ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ನಿರ್ಭಾಗ್ಯಾಚೆಂ ಸ್ವಪಾಣ್
ಅವಸ್ವರ್ 7
ಜೆಸ್ಸಿಕ್ ಕಂಯ್ ಏಕ್ ಪಾವ್ಟಿಂ ವಚೊನ್ ಮೆಳ್ತಾ ಮ್ಹಣಾಸರ್ ಮೆಲ್ವಿನಾಕ್ ಜೀವಾಂತ್ ಜೀವ್ ನಾತ್ಲ್ಲೊ. ದರ್ವಡ್ಯಾಚಿಂ ಮೆಟಾಂ ಕಾಡ್ನ್ ತೊ ಜೆಸ್ಸಿಗೆಲ್ಯಾ ಘರಾಲಾಗಿಂ ಪವ್ಲೊ. ತೆಂಯಿ ಮೆಲ್ವಿನಾಚಿಚ್ ವಾಟ್ ರಾಕ್ತಾಲೆಂ. ಮೆಲ್ವಿನಾಕ್ ದೆಖ್ತಾಚ್ಚ್ ತಾಚ್ಯಾ ಪೊಲ್ಯಾರ್ ತಾಂಬ್ಸಾಣ್ ಉದೆಲಿ. ಲಜ್ ವ ಸುರ್ಯಾಚಿ ದಾವ್ ಮ್ಹಳ್ಳೆಂ ಮೆಲ್ವಿನಾಕ್ ಸಮ್ಜಾಲೆಂನಾ.
"ಹಲ್ಲೊ ಮೆಲ್ವಿನ್.." ಜೆಸ್ಸಿನ್ ಹಾಸ್ಯಾನ್ ತಾಕಾ ಸ್ವಾಗತ್ ದಿಲೊ. ತೊ ತಾಕಾಚ್ ಪಳೆಂವ್ಕ್ ಪಡ್ಲ್ಲೊ. ಕಶೆಂ ಕಶೆಂ ಕೆಲ್ಯಾರೀ ಉಲೊಂವ್ಕ್ ಮೆಲ್ವಿನಾಚಿ ಜೀಬ್ ಸುಟ್ಲಿ ನಾ. ಜೆಸ್ಸಿ ಸಕಾಳಿಂ ಘಾಲ್ಲೆಂಚ್ ನ್ಹೆಸಾಣ್ ನ್ಹೆಸ್ಲ್ಲೆಂ, ಮೆಲ್ವಿನಾಚ್ಯಾ ಕಾಳ್ಜಾಂತ್ ಕಿತೆಂಗಿ ಭೊಗ್ಣಾಂ ಭೊಗ್ತಾಲಿಂ.
"ತುಂ ಉಲೈನಾಂಯ್ ಕಿತ್ಯಾಹಾಬಾ? ಪಯ್ಲೆಂ ಆಮ್ಗೆರ್ ವಚೊನ್ ಯೆವ್ಯಾಂಗಿ?" ವಿಚಾರ್ಲೆಂ ಜೆಸ್ಸಿನ್.
ಮೆಲ್ವಿನಾನ್ ನಾಕಾ ಮ್ಹಣ್ಚ್ಯಾ ಅರ್ಥಾರ್ ತಕ್ಲಿ ಹಾಲಯ್ಲಿ. ತಿಂ ದೊಗಾಂಯ್ ಬತ್ತೇರಿಚ್ಯಾ ಕುಶಿಕ್ ಚಲೊಂಕ್ ಲಾಗ್ಲಿಂ.
"ಮೆಲ್ವಿನ್ ತುಕಾ ಮ್ಹಜೊ ರಾಗ್ ಆಯ್ಲಾಗಿ ಕಿತೆಂ? ನಹಿಂ ತರ್, ಹೆಂ ಮೌನ್ ಸೊಸುಂಕ್ ತಾಂಕಾನಾ" ಜೆಸ್ಸಿ ಮ್ಹಣಾಲೆಂ.
ಪುಣ್ ಮೆಲ್ವಿನಾಚೆಂ ಕಾಳಿಜ್ ಉಲೈತಾಲೆಂ ತೆಂ ಜೆಸ್ಸಿ ನೆಣಾಸ್ಲ್ಲೆಂ. ತೊ ಹಳೂ ಹಾಸ್ಲೊ. "ನಾಜೆಸ್ಸಿ, ಕಿತೆಂ ಉಲೊಂವ್ಚೆಂ ಮ್ಹಣ್ ಚಿಂತ್ತಾಲೊ ಹಾಂವ್"
"ಚಿಂತುನ್ ಉಲೊಂವ್ಚೆಂ ತಸಲೆಂ ವಿಶೇಷ್ ಕಿತೆಂ ಆಸಾ ಮೆಲ್ವಿನ್? ತುವೆಂ ಉಲೈಲ್ಲ್ಯಾಂತ್ ಚುಕಿ ಸೊದುನ್ ಕಾಡುಂಕ್ ಹಾಂವ್ ನೆಣಾ" ತೆಂಯ್ ಹಾಸ್ಲೆಂ.
"ತುಂ ಟೀಚರ್ ನಹೀಂವೆ ಜೆಸ್ಸಿ? ಭುರ್ಗ್ಯಾಚ್ಯೊ ಚುಕಿ ತಿದ್ವುಂಚೆಂ ಕಾಮ್ ತುಜೆಂ"
"ಹಾಂವ್ ಟೀಚರ್ ಖರೆಂ. ಪುಣ್ ತುಂ ಭುರ್ಗೊ ನಹಿಂಮೂ?"
"ವ್ಹಯ್, ಆಪುಣ್ ಭುರ್ಗೊ ನಹಿಂ. ಜೆಸ್ಸಿನ್ ಮ್ಹಣ್ತಾನಾ ತಾಚಿ ಕೂಡ್ ಸಂತೊಸಾನ್ ಕಾಂಪ್ಲಿ. ವೊತಾಚೆರ್ ಉದೆವ್ನ್ ಆಯಿಲ್ಲ್ಯೊ ಮಿಶ್ಯೊ, ಖರ್ಕಸ್ ಜಾಲ್ಲೊ ತಾಳೊ ಭುರ್ಗ್ಯಾಚೆಂ ಲಕ್ಶಣ್ ನಹಿಂ. ಆಟ್ರಾ ವರ್ಸಾಂ ಉತರ್ಲ್ಲೊ ಆಪುಣ್ ತರ್ನಾಟೊ - ದಾದ್ಲೊ.
"ಜೆಸ್ಸಿ, ಆಮಿಂ ಬತ್ತೇರಿಲಾಗಿಂ ಆಯ್ಲ್ಯಾಂವ್. ಪಳೆ, ಹಾಂಗಾಸರ್ ಸಬಾರ್ ದೊಣಿ ಆಸಾತ್. ಆಮಿಂ ಚಲ್ಯಾಂಗಿ? ದೊಣಿಚೆಂ ಭ್ಯೆಂ ದಿಸಾನಾಮೂ?" ವಿಚಾರ್ಲೆಂ ಮೆಲ್ವಿನಾನ್.
"ತುಂ ಆಸ್ತಾ ವರೇಗ್ ಭ್ಯೆಂ ನಾ" ತಾಕಾಚ್ ಪಳೆವ್ನ್ ಉಲೈಲೆಂ ಜೆಸ್ಸಿ,
"ತರ್, ಚಲ್ಯಾಂ, ದೊಣಿರ್ ಚಡ್" ಮೆಲ್ವಿನಾನ್ ಮ್ಹಳೆಂ. ದೊಗಾಂಯ್ ದೊಣಿರ್ ಚಡ್ಲಿಂ. ಸಾಂಗಾಂತಾ ದುಸ್ರೊ ಲೋಕ್ಯಿ ದೊಣಿರ್ ಆಸ್ಲ್ಲೊ. ಮೆಲ್ವಿನಾಚ್ಯಾ ವೊಳ್ಕಿಚೆಯಿ ಥೊಡೆ ತರ್ನಾಟೆ ಆಸ್ಲ್ಲೆ. ತೆ ಮೆಲ್ವಿನಾಕ್ ಆನಿಂ ಸಾಂಗಾತಾ ಆಯಿಲ್ಲ್ಯಾ ನವ್ಯಾಚ್ ಚೆಡ್ವಾಕ್ ದೊಳೆ ರುಂದಾವ್ನ್ ಪಳೆತಾಲೆ. ಮೆಲ್ವಿನಾಕ್ ಮತಿಂತ್ಚ್ ಹಾಸೊ ಆಯ್ಲ್ಯೊ. ದೋಣ್ ಭರ್ನ್ ಜಾತಚ್ ದೊಣ್ಕಾರಾನ್ ಚಲೊವ್ಕ್ ಪ್ರಾರಂಭ್ ಕೆಲಿ.
ಹೆವಾಳ್ಯಾಬರಿ ಉದ್ಕಾಂತ್ ಮುಖಾರ್ ವೆತಾಲಿ ದೋಣ್. ಜೆಸ್ಸಿಕ್ ಏಕ್ ದೋನ್ ಪಾವ್ಟಿಂ ಆಂಗ್ ಲಕ್ಲ್ಲ್ಯಾಬರಿ ಜಾಲೆಂ. ತಶೆಂ ತೆಂ ಲಕ್ತಾನಾ ಮೆಲ್ವಿನಾಚ್ಯಾ ಬುಜಾಕ್ ಅದಾಳ್ತಾಲೆಂ. ತೆದ್ನಾಂ ದೊಗಾಂಯ್ಚ್ಯಾ ಕುಡಿಂತ್ ವೀಜ್ ಶಕ್ತ್ ಧಾಂವ್ಲ್ಲ್ಯಾಬರಿ ಜಾತಾಲಿ. ಜೆಸ್ಸಿ ಲಜೆನ್ ದೊಡ್ತಾಲೆಂ, ಮೆಲ್ವಿನ್ ವಾರ್ಯಾರ್ಚ್ ಧಲ್ತಾಲೊ.
ಆತಾಂ ದೊಣಿ ವಯ್ಲ್ಯಾ ತರ್ನಾಟ್ಯಾಂನಿ ಕಂತಾರಾಂ ಮ್ಹಣೊಂಕ್ ಪ್ರಾರಂಭ್ ಕೆಲಿಂ. ಥೊಡ್ಯಾಲಾಗಿಂ ಗೀಟಾರ್ ಆನಿಂ ವಾಯೊಲಿನ್ ಆಸ್ಲ್ಲಿಂ. ಎಕ್ಲ್ಯಾನ್ ಗಾವಾಂತ್ ಪ್ರಸಿದ್ಧ್ ಜಾಲ್ಲೆಂ ಗೀತ್ ಗಾಯ್ತಾನಾ, ಉರ್ಲ್ಲೊ ಲೋಕ್ಯಿ ಸಂತೊಸಾನ್ ತಾಚ್ಯಾ ಸಾಂಗಾತಾ ಮೆಳ್ಳೊ. ಜೆಸ್ಸಿಯಿ ಸಂತೊಸಾನ್ ಮೆಲ್ವಿನಾಕ್ ಪಳೆವ್ನ್ ಮ್ಹಣಾಲೆಂ - "ತುಂಯ್ ಪದ್ ಮ್ಹಣ್ ಮೆಲ್ವಿನ್.."
"ಮ್ಹಾಕಾ ತಾಳೊ ನಾ ಜೆಸ್ಸಿ, ಹಾಂವೆ ಮ್ಹಳ್ಯಾರ್ ಆಯ್ಕೊಂಚೆಂ ಕೊಣೆ?" ತಾಣೆಂ ಫಟ್ ಮಾರ್ಲಿ. ಸಾಂ. ಲುವಿಸ್ ಕೊಲೆಜಿಂತ್ ಗಾಯಾನಾಂತ್ ಪಯ್ಲೆಂ ಸ್ಥಾನ್ ಜೊಡ್ಲ್ಲಿ ಖಬಾರ್ ಜೆಸ್ಸಿಕ್ ತಾಣೆಂ ಸಾಂಗೊಂಕ್ ನಾತ್ಲ್ಲಿ. ಆಯ್ಚ್ಯಾ ದಿಸಾ ತಾಕಾ ಕಂತಾರ್ಯಿ ನಾಕಾ ಆಸ್ಲ್ಲೆಂ, ಕಾಂಯ್ ನಾಕಾ ಜಾಲ್ಲೆಂ. ಜೆಸ್ಸಿಚೊ ಎಕ್ಸುರೊ ಸಾಂಗಾತ್ ತಾಕಾ ಪುರೊ ಆಸ್ಲ್ಲೊ. ಮತಿಂತ್ ಚಿಂತುನ್ಂಚ್ ಆಸ್ಲ್ಲೊ - ಆಯಿನ್ನ್ ಸಂದರ್ಭಾರ್ ಜೆಸ್ಸಿಲಾಗಿಂ ಮೋಗ್ ಉಚಾರ್ತಾಲೊಂ ಮ್ಹಣ್. ತರೀ ಕಾಳಿಜ್ ತಾಚೆಂ ಭೆಷ್ಟಾಯ್ತಾಲೆಂ.
ದೋನ್ ತೀನ್ ಗಾಯಾನಾಂ ಅಖೇರ್ ಜಾತಾನಾ ದೋಣ್ ಪೆಲ್ಯಾ ತಡಿಕ್ ಪಾವ್ಲಿ. ದೊಣ್ಕಾರಾಚೆ ಪಯ್ಶೆ ಮೆಲ್ವಿನಾನ್ ಫಾರಿಕ್ ಕೆಲೆ. ತಿಂ ದೊಗಾಂಯ್ ದೊಣಿ ವಯ್ಲೆಂ ದೆಂವೊನ್ ದರ್ಯಾ ಕುಶಿನ್ ಚಲೊಂಕ್ ಲಾಗ್ಲಿಂ. ವೊರಾಂ ಆತಾಂ ತೀನ್ ಜಾಂವ್ಕ್ ಜಾಲ್ಲಿ. ಸುರ್ಯಾಚಿ ದಾವ್ ಚಿಕ್ಕೆ ಉಣಿ ಆಸ್ಲ್ಲಿ. ದರ್ಯಾಚೆಂ ವಾರೆಂ ವ್ಹಾಳ್ತಾಲೆ ಜಾಲ್ಲ್ಯಾನ್, ವೊತ್ ಕಠಿಣ್ ನಾತ್ಲ್ಲೆಂ ಆತಾಂ ದರ್ಯಾಚಿ ಗಾಜ್ ವ್ಹೊಡ್ಲ್ಯಾನ್ ಆಯ್ಕಾತಾಲಿ.
ಸರ್ಶಿನ್ ಆಸ್ಲ್ಲ್ಯಾ ಚಾಬುಕಾಚ್ಯಾ ರುಕಾಂಚ್ಯಾ ತೊಟಾಕ್ ಪಳೆವ್ನ್ ಜೆಸ್ಸಿ ಮ್ಹಣಾಲೆಂ - "ಮೆಲ್ವಿನ್, ಕಿತ್ಲೆ ರೂಕ್ ಆಸಾತ್ ಹಾಂಗಾ! ಥಂಯ್ಸರ್ ಕಿತ್ಲಿ ಸಾವ್ಳಿ ಆಸಾ ಪಳೆ. ಹಾಂಗಾಸರ್ ಬಸ್ಲ್ಯಾರ್, ಕಸಲಿ ಪುರಾಸಣ್ ಆನಿಂ ಬೆಜಾರಾಯ್ ತರೀ ಪರಿಹಾರ್ ಜಾಯ್ತ್"
ನಿಜಾಕೀ ಜೆಸ್ಸಿ. ಆಮಿಂ ಹಾಂಗಾ ಥೊಡೊ ವೇಳ್ ಬಸ್ಚೆಂ ಜಾಲ್ಯಾರ್ ಬಸ್ಯಾಂ. ಪುಣ್, ಪಯ್ಲೆಂ ದರ್ಯಾ ತಡಿಕ್ ಯಾ.." ಸಾಂಗ್ಲೆಂ ಮೆಲ್ವಿನಾನ್.
ಥೊಡಿಂ ಮೆಟಾಂ ಚಲ್ತಚ್, ದರ್ಯೊ ದಿಷ್ಟಿಕ್ ಪಡ್ಲೊ. ತಿಂ ಆತಾಂ, ಮೋವ್ ರೆಂವೆರ್ ಉಬಿಂ ಆಸ್ಲ್ಲಿಂ. ಸುಮಾರ್ ಪಯ್ಸ್ ಥಾವ್ನ್ ದಾಂವೊನ್ ಯೇವ್ನ್ ತಡಿರ್ ಫುಟ್ತಾಲಿಂ ತಿಂ ಲಾರಾಂ. ಏಕ್ ಘಡಿ ದೊವೊ ಫೆಂಡ್ ವಯ್ರ್ ತಡಿಕ್ ಮಾರ್ತಾಲೊ ಆನಿಂ ನಪಂಯ್ಚ್ ಜಾತಾಲೊ. ತಾಣಿಂ ಉಬೆಂ ರಾವೊನ್ ಆಸ್ಚ್ಯಾ ಕಡೆ ಏಕ್ಪಾವ್ಟಿಂ ಉದಾಕ್ ಯೇವ್ನ್ ಪಾಟಿಂ ವೆತಾನಾ, ಜೆಸ್ಸಿನ್ ಎಕಾಚ್ಚಾಣೆಂ ಮೆಲ್ವಿನಾಚ್ಯಾ ಭುಜಾಕ್ ವೆಂಗೊವ್ನ್, ಹಾಳ್ವಾಯೆಚಿ ಬೋಬ್ ಮಾರ್ಲಿ. ತಾಕಾ ಆಧಾರ್ ಚುಕ್ಲ್ಲ್ಯಾಬರಿ ಜಾಲ್ಲೊ.
"ಜೆಸ್ಸಿ, ಬಿಯೆಲೆಂಯ್ಗಿ ಕಿತೆಂ? ದರ್ಯಾಂತ್ ವ್ಹಾಳೊನ್ ವೆಶಿ ಮ್ಹಣ್ ಚಿಂತ್ಲೆಂಯ್ಗಿ?" ಮೆಲ್ವಿನಾನ್ ತಾಕಾ ಪಾಟಿಂ ವೊಡ್ನ್ ವಿಚಾರ್ಲೆಂ.
"ನಾ, ತೆಂ ಉದಾಕ್ ಯೇವ್ನ್ ಪಾಂಯಾಂ ಪಂದ್ಲಿ ರೇಂವ್ ವೋಡ್ನ್ ವರ್ತಾನಾ, ಮ್ಹಾಕಾ ನೀಟ್ ರಾವೊಂಕ್ ಜಾಲೆಂನಾ. ಮೆಲ್ವಿನ್ ತಿತ್ಲೊ ವಿಚಿತ್ರ್ ದರ್ಯೊ ! ಪಯ್ಸ್ ಥಾವ್ನ್ ಪಳೆತಾನಾ ಥಂಡ್ ಆನಿಂ ಗಂಭೀರ್ ದಿಸ್ತಾ. ಲಾಗಿಂ ಥಾವ್ನ್ ದೆಖ್ತಾನಾ, ಉಬ್ಜೊಂಚಿ ತಿಂ ಆಸಂಖ್ಯಾತ್ ಲಾರಾಂ ದಿಸ್ತಾತ್ ಆನಿಂ ತಡಿರ್ ಯೇವ್ನ್ ಆಪ್ಟಾತಾತ್"
"ವ್ಹಯ್ ಜೆಸ್ಸಿ. ಸಗ್ಳ್ಯೊ ವಸ್ತುಯಿ ತಸ್ಯೊಚ್. ಪಯ್ಶಿಲೆ ಗುಡೊ ಸಪಾಯ್ ದಿಸ್ತಾ. ಲಾಗಿಂ ರಾವ್ಲ್ಯಾರ್ ಖಂದಕ್ ಆನಿಂ ಕಾಂಟೆ ಪಳೆಂವ್ಕ್ ಮೆಳ್ತಾತ್. ಮನ್ಶಾಚಿ ಜೀಣ್ಯಿ ತಶಿಚ್. ಎಕ್ಲ್ಯಾಚ್ಯಾ ಸಾಂಗಾತಾ ಥೊಡೆ ದೀಸ್ ಚಂಗಾಯ್ ಕೆಲ್ಯಾರ್ ತಾಚೊ ಸ್ವಭಾವ್ ಆನಿಂ ಗೂಣ್ ಕಳ್ತಾತ್. ಪಯ್ಸ್ ಥಾವ್ನ್ ಸಕ್ಕಡ್ ಬರೆಂಚ್ ದಿಸ್ತಾ.: ಮೆಲ್ವಿನಾನ್ ಕುಡ್ಸಿಲೆಂ.
ತಂಡ್ರಬೈಲ್ ದರ್ಯಾ ತಡಿರ್ ಸಬಾರ್ ಲೋಕ್ ಕುಡ್ಸಾಲ್ಲೊ. ಚಡಾವತ್ ತರ್ನಾಟೆ, ಚೆಡೆ ಆನಿಂ ಚೆಡ್ವಾ, ಲ್ಹಾನ್ ಭುರ್ಗಿ. ಜಾಯ್ತಿಂ ದರ್ಯಾಂತ್ ನ್ಹಾತಾಲಿಂ. ಥೊಡೆ ರೆಂವೆರ್ ಬಸೊನ್ ವಿಶೆವ್ ಘೆತಾಲೆ. ಚಿಕ್ಕೆ ಪಯ್ಸ್ ಮೊಗೊರ್ ಮಾಸ್ಳಿ ಧರುಂಕ್ ’ರಾಂಪೊಣಿ’ ಘಾಲ್ನ್ ಅಸ್ಚೆ ದಿಷ್ಟಿಕ್ ಪಡ್ತಾಲೆ. ತಾಮ್ಚ್ಯಾ ಭಂವ್ತೊಣಿಚ್ಯಾ ಸಬಾರ್ ಲೋಕ್ ಕುಡ್ಸಾಲ್ಲೊ. ಲ್ಹಾನ್ ಭುರ್ಗಿಂ ದರ್ಯಾದೆಗೆರ್ ಪಡ್ಲ್ಲ್ಯೊ ಶಿಂಪಿಯೊ ಆನಿಂ ಕರ್ಲಾಂ ಆರಾಂವ್ಚ್ಯಾರ್ ಮಗ್ನ್ ಜಾಲ್ಲಿಂ.
"ಜೆಸ್ಸಿ, ಆಮಿಂ ಕಿತೆಂ ಕರ್ಚೆಂ ಆತಾಂ? ಹಾಂಗಾ ಬಸ್ಯಾಂಗಿ?" ವಿಚಾರ್ಲೆಂ ಮೆಲ್ವಿನಾನಾ.
ಏಕ್ ಘಡಿ ವೊಗೆಂ ರಾವೊನ್ ತಾಣೆಂ ಜಾಪ್ ದಿಲಿ. "ವೊರಾಂ ಸಾಡೆ ತೀನ್ ಜಾಲಿಂ ಮಾತ್ರ್. ಸುರ್ಯೊ ಬುಡ್ಚಿ ದ್ರಶ್ಯಾ ಪಳೆಂವ್ಕ್ ಮ್ಹಾಕಾ ಮನ್ ಆಸಾ ಮೆಲ್ವಿನ್. ತ್ಯಾ ಮ್ಹಣಾಸರ್ ಸಬಾರ್ ವೇಳ್ ಆಸಾ. ಹೆಂ.... ಹಾವೆಂ ಆಯ್ಕಾಲ್ಲೆಂ ಹಾಂಗಾಂ ಏಕ್ ಇಗರ್ಜ್ ಆಸಾ ಮ್ಹಣ್.."
"ಕಿತೆಂ, ಮಾಗ್ಣೆ ಕರುಂಕ್ ಆಶಾ ಅಯ್ಲ್ಯಾಗಿ ಜೆಸ್ಸಿ?" ಮಧೆಂಚ್ ಸವಾಲ್ ಮೆಲ್ವಿನಾಚೆಂ.
"ನಾ, ಹಾಬಾ. ಮ್ಹಾಕಾ ತಿ ಇಗರ್ಜ್ ಪಳೆಯಾಂ ಮ್ಹಣ್ ಮನ್ ಜಾಲೆಂ" ಹಾಸೊನ್ ಜೆಸ್ಸಿ ಸಾಂಗಾಲಾಗ್ಲೆಂ, ತುಜಿ ಆಡ್ಕಳ್ ನಾ ಜಾಲ್ಯಾರ್...."
"ಬಿಲ್ಕುಲ್ ನಾ," ಮೆಲ್ವಿನ್ ಮ್ಹಣಾಲೊ, "ಪುಣ್ ಇಗರ್ಜ್ ಸುಮಾರ್ ಪಯ್ಸ್ ಆಸಾಮೂ ಜೆಸ್ಸಿ"
"ಕಾಂಯ್ ವ್ಹಡ್ ನಾ. ಸವ್ಕಾಸ್ ವಚೊನ್ ಯೆತಾನಾ ವೇಳ್ ಸಮಾ ಜಾತಾ. ಚಲ್ಯಾಂಗಿ ಮೆಲ್ವಿನ್?"
"ಬರೆಂ ಯಾ. ತುಜ್ಯಾ ಸಾಂತಿಪಣಾಕ್ ಮ್ಹಜಿ ಆಡ್ಕಳ್ ಕಿತ್ಯಾಕ್? ತುಜೆವರ್ವಿಂ ಮ್ಹಾಕಾಯ್ ಇಗರ್ಜೆಕ್ ಬೆಟ್ ದಿಲ್ಲ್ಯಾಕ್ ಇಲ್ಲೆಂ ಪೂನ್ ಲಾಬೊಂದಿ" ಮೆಲ್ವಿನಾನ್ ಮ್ಹಣ್ತಾನಾ ಜೆಸ್ಸಿ ಲಜೆನ್ ಹಾಸ್ಲೆಂ.
ತಿಂ ತ್ಯಾ ಚಾಬ್ಕಾಚ್ಯಾ ತೊಟಾಂ ಮಧ್ಲ್ಯಾನ್ ಇಗರ್ಜೆ ಕುಶಿಕ್ ಚಲ್ಲಿಂ. ವಾಟೆರ್ ಮೆಲ್ವಿನಾನ್ ಮ್ಹಳೆಂ - "ಜೆಸ್ಸಿ, ಇಸ್ಕೊಲ್ ಸುರು ಜಾಂವ್ಕ್ ಆನಿಂ ಏಕ್ಚ್ ದೀಸ್ ಉರ್ಲಾ. ತುಂಯಿ, ಆನಿಂ ಏಕ್ಚ್ ದೀಸ್ ಹಾಂಗಾ ಉರ್ತಾಲೆಂಯ್".
ಖಂತೀಷ್ಟ್ ದಿಸ್ಲೆಂ ತೆಂ ಏಕ್ ಘಡಿ. "ವ್ಹಯ್ ಮೆಲ್ವಿನ್, ಹಾವೆಂ ವೊಚಾಜಾಯಿಚ್ ನಹಿಂ ತರ್, ಆಮ್ಚೆಂ ಜೀವನ್ ಸಾರ್ಚೆಂ ಕಶೆಂ ಪೊಟಾಚ್ಯಾ ಭುಕೆ ಖಾತಿರ್ ಮನ್ಶಾನ್ ಸಾತ್ ಸಾಗೊರಾಂ ಪಯ್ಸ್ ತರೀ ವೆಚೆಂ ಪಡ್ತಾ"
"ಸಾತ್ ಸಾಗೊರ್....ವ್ಹಯ್ ಜೆಸ್ಸಿ" ಮೆಲ್ವಿನ್ ಮ್ಹಣಾಲೊ, "ತುಕಾ ಮಂಗ್ಳೂರ್ಚ್ ಖಂಯ್ ಪುಣಿ ಕಾಮ್ ಪಳೆಂವ್ಕ್ ನಜೊವೆ?"
ಬಾರೀಕ್ ಹಾಸೊನ್ ಜೆಸ್ಸಿ ಉಲೈಲೆಂ - "ಹುಂ...ಹಾಂಗಾ ಕಾಮ್ ಮೆಳ್ಚೆಂ, ತಿತ್ಲೆಂ ಸುಲಭ್ಗಿ ಮೆಲ್ವಿನ್? ತುಕಾ ಹಾವೆಂ ರಾವಾಜಾಯ್ ಮ್ಹಣ್ ಮನ್ಗಿ?" ವಾಂಕ್ಡ್ಯಾ ದಿಷ್ಟಿನ್ ತಾಕಾ ಪಳೆಲೆಂ ಜೆಸ್ಸಿನ್.
"ನಹಿಂ....ನಹಿಂ..." ಗಾಗೆಲೊ ತೊ, " ತುಕಾ ಹಾಂಗಾ ರಾವ್ ಮ್ಹಣೊಂಕ್ ಹಾಂವ್ ಕೊಣ್ ಜೆಸ್ಸಿ? ಕಿತೆಂಗಿ ಎಕಾ ಸಂದರ್ಭಾರ್ ತುಜಿ ವಳೊಕ್ ಜಾಲಿ. ಆನಿಂ ಆತಾಂ ತುಂ ಪಯ್ಸ್ ವೆತಾಯ್ ಮ್ಹಣ್ತಾನಾ.." ಮುಖಾರ್ಸುಂಕ್ ಕಳಾನಾಸ್ತಾನಾ ರಾವ್ಲೊ ತೊ.
ಜೆಸ್ಸಿನ್ ಏಕ್ ಭಾರಾಧೀಕ್ ಶ್ವಾಸ್ ಸೊಡ್ಲೊ. ಮೆಲ್ವಿನಾಕ್ ಆಪುಣ್ ವೆತಾಂ ಮ್ಹಣ್ ದುಃಖ್ ಬೊಗ್ತಾ ತೆಂ, ತಾಕಾ ಕಳ್ಲ್ಲೆಂ. ಮೆಲ್ವಿನಾಚೊ ಥೊಡ್ಯಾಚ್ ದಿಸಾಂಚೊ ಸಾಂಗಾಂತ್ ತರೀ, ತಾಚ್ಯಾ ವಾಂಟ್ಯಾಕ್ ಮಹಾಭಾಗ್ ತೆಂ ಜಾವ್ನಾಸ್ಲ್ಲೆಂ. ತಿಂ ಜಾಯ್ತೆ ಉಲೈಲ್ಲಿಂ, ಎಕಾಮೆಕಾಚೆ ಅಬಿಪ್ರಾಯ್ ಬದ್ಲುನ್, ಎಕಾಮೆಕಾಕ್ ಸಮ್ಜೊಂಕ್ ಸಕ್ಲ್ಲಿಂ.....ಎಕಾಚ್ ಸ್ವಭಾವಾಚಿಂ ತಾಂಚಿ ಮನಾಂ, ಆತಾಂ ಥೊಡ್ಯಾ ಕಾಳಾಚ್ಯಾ ಆದೆವ್ಸಾಕ್ ರಡ್ತಾಲಿಂ.
"ಮೆಲ್ವಿನ್, ಹಾಂವ್ ವೆತಾಂ ಮ್ಹಣ್ ತುಕಾ ಬೆಜಾರಾಯ್ ಭೊಗ್ತಾಗಿ? ವಿಚಿತ್ರ್ ಮನಿಸ್ ತುಂ. ತುಂ ಎಕ್ಲೊ ಕೊಲೆಜ್ ಸ್ಟುಡೆಂಟ್. ತುಕಾ ಸಬಾರ್ ಸಾಂಗಾತಿ ಆಸಾತ್. ತುಮ್ಚೆಂ ಜೀವನ್ ಎಕಾ ಥರಾನ್ ಭಾಗಿ ಆನಿಂ ಮಝೆಚೆಂ. ಆಶೆಂ ಆಸ್ತಾಂ ಮ್ಹಜೊ ಸಾಂಗಾಂತ್ ಚುಕ್ಲ್ಯಾರ್ ತುಕಾ ಕಾಂಯ್ ಬೊಗ್ಚೆಂ ನಾ" ಜೆಸ್ಸಿನ್ ಧರ್ಣಿಕ್ ದೀಷ್ಟ್ ಲಾವ್ನ್ ಮ್ಹಳೆಂ.
"ನಾ, ನಾ ಜೆಸ್ಸಿ. "ತುಂ ಚೂಕ್ ಸಮ್ಜಾಲಾಂಯ್. ಹಾಂವ್....ಹಾಂವ್.." ಜೆಸ್ಸಿಚೊ ಮೋಗ್ ಕರ್ತಾ ಮ್ಹಣ್ ಸಾಂಗೊಂಕ್ ಸೊಧ್ತಾಲೊ ತೊ. ಪುಣ್ ಆಯಿನ್ನ್ ವೆಳಾರ್ ಕಾಳ್ಜಾನ್ ತಾಚ್ಯಾ ಘಾತ್ ಕೆಲೊ. ದಡ್ದಡ್ಚ್ಯಾ ಕಾಳ್ಜಾನ್ ತಾಕಾ ಬೆಷ್ಟಾಯ್ಲೆಂ ಆನಿಂ ಜೀಬ್ ಮುಖಾರ್ ಘುಂವಾನಾ ಜಾಲಿ. ತಾಚೆಂ ತೊಂಡ್ ವರ್ಣಾಂತರ್ ಕಾಲೆಂ.
"ಕಿತೆಂ, ಕಿತೆಂ ಜಾಲೆಂ ಮೆಲ್ವಿನ್? ಕಿತೆಂ ಸಾಂಗೊಂಕ್ ಚಿಂತಾಲೊಯ್?"
"ಆಳೆ, ಹಿಚ್ ಇಗರ್ಜ್ ಜೆಸ್ಸಿ..." ತಾಣೆಂ ಕಪಾಲಾ ವಯ್ಲೊ ಘಾಮ್ ಪುಸ್ಲೊ. ಇಗರ್ಜ್ ಲಾಗಿಂ ಆಯಿಲ್ಲ್ಯಾನ್ ತೊ ಬಚಾವ್ ಜಾಲೊ. ಜೆಸ್ಸಿ ಅಮ್ರುಕೆಂ ಹಾಸ್ಲೆಂ. ಮೆಲ್ವಿನಾಚಿ ಸ್ಥಿತಿ ಪಳೆವ್ನ್ ತಾಣೆಂ ಕಿತೆಂ ಚಿಂತ್ಲೆಂ ಕೊಣ್ ಜಾಣಾ? ದುಸ್ರೊ ಸಬ್ದ್ ಕಾಡಿನಾಸ್ತಾನಾ ದೊಗಾಂಯ್ ಇಗರ್ಜೆ ಬಿತರ್ ರಿಗ್ಲಿಂ. ಜೆಸ್ಸಿನ್ ದಿಂಬಿ ಮಾರ್ತಚ್, ಮೆಲ್ವಿನಾನ್ಯಿ ದಿಂಬಿ ಘಾಲಿ.
’ದೆವಾ, ದಯಾಕರ್ ಮ್ಹಾಕಾ ಥೊಡೆಂ ಧೈರ್ ದಿ. ಜೆಸ್ಸಿ ವಿಣೆಂ ಹಾಂವ್ ಜಿಯೆಂವ್ಕ್ ಸಕ್ಚೊಂನಾ ತೆಂ ತುಂ ಜಾಣಾಂಯ್. ಹಾಂವ್ ತಾಚೊ ಖರ್ಯಾ ಕಾಳ್ಜಾನ್ ಮೋಗ್ ಕರ್ತಾಂ. ತಾಣೆಯಿ ಮ್ಹಜೊ ಮೋಗ್ ಕರಿಶೆಂ ಚಿಂತ್ನಾಂ ತಾಚ್ಯಾ ಮತಿಂತ್ ಘಾಲ್. ಜೆಸ್ಸಿ ಮ್ಹಜೊ ಮೋಗ್ ಕರಿನಾ ಜಾಲ್ಯಾರ್ ಹಾಂವ್ ಮೊರ್ತೊಲೊಂ....’ ಮೆಲ್ವಿನಾನ್ ಭರೊನ್ ಯೆಂವ್ಚ್ಯಾ ಕಾಳ್ಜಾಂತ್ಲ್ಯಾ ಉಮಾಳ್ಯಾ ಸಂಗಿಂ ಮಾಗ್ಲೆಂ. ತಾಚ್ಯಾ ಮುಖಾರ್ ದಿಂಬಿ ಘಾಲ್ನ್ ಆಸ್ಚೆಂ ಜೆಸ್ಸಿಯಿ ಮಾಗ್ತಾಲೆಂ. ’ತೆಂ ಕಿತೆಂ ಮಾಗ್ತಾಗಾಯ್?’ ಚಿಂತುಂಕ್ ಪಡ್ಲೊ ಮೆಲ್ವಿನ್.
ಥೊಡ್ಯಾ ವೆಳಾನ್ ದೊಗಾಂಯ್ ಉಟ್ಲಿಂ. ಇಗರ್ಜೆಂತ್ಲಿಂ ಭಾಯ್ರ್ ಯೆತಾಚ್ಚ್ ಜೆಸ್ಸಿ ಮ್ಹಣಾಲೆ - "ಆತಾಂ ಖಂಯ್, ದಯಾ ದೆಗೆಕ್ ಚಲ್ಯಾಂಗಿ ಮೆಲ್ವಿನ್?"
ತೊ ಚಿಂತುಂಕ್ ಪಡ್ಲೊ. ಖಂಯ್ಚ್ಯಾಕೀ ಆಜ್ ತಾಚೆಂ ಮನ್ ಜೆಸ್ಸಿಕ್ ತಿಳ್ಸುಂಕ್ ತಾಣೆಂ ನಿರ್ಣಯ್ ಕೆಲ್ಲೆಂ. ಜೀಕ್ ವ ಸಲ್ವೊಣಿ...... ಆಪ್ಣಾಚ್ಯಾ ನಶಿಬಾಂತ್ ಆಸ್ಲ್ಲೆಂ ಜಾತಾ. ದರ್ಯಾದೆಗೆರ್ ಆಪ್ಣೆಂ ಮತಿಂತ್ಲೆಂ ಸ್ವಷ್ಟ್ ಉಚಾರುಂಕ್ ಅಸಾಧ್ಯ್.
"ಜೆಸ್ಸಿ, ವೊರಾಂ ಚ್ಯಾರ್ ಜಾಲಿಂ ಮಾತ್ರ್. ಆಮಿಂ ಥೊಡೊ ವೇಳ್ ಹಾಂಗಾಚ್ ಚಾಬ್ಕಾ ರುಕಾಂ ಮುಳಾಂತ್ ಬಸ್ಯಾಂ. ಉಪ್ರಾಂತ್ ಸವ್ಕಾಸ್ ದರ್ಯಾ ತಡಿಕ್ ಗೆಲ್ಯಾರ್ ಸಯ್. ತುಜೆ ಲಾಗಿಂ ಮಸ್ತ್ ಉಲೊಂಕ್ ಆಸಾ ಮ್ಹಾಕಾ ಜೆಸ್ಸಿ" ಮೆಲ್ವಿನ್ ಮ್ಹಣಾಲೊ.
ಜೆಸ್ಸಿನ್ ಆಡ್ಕಳ್ ಸಾಂಗ್ಲಿನಾ. ತೆಂ ಚಿಕ್ಕೆ ಮುಖಾರ್ ಆಸ್ಚ್ಯಾ ರುಕಾಕ್ ವಣ್ಕೊನ್ ಬಸ್ಲೆಂ. ಮೆಲ್ವಿನ್ಯಿ ತಾಚ್ಯಾ ಮುಖಾರ್ ಬಸ್ಲೊ ಆನಿಂ ಹಾಡ್ಲ್ಲೊ ಕುಸ್ವಾರ್ ಸೊಡೊಂವ್ಕ್ ಲಾಗ್ಲೊ.
"ಹೊ....ಮೆಲ್ವಿನ್, ಹಿ ಕಿತೆಂ ವಿಶೇಷ್ ಸರ್ಬಾರಾಯ್?" ದಾದೊಶಿ ಹಾಸ್ಲೆಂ ತೆಂ.
’ಹಿ ಸರ್ಬರಾಯ್ ಸದಾಂಚಿ ನಹಿಂ ಜೆಸ್ಸಿ. ಕಾಂಯ್ ವರ್ಸಾಂತ್ ಏಕ್ ಪಾವ್ಟಿಂ ಅಪ್ರೂಪ್ ಖಾ ಜೆಸ್ಸಿ. ದಾಕ್ಶೆಣ್ ಕರಿನಾಕಾ" ಸಾಂಗ್ಲೆಂ ಮೆಲ್ವಿನಾನ್.
ಕೇಕಿಚೊ ಏಕ್ ಕುಡ್ಕೊ ಹಾತಿಂ ಘೆವ್ನ್ ಜೆಸ್ಸಿ ಮ್ಹಣಾಲೆಂ. "ತುಂ ಖಾಶಿ ಜಾಲ್ಯಾರ್ ಮಾತ್ರ್ ಹಾಂವ್ ಖಾತಾಂ. ಮ್ಹಾಕಾ ಖಾ ಮ್ಹಣ್ ತುವೆಂ ಮ್ಹಜೆಂ ತೊಂಡ್ ಪಳೆಂವ್ಚೆಂ ನಾಕಾ"
"ಜಾಯ್ತ್ ಜೆಸ್ಸಿ. ಹಾಂವೀ ಖಾತಾಂ" ತಾಣೆಂಯಿ ಕೇಕಿ ಕುಡ್ಕೊ ಹಾತಿಂ ಘೆತ್ಲೊ.
ಕೇಕ್ ಖಾತಾನಾ ಜೆಸ್ಸಿನ್ ವಿಚಾರ್ಲೆಂ. ಮ್ಹಜೆಲಾಗಿಂ ಮಸ್ತ್ ಉಲೊಂವ್ಕ್ ಆಸಾ ಮ್ಹಣ್. ಆತಾಂ ಹಾಂವೆಂಚ್ ಉಲೊಂವ್ಕ್ ಸುರು ಕರಿಜಾಯ್ಗಿ ಕಿತೆಂ? ಉಲಯ್"
ತಾಚೆಂ ಸವಾಲ್ ಅನಿರೀಕ್ಶಿತ್ ಜಾವ್ನಾ’ಸ್ಲ್ಲೆಂ. ತ್ಯಾ ಸವಾಲಾಕ್ ಫಾವೊತಿ ಜಾಪ್ ದೀಂವ್ಕ್ ಸಕಾನಾಸ್ತಾಂ ಮೆಲ್ವಿನ್ ಘುಸ್ಪಡ್ಲೊ. ಏಕ್ ಮಿನುಟ್ ವೊಗೊ ರಾವೊನ್ ತೊ ಮ್ಹಣಾಲೊ -"ಉಲೊಂವ್ಕ್ ಮಸ್ತ್ ಆಸಾ ತೆಂ ಖರೆಂ. ಪುಣ್ ಹಾಂವ್ ತರ್ ಕಾಂಯ್ ಸಾಂಗಾನ್, ತುಂ ಮ್ಹಜೆರ್ ರಾಗಾರ್ ಜಾಂವ್ಚೆಂ ನಾಂಯ್ಮೂ?"
"ಬಿಲ್ಕುಲ್ ನಾ ಮೆಲ್ವಿನ್. ಕಿತೆಂ ತುವೆಂ ಸಾಂಗ್ಲ್ಯಾರಿ, ಮ್ಹಾಕಾ ದುಕ್ಚೆಂ ಕಾಂಯ್ ತುಂ ಉಲೊಂವ್ಚೊನಾಂಯ್ ಮ್ಹಣ್ ಮ್ಹಾಕಾ ಪಾತ್ಯೆಣಿ ಆಸಾ. ತಶೆಂ ಎಕಾ ವೆಳಾರ್ ಮ್ಹಾಕಾ ಕೀಳ್ ಕರ್ನ್ ತುಂ ಉಲೈಲ್ಯಾರಿ ಹಾಂವ್ ತುಜೆರ್ ರಾಗಾರ್ ಜಾಂವ್ಚಿ ನಾ. ಕಿತ್ಯಾಕ್ ಮ್ಹಾಕಾ ಆನಿಂ ತುಕಾ ರಾತ್ ದೀಸ್ ವ್ಯತ್ತ್ಯಾಸ್ ಆಸಾ" ಜೆಸ್ಸಿ ಮ್ಹಣಾಲೆಂ.
"ಜೆಸ್ಸಿ, ತುಂ ಆಶೆಂ ಸಮ್ಜಾನಾಕಾ. ತುಕಾ ಹಲ್ಕ್ ಕರ್ನ್ ಉಲೊಂವ್ಚ್ಯಾ ತಿತ್ಲೊ ಪಿಸೊ ಹ್ಯಾ ಸಂಸಾರಾಂತ್ ಜಲ್ಮಾಲ್ಲೊ ನಾ. ಮ್ಹಜೊ ಮತ್ಲಾಬ್.."
ಮಧೆಂಚ್ ತೆಂ ಅಮ್ರುಕೆಂ ಹಾಸೊನ್ ಸಾಂಗಾಲಾಗ್ಲೆಂ - "ತರ್ ಕಿತೆಂ ಮ್ಹಾಕಾ ಫುಲಾಂಚೊ ಝೆಲೊ ಘಾಲುಂಕ್ ಆಲೋಚನ್ಗಿ ತುಜಿ?"
"ತಶೆಂ ಕೆಲ್ಯಾರಿ ಚೂಕ್ ನಹಿಂ" ಅಂತ್ರಳಾಕ್ ಪಳೆವ್ನ್ ಉಲೈಲೊ ಮೆಲ್ವಿನ್, "ಜೆಸ್ಸಿ, ಆಜ್ ಹೊ ಎಕ್ಸುರೊ ಸಂದರ್ಭ್ ಮ್ಹಾಕಾ ಮೆಳ್ಳಾ. ತುಜಿ ವಳೊಕ್ ಜಾಲ್ಲ್ಯಾ ದಿಸಾ ಥಾವ್ನ್ ಮ್ಹಜ್ಯಾ ಮತಿಂತ್ ಜಾಯ್ತಿಂ ಚಿಂತ್ನಾಂ ಘುಂವ್ತಾತ್ ಜೆಸ್ಸಿ. ಆನಿಂ ತ್ಯಾ ಚಿಂತ್ನಾಂಚ್ಯಾ ಬರಾಕ್ ಹಾಂವ್ ದೀಸ್ ರಾತ್ ಕರ್ಗಾತಾಂ. ಆನಿಂ ಜರ್ ತರ್ ಹಾಂವ್ ತಿಂ ಚಿಂತ್ನಾಂ ತುಜ್ಯಾ ಮುಖಾರ್ ದವ್ರಿನಾ. ಹಾಂವ್ ಪಿಸೊ ಜಾತೊಲೊಂ. ದೆಕುನ್ಂಚ್ ಹಾಂವೆಂ ತುಕಾ ತಂಡ್ರಬೈಲ್ ಆಪಯ್ಲೆಂ. ತುಕಾ ಮ್ಹಜೆರ್ ರಾಗ್ ಆಯ್ಲ್ಯಾರೀ ವ್ಹಡ್ ನಾ. ತುಕಾ ಮ್ಹಜ್ಯಾ ತೊಂಡಾಕ್ ಥಾಪಾಡ್ ಮಾರ್ಲ್ಯಾರಿ ಪರ್ವಾನಾ......ಹಾವೆಂ ಮ್ಹಣ್ಚೆಂ - ಹಾಂವ್ ತುಜೊ.." ತಿತ್ಲ್ಯಾರ್ ಉಲೊಣೆಂ ರಾವೊವ್ನ್ ಜೆಸ್ಸಿಚ್ಯಾ ತೊಂಡಾಕ್ ನದರ್ ಜೊಕ್ಲಿ. ತೆಂಯ್ ಕಿತೆಂಗಿ ಉಲೊವ್ನ್ ಪ್ರಯತ್ನ್ ಕರ್ತಾಲೆಂ ತೆಂ ತಾಕಾ ದಿಸ್ಲೆಂ. ಜೆಸ್ಸಿಚೆ ವೋಂಟ್ ಕಾಂಪ್ತಾಲೆ ಶಿವಾಯ್, ಉತ್ರಾಂ ಭಾಯ್ರ್ ಸರಾನಾತ್ಲ್ಲಿಂ. ತಾಚೆ ದೊಳೆ ಎಕಾ ಥರಾಚ್ಯಾ ಕಾವ್ಜೆಣೆನ್ ಭರ್ಲ್ಲೆ.
ಕಾಂಪ್ಚ್ಯಾ ತರೀ ದ್ರಡ್ ಸ್ವರಾನ್ ಸವ್ಕಾಸ್ ಮೆಲ್ವಿನಾನ್ ಮ್ಹಳೆಂ - "ಹಾಂವ್ ...ಹಾಂವ್ ತುಜೊ ಮೋಗ್ ಕರ್ತಾಂ ಜೆಸ್ಸಿ.... ತುಂ.." ಥಟ್ಟ್ ಕರ್ನ್ ಜೆಸ್ಸಿನ್ ತಕ್ಲಿ ಬಾಗಾಯ್ಲಿ. ಆಪ್ಲೆಂ ಮುಖಮಳ್ ದೊನಿ ಹಾತಾಂನಿ ಲಿಪವ್ನ್ ತೆಂ ಹಾಳ್ವಾಯೆನ್ ಸುಸ್ಕಾರ್ತಾನಾ ಮೆಲ್ವಿನ್ ಘಡ್ಬಡ್ಲೊ. ತಾಚ್ಯಾ ಕಾಳ್ಜಾಕ್ ಭಾಲಿ ತೊಪ್ಲ್ಲ್ಯಾಬರಿ ಜಾಲಿ. ಜೆಸ್ಸಿ ರಡ್ತಾಲೆಂ...
"ಜೆಸ್ಸಿ...."ತಾಚೆಂ ಧೈರ್ ಕೊಸಾಳ್ಳೆಲೆಂ,
"ತುಂ ರಡ್ತಾಯ್ ಕಿತ್ಯಾಕ್? ಹಾಂವೆಂ ತುಕಾ ಪಯ್ಲೆಂಚ್ ಸಾಂಗ್ಲ್ಲೆಂ ತುಕಾ ಮ್ಹಜೊ ರಾಗ್ ಯೆಂವ್ಕ್ ಪುರೊ ಮ್ಹಣ್. ತುಕಾ ರಾಗ್ ಆಯ್ಲ್ಯಾರ್ ಮ್ಹಜ್ಯಾ ಕಾನ್ಸುಲಾಕ್ ಮಾರ್. ಮ್ಹಜ್ಯಾ ತೊಂಡಾರ್ ಥಿಂಪಿ ಉಡಯ್. ಹ್ಯಾ ಪರಿ ರಡಾನಾಕಾ ಜೆಸ್ಸಿ,,,"
ತಾಣೆಂ ತಕ್ಲಿ ಉಕ್ಲ್ಲಿನಾ, ರಡ್ಣೆಂಯಿ ರಾವಯ್ಲೆಂನಾ. ಮೆಲ್ವಿನ್ ಸಂಪೂರ್ಣ್ ದೆದೊಸ್ಪಾರ್ ಜಾಲೊ. ’ಹ್ಯಾ ಎಕ್ಸುರ್ಯಾ ಜಾಗ್ಯಾಕ್ ಕಿತ್ಯಾಕ್ ಜೆಸ್ಸಿಕ್ ಆಪೊವ್ನ್ ಹಾಡ್ಲೆಂ ಹಾಂವೆ?’ ಚಿಂತಿಲಾಗ್ಲೊ ತೊ. ನಿರಾಶೆಚಿಂ ಚಿಂತ್ನಾಂ ತಾಚ್ಯಾ ಮತಿಂತ್ ಉಬ್ಜಾಲಿಂ. ಜೆಸ್ಸಿ ರಡ್ತಾ ಜಾಲ್ಯಾರ್ .....ತೆಂ ಮ್ಹಜೊ ಮೋಗ್ ಕರಿನಾ. ಆನಿಂ ಹಾಂವೆಂ ತಾಚೆಂ ತೊಂಡ್ ಪಳೆಂವ್ಚೆಂ ಕಶೆಂ? ಹ್ಯಾ ಸಂಸಾರಾಕ್ ಮ್ಹಜೆಂ ತೊಂಡ್ ದಾಕೊಂವ್ಚೆಂ ಕಶೆಂ, ಜೆಸ್ಸಿಕ್ ಹಾಂವೆಂ ಇತ್ಲ್ಯಾ ವೆಗಿಂ ಹಾವೆಂ ಆಶೆಂ ಸಾಂಗೊಂಕ್ ನಜೊ ಅಸ್ಲ್ಲೆಂ. ಆತಾಂ....ಹಿ ಸಲ್ವೊಣಿ..ಹಿ ನಿರಾಶಾ..ಹಾಯ್ ಮುಖಾರ್ ಕಿತೆಂ ಕರ್ಚೆಂ?’
ಮೆಲ್ವಿನಾಚಿ ತಕ್ಲಿ ಪಿಸಾಂತುರ್ ಜಾಲಿ. ಬೊಲ್ಸಾಂತ್ ಆಸ್ಲ್ಲಿ ಏಕ್ ಸಿಗ್ರೆಟ್ ಕಾಡ್ನ್ ತಾಣೆಂ ವೊಂಟಾಂಕ್ ತೆಂಕ್ಲಿಂ. ಆನಿಂ ಜ್ಯೋರಾನ್ ಚ್ಯಾರ್ ಧಮ್ಮ್ ವೊಡ್ಲೆಂ. ಪುಣ್ ಕಾಳ್ಜಾಂತ್ಲೆಂ ಉಬ್ದೇಸ್ ಉಣೆ ಜಾಲೆನಾಂತ್. ಜೆಸ್ಸಿ ಅನಿಕೀ ರಡ್ತಾಲೆಂ. ಆತಾಂ ಮೆಲ್ವಿನಾಚ್ಯಾ ದೊಳ್ಯಾಂತ್ಯಿ ದುಃಖಾ ದೆಂವ್ಲಿಂ. ದುಃಖಾಂ..... ಸಲ್ವೊಣೆಚಿಂ ..ದುಃಖಾಂ ನಿರಾಶೆಚ್ಯಾ ಅಂತಿಮ್ ಗಡಿಚಿಂ....ತೊ ಗಾಗೆವ್ನ್ ಮ್ಹಣಾಲೊ -
"ಜೆಸ್ಸಿ, ಮ್ಹಾಕಾ ಏಕ್ ಪಾವ್ಟಿಂಚ್ಯಾಕ್ ಮಾಫ್ ಕರ್. ಹಾವೆಂ ಆಶೆಂ ತುಕಾ ಸಾಂಗೊಂಕ್ ನಜೊ ಆಸ್ಲ್ಲೆಂ. ಪುಣ್ ಖರೆಂ ಹಾಂವ್ ಸಾಂಗ್ತಾಂ..... ತುಜೆಂ ರುಪ್ಣೆಂ ಮ್ಹಜ್ಯಾ ಕಾಳ್ಜಾಂತ್ ಇತ್ಲೆಂ ಖಂಚೊನ್ ಆಸ್ತಾನಾ, ಮ್ಹಜೆಂ ಕಾಳಿಜ್ ತುಜ್ಯಾ ಮೊಗಾಕ್ ಆಶೆವ್ನ್ ರಾವ್ತಾನಾ ತ್ಯಾ ಬಗಾರ್ ದುಸ್ರಿ ವಾಟ್ ಮ್ಹಾಕಾ ನಾತ್ಲ್ಲಿ. ವ್ಹಯ್.... ಹಿಂ ಚಿಂತ್ನಾಂ ಹಾಂವ್ ಚಿಂತ್ತಾನಾ ಮ್ಹಜ್ಯಾ ಆನಿಂ ತುಜ್ಯಾ ಮಧ್ಲೊ ಭೇದ್ ಹಾಂವೆ ಚಿಂತುಂಕ್ನಾ. ತುಂ ಏಕ್ ಸುಂದರ್ ಚೆಡುಂ ಆನಿಂ ಹಾಂವ್ ಎಕ್ಲೊ ಗರೀಬ್. ಹಾಂವೆಂ ಚಿಂತ್ಲ್ಲೆಂ, ಸಂಸರಾಂತ್ಲ್ಯಾ ಗ್ರೇಸ್ತ್ಕಾಯೆಚ್ಯಾಕಿ ಖರೊ ಮೋಗ್ ವರ್ತೊ ಮ್ಹಣ್. ಕಿತ್ಯಾಕ್, ಕಾಳ್ಜಾಚ್ಯಾ ನಿತಳ್ ಮೊಗಾಂತ್, ಗ್ರೇಸ್ತ್ ಆನಿಂ ದುಬ್ಳೊ ಮ್ಹಣ್ ಬೇಧ್ ನಾ. ಆನಿಂ ಹಿಂ ಚಿಂತ್ನಾಂ ಮತಿಂತ್ ಆಸೊನ್ ಹಾಂವೆಂ ತುಜೊ ಮೋಗ್ ಕೆಲ್ಲೊ ಜೆಸ್ಸಿ. ಪುಣ್, ದುಬ್ಳೊ ಜಾವ್ನಾಸ್ಲ್ಲೊ ಹಾಂವ್ ಸಲ್ವಾಲೊಂ. ದಯಾ ಕರ್ನ್ ಮ್ಹಾಕಾ ಮಾಫ್ ಕರ್ ಜೆಸ್ಸಿ. ಹಾಂವ್ ತುಕಾ ಆನಿಂ ಮೆಳಾನಾ. ಊಟ್, ತುಕಾ ಘರಾ ಪರ್ಯಾಂತ್ ಪಾವೊಂವ್ಚಿ ಜವಬ್ದಾರಿ ಮ್ಹಜೆರ್ ಆಸಾ. ಊಟ್ ಜೆಸ್ಸಿ...ತತ್ಕಾಲಾಕ್ ಮ್ಹಜೆ ವಯ್ಲೊ ರಾಗ್ ಸಾಂಡ್" ಮೆಲ್ವಿನಾಚ್ಯಾ ದೊಳ್ಯಾಂನಿ ದುಃಖಾಂಚಿ ಝರ್ ದೆಂವ್ತಾಲಿ. ದುಃಖಾಂ ಪುಸುನ್ ತೊ ಉಬೊ ರಾವ್ಲೊ.
ಜೆಸ್ಸಿ ಥಾವ್ನ್ ಜಾಪ್ ಯೇಂವ್ಕ್ ಘಂಟೊ ಪಾಶಾರ್ ಜಾಲ್ಲ್ಯಾಬರಿ ಬೊಗ್ಲೆಂ ಮೆಲ್ವಿನಾಕ್. ನಿಮಾಣೆ, ಲೋವ್ ತಾಳ್ಯಾನ್ ತೆಂ ಸುಸ್ಕಾರ್ಲೆಂ - "ಮೆಲ್ವಿನ್...." ತ್ಯಾ ತಾಳ್ಯಾಂತ್ ರಾಗಾಚಿಂ ಖುಣಾಂ ನಾತ್ಲ್ಲಿ. ಜೆಸ್ಸಿಚೊ ತಾಳೊ ಕಾಂಪ್ತಾಲೊ. ಅಜಾಪೊನ್, ತೆವ್ಶಿನ್ ಪಳೆತಾಲೊ ತೊ ಘುಂವ್ಲೊ. ಜೆಸ್ಸಿನ್ ತಕ್ಲಿ ಉಕ್ಲ್ಲಿ. ತಾಚ್ಯಾ ದೊಳ್ಯಾಂತ್ಲ್ಯಾನ್ ದುಃಖಾಂ ಅಜೂನ್ ದೆಂವ್ತಾಲಿಂ. ತರೀ ತೊಂಡಾರ್ ಅಪೂರ್ವ್ ಪ್ರಜಳ್ ಆಸ್ಚೊ ಪಳೆವ್ನ್ ತೊ ವಿಜ್ಮಿತ್ ಜಾಲೊ.
"ಮೆಲ್ವಿನ್, ಹಾಂವೆಂ ಜಾಪ್ ದೀಂವ್ಕ್ ವೇಳ್ ಕೆಲ್ಲ್ಯಾಕ್ ತುಕಾ ರಾಗ್ ಆಯ್ಲೊಗಿ?" ಧರ್ಣಿಕ್ ಪಳೆವ್ನ್ ವಿಚಾರ್ಲೆಂ ತಾಣೆ.
"ಜೆಸ್ಸಿ.." ಹಾಳ್ವಾಯೆನ್ ಮೆಲ್ವಿನಾನ್ ಬೊಬ್ ದಿಲಿ, ಬೊಗ್ಣಾಂ ಧಾಂಬುನ್ ದವರುಂಕ್ ತಾಂಕಾನಾಸ್ತಾನಾಂ. ಜೆಸ್ಸಿನ್ ಮಧುರ್ ತಾಳ್ಯಾನ್ ಉಲೈತಾನಾ ತಾಕಾ ವಿಚಿತ್ರ್ ದಿಸ್ಲೆಂ. ತೆಂ ರಡ್ಲೆಂ ಕಿತ್ಯಾಕ್? ಆನಿಂ ಆತಾಂ ಹ್ಯಾ ಪರಿಂ ಉಲೈತಾ....
"ಮೆಲ್ವಿನ್, ಬಸ್. ಉಬೊ ಕಿತ್ಯಾ ರಾವ್ಲಾಯ್?" ಜೆಸ್ಸಿನ್ ಮ್ಹಣ್ತಾನಾ ತೊ ಬಸ್ಲೊ.
"ತುಂ ರಡ್ಲೆಂಯ್ ಕಿತ್ಯಾಕ್ ಜೆಸ್ಸಿ?" ವಿಚಾರ್ಲೆಂ ತಾಣೆಂ.
ಏಕ್ ಘಡಿ ಮೌನ್ ರಾವೊನ್ ಜೆಸ್ಸಿ ಸಾಂಗಾಲಾಗ್ಲೆಂ - "ಮ್ಹಾಕಾ ಕಸಲಿ ಜಾಪ್ ದಿಂವ್ಚಿ ಮ್ಹಣ್ ಕಳ್ಳಿನಾ ಮೆಲ್ವಿನ್. ಮ್ಹಾಕಾ ರಡೊಂಕ್ ಆಯ್ಲೆಂ. ತುಂ ಮ್ಹಜೆರ್ ವಾಯ್ಟ್ ಸಮ್ಜಾಲೊಯ್ಗಿ?"
"ಖಂಡಿತ್ ನಾ ಜೆಸ್ಸಿ. ಹಾಂವೆಂ ಉಲೈಲ್ಲ್ಯಾಂತ್ ಚೂಕ್ ಆಸ್ಲ್ಯಾರ್.."
"ತಶೆಂ ಮ್ಹಣಾನಾಕಾ.." ಮಧೆಂಚ್ ಉಲೈಲೆಂ ತೆಂ, "ಮೆಲ್ವಿನ್, ತುವೆಂ ಮ್ಹಜೊ ಮೋಗ್ ಕರ್ತಾಂ ಮ್ಹಣ್ ಸಾಂಗ್ಲೆಂಯ್. ತುಕಾ ಮಸ್ತ್ ದೇವ್ ಬರೆಂ ಕರುಂ. ಪುಣ್ ತುವೆಂ ಮ್ಹಜೊ ಮೋಗ್ ಕರುಂಕ್ ನಜೊ ಆಸ್ಲ್ಲೊ ಮೆಲ್ವಿನ್" ತಾಚೆ ವೋಂಟ್ ಕಾಂಪ್ತಾಲೆ.
"ಜೆಸ್ಸಿ, ತುಂ ಆಶೆಂ ಕಿತ್ಯಾಕ್ ಮ್ಹಣ್ತಾಯ್? ತುಕಾ ಮ್ಹಜೆರ್ ಮೋಗ್ ನಾಂಗಿ?" ಆತುರಾಯೆನ್ ವಿಚಾರ್ಲೆಂ ಮೆಲ್ವಿನಾನ್.
ಆಪ್ಲಿಂ ದುಃಖಾಂ ಪುಸುನ್ ಅಮ್ರುಕೆಂ ಹಾಸ್ಲೆಂ ಜೆಸ್ಸಿ, "ಮೆಲ್ವಿನ್, ಹಾಂವ್ ನಿಜಾಕೀ ಭಾಗಿ. ತುಂ ಮ್ಹಜೊ ಮೋಗ್ ಕರ್ಶಿ ಮ್ಹಣ್ ಸ್ವಪ್ಣಾಂತ್ಯಿ ಹಾಂವೆಂ ಚಿಂತುಂಕ್ ನಾತ್ಲ್ಲೆಂ. ತುಕಾ ಪಳೆಲ್ಲ್ಯಾ ಪಯ್ಲ್ಯಾ ಕ್ಷಣಾ ಮ್ಹಜಾಯಿ ಕಾಳ್ಜಾಂತ್ ವಿಚಿತ್ರ್ ಬೊಗ್ಣಾಂ ಆರಂಭ್ ಜಾಲ್ಲಿ. ಹಾಂವ್ ತುಜೊ ಮೋಗ್ ಕರ್ತಾಂ ಮೆಲ್ವಿನ್.
ದೆವಾನ್ ತಸಲ್ಯಾ ಚಲ್ಯಾಚೊ ಮೋಗ್ ಫಾವೊ ಕೆಲ್ಲ್ಯಾಕ್ ಹಾಂವ್ ತಾಕಾ ಅರ್ಗಾಂ
ದಿತಾಂ. ಪುಣ್....."
ಮೆಲ್ವಿನಾಚ್ಯಾ ದೊಳ್ಯಾಂನಿ ಸಂತೊಸಾಚಿಂ ದುಃಖಾಂ ದೆಂವ್ಲಿಂ. ಜೆಸ್ಸಿ ಆಪ್ಣಾಚೊ ಮೋಗ್ ಕರ್ತಾ ಮ್ಹಣ್ ಆಯ್ಕಾತಾನಾ ತಾಚೆಂ ಕಾಳಿಜ್ ಸಂತೊಸಾನ್ ನಾಚ್ಲೆಂ.
"ಪುಣ್ ಮೆಲ್ವಿನ್..." ಮುಖಾರ್ಸಿಲಾಗ್ಲೆಂ ತೆಂ, "ಹಾಂವ್ ಜಾಣಾ ಮ್ಹಜ್ಯಾ ಆನಿಂ ತುಜ್ಯಾ ಮಧ್ಲೊ ಭೇದ್. ತುಕಾ ಆನಿಂ ಮ್ಹಾಕಾ ಸರ್ಗಿ ಮೆಲ್ವಿನ್? ತುಂ ಕೊಲೆಜ್ ವಿದ್ಯಾರ್ಥಿ. ಫಾಲ್ಯಾಂ ಸಕಾಳೀಂ ತುಕಾ ಬರೆಂ ಭವಿಷ್ಯ್ ರಾಕೊನ್ ಆಸಾ. ಆನಿಂ ಹಾಂವ್......ಹಾಂವ್ ಏಕ್ ದುಬ್ಳೆಂ ಚೆಡುಂ. ತುಜ್ಯಾ ಮೊಗಾಕ್ ವಾಂಟೆಲಿ ಜಾಲ್ಯಾರ್......ತುಜ್ಯಾ ಮೊಗಾಕ್ ಆಶೆಂವ್ಚೆಂ ಮ್ಹಜಿಚ್ ಚೂಕ್ ಮೆಲ್ವಿನ್. ಫಾಲ್ಯಾಂ ಸಕಾಳಿಂ ತುಂ ವೊಡ್ಲೊ, ನಾಂವಾಡ್ದಿಕ್ ಆನಿಂ ಗ್ರೇಸ್ತ್ ಜಾಂವ್ಕ್ ಪಾವ್ತಾನಾ ಮ್ಹಾಕಾ ತುಂ ಲೆಕ್ಶಿಗಿ? ಹಾಂವ್ ರಡ್ಲಿಂ ಹೆಂ ಸರ್ವ್ ಚಿಂತುನ್..."
ಮೆಲ್ವಿನಾಚೆಂ ಕಾಳಿಜ್ ಶಿಂದ್ಲ್ಲ್ಯಾಬರಿ ಜಾಲೆಂ. ಜೆಸ್ಸಿನ್ ಆಪ್ಣಾ ವಿಷ್ಯಾಂತ್ ವ್ಹೊಡ್ಲೆಂ ವ್ಹೊಡ್ಲೆಂ ಚಿಂತ್ಲಾಂ....ತಾಚ್ಯಾ ತ್ಯಾ ಉಗ್ತ್ಯಾ ಮನಾಕ್ ಎಕಾ ವಾಟೆನ್ ತೊ ಸಂತೊಸ್ ಪಾವ್ತಾನಾ, ದುಸ್ರ್ಯಾ ಕುಶಿನ್ ತೊ ಕಳ್ವಳ್ಳೊ. "ತಿತ್ಲ್ಯಾಕ್ಚ್ ರಡ್ತಾಲೆಂಯ್ಗಿ ಜೆಸ್ಸಿ?" ತಾಣೆಂ ವಿಚಾರ್ಲೆಂ, "ತುಜಿಂ ಚಿಂತ್ನಾಂ ಅಧಾರ್ ನಾತ್ಲ್ಲಿಂ. ಫಾಲ್ಯಾಚೆಂ ಭವಿಷ್ಯ್ ಹಾಂವ್ ನೆಣಾ. ಹಾಂವ್ ತುಜೊ ಮೋಗ್ ಕರ್ತಾಂ ಖರ್ಯಾ ಕಾಳ್ಜಾನ್. ಆನಿಂ, ತುಕಾ ಸಾಂಡ್ಚೆಂ ನಿರ್ಭಾಗ್ಪಣ್ ದೆವಾನ್ ಮ್ಹಾಕಾ ಫಾವೊ ಕರ್ನಾ ಜಾಲ್ಯಾರ್ ಪುರೊ. ಹಾಂವ್ ತುಕಾ ಕೆದಿಂಚ್ ಸಾಂಡ್ಚೊನಾ. ತುಂಯ್ ಮ್ಹಾಕಾ ತಿಚ್ ಭಾಸ್ ದಿ, ಜೆಸ್ಸಿ"
ಜೆಸ್ಸಿಚೆಂ ಮುಖ್ ಲಜೆನ್ ಆನಿಂ ಉದ್ವೇಗಾನ್ ತಾಂಬ್ಡೆ ಜಾಲ್ಲೆಂ. "ಮೆಲ್ವಿನ್, ಆಳೆ ಮುಖ್ಲ್ಯಾ ಇಗರ್ಜೆಂತ್ ಸಾಕ್ರಾಮೆಂತಾಂತ್ಲೊ ಜೆಜು ಆಮ್ಕಾಂಚ್ ಪಳೆತಾ. ದುಬ್ಳ್ಯಾ ಮ್ಹಾಕಾ ತುಂ ಸಾಂಡಿನಾಕಾ. ಮ್ಹಜೊ ಪ್ರಾಣ್ ಆಸ್ತಾ ವರೇಗ್ ಹಾಂವ್ ತುಕಾ ಸಾಂಡ್ಚಿಂನಾ,. ಸದಾಂಕಾಲ್ ಹಾಂವ್ ತುಜಿಂ...."
"ಜೆಸ್ಸಿ, ಆಜ್ ನವೆಂ ವರ್ಸ್. ಆನಿಂ ನವ್ಯಾ ವರ್ಸಾಚಿ ಕಾಣಿಕ್ ತುಕಾ ದುಸ್ರಿ ಹಾಂವ್ ದೀನಾ ಜೆಸ್ಸಿ. ಬಗಾರ್ ಹೆಂಚ್ ಉತಾರ್ ಹ್ಯಾ ಇಗರ್ಜೆ ಮುಖಾರ್ ಸಾಂಗ್ತಾಂ ಹಾಂವ್ ತುಜ್ಯಾವಿಣೆಂ ದುಸ್ರ್ಯಾಲಾಗಿಂ ಕಾಜಾರ್ ಜಾಂವ್ಚೊನಾ" ಜೆಸ್ಸಿಚೊ ಹಾತ್ ಧರ್ನ್ ತೊ ಮ್ಹಣಾಲೊ.
ಸಬಾರ್ ವೇಳ್ ತಿಂ ತಶಿಂಚ್ ಬಸ್ಲ್ಲಿಂ. ತೊಂಡಾಂ ತಾಂಚಿಂ ಉಲೈನಾತ್ಲ್ಲಿಂ ತರೀ ಕಾಳ್ಜಾಂ ಉಲೈತಾಲಿಂ. ಜೆಸ್ಸಿ ಮೆಲ್ವಿನಾಚೆಂ ಆನಿಂ ಮೆಲ್ವಿನ್ ಜೆಸ್ಸಿಚೊ ಜಾಲ್ಲೊ ಆನಿಂ ಎಕಾಮೆಕಾಚ್ಯಾ ಖರ್ಯಾ ಮೊಗಾ ಶಿವಾಯ್ ದುಸ್ರೆಂ ಕಸಲೆಂಚ್ ತಾಂಕಾಂ ನಾಕಾ ಆಶ್ಲ್ಲೆಂ.
ವೊರಾಂ ಸ ಜಾಂವ್ಕ್ ಜಾಲ್ಲಿಂ. ನಿಮಾಣೆಂ ತಿಂ ಉಟ್ಲಿಂ ಆನಿಂ ಮೌನ್ ಜಾವ್ನ್ ದರ್ಯಾ ಕುಶಿಕ್ ಚಲೊಂಕ್ಲಾಗ್ಲಿಂ. ವಾಟೆರ್ ದೊಗಾಂಯ್ ಉಲೈಲಿಂನಾಂತ್. ಜೆಸ್ಸಿಚ್ಯಾ ತೊಂಡಾರ್ ತಾಂಬ್ಸಾಣ್ ಆಸ್ಲ್ಲಿ ಆನಿಂ ಮೆಲ್ವಿನಾಚೆಂ ಕಾಳಿಜ್ ಸಂತೊಸಾಚ್ಯಾ ಅವೇಗಾನ್ ಉಡ್ತಾಲೆಂ.
ತಿಂ ದರ್ಯಾತಡಿಕ್ ಪಾವ್ತಾನಾ ಸುರ್ಯೊ ಬುಡ್ತಾಲೊ ಮಾತ್ರ್. ಮೆಲ್ವಿನಾಕ್ ಸಟ್ಟ್ ಕರ್ನ್ ತ್ಯಾ ದಿಸಾ ಬತ್ತೇರಿಚೆರ್ ಆಸ್ತಾನಾ ಮ್ಹಳ್ಳೆಲಿಂ ಉತ್ರಾಂ ಉಗ್ಡಾಸಾಕ್ ಆಯ್ಲಿಂ. ತೊ ಅಮ್ರುಕೊ ಹಾಸೊನ್ ಜೆಸ್ಸಿಕ್ ದೆಖ್ತಾನಾ ತೆಂಯ್ ಲಜೆನ್ ತಾಕಾ ಪಳೆತಾಲೆಂ. ಜೆಸ್ಸಿಕ್ಯಿ ತ್ಯಾ ಉತ್ರಾಂಚೊ ಉಗ್ಡಾಸ್ ಆಯಿಲ್ಲೊ.
’ತಾಂಬ್ಡೊ ಸುರ್ಯೊ ಜೆಸ್ಸಿ....ಏಕ್ ಬುಡ್ಲೊ ಆನಿಂ ತಾಚಿ ತಾಂಬ್ಸಾಣ್ ತುಜ್ಯಾ ಪೊಲ್ಯಾರ್ ಸೊಡ್ನ್ ಗೆಲಾ..’ ತಾಣೆಂ ಸಾಂಗ್ಲ್ಲೆಂ.
"ನವ್ಯಾ ದಿಸಾಚೊ ಪಯ್ಲೊ ಸುರ್ಯೊ..." ಮೆಲ್ವಿನ್ ಮ್ಹಣಾಲೊ.
ತೆಂ ಲಜ್ಲೆಂ ಶಿವಾಯ್ ಉಲೈಲೆಂ ನಾ. "ಜೆಸ್ಸಿ ಬಸ್. ಆನಿಂ ಥೊಡ್ಯಾ ವೆಳಾ ಉಪ್ರಾಂತ್ ಆಮಿಂ ಘರಾ ಚಲ್ಯಾಂ" ಮೆಲ್ವಿನ್ ಮ್ಹಣಾಲೊ. ದೊಗಾಂಯ್ ದರ್ಯಾಕ್ ಫುಡ್ ಕರ್ನ್ ಬಸ್ಲಿಂ.
ಸಾಂಜ್ ಜಾತಾನಾ, ತಡಿರ್ ಲೊಕಾಚಿ ಖೆಟ್ ಚಡಾತ್ತ್ ಆಯಿಲ್ಲಿ. ಪುಣ್ ತಿಂ ದೊಗಾಂ ಕೊಣಾಚಿಚ್ ಪರ್ವಾನಾತ್ಲ್ಲ್ಯಾಬರಿ ಉಲವ್ನ್ ಬಸ್ಲ್ಲಿಂ. ತಿ ಸಾಂಜ್ ವರ್ತ್ಯಾ ಸಂತೊಸಾಚಿ ತಾಂಕಾ ಜಾಲ್ಲಿ. ಕಾಳೊಕ್ ಜಾತಾ ಪರ್ಯಾಂತ್ ತಶೆಂಚ್ ಉಲವ್ನ್ ಉಪ್ರಾಂತ್ ನ್ಹಂಯ್ಚ್ಯಾ ತಡಿಕ್ ತಿಂ ಯೇವ್ನ್ ಪಾವ್ಲಿಂ. ಥೊಡ್ಯಾ ವೆಳಾನ್ ಆಯಿಲ್ಲ್ಯಾ ದೊಣಿರ್ ಚಡೊನ್, ತಿಂ ಬತ್ತೇರಿಸರ್ಶಿಂ ದೆಂವ್ಲಿಂ.
ಮೆಲ್ವಿನಾಕ್ ದರ್ಯಾ ತಡಿಕ್ ಆಯಿಲ್ಲ್ಯಾ ಲೊಕಾಚಿ ಪರ್ವಾಚ್ ನಾತ್ಲ್ಲಿ. ಆನಿಂ ಆಪ್ಣಾಕ್ ಪಾಟ್ಲಾವ್ ಕರ್ನ್ ಆಸ್ಚ್ಯಾ ತ್ಯಾ ದೊಣ್ ದೊಳ್ಯಾಂಚೊ ದುಬಾವ್ಚ್ ನಾತ್ಲ್ಲೊ. ತಾಚಿ ಹರ್ಯೇಕ್ ಚಾಲ್ ದೆಖ್ಲ್ಲಿ ಸಿಂತಿನ್. ತೆಂಯ್ ತಾಚ್ಯಾ ಎಕ್ಲ್ಯಾ ಇಷ್ಟಾ ಸಂಗಿಂ ದರ್ಯಾ ತಡಿಕ್ ಆಯಿಲ್ಲೆಂ.
ಪಯ್ಸ್ ಥಾವ್ನ್ ಜೆಸ್ಸಿ ಸಾಂಗಾಂತಾ ಆಸ್ಚ್ಯಾ ಮೆಲ್ವಿನಾಕ್ ಪಳೆವ್ನ್ ಹಾಂಕ್ರೆಲೆಂ ಸಿಂತಿ. ತಾಚೆ ದೊಳೆ ರುಂದಾಲೆ ಆನಿಂ ಆಪ್ಸೊಚ್ ಆಜ್ಯಾಪಾಚೊ ಉದ್ಗಾರ್ ತಾಚ್ಯಾ ತೊಂಡಾಂತುನ್ ಭಾಯ್ರ್ ಪಡ್ಲ್ಲೊ.
"ಸಿಂತಿ, ಜಾಲೆಂ ಕಿತೆಂಬಾ?" ತಾಚೆ ನಾಜೂಕ್ ಕೇಸ್ ಪೊಶೆವ್ನ್ ವಿಚಾರ್ಲೆಂ ರಿಚ್ಚಿನ್.
"ಥಂಯ್....ಥಂಯ್ ಪಳೆ ರಿಚ್ಚಿ. ಮೆಲ್ವಿನ್ ಆನಿಂ ತೆಂ ನವೆಂಚ್ ಚೆಡುಂ..." ಕಾಂಪ್ಚ್ಯಾ ತಾಳ್ಯಾನ್ ತೆಂ ಉಲಯ್ಲೆಂ.
ರಿಚ್ಚಿ ಹಾಸ್ಲೊ. "ಹ...ಹ...ಹ... ಬರೆಂ ಸಾಂಗ್ಲೆಯ್ ತುವೆಂ. ಮೆಲ್ವಿನಾಕ್ ಪಳೆವ್ನ್ ತುಕಾ ಕಿತ್ಯಾಕ್ ಬೆಜಾರಾಯ್ ಭೊಗ್ಲಿ ಹಾಬಾ? ತಿಂವಿ ಆಮ್ಚೆಬರಿಚ್ ಮಝಾ ಬೊಗುಂಕ್ ಆಯ್ಲ್ಯಾಂತ್. ಪುಣ್ ಸಾಂಗ್ಲ್ಯಾಬರಿ, ಹೆಂ ನವೆಂಚ್ ಚೆಡುಂ ಕೊಣ್ ಹಾಬಾ? ವ್ಹಾ! ಪಳೆಂವ್ಕ್ ಅಂಜ್ಯಾಬರಿ ದಿಸ್ತಾ..."
’ಆಂಜ್...!’ ಸಿಂತಿನ್ ವೋಂಟ್ ಚಾಬ್ಲೆ. ತಾಚೆಂ ರಗಾತ್ ಸಳ್ಸಳ್ಳೆಂ. "ವ್ಹಯ್.......ಹೆಂ ಗಾಂವಾಕ್ಚ್ ನವೆಂ ಚೆಡುಂ ಖಂಯ್ ಥಾವ್ನ್ ಆಯ್ಲಾಂ? ಮೆಲ್ವಿನಾಕ್ ತೆಂ ಕಶೆಂ ಬೆಟ್ಲೆಂ? ತೆಂ ಪಳೆಂವ್ಕ್ ಸುಂದರ್ ದಿಸ್ತಾ...’ ನಿಯಾಳ್ತಾನಾ ಸಿಂತಿಕ್ ಕಠಿಣ್ ಮೊಸೊರ್ ಜಾಲೊ.
"ತುಂ ತಾಂಕಾಂ ಕಿತ್ಯಾಕ್ ಪಳೆತಾಯ್ ಸಿಂತಿ? ತಿಂ ತಾಂಚ್ಯಾ ಇತ್ಲ್ಯಾಕ್ಚ್ ಆಸೊಂದಿತ್. ಆಮಿಂ ಆಯಿಲ್ಲ್ಯಾಂವ್ ಆಯ್ಚೊ ದೀಸ್ ಖುಶಾಲಾಯೆನ್ ಪಾಶಾರ್ ಕರುಂಕ್" ರಿಚ್ಚಿನ್ ಸಿಂತಿಚ್ಯಾ ಬಾವ್ಳ್ಯಾಕ್ ಧರ್ನ್ ಮ್ಹಳೆಂ.
ಸಿಂತಿನ್ ನಾ - ಖುಶೆನ್ ಹಾತ್ ಪಾಟಿಂ ವ್ಹೊಡ್ಲೊ, "ಮ್ಹಜಿ ತಕ್ಲಿ ಪೊಡ್ತಾ ರಿಚ್ಚಿ. ತುಂ ಮ್ಹಜ್ಯಾ ಅಂಗಾಕ್ ಹಾತ್ ಲಾಯ್ನಾಕಾ"
"ತಕ್ಲಿ ಪೊಡ್ತಾ! ಹಿ ತಕ್ಲಿ ಪೊಡಾಪೊಡ್ ಆತಾಂಚ್ ಕಶಿ ಸುರು ಜಾಲಿ? ಬಹುಶಃ ತ್ಯಾ ಚೆಡ್ವಾಕ್ ದೆಖ್ತಾಚ್ ಜಾಯ್ಜಾಯ್" ಹಾಸ್ಲೊ ರಿಚ್ಚಿ. "ಬಿಯೆನಾಕಾ ಸಿಂತಿ, ತುಂಚ್ ತಾಚ್ಯಾಕಿ ಸುಂದರ್ ದಿಸ್ತಾಯ್. ತುಜ್ಯಾ ಸೊಬಾಯೆ ಮುಖಾರ್ ತಾಕಾ ನಿವಾಳ್ನ್ ಉಡೈಜಾಯ್"
ಸಿಂತಿ ಪಾತ್ಯೆಲೆಂನಾ. ತರೀ ರಾಗಾನ್ ಮ್ಹಣಾಲೆಂ - "ಹಾಂವ್ ತಾಚೊ ಮೊಸೊರ್ ಕರಿನಾ. ತುಂ ಕಿತೆಂ ನಾಕಾ ಜಾಲ್ಲೆಂ ಉಲೈತಾಯ್?"
"ಮೊಸೊರ್ ತುವೆಂ ಕಿತ್ಯಾಕ್ ಕರ್ಚೊ? ಮೊಸೊರ್ ಹಾಂವೆಂ ಕರಿಜಾಯ್, ಕಿತ್ಯಾಕ್ ಮ್ಹಜ್ಯಾಕಿ ಬರೆಂ ಸುಂದರ್ ಚೆಡುಂ ಮೆಲ್ವಿನಾಕ್ ಮೆಳ್ಳಾಂ ಮ್ಹಣ್" ಚಿಂತಿನಾಸ್ತಾಂ ರಿಚ್ಚಿನ್ ಸಾಂಗ್ಲ್ಲ್ಯಾ ಉತ್ರಾಂಚೊ ಪರಿಣಾಮ್ ಕಠಿಣ್ ಜಾಲೊ. ಸಿಂತಿ ಘಾಯೆಲ್ಯಾ ವಾಗಿಣಿ ಬರಿ ಚಡ್ಪಡ್ಲೆಂ. ಕ್ರೋಧಾನ್ ತಾಚೆಂ ಅಂಗ್ ಜಳ್ಳೆಂ.
’ನಾ..... ಹೆಂ ಕೆದಿಂಚ್ ಘಡೊಂಕ್ ನಜೊ. ಮೆಲ್ವಿನ್....ಮೆಲ್ವಿನ್ ಆನಿಂ ತ್ಯಾ ಚೆಡ್ವಾಕ್ ದೋಸ್ತಿ ಜಾಂವ್ಕ್ ಹಾಂವ್ ಸೊಡಿಶಿನಾ. ಮೆಲ್ವಿನ್ ಎದೊಳ್ಚ್ ಮ್ಹಜ್ಯಾ ಪಾಸಾಂತ್ ಸಾಂಪಾಡ್ಲಾ ಆನಿಂ ಭಾಯ್ಲ್ಯಾ ಭಾಯ್ರ್ ಮ್ಹಾಕಾ ಘಾತ್ ಕರ್ತಾ. ಕಶೆಂ ಪುಣಿ ತಾಂಚೊ ಸಂಬಂಧ್ ತುಟಯ್ತೆಲಿಂ...’ ಸಿಂತಿನ್ ಮತಿಂತ್ ಸೊಪುತ್ ಘಾಲೊ.
"ಸಿಂತಿ....ತುಂ ಅನಿಕೀ ಚಿಂತಾಯ್ ಕಿತೆಂ"? ಪರ್ತ್ಯಾನ್ ವಿಚಾರ್ತಾಲೊ ರಿಚ್ಚಿ.
ಪುಣ್ ಸಿಂತಿಚಿ ದೀಷ್ಟ್ ಮೆಲ್ವಿನ್ ಆನಿಂ ಜೆಸ್ಸಿಚೆರ್ಚ್ ಆಸ್ಲ್ಲಿ. ಅಖ್ರೇಕ್ ತಿಂ ದೊಗಾಂಯ್ ಉಟೊನ್ ನ್ಹಂಯ್ಚ್ಯಾ ದೆಗೆಕ್ ಚಲ್ತಾನಾ ಸಿಂತಿ ಮ್ಹಣಾಲೆಂ, "ಚಲ್ ರಿಚ್ಚಿ, ಆಮಿಂಯಿ ಚಲ್ಯಾಂ.."
ರಿಚ್ಚಿಕ್ ದುಸ್ರೊ ಉಪಾಯ್ಚ್ ನಾತ್ಲ್ಲೊ. ನಾ- ಖುಶೆನ್ ತೊ ಉಟ್ಲೊ ಆನಿಂ ಸಿಂತಿಬರಾಬರ್ ತಾಂಚೊ ಪಾಟ್ಲಾವ್ ಕರ್ನ್ ಗೆಲೊ.
ಜೆಸ್ಸಿ ಆನಿಂ ಮೆಲ್ವಿನ್ ದೊಣಿರ್ ಬಸ್ಲ್ಲಿಂ, ಸಿಂತಿನ್ ಮಸ್ಕ್ ಉಜ್ವಾಡಾಂತ್ ದೆಖ್ಲೆಂ. ತೆಂ ಆನಿಂ ತಾಚ್ಯಾ ಸಾಂಗಾತಾ ರಿಚ್ಚಿ, ದುಸ್ರ್ಯಾ ಎಕಾ ದೊಣಿರ್ ಚಡ್ಲಿಂ. ಪಯ್ಲ್ಯಾ ದೊಣಿಚೊ ಪಾಟ್ಲಾವ್ ಕರ್ನ್ ಹಿ ದೋಣ್ಯಿ ಚಲ್ಲಿ.
ಬತ್ತೇರಿಲಾಗಿಂ ದೆಂವ್ಲ್ಲಿಂ ಮೆಲ್ವಿನ್ ಆನಿಂ ಜೆಸ್ಸಿ ಸವ್ಕಾಸ್ ಮೆಟಾಂ ಕಾಡ್ನ್ ಚಲ್ತಾಲಿಂ. ತಾಂಚ್ಯಾ ಪಾಟಾಪಾಟ್ ಆಯಿಲ್ಲ್ಯಾ ಸಿಂತಿನ್, ಎದೊಳ್ಚ್ ರಿಚ್ಚಿಕ್ ಆದೇವ್ಸ್ ಮಾಗ್ಲ್ಲೊ. ’ತೆಂ ಚೆಡುಂ ಕೋಣ್? ಖಂಯ್ ರಾವ್ತಾ?" ಸೊದುನ್ ಕಾಡುಂಕ್ ಚಿಂತ್ಲ್ಲೆಂ ಸಿಂತಿನ್. ಮೆಲ್ವಿನ್ ಆನಿಂ ಜೆಸ್ಸಿಕ್ ಥೊಡೆಂ ಅಂತರ್ ದವರ್ನ್ ಚತ್ರಾಯೆನ್ ಪಾಟ್ಲಾವ್ ಕರ್ತಾಲೆಂ ಸಿಂತಿ.
"ಜೆಸ್ಸಿ....ಫಾಲ್ಯಾಂ ಕೆದಾಳಾ ಮ್ಹಾಕಾ ಮೆಳ್ತಾಯ್?" ವಿಚಾರ್ಲೆಂ ಮೆಲ್ವಿನಾನ್.
"ಫಾಲ್ಯಾಂ ಸಕಾಳಿಂ ಆಮ್ಗೆರ್ ಯೆ ಮೆಲ್ವಿನ್. ದನ್ಪಾರಾಂ ಜೇಂವ್ಕ್ ರಾವ್, ಸಾಂಜೆರ್ ಘರಾ ವೊಚ್..." ಜೆಸ್ಸಿನ್ ಸಾಂಗ್ಲೆಂ.
"ಓ.....ತುಜಿ ಮಾಂಯ್ ಕಿತೆಂ ಸಮ್ಜೊಂಕ್ ಆಸಾ? ಮಾಗಿರ್ ಕಾಂಯ್ ಚಿಂತಿತ್ ಜಾಲ್ಯಾರ್?"
"ಚಿಂತ್ಚೆಂ ಕಿತೆಂ? ಆಫ್ಲಿ ಧುವ್ ಮೆಲ್ವಿನಾಚ್ಯಾ ಮೊಗಾರ್ ಪಡ್ಲ್ಯಾ ಮ್ಹಣ್ ಬಿಲ್ಕುಲ್ ತಿಕಾ ಸಂಶಯ್ ಯೆಂವ್ಚೊನಾ. ಕಿತ್ಯಾಕ್, ತಿಣೆ ಚಿಂತ್ಲಾಂ ಜೆಸ್ಸಿ ಏಕ್ ದೀಸ್ ಸಂಸಾರ್ ಸಾಂಡುನ್ ಮಾದ್ರ್ ಜಾಂವ್ಕ್ ವೆತೆಲೆಂ ಮ್ಹಣ್.." ಹಾಸೊನ್ ಮ್ಹಣಾಲೆ ತೆಂ.
"ತುಂ ಮಾದ್ರ್..ತರ್ ಜೆಸ್ಸಿ, ಹಾಂವೆಂ ಪಾದ್ರ್ ಜಾಂವ್ಕ್ ಪಡಾತ್! ತೊಯ್ ಹಾಸ್ಲೊ.
"ಜಾಲ್ಯಾರ್ ಕಿತೆಂ? ಆಲೋಚನ್ ಕಾಂಯ್ ವಾಯ್ಟ್ ನಾ"
"ಪುಣ್ ಜೆಸ್ಸಿ, ತುಕಾ ಮ್ಹಾಕಾ ವಿಸ್ರೊಂಕ್ ಜಾಂವ್ಚೆಂನಾ. ಹಾಂವ್ ತುಕಾ ವಿಸ್ರೊಂಕ್ ಸಕ್ಚೊಂನಾ. ಉಪ್ರಾಂತ್ ಆಮಿಂ ದೊಗಾಂಯ್ ಸಂಸಾರಾಕ್ ಪಾಟಿಂ ಆಯ್ಲ್ಯಾರ್, ಸಂಸಾರ್ಚ್ ಆಮ್ಕಾಂ ಹಾಸ್ತೊಲೊ"
ಸಂಸಾರ್ಚ್ ಹಾಸ್ತೊಲೊ ಮ್ಹಣ್ ದೊಗಾಂಯ್ ಕುಡ್ಕುಡೊನ್ ಹಾಸ್ಲಿಂ. ಸಿಂತಿಚ್ಯಾ ಕಾನಾಂಕ್ಯಿ ತೊ ಹಾಸೊ ಆಯ್ಕಾತಾನಾ ತಾಚೆಂ ಶರೀರ್ ಮಾತ್ರ್ ಕಾಂಪ್ಲೆಂ.
ಉರ್ವಾ ಮಾರ್ಕೆಟ್ ಲಾಗಿಂ ಪಾವ್ಲಿ. "ತುಂ ಖಂಡಿತ್ ಫಾಲ್ಯಾಂ ಆಮ್ಗೆರ್ ಯೆ ಮೆಲ್ವಿನ್," ವತ್ತಾಯ್ ಕೆಲಿ ಜೆಸ್ಸಿನ್
"ಖಂಡಿತ್ ಯೆತಾಂ. ಸಕಾಳಿಂಚ್ ಯೆತಾಂ ಬರೆಂ ಜೆಸ್ಸಿ ಗುಡ್ಣಾಯ್ಟ್" ಮೆಲ್ವಿನಾನ್ ಆದೇವ್ಸ್ ಮಾಗ್ಲೊ.
"ಗುಡ್ ನಾಯ್ಟ್, ಸ್ವೀಟ್ ಡ್ರೀಮ್ಸ್"
"ತುಜಿಂಚ್ ಸ್ವಪ್ಣಾಂ ಪಡೊಂದಿತ್ ಜೆಸ್ಸಿ" ಹಾಸೊನ್ ತೊ ಮ್ಹಣಾಲೊ.
ಮೆಲ್ವಿನ್ ಘರ್ಚಾ ವಾಟೆಕ್ ಲಾಗ್ಲ್ಲೊ ಆನಿಂ ಚ್ಯಾರ್ ಕದಮಾಂ ತಾಣೆಂ ಕಾಡ್ಲ್ಲಿಂ. ಸಾಂಜೆಚಿಂ ಘಡಿತಾಂಚ್ ತಾಚ್ಯಾ ಮತಿಕ್ ಪರ್ತ್ಯಾನ್ ಉಗ್ಡಾಸಾಕ್ ಯೆತಾಲಿಂ. ತೊ ಆಪ್ಲೆಸ್ತಕಿ ಹಾಸ್ತಾಲೊ ಆನಿಂ ಆಪ್ಣಾ ತಿತ್ಲೊ ಭಾಗಿ ಕೊಣ್ಂಚ್ ನಾ ಮ್ಹಣ್ ಚಿಂತ್ತಾಲೊ. ತ್ಯಾಚ್ ಕ್ಷಣಾ "ಮೆಲ್ವಿನ್....." ಮ್ಹಣ್ ತಾಕಾ ತಾಳೊ ಆಯ್ಕಾಲೊ.
ತ್ಯಾ ತಾಳ್ಯಾಚಿ ವಳೊಕ್ ತಾಕಾ ಮೆಳ್ಳಿ. ಆಜ್ಯಾಪೊನ್ ತೊ ಪಾಟಿಂ ಪಳೆತಾನಾ, ಆಪ್ಲಿಂ ಸರ್ವ್ ಬೊಗ್ಣಾಂ ಲಿಪೊವ್ನ್ ಧರ್ನ್ ಅಮ್ರುಕೆಂ ಹಾಸೊನ್ ಯೆಂವ್ಚೆಂ ಸಿಂತಿ, ತಾಕಾ ರಸ್ತ್ಯಾಚ್ಯಾ ವೀಜೆಚ್ಯಾ ಉಜ್ವಾಡಾಂತ್ ದಿಸ್ಲೆಂ.
"ಸಿಂತಿ...." ವಿಜ್ಮಿತ್ ಜಾವ್ನ್ ತಾಣೆ ಉಲೊ ಕೆಲೆಂ.
"ಮೆಲ್ವಿನ್..ಕಿತೆಂ ನವಾಲ್ ಹೆಂ,,,?" ಸಿಂತಿ ತಾಚ್ಯಾ ಬರಾಬರ್ ಯೇವ್ನ್ ಮ್ಹಣಾಲೆಂ. "ತುಜೆಂ ದರ್ಶನ್ ಹ್ಯಾ ವೆಳಾರ್ ಖಂಯ್ ಪಾವ್ಲ್ಲೊಯ್?"
"ಹಾಂವ್....ಹಾಂವ್ ತಂಡ್ರಬೈಲ್ ಗೆಲ್ಲೊಂ." ಘುಸ್ಪುಡೊನ್ ತೊ ಉಲೈಲೊ. ಸಿಂತಿಯಿ ದರ್ಯಾ ತಡಿಕ್ ವೊಚೊನ್ ಆಯ್ಲಾ ಮ್ಹಣ್ ತಾಕಾ ಕಳ್ಳೆಂ. ಆಪ್ಣಾಕ್ ಜೆಸ್ಸಿ ಸಾಂಗಾತಾ ಆಸ್ತಾನಾ ಸಿಂತಿನ್ ಪಳೆಲಾಂ ಪುಣಿಂಗಿ.....ತರೀ ಸಿಂತಿಚ್ಯಾ ತೊಂಡಾರ್ ಕಸಲಿಂಯಿ ಖೂಣಾಂ ದಿಸ್ಲಿನಾಂತ್.
"ಹಾಂವೀ ದರ್ಯಾತಡಿಕ್ ಗೆಲ್ಲಿಂ. ಮ್ಹಾಕಾ ತುಂ ಕಿತ್ಯಾಕ್ ಪಳೆಂವ್ಕ್ ಮೆಳ್ಳೊನಾಂಯ್?" ಅಜ್ಯಾಪ್ ಜಾಲ್ಲ್ಯಾಬರಿ ಸಾಂಗಾಲಾಗ್ಲೆಂ ತೆಂ.
"ನಿಜಾಕಿ ಅಜಾಪ್ಚ್ ಸಯ್. ಹಾಂವೆಯಿ ತುಕಾ ಪಳೆಲೆಂನಾ"
"ತುಂ ಖಂಯ್ ಪಯ್ಸ್ ಪಾವ್ಲ್ಲೊಯ್ ಕೊಣ್ಣಾ" ಶಾಂತ್ ತಾಳ್ಯಾನ್ ತೆಂ ಮ್ಹಣಾಲೆಂ. "ಹೆಂ ಕಿತೆಂ, ತುಂ ಎಕ್ಲೊಚ್? ತಂಡ್ರಬೈಲ್ ಎಕ್ಸುರೊ ಗೆಲ್ಲೊಯ್ಗಿ ಕಿತೆಂ? ತುಜೆ ಈಷ್ಟ್ ವ ಕೊಣೀ ನಾಂತ್..?"
"ಈಷ್ಟ್.." ಮೆಲ್ವಿನಾನ್ ಥಿಂಪಿ ಗಿಳ್ಳಿ....."ಈಷ್ಟ್..ವ್ಹಯ್ ಸಿಂತಿ. ಹಾಂವ್ ತಾಂಕಾಂ ಸೊಡ್ನ್ ಮುಖಾರ್ ಆಯ್ಲೊ. ವೊರಾಂ ಸಾತ್ ಉತರ್ಲಿಂಮೂ?"
"ಆಜ್ ನವೆಂ ವರ್ಸ್. ಘರಾ ವೆಗಿಂಚ್ ಪಾವಾನಾ ಜಾಲ್ಯಾರ್ ಕಾಂಯ್ ಗೊವ್ಜಿ ಕರ್ಚಿನಾಂತ್. ಮೆಲ್ವಿನ್....ಮ್ಹಾಕಾ ತುಜೆಲಾಗಿಂ ಉಲೊಂವ್ಕ್ ಆಸಾ. ಆಮಿಂ ಖಂಯ್ ವಚೊನ್ ಬಸ್ಯಾಂ?"
"ಮ್ಹಜೆಲಾಗಿಂ ಉಲೊಂವ್ಕ್!" ಹಾಂಕ್ರೆಲೊ ತೊ. "ಹ್ಯಾ ವೆಳಾರ್? ಆತಾಂ ಕಾಳೊಕ್ ಜಾಲೊ ಸಿಂತಿ, ಆತಾಂ ಕಿತೆಂ ಉಲೊಂವ್ಚೆ?"
"ಕಾಳೊಕ್ ಜಾಲ್ಯಾರ್ ಕಿತೆಂ? ಆಯ್ಚೊ ದೀಸ್ ಖುಶಾಲಾಯೆಚೊ" ದಾಂಬುನ್ ಮ್ಹಣಾಲೆಂ ಸಿಂತಿ, "ಮ್ಹಜ್ಯಾ ಸಾಂಗಾತಾ ಆಸೊಂಕ್ ಭ್ಯೆಂ ದಿಸ್ತಾ ತುಕಾ?"
"ಭ್ಯೆಂ ದಿಸ್ಚೆಂ ...ನಾ" ಸುಕೊ ಹಾಸೊ ಹಾಸ್ಲೊ ಮೆಲ್ವಿನ್. ತಾಕಾ ಸಿಂತಿಚಿಂ ಉತ್ರಾಂ ಮಿಸ್ತೆರಾಚಿ ಜಾಲ್ಲಿಂ, "ಆಮಿಂ ಆತಾಂ ವೆಚೆಂ ಖಂಯ್ಸರ್?"
"ಹ್ಯಾಚ್ ಆಡ್ ವಾಟೆನ್ ಮನ್ನಾಗುಡ್ಡಾ ಪಾರ್ಕಾಕ್ ಚಲ್ಯಾಂ ಮೆಲ್ವಿನ್. ಉದ್ಯಾನಾಂತ್ ಎಕ್ಸುರೆಂ ಬಸೊನ್ ಆಮ್ಕಾಂ ಉಲೊವ್ಯೆತ್" ಕರ್ಕಸ್ ತಾಳ್ಯಾನ್ ಸಿಂತಿ ಉಲೈಲೆಂ
ಸಿಂತಿಚೊ ತೊ ತಾಳೊ ಆಯ್ಕಾತಾನಾ ಮೆಲ್ವಿನ್ ಆಪ್ಸೊಚ್ ಕಾಂಪ್ಲೊ. ’ಕಿತೆಂಗಿ ಜಾಲಾಂ.....ಕಿತೆಂಗಿ ವಾಯ್ಟ್ಯ್ ಘಡ್ಲಾಂ......’ ತಾಚೆಂ ಅಂತಸ್ಕರ್ನ್ ಬೋಬ್ ಮಾರ್ನ್ ತಾಕಾ ಸಾಂಗ್ತಾಲೆಂ, ’ಜೆಸ್ಸಿಕ್ ಸಿಂತಿನ್ ಪಳೆಲಾಂ ಜಾಯ್ಜಾಯ್ ಆನಿಂ ತೆಂ ರಾಗಾರ್ ಜಾಲಾಂ....’
ಆಪ್ಲಿಂ ಚಿಂತ್ನಾಂ ಉಚಾರುಂಕ್ ತಾಕಾ ಧೈರ್ ಆಯ್ಲೆಂನಾ. ಸಿಂತಿ ಸಾಂಗಾತಾ ಉದ್ಯಾನಾಕ್ ವೆಚ್ಯಾ ರಸ್ತ್ಯಾಕ್ ತೊ ಲಾಗ್ಲೊ. ದೊಗಾಂಯ್ ಸುಮಾರ್ ವಾಟ್ ಮ್ಹಣಾಸರ್ ಉಲೈಲಿನಾಂತ್. ಅಖ್ರೇಕ್ ತಿ ಶಾಂತಿ ಮೋಡ್ನ್ ಅಪಧೈರಾಚೊ ಹಾಸೊ ಹಾಸ್ಲೊ ಆನಿಂ ಮ್ಹಣಾಲೊ - "ಸಿಂತಿ...ಹ್ಯಾ ವೆಳಾರ್ ಆಮಿಂ ಆಶೆಂ ದೊಗಾಂಚ್ ಕೊಣಿ ಪಳೆತಿತ್ ಆನಿಂ ಆಮ್ಚ್ಯಾ ಘರ್ಚ್ಯಾಂಕ್ ಹಿ ಖಬಾರ್ ಮೆಳಾತ್ ಜಾಲ್ಯಾರ್....?"
"ವಾಕ್ಯೆಂ ತಾಣೆಂ ಸಂಪೂರ್ಣ್ ಕೆಲೆಂ ನಾ. ಕುರಾಡಿಚ್ಯಾ ಮಾರಾಬರಿ ಸಿಂತಿ ಮಧೆಂಚ್ ಮ್ಹಣಾಲೆ "ಹಿಂ ಚಿಂತ್ನಾಂ, ಹೆಂ ಭ್ಯೆಂ, ತುಕಾ ದರ್ಯಾ ದೆಗೆರ್ ಆಸ್ತಾನಾ ದಿಸ್ಲೆಂನಾಂಗಿ ಮೆಲ್ವಿನ್?"
ಮೆಲ್ವಿನಾಕ್ ಆತಾಂ ಸ್ವಷ್ಟ್ ಜಾಲ್ಲೆಂ. "ಸಿಂತಿ ..ತುಂ ಸಾಂಗೊಂಕ್ ಸೊಧ್ತಾಯ್ ಜಾಲ್ಯಾರಿ ಕಿತೆಂ? ತುಜೊ ಮತ್ಲಾಬ್..."
"ಮ್ಹಜೊ ಮತ್ಲಾಬ್, ಇತ್ಲೊಚ್. ದರ್ಯಾ ದೆಗೆರ್ ತುಂ ತ್ಯಾ ಚೆಡ್ವಾ ಸಾಂಗಾತಾ ಸಂಸಾರಾಂತ್ ನಾತ್ಲ್ಲ್ಯಾಬರಿ ನಟನ್ ಕರ್ತಾನಾ ಕೊಣಿ ತುಕಾ ಪಳೆತಿತ್ ಮ್ಹಣ್ ಸಂಶಯ್ ಆಯ್ಲೊನಾಂಗಿ ತುಕಾ?" ಸಿಂತಿನ್ ಸಾಂಗ್ಲೆಂ.
ಮೆಲ್ವಿನಾಚಿ ಜೀಬ್ ಘುಂವ್ಲಿನಾ,. ದೊಳೆ ವಾಟಾರ್ನ್ ಸಿಂತಿಕ್ಚ್ ತೊ ಪಳೆಂವ್ಕ್ ಪಡ್ಲೊ.
[ಉದ್ಯಾನಾಂತ್ ಸಿಂತಿನ್ ತಾಕಾ ಸಾಂಗೊಂಕ್ ಚಿಂತ್ಲ್ಲೆಂ ಕಿತೆಂ? ತ್ಯಾ ಸಾಂಜೆಚ್ಯಾ ವೆಳಾ ತಾಂಚ್ಯಾ ಮಧೆಂ ಕಿತೆಂ ಅನಾಹುತ್ ಘಡ್ಲೆಂ? ದೊಗಾಂ ಚಲಿಯಾಂಚ್ಯಾ ಮಧೆಂ ಸಾಂಪಡ್ಲೆಲ್ಯಾ ಮೆಲ್ವಿನಾಚಿ ಗತ್ ಕಿತೆಂ? ತುಜಿ ಅತುರಾಯ್ ಯೆಂವ್ಚ್ಯಾ ಹಪ್ತ್ಯಾ ವರೇಗ್ ಸಾಂಬಾಳ್].
ನಿರ್ಭಾಗ್ಯಾಚೆಂ ಸ್ವಪಾಣ್: ಪ್ರಸ್ತಾವನ್. ಅವಸ್ವರ್ 1, 2, 3, 4, 5, 6
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
