್ನ್ ಗಿಬ್ಬಾ ಚಲ್ಲೊ.
ತ್ಯಾ ಸಾಂಜೆರ್ ಸದಾಂಚ್ಯಾ ಬರಿ ಮೆಲ್ವಿನಾಕ್ ಜಿಲ್ಲಿಬಾಯ್ ಬೂದ್ ಸಾಂಗ್ತಾಲಿಂ.
"ಮೆಲ್ವಿ, ಬುಧ್ವಾರಾ ಫೆಸ್ತಾಚೆಂ ಮೀಸ್ ಆಯ್ಕ್ ಹಾಂ. ಹೆಣೆ ತೆಣೆ ಭವೊಂಕ್ ವಚಾನಾಕಾತ್. ವೆಗಿಂಚ್ ಇಗರ್ಜೆಚ್ಯಾ ಅಂಗ್ಣಾಂತ್ ನಿದೊಂಕ್ ಜಾಗೊ ಪಳೆಯಾ. ಪಯ್ಲೆಂಚ್ ಸಾಂಗ್ತಾಂ, ಕಾರ್ಕಳಾಂತ್ ಆತಾಂ ಹಿಂವ್ ಚಡ್. ಖಂಯ್ ರಾತ್ಚೆಂ ಭಂವೊನ್ ದೊವಾಕ್ ಶೆಳ್ ಘೆವ್ನ್ ಯೆನಾಕಾ" ತಿಣೆಂ ಸಾಂಗ್ಲ್ಲ್ಯಾಕ್ ಮೆಲ್ವಿನಾನ್ ಹೂಂ ಕುಟ್ಟಿಲೆಂ.
"ಹಾಂ, ಅನ್ಯೇಕ್ ವಿಸರ್ಲಿಂರೆ.." ಪರ್ತ್ಯಾನ್ ತಿ ಮ್ಹಣಾಲಿ. "ಭಕ್ತಾಕ್ ಆಂಗೊಂವ್ಣ್ ಘಾಲುಂಕ್ ವಿಸಾರ್ನಾಕಾ. ಥೊಡ್ಯೊ ವಾತಿ ಘೆವ್ನ್ ಪೆಟಯ್. ಇಗರ್ಜೆಚ್ಯಾ ಅಂಗ್ಣಾಂತ್ ಮಿಂಜಿತ್ಕಾಂವ್ ಬೆಂಜಾರ್ ಕರೊವ್ನ್ ಹಾಡ್"
"ಜಾಯ್ತ್ ಮಾಂಯ್. ತುವೆಂ ಸಾಂಗ್ಲ್ಲ್ಯಾಬರಿಚ್ ಕರ್ತಾಂ" ತಾಣೆಂ ತಿಕಾ ಭರ್ವಸೊ ದಿಸ್ಲೊ.
ತ್ಯಾ ರಾತಿಂ ವಿತೊರಾಬಾನ್ ತಾಕಾ ಪಾಂಚ್ ರುಪಯ್ ದಿಲೆ. ಆಶೆಂ ಜೆಸ್ಸಿನ್ ದಿಲ್ಲೆ ಆನಿಂ ಹೆ ಪಯ್ಶೆ ಮ್ಹಣ್ತಾನಾ, ವೀಸ್ - ಪಂಚೀಸ್ ರುಪಯ್ ತಾಚೆಲಾಗಿಂ ಆಸ್ಲ್ಲೆಂ.
ಮಂಗ್ಳಾರಾ ಫಾಂತ್ಯಾರ್ ವೆಗಿಂಚ್ ಉಟ್ಲೊ ಮೆಲ್ವಿನ್. ಜಿಲ್ಲಿಬಾಯೆನ್ ಹ್ಯಾ ಬಿತರ್ಚ್ ಕಾಫಿ ಕರ್ನ್ ಜಾಲ್ಲಿ. ತೊಂಡ್ ಧುವ್ನ್, ಕಾಫಿ ಪಿಯೆತಚ್ ತೊ ನ್ಹೆಸ್ಲೊ. ನ್ಹೆಸ್ತಾನಾ ಆವಯ್ಚಿ ಆನಿಂ ಥೊಡಿ ಬೂದ್ಬಾಳ್ ಆಯ್ಕೊಂಕ್ ಪಡ್ಲಿ. ಸಕ್ಕಡ್ ಜಾತಚ್, ತೊ ಘರಾ ಥಾವ್ನ್ ಭಾಯ್ರ್ ಸರ್ಲೊ. ತಾಚ್ಯಾ ಮತಿಂತ್ ಅತುರಾಯೆಚಿಂ ಆನಿಂ ಸಂತೊಸಾಚಿ ಚಿಂತ್ನಾಂ ಖೆಳ್ತಾಲಿಂ - ಥೊಡ್ಯಾಚ್ ವೊರಾಂ ಬಿತರ್ ಜೆಸ್ಸಿಕ್ ಪಳೆಂವ್ಕ್ ಆಸಾ ಮ್ಹಣ್.
ಹಂಪನ್ಕಟ್ಟಾ ತೊ ಪಾವ್ತಾನಾ ವೊರಾಂ ಸಾತ್ ಜಾಲ್ಲಿಂ. ತಾಚಿಚ್ ವಾಟ್ ರಾಕೊನ್ ಆಸ್ಲ್ಲೊ ಗಿಬ್ಬಾ ಧಾಂವೊನ್ ಯೇವ್ನ್ ಮ್ಹಣಾಲೊ "ಪುನೆಕಲ್ಲ್ಯಾ, ಮ್ಹಾಕಾ ವೆಗಿಂ ಯೆ ಮ್ಹಣ್ ಸಾಂಗೊನ್ ತುಂಚ್ ವೇಳ್ ಕರ್ನ್ ಆಯ್ಲಾಯ್ ಆತಾಂ. ಹಾಂವೆಂ ಚಿಂತ್ಲೆಂ ತುಂ ಯೆಂವ್ಚೊನಾಂಯ್ ಮ್ಹಣ್. ಪಳೆ, ಹಾಂವೆಂ ಟಿಕೆಟಿ ಕಾಡ್ಲ್ಲ್ಯೊ ಬರೆಂ ಜಾಲೆಂ..’
"ಕಿತೆಂ ಟಿಕೆಟಿ ಕಾಡ್ಲ್ಯೊಯ್....?" ಆಜಾಪ್ಲೊ ಮೆಲ್ವಿನ್.
"ಆನಿಂ ಕಿತೆಂ, ಅನಿಕೀ ಘಳಾಯ್ ಕರ್ನ್ ಟಿಕೆಟಿ ಮೆಳಾನಾಸ್ತಾಂ ಸಾಂಜೆ ವರೆಗ್ ಹಾಂಗಾಚ್ ಸುಕ್ಚೆಂ ಮ್ಹಣ್ತಾಯ್ ದಿಸ್ತಾ. ಹಾಂಗಾ ಕುಡ್ಸಾಲ್ಲೊ ಲೋಕ್ ಪಳೆ. ಟಿಕೆಟ್ಯಾಂಕ್ ಲೊಕಾಚಿ ಲಾಯ್ನ್ ಲಾಗ್ಲ್ಯಾ. ಟಿಕೆಟ್ ದಿತೊಲೊ ಮ್ಹಜ್ಯಾ ವಳ್ಕಿಚೊ ಜಾಲ್ಲ್ಯಾನ್ ಜಾಲೆಂ. ನಹಿಂ ತರ್, ಆಮಿಂಯಿ ರಾಕ್ಚೆಂ ಪಡ್ತೆಂ....."
"ಇತ್ಲಿಂ ಸ್ಪೆಶಲ್ ಬಸ್ಸಾಂ ಆಸಾತ್ ಗಿಬ್ಬಾ.." ಹಾಂಕ್ರೆಲೊ ಮೆಲ್ವಿನ್.
"ಆಸ್ಲ್ಯಾರ್ ಕಿತೆಂ? ಲೊಕಾಚಿ ಖೆಟ್ ತಾಚ್ಯಾಕಿ ಚಡ್. ಆನಿಂ ಸಕಾಳಿಂಚೆಂ ಬಸ್ಸ್ ಮೆಳೊಂಕ್ನಾತ್ಲ್ಲೆ ತರ್ .....ಹಾಸ್ಲೊ ಗಿಬ್ಬಾ.
"ಕಿತೆಂ ಜಾತೆಂ?"
"ಜೆಸ್ಸಿ ಮಹಾರಾಣಿ, ಮೆಲ್ವಿನ್ ಮಹಾರಾಜಾಚ್ಯಾ ಯೆಣ್ಯಾಕ್ ರಾಕೊನ್ ರಾಕೊನ್ ಸುಕ್ತಿ ಆಸ್ಲ್ಲಿ...."
ಮೆಲ್ವಿನಾನ್ ಹಾಸೊನ್ಂಚ್ ಜಾಪ್ ದಿಲಿ. "ತಸಲ್ಯಾ ಸಂದರ್ಭಾರ್ ತುಕಾ ಪ್ರಧಾನಿಕ್ ಹಿ ವರ್ದಿ ಪಾಟಂವ್ಕ್ ಪಯ್ಲೆಂ ಕಾರ್ಕಳಾಕ್ ದಾಡ್ತೊ"
"ಚಡ್, ಬಸ್ಸಾಕ್ ವೇಳ್ ಜಾಲೊ." ಗಿಬ್ಬಾನ್ ಮ್ಹಳೆಂ. ಕಂಡಕ್ಟರ್ "ಟಿಕೆಟಿ ಘೆತ್ಲ್ಲೆ ಬಸ್ಸಾರ್ ಚಡಾ" ಮ್ಹಣ್ ಬೋಬ್ ಮಾರ್ತಾಲೊ. ಮೆಲ್ವಿನ್ ಆನಿಂ ಗಿಬ್ಬಾಕ್ ಕಷ್ಟಾಂನಿ ಬಸೊಂಕ್ ಸುವಾತ್ ಮೆಳ್ಳಿ. ಕ್ಷಣಾನ್ ಬಸ್ಸ್ ಚಾಲು ಜಾಲೆಂ ಆನಿಂ ಕಾರ್ಕಳ್ ವೆಚ್ಯಾ ರಸ್ತ್ಯಾರ್ ಧಾವೊಂಕ್ ಲಾಗ್ಲೆಂ.
ಮೆಲ್ವಿನಾನ್ ಮಂಗ್ಳೂರ್ ಶಹರ್ ಸೊಡ್ನ್ ಭಾಯ್ರ್ ವೆಚೆಂ ತೆಂಚ್ ಪಯ್ಲ್ಯಾ ಪಾವ್ಟಿಂ. ಶಹರ್ ಉತ್ರೊನ್ ಗುಡ್ಯಾ ಬಯ್ಲಾಂ ಮಧ್ಲ್ಯಾ ರಸ್ತ್ಯಾನ್ ವೆತಾಲೆಂ ಬಸ್ಸ್. ಕಸಲಿ ಸೊಭಿತ್ ತಿ ಸ್ರಷ್ಟಿ. ಬೊಂವಾರಿಂ ದಾಟಾಯೆನ್ ವಿಸ್ತಾರ್ಲೆಲೆ ರೂಕ್ ಆನಿಂ ಝಡಾಂ ಸುರ್ಯಾಚ್ಯಾ ಕೀರ್ಣಾಂಕ್ ನವೊ ಜೀವ್ ಭರೊನ್ ಸೊಭ್ತಾಲಿಂ. ಗುಡ್ಯಾ ವಯ್ಲ್ಯಾ ರಸ್ತ್ಯಾನ್ ಬಸ್ಸ್ ಧಾಂವ್ತಾನಾ ಗುರ್ಪುರ್ ತ್ಯಾ ಕುಶಿಚಿಂ ಫಾಲ್ಕಿಂ ದಿಷ್ಟಿಕ್ ಪಡ್ತಾಲಿಂ. ಸಕ್ಲಾ ದುವ್ರಿ ಭರೊನ್ ಧೊವಿ ವೋಲ್ ಪಾಂಗುರ್ಲೆಲ್ಯಾಬರಿ ದಿಸ್ತಾಲಿ ತಿ ಸುವಾತ್. ಆನಿಂ ಮಧೆಂ ಮಧೆಂ ತೆ ಪಾಚ್ವೆ ಗಾದೆ ದೊಳ್ಯಾಂಕ್ ಅಪರಿಮಿತ್ ಸಂತೊಸ್ ದಿತಾಲೆ. ಪಯ್ಶಿಲಿಂ ಘರಾ ಲ್ಹಾನ್ ಕಾಡಿಯಾಂ ಪೆಟೆಬರಿ ದಿಸ್ತಾನಾ, ವಯ್ರ್ ಆಂತ್ರಳಾರ್ ಉಬೊನ್ ವೆಚಿಂ ಸುಕ್ಣಿಂಯಿ ದಿಷ್ಟಿಕ್ ಪಡ್ತಾಲಿಂ. ತ್ಯಾ ಥಂಡ್ ವಾರ್ಯಾಕ್ ಕೂಡ್ ಹಿಂವಾಳ್ತಾಲಿ. ಮೆಲ್ವಿನ್ ಆನಿಂ ಗಿಬ್ಬಾನ್ ಎಕೇಕ್ ಸಿಗ್ರೆಟ್ ಪೆಟೈಲಿ ಆನಿಂ ಧುಂವೊರ್ ವೊಕೊಂಕ್ ಪ್ರಾರಂಭ್ ಕೆಲೆಂ. ರಸ್ತ್ಯಾ ದೆಗೆಚೆ ಎಕೇಕ್ಚ್ ಫರ್ಲಾಂಗಾಚೆ ಫಾತೊರ್ ಉತರ್ತಾನಾ ಮೆಲ್ವಿನಾಚೆಂ ಕಾಳಿಜ್ ಆನಂದಾನ್ ಉಡ್ಕಿ ಮಾರ್ತಾಲೆಂ. ಹರ್ಯೇಕಾ ಕ್ಷಣಾ ಜೆಸ್ಸಿಕ್ ಆಪುಣ್ ಪಳೆತಾಲೊಂ ಮ್ಹಳ್ಳಿಂ ಚಿಂತ್ನಾಂ ಯೆತಾನಾ, ಮತ್ ಕಸಲ್ಯಾಗಿ ಸುಂದರ್ ಲೊಕಾಂತ್ ವಿಹಾರ್ ಕರ್ತಾಲಿ. ತೀನ್ ವೊರಾಂ ಪಾಶಾರ್ ಜಾಲಿಂ ಆನಿಂ ಕಾರ್ಕಳ್ ಆಯ್ಲೆಂ.
ಕಾರ್ಕಳ್ ಪೇಂಟ್ ಲಾಗಿಂ ಪಾವ್ತಾನಾ ಗಿಬ್ಬಾನ್ ಮ್ಹಳೆಂ "ಪಳೆ ಮೆಲ್ವಿನ್, ತೊಚ್ ಕಾರ್ಕಳ್ಚೊ ಗುಮ್ಟೊ. ಥಂಯ್ ಗುಡ್ಯಾರ್ ಪಳೆ"
ಜೆಸ್ಸಿಚ್ಯಾಚ್ ಚಿಂತ್ನಾಂಚೆರ್ ಆಸ್ಲ್ಲೊ ಮೆಲ್ವಿನ್ ಎಕಾಚ್ಚಾಣೆಂ ಜಾಗೊ ಜಾವ್ನ್ ಗಿಬ್ಬಾಕ್ ಪಳೆಂವ್ಕ್ ಪಡ್ಲೊ.
"ಹಾಂವ್ ಗುಮ್ಟೊ ನ್ಹಂಯ್, ಮ್ಹಾಕಾ ಕಿತೆಂ ಪಳೆತಾಯ್? ಕಳ್ಳೆಂ, ಕಿತೆಂ ತುಂ ಚಿಂತ್ತಾಯ್ ಮ್ಹಣ್" ಗಿಬ್ಬಾ ಹಾಸ್ತಾನಾ ಮೆಲ್ವಿನ್ ಲಜೆನ್ ದೊಡ್ಲೊ.
ಬಸ್ಸ್, ಸ್ಟೇಂಡಾಂತ್ ಉಬೆಂ ಜಾಲೆಂ. ದೊಗೀ ಬಸ್ಸಾರ್ ಥಾವ್ನ್ ಸಕ್ಲಾ ದೆಂವ್ಲೆ. ಆತುರಾಯೆಚಿ ದೀಷ್ಟ್ ಮೆಲ್ವಿನಾನ್ ಭೊಂವಾರಿಂ ಫಾಂಕ್ಲಿ...ಜೆಸ್ಸಿ ತಾಕಾ ದಿಸ್ಲೆಂ. ಮುಖಾಮಳಾಚೆರ್ ಲಜೆ ಮಿಶ್ರಿತ್ ಹಾಸೊ ಖೆಳ್ತಾಲೊ. ಮೆಲ್ವಿನಾಚ್ಯಾ ಯೆಣ್ಯಾನ್ ವರ್ತೊ ಆನಂದ್ ಬೊಗ್ಲ್ಲೊ ಮ್ಹಣ್ ದಿಸ್ತಾ ಜೆಸ್ಸಿಕ್. ತೆಂ ಮುಖಾರ್ ಯೇವ್ನ್ ಮ್ಹಣಾಲೆಂ "ಹಲ್ಲೋ ಮೆಲ್ವಿನ್...."
"ಮಸ್ತ್ ವೇಳ್ ಥಾವ್ನ್ ರಾಕ್ತಾಲೆಂಯ್ಗಿ ಕಿತೆಂ ಜೆಸ್ಸಿ. ತುಕಾ ವಾಂವ್ಟ್ ಜಾಲಿ" ಉಲೈಲೊ ಮೆಲ್ವಿನ್.
"ನಾ, ಹಾಂವ್ ಆತ್ತಾ ಆಯ್ಲಿಂ ಮಾತ್ರ್. ಪಯ್ಣ್ ಬರ್ಯಾ ಥರಾನ್ ಜಾಲೆಂಮೂ"
"ವ್ಹಯ್ ಜೆಸ್ಸಿ, ಆಳೆ ಹೊಚ್ ಮ್ಹಜೊ ಈಶ್ಟ್ ಗಿಬ್ಬಾ......." ಮೆಲ್ವಿನಾನ್ ಆಶೆಂ ಮ್ಹಣ್ತಾನಾ ಜೆಸ್ಸಿಕ್ಚ್ ಬೊಂಬ್ಯಾಬರಿ ರಾವೊನ್ ದೆಖ್ತಾಲೊ ಗಿಬ್ಬಾ ಮತಿರ್ ಆಯ್ಲೊ. ಜೆಸ್ಸಿಕ್ ಶೇಕ್ ಹ್ಯಾಂಡ್ ದಿತಾನಾ ಗಿಬ್ಬಾಚೊ ಹಾತ್ ಕಾಂಪ್ತಾಲೊ. ತೊಂಡಾರ್ ವಿಚಿತ್ರ್ ಬದ್ಲಾವಣ್ ಜಾಲ್ಲಿ.
"ಆಮಿಂ ಘರಾ ಚಲ್ಯಾಂಗಿ? ಥೊಡ್ಯಾ ಮಿನುಟಾಂಚಿ ವಾಟ್ ಆಸಾ. ಚಲೊನ್ಂಚ್ ವಚ್ಯೆತಾ" ಜೆಸ್ಸಿನ್ ಸಾಂಗ್ಲೆಂ. ತೆಗಾಂಯ್ ಚಲೊಂಕ್ ಲಾಗ್ಲಿಂ.
"ಘರಾ ಆಮಿಂ ಕೊಣ್ ಮ್ಹಣ್ ವಿಚಾರ್ತಿತ್ ಜಾಲ್ಯಾರ್ ಕಿತೆಂ ಸಾಂಗ್ತಾಯ್ ಜೆಸ್ಸಿ?" ವಿಚಾರ್ಲೆಂ ಮೆಲ್ವಿನಾನ್.
"ಹಾಂವೆ ಸಾಂಗ್ಲಾಂ ತುಂ ತೆರೆಜ್ ಆಂಟಿಚೊ ಪಿಲ್ಯಾದ್ ಮ್ಹಣ್. ತುಂಯ್ ತಶೆಂಚ್ ಸಾಂಗ್"
ಗಿಬ್ಬಾ ಆನಿಂ ಮೆಲ್ವಿನ್ ಎಕಾಮೆಕಾಕ್ ಪಳೆವ್ನ್ ಹಾಸ್ಲೆ. ಗರ್ಜೆಕ್ ತರೀ ಫಟಿ ಮಾರುಂಕ್ ಜಾಯ್ ಆಸ್ಲ್ಲ್ಯೊ.
"ಆಳೆ, ಹೆಂಚ್ ತಾಂಚೆ ಘರ್" ಜೆಸ್ಸಿನ್ ಮುಖಾರ್ ಆಸ್ಲ್ಲ್ಯಾ ಮಜ್ಭೂತ್ ಘರಾಕ್ ದಾಕೊವ್ನ್ ಸಾಂಗ್ಲೆಂ. ದುಸ್ರ್ಯಾ ಘಡಿಯೆ ತ್ಯಾ ಘರ್ಚ್ಯಾ ಜ್ಯಾಲಾಂತ್ ಪಾವ್ತಾನಾ, ಜೆಸ್ಸಿ "ಮಾವ್ಶೇ.." ಮ್ಹಣ್ ಉಲೊ ಕರಿತ್ತ್ ಮುಖಾರ್ ಗೆಲೆಂ.
ತ್ಯಾಚ್ ಸಂದರ್ಭಾರ್ ರಾಕ್ತಾಲೊ ಗಿಬ್ಬಾ ಎಕಾಚ್ಚಾಣೆ ಪುಸ್ಪುಸ್ಲೊ. "ಜೆಸ್ಸಿ...ಜೆಸ್ಸಿ ಮನಿಸ್ ನಹಿಂ ಮೆಲ್ವಿನ್. ತುಕಾ ಅಂಜ್ ಮೆಳ್ಳಾಂ...."
ಮೆಲ್ವಿನ್ ಹಾಸ್ಲೊ ಲಜೆನ್.
ರೊಫಿನ್ ಬಾಯೆಗೆರ್ ಆಯಿಲ್ಲ್ಯಾ ತಾಂಕಾಂ ಬರೊಚ್ ಸತ್ಕಾರ್ ಲಾಭ್ಲೊ. ಘರ್ಚಿಂ ಮನ್ಶಾಂ ಭೋವ್ ಬರಿಂ ಜಾವ್ನಾಸ್ಲ್ಲಿಂ. ಘರ್ಚೊ ಯೆಜ್ಮಾನಿ ಕಾಮಿಲ್ ಶೆಣಯ್ ರಿಟಾಯಾರ್ಡ್ ತಹಶೀಲ್ದಾರ್. ಗಂಭೀರ್ ತರೀ ಮಯ್ಪಾಸಿ ಮನಿಸ್. ತಶಿಚ್ ತಾಚಿ ಪತಿಣ್ ರೊಫಿನ್ಬಾಯ್ ದಯಾಳ್ ಮನಾಚಿ ಸ್ತ್ರೀ. ತಾಂಚ್ಯಾ ಬರ್ಯಾ ಮನಾಕ್ ದೆವಾನ್ ಜಾಯ್ತಿ ಗ್ರೇಸ್ತ್ಕಾಯ್ ತಾಂಕಾಂ ದಿಲ್ಲಿ. ಕಾರ್ಕಳಾಂತ್ ತಾಂಚ್ಯಾ ತಿತ್ಲಿಂ ಗ್ರೇಸ್ತ್ ಆನಿಂ ನಾಂವಾಡ್ದಿಕ್ ಮನ್ಶಾಂ ದುಸ್ರಿಂ ನಾತ್ಲ್ಲಿಂ....ಸಾಂಗಾತಾಚ್ ತಾಂಚ್ಯಾ ಕಜಾರಿ ಜೀವನಾಚ್ಯಾ ರುಕಾಕ್ ಧಾದೊಸ್ಕಾತೆಚಿಂ ದೋನ್ ಫಳಾಂಯಿ ಉಬ್ಜಾಲ್ಲಿಂ. ಮಾಲ್ಗಡೊ ಹೆರಿ ಬೆಂಗ್ಳೂರಾಂತ್ ದಾಕ್ತೆರ್ಗಿಚೆಂ ಶಿಕಾಪ್ ಶಿಕ್ತಾಲೊ. ಹ್ಯಾಚ್ ಮಾರ್ಚಾಂತ್ ಆಪ್ಲೆಂ ಶಿಕಾಪ್ ಕಾಬಾರ್ ಕರ್ನ್ ತೊ ಪಾಟಿಂ ಯೆಂವ್ಚೊ ಆಸ್ಲ್ಲೊ. ದುಸ್ರೆಂ ಆನಿಂ ನಿಮಾಣೆಂ ರೀಜಾ ಮೆಟ್ರಿಕಾಂತ್ ಶಿಕ್ತಾಲೆಂ. ಸೊಳಾ ವರ್ಸಾಚೆಂ ರೀಜಾ ಸೊಬಿತ್ ತಶೆಂ ಹುಶಾರ್ ಚೆಡುಂ. ಜೆಸ್ಸಿ ಆನಿಂ ರೀಜಾ ಭ-ಭಯ್ಣ್ಯಾಬರಿಂ ದಿಸ್ತಾಲಿಂ.
ಕೊಡಿಯಾಳಾ ಥಾವ್ನ್ ಆಯಿಲ್ಲ್ಯಾ ಸೈರ್ಯಾಂಕ್ ಕಿತ್ಲೊ ಸಮ್ಮಾನ್ ಕೆಲೊ ತರೀ ರೊಫಿನ್ಬಾಯೆಕ್ ಸಮಾಧಾನ್ ನಾ. ಫೆಸ್ತಾಕ್ ಲಾಗೊನ್ ಎದೊಳ್ಚ್ ವೀಸಾಂಕ್ ಮಿಕ್ವೊನ್ ಸೈರಿಂ ಘರಾಂತ್ ಹಾಜರ್ ಆಸ್ಲ್ಲಿಂ. ತೀನ್ ಚ್ಯಾರ್ ಚಾಕ್ರಾಂ ಘರಾಂತ್ ಖಳ್ಮಿತ್ನಾಸ್ತಾಂ ವಾವುರ್ತಾಲಿಂ. ಕೊಲೆಜ್ ವಿದ್ಯಾರ್ಥಿ ಜಾವ್ನಾಸ್ಚ್ಯಾ ಗಿಬ್ಬಾ ಆನಿಂ ಮೆಲ್ವಿನಾಚೆಂ ಯೆಣೆಂ ಸರ್ವಾಂಕ್ ಸಂತೊಸಾಚೆಂ ಜಾಲ್ಲೆಂ.
ರೊಫಿನ್ಬಾಯ್ ಮ್ಹಣಾಲಿ -"ತುಮಿಂ ಕಾರ್ಕಳ್ ಫೆಸ್ತಾಕ್ ಆಯಿಲ್ಲಿ ಸಂತೊಸಾಚಿ ಗಜಾಲ್ ಜೆಸ್ಸಿ ಥೊಡ್ಯಾ ದಿಸಾಂ ಆದಿಂ ಸಾಂಗ್ತಾಲೆಂ ತುಮಿಂ ಯೆಂವ್ಚೆಂ ಆಸಾತ್ ಮ್ಹಣ್. ಮ್ಹಾಕಾಚ್ ದುಬಾವ್ ಆಸ್ಲ್ಲೊ. ಶಹರಾಂತ್ಲ್ಯಾ ತುಮ್ಕಾಂ ಆಮ್ಚೆಂ ನಡ್ತೆ ಕಶೆ ದಿಸ್ತಾ ಕೊಣ್ಣಾ..."
"ತುಂ ಕಿತೆಂ ಉಲೈತಾಯ್ ಮಾವ್ಶೆ? ಕಾರ್ಕಳಾ ವಿಶ್ಯಾಂತ್ ಬರೆಂ ಆಯ್ಕಾಲ್ಲೆಂ ಆಮಿಂ. ಆತಾಂ ಕಾರ್ಕಳ್ ಖುದ್ಧ್ ಪಳೆವ್ನ್ಯಿ ಧಾದೊಶಿ ಜಾಲ್ಯಾಂವ್. ಆತಾಂ ಮ್ಹಾಕಾ ದಿಸ್ತಾ ಆಮಿಂಯಿ ಮಂಗ್ಳೂರ್ ಸೊಡ್ನ್ ಹಾಂಗಾಚ್ ರಾವೊಂಕ್ ಆಯ್ಲ್ಯಾರ್, ಅಧಿಕ್ ಬರೆಂ ಆಸ್ಲ್ಲೆಂ ಮ್ಹಣ್. ಹಾಂಗಾಚೊ ಲೋಕ್ ಸುಂದರ್ ದ್ರಶ್ಯಾಂ, ತುಮ್ಚೊ ಅಧಿಕ್ ಮೋಗ್ ಆನಿಂ ಸತ್ಕಾರ್ ಪಳೆತಾನಾ, ಆಮ್ಕಾಂ ಪಾಟಿಂ ವಚೊಂಕ್ ಪಾಂಯ್ ಯೆಂವ್ಚೆನಾಂತ್" ಮೆಲ್ವಿನ್ ಮ್ಹಣಾಲೊ.
"ಹಾಂ ಹಾಂ, ಹಾಂಗಾಚ್ ರಾವ್ತಾಂ ಮ್ಹಣ್ತಾಯ್ಗಿ? ಕಿತ್ಯಾಕ್ ಆಮ್ಚೆಂ ಬರಿ ಗಾದೆ ಕೊಸುನ್ ಕ್ರಷಿ ಕರ್ಚಿ ಆಲೋಚನ್ ದಿಸ್ತಾ?" ಹಾಸೊನ್ ರೊಫಿನ್ಬಾಯ್ ಉಲೈಲಿ.
"ತಶೆಂ ನಹಿಂ ತರಿ, ತುಜ್ಯಾ ತಸಲ್ಯಾ ದಯಾಳ್ ಎಕಾ ಮಾವ್ಶೆಕ್ ಸದಾಂಚ್ ಪಳೆವ್ನ್ ತಿಚೊ ಸತ್ಕಾರ್ ಘೆಂವ್ಚೆಂ ಭಾಗ್ ಮೆಳ್ತೆಂ" ಗಿಬ್ಬಾ ಮ್ಹಣಾಲೊ.
ತಿತ್ಲ್ಯಾಯಿ ಧಾದೊಸ್ಕಾಯೆಚೆಂ ಜಾವ್ನ್ ಆಸ್ಲ್ಲೆಂ ತಾಂಚೆಂ ಘರ್ ಆನಿಂ ತೆಂ ಖುಶಾಲಿ ಉಲವ್ಣೆಂ. ದನ್ಪಾರ್ ಕ್ಷಣಾಬಿತರ್ ಉಬ್ಲೆಂ. ಸಾಂಜೆರ್ ತಾಣಿ ಇಗರ್ಜೆಕ್ ಬೆಸ್ಪಾಕ್ ವಚೊಂಕ್ ಆಲೋಚನ್ ಕೆಲಿ. ಪುಣ್ ಕಾಮಿಲಾಬಾಕ್ ಆನಿಂ ರೊಫಿನ್ಬಾಯೆನ್ ಕಾಮಾ ನಿಮ್ತಿಂ ಯೇಂವ್ಕ್ ಅಸಾಧ್ಯ್ ಜಾಲೆಂ. ಆಖ್ರೇಕ್ ತಾಣಿಂ ಚೊವ್ಗಾನಿಂಚ್ ಮ್ಹಣ್ಜೆಂ ಗಿಬ್ಬಾ, ಮೆಲ್ವಿನ್, ಜೆಸ್ಸಿ ಆನಿಂ ರೀಜಾನ್ ಇಗರ್ಜೆಕ್ ವೆಚೆಂ ಮ್ಹಣ್ ಜಾಲೆಂ. ತಿಂ ಭಾಯ್ರ್ ಸರ್ತಾನಾ ವತ್ತಾಯೆನ್ ರೊಫಿನ್ಬಾಯೆನ್ ಧಾ ರುಪಿಯಾಂಚೊ ನೋಟ್ ಧುವೆಚ್ಯಾ ಹಾತಾರ್ ದೀವ್ನ್ ಮ್ಹಳೆಂ "ಪುತಾ ತಾಂಕಾಂ ಪಯ್ಶೆ ಖರ್ಚ್ ಕರುಂಕ್ ಸೊಡ್ನಾಕಾ. ವೆತಾನಾ ಆನಿಂ ಪಾಟಿಂ ಯೆತಾನಾ ಬಾಡ್ಯಾಚೆಂ ಕಾರ್ ಕರ್ನ್ಂಚ್ ವೊಚಾ. ಚಡ್ ವೇಳ್ ಕರಿನಾಕಾತ್"
ತಿಚಿ ಜಾಗ್ವಣಿ ಆಯ್ಕೊನ್, ಚೊವ್ಗಾಂಯಿ ನೆಸೊನ್ ಭಾಯ್ರ್ ಸರ್ಲಿಂ. ಬಸ್ಸ್ ಸ್ಟೆಂಡಾಂತ್ ಆಸ್ಲ್ಲಿ ಟೆಕ್ಸಿ ಕರ್ನ್ ತಿಂ ಇಗರ್ಜೆಕ್ ಗೆಲಿಂ.
ಟೆಕ್ಸಿ ದೋನ್ ಮೈಲಾಂಚೆಂ ಪಯ್ಣ್ ಕರ್ನ್ ಇಗರ್ಜೆಕ್ ಪಾವ್ಲಿ. ಥಂಯ್ ಅಂಗ್ಣಾಂತ್ ಭರ್ಲ್ಲೊ ಲೋಕ್ ಪಳೆತಾನಾ ಮೆಲ್ವಿನ್ ಆನಿಂ ಗಿಬ್ಬಾಕ್ ಝಿಂಟ್ ಉಡ್ಲಿ. ಕಿತ್ಲೊ ಲೋಕ್ ಕುಡ್ಸಾಲ್ಲೊ! ಕಾರ್ಕಳ್ಚ್ಯಾ ಸಾಂತ್ ಲೊರೆಸಾ ಥಂಯ್ ಹ್ಯಾ ಲೊಕಾಕ್ ಕಸಲಿ ಭಕ್ತ್! ನಹಿಂಚ್ ಕರ್ಕಳ್, ಬಗಾರ್ ಮಂಗ್ಳೂರ್ ಆನಿಂ ದುಸ್ರ್ಯಾ ಪಯ್ಶಿಲ್ಯಾ ಜಾಗ್ಯಾಂ ಥಾವ್ನ್ಯಿ ಲೋಕ್ ಆಯಿಲ್ಲೊ. ಆನಿಂ ತೊ ಭಕ್ತ್ ಸಾಂತ್ ಲೊರೆಸ್, ಹ್ಯಾ ವೆಳಾರ್ ದೆವಾಲಾಗಿಂ ಮಾಗೊನ್ ಸರ್ವಾಂಚಿ ಗರ್ಜ್ ಸುಧಾರ್ಸಿತಾಲೊ. ಆಪ್ಲಿ ಕ್ರಿಸ್ತಾಂವ್ ಸಮೊಡ್ತ್, ತಾಂತ್ಲೆ ಸಾಂತ್ ಆನಿಂ ತಿ ಆದ್ರಶ್ಯ್ ದೆವಾಚಿ ಮಾಂಡಾವಳ್ ನಿಯಾಳ್ತಾನಾ, ಮೆಲ್ವಿನಾಕ್ ಭೊಗ್ಲೆಂ ಕಿತ್ಲಿ ಶ್ರೇಷ್ಟ್ಘಿ ಮ್ಹಣ್ ಕ್ರಿಸ್ತಾಂವ್ ಸಮೊಡ್ತ್. ನಂಯ್ ತರಿ ಮೈಲಾಂಚೆಂ ಪಯ್ಣ್ ಕರ್ನ್ ಎಕಾ ಭಕ್ತಾ ಥಾವ್ನ್ ಉಪ್ಕಾರ್ ಆನಿಂ ದೆವಾಚೆಂ ಆಶೀರ್ವಾದ್ ಘೆಂವ್ಕ್ ಇತ್ಲೊ ಲೋಕ್ ಯೆತೊನಾ.
"ಕಾರ್ಕಳ್ ಕಶೆಂ ದಿಸ್ತಾ ಮೆಲ್ವಿನ್" ವಿಚಾರ್ಲೆಂ ಜೆಸ್ಸಿನ್.
"ವಂಡರ್ಫುಲ್ ಜೆಸ್ಸಿ, ತುಜ್ಯಾ ದಯೆನ್ ನ್ಹಂಯ್ ತರ್, ಅಸಲ್ಯಾ ಭಾಗಿ ದಿಸಾಕ್ ಹಾಜರ್ ಜಾಂವ್ಚೆಂ ಅದ್ರುಷ್ಟ್ ಮ್ಹಾಕಾ ಲಾಭ್ತೆಂನಾ.."
"ಮ್ಹಜೆ ಖಾತಿರ್ ಮಾಗ್ ಮೆಲ್ವಿನ್...." ಇಗರ್ಜೆಕ್ ಚಲ್ಯಾಂ..." ಮ್ಹಣಾಲೆಂ ತೆಂ. ಕಷ್ಟಾಂನಿ ಇಗರ್ಜೆ ಬಿತರ್ ತಿಂ ಸರ್ಲಿಂ. ಥೊಡೊ ವೇಳ್ ಮಾಗ್ಣೆಂ ಕೆಲೆಂ. ಉಪ್ರಾಂತ್ ವಾತಿ ಪೆಟೊವ್ನ್ ಅಂಗೊವ್ಣೆಚೆ ಪಯ್ಶೆ ಫಾರಿಕ್ ಕೆಲೆ. ಅವಯ್ನ್ ಸಾಂಗ್ಲ್ಲ್ಯಾ ಬರಿ ಮಿಂಜಿತ್ಕಾಂವ್ ಘೆಂವ್ಕ್ ಮೆಲ್ವಿನ್ ವಿಸರ್ಲೊನಾ.
ಮೆಲ್ವಿನಾಕ್ ಏಕ್ ಸಂಗತ್ ಹ್ಯಾ ಮಧೆಂ ಝಳ್ಕೆಕ್ ಆಯಿಲ್ಲಿ. ಗಿಬ್ಬಾ ಆನಿಂ ರೀಜಾ ಎಕಾಮೆಕಾಕ್ ಹೊಂದ್ವೊನ್ ಚಲ್ತಾಲಿಂ. ದೊಗಾನಿಂಚ್ ಸಂಭಾಷಣ್ ಕರ್ಚೆಂ, ತಾಂಚೊ ಹಾಸೊ ಆನಿಂ ತಿ ಚಾಲ್ ದೆಖ್ತಾನಾ ಮೆಲ್ವಿನಾಕ್ ಕಿತೆಂಗಿ ದುಬಾವ್ ಆಯ್ಲೊ.
ಭುಮಿರ್ ಕಾಳೊಕ್ ಪಡೊನ್ ಯೆತಾನಾ ಫೆಸ್ತಾಚೆಂ ಅಧಿಕ್ ಆಕರ್ಷಣ್ ಜಾವ್ನಾಸ್ಚೆಂ ದಾರು ಲಾಸ್ಚೆಂ ಕಾರ್ಯೆಂ ಸುರು ಜಾಲೆಂ. ಲ್ಹಾನ್ ಭುರ್ಗಿಂ ಸಾಂಗಾತಾ ಮೆಳೊನ್ ಬೋಬ್ ಮಾರ್ನ್ ನಾಚ್ಚಿ ದ್ರಶ್ಯಾ ಪಳೆತಾನಾ ಅಧಿಕ್ ಸಂತೊಸ್ ಭೊಗ್ತಾಲೊ. ದಾರು ಲಾಸುನ್ ಜಾತಾನಾ, ಗಿಬ್ಬಾ ಮೆಲ್ವಿನಾಲಾಗಿಂ ಮ್ಹಣಾಲೊ "ತುಮಿಂ ಹಾಂಗಾ ರಾವಾ. ಹಾಂವ್ ಆನಿಂ ರೀಜಾ ಕರ್ನ್ ಸಾಂತೆಂತ್ ಬೊಂವೊನ್ ಯೆತಾಂವ್"
ಮೆಲ್ವಿನ್ ಆನಿಂ ಜೆಸ್ಸಿಕ್ ಹಾಸೊ ಆಯ್ಲ್ಯೊ. ತಿಂಯಿ ರಾಕ್ತಾಲಿಂ ತಸಲ್ಯಾಚ್ ಸಂದರ್ಭಾಕ್. ಸಗ್ಳ್ಯಾ ದಿಸಾ ಜೆಸ್ಸಿಲಾಗಿಂ ಎಕ್ಸುರೊ ಉಲಂವ್ಕ್ ಸಂದ್ರಾಪ್ ತಾಕಾ ಮೆಳೊಂಕ್ ನಾತ್ಲ್ಲೊ. ಗಿಬ್ಬಾ ಆನಿಂ ರೀಜಾ ಚಲ್ಲಿಂ.
ಕಾಳೊಕಾಚಿ ವೊರೆ ವಿಂಗಡ್ ಸುವಾತ್ ಪಳೆವ್ನ್ ಧರ್ಣಿರ್ ಬಸ್ಲಿಂ ಜೆಸ್ಸಿ ಆನಿಂ ಮೆಲ್ವಿನ್. ಸಂಭಾಷಣ್ ಪ್ರಾರಂಭ್ ಕರುಂಕ್. ದೊಗಾಂಯ್ಕಿ ಜೀಬ್ ಸುಟ್ಲಿನಾ. ಬರೆ ಮತಿಂತ್ ವಿವಿಧ್ ಚಿಂತ್ನಾಂ ಖೆಳ್ತಾಲಿಂ. ಅಖ್ರೇಕ್ ಕಿತೆಂ ಉಲಂವ್ಚೆಂ ಮ್ಹಣ್ ಕಳಾನಾಸ್ತಾಂ ಮೆಲ್ವಿನ್ ಮ್ಹಣಾಲೊ " ಜೆಸ್ಸಿ, ಟೀಚರಿಚೆಂ ಜೀವನ್ ಕಾರ್ಕಳಾಂತ್ ಕಶೆಂ ಚಲ್ತಾ?"
ಜೆಸ್ಸಿನ್ ಅಮ್ರುಕೆಂ ಹಾಸೊನ್ ಜಾಪ್ ದಿಲಿ -"ಮಾಸ್ಟರ್ ನಾತ್ಲ್ಲೆಂ ಜೀವನ್ ನಿಜಾಕೀ ಉಬ್ಗೊಣೆಚೆಂ ಮೆಲ್ವಿನ್"
"ಹಾಂವ್ ಅಜೂನ್ಯಿ ಸ್ಟೂಡೆಂಟ್.." ಮಧೆಂಚ್ ತೊ ಉಲೈಲೊ.
"ಜೀವನ್ ಮ್ಹಳ್ಳ್ಯಾ ಶಾಲಾಂತ್ ಸಕ್ಕಡ್ಯಿ ಸ್ಟೂಡೆಂಟ್ಚ್" ಜೆಸ್ಸಿನ್ ಸಾಂಗ್ಲೆಂ, " ಹ್ಯಾ ದಿಸಾಂನಿ ಕಿತ್ಲೆಂ ಪಾವ್ಟಿಂ ಮ್ಹಜೊ ಉಗ್ಡಾಸ್ ತುಕಾ ಯೆತಾಲೊ?"
"ತುಜೊ ಉಗ್ಡಾಸ್ ಯೇನಾತ್ಲ್ಲಿ ಘಡಿಚ್ ನಾತ್ಲ್ಲಿ ಜೆಸ್ಸಿ. ರಾತಿಂ ನಿದೆಂತೀ ತುಜಿಂಚ್ ಸ್ವಪ್ಣಾಂ. ಹಾಂವ್ ತುಕಾ ಕಿತೆಂ ಸಾಂಗೊಂ ಜೆಸ್ಸಿ? ಮ್ಹಜೆಂ ಕಾಳಿಜ್ ಜರ್ ತುಜ್ಯಾ ಮುಖಾರ್ ದವ್ರುಂಕ್ ಸಾಧ್ಯ್ ಆಸ್ಲ್ಲೆಂ ತರ್ ತಶೆಂ ಕರ್ತೊಂ ಮ್ಹಣ್ ಸಾಂಗೊಂಕ್ ಸಕಾನಾ"
"ತುಂ ಸದಾಂಚ್ ಮ್ಹಜೊ ಉಗ್ಡಾಸ್ ಕರ್ತಾಯ್ ಮ್ಹಣ್ ಆಯ್ಕೊನ್ ಮ್ಹಾಕಾ ವರ್ತೊ ಆನಂದ್ ಭೊಗ್ತಾ ಮೆಲ್ವಿನ್. ಏಕ್ ಅಬಲ್ ಚೆಡುಂ, ತುಜೆರ್ ಪಾತ್ಯೆವ್ನ್ ಹಾಂವ್ ರಾವ್ಲ್ಯಾ. ತುಂ ಮ್ಹಾಕಾ ಕೆದಾಳಾಚ್ ವಿಸರ್ಚೊನಾಂಯ್ ತರ್ ಹಾಂವ್ ಅಧಿಕ್ ಭಾಗಿ. ಸವ್ಕಾಸ್ ಮ್ಹಣಾಲೆಂ ತೆಂ.
"ದೆವಾನ್ ವೆಗಿಂಚ್ ಆಮ್ಚೊ ಎಕ್ವೊಟ್ ಕರುಂಕ್ ಮಾಗ್ ಜೆಸ್ಸಿ. ತುಜ್ಯಾ ಬಗಾರ್ ಕಸಲೆಂಚ್ ಮ್ಹಾಕಾ ನಾಕಾ. ಜೀವನಾಂತ್ ಕಿತೆಂಯಿ ಹಾಂವ್ ಜಿಕ್ಲ್ಯಾರೀ, ತುಜ್ಯಾವಿಣೆ ಹಾಂವ್ ಪರಿಪೂರ್ಣ್ ನ್ಹಂಯ್"
ಜೆಸ್ಸಿ ಮೌನ್ ಆಸ್ಲ್ಲೆಂ. ಮತಿಂತ್ ಕಿತೆಂ ಚಿಂತ್ತಾಲೆಂ ಕೊಣ್ಣಾ. ಏಕ್ ಲಾಂಬ್ ಶ್ವಾಸ್ ತಾಣೆಂ ಸೊಡ್ಲೊ ಆನಿಂ ಉಪ್ರಾಂತ್ ಉಲೈಲೆಂ. "ಕೊಲೆಜ್ ಕಶಿ ಜಾತಾ ಮೆಲ್ವಿನ್? ಮ್ಹಜ್ಯಾಚ್ ಧ್ಯಾನಾಂತ್ ಶಿಕ್ಪಾಕ್ ಅಡ್ಕಳ್ ಹಾಡಿನಾಕಾ. ಸಕ್ಡಾಂತ್ ಪಾಸ್ ಜಾಲಾಯ್ಮೂ?"
"ಮ್ಹಜ್ಯಾ ವಿಶ್ಯಾಂತ್ ತುಂ ಖಂತ್ ಕರ್ನಾಕಾ ಜೆಸ್ಸಿ. ಹಾಂವ್ ಸಕ್ಡಾಂತ್ ಪಾಸ್ ಜಾಲಾಂ. ತಶೆಂ ಕಾಂಯ್ ಕಷ್ಟ್ ಜಾತಿತ್ ಜಾಲ್ಯಾರ್ ಟೀಚರ್ ಲಾಗಿಂ ಆಸ್ತಾನಾ ಮ್ಹಾಕಾ ಕಿತೆಂ ಭ್ಯೆಂ?"
"ತುಕಾ ಸಗ್ಳೊ ವೇಳ್ ತಮಾಷೆಚ್ ಲಾಗ್ಲ್ಯಾತ್. ಕೊಲೆಜ್ ವಿದ್ಯಾರ್ಥಿ ಸಕ್ಕಡ್ ಆಶೆಚ್ಗಿ ಕಿತೆಂ? ಎಕಾ ಸವಲಾಕ್ ಆಡ್ ಸವಾಲ್ ನಾಸ್ತಾಂ ಉಲವ್ಣೆಂ ನಾ. ತುವೆಂ ಏಕ್ ಲೊಯರ್ ಜಾಂವ್ಕ್ ಜಾಯ್ ಮೆಲ್ವಿನ್.."
"ಹಾಂ ಉಪ್ರಾಂತ್?"
"ಉಪ್ರಾಂತ್ ಜಡ್ಜ್. ತುವೆಂ ವ್ಹಡ್ಲೊ ಮನಿಸ್ ಜಾಂವ್ಕ್ ಜಾಯ್"
"ಮನ್ಶಾಚಿ ಸಾಧಾರಣ್ ವಾಡಾವಳ್ ಸ ಫುಟಿಂಚೆರ್ ರಾವ್ತಾ. ಹಾಂವೆಂ ಸಾತ್ ಫುಟಿ ಲಾಂಬ್ ಜಾಯ್ಜಾಯ್ಗಿ ಕಿತೆಂ?"
ದೊಗಾಂಯ್ ಹಾಸ್ಲಿಂ. ಥೊಡ್ಯಾ ವೆಳಾನ್ ಮೆಲ್ವಿನಾನ್ ವಿಚಾರ್ಲೆಂ. "ಗಿಬ್ಬಾ ಮ್ಹಜೊ ಜಿವಾಚೊ ಮಿತ್ರ್ ಜೆಸ್ಸಿ. ತುಕಾ ಕಸೊ ದಿಸ್ತಾ?"
"ತುಜ್ಯಾ ತಸಲ್ಯಾಚ್ ಇಷ್ಟಾಕ್ ಸೊಧುನ್ ಕಾಡ್ಲಾಯ್ ತುವೆಂ. ಗಿಬ್ಬಾ ಬರೊ ಭುರ್ಗೊ. ರೀಜಾ ತಾಚೆ ವಿಷ್ಯಾಂತ್ ಮಸ್ತ್ ಹೊಗಳ್ಸುನ್ ಉಲೈತಾಲೆಂ..."
"ತೆಂ ತಾಚ್ಯಾ ಮೊಗಾರ್ ಪಡ್ಲಾಂ ಆಸ್ತೆಲೆಂ" ಚಿಡಾಯ್ಲೆಂ ಮೆಲ್ವಿನಾನ್
"ಹಾಂ ಹಾಂ, ನಾಕಾ ಜಾಲ್ಲೊ ದುಬಾವ್ ಕರ್ನಾಕಾ. ಚೆಡ್ವಾಂ ಸಸಾರಾಯೆನ್ ಎಕ್ಲ್ಯಾ ಚೆಡ್ಯಾಚ್ಯಾ ಮೊಗಾರ್ ಪಡಾನಾಂತ್ ಕಳ್ಳೆಂಗಿ?"
"ಚೆಡ್ವಾಂಚೊ ಸ್ವಭಾವ್ ಹಾಂವ್ ಬರೊ ಕರ್ನ್ ಜಾಣಾಂ. ತುವೆಂ ರೀಜಾಚಿ ವಕಾಲತ್ ಘೆಂವ್ಚಿನಾಕಾ" ಹಾಸ್ಲೊ ಮೆಲ್ವಿನ್.
ಜೆಸ್ಸಿಯ್ ಹಾಸೊನ್ ಸಾಂಗಾಲಾಗ್ಲೆಂ.
"ತರ್ ತಿಂ ಚಿಂತ್ತಾಯ್ ಗಿಬ್ಬಾ ಸಾಂಗಾತಾ ತೆಂ ಸಾಂತೆಂತ್ ಭವೊಂಕ್ ಗೆಲ್ಲ್ಯಾನ್..."
ಮಧೆಂಚ್ ಮ್ಹಣಾಲೊ ತೊ. "ತಾಂಚಿ ಖಬಾರ್ ಹಾಂವ್ ಉಲೈನಾ. ಪುಣ್ ಆಮ್ಕಾಂ ಉಲಂವ್ಕ್ ಸಂದರ್ಭ್ ದೀವ್ನ್ ಗೆಲಿಂ ದೊಗಾಂಯ್"
"ಆಳೆ ಮೆಲ್ವಿನ್, ತಿಂ ಆಯ್ಲಿಂಚ್..." ಮ್ಹಣಾಲೆಂ ಜೆಸ್ಸಿ. ಮೆಲ್ವಿನಾಕ್ ತ್ಯಾ ಕಾಳೊಕಾಂತ್ ಯೆಂವ್ಚಿಂ ಗಿಬ್ಬಾ ಆನಿಂ ರೀಜಾ ದಿಸ್ಲಿಂ ಪುಣ್ ತಾಂಚ್ಯಾ ಸಾಂಗಾತಾ ಆಸ್ಚ್ಯಾ ಅನ್ಯೇಕಾ ವ್ಯಕ್ತಿಚೆರ್ ದೀಷ್ಟ್ ವ್ಹರೊಂಕ್ ತಾಕಾ ಏಕ್ ಕ್ಷಣ್ ಲಾಗ್ಲೆಂ. ತಿಂ ತೆಗಾಂಯ್ ಲಾಗಿಂ ಪಾವ್ತಾನಾ ವಿಜ್ಮಿತ್ ಜಾಲ್ಲ್ಯಾ ಮೆಲ್ವಿನಾಕ್ ತ್ಯಾ ತಿಸ್ರ್ಯಾ ವ್ಯಕ್ತಿಚಿ ವಳೊಕ್ ಮೆಳ್ಳಿ ಆನಿಂ ತೊ ಹಾಂಕ್ರೆಲೊ. "ಸಿಂತಿ......ತುಂ ಹಾಂಗಾ!" ಹಾಳ್ವಾಯೆಚಿ ಬೋಬ್ ಮಾರ್ಲಿ ತಾಣೆಂ.
"ಹೊ ಮೆಲ್ವಿನ್..... ತುಕಾ ಹಾಂಗಾ ಪಳೈನ್ ಮ್ಹಣ್ ಸ್ವಪ್ಣಾಂತ್ಯಿ ಚಿಂತುಂಕ್ ನಾ ಹಾಂವೆಂ. ಸಾಂತೆಂತ್ ಗಿಬ್ಬಾ ದಿಸ್ಲೊ ಹೆಂ......ಸಾಂಗಾತಾ ತುಜ್ಯಾ ಕೋಣ್?" ಅಧಿಕಾರನ್ ವಿಚಾರ್ಚ್ಯಾ ಬರಿ ಉಲೈಲೆಂ ಸಿಂತಿ.
ತಾಚ್ಯಾ ತಾಳ್ಯಾಚೊ ’ಪೊರ್ಸ್’ ಮೆಲ್ವಿನಾಕ್ ಬರೊ ಲಾಗ್ಲೊನಾ. ತಶೆಂ ಜೆಸ್ಸಿಕ್ಯಿ ಬೆಜಾರ್ಚ್ ಜಾಲೆಂ.
ಹೆಂ ಜೆಸ್ಸಿ.... ಆನಿಂ ಹೆಂ ಸಿಂತಿ...." ನಿರುತ್ಸಾಹಿ ಸ್ವರಾನ್ ತಾಣೆಂ ಎಕಾಮೆಕಾಚಿ ವಳೊಕ್ ಸಾಂಗ್ಲಿಂ.
"ಜೆಸ್ಸಿ...ಹಾಚಿ ತುಕಾ ಖಂಯ್ ವಳೊಕ್ ಜಾಲಿ ಹಾಬಾ? ವೊಪಾರ್ಯಾಂನಿ ಉಲೈಲೆಂ ತೆಂ.
"ವಳ್ಕಿಚಿ ಖಬಾರ್ ಆತಾಂ ಸೊಡ್ ಸಿಂತಿ. ತುಂ ಕಾರ್ಕಳ್ ಕಶೆಂ ಪಾವ್ಲೆಂಯ್? ಸಯ್ರ್ಯಾಂಗೆರ್ ಆಯ್ಲಾಂಯ್ಗಿ? ಪ್ರಸ್ತಾಪ್ ಘುಂವ್ಡಾವ್ನ್ ಮೆಲ್ವಿನಾನ್ ಮ್ಹಳೆಂ.
"ಆಮ್ಕಾಂ ಹಾಂಗಾ ಕಾರ್ಕಳಾಂತ್ ಭುಂಯ್ ಆಸಾ" ದವ್ಲತೆನ್ ಉಲೈಲೆಂ ಸಿಂತಿ. "ಆಮ್ಚ್ಯಾ ವೊಕ್ಲಾಂತ್ಲ್ಯಾ ಶಾಬಿಯಾಮಾಗೆರ್ ಹಾಂವ್ ಆತಾಂ ರಾವ್ತಾಂ. ಪಯ್ಲ್ಯಾ ಪಾವ್ಟಿಂ ಹಾಂವೆಂ ಕಾರ್ಕಳಾಂತ್ ಯೆಂವ್ಚೆಂ. ಜೆಸ್ಸಿ ಮ್ಹಾಕಾ ತುಮ್ಚ್ಯಾ ಕಾರ್ಕಳ್ಚ್ಯಾ ಸಾಂತೆಂತ್ ಭಂವ್ಡಾವ್ಕ್ ವರಿನಾಯ್ಗಿ" ವಿಚಾರ್ಲೆಂ ಸಿಂತಿನ್.
ಎಕಾ ಕ್ಶಣಾಚ್ಯಾ ವಳ್ಕಿನ್ ತಿತ್ಲಿ ಸಳಾವಳ್ ದಾಕಂವ್ಚ್ಯಾ ಸಿಂತಿಚೆಂ ನಡ್ತೆಂ ಮಿಸ್ತಾರಾಚೆಂ ದಿಸ್ಲೆಂ ಜೆಸ್ಸಿಕ್. ತಾಕಾ ಕಸಲಿ ಜಾಪ್ ದಿಂವ್ಚಿಂ ಕಳ್ಳಿನಾ. ತಿತ್ಲ್ಯಾರ್ ಮೆಲ್ವಿನ್ಂಚ್ ಜೆಸ್ಸಿಚ್ಯಾ ಕುಮ್ಕೆಕ್ ಆಯ್ಲೊ. "ಸಾಂತೆಂತ್ ಭಂವ್ತಾಯ್ ತರ್, ಆಮಿಂ ಸಕ್ಕಡ್ ಚಲ್ಯಾಂ" ಮ್ಹಣಾಲೊ ತೊ.
"ಸಕ್ಕಡ್....ಕಿತ್ಯಾಕ್ ಜೆಸ್ಸಿ ಆನಿಂ ಹಾಂವ್ಂಚ್ ವೆತಾಂವ್. ಯೆತಾಯ್ ಜಾಲ್ಯಾರ್ ರೀಜಾಯಿ ಯೆ. ತುಮ್ಚ್ಯಾ ಚೆಡ್ಯಾಂ ಸಾಂಗಾಂತಾ ಕಸಲೆಂ ಭಂವ್ಚೆಂ?" ಆಶೆಂ ಸಾಂಗೊನ್ ಜೆಸ್ಸಿಚ್ಯಾ ಹಾತಾಕ್ ಧರ್ನ್ ವೋಡ್ನ್ಂಚ್ ವರ್ನ್ ಗೆಲೆಂ ಸಿಂತಿ. ಪಾಟಾಪಾಟ್ ರೀಜಾಯಿ ಧಾಂವ್ಲೆಂ. ಗಿಬ್ಬಾ ಆನಿಂ ಮೆಲ್ವಿನಾಕ್ ಕಿತೆಂ ಕರ್ಚೆಂ ಕಳ್ಳೆಂನಾ. ದೊಗೀ ಶೆರ್ಮೆವ್ನ್ ಎಕಾಮೆಕಾಕ್ ಪಳೆಂವ್ಕ್ ಪಡ್ಲೆ.
"ಜೆಸ್ಸಿ....." ಸಿಂತಿಚೊ ತಾಳೊ ಆತಾಂ ಮಧುರ್ ಜಾಲ್ಲೊ. "ಮ್ಹಜ್ಯಾ ವಿಶೇಷ್ ನಡ್ತ್ಯಾಕ್ ವಾಯ್ಟ್ ಸಮ್ಜಾನಾಕಾ ಹಾಂ. ಮ್ಹಾಕಾ ತುಜ್ಯಾಲಾಗಿಂ ಥೊಡೆಂ ಖಾಸಿಂ ಉಲೊಂವ್ಕ್ ಆಸ್ಲ್ಲೆಂ. ದೆಕುನ್ಂಚ್ ಹಾಂವೆಂ ಮೆಲ್ವಿನಾಕ್ ಪಯ್ಸ್ ದವರ್ಲೆಂ.."
"ಮ್ಹಜೆಲಾಗಿಂ ಖಾಸ್ಗೆನ್ ಉಲೊಂವ್ಕ್ ಆಸಾ?" ಜೆಸ್ಸಿ ನಿಜಾಕೀ ಅಜ್ಯಾಪ್ ಜಾಲ್ಲೆಂ. ಸಿಂತಿ, ಮ್ಹಾಕಾ ತುಜಿ ವಳೊಕ್ ಜಾಲ್ಲಿ ಆತ್ತಾಂಚ್. ಆನಿಂ ತುಂ ಖಾಸ್ಗಿ ಸಂಗತ್ ಉಲೊಂವ್ಕ್ ಮ್ಹಾಕಾ ಸೊಧ್ತಾಲೆಂಯ್...?"
"ವ್ಹಯ್......" ದುಃಖೇಸ್ತ್ ತಶೆಂ ಉಲೈಲೆಂ ತೆಂ, "ಪುಣ್ ಹಾಂವೆಂ ಸಾಂಗ್ಚಿ ಗಜಾಲ್ ತುಜ್ಯಾ ಕಾಳ್ಜಾಕ್ ದುಃಖ್ ದಿತೆಲಿ"
"ದುಃಖ್! ಕಿತ್ಯಾಕ್?" ಕಸಲೊ ಮಿಸ್ತೆರ್ ದೆವಾ!’ ನಿಯಾಳ್ತಾಲೆಂ ಜೆಸ್ಸಿ.
"ನಿಜಾಕೀ, ತುಕಾ ದುಃಖಾಚಿ ಜಾತೆಲಿ ಗಜಾಲ್" ಗಂಭೀರ್ ತಾಳ್ಯಾನ್ ಮ್ಹಣಾಲೆಂ ಸಿಂತಿ, "ಹಾಂವೆಂ ಸಾಂಗ್ಚಿಂ ಖಬಾರ್ ಮೆಲ್ವಿನಾಚಿ"
"ಮೆಲ್ವಿನಾಚಿ! ಕಸಲಿ ಖಬಾರ್?" ಜೆಸ್ಸಿಚೊ ತಾಳೊ ಕಾಂಪ್ಲೊ.
"ಸಾಂಗ್ತಾಂ ಜೆಸ್ಸಿ. ಮೆಲ್ವಿನಾನ್ ಮ್ಹಾಕಾ ಘಾತ್ ಕೆಲಾ, ಮ್ಹಜೊ ಮೆಲ್ವಿನ್ ಮೋಗ್ ಕರ್ತಾಲೊ ಆನಿಂ ಆತಾಂ ಮ್ಹಾಕಾ ಘಾತ್ ಕರ್ನ್, ತುಜ್ಯಾಲಾಗಿಂ ಖೆಳ್ ಖೆಳ್ತಾ"
ಸಿಂತಿಚಿಂ ಉತ್ರಾಂ ತಳ್ಮಟ್ಯಾಕ್ ಮಾರ್ಲ್ಲ್ಯಾಬರಿ ಜಾಲಿಂ ಜೆಸ್ಸಿಕ್. ಸಾಂಗಾತಾ ಆಸ್ಚೆಂ ರೀಜಾಯಿ ಬಿಯೆವ್ನ್ ಗೆಲೆಂ.
"ನಾ...ನಾ ಹೆಂ ಫಟ್. ತುಂ ಫಟಿ ಹಾಡ್ನ್ ಆಯ್ಲಾಂಯ್.." ಜೆಸ್ಸಿ ಸುಸ್ಕಾರ್ಲೆಂ ಹಾಳ್ವಾಯೆನ್.
"ಫಟ್......! ತುಂ ನೆಣಾರಿ ಜೆಸ್ಸಿ. ಪಳೆ ಹಾಂವ್ ತುಕಾ ಆಯಿನ್ನ್ ವೆಳಾರ್ ಜಾಗ್ವಂವ್ಚ್ಯಾ ಖಾತಿರ್ಚ್ ಹಾಂಗಾ ಆಯಿಲ್ಲಿಂ. ಮ್ಹಜಿಂ ಉತ್ರಾಂ, ಸತ್ ಮ್ಹಣ್ ಹಾಂವೆಂ ತುಕಾ ರುಜು ಕೆಲ್ಯಾರ್....?"
"ತುಜ್ಯಾಲಾಗಿಂ ರುಜ್ವಾತ್ ಆಸಾ? ನಾಂ ಸಿಂತಿ, ಹಾಂವ್ ತುಕಾ ಬಿಲ್ಕುಲ್ ಪಾತ್ಯೆನಾ" ಜೆಸ್ಸಿನ್ ಸ್ವಷ್ಟ್ ಸಾಂಗ್ಲೆಂ.
"ಧರ್......ಪಳೆ ಹಿ ರುಜ್ವಾತ್" ಆಶೆಂ ಮ್ಹಣೊನ್ ಸಿಂತಿನ್ ಬ್ಲಾವ್ಜಾಚ್ಯಾ ಬಿತರ್ ಲಿಪಯಿಲ್ಲಿ ಮೆಲ್ವಿನಾಚಿ ತಸ್ವೀರ್ ಭಾಯ್ರ್ ಕಾಡ್ಲಿ. ತ್ಯಾ ತಸ್ವೀರೆಚೆರ್, ಸಾಂತೆಂತ್ಲ್ಯಾ ಉಜ್ವಾಡಾಂತ್ ಜೆಸ್ಸಿಚಿ ದೀಷ್ಟ್ ಪಡ್ತಾನಾ, ದೊಳ್ಯಾಂಕ್ ಕಾಳೊಕ್ ಆಯ್ಲೊ ತಾಕಾ.
[ಮೆಲ್ವಿನಾಗೆರ್ ಥಾವ್ನ್ ಚೊರ್ಲ್ಲ್ಯಾ ತಸ್ವೀರೆ ವರ್ವಿಂ, ಜೆಸ್ಸಿ ಆನಿಂ ಮೆಲ್ವಿನಾ ಮಧೆಂ ವೆಗ್ಳಾಚಾರ್ ಹಾಡೊಂವ್ಕ್ ಸಿಂತಿ ಸುಫಳ್ ಜಾಲೆಂಗಿ? ಬದ್ಲಾಕ್, ಪರಿಣಾಮ್ ತಾಚೆರ್ಚ್ ಉಳ್ಟೊ ರಾವ್ಲೊ? ತರ್ನ್ಯಾ ಕಾಳ್ಜಾಚೆರ್ ನಿಷ್ಟುರ್ ಭಾಲಿ ತೊಪ್ಲ್ಲ್ಯಾ ಜೆಸ್ಸಿಚೆ ಹಾಲ್ - ಹವಾಲ್, ಮೆಲ್ವಿನಾಚೊ ಕ್ರೋಧ್.....ಮುಖ್ಲ್ಯಾ ಅಂಕ್ಯಾಂನಿಂ ಹಿಂ ವಿಶೇಷ್ ಘಡಿತಾಂ ಪಳೆಯಾಂ]
ನಿರ್ಭಾಗ್ಯಾಚೆಂ ಸ್ವಪಾಣ್: ಪ್ರಸ್ತಾವನ್. ಅವಸ್ವರ್ 1, 2, 3, 4, 5, 6, 7, 8
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
