ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ನಿರ್ಭಾಗ್ಯಾಚೆಂ ಸ್ವಪಾಣ್
ಅವಸ್ವರ್ 8
ಮೆಲ್ವಿನಾಕ್ ವೊಡ್ಲ್ಯಾರ್ ಜೀಬ್ ಆಯ್ಲಿನಾ ಸಿಂತಿಚ್ಯಾ ಸವಾಲಾಕ್ ಜಾಪ್ ದೀಂವ್ಕ್. ತೊ ಶೆರ್ಮೆಲೊ ಆನಿಂ ಹಜಾರ್ ಚಿಂತ್ನಾಂಚ್ಯಾ ಭರಾಕ್ ಕಳ್ವಳ್ಳೊ. ಬೊರ್ಯಾ ವಯ್ರ್ ಬೊರ್ಕುಟಿ ಮ್ಹಳ್ಳ್ಯಾ ಬರಿ ಸಿಂತಿಚ್ ಹಿಣ್ಸೊಣೆಚ್ಯಾ ಸ್ವರಾನ್ ಪರ್ತ್ಯಾನ್ ವಿಚಾರಿಲಾಗ್ಲೆಂ -
"ಮೆಲ್ವಿನ್, ಸಾಂಗ್ ಆತಾಂ ಲಜ್ ದಿಸಾನಾಂಗಿ ತುಕಾ? ಉತ್ರಾಂ ಮ್ಹಜಿಂ ಕೊಡು ಲಾಗ್ಲಿಂಗಿ?"
ನಹಿಂಚ್ ಉತ್ರಾಂ ಕೊಡು ಲಾಗ್ಲ್ಲಿಂ, ಬಗಾರ್ ತ್ಯಾ ಉತ್ರಾಂನಿ ಮೆಲ್ವಿನಾಚೆರ್ ಕಠಿಣ್ ಪರಿಣಾಮ್ ಕೆಲ್ಲೊ. ಕಾಂಪ್ಚ್ಯಾ ತಾಳ್ಯಾನ್ ತೊ ಮ್ಹಣಾಲೊ - "ಸಿಂತಿ, ತುವೆಂ ಹೆಂ ಖಂಯ್ ಪಳೆಲೆಂಯ್"
"ಹಾಂವೆಂ ಪಳೆಲೆಂ? ಕಿತ್ಯಾಕ್, ಸಗ್ಳ್ಯಾ ಸಂಸಾರಾನ್ಂಚ್ ತುಕಾ ಪಳೆಲಾಂ. ಸಾಂಗ್, ತೆಂ ಹ್ಯಾ ವಾಡ್ಯಾಕ್ಚ್ ನವೆಂ ಚೆಡುಂ ಖಂಯ್ ಥಾವ್ನ್ ಆಯ್ಲಾಂ? ತಾಚಿ ವಳೊಕ್ ತುಕಾ ಕಶಿ ಜಾಲಿ?"
ಮೆಲ್ವಿನಾನ್ ಜಾಪ್ ದಿಲಿನಾ. ಉದ್ಯಾನ್ ಲಾಗಿಂ ಆಯಿಲ್ಲ್ಯಾನ್ ತೊ ಶೀದಾ ಉದ್ಯಾನಾ ಬಿತರ್ ರಿಗ್ಲೊ ಆನಿಂ ಸರ್ಶಿಲ್ಯಾ ಬಾಂಕಾರ್ ಗಳ್ಳೊ. ಪಾಟಾಪಾಟ್ ಸಿಂತಿಯ್ ಯೇವ್ನ್ ತಾಚ್ಯಾ ಕುಶಿನ್ ಬಸ್ಲೆಂ.
"ಮ್ಹಾಕಾ ತ್ಯಾ ಚೆಡ್ವಾ ವಿಷ್ಯಾಂತ್ ಸಾಂಗೊಂಕ್ ಲಜ್ತಾಯ್ ಕಿತ್ಯಾಕ್ ಮೆಲ್ವಿನ್?" ಸಿಂತಿನ್ ಮೆವಾಳಾಯೆನ್ ವಿಚಾರ್ಲೆಂ.
"ಆಶೆಂಚ್....ವಿಚಾರ್ಲ್ಲ್ಯಾಂಕ್ ಬಾಧಕ್ ಕಿತೆಂ?"
"ತಿ ಖಬಾರ್ ವಿಸರ್ ಸಿಂತಿ. ಮ್ಹಜಿ ಖಾಸ್ಗಿ ಗಜಾಲ್ ತಿ. ತಾಂತುಂ ಮೆತೆರ್ ಜಾಂವ್ಕ್ ತುಕಾ ಅಧಿಕಾರ್ ನಾ" ತೊ ತಾಪ್ಲೊ.
"ಓ....ತಿತ್ಲೊ ವ್ಹೊಡ್ ಆವಾಜ್ ಕರಿನಾಕಾ..." ಸಿಂತಿಯಿ ಜ್ಯೋರಾನ್ ಮ್ಹಣಾಲೆಂ, "ತುಂ ಘಾತ್ಕಿ!"
"ಘಾತ್ಕಿ?!" ಹಾಸ್ಲೊ ತೊ ತಿಕ್ಸಾಣೆನ್, "ಹಾಂವೆಂ ಕಸಲೊ ಘಾತ್ ತುಕಾ ಕೆಲೊ?"
"ಮ್ಹಜ್ಯಾ ದೊಳ್ಯಾಂಭಾಯ್ರ್ ತುಂ ತ್ಯಾ ಚೆಡ್ವಾಚೊ ಮೋಗ್ ಕರ್ತಾಯ್. ಮ್ಹಾಕಾ ತುವೆಂ ಫಟಯ್ಲೆಂಯ್"
"ಸಿಂತಿ....ಹಾಂಗಾ ಆಯ್ಕ್", ಶಾಂತ್ ತಾಳ್ಯಾನ್ ತೊ ಮ್ಹಣಾಲೊ, "ತುಜ್ಯಾ ಉತ್ರಾಂಚೊ ಮ್ಹಾಕಾ ಅರ್ಥ್ಚ್ ಮೆಳಾನಾ. ಹಾಂವೆಂ ತುಕಾ ಖಂಯ್ಚ್ಯಾ ರಿತಿನ್ ಫಟಯ್ಲೆಂ ತೆಂಯ್ ಮ್ಹಾಕಾ ಕಳಾನಾ. ಹಾಂವೆಂ ತುಜೊ ಮೋಗ್ ಕರ್ತಾಂ ಮ್ಹಣ್ ತುಕಾ ಉತಾರ್ ದೀಂವ್ಕ್ ನಾ. ದಿಲ್ಲೆಂ ತುಕಾ ಉಗ್ಡಾಸ್ ಆಸಾಗಿ?"
"ಪುಣ್ ತುಂ ಮ್ಹಜೊ ಮೋಗ್ ಕರ್ತಾಲೊಯ್!" ಹಾಳ್ವಾಯೆನ್ ಬೋಬ್ ದಿಲಿ ತಾಣೆ, "ಉತ್ರಾಂನಿ ನಹಿಂ ಜಾವ್ಯೆತ್, ಪುಣ್ ತುಜ್ಯಾ ಕರ್ನ್ಯಾಂನಿ ಆನಿಂ ದಿಷ್ಟಿನ್ ತುಂ ಮ್ಹಜೊ ಮೋಗ್ ಕರ್ತಾಯ್ ಮ್ಹಣ್ ತುವೆಂ ದಾಕೈಲ್ಲೆಂಯ್"
"ವ್ಹಯ್, ಖರೆಂಚ್ ತುವೆಂ ಸಾಂಗ್ಚೆಂ," ತ್ಯಾಚ್ ತಾಳ್ಯಾನ್ ತೊ ಉಲೈಲೊ. "ಎಕಾ ವೆಳಾರ್ ತುಜ್ಯಾ ರುಪಾಕ್ ಹಾಂವ್ ಪಿಸ್ವಾಲ್ಲೊಂ ಆನಿಂ ಆರಾಧಾನ್ ಕರ್ತಾಲೊಂ. ತುಜ್ಯಾ ಮೊಗಾ ಬಗಾರ್ ದುಸ್ರೆಂ ಕಸಲೆಂಚ್ ಮ್ಹಾಕಾ ನಾಕಾ ಮ್ಹಣ್ ಆಶೆಲ್ಲೊಂ. ಪೂನ್ ಸಿಂತಿ, ತ್ಯಾ ವೆಳಾರ್ ತುವೆಂ ಮ್ಹಾಕಾ ದಿಲ್ಲೊ ಪ್ರತಿಫಳ್ ಕಸಲೊ? ತುಂ ವಿಸಾರ್ಲಾಂಯ್ ಪಾಂವ್ಕ್ ಪುರೊ. ಪುಣ್ ಹಾಂವ್ ವಿಸ್ರೊಂಕ್ ನಾ"
"ತ್ಯಾ ವಿಷ್ಯಾಂತ್ ಮ್ಹಜೊ ಗುನ್ಯಾಂವ್ ಹಾಂವ್ ವಳ್ಕಾಲ್ಯಾಂ....ಮೆಲ್ವಿನ್, ಹಾಂವ್ ತುಜೊ ಮೋಗ್ ಕರ್ತಾಂ!" ಸಿಂತಿನ್ ಮೆಲ್ವಿನಾಚೊ ಹಾತ್ ಆರಾವ್ನ್ ಧರ್ಲೊ.
ಉತ್ರಾಂ ಭೋವ್ ವೇಳ್ ಕರ್ನ್ ಆಯಿಲ್ಲಿಂ. ಥೊಡ್ಯಾಚ್ ದಿಸಾಂ ಆದಿಂ ಸಿಂತಿಚ್ಯಾ ತ್ಯಾಚ್ ಉತ್ರಾಂಕ್ ದೀಸ್ ರಾತ್ ತೊ ರಾಕೊನ್ ಆಸ್ಲ್ಲೊ. ಆಜ್ ಸಿಂತಿನ್ ಉತ್ರಾಂ ತಾಣೆಂ ಆಯ್ಕಾಲಿಂ - ತಾಂಚಿ ಗರ್ಜ್ಚ್ ನಾತ್ಲ್ಲ್ಯಾ ಸಂದರ್ಭಾರ್.
ಸಿಂತಿಚಿ ಸಾಂಗಾತ್ ಆದ್ಲ್ಯಾ ತ್ಯಾ ಘಡಿತಾಂಚೊ ತಾಕಾ ಉಗ್ಡಾಸ್ ಹಾಡ್ತಾಲೊ. ಮೆಲ್ವಿನಾಚೆಂ ರಗಾತ್ ಸಳ್ಸಳ್ತಾಲೆಂ. ತರೀ ತಾಣೆಂ ತ್ಯಾ ತಾಳ್ನೆಚೆರ್ ಜಯ್ತ್ ವ್ಹೆಲೆಂ ಆನಿಂ ಸಿಂತಿಕ್ ಹಾಳ್ವಾಯೆನ್ ಪಯ್ಸ್ ಕೆಲೆಂ.
"ಸಿಂತಿ.....ಮ್ಹಾಕಾ ಮಾಫ್ ಕರ್. ವೇಳ್ ಉತರ್ಲಾ ಸಿಂತಿ.."
"ತುಂ ತ್ಯಾ ಚೆಡ್ವಾಚೊ ಮೋಗ್ ಕರ್ತಾಯ್ ಮ್ಹಣ್ ಸ್ವಷ್ಟ್ ಸಾಂಗ್" ಆಕ್ಮಾನಾನ್ ಆನಿಂ ನಿರಾಶೆನ್ ಸಿಂತಿಚಿ ಕೂಡ್ ಕಾಂಪ್ತಾಲಿ.
"ವ್ಹಯ್, ಹಾಂವೆಂ ಜೆಸ್ಸಿಕ್ ಭಾಸ್ ದಿಲ್ಯಾ. ಹ್ಯಾಚ್ ಸಾಂಜೆರ್, ತಂಡ್ರಬೈಲ್ ಇಗರ್ಜೆ ಮುಖಾರ್ ಹಾಂವೆಂ ತಾಚೊ ಹಾತ್ ಧರ್ನ್ ಸಾಂಗ್ಲಾಂ ಸಿಂತಿ, ’ಹಾಂವ್ ತುಕಾ ಕೆದಿಂಚ್ ಸಾಂಡ್ಚೊನಾ ಜೆಸ್ಸಿ’ ಮ್ಹಣ್"
"ಓ......ಕ್ರೂರಿ ತುಂ...." ರಡೊಂಕ್ ತಯಾರ್ ಜಾಲ್ಲೆಂ ಸಿಂತಿ
"ತುವೆಂ ಮ್ಹಾಕಾ ಕಿತೆಂ ಆಪಯ್ಲ್ಯಾರಿ ಪರ್ವಾನಾ" ಸ್ವಷ್ಟ್ ತೊ ಸಾಂಗಾಲಾಗ್ಲೊ. "ಎಕಾ ದಿಸಾ ತುವೆಂಚ್ ಸಾಂಗ್ಲ್ಲೆಂ ಮ್ಹಾಕಾ ’ಕೊಣಾಚೊ ಮೋಗ್ ಕರುಂಕ್ ಹಾಂವ್ ತಯಾರ್ ನಾ. ಆನಿಂ ಕೊಣಾಚಿ ಪತಿಣ್ ಜಾವ್ನ್ ರಾಂದ್ಪಾಚ್ಯಾ ಕುಡಾಂತ್ ದೀಸ್ ಸಾರುಂಕ್ ಮ್ಹಾಕಾ ಖುಶಿನಾ’ ಮ್ಹಣ್. ಆಜ್ ತಿಂಚ್ ಉತ್ರಾಂ ತುಂ ಕಶೆಂ ವಿಸರ್ಲೆಂಯ್ ದೇವ್ ಎಕ್ಲೊ ಜಾಣಾ. ತರೀ ತುವೆಂ ಮ್ಹಜೊ ಮೋಗ್ ಕರ್ತಾಂ ಮ್ಹಳ್ಳ್ಯಾಕ್ ಮಸ್ತ್ ದೇವ್ ಬರೆಂ ಕರುಂ"
"ತುವೆಂ ಮ್ಹಜೊ ಮೋಗ್ ಇನ್ಕಾರ್ ಕೆಲ್ಲ್ಯಾಕ್ ತುಕಾಯ್ ಮಸ್ತ್ ದೇವ್ ಬರೆಂ ಕರುಂ" ತೆಂ ರಡೊನ್ ಮ್ಹಣಾಲೆಂ, "ಆಯ್ಚಿಂ ಉತ್ರಾಂ ತುಂ ವಿಸರ್ಚೊನಾಂಯ್"
"ಸಿಂತಿ......" ಸೈರಾಣ್ ಚುಕೊನ್ ತೊ ಮ್ಹಣಾಲೊ, "ಜೀವನಾಂತ್ ಆಮ್ಚ್ಯೊ ವಾಟೊ ವಿವಿಂಗಡ್ ಜಾವ್ನಾಸಾತ್. ತುಂ ತುಕಾ ಬರೆಂ ಆಸ್ಲ್ಲೆಂ ಕರ್ತಾನಾ, ಸಿಂತಿ, ಹಾಂವ್ ಮ್ಹಾಕಾ ಸಾರ್ಕೆಂ ದಿಸ್ಚ್ಯಾ ವಾಟೆನ್ ಚಲ್ತಾಂ. ಆನಿಂ ಆಮ್ಚ್ಯಾ ಖಾಸ್ಗಿ ಸಂಗ್ತಿಂನಿ ಎಕಾಮೆಕಾಕ್ ಭರ್ಸೊಂಕ್ ಅಧಿಕಾರ್ಚ್ ನಾ"
"ವ್ಹಯ್, ಆಮಿಂ ತ್ಯಾ ವಿಶ್ಯಾಂತ್ ಚಿಂತುನ್ ಪಳೆಂವ್ಚೆಂ ಅಧಿಕ್ ಬರೆಂ" ತೆಂ ಉಟ್ಲೆಂ.
"ಸಿಂತಿ...ರಾವ್. ಹಾಂವೀ ಯೆತಾಂ" ಸರಾರಾಂ ವೆಚ್ಯಾ ಸಿಂತಿಕ್ ಪಳೆವ್ನ್ ತೊ ಮ್ಹಣಾಲೊ.
"ತುಂ ಆಜ್ ಮ್ಹಜ್ಯಾ ಸಂಗಿಂ ಉಲೈನಾಕಾ. ದೆವಾನ್ ಆಮ್ಚ್ಯಾ ವಾಂಟ್ಯಾಕ್ ಫಾಲ್ಯಾಚೊ ದೀಸ್ ಫಾವೊ ಕೆಲಾ ಜಾಲ್ಯಾರ್, ಆಮಿಂ ಮೆಳ್ಯಾಂ" ಆಶೆಂ ಸಾಂಗೊನ್ ತೆಂ ಚಲ್ಲೆಂ.
ಮೆಲ್ವಿನ್ ಸಿಂತಿಚಿಂ ಉತ್ರಾಂಚ್ ನಿಯಾಳ್ನ್ ವೆತಾಲೊ. ’ಹಾಯ್......ಕಸಲೆಂ ವಿಚಿತ್ರ್ ಘಡಿತಾಂ. ಮೋಗ್ ಆಶೆವ್ನ್ ಗೆಲ್ಲ್ಯಾಕಡೆ ಮೆಳ್ಲ್ಲೊ ತಿರಸ್ಕಾರ್ ಆನಿಂ ಆಜ್ ಮ್ಹಾಕಾ ಜೆಸ್ಸಿ ಸಾಂಗಾತಾ ಪಳೆವ್ನ್, ಸಿಂತಿ ಜಾವ್ನ್ಂಚ್ ಮೋಗ್ ದೀಂವ್ಕ್ ಆಯ್ಲಾಂ. ನಾ.....ಹೊ ಮೋಗ್ ನಹಿಂ. ಬಗಾರ್ ಸಿಂತಿ ಜೆಸ್ಸಿಚ್ಯಾ ಮೊಸ್ರಾನ್ ಪೆಟ್ಲಾಂ. ಜೆಸ್ಸಿಚ್ಯಾ ಸೊಭಿತ್ ರುಪಾಕ್ ಪಳೆವ್ನ್ ಕಳ್ವಳಾಂ ತೆಂ...... ಆನಿಂ ತಿ ಸೊಭಾಯ್ ತಾಚ್ಯಾ ದೊಳ್ಯಾಂಕ್ ಕಿಸರ್ ಜಾಂವ್ಕ್ ಪಾವ್ಲ್ಯಾಂ. ಮ್ಹಾಕಾ ಆನಿಂ ಜೆಸ್ಸಿಕ್ ವಿಂಗಡ್ ಕರುಂಕ್ ಸೊಧ್ತಾಂ... ತೆಂ....ವ್ಹಯ್, ಹಿಚ್ ತಾಚಿ ಮಾಂಡಾವಳ್. ನಾ, ಹಾಂವೆಂ ಹ್ಯಾ ಪುಸ್ಲಾವ್ಣ್ಯಾಕ್ ಬಲಿ ಜಾಂವ್ಕ್ ನಜೊ. ಹಾಂವೆಂ ಚಡ್ ಜಾಗ್ರುತ್ಕಾಯ್ ಘೆಂವ್ಕ್ ಜಾಯ್...."
ವೊರಾಂ ಆಟ್ ಜಾತಾನಾ ತೊ ಘರಾ ಪಾವ್ಲೊ. ಜಿಲ್ಲಿಬಾಯ್ ಪೂತ್ ವೇಳ್ ಕರ್ನ್ ಆಯಿಲ್ಲ್ಯಾಕ್ ಪುರ್ಪುರೊಂಕ್ ಲಾಗ್ಲಿ. ತರೀ ತಿಚ್ಯಾ ಉತ್ರಾಂಕ್ ಉಲೊಂವ್ಕ್ಯಿ ತಾಕಾ ಮನ್ ನಾತ್ಲ್ಲೆಂ. ರಾತಿಂ ಹಾಂತುಳ್ಣಾರ್ ನಿದ್ಲ್ಲ್ಯಾಕಡೆ ಸಿಂತಿ ಆನಿಂ ಜೆಸ್ಸಿಚಿಂಚ್ ಉತ್ರಾಂ ಆನಿಂ ದನ್ಪರಾಂಚಿಂ ಘಡೀತಾಂ ತೊ ಚಿಂತ್ತಾಲೊ. ನಿದೆಂತಿ ನಾನಾಂತಿಂ ಸ್ವಪ್ಣಾಂ ತಾಣೆಂ ದೆಖ್ಲಿಂ. ಕಶಿಯಿ ರಾತ್ ಫಾಲಿ ಜಾಲಿ ಆನಿಂ ಸುರ್ಯಾಚಿಂ ನೆಂಟಿ ಕೀರ್ಣಾಂ ಜನೆಂತ್ಲ್ಯಾನ್ ತಾಚ್ಯಾ ತೊಮ್ಡಾರ್ ಪಡ್ಲಿಂ. ದೊಳೆ ಘಸ್ಟುನ್ ತೊ ಜಾಗೊ ಜಾತಾನಾ, ಧಾ ವರ್ಸಾಂಕ್ ಆಪುಣ್ ಮ್ಹಾತಾರೊ ಜಾಲಾಂ ತಶೆಂ ಬೊಗ್ಲೆಂ ಮೆಲ್ವಿನಾಕ್.
ತ್ಯಾ ವೆಳಾರ್ ಜಾಗ್ ಜಾಲ್ಲ್ಯಾ ಸಿಂತಿಕೀ ಮತಿಂತ್ ಸಮಾಧನ್ ನಾತ್ಲ್ಲೆಂ. ಆದ್ಲ್ಯಾ ದಿಸಾ ತಾಕಾ ಸಲ್ವೊಣಿ ಮೆಳ್ಲ್ಲಿ. ಸಲ್ವೊಣಿ ನಹಿಂ ಖರ್ಯಾ ಮೊಗಾಂತ್, ಬಗಾರ್ ಚಿಂತ್ಲೆಲ್ಯಾ ಖೊಟ್ಯಾ ಚಿಂತ್ನಾಚೆರ್. ಖರೆಂಚ್ ತೆಂ ಮೆಲ್ವಿನಾಚೊ ಮೋಗ್ ಕರುಂಕ್ ಕಬೂಲ್ ನಾತ್ಲ್ಲೆಂ. ಪುಣ್ ಜೆಸ್ಸಿ ಥಾವ್ನ್ ಮೆಲ್ವಿನಾಕ್ ಚುಕೈಜಾಯ್ ಮ್ಹಣ್ ತಾಚಿ ಅಭಿಲಾಷಾ ಆಸ್ಲ್ಲಿ. ತ್ಯಾ ಇಚ್ಛೆಕ್, ತಾಣೆಂ ಜಾವ್ನ್ ಮೆಲ್ವಿನಾಚೊ ಮೋಗ್ ಕರ್ತಾಂ ಮ್ಹಣ್ ಉಚಾರ್ಲ್ಲೆಂ. ಆಪ್ಣಾಚ್ಯಾ ಖುಶೆ ವಿರೋಧ್. ಪುಣ್ ಮೆಲ್ವಿನಾಚಿ ಕಠೋರ್ ಜಾಪ್ ಆಯ್ಕಾತಾನಾ ತಾಚ್ಯಾ ಸ್ವಾಭಿಮಾನಾಕ್ ಶೆಳೆಂ ಉದಾಕ್ ವೊತ್ಲ್ಲ್ಯಾಬರಿ ಜಾಲ್ಲೆಂ. ವ್ಹಯ್, ಹೊ ಪ್ರಸ್ತಾಪ್ ಸೊಡೂಂಕ್ ನಜೊ. ಕಿತೆಂ ಪುಣಿ ಉಪಾಯ್ ಚಾಲು ದವರಿಜಾಯ್. ಶೆಳಿಯೆಕ್ ಅಪಹರ್ಸುಂಕ್ ಜಾಯ್ ಜಾಲ್ಯಾರ್ ಬೊಲ್ಪ್ಯಾನ್ಯಿ ಶೆಳಿಯಾಚ್ಯಾ ರುಪಾರ್ ಯೇಂವ್ಕ್ ಜಾಯ್. ಕಾತರ್ಚೆಂ ಮನ್ ಆಸ್ಲ್ಯಾರ್ ವೈರಿಚ್ಯಾ ಪಾಯಾಂಕ್ ಪಡ್ಲ್ಲ್ಯಾ ಬರಿ ಕರ್ನ್ ತಾಚೆ ಪಾಂಯ್ ಕಾತ್ರುಂಕ್ ಜಾಯ್.
ಸಿಂತಿ ಉಟ್ಲೆಲ್ಯಾ ಲಾಗಾಯ್ತ್ ಚಿಂತ್ತಾಲೆಂ. ಆಖ್ರೇಕ್ ತಾಕಾ ಏಕ್ ಉಪಾಯ್ ಮತಿಕ್ ಝಳ್ಕಾಲೊ. ತೆಂ ಆಪ್ಲೆಸ್ಥಕಿಂ ಹಾಸ್ಲೆಂ ಆನಿಂ ಮ್ಹಣಾಲೆಂ. "ವ್ಹಯ್, ಹೊಚ್ ಉಪಾಯ್ ಬರೊ. ಹಾಂತುಂಚ್ ಮೆಲ್ವಿನಾಕ್ ಸಾಂಪ್ಡಾಯ್ತೆಲಿಂ."
ತಶೆಂ ತೆಂ ಸಕಾಳಿಂಚಿ ನೋವ್ ವೊರಾಂ ವ್ಹಾಜ್ತಾನಾ ಮೆಲ್ವಿನಾಗೆರ್ ಗೆಲೆಂ. ಮೆಲ್ವಿನಾಚ್ಯಾ ಘರಾ ಸಿಂತಿನ್ ವೆಚೆಂ ಬಾರಿಚ್ ಆಪ್ರೂಪ್. ತೆಂಚ್ ನಹಿಂ, ಮನ್ವೆಲಾಬ್ ಸುಧಾಂ ಗರ್ಜೆಂ ಭಾಯ್ರ್ ವಕ್ಲಾಂಚ್ಯಾ ಘರಾ ಬಿಲ್ಕುಲ್ ವೆಚೊ ಮನಿಸ್ ನ್ಹಂಯ್. ತಶೆಂ ವೆಚೆಂ ವ್ಹಡ್ಪಣಾಕ್ ಉಣೆಂ ಮ್ಹಣ್ ಸಬಾರ್ ಗ್ರೇಸ್ತಾಂಚಿ ಆಲೋಚನ್ ಆಸ್ತಾ. ತಸಲೆ ಗ್ರೇಸ್ತ್ ಮೊರೊನ್ ದೆವಾ ಮುಖಾರ್ ಝಡ್ತೆಕ್ ವೆತಾನಾ, ತಾಂಚಿಂ ಸೈರಿಂ ತಾಂಕಂ ದುಡು ಆನಿಂ ಆಸ್ತ್ ಕಿತ್ಯಾಕ್ ಬಾಂದುನ್ ದೀಂವ್ಕ್ ಸಕಾನಾಂತ್ ತೆಂ ದೇವ್ಚ್ ಜಾಣಾ.
ಅಪ್ರೂಪ್ ಆಯಿಲ್ಲ್ಯಾ ಸಿಂತಿಕ್ ಪಳೆವ್ನ್ ವಿಜ್ಮಿತ್ ಜಾವ್ನ್ ಮ್ಹಣಾಲಿ ಜಿಲ್ಲಿಬಾಯ್. "ಓ......ಯೆ ಸಿಂತಿ. ಕಿತೆಂ ಅಪ್ರೂಪ್ ಆಯ್ಲೆಂಯ್?"
ತೆಂ ಸುಂದರ್ ಹಾಸೊ ಹಾಸ್ಲೆಂ ಅನಿಂ ಚೆಡ್ವಾಂಕ್ ಜೊಕ್ತ್ಯಾ ಶೇಲ್ಯಾಂನಿ ಸಾಂಗಾಲಾಗ್ಲೆಂ - "ಆಶೆಂಚ್ ಆಯ್ಲಿಂ ಆಂಟಿ. ಫಾಲ್ಯಾಂ ಕ್ಲಾಸ್ ಸುರು ನಹಿಂವೆ? ಮ್ಹಾಕಾ ಏಕ್ ಮೆಲ್ವಿನಾಚೊ ಬೂಕ್ ಪಳೆಂವ್ಕ್ ಜಾಯ್ ಆಸ್ಲ್ಲೊ."
ಮೆಲ್ವಿನ್ ಮತಿಚಿ ಬೆಜಾರಾಯ್ ಕಾಡುಂಕ್ ನ್ಹಾಂವ್ಚಿ ತಯಾರಾಯ್ ಕರ್ತಾಲೊ. ಆಫ್ಲ್ಯಾ ಕುಡಾಂತ್ ಆಸ್ಲೆಲ್ಯಾ ತಾಕಾ ಸಿಂತಿಚಿಂ ಉತ್ರಾಂ ಆಯ್ಕಾಲಿಂ.
"ಮೆಲ್ವಿನಾ, ಆಳೆ ಸಿಂತಿ ಆಯ್ಲಾಂ. ತುಜೊ ಏಕ್ ಬೂಕ್ ಜಾಯ್ ಖಂಯ್ ತಾಕಾ" ಜಿಲ್ಲಿಬಾಯ್ ಸಾಂಗಾಲಾಗ್ಲಿ.
"ಯೆ.....ಸಿಂತಿ" ತೊ ಹಾಸೊನ್ ಮ್ಹಣಾಲೊ. ಸಿಂತಿಕ್ ಕೆದಾಳಾಚ್ ಪಡಾನಾತ್ಲ್ಲಿ ಬುಕಾಚಿ ಗರ್ಜ್ ಆಜ್ ಕಿತೆಂ ಪಡ್ಲಿಗಾಯ್ ಮ್ಹಣ್ ತೊ ನಿಯಾಳ್ತಾಲೊ.
ಸಿಂತಿ ಸೊಪ್ಯಾಚಿಂ ಮೆಟಾಂ ವಯ್ರ್ ಚಡ್ಲೆಂ, ತೊಂಡಾರ್ ತೊಚ್ ಅಮ್ರುಕೊ ಹಾಸೊ ಫಾಂಕೊವ್ನ್.
"ಯೆ, ಮ್ಹಜ್ಯಾ ರೂಮಾಕ್ ಯೆ. ಕಸಲೊ ಬೂಕ್ ಜಾಯ್ ತುಕಾ?" ಮೆಲ್ವಿನಾನ್ ವಿಚಾರ್ಲೆಂ.
"ಇಕೊನೊಮಿಕ್ಸ್..." ಆಶೆಂ ಮ್ಹಣೊನ್ ತೆಂ ಮೆಲ್ವಿನಾಚ್ಯಾ ಕುಡಾಂತ್ ಪ್ರವೇಶ್ ಜಾಲೆಂ.
"ತುಂ ಸಾಯನ್ಸ್ ಸ್ಟೂಡೆಂಟ್....ಇಕೊನೊಮಿಕ್ಸಾಚಿ ಗರ್ಜ್ ಕಿತೆಂ ಪಡ್ಲಿ ತುಕಾ?" ತಾಣೆಂ ವ್ಹಳೂ ವಿಚಾರ್ಲೆಂ.
ಸಿಂತಿ ಏಕ್ ಕ್ಷಣ್ ವೊಗೆಂ ರಾವೊನ್ ಉಲೈಲೆಂ - "ಬೂಕಾಚಿ ಮ್ಹಾಕಾ ಗರ್ಜ್ ನಾ ಮೆಲ್ವಿನ್. ಕಾಲ್ ಹಾಂವೆಂ ಉಲೈಲ್ಲ್ಯಾ ಉತ್ರಾಂಕ್ ಮ್ಹಾಕಾ ಮಾಫ್ ಕರ್."
"ಓ.....ತಿ ಕಸಲಿ ವ್ಹಡ್ಲಿ ಗಜಾಲ್? ಮ್ಹಾಕಾ ತ್ಯಾ ವಿಷ್ಯಾಂತ್ ಬೆಜಾರ್ಚ್ ನಾ" ಮೆಲ್ವಿನಾಕ್ ಸಿಂತಿಚಿ ಉತ್ರಾಂ ಆಯ್ಕೊನ್ ವಿಜ್ಮಿತ್ಚ್ ಜಾಲ್ಲೆಂ.
"ತುಜೆಲಾಗಿಂ ಮಸ್ತ್ ಬೂಕ್ ಆಸಾತ್. ಲೈಬ್ರೆರಿಯಿ ವಾಚ್ತಾಯ್ಗಿ ಕಿತೆಂ ?" ಬೂಕ್ ಶೆಲ್ಪಾಂತ್ಲೊ ಏಕ್ ಬೂಕ್ ಕಾಡ್ನ್ ಸಿಂತಿ ಮ್ಹಣಾಲೆಂ.
"ಹಾ, ವೇಳ್ ಪಾಶಾರ್ ಕರುಂಕ್ ಬರೆಂ ಸಾಧನ್ ತೆಂ" ಹಾಸ್ಲೊ ಮೆಲ್ವಿನ್, "ಸಿಂತಿ ಏಕ್ ಘಡಿ ಮ್ಹಾಕಾ ಮಾಫ್ ಕರ್. ಹಾಂವ್ ನ್ಹಾಂವ್ಕ್ ಭಾಯ್ರ್ ಸರ್ಲ್ಲೊಂ. ತುಕಾ ವೇಳ್ ಜಾಯಾ ಜಾಲ್ಯಾರ್ ಚಿಕ್ಕೆ ಬಸ್ ಆನಿಂ ಬೂಕ್ ವಾಚ್"
"ಮ್ಹಾಕಾ ವೇಳ್ ಜಾಯ್ನಾ. ನ್ಹಾವ್ನ್ ಯೆ ತುಂ" ತ್ಯಾಚ್ ಸಂದರ್ಭಾರ್ ರಾಕ್ತೆಲ್ಯಾ ಸಿಂತಿನ್ ಮ್ಹಳೆಂ.
ಮೆಲ್ವಿನ್ ತುವಾಲೊ ಘೆವ್ನ್ ನ್ಹಾಣಿಯೆಕ್ ಚಲ್ಲೊ. ತೊ ದೊಳ್ಯಾಂ ಭಾಯ್ರ್ ಗೆಲ್ಲೊಚ್ ಸಿಂತಿನ್ ಭಾಯ್ರ್ ಕೊಣಾಚಿಯಿ ಝಳಕ್ ದಿಸ್ತಾಗಿ ಪಳೆಲೆಂ. ಕೊಣೀ ದಿಸೊಂಕ್ನಾಂತ್. ಮಾಜ್ರಾಬರಿ ತೆಂ ಮೆಲ್ವಿನಾಚೆ ಬೂಕ್ ಸೊಡವ್ನ್ ಕಿತೆಂಗಿ ಸೊಧುಂಕ್ಲಾಗ್ಲೆಂ. ತಾಣೆಂ ಆಶೆಲ್ಲಿ ವಸ್ತ್ ಮೆಳ್ಳಿನಾ. ಸರಾರಾಂ ತಾಣೆಂ ಮೆಜಾಚೆಂ ಗೊವೆತ್ ಉಗ್ತೆಂ ಕೆಲೆಂ......ತಾಂತುಯಿ ಚ್ಯಾರ್ ಲ್ಹಾನ್ ಬೂಕ್ ದಿಸ್ಲೆ. ಮೆಲ್ವಿನಾಚಿಂ ಪತ್ರಾಂ, ಥೊಡ್ಯೊ ಲ್ಹಾನ್ ವಸ್ತು ಇತ್ಯಾದಿ ಆಸ್ಲ್ಲ್ಯೊ. ಆಪ್ಣಾಕ್ ಜಾಯ್ ತಿ ವಸ್ತ್ ದಿಸೊಂಕ್ ನಾ. ತರೀ ಸಿಂತಿ ನಿರಾಶಿ ಜಾಲೆಂನಾ.....ಆಖ್ರೇಕ್ ತಾಣೆಂ ಗೊವೆಂತಾಂತ್ಲೊ ಏಕ್ ಲ್ಹಾನ್ ಕಂರ್ಡೊಭಾಯ್ರ್ ಕಾಡ್ಲೊ ಆನಿಂ ಉಗಡ್ಲೊ. ಆತಾಂ ತೆಂ ಸಂತೊಸಾನ್ ಹಾಸ್ಲೆಂ. ಸಿಂತಿನ್ ಆಪೇಕ್ಶಿಲ್ಲಿ ವಸ್ತ್ ದಿಸ್ಲಿ. ಕ್ಷಣಾ ಬಿತರ್ ಮೆಲ್ವಿನಾಚಿ ತಸ್ವೀರ್ ತಾಣೆಂ ಉಕೊಲ್ಲಿ ಆನಿಂ ಆಪ್ಲ್ಯಾ ಬ್ಲಾವ್ಜಾ ಬಿತರ್ ಲಿಪೈಲಿ.
ತಾಣೆಂ ಗೊವೆತ್ ಬಿತರ್ ಲೊಟ್ತಾನಾಂಚ್ ಕೊಣ್ಗಿ ಚಲೊನ್ ಯೆಂವ್ಚೊ ಆವಾಜ್ ಜಾಲೊ. ಪಾಟಾಪಾಟ್ ಜಿಲ್ಲಿಬಾಯ್ ಹಾತಾಂತ್ ಕಾಫಿಯೆಚೊ ಗ್ಲಾಸ್ ಘೆವ್ನ್ ಕುಡಾ ಬಿತರ್ ಸರ್ಲಿ.
"ಕಾಫಿ ಮ್ಹಾಕಾ ನಾಕಾ ಆಸ್ಲ್ಲಿ ಆಂಟಿ. ಆತ್ತಾಂ ಪಿಯೆವ್ನ್ ಆಯಿಲ್ಲಿಂ ಮಾತ್ರ್" ಸಿಂತಿನ್ ಮ್ಹಳೆಂ.
"ಓ....ಪಿಯೆಲ್ಯಾರ್ ಕಿತೆಂ ಜಾಲೆಂ? ಏಕ್ ಗ್ಲಾಸ್ ಚಡಿತ್, ಜೀವಾಕ್ ಕಾಂಯ್ ಬಾಧಕ್ ಹಾಡಿನಾ" ಜಿಲ್ಲಿಬಾಯೆನ್ ಮ್ಹಳೆಂ. "ಹೆಂ ಮೆಲ್ವಿನಾಚೆ ಬೂಕ್ ಪಳೆತಾಲೆಂಯ್ಗಿ ಕಿತೆಂ"
ಕಾಲುಬುಲೆಂ ಜಾವ್ನ್ ಸಿಂತಿನ್ ಸಾಂಗ್ಲೆಂ - "ನಾ.....ಮ್ಹಾಕಾ ಏಕ್ ಬೂಕ್ ಜಾಯ್ ಆಸ್ಲ್ಲೊ"
"ಸೊದ್.....ಸಿಂತಿ" ತಿಣೆಂ ಮ್ಹಳೆಂ. ಬೂಕ್ ಸೊದ್ಲ್ಯಾರ್ ಮೆಲ್ವಿನ್ ಕಾಂಯ್ ಮ್ಹಣ್ಚೊ ನಾ. ಬರೆ ಹಾಂವೆಂ ಮಾತ್ರ್ ಕಾಂಯ್ ತಾಚ್ಯಾ ಕುಡಾಂತ್ ವೊತ್ತಾರೆ ಕೆಲ್ಯಾರ್ ಮಾಂಡಾವಳ್ ಪಾಡ್ ಕೆಲಿ ಮ್ಹಣ್ ತೊ ಬೊಬೊ ಮಾರ್ತಾಂ"
ಸಿಂತಿ ಹಾಸ್ಲೆಂ. ತಾಣೆಂ ಕಾಫಿಯೆಚೊ ಗ್ಲಾಸ್ ಖಾಲಿ ಕರ್ತಚ್ ತೊ ಘೆವ್ನ್, ಜಿಲ್ಲಿಬಾಯ್ ಬಿತರ್ ಗೆಲಿ. ಸಿಂತಿ ಏಕ್ ಘಡಿ ಬೂಕ್ ಪಳೆಲ್ಲ್ಯಾಬರಿ ಕರುಂಕ್ಲಾಗ್ಲೆಂ. ತಿತ್ಲ್ಯಾರ್ ಮೆಲ್ವಿನ್ ಆಯ್ಲೊ.
"ಬರೆಂ ಮೆಲ್ವಿನ್, ಹಾಂವ್ ವೆತಾಂ ತರ್...." ತೆಂ ಉಟ್ಲೆಂ.
"ಆಯ್ಲೆಂಯ್ ಕಿತೆಂ, ಧಾಂವ್ತಾಯ್ ಕಿತ್ಯಾಕ್?" ಹಾಸೊನ್ ತಾಣೆಂ ವಿಚಾರ್ಲೆಂ.
"ನಾ, ಫಾಲ್ಯಾಂ ಕ್ಲಾಸ್ ಸುರು ನಹಿಂಗಿ-ಬಾ? ಮಸ್ತ್ ಕಾಮ್ ಆಸಾ" ಆಶೆಂ ಸಾಂಗೊನ್ ತೆಂ ಚಲ್ಲೆಂ.
ಆಪ್ಣಾಚಿ ತಸ್ವೀರ್ ಸಿಂತಿನ್ ಕಾಡ್ಲ್ಲಿ ತಿ ಮೆಲ್ವಿನಾಕ್ ಸಂಶಯ್ ಯೇಂವ್ಕ್ ಕಾರಣ್ಂಚ್ ನಾತ್ಲ್ಲೆಂ. ತ್ಯಾ ತಸ್ವೀರೆಚಿ ಗರ್ಜ್ಯಿ ತಾಕಾ ನಾತ್ಲ್ಲಿ. ಮೆಟ್ರಿಕಾಂತ್ ತೊ ಶಿಕ್ತಾನಾ, ಏಕ್ ದೀಸ್ ದರ್ಯಾದೆಗೆರ್ ಪಿಕ್ನಿಕಾಕ್ ಗೆಲ್ಲ್ಯಾ ವೆಳಾರ್ ತಾಚ್ಯಾ ಇಷ್ಟಾನ್ ಕಾಡ್ಲ್ಲಿ ತಸ್ವೀರ್ ತಿ. ತಾಚ್ಯಾ ವಿಶ್ಯಾಂತ್ ತೊ ಎದೊಳ್ಚ್ ವಿಸರ್ಲ್ಲೊ. ಸಿಂತಿ ಮೆಲ್ವಿನಾಚಿ ಪೊಟೊ ಆಸಾ ಮ್ಹಳ್ಳೆಂ ನೆಣಾಸ್ಲ್ಲೆಂ. ’ಮೆಳ್ಳ್ಯಾರ್ ಅಂಬೊ, ಗೆಲ್ಯಾರ್ ಫಾತೊರ್’ ಮ್ಹಣ್ ತಾಣೆಂ ಪ್ರಯತ್ನ್ ಕೆಲ್ಲೆಂ ಆನಿಂ ತೆಂ ಸುಫಳ್ ಜಾಲೆಂ. ತ್ಯಾ ತಸ್ವೀರೆ ವರ್ವಿಂ ಮುಖಾರ್ ಲಾನ್ಶಾ ಗೊಂದೊಳಾಕ್ ಆಪುಣ್ ಕಾರಣ್ ಜಾತಾಂ ಮ್ಹಣ್ ಮೆಲ್ವಿನ್ ಸ್ವಪ್ಣಾಂತ್ಯಿ ನೆಣಾಸ್ಲ್ಲೊ.
ನ್ಹಾವ್ನ್ ಆಯಿಲ್ಲೊ ಮೆಲ್ವಿನ್ ಮುಸ್ತಾಯ್ಕಿ ನ್ಹೆಸ್ತಾನಾ ಶಿಲೊಣ್ಯೊ ಘಾಲ್ತಾಲೊ. ಸಿಂತಿನ್ ಅನ್ಯೇಕ್ ಅನ್ವಾರ್ ನಿವಾರ್ಲೆಂ ಮ್ಹಣ್ ತೊ ಖುಶ್ ಪಾವ್ಲೊ. ಗರ್ಜ್ ನಾಸ್ತಾಂ, ತಾಚೊ ದ್ವೇಷ್ ಜೊಡುಂಕ್ ತೊ ತಯಾರ್ ನಾತ್ಲ್ಲೊ ಆತಾಂ ಪರ್ತುನ್ ತೆಂ ಜಾವ್ನ್ ಆಯಿಲ್ಲೆಂ ಆನಿಂ ಎಕಾ ವೆಳಾರ್ ವಾಂಕ್ಡಿ ಜಾಂವ್ಕ್ ಆಸ್ಲ್ಲಿಂ ಮನಾಂ ಸಾರ್ಕಿಂ ಕರ್ನ್ ಗೆಲ್ಲೆಂ.
ಮೆಲ್ವಿನಾಕ್ಯಿ ಫಾಲ್ಯಾಂ ಕ್ಲಾಸ್ ಪ್ರಾರಂಭ್. ರಜೆಚೆ ದೀಸ್ ತುರ್ತಾನ್ ಧಾಂವ್ಲ್ಲೆ ಆನಿಂ ಜಾಯ್ತಿಂ ಘಡಿತಾಂಯಿ ಘಡೊನ್ ಗೆಲ್ಲಿಂ. ಸಕ್ಡಾಂಪ್ರಾಸ್ ಚಡ್ ಜೆಸ್ಸಿಚೊ ಮೋಗ್ ಜೊಡ್ಲ್ಲೆಂ, ತಾಚ್ಯಾ ವಾಂಟ್ಯಾಕ್ ವ್ಹೊಡ್ಲೆಂ ಭಾಗ್. ಪುಣ್ ತೊ ಸಂತೊಸ್ - ಜೆಸ್ಸಿಕ್ ಸದಾಂಚ್ ಪಳೆಂವ್ಚೆಂ ಭಾಗ್ ಚಡ್ ಕಾಳ್ ನಾ. ಜೆಸ್ಸಿಯಿ ಫಾಲ್ಯಾಂ ಕಾರ್ಕಳಾಕ್ ವೆತಾ. ಮೆಲ್ವಿನಾಕ್ ಕಠಿಣ್ ಬೆಜಾರಾಯ್ ಜಾಲ್ಲಿ.
ಧಾ ವೊರಾಂ ಜಾತಾನಾ ತೊ ಜೆಸ್ಸಿಗೆರ್ ಗೆಲೊ. ತೆಂ ಮೆಲ್ವಿನಾಚ್ಯಾ ಯೆಣ್ಯಾಕ್ಚ್ ರಾಕೊನ್ ರಾವ್ಲ್ಲೆಂ. ದೊಗಾಂಯ್ ಮಸ್ತ್ ಉಲೈಲಿಂ. ಮಾಗ್ಗಿಬಾಯೆಚ್ಯಾ ಆನಿಂ ಜೆಸ್ಸಿಚ್ಯಾ ವತ್ತಾಯೆಕ್ ತೊ ದನ್ಪರಾಂ ಜೆವ್ಣಕ್ ತಾಂಗೆರ್ಚ್ ರಾವ್ಲೊ.
ಸಾಂಜೆರ್ ತಿಂ ಸುಲ್ತಾನ್ ಬತ್ತೇರಿಕ್ ಗೆಲಿಂ ಆನಿಂ ನ್ಹಂಯ್ಕ್ ಫುಡ್ ಕರ್ನ್ ಬಸ್ಲಿಂ. ತತ್ಕಾಲಾಕ್ ನಿಮಾಣಿ ಜಾವ್ನಾಸ್ಲ್ಲಿ ತಾಣಿ ಸಾಂಗಾತಾ ಮೆಳ್ಚಿ ತಿ ಸಾಂಜ್. ದೊಗಾಂಯ್ಚಿಂ ಕಾಳ್ಜಾಂ ಭಾರಾಧಿಕ್ ಜಾಲ್ಲಿಂ. ಸಬಾರ್ ವೇಳ್ ಉಲಂವ್ಕ್ ತಾಂಕಾಂ ಜಾಲೆಂನಾ. ನಿಮಾಣೆಂ ಕಠೋರ್ ತಿ ಶಾಂತಿ ಮೋಡ್ನ್ ಜೆಸ್ಸಿ ಸಾಂಗಾಲಾಗ್ಲೆಂ - "ಖಂತ್ ಕರ್ನಾಕಾ ಮೆಲ್ವಿನ್, ಹಾಂವ್ ಫಾಲ್ಯಾಂ ವೆತಾಂ ಖರೆಂ. ಪುಣ್ ಸಾಂಗಾಂತಾ ತುಜೊ ನಿತಳ್ ಮೋಗ್ ಘೆವ್ನ್ ಚಲ್ತಾಂ"
"ಜೆಸ್ಸಿ, ತಾಕಾ ಆನಿಂ ತೀನ್ ಮಹಿನೆ ಪಳೆನಾಸ್ತಾಂ ಹಾಂವೆಂ ರಾಂವ್ಚೆಂ ಕಶೆಂ? ಮ್ಹಾಕಾ ಕಠಿಣ್ ಬೆಜಾರಾಯ್ ಬೊಗ್ತೆಲಿ’ ತೊ ಉಲೈಲೊ.
ತೀನ್ ಮಹಿನೆ ಕಿತ್ಯಾಕ್ ಮೆಲ್ವಿನ್? ಹಾಂವ್ ತವಳ್ ತವಳ್ ಮಂಗ್ಳೂರ್ ಯೆತೆಲಿಂ. ಶಿವಾಯ್ ಜನವರಿಚ್ಯಾ ಅಖ್ರೇಕ್ ಕಾರ್ಕಳ್ಚೆಂ ಫೆಸ್ತ್. ತುಂ ಕಾರ್ಕಳ್ ಯೆ"
"ಜಾಯ್ತ್. ಜೆಸ್ಸಿ ಮ್ಹಜೊ ಉಡಾಸ್ ಕೆದಿಂಚ್ ವಿಸರ್ನಾಕಾ. ತುಂ ಮ್ಹಜೆ ಥಾವ್ನ್ ಪಯ್ಸ್ ಆಸ್ಲ್ಯಾರಿ, ಮ್ಹಜೆಂ ಕಾಳಿಜ್ ತುಜೆ ಸಾಂಗಾತಾ ಆಸಾ ಮ್ಹಣ್ ಚಿಂತ್. ಹಾಂವ್ ತುಜ್ಯಾ ಮೊಗಾಚ್ಯಾ ಮಧುರ್ ಉಗ್ಡಾಸಾಂತ್ ದಿಸಾಚಿ ಹರ್ಯೇಕ್ ಘಡಿ ಸಾರ್ತಾಂ"
ಜೆಸ್ಸಿ ಏಕ್ ಮಿನುಟ್ ವೊಗೆಂ ರಾವೊನ್ ಮ್ಹಣಾಲೆಂ - "ಮೆಲ್ವಿನ್, ಹಾಂವ್ ತುಕಾ ಮ್ಹಜ್ಯಾ ಇಸ್ಕೊಲಾಕ್ ಎಡ್ರೆಸ್ ದಿತಾಂ. ತುಂ ಮ್ಹಾಕಾ ಕಾಗ್ದಾಂ ಬರೈತ್ ರಾವ್. ಆನಿಂ ತುಜೊ ಎಡ್ರೆಸ್ಯಿ ಮ್ಹಾಕಾ ದಿ"
ಮೆಲ್ವಿನಾನ್ ಜೆಸ್ಸಿಚೊ ಎಡ್ರೆಸ್ ಘೆತ್ಲೊ ಆನಿಂ ಆಪ್ಲ್ಯಾ ಕೊಲೆಜಿಚೊ ವಿಳಾಸ್ಯಿ ದಿಲೊ.
"ಹಾಂವ್ ನಾ ಮ್ಹಣ್ ತುಂ ಆಮ್ಗೆರ್ ವೊಚಾನಾಸ್ತಾಂ ರಾವಾನಾಕಾ ಹಾಂ. ಮ್ಹಜಿ ಮಾಂಯ್ ಪಿಡೇಸ್ತ್. ವ್ಹಡ್ಲಿಮಾಂಯ್ ಮ್ಹಾತಾರಿ ಜಾವ್ನ್ ಆಯ್ಲ್ಯಾ. ತಾಂಕಾಂ ಖಂಯ್ಚಾಯಿ ಗರ್ಜೆ ಅಕಾಂತಾಂಕ್ ತುಜ್ಯಾ ಅಧಾರಾಚಿ ಗರ್ಜ್ ಆಸಾ. ಆನಿಂ ಕಾಂಯ್ ಚಡ್ ಉಣೆಂ ಜಾಲ್ಯಾರ್ ಮ್ಹಾಕಾ ದಯಾ ಕರ್ನ್ ಬರಯ್ ಮೆಲ್ವಿನ್"
"ತುವೆಂ ಸಾಂಗ್ಲ್ಲ್ಯಾಬರಿಚ್ ಚಲ್ತಾಂ. ತುಂ ಫಿಕಿರ್ ಕರಿನಾಕಾ" ಮೆಲ್ವಿನಾನ್ ಜಾಪಿ ದಿಲಿ.
"ಅನ್ಯೇಕ್ ಸಂಗತ್ ಆಸಾ. ಮ್ಹಜ್ಯಾ ಉಗ್ಡಾಸಾಂತ್ ತುಜೊ ಚಡಿತ್ ವೇಳ್ ಪಾಡ್ ಕರ್ನಾಕಾ. ಹಾಂವೆಂ ತುಕಾ ಬೂದ್ ಸಾಂಗ್ಚಿಂ ನ್ಹಂಯ್. ಪುಣ್ ತುಂ ಬೆಜಾರಾಯ್ ಕರ್ಚೊನಾಂಯ್ ಜಾಲ್ಯಾರ್ ಸಾಂಗ್ತಾಂ - ತುಜೆಂ ಶಿಕಾಪ್ ಬರ್ಯಾ ಥರಾನ್ ಶಿಕ್. ತುವೆಂ ಫಸ್ಟ್ ಕ್ಲಾಸ್ ಪಾಸ್ ಜಾಯ್ಜಾಯ್ ಮೆಲ್ವಿನ್. ತುಜ್ಯಾ ಖಾತಿರ್ ಸದಾಂಚ್ ದೆವಾಲಾಗಿಂ ಹಾಂವ್ ಮಾಗ್ತಾಂ" ತೆಂ ಮ್ಹಣಾಲೆಂ ದೆಂವ್ಚಿಂ ದುಃಖಾಂ ಪುಸುನ್.
ಮೆಲ್ವಿನಾಚೆ ದೊಳೆಯಿ ಬಿಜೊನ್ ಆಯ್ಲೆ. ಸಬಾರ್ ವೇಳ್ ತೊ ವೊಗೊಚ್ ರಾವ್ಲೊ. "ಫಾಲ್ಯಾಂ ಕಿತ್ಲ್ಯಾ ವೊರಾಂಚೆರ್ ತುಂ ವೆತಾಯ್ ಜೆಸ್ಸಿ?" ವಿಚಾರ್ಲೆಂ ತಾಣೆಂ ನಿಮಾಣೆಂ
"ಸಕಾಳಿಂ ಸಾತ್ ವೊರಾಂಚ್ಯಾ ಬಸ್ಸಾರ್"
"ಹಾಂವ್ ತುಕಾ ಹಂಪನ್ಕಟ್ಟಾ ಮ್ಹಣಾಸರ್ ಪಾಂವ್ಕ್ ಯೆತಾಂ ಜೆಸ್ಸಿ"
"ತುಕಾ ಬೆಷ್ಟೆಂಚ್ ತೊಂದ್ರೆ ಜಾತೆಲೆ. ಫಾಲ್ಯಾಂ ಕ್ಲಾಸ್ ಆರಂಭ್ ಜಾತಾಮೂ? ತುಕಾ ಕ್ಲಾಸಿಕ್ ವೇಳ್ ಜಾಲ್ಯಾರ್.."
"ನಾ ಜೆಸ್ಸಿ. ತುಂ ಕಾಂಯ್ ಬಿಯೆನಾಕಾ. ಹಾಂವ್ ಸಕಾಳಿಂ ಸ ವ್ಹಾಜ್ತಾನಾ ಮಾರ್ಕೆಟಿ ಲಾಗಿಂ ಬಸ್ಸ್ ಸ್ಟೆಡಾಂತ್ ಮೆಳ್ತಾಂ"
"ಜಾಯ್ತ್ ತರ್. ಕಾಳೊಕ್ ಜಾವ್ನ್ ಆಯ್ಲೊ ಮೆಲ್ವಿನ್. ಅನಿಕೀ ಸಬಾರ್ ಕಾಮಾಂ ಹಾಂವೆಂ ತಿರ್ಸುಂಕ್ ಬಾಕಿ ಉರ್ಲ್ಯಾಂತ್. ಆಮಿಂ ಘರಾ ಯಾಗಿ?"
"ಚಲ್ಯಾಂ ಜೆಸ್ಸಿ" ಪುರಾಸಾಣ್ ಜಾಲ್ಲ್ಯಾಬರಿ ಉಲೊವ್ನ್ ತೊ ಉಟ್ಲೊ. ಜೆಸ್ಸಿಚ್ಯಾ ಘರಾ ಲಾಗಿಂ ತಾಕಾ ಗುಡ್ನಾಯ್ಟ್ ಮಾಗ್ತಚ್ ತೊ ಘರಾ ಗೆಲೊ.
ಜೆಸ್ಸಿಚ್ಯಾಚ್ ಚಿಂತ್ನಾಂನಿ ಸಬಾರ್ ವೇಳ್ ತಾಕ್ ನೀದ್ ಪಡೊಂಕ್ ನಾ. ಏಖ್ಚ್ ಜೆಸ್ಸಿಕ್ ಪಳೆನಾಸ್ತಾಂ ರಾಂವ್ಚಿಂ ಖಂತ್ ತಾಕಾ ದೊಸ್ತಾಲಿ. ಫಾಂತ್ಯಾರ್ ಪಾಂಚ್ ವೊರಾಂಚಿ ಘಾಂಟ್ ಜಾತಾನಾ ತೊ ಹಾಂತುಳ್ಣಾ ವಯ್ಲೊ ಉಟ್ಲೊ. ತೊಂಡ್ಬಿ ಧುವ್ನ್ ಯೆತಾನಾ, ಜಿಲ್ಲಿಬಾಯೆಕ್ಯಿ ಜಾಗ್ ಜಾಲ್ಲಿ.
"ಇತ್ಲ್ಯಾ ವೆಗ್ಗಿಂ ಕಿತೆಂ ಉಟ್ಲೊಯ್ರೆ?" ತಿಣೆಂ ವಿಚಾರ್ಲೆಂ.
"ಆಜ್ ಕ್ಲಾಸ್ ಸುರು ನಹಿಂವೆ? ಮಾಂಯ್? ಮಿಸಾಕ್ ವಚೊನ್ ಯೆತಾಂ"
"ಹಾಂ ವೊಚ್. ಖಂಯ್ಚ್ಯಾ ದೆವಾನ್ ಹಿ ಬರಿ ಬೂದ್ ತುಕಾ ದಿಲಿಂಗಿ? ಆಶೆಂಚ್ ಮಾಂದ್ರೆರ್ ಸಾತ್ ವೊರಾಂ ಮ್ಹಣಾಸರ್ ಲೊಳ್ಚ್ಯಾ ಬದ್ಲಾಕ್ ತುಕಾ ಸದಾಂಚ್ ಮಿಸಾಕ್ ವಚೊನ್ ಆಯ್ಲ್ಯಾರ್ ಕಿತ್ಲೆಂ ಬರೆಂ ನಹಿಂಗಿ? ಮಿಸಾಚೆಂ ಮೊಲ್ ತುಮಿಂ ನೆಣಾಂತ್ ಪುತಾ" ಸಾಂಗಾಲಾಗ್ಲಿ ಜಿಲ್ಲಿಬಾಯ್.
ಪುತಾನ್ ಜೆಸ್ಸಿ ಸಾಂಗಾತಾ ಹಂಪನ್ಕಟ್ಟಾ ವಚೊಂಕ್ ಕೆಲ್ಲಿ ಆಲೋಚನ್ ತಿಕಾ ಕಳ್ಲ್ಲಿ ಜಾಲ್ಯಾರ್ ತಿ ಕಿತೆಂ ಮ್ಹಣ್ತಿಗಿ? ಪುಣ್ ಮಿಸಾಚ್ಯಾ ನಿಬಾನ್ ತಾಣೆಂ ಅವಯ್ಕ್ ಫಟೈಲೆಂ ಆನಿಂ ತಿ ಪಾತ್ಯೆಲಿ.
ಮೆಲ್ವಿನ್ ನ್ಹೆಸ್ಲೊ. ಮೀಸ್ ಆರಂಭ್ ಜಾಂವ್ಚಿ ಗಾಂಟ್ ವ್ಹಾಜ್ತಾನಾ ತೊ ಘರಾ ಭಾಯ್ರ್ ಪಡ್ಲೊ.
ಜ್ಯೋರಾನ್ ವಾರೆಂ ವ್ಹಾಳ್ತಾಲೆಂ ತ್ಯಾ ಸಕಾಳಿಂ. ಹಿಂವಾಳ್ ದೀಸ್. ದರ್ಯಾಕುಶಿ ಥಾವ್ನ್ ರಭಸಾನ್ ಯೆಂವ್ಚೆಂ ತೆಂ ವಾರೆಂ ಆಂಗ್ ಕಾಂಪೈತಾಲೆಂ. ಹರ್ಶೆಂ ಇತ್ಲ್ಯಾ ವೆಳಾರ್ ತೊ ನಿದೊನ್ ಆಸ್ತಾಲೊ. ಪುಣ್ ಆಜ್ ಜೆಸ್ಸಿಕ್ ಅದೇವ್ಸ್ ಮಾಗೊಂಕ್ ತೊ ವೆಗಿಂಚ್ ಉಟ್ಲ್ಲೊ.
ಉರ್ವಾ ಬಸ್ಸ್ ಸ್ಟೊಪಾಕ್ ಮೆಲ್ವಿನ್ ಪಾವ್ತಾನಾ ಮಸ್ಕ್ ಉಜ್ವಾಡ್ಲ್ಲೆಂ. ಪುಣ್ ರಸ್ತ್ಯಾಚೆ ವೀಜ್ ದಿವೆ ಪಾಲ್ವೊಂಕ್ ನಾತ್ಲ್ಲೆ. ಏಕ್ ಮಿನುಟ್ ಪಾಶಾರ್ ಜಾತನಾ ಜೆಸ್ಸಿ ಘರಾ ಭಾಯ್ರ್ ಯೆಂವ್ಚೆಂ ದಿಸ್ಲೆಂ. ಗೇಟಿಲಾಗಿಂ ಪರ್ಯಾಂತ್ ಮಾಗ್ಗಿಬಾಯ್ ತಾಕಾ ಪಾಂವ್ಕ್ ಆಯ್ಲಿ. ಕಿತೆಂಗಿ ತಿಂ ಉಲಂವ್ಚಿ ತಾಕಾ ಆಯ್ಕಾಲೆಂ. ಉಪ್ರಾಂತ್ ತಿ ಪಾಟಿಂ ಚಲ್ಲಿ. ಭಾರಾಧಿಕ್ ಮೆಟಾಂ ಕಾಡ್ನ್ ಜೆಸ್ಸಿ, ತೊ ರಾವೊನ್ ಅಸ್ಚೆ ಕಡೆ ಆಯ್ಲೆಂ.
"ಗುಡ್ ಮೊರ್ನಿಂಗ್ ಮೆಲ್ವಿನ್...." ತೆಂ ದುಃಖೇಸ್ತ್ ತಾಳ್ಯಾನ್ ಮ್ಹಣಾಲೆಂ.
"ಗುಡ್ ಮೋರ್ನಿಂಗ್..." ,ಮೆಲ್ವಿನ್ ಉಲೈಲೊ. "ಮಾಂಯ್ ಕಿತೆಂ ಮ್ಹಣ್ತಾಲಿ ಜೆಸ್ಸಿ?"
"ತಿ ಅಪುಣ್ಯಿ ಬಸ್ಸ್ ಯೆತಾ ಮ್ಹಣಾಸರ್ ಹಾಂಗಾ ರಾಖ್ತಾಂ ಮ್ಹಣ್ತಾಲಿ. ಹಾಂವೆಂ ತಿಕಾ ಪಾಟಿಂ ದಾಡ್ಲೆಂ. ತಿಕಾ ಚಿಕ್ಕೆ ತಾಪ್ಸೊ ಯೆತಾ.."
"ಓ....ತಶೆಂಗಿ?" ಸಾಂಗಾಲಾಗ್ಲೊ ತೊ. "ವಕಾತ್ ಆಜ್ ಹಾಡ್ನ್ ಯೆಂವ್ಚೆಂ ಬರೆಂ. ವೊರಾಂ ಕಿತ್ಲಿಂ ಜಾಲಿ ಜೆಸ್ಸಿ?"
ಹಾತ್ ವೊಚ್ಯಾಕ್ ದೀಷ್ಟ್ ಲಾವ್ನ್ ತೆಂ ಮ್ಹಣಾಲೆಂ - "ಸ ಜಾಂವ್ಕ್ ಧಾ ಮಿನುಟಾಂ ಉರ್ಲ್ಯಾಂತ್. ಮ್ಹಾಕಾ ತುಜಿ ಬಿರ್ಮೊತ್ ದಿಸ್ತಾ ಮೆಲ್ವಿನ್. ಕೊಲೆಜ್ ವಿದ್ಯಾರ್ಥಿಕ್ ತುಕಾ, ಏಕ್ ರಿಸ್ಟ್ ವೊಚ್ ಅಧಿಕ್ ಗರ್ಜೆಚೆಂ"
ಮೆಲ್ವಿನ್ ಹಾಸೊನ್ ಸಾಂಗಾಲಾಗ್ಲೊ - "ಸಕ್ಕಡ್ಯಿ ವೊಚಾಂ ಬಾಂದ್ತಿತ್ ಜಾಲ್ಯಾರ್ ತುಜ್ಯಾ ತಸಲ್ಯಾ ಸುಂದರ್ ಚಲಿಯೆಲಾಗಿಂ ವೊರಾಂ ವಿಚಾರುಂಕ್ ಭಾಗ್ ಖಂಯ್ ಮೆಳ್ತಾ ಜೆಸ್ಸಿ? ಮ್ಹಾಕಾ ವೊಚ್ ನಾಕಾಚ್"
ಹಂಪನ್ಕಟ್ಟಾ ವೆಚೆಂ ಬಸ್ಸ್ ಆಯಿಲ್ಲೆಂ. ತಿಂ ದೊಗಾಂಯ್ ಬಸ್ಸಾರ್ ಚಡೋನ್ ಬಸ್ಲಿಂ. ಥೊಡ್ಯಾಚ್ ವೆಳಾಬಿತರ್ ಬಸ್ಸ್ ಹಂಪನ್ಕಟ್ಟಾ ಪಾವ್ಲೆಂ.
ಜೆಸ್ಸಿನ್ ಕಾರ್ಕಳಾಕ್ ಟಿಕೆಟ್ ಘೆತ್ಲಿ. ಉಪ್ರಾಂತ್ ಮೆಲ್ವಿನಾ ಸರ್ಶಿಂ ಯೇವ್ನ್ ತೆಂ ಮ್ಹಭಾಲೆಂ. "ಬಸ್ಸ್ ಸುಟೊಂಕ್ ಅನಿಕೀ ಅರ್ಧೆಂ ವೊರ್ ಆಸಾ. ತ್ಯಾ ಮ್ಹಣಾಸರ್ ಅಮಿಂ ಕಿತೆಂ ಕರ್ಚೆಂ? ಕಾಫಿ ಪಿಯೆಂವ್ಕ್ ವೊಚ್ಯಾಂಗಿ?"
"ಕಾಫಿ....?" ಹಾಂಕ್ರೆಲೊ ತೊ. ತಸಲ್ಯಾಚ್ ಎಕಾ ಸಕಾಳಿಂ ಜೆಸ್ಸಿಕಡೆ ಆಪ್ಣೆ ವಿಚಾರ್ಲ್ಲ್ಯಾ ತ್ಯಾಚ್ ಸವಾಲಾಚೊ ಉಗ್ಡಾಸ್ ಆಯ್ಲೊ ಮೆಲ್ವಿನಾಕ್.
"ವ್ಹಯ್ ಮೆಲ್ವಿನ್. ತುಂ ಅಜ್ಯಾಪ್ ಪಾವ್ಲ್ಲೆಂ ಕಾರಣ್ ಮ್ಹಾಕಾ ಸುಸ್ತಾಲೆಂ. ತ್ಯಾ ಎಕಾ ದಿಸಾ, ಆಶೆಂಚ್ ಸಕಾಳಿಂಚ್ಯಾ ವೆಳಾರ್ ತುವೆಂ ಮ್ಹಾಕಾ ಕಾಫಿ ಪಿಯೆಂವ್ಕ್ ಆಪಯಿಲ್ಲೆಂ ಆನಿಂ ಹಾಂವೆಂ ನಿರಾಕರ್ಸಿಲ್ಲೆಂ. ಪುಣ್ ಆಜ್...... ಆಜ್ ಸಂದರ್ಭ್ ದುಸ್ರೊಚ್ ಮೆಲ್ವಿನ್. ತ್ಯಾ ದಿಸಾ ಆಮಿಂ ಎಕಾಮೆಕಾಕ್ ವಳ್ಕಾತೆಲ್ಯಾಂವ್ ತರೀ ಪರ್ಕಿ ಜಾವ್ನ್ ಆಸ್ಲ್ಲ್ಯಾಂವ್. ಆಜ್ ತೊ ಬೇಧ್ ನಾ.."
ಮೆಲ್ವಿನಾನ್ ದುಸ್ರೊ ಸಬ್ದ್ ಕಾಡುಂಕ್ ನಾ. ಸರ್ಶಿಲ್ಯಾ ಹೊಟೆಲಾಕ್ ವಚೊನ್ ಫೆಮಿಲಿ ರೂಮಾಂತ್ ತಿಂ ಬಸ್ಲಿಂ. ಮೆಲ್ವಿನಾನ್ ಕಾಫಿಯೆಕ್ ಓರ್ಡರ್ ದಿಲೆಂ.
ಜೆಸ್ಸಿ ಮೆಲ್ವಿನಾಚ್ಯಾ ತೊಂಡಾಕ್ಚ್ ಪಳೆತಾಲೆಂ. ತಾಚೆಂ ತೊಂಡ್ ಬಾವ್ಲ್ಲೆಂ ಆನಿಂ ದೊಳ್ಯಾಂಚ್ಯಾ ಕೊನ್ಶಾಂನಿ ದುಃಖಾಂ ಭಾಯ್ರ್ ತಿಳ್ತಾಲಿಂ. ಮೆಲ್ವಿನಾಚೆಂ ಕಾಳಿಜ್ಯಿ ಕಸ್ಸ್ ಜಾಲೆಂ. ತಾಚೆ ದೊಳೆಯಿ ಬಿಜ್ಲೆ. ದುಸ್ರ್ಯಾ ಕ್ಶಣಾ ಜೆಸ್ಸಿಚೊ ಹಾತ್ ತಾಣೆಂ ಆಪ್ಲ್ಯಾಂತ್ ಧರ್ಲೊ. ಜೆಸ್ಸಿನ್ ದೊಳೆ ದಾಂಪ್ಲ್ಲೆ. ದೊಗಾಂಯ್ಚಿಂ ಕಾಳ್ಜಾಂ ಜ್ಯೋರಾನ್ ಉಡ್ತಾಲಿಂ. ತಿತ್ಲ್ಯಾರ್ ವೇಯ್ಟರ್ ಕಾಫಿ ಹಾಡ್ನ್ ಪ್ರವೇಶ್ ಜಾಲೊ. ವೆವೆಗ್ಗಿಂ ಮೆಲ್ವಿನಾನ್ ತಾಚೊ ಹಾತ್ ಸೊಡ್ಲೊ.
ಕಾಫಿ ಹಾಡ್ನ್ ಥೊಡಿಂ ಮಿನುಟಾಂ ಪಾಶಾರ್ ಜಾಲ್ಯಾರ್ಯಿ ದೊಗಾಂಯ್ ತಿ ಪಿಯೆಂವ್ಚ್ಯಾ ಖಬ್ರೆರ್ ನಾತ್ಲ್ಲಿಂ. ನಿಮಾಣೆಂ ಜೆಸ್ಸಿ ಮ್ಹಣಾಲೆಂ- "ಕಾಫಿ ಪಿಯೆ ಮೆಲ್ವಿನ್, ನಿವೊನ್ ಆಯ್ಲಿ"
ಮೆಲ್ವಿನಾನ್ ಕಪ್ ಉಕೊಲ್ತಾನಾ ಜೆಸ್ಸಿ ಮ್ಹಣಾಲೆಂ " ತುಂ ಬೆಜಾರ್ ಪಾವಾನಾಂಯ್ ಜಾಲ್ಯಾರ್...."
ತೊಂಡಾಂತ್ಲೊ ಘೊಟ್ ಪುರ್ತೊ ಗಿಳುಂಕ್ ನಾ ಮೆಲ್ವಿನಾನ್. ತೊ ಶೆರ್ಮೆವ್ನ್ ಜೆಸ್ಸಿಕ್ಚ್ ಪಳೆಂವ್ಕ್ ಪಡ್ಲೊ. ತಾಣೆಂ ’ಪರ್ಸಾಂತ್ಲೆಂ’ ವೀಸ್ ರುಪಯ್ ಭಾಯ್ರ್ ಕಾಡ್ಲ್ಲೆ.
"ಧರ್ ಮೆಲ್ವಿನ್, ಪ್ಲೀಜ್...."
"ಜೆಸ್ಸಿ, ಹೆಂ ಕಿತೆಂ ಕರ್ತಾಯ್? ಮ್ಹಾಕಾ ಕಿತ್ಯಾಕ್ ಪಯ್ಶೆ?" ಅಜ್ಯಾಪೊನ್ ತಾಣೆಂ ವಿಚಾರ್ಲೆಂ.
"ತಶೆಂ ಮ್ಹಣಾನಾಕ್ ಮೆಲ್ವಿನ್....." ಪರಾತ್ತುಂಚ್ಯಾ ಸ್ವರಾನ್ ತೆಂ ಮ್ಹಣಾಲೆಂ. "ಮ್ಹಜೆ ಖಾತಿರ್ ತುಂ ಹೆಂ ನಿರಾಕರ್ಸಿನಾಕಾ. ಮೆಲ್ವಿನ್, ತುಂ ಕೊಲೆಜ್ ಸ್ಟೂಡೆಂಟ್. ಆನಿಂ ತ್ಯಾ ತೆಕಿತ್ ಚಲೊಂಕ್ ತುಮ್ಕಾಂ ಮಸ್ತ್ ಪಯ್ಶಾಂಚಿ ಗರ್ಜ್ ಆಸಾ. ಹಾಂವ್ ಜಾಣಾಂ ಮ್ಹಜೆಬರಿಚ್ ತುಂಯ್ ದುಬ್ಳೊ. ಘೆ ಮೆಲ್ವಿನ್, ತುಂ ಜೊಡಿಕ್ ಪಾವ್ಲ್ಯಾ ಉಪ್ರಾಂತ್ ಮ್ಹಾಕಾ ಪಾಟಿಂ ದಿ ಹೆ ಪಯ್ಶೆ" ಹಾಳ್ವಾಯೆಚ್ಯಾ ರಡ್ಣ್ಯಾ ಮಧೆಂ ತೆಂ ಉಲೈಲೆಂ.
ಮೆಲ್ವಿನ್ ತಕ್ಲಿ ಬಾಗಾವ್ನ್ ದುಳ್ದುಳ್ಯಾ ರಡ್ಲೊ. ತಾಣೆಂ ಜೆಸ್ಸಿಚ್ಯಾ ಒತ್ತಾಯೆಕ್ ಪಯ್ಶೆ ಸ್ವೀಕರ್ಸುಂಚೆಚ್ ಪಡ್ಲೆ.
"ಮೆಲ್ವಿನ್, ಮ್ಹಜೊ ಉಗ್ಡಾಸ್ ಕೆದಿಂಚ್ ವಿಸಾರ್ನಾಕಾ. ಹಾಂವ್ ದುಬ್ಳಿಂ ಮೆಲ್ವಿನ್. ಫಾಲ್ಯಾಂ ಸಕಾಳಿಂ ತುಂ ಶಿಕೊನ್ ವ್ಹಡ್ ಮನಿಸ್ ಜಾತಾನಾ ಮ್ಹಾಕಾ ತುಜ್ಯಾ ಸಮಾನ್ ಲೆಕಿನಾಕಾ, ಪುಣ್ ಚಾಕರ್ನಿಚೊ ಜಾಗೊ ದಿಲ್ಯಾರಿ ಹಾಂವ್ ಋಣಿ"
"ನಾ ಜೆಸ್ಸಿ, ಆಶೆಂ ಕಿತ್ಯಾಕ್ ಉಲೈತಾಯ್? ಹಾಂವ್ ತುಕಾ ಕೆದಿಂಚ್ ಸಾಂಡ್ಚೊಂನಾ. ಕೆದಿಂಚ್ ಸಾಂಡ್ಚೊಂನಾ. ಕೆದಿಂಚ್ ವಿಸರ್ಚೊಂನಾ ಮ್ಹಜ್ಯಾ ಮೊಗಾ..." ಉದ್ವೇಗಾನ್ ತೊ ಮ್ಹಣಾಲೊ.
ಆಫ್ಲಿಂ ದುಃಖಾಂ ತುವಾಲ್ಯಾನ್ ಪುಸುನ್ ತೆಂ ಉಲೈಲೆಂ - "ತುಕಾ ದೇವ್ ಬರೆಂ ಕರುಂ ಮೆಲ್ವಿನ್. ಆಮಿಂ ತರ್ ಚಲ್ಯಾಂಗಿ? ಬಸ್ಸಾಕ್ ವೇಳ್ ಜಾಲೊ. ಉಟ್ಯಾಂಗಿ?"
ದೊಗಾಂಯ್ ಭಾಯ್ರ್ ಆಯ್ಲಿಂ. ಜೆಸ್ಸಿನ್ ದಿಲ್ಲ್ಯಾ ಪಯ್ಶಾನಿಂಚ್ ತಾಣೆಂ ಹೊಟೆಲಾಚೆಂ ಬಿಲ್ಲ್ ಫಾರಿಕ್ ಕೆಲೆಂ.
ನಿಮಾಣೆಂ ಜೆಸ್ಸಿಕ್ ವರೊಂಕ್ ಆಸ್ಚೆಂ ಬಸ್ಸ್ ವೇಳ್ ಜಾಲೊ ಮ್ಹಣ್ ಘುರ್ಗುರೊಂಕ್ ಲಾಗ್ಲೆಂ. ಜೆಸ್ಸಿ ಬಸ್ಸಾರ್ ಚಡೊನ್ ಸಿಟಿಚ್ಯಾ ಪೊಂತಾರ್ ಬಸ್ಲೆಂ. "ಕಾಗಾದ್ ಬರೈತ್ತ್ ರಾವ್ ಮೆಲ್ವಿನ್" ಮ್ಹಣಾಲೆಂ ತೆಂ
"ಜಾಯ್ತ್ ಜೆಸ್ಸಿ, ಖಂಡಿತ್ ಬರೈತಾಂ" ಕಾಂಪ್ಚ್ಯಾ ತಾಳ್ಯಾನ್ ತಾಣೆಂ ಜಾಪ್ ದಿಲಿ.
ಬಸ್ಸ್ ಸುಟ್ಲೆಂ. ನಿಮಾಣಿಂ ನದರ್ ಜೆಸ್ಸಿನ್ ಮೆಲ್ವಿನಾಚ್ಯಾ ತೊಂದಾರ್ ಜೊಕ್ಲಿ. ’ಮ್ಹಾಕಾ ಸಾಂಡಿನಾಕಾ ಮೆಲ್ವಿನ್’ ಆಶೆಂ ತೆಂ ತ್ಯಾ ದಿಷ್ಟಿಂತ್ ಸಾಂಗ್ತಾಶೆಂ ದಿಸ್ಲೆಂ. ಬಸ್ಸ್ ದೊಳ್ಯಾಂ ಭಾಯ್ರ್ ಜಾತಚ್ ಮೆಲ್ವಿನಾನ್ ದೀರ್ಘ್ ಶ್ವಾಸ್ ಸೊಡ್ಲೊ ಆನಿಂ ಭಾರಾಧಿಕ್ ಮೆಟಾಂ ಕಾಡ್ನ್ ಘರಾ ಪರ್ತಾಲೊ.
ತಾಚೆಂ ಕಾಳಿಜ್ ಖಾಲಿ ಜಾಲ್ಲೆಂ. ಜೆಸ್ಸಿ ಪಯ್ಸ್ ಗೆಲ್ಲೆಂ. ಆನಿಂ ತೆಂ ಪಯ್ಸ್ ವೆತಾನಾ ತಾಚೆಂ ಕಾಳಿಜ್ಯಿ ವರ್ನ್ ಗೆಲ್ಲೆಂ. ಜೆಸ್ಸಿವಿಣೆಂ ರಾವೊಂಕ್ ಜಾಯ್ನಾ ತಶೆಂ ಬಿರಾಂಕುಳ್ ಉಬ್ಗೊಣ್ ಭೊಗ್ಲಿ ತಾಕ್ತಾ. ದುಃಖೇಸ್ತ್ ಜಾವ್ನ್ಂಚ್ ತೊ ಘರಾ ಪಾವ್ಲೊ,.
ತಾಂಕಾಂ ಕ್ಲಾಸ್ ಸುರು ಆಜ್. ಕ್ಲಾಸಿಕ್ ವಚೊಂಕ್ ತಾಕಾ ಮನ್ ನಾತ್ಲೆಂ ತರೀ, ಘರಾ ರಾವೊನ್ ಕರ್ಚೆಂ ಕಿತೆಂ? ಎಕ್ಸುರೊ ರಾವ್ಲ್ಯಾರ್ ಚಡಿತ್ ಉಬ್ಗೊಣ್ ಬೊಗ್ತೆಲಿ. ಕ್ಲಾಸಿಂತ್ ಗಿಬ್ಬಾ ವ ದುಸ್ರೆಂ ಈಷ್ಟ್ ಪುಣಿ ಮೆಳ್ತಾನಾ ಚಿಕ್ಕೆ ಪುಣಿ ಖಂತ್ ಪರಿಹಾರ್ ಜಾತೆಲಿ.
ಪುಣ್ ಕ್ಲಾಸಿಂತ್ ರಿಗ್ಲ್ಲ್ಯಾ ತಾಕಾ ಬೊರ್ಯಾ ವಯ್ರ್ ಬೊರ್ಕುಟಿ ಮ್ಹಳ್ಳ್ಯಾಬರಿ ಗಿಬ್ಬಾಚೊ ಕ್ಷೀಣ್ ಹಾಸೊ ಸ್ವಾಗತ್ ಕರುಂಕ್ ಲಾಗ್ಲೊ. ತಾಚಿ ಚಾಲ್ ಪಳೆವ್ನ್ ಘಾಬರ್ಲೊ ಮೆಲ್ವಿನ್. ಗಿಬ್ಬಾಕ್ ಜಾಲಾಂ ಜಾಲ್ಯಾರೀ ಕಿತೆಂ?
"ಗಿಬ್ಬಾ, ಕಿತೆಂ ಜಾಲಾಂ ತುಕಾ? ಕಿತ್ಯಾಕ್ ಖಂತಿರ್ ಆಸಾಯ್?" ವಿಚಾರ್ಲೆಂ ತಾಣೆಂ.
ತೊ ತೆವ್ಶಿನ್ ಪಳೆಂವ್ಕ್ಲಾಗ್ಲೊ. ಆನಿಂ ಖರ್ಕಸ್ ತಾಳ್ಯಾನ್ ಉಲೈಲೊ. "ಜಾಂವ್ಚೆಂ ಕಿತೆಂ? ಹಾಂವ್ ಬರೊ ಆಸಾಂ. ಮ್ಹಾಕಾ ಕಾಂಯ್ ಕೇಡ್ನಾ"
"ತರ್ ಹ್ಯಾ ಪರಿಂ ಚಲ್ತಾಯ್ ಕಿತ್ಯಾಕ್? ಮ್ಹಜೆರ್ ತುಕಾ ಕಾಂಯ್ ರಾಗ್ ಆಯ್ಲಾಗಿ?" ಚಿಕ್ಕೆ ದುಃಖೊನ್ ಮೆಲ್ವಿನಾನ್ ವಿಚಾರ್ಲೆಂ.
"ತುಜೆರ್ ಮ್ಹಾಕಾ ರಾಗ್ ಕಿತ್ಯಾಕ್ ಭಾವಾ? ತುಜೆ ತಸಲ್ಯಾ ರಾಯ್ ಕುವರಾ ಕಡೆ ಮ್ಹಜೆತಸಲ್ಯಾನ್ ರಾಗ್ ಕರ್ನ್ ಕಿತೆಂ ಚಲಾತ್?" ತಿಕ್ಸಾಣೆನ್ ಗಿಬ್ಬಾ ಸಾಂಗಾಲಾಗ್ಲೊ.
"ತರ್ ಜಾಲಾಂ ಕಿತೆಂ ಸಾಂಗನಾಂಯ್? ಅರ್ಧೆಂ ಪೊಟಾಂತ್ ದವರ್ನ್, ಅರ್ಧೆಂ ಉಚಾರ್ನಾಕಾ" ಮೆಲ್ವಿನ್ಯಿ ತಾಳೊ ಕಾಡ್ನ್ ಉಲೈಲೊ.
ಗಿಬ್ಬಾನ್ ಏಕ್ ಘಡಿ ತಾಚ್ಯಾ ತೊಂಡಾಕ್ ದೆಖ್ಲೆಂ. ಉಪ್ರಾಂತ್ ಜ್ಯೋರಾನ್ ಹಾಸ್ಲೊ ತೊ. ತಸೊಚ್ ಗಂಭೀರ್ ಜಾಲೊ ಆನಿಂ ಮ್ಹಣಾಲೊ - "ಮೆಲ್ವಿನ್, ತುಂ ಮ್ಹಾಕಾ ಇತ್ಲೊಯಿ ಅಕ್ಮಾನ್ ಕರ್ಶಿ ಮ್ಹಣ್ ಹಾಂವೆಂ ಲೆಕುಂಕ್ ನಾ. ಆಮಿಂ ದುಬ್ಳಿ ವ್ಹಯ್. ಪುಣ್ ತುಕಾ ಆಮಿಂ ಭಾಯ್ರ್ ಘಾಲ್ತೆನಾಂವ್"
ಥಟ್ಟ್ ಕರ್ನ್ ತಾಚ್ಯಾ ಉದಾಸೀನಾಚೆಂ ಕಾರಣ್ ತಾಕಾ ಸುಸ್ತಾಲೆಂ. "ಮಾಫ್ ಕರ್ ಗಿಬ್ಬಾ. ನತಲಾಂಚ್ಯಾ ಫೆಸ್ತಾಕ್ ಹಾಂವೆಂ ತುಮ್ಗೆರ್ ಯೆತಾಂ ಮ್ಹಳ್ಳೆಂ. ಜಾಯ್ತ್ಯಾ ಕಾರಣಾಂಕ್ ಲಾಗೊನ್ ಮ್ಹಾಕಾ ಜಾಲೆಂನಾ. ನಿಜಾಕೀ ಮ್ಹಾಕಾ ಮಾಫ್ ಕರ್"
"ತಿ ಕಸಲಿ ಗಾಂವ್ ಕಾಡ್ಚಿ ರಾಟಾವಳ್ ತುಕಾ?" ವಿಚಾರ್ಲೆಂ ಗಿಬ್ಬಾನ್. ತಾಚೆಂ ಮುಖ್ ಆತಾಂ ಚಿಕ್ಕೆ ಪರ್ಜಳೊಂಕ್ ಲಾಗ್ಲೆಂ.
"ಪಯ್ಲ್ಯಾ ಸುವಾತೆರ್ ಬೊಂಬಯ್ ಥಾವ್ನ್ ಮ್ಹಜಿಂ ಅಂಕಲ್ ಆನಿಂ ಆಂಟಿ ಆಯಿಲ್ಲಿಂ. ತಿಂ ಆಸ್ತಾನಾ ಯೆಂವ್ಕ್ ಜಾಲೆಂನಾ..."
"ಹಾಂ, ಬರೆಂ ನೀಬ್...." ಗಿಬ್ಬಾ ಹಾಸ್ಲೊ.
"ತುಜಿ ಆಂಟಿ ತುಕಾ ಉಸ್ಕ್ಯಾರ್ಚ್ ಬಸೊವ್ನ್ ಖೆಳಯ್ತಾಲಿ ಮ್ಹಣ್ ದಿಸ್ತಾ. ಹಾಂ, ತೆಂ ಮೊರೊಂದಿ. ದುಸ್ರೆಂ ನೀಬ್?"
"ದುಸ್ರೆಂ.....ದುಸ್ರೆಂ ಕಾಂಯ್ ನಾ" ಘುಸ್ಪೊಡೊನ್ ಮೆಲ್ವಿನ್ ಉಲೈಲೊ.
"ಫಟ್ ಮಾರ್ನಾಕಾ. ತುಜೆಂ ತೊಂಡ್ ಪಳೆತಾನಾ ಮ್ಹಾಕಾ ಕಳ್ತಾ ಕಿ ತುಂ ಕಿತೆಂಗಿ ಲಿಪಂವ್ಕ್ ಪ್ರಯತ್ನ್ ಕರ್ತಾಯ್. ಸಾಂಗ್, ಕಾಂಯ್ ಬಿಯೆನಾಕಾ"
ಮೆಲ್ವಿನ್ ಲಜೆನ್ ತಾಂಬ್ಡೊ ಜಾಲೊ. ’ಜೆಸ್ಸಿಚಿ ಸಂಗತ್ ಸಾಂಗ್ಚಿಗಿ ನಾಕಾ?’ ತ್ಯಾ ಚಿಂತ್ನಾಂನಿ ವದ್ದಾಡ್ಲೊ ತೊ. ಗಿಬ್ಬಾ ಕಸೊಯ್ ಜಿವಾಚೊ ಮಿತ್ರ್. ತಾಚೆ ಥಾವ್ನ್ ಕಸಲಿಚ್ ಖಬಾರ್ ಲಿಪವ್ನ್ ಫಾಯ್ದೊ ಕಿತೆಂ?
"ಹಾಂವ್ ಸಾಂಜೆರ್ ಇಸ್ಕೊಲ್ ಜಾಲ್ಯಾ ನಂತರ್ ಸಾಂಗ್ತಾಂ ತುಕಾ .." ಮ್ಹಣಾಲೊ ಮೆಲ್ವಿನ್.
ಗಿಬ್ಬಾ ತಾಚ್ಯಾಕೀ ಚಡ್ ಚತುರ್ ಆಸ್ಲ್ಲೊ. ಅಮ್ರುಕೊ ಹಾಸೊನ್ ತೊ ಉಲೈಲೊ "ನಾಕಾ ಮೆಲ್ವಿನ್. ತುವೆಂ ಸಾಂಗ್ಚ್ಯಾದಿಂಚ್ ಹಾಂವ್ ಸಮ್ಜಾಲೊ....ಗುಡ್, ವೆರ್ ಗುಡ್ ತೊ ವ್ಹಡ್ಲ್ಯಾನ್ ಹಾಸ್ಲೊ.
"ಕಿತೆಂ..ಕಿತೆಂ....ಕಳ್ಳೆಂ ತುಕಾ?" ನೆಣಾರ್ಯಾಬರಿ ತಾಣೆಂ ಸವಾಲ್ ಕೆಲೆ.
ಗಿಬ್ಬಾ ಏಕ್ ಕ್ಷಣ್ ವೊಗೊ ರಾವೊನ್ ವಿಚಾರಿಲಾಗ್ಲೊ. "ತುಜ್ಯಾ ಮೊಗಾಕ್ ಪಾತ್ರ್ ಜಾಲ್ಲೆಂ ತೆಂ ಬಾಗಿ ಚೆಡುಂ ಕೊಣ್ ಮೆಲ್ವಿನ್ ಸಿಂತಿಗಿ?"
"ಸಿಂತಿ...ನಹಿಂ ಗಿಬ್ಬಾ.....ತಾಚೆಂ ನಾಂವ್ ಜೆಸ್ಸಿ....." ಲಜ್ಲೊ ಮೆಲ್ವಿನ್.
"ಅರೇ, ಹೆಂ ಖಂಯ್ಚೆಂ ಜೆಸ್ಸಿ ತುಜ್ಯಾ ಜೀವನಾಕಾಶಾಚೆರ್ ಉದೆಲೆಂ ಹಾಬಾ? ನಾಂವ್ ಬರೆಂ ಆಸಾ. ಪಳೆಂವ್ಕ್ಯಿ ಸುಂದರ್ ಆಸ್ತೆಲೆಂ ಮ್ಹಣ್ ಚಿಂತ್ತಾ.....ಹೆಂ ಸುಂದರ್ ಮಾಣಿಕ್ ಖಂಯ್ ಥಾವ್ನ್ ಸೊದುನ್ ಕಾಡ್ಲೆಂಯ್?"
"ತುವೆಂ ಸಾಂಗ್ಲ್ಲಿಂ ಹರ್ಯೆಕ್ ಲಕ್ಷಣಾಂ ಆಶ್ಲ್ಲೆಂಚ್ ಚೆಡುಂ ಗಿಬ್ಬಾ ತೆಂ. ತಾಚ್ಯಾ ವಿಷ್ಯಾಂತ್ ತುಕಾ ದನ್ಪರಾಂ ಸಾಂಗ್ತಾಂ ಆತಾಂ ಕ್ಲಾಸಿಕ್ ವೇಳ್ ಜಾಲೊ"
ತ್ಯಾ ದನ್ಪರಾಂ ತೊ ಘರಾ ಜೆಂವ್ಕ್ ವಚೊಂಕ್ ನಾ. ದೊಗಿ ಹಂಪನ್ಕಟ್ಟಾ ಎಕಾ ಹೊಟೆಲಾಂತ್ ಜೆವ್ಲೆ. ಜೆವ್ತಾನಾ ಸಗ್ಳಿ ಖಬಾರ್ ಮೆಲ್ವಿನಾನ್ ತಾಕಾ ಸಾಂಗ್ಲಿ.
"ತುಂ ನಿಜಾಕೀ ಭಾಗಿ ಮೆಲ್ವಿನ್. ಜೆಸ್ಸಿ ಬರೆಂ ಭುರ್ಗೆಂ. ತಾಕಾ ಬಿಲ್ಕುಲ್ ಸಾಂಡಿನಾಕಾ ಹಾಂ..."
"ಮ್ಹಜೊ ಜೀವ್ ಆಸ್ತಾ ಪರ್ಯಾಂತ್ ಹಾಂವ್ ತಾಕಾ ಸಾಂಡ್ಚೊಂನಾ. ತೆಂ ಮ್ಹಾಕಾ ಲಾಭ್ಲ್ಲೆಂ ನಿಜಾಕಿ ದೆವಾನ್ ದಿಲ್ಲೆಂ ವರ್ತೆಂ ಭಾಗ್" ಮೆಲ್ವಿನ್ ಮ್ಹಣಾಲೊ.
"ಜಾಂವ್ದಿ, ತುಜ್ಯಾ ಮೊಗಾಂತ್ ಸದಾಂಚ್ ಥಿರ್ ರಾವ್. ಕಿತ್ಲೆ ಕಷ್ಟ್ ಆಯ್ಲ್ಯಾರೀ ಮೊಗಾಚೊ ಘಾತ್ ಕರಿನಾಕಾ" ಗಿಬ್ಬಾನ್ ಸಾಂಗ್ಲೆಂ.
"ಖಂಡಿತ್ ಗಿಬ್ಬಾ. ಹೆಂ....ತುಕಾ ಜೆಸ್ಸಿಕ್ ಹಾಂವ್ ವಳೊಕ್ ಕರ್ನ್ ದಿತಾ. ಆಮಿಂ ಹ್ಯಾ ಮಹಿನ್ಯಾಚ್ಯಾ ಅಖ್ರೇಕ್ ಕಾರ್ಕಳ್ ಫೆಸ್ತಾಕ್ ಯಾ. ತುಕಾ ಪಳೆವ್ನ್ ಖಂಡಿತ್ ತೆಂ ಸಂತೊಸ್ ಪಾವ್ತೆಲೆಂ"
"ಹಾಂವ್ ಕಾರ್ಕಳ್ ಯೇಂವ್ಕ್ ಯೆತಾಂ. ಪುಣ್ ಮ್ಹಾಕಾ ಪಳೆಲ್ಲೆಂ ಜೆಸ್ಸಿ ತುಕಾ ಸೊಡ್ನ್ ಮ್ಹಾಕಾ ಭುಲಾತ್ ಜಾಲ್ಯಾರ್.....? ಹಾಸ್ಲೊ ಗಿಬ್ಬಾ.
ಮೆಲ್ವಿನ್ಯಿ ಹಾಸೊನ್ಂಚ್ ಮ್ಹಣಾಲೊ - "ತಶೆಂ ಜಾಲ್ಯಾರ್ ಹಾಂವ್ ಪಾದ್ರಿ ಜಾತಾಂ ಆನಿಂ ತುಮ್ಚ್ಯಾ ರೆಸ್ಪೆರಾಚೆಂ ಮೀಸ್ ಸಾಂಗ್ತಾಂ"
ದೊಗೀ ಹಾಸೊನ್ ಹೊಟೆಲಾ ಭಾಯ್ರ್ ಪಡ್ಲೆ.
ತಾಚ್ಯಾ ಉಪ್ರಾಂತ್ಲ್ಯಾ ದೋನ್ ದಿಸಾಂ ಉಪ್ರಾಂತ್, ಮೆಲ್ವಿನ್ ದೀಸ್ ರಾತ್ ರಾಕ್ತಾಲೊ ತೆಂ ಜೆಸ್ಸಿಚೆಂ ಕಾಗಾದ್ ತಾಕಾ ಕೊಲೆಜಿಚ್ಯಾ ಎಡ್ರೆಸಾಕ್ ಆಯ್ಲೆಂ. ತಾಣೆಂ ದರ್ವಡ್ಯಾನ್ ತೆಂ ಕಾಗದ್ ಪೊಡ್ಲೆಂ ಆನಿಂ ವಾಚುಂಕ್ ಪ್ರಾರಂಭ್ ಕೆಲೆಂ.
[ಎಕಾ ಚಲಿಯೆಚೆಂ ಉಗ್ತೆಂ ಮನ್ ಉಜಾರ್ನ್ ಬರೈಲ್ಲ್ಯಾ ತ್ಯಾ ಕಾಗ್ದಾಂತ್ ಮೆಲ್ವಿನ್ ಕಿತೆಂ ಸಮ್ಜಾಲೊ? ಮೊಗಾಚಿ ವಾಡಾವಳ್ ಆತಾಂ ಪ್ರಾರಂಭ್ ಜಾತಾ.... ತಿ ಖಂಯ್ಚ್ಯಾ ವಾಟೆನ್ ಮುಖಾರ್ ವೆತಾ? ಹ್ಯಾ ಸವಾಲಾಂಕ್ ಮುಖ್ಲ್ಯಾ ಅಂಕ್ಯಾಂನಿ ಜಾಪ್ ಮೆಳ್ತೆಲಿ]
ನಿರ್ಭಾಗ್ಯಾಚೆಂ ಸ್ವಪಾಣ್: ಪ್ರಸ್ತಾವನ್. ಅವಸ್ವರ್ 1, 2, 3, 4, 5, 6, 7
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
