ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ನಿರ್ಭಾಗ್ಯಾಚೆಂ ಸ್ವಪಾಣ್
ಅವಸ್ವರ್ 5
ಮೆಲ್ವಿನ್ ನಿಜಾಕ್ಯಿ ಘಾಬರ್ಲ್ಲೊ. ಆಪ್ಣೆಂ ಕೆಲ್ಲಿ ಮಹಾ ಚೂಕ್ ತಶಿ ಭೊಗ್ಲಿ ತಾಕಾ. ಎಕಾ ದಿಸಾಚ್ಯಾ ವಳ್ಕಿನ್ ಜರ್ ಎಕಾ ಚೆಡ್ವಾಕ್ ಹೊಟೆಲಾಕ್ ಆಪಂವ್ಚೆಂ ಜಾಲ್ಯಾರ್, ಸಂಸರಾಂತ್ ಚಲಿಯೆಚ್ಯಾ ಭರ್ಮಾಕ್ ಜಾಗೊ ಖಂಯ್ ಉರ್ಲೊ? ಚೆಡುಂ ಮ್ಹಳ್ಯಾರ್, ಲಜೆಚೆಂ ಏಕ್ ಫುಲ್, ತಾಕಾ ಆರಾಧಾನ್ ಕರ್ತಾನಾಯಿ ವ್ಹಡ್ ಭಕ್ತ್ ಆಸಾಜಾಯ್. ಖರ್ಕಸ್ ಹಾತಾಂನಿ ತೆಂ ಖುಂಟುನ್ ಖಂಯ್ ಆಲ್ತಾರಿರ್ ಮಾಳ್ತಾನಾಂಯಿ ಜಾಗ್ರುತ್ ರಾವಾಜಾಯ್. ಕಿತ್ಯಾಕ್, ನಾಜೂಕ್ ತ್ಯಾ ಫುಲಾಚ್ಯೊ ಪಾಕ್ಳ್ಯೊ ಥೊಡ್ಯಾ ಮಾರಾಕ್ ಪಿಸೊಡ್ತಾತ್. ಕಶೆಂ ಚಲಿಯೆಲಾಗಿಂ ಬಲತ್ಕಾರ್ ಜಿಕಾನಾಂಗಿ, ತಶೆಂಚ್ ಅರ್ಥ್ ನಾತ್ಲ್ಲಿ ಸಳಾವಳ್ಯಿ ಶಿಜಾನಾ. ಆನಿಂ ಆತಾಂ ಮೆಲ್ವಿನಾಕ್ಯಿ ಸ್ವಷ್ಟ್ ಜಾಲ್ಲೆಂ ಆಪ್ಣೆಂ ತಶೆಂ ತಾಕಾ ಆಪೈಲ್ಲೆಂ ಚಡ್ ಸಳ್ಗಿ ದಾಕೈಲ್ಲ್ಯಾಬರಿ ಜಾಲಿ ಮ್ಹಣ್. ತೊ ಮತಿಂತ್ಚ್ ಕಳ್ವಳ್ಳೊ. ಲಜೆಲೊ ಆನಿಂ ಸಕಾಳಿಂಚ್ಯಾ ಥಂಡ್ ವಾತಾವರಣಾಂತ್ಯಿ ಘಾಮೆಲೊ. ಜೆಸ್ಸಿ ಥಾವ್ನ್ ಜಾಪ್ಚ್ ಆಯ್ಲಿನಾ. ಆತಾಂ ತೊ ಪುರ್ತೊ ಗಳ್ಳೊ. ಆನಿಂ ನಿರಾಶೆಚ್ಯಾ ಗಡಿರ್ ಪಾವ್ತಾನಾ,.....
"ಮಾಕಾ ಮಾಫ್ ಕರ್.." ಮ್ಹಣಾಲೆಂ ಜೆಸ್ಸಿ ಧರ್ಣಿಕ್ ದೀಷ್ಟ್ ಜೊಕುನ್, "ಹೊಟೆಲಾಂತ್ ಕಾಫಿ ಪಿಯೆಂವ್ಚಿ ವಾಯ್ಟ್ ಸವಯ್ ಮ್ಹಾಕಾ ನಾ"
"ವಾಯ್ಟ್ ಸವಯ್!" ಹಾಂಕ್ರೆಲೊ ಮೆಲ್ವಿನ್.
"ವ್ಹಯ್, ತುಮ್ಕಾಂ ಚಲ್ಯಾಂಕ್ ನ್ಹಂಯ್ ಜಾವ್ಯೆತ್. ಪುಣ್ ಚಲಿಯಾಂನಿ ಹೊಟೆಲಾಂತ್ ಕಾಫಿ ಪಿಯೆಂವ್ಚಿ ಸವಯ್ ಬರಿಂ ನ್ಹಂಯ್"
"ಮ್ಹಜಿ ಚೂಕ್ ಜಾಲಿ ಜೆಸ್ಸಿ," ಮೆಲ್ವಿನ್ ಮ್ಹಣಾಲೊ. "ಹಾಂವೆಂ ತುಕಾ ಖಂಯ್ಚಾಯಿ ವಾಯ್ಟ್ ಇರಾದ್ಯಾನ್.."
"ಛೆ, ತಶೆಂ ನ್ಹಂಯ್ ಮೆಲ್ವಿನ್.." ಪಯ್ಲ್ಯಾ ಪಾವ್ಟಿಂ ಜೆಸ್ಸಿನ್ ತಾಚೆಂ ನಾಂವ್ ಆಪಯ್ತಾನಾ ವೀಜ್ ಸಕತ್ ತಾಚ್ಯಾ ಶರೀರಾಂತ್ಲ್ಯಾನ್ ವ್ಹಾಳ್ಲ್ಲ್ಯಾ ಬರಿ ಜಾಲೆಂ ಮೆಲ್ವಿನಾಕ್, "ತುಜಿ ಕಸಲಿಚ್ ಚೂಕ್ ಮ್ಹಣಾನಾ ಹಾಂವ್. ತಿ ಖಬಾರ್ ಸೊಡ್ ಆತಾಂ. ಇತ್ಲ್ಯಾ ಸಕಾಳಿಂ ತುಂ ಹಾಂಗಾಂ ಕಸೊ ಪಾವ್ಲೊಯ್?"
ಮೆಲ್ವಿನಾನ್ ಆಪ್ಣೆಂ ಆಯಿಲ್ಲಿ ಸಂಗತ್ ತಾಕಾ ತಿಳ್ಸಿಲಿ. ತಿತ್ಲ್ಯಾರ್ ಕಾರ್ಕಳಾಕ್ ವೆಚೆಂ ಬಸ್ಸ್ಯಿ ಆಯ್ಲೆಂ. "ಮ್ಹಜೆ ವರ್ವಿಂ ತುಕಾ ಇತ್ಲೊ ವೇಳ್ ರಾಕೊಂಕ್ ಪಡ್ಲೆ ನ್ಹಂಯ್ ತರ್ ತುಂ ಎದೊಳ್ ಘರಾ ಪಾವ್ತೊಯ್. ತುಕಾ ಮಸ್ತ್ ಥ್ಯಾಂಕ್ಸ್. ವೆಗಿಂಚ್ ಮೆಳ್ಯಾಂ...." ಆಶೆಂ ಸಾಂಗೊನ್ ಜೆಸ್ಸಿ ಬಸ್ಸಾರ್ ಚಡ್ಲೆಂ.
"ಆನಿಂ ಕೆದಾಳಾ ಯೆತಾಯ್?" ಧೈರಾನ್ ವಿಚಾರ್ಲೆಂ ಮೆಲ್ವಿನಾನ್.
ತಾಂಬ್ಡೆ ಜಾಲ್ಲೆಂ ಮುಖ್ ಧರ್ಣಿಕ್ ಬಾಗಾವ್ನ್ ತೆಂ ಉಲಯ್ಲೆಂ -"ಬಹುಶಃ ಪೊರ್ವಾಂ....ಬಾಯ್ " ಅಮ್ರುಕೆ ಹಾಸ್ಲೆಂ ತೆಂ.
"ಬಾಯ್" ಮೆಲ್ವಿನಾನ್ ಸಾಂಗ್ತಾನಾ ಬಸ್ಸ್ ಸುಟ್ಲೆಂ.
ಬಸ್ಸ್ ಜ್ಯೋರಾನ್ಂಚ್ ಧಾಂವ್ತಾಲೆಂ ಕಾರ್ಕಳಾಚ್ಯಾ ವಾಟೆಕ್. ಜೆಸ್ಸಿಚ್ಯಾ ಮತಿಂತ್ ವಿವಿಧ್ ಚಿಂತ್ನಾಂ ಯೆತಾಲಿಂ, ತೆಂ ನಿಯಾಳ್ತಾಲೆಂ, ಮೆಲ್ವಿನಾನ್ ಆಪ್ಣಾಕ್ ಕಾಫಿ ಪಿಯೆಂವ್ಕ್ ಆಪಯ್ಲೊ ಪ್ರಸಂಗ್.
"ಹಾಂವೆಂ ತಶೆಂ ಮ್ಹಳ್ಳೆಂ ಚೂಕ್ಗಿ...?" ತಾಕಾಚ್ ತೆಂ ವಿಚಾರ್ತಾಲೆಂ. ಕಿತ್ಯಾಕ್ ಚೂಕ್? ಮೆಲ್ವಿನಾನ್ ತೆಂ ಚಡಿತ್ ವಳ್ಕೊನ್ ನೆಣಾ. ದೋನ್ ಪಾವ್ಟಿಂ ತಾಚಿ ಭೆಟ್ ಜಾಲಿ ಮ್ಹಣ್ತಾಚ್ ಸಳಾವಳ್ ಚಡ್ ಮುಖಾರ್ ವೆಚಿ ಬರಿ ನ್ಹಂಯ್ ಕೋಣ್ ಜಾಣಾ ತೊ ಕಸಲ್ಯಾ ಸ್ವಭಾವಾಚೊ ಮ್ಹಣ್? ಚೆಡೆ ಬೊಟ್ ದಿಲ್ಯಾರ್ ಹಾತ್ ಗಿಳುಂಖ್ಯಿ ಪಾಟಿಂ ಸರಾನಾಂತ್.
ತರೀ ಮೆಲ್ವಿನ್ ಭುರ್ಗೊ ಬರೊಸೊ ದಿಸ್ತಾ. ತಾಚೆಂ ಸುಂದರ್ ರೂಪ್, ಹಾಸ್ತೆಂ ಮುಖಾಮಳ್, ಶ್ಹಾಣಿಂ ಆನಿಂ ಮೊವಾಳ್ ಉತ್ರಾಂ...... ಜೆಸ್ಸಿ ಬಾರೀಕ್ ಲಜ್ಲೆಂ. ಪರ್ಕಿ ಎಕಾ ತರ್ನಾಟ್ಯಾ ವಿಶ್ಯಾಂತ್ ಚಡಿತ್ ನಿಯಾಳ್ಚೆಂ ಚೂಕ್. ಆಜ್ ತಾಚಿ ವಳೊಕ್ ಜಾಲಿ, ಆನಿಂ ತೊ ಉಲೈಲೊ. ಫಾಲ್ಯಾಂ ತಾಚಿ ಚಿಂತ್ನಾಂ ಕಶಿಂ ರಾವ್ತಿತ್ ದೇವ್ ಜಾಣಾ. ತೊ ಶಿಕ್ಪಿ, ಕೊಲೆಜಿಂತ್ ಶಿಕ್ತಾ, ಪುಣ್ ಶಿಕಾಪ್ ಮನ್ಶಾಚಿ ಮತ್ ಘುಂವ್ಡಾಯ್ತಾ ಖಂಯ್.
ಬಸ್ಸ್ ಧಾಂವ್ತಾಲೆಂ ಆನಿಂ ತೆಂ ಚಿಂತ್ತಾಲೆಂ. ಮೆಲ್ವಿನಾ ವಿಶ್ಯಾಂತ್ ಕಿತ್ಲೆಂ ಚಿಂತ್ಲೆಗಿ ತಿತ್ಲೆಂಚ್ ತೆಂ ಲಜೆತಾಲೆಂ. ತಾಚ್ಯಾ ವಿಶ್ಯಾಂತ್ಲಿ ಚಿಂತ್ನಾಂ ಕಾಡ್ನ್ ಉಡೊಂವ್ಕ್ ತೆಂ ಪ್ರಯತ್ನ್ ಕರ್ತಾಲೆಂ, ತರೀ ತ್ಯಾ ಸಾಧನಾಂತ್ ತೆಂ ಸಲ್ವಾಲೆಂ.
ಆನಿಂ ತ್ಯಾ ವಾಟೆನ್ ಉರ್ವಾ ವೆಚೆಂ ಬಸ್ಸ್ಯಿ ಧಾಂವ್ತಾಲೆಂ ಆನಿಂ ಮೆಲ್ವಿನ್ಯಿ ನಿಯಾಳ್ತಾಲೊ. ಜೆಸ್ಸಿಚಿಂ ಉತ್ರಾಂ ಆಯ್ಕೊನ್ ವಿಜ್ಮಿತ್ ಜಾಲ್ಲೊ ತೊ. ಹಳ್ಳೆಂತ್ ಜಲ್ಮೊನ್ ವಾಡ್ಲ್ಲೆಂ ಚೆಡುಂ, ತರೀ ತಾಚಿ ಚಾಲ್ ಚಮ್ಕಾಣ್ ಆನಿಂ ಉಲೊವ್ಣೆಂ ಶಹರಾಂತ್ಲ್ಯಾಂಕ್ ಲಜೆಕ್ ಘಾಲ್ಚೆಂ ತಸಲೆಂ. ಕಸಲೆಂ ಆಕರ್ಶಿಕ್ ವ್ಯಕ್ತಿತ್ವ್ ಆನಿಂ ಮಾಣ್ಸುಗೆಚಿಂ ಉತ್ರಾಂ-
"ಚಲಿಯಾಂನಿ ಹೊಟೆಲಾಂತ್ ಕಾಫಿ ಪಿಯೆಂವ್ಚಿ ಸವಯ್ ಬರಿ ನ್ಹಂಯ್"
ಹಾಸೊ ಆಯ್ಲೊ ತಾಕಾ. ತರ್ ಸಿಂತಿ..... ತೆಂಯಿ ಚೆಡುಂಚ್. ಕೊಲೆಜಿಂತ್ ಶಿಕ್ಚಿಂ ಹೆರ್ ಚೆಡ್ವಾಂ....ತಿಂಯಿ ಚೆಡ್ವಾಂವ್. ಪುಣ್ ತಾಂಕಾ ಕಿತ್ಲೆಶಾ ಪಾವ್ಟಿಂ ಚಲ್ಯಾಂ ಸಾಂಗಾಂತಾ ಹೊಟೆಲಾಂತ್ ತಾಣೆಂ ಪಳೆಲಾಂ. ತರ್ ತಿ ಚೂಕ್ಗಿ? ವೇಸ್ ಭಂಗೊವ್ನ್, ಮಾಣ್ಸುಗಿ ಸಾಂಡುನ್ ಥೊಡ್ಯಾ ಕೊಲೆಜಿಕ್ ವೆಚ್ಯಾ ಚಲಿಯಾಂನಿ ಅದಾರ್ಚಿಂ ಕರ್ತುವಾಂ ನಿಯಾಳ್ತಾನಾ ಮೆಲ್ವಿನಾನ್ ಚಿಂತ್ಲೆಂ - ’ಹೊ ಕೊಲೆಜಿಚ್ಯಾ ಶಿಕ್ಪಾಚೊ ಪರಿಣಾಮ್ಗಿ? ಕಸಲೊ ಭೇದ್ - ಚಲಿಯೆ ಆನಿಂ ಚಲಿಯೆ ಮಧೆಂ!’
’ಚಲಿಯೊ ಹೆಂ ಸಕ್ಕಡ್ ಕರ್ತಾತ್ ಚಲೆ ಉತ್ತೇಜನ್ ದಿತಾತ್ ಮ್ಹಣ್. ನ್ಹಂಯ್ ತರ್ ಅಸಲಿಂ ಗಲೀಜ್ ಕರ್ತುವಾಂ ಕಿತ್ಯಾಕ್ ತಿಂ ಅದಾರ್ತಾತ್? ಏಕ್ ತಾಳೊ ತಾಕಾ ವಿಚಾರ್ತಾಲೊ.
’ನಾ.....’ ಮೆಲ್ವಿನ್ ತೊ ತಾಳೊ ಖಂಡನ್ ಕರ್ನ್ ಮ್ಹಣಾಲೊ. ’ಚಲ್ಯಾಂಕ್ ವೊಡ್ಚ್ಯಾ ಖಾತಿರ್ಚ್ ಚೆಡ್ವಾಂ ಫೆಶನಾಂ ಕರ್ತಾತ್. ಖಂಯ್ ಫೆಶನ್ ಆಸ್ತಾಗಿ, ಥಂಯ್ ಭುಲ್ ಆಸ್ತಾ, ಆನಿಂ ತ್ಯಾ ವೆಳಾರ್ ಗರ್ವಿ ಬೊಕ್ರೆ ಜಾತಾತ್, ಭಕ್ತಾಕ್ಯಿ ಕೊಂತಾಚಿ ಮಣಿ ಲೆಕ್ ಚುಕ್ತಾ, ಸಾಂತಾಕ್ಯಿ ತಾಳ್ಣಿ ಯೆತಾ. ಚಲಿಯೆಚೆ ದೋನ್ ದೊಳೆ......ದೋನ್ ಹಜಾರ್ ಯಂತ್ರಾಂಚ್ಯಾಕಿ ಬಳಾಧಿಕ್ ...ಚಲಿಯಾಂಕ್ಚ್ ಗುನ್ಯಾಂವ್ಕಾರ್ ಮ್ಹಣಾಜಾಯ್.’
’ಹೊಟೆಲಾಂತ್ ಕಾಫಿ ಪಿಯೆಂವ್ಚಿ ಚಲಿಯಾಂಚಿ ಚೂಕ್. ಸ್ತ್ರೀ ಜಾತಾಚ್ ಜೆಸ್ಸಿ ಮುಖಾಂತ್ರ್ ಸ್ತ್ರೀ ಜಾತಿಚೆರ್ ಬದ್ಲಮ್ ಮಾಂಡ್ತಾಲಿ.
ಖಂಯ್ಚೆಂ ಸತ್ ಆನಿಂ ಖಂಯ್ಚೆಂ ಫಟ್? ಸಿಂತಿ....ತೆಂ ಸುಂದರ್. ಜೆಸ್ಸಿ ....ತೆಂಯಿ ಸೊಬಿತ್. ಪುಣ್ ತಾಂಚೆಮಧೆಂ ಬೇದ್ ಕಿತ್ಲೊ! ಎಕ್ಲೆಂ ಪಯ್ಶ್ಯಾಂಚ್ಯಾ ಹಂಕಾರಾನ್, ರುಪಾಚ್ಯಾ ದವ್ಲತೆನ್, ಸಂಸಾರಾಕ್ ತಕ್ಲಿ ಉಕೊಲ್ನ್ ಚಲ್ತಾಲೆಂ. ಪಿಸೊಳ್ಯಾಬರಿ ಫುಲಾ ಥಾವ್ನ್ ಫುಲಾಕ್ ಉಬ್ತಾಲೆ. ಆನಿಂ ದುಸ್ರೆಂ ಉಬ್ರಾಂತ್ಲೆಂ ಸಾಳಕ್. ಹಳ್ಳೆಂತ್ ವಾಡ್ಲ್ಲೆಂ., ಕಾಂಟ್ಯಾ ಮೊಲ್ಯಾ ಮಧೆಂ ವ್ಹಡ್ ದೀಷ್ಟ್ ಧರ್ಣಿಕ್ ಜೊಕ್ಲ್ಲಿ. ಪುಣ್ ತ್ಯಾ ದಿಷ್ಟಿಂತ್ ನಮ್ರತಾ ಆಸ್ಲ್ಲಿ, ಶೆಗುಣ್ ಆಸ್ಲ್ಲೆ.
ಎಕ್ಲೆಂ ಸಂಸಾರಾರ್ ನಾಂವಾಡ್ದಿಕ್ ಜಾಂವ್ಕ್ ಪೆಚಾಡ್ತಾಲೆಂ. ದುಸ್ರೆಂ ಸಂಸಾರಾರ್ ಆಸಾಗಿನಾ ಮ್ಹಣ್ ಕಳಿತ್ ನಾತ್ಲ್ಲೆಂ. ತರೀ ದೊಗಾಂಯಿ ಸುಂದರ್. ಎಕ್ಲ್ಯಾಚಿ ಗರ್ವಾಚಿ ಸೊಭಾಯ್ ತರ್, ದುಸ್ರ್ಯಾಚಿ ಖಾಲ್ತೆಪಣಾಚಿ.
ಹ್ಯಾಚ್ ಚಿಂತ್ನಾಂನಿ ಮಗ್ನ್ ಜಾವ್ನ್ ತೊ ಘರಾ ಆಯ್ಲೊ. ಘರ್ ಗಿಳುಂಕ್ ಆಯಿಲ್ಲ್ಯಾಬರಿ ತಾಕಾ ದಿಸ್ಲೆಂ. ಆಂಟಿ ಆನಿಂ ಆಂಕಲ್ ನಾತ್ಲ್ಲ್ಯಾ ವರ್ವಿಂ ಉಬ್ಗೊಣ್ ಜಾಲಿ ತಾಕಾ. ಜಿಲ್ಲಿಬಾಯ್ ಬಿತರ್ ಥಾವ್ನ್ ಯೇವ್ನ್ ಮ್ಹಣಾಲಿ "ಮೆಲ್ವಿನ್, ಆಂಟಿ ಆನಿಂ ಆಂಕಲಾಕ್ ಬಸ್ಸಾರ್ ಸಮಾ ಜಾಗೊ ಮೆಳ್ಳೊಗಿ? ಕಾಂಯ್ ತೊಂದ್ರೆ ಜಾಂವ್ಕ್ನಾಂತ್ಮೂ?"
"ನಾ ಮಾಂಯ್, ಬಸ್ಸಾರ್ ಬರೊ ಜಾಗೊ ಮೆಳ್ಳೊ ತಾಂಕಾಂ"
"ತಾಂಚೆ ಪಯ್ಣ್ ಬರ್ಯಾ ಥರಾನ್ ಜಾಲ್ಯಾರ್ ಪುರೊ. ಹೆಂ, ಆಂಟಿ ಕಿತೆಂ ಮ್ಹಣಾಲಿರೆ ತುಕಾ? ವಿಚಾರ್ಲೆಂ ತಿಣೆಂ.
"ಮ್ಹಣ್ಚೆಂ ಕಿತೆಂ? ಕಾಂಯ್ ನಾ..." ಮೆಲ್ವಿನಾನ್ ಜಾಪ್ ದಿಲಿ.
"ಹುಂ, ಆತಾಂ ಪಯ್ಲೆಂ ಜೇವ್. ಇಸ್ಕೊಲ್ ಸುರು ಜಾಂವ್ಕ್ ಕಿತ್ಲೆಂ ದೀಸ್ ಆಸಾತ್ರೆ ಪುತಾ?"
"ಏಕ್ ಹಪ್ತೊ ಮಾಂಯ್" ಆಶೆಂ ಮ್ಹಣೊನ್ ತೊ ಜೇಂವ್ಕ್ ಗೆಲೊ.
ಜೆವ್ತಾ ನಾಂಯೀ ತೊ ಜೆಸ್ಸಿಕ್ಚ್ ನಿಯಾಳ್ತಾಲೊ. ಸಿಂತಿ ಪ್ರಾಸ್ ತೆಂಚ್ ಚಡ್ ಸೊಬ್ಚೆಂ ತಾಕಾ. ಎಕಾ ಉತ್ರಾನ್ ಜೆಸ್ಸಿಚ್ಯಾ ಮೊಗಾರ್ಚ್ ಪಡ್ಲೊ ತೊ. ಅಸಲ್ಯಾ ಮೊಗಾಕ್ ’ಪಯ್ಲ್ಯಾ ದಿಷ್ಟಿಕ್ ಮೋಗ್’ ಮ್ಹಣ್ತಾತ್.
ಮೋಗ್....ಮೋಗ್ ಮ್ಹಳ್ಯಾರ್ ಕಿತೆಂ ಗಾಯ್? ತಾಚೆಂ ಕಾಳಿಜ್ ಕಿತೆಂಗಿ ಉಲೊ ದಿತಾಲೆಂ. ಹೊ ಉಲೊ, ತಿಂ ಆವ್ಯಕ್ತ್ ಥರಾಚಿಂ ಚಿಂತ್ನಾಂ - ಮೊಗಾಚೆಂ ಆರಂಭ್ ಮ್ಹಣ್ ದಿಸ್ತಾ! ಮೊಗಾಕ್ ವರ್ಣುಂಕ್ ಮನಿಸ್ ಸಲ್ವಾಲಾ. ಕಿತ್ಯಾಕ್, ಮೊಗಾ ವಿಷ್ಯಾಂತ್ ಎಕೆಕ್ಲ್ಯಾಚಿ ಅಭಿಪ್ರಾಯ್ ವೆವೆಗ್ಳಿ ಆಸ್ತಾ. ಮೋಗ್ ಮ್ಹಳ್ಯಾರ್ ದೊಳ್ಯಾಂಕ್ ದಿಸ್ಚಿ ವಸ್ತ್ಯಿ ನ್ಹಂಯ್. ಬರೇ ಕಾಳ್ಜಾಚಿಂ ಭೊಗ್ಣಾಂ ಆನಿಂ ಉಲೊ. ಜಶೆಂ ಮನಿಸ್ ಅತ್ಮ್ಯಾಕ್ ಪಳೆಂವ್ಕ್ ಸಕಾನಾ. ತರಿಕೀ ತಿ ಆಸಾ ಮ್ಹಣ್ ಪಾತ್ಯೆತಾ, ತಶೆಂಚ್ ಕಾಳ್ಜಾಚ್ಯಾ ಹ್ಯಾ ಅವ್ಯಕ್ತ್ ಉಲ್ಯಾಕ್ ಮೋಗ್ ಮ್ಹಣ್ ಸಮ್ಜಾಲೊ ಮೆಲ್ವಿನ್.....ತಾಚೆಂ ಕಾಳಿಜ್ ಚಡ್ ಆನಿಂ ಚಡ್ ಜೆಸ್ಸಿ ಕುಶಿನ್ ವೊಡುಂಕ್ ಲಾಗ್ಲೆಂ. ತ್ಯಾ ಅವೇಗಾಕ್ ಸಿಂತಿಕ್ ತೊ ವಿಸರ್ಲೊ. ತಾಣೆಂ ಕೆಲ್ಲೊ ಅಕ್ಮಾನ್ ಆನಿಂ ನಿಂದಾ ಸರ್ವ್ ತೊ ವಿಸರ್ಲೊ.
’ಮೆಲ್ವಿನ್, ಮೋಗ್ ಮ್ಹಳ್ಯಾರ್ ಕಿತೆಂ ಖೆಳಾಚಿ ವಸ್ತ್ ಮ್ಹಣ್ ಸಮ್ಜಾತಾಯ್?’ ಏಕ್ ಬಿತರ್ಲೊ ತಾಳೊ ತಾಕಾ ಬೆಷ್ಟಯ್ತಾಲೊ. ’ಎಕಾ ಹಾತಾನ್ ತಾಳಿಯೊ ಪೆಟುಂಕ್ ಸಾಧ್ಯ್ ಆಸಾಗಿ ತುಕಾ? ಸಿಂತಿಚೊ ತುಕಾ ಮೋಗ್ ಆಸ್ಲ್ಲೊ, ಆತಾಂ ನಾಂ.ಕಿತ್ಯಾಕ್, ಆತಾಂ ತುವೆಂ ಜೆಸ್ಸಿಕ್ ದೆಖ್ಲಾಂಯ್. ಹ್ಯಾ ವೊಡ್ನೆಕ್ ಮೋಗ್ ಮ್ಹಣಾನಾಂತ್. ಬಗಾರ್ ಚಲಿಯೆಚ್ಯಾ ಸಾಂಗಾತಾಚಿ ಆಶಾ ಮ್ಹಣ್ತಾತ್. ಕಿತ್ಯಾಕ್ ಪ್ರಾಯೆಕ್ ಪಾವ್ಲ್ಲ್ಯಾ ತರ್ನಾಟ್ಯಾಕ್ ಎಕಾ ಚಲಿಯೆಚಿ ಗರ್ಜ್ ಭೊಗ್ತಾ. ತಶೆಂಚ್ ಚಲಿಯಾಂಕ್ಯಿ ಚಲ್ಯಾಂಚೊ ಸಾಂಗಾತ್ ಜಾಯ್ ದಿಸ್ತಾ. ಕಿತ್ಯಾಕ್, ಆವಯ್-ಬಾಪುಯ್ಲಾಗಿಂ ಸಾಂಗೊಂಕ್ ಜಾಯ್ನಾತ್ಲ್ಲೆ, ಇಷ್ಟಾ ಮಂತ್ರಾಂಲಾಗಿಂ ಉಚಾರುಂಕ್ ಲಜ್ ದಿಸ್ಚೆ ವಿಷಯ್ ಮೊಗಾಚ್ಯಾ ಚಲಿಯೆಲಾಗಿಂ ತೊ ಉಲೈತಾ. ಆಪ್ಲಿ ಆಶಾ, ನಿರಾಶಾ, ಫುಡಾರ್ ಆನಿಂ ಪಾಟ್ಲೆಂ, ಲಜೆವಿಣೆ ತೊ ಚಲಿಯೆಲಾಗಿಂ ವಿಮರ್ಸೊ ಕರ್ತಾ....ತ್ಯಾ ಪರಿಂ ಎಕಾಮೆಕಾ ವಿರೋಧ್ ಜಾತಿಚ್ಯಾ ವ್ಯಕ್ತಿಚಿ ಗರ್ಜ್ ದಿಸ್ತಾ ವ್ಹಯ್. ಪುಣ್ ಮೆಳ್ಲ್ಲ್ಯಾ ಚಲಿಯೆಚೊ ಸಾಂಗಾಂತ್ ಆಶೆಂವ್ಚೊ ಮೋಗ್ ನ್ಹಂಯ್. ಜೆಸ್ಸಿಯಿ ತುಜ್ಯಾ ವಿಷ್ಯಾಂತ್ ಆಸಲಿಂಚ್ ಚಿಂತ್ನಾಂ ಚಿಂತ್ತಾಗಿ? ನಾ. ಕಿತ್ಯಾಕ್? ಸಿಂತಿನ್, ತುಂ ತುಕಾ ವಳ್ಕಿಚೊ ಜಾಲ್ಯಾರ್ಯಿ, ಕಿತ್ಯಾಕ್ ತುಜೊ ಮೋಗ್ ಕರುಂಕ್ ನಾ?’ ತ್ಯಾ ತಾಳ್ಯಾಕ್ ಮೆಲ್ವಿನ್ ಚಿಂತ್ನಾಂನಿ ಘುಸ್ಪಡ್ಲೊ ಆನಿಂ ಜಾಪ್ ದೀವ್ನ್ ಮ್ಹಣಾಲೊ.-
’ಮೋಗ್ ಖಂಯ್ಚ್ಯಾ ವೆಳಾರ್ ಪ್ರಾರಂಭ್ ಜಾತಾ ಮ್ಹಳ್ಳೆಂ ಕೋಣ್ಂಚ್ ನೆಣಾ. ಹಾಂವ್ ಜೆಸ್ಸಿಚೊ ಖಂಡಿತ್ ಮೇಗ್ ಕರ್ತಾಂ....’
’ಪಿಶಿ ಚಿಂತ್ನಾಂ; ಆನಿಂ ತುಂ ಚಿಂತ್ತಾಯ್ ತೆಂಯಿ ತುಜೊ ಮೋಗ್ ಕರ್ತೆಲೆಂ ಮ್ಹಣ್’!’
’ಕಿತ್ಯಾಕ್ ಹಾಂವ್ ಪಿಸೊ?’
’ದುಬ್ಳೊ ಗರೀಬ್ ತುಂ. ಸುಂದರ್ ಚಲಿಯೆಕ್ ಆಶೆತಾಯ್..ಹ..ಹ್ಹ....ಹಾ..!’
’ಗರೀಬಾಕ್ ಚಿಂತ್ನಾಂಚೆ ಸ್ವತಂತ್ರ್ ನಾಂಗಿ? ಪಯ್ಶಾಂಚೆಂ ಬಳ್ ತಾಕಾ ನಾ ಜಾವ್ಯೆತ್. ಪುಣ್ ಸ್ವಾಭಿಮಾನಾಕ್ ಆನಿಂ ಸ್ವೇಚ್ಛೆಕ್ ಖಡೊ ಘಾಲುಂಕ್ ನಾ...’
’ಗರೀಬ್ ರಾಯ್ ಜಾಂವ್ಕ್ಯಿ ಆಶೆತಾತ್ ಆನಿಂ ಸ್ವಪ್ಣಾಂಕ್ ರಾಜ್ವಟ್ ಚಲೈತಾತ್’
’ಹಾಂವ್ ಗರೀಬ್ ಜಾಲ್ಯಾರ್ಯಿ ರೂಪಾನ್ ಸುಂದರ್ ನಾಂಗಿ? ರೂಪ್ ದುಡ್ವಾಚ್ಯಾಕೀ ಶ್ರೇಷ್ಟ್.’
’ದೆಕುನ್ಂಚ್ ತೆಂ ನಶ್ವರ್....ದೋನ್ ದಿಸಾಂಚಿ ತಾಚಿ ಬಾಳ್ವಿ. ತುಜ್ಯಾ ರುಪಾಕ್ ಸಿಂತಿನ್ ಕಿತೆಂ ಇನಾಮ್ ದಿಲೆಂ? ಪಿಸೊ ತುಂ!’
’ಪಿಸೊ!.....ಪಿಸೊ!!...’ ಸಗ್ಳೊ ಸಂಸಾರ್ಚ್ ಹೆಡಾವ್ನ್ ಹಾಸ್ತಾಶೆಂ ಬೊಗ್ಲೆಂ ತಾಕಾ. ತಾಣೆಂ ಆಶೆಂವ್ಚೆಂ ಎಕಾ ನಿರ್ಭಾಗ್ಯಾಂಚೆಂ ಸ್ವಪಾಣ್ ತಶೆಂ ದಿಸ್ಲೆಂ ತಾಕಾ. ತಾಚಿ ತಕ್ಲಿ ಜ್ಯೋರಾನ್ ಪೊಡೊಂಕ್ ಲಾಗ್ಲಿ ಆನಿಂ ಕಳ್ವಳೆ ಸೊಸುಂಕ್ ತಾಂಕನಾಸ್ತಾಂ ತೊ ಜಾಲಾಂತ್ ಯೇವ್ನ್ ಉಬೊ ರಾವ್ಲೊ.
ನಿರಾಶೆಂತ್ ಏಕ್ ಭರ್ವಶ್ಯಾಚೆಂ ಕೀರ್ಣ್ ತಾಣೆಂ ದೆಖ್ಲೆಂ. ವ್ಹಯ್ ಸಂಸಾರ್ ಲಬ್ದಾಲಾ ಖುಶಾಲಾಯೆಕ್. ಪುಣ್ ಜೆಸ್ಸಿ ನ್ಹಂಯ್...ದೆಕುನ್ಂಚ್ ಆಪ್ಣೆಂ ಕಾಫಿ ಪಿಯೆಂವ್ಕ್ ಹೋಟೆಲಾಕ್ ಆಪಯ್ತಾನಾ ಯೇಂವ್ಕ್ ನಾ ತೆಂ. ಜೆಸ್ಸಿ ಸಂಸಾರಾಕ್ ಲಬ್ದೊಂಕ್ ನಾ....ನಾ....ಖಂಯ್ಚಾಕೀ ತೆಂ ಕೊಡಿಯಾಳ್ ಪಾಟಿಂ ಯೇಂವ್ದಿ. ಉಪ್ರಾಂತ್ ಖಂಡಿತ್ ಮ್ಹಜೆಂ ಮನ್ ಹಾಂವ್ ಉಚಾರ್ತಾಲೊಂ.
ತೊ ಜಾಲಾಂತ್ ಪಾಸಾಯೊ ಮಾರ್ತಾಲೊ. ಜಿಲ್ಲಿಬಾಯ್ ಬಿತರ್ ರಾಂದ್ಪಾಚ್ಯಾ ಕುಡಾಂತ್ ಆಸ್ಲ್ಲಿ. ಸಟ್ಟ್ ಕರ್ನ್ ಮೆಲ್ವಿನಾಚ್ಯಾ ಚಿಂತ್ನಾಂಕ್ ಭಂಗ್ ಜಾಲೊ. ತಾಂಚ್ಯಾ ಜಾಲಾಂತ್ ಫುಡ್ ಕರ್ನ್ ದಿಸ್ಚ್ಯಾ ಮನ್ವೆಲಾಬಾಚ್ಯಾ ಘರ್ಚ್ಯಾ ಪಾಟ್ಲ್ಯಾ ಜನೆಲಾಂ ಥಾವ್ನ್ ಕ್ಷೀಣ್ ತಾಳೊ ತಾಕಾ ಆಯ್ಕಾಲೊ - "ಮೆಲ್ವಿನ್...."
ತೊ ಉಡೊನ್ ಪಡ್ಲೊ. ಸಿಂತಿ....ಸಿಂತಿ....ತಾಕಾ ಆಪಯ್ತಾ. ಚಿಂತುಂಕ್ ನಜೊ ಜಾಲ್ಲೊ ಮಿಸ್ತೆರ್. ತಾಚೆಂ ಶರೀರ್ ಕಾಂಪ್ಲೆಂ. ಕಾಂಪ್ಚಿ ದೀಷ್ಟ್ ತಾಣೆಂ ಉಕೊಲ್ಲಿ. ಸಿಂತಿ ತಾಕಾ ಹಾತ್ ಭಾಸ್ ಕರ್ತಾಲೆಂ - ಲಾಗಿ ಯೇಂವ್ಕ್.
ಮೆಲ್ವಿನಾಚಿಂ ಮೆಟ್ಯಾಂಯಿ ಕಾಂಪ್ತಾಲಿಂ. ಚಡಿತ್ ವಿಚಾರ್ ಕರುಂಕ್ ತಾಕಾ ಸಕತ್ ನಾತ್ಲ್ಲಿ. ತೊ ಲಾಗಿಂ ಪಾವ್ಲೊ.
"ಘರಾ ಯೆ ಮೆಲ್ವಿನ್. ತುಜೆಲಾಗಿಂ ಉಲೊಂವ್ಕ್ ಆಸಾ..."
ತೊ ನಿಜಾಕೀ ಘಾಬಾರ್ಲ್ಲೊ...ಗಜಾಲ್ ಕಿತೆಂ? ತಾಕಾ ಧಡ್ದಡ್ಯಾಂ ಸಾಂಗಾಂತಾ ಕುಲ್ಕೊಲೊಯಿ ಪ್ರಾರಂಭ್ ಜಾಲೊ. ’ಪೊರ್ಚೆಂ ಘಡಿತ್ ಸಿಂತಿನ್ ಮಾನ್ವೆಲಾಬಾಚ್ಯಾ ಕಾನಾಕ್ ಘಾಲಾಂಗಾಯ್..? ಮೆಲೊಂಮೂ ದೆವಾ!’ ತರೀ, ಚಿಂತುನ್ ರಾವೊಂಕ್ ತೊ ವೇಳ್ ನ್ಹಂಯ್....ಕೊಸಾಳ್ಚೆಂ ಧಯ್ರ್ ಎಕ್ಟಾಂಯ್ ಕರ್ನ್ ಸಿಂತಿಗೆಲ್ಯಾ ಘರಾಚ್ಯಾ ಮುಖ್ಲ್ಯಾ ಕುಶಿಕ್ ತೊ ಪಾವ್ಲೊ ಆನಿಂ ತೊ ಮೆಟಾಂ ಚಡ್ಲೊ.
ಮುಖ್ಲೆಂ ದಾರ್ ಉಗ್ತೆಂ ಆಸ್ಲ್ಲೆಂ. ಆನಿಂ ಸಿಂತಿ ಅಮ್ರುಕೆ ಹಾಸ್ತಾಲೆಂ. "ಪಪ್ಪಾ ಘರಾ ನಾ ಮೆಲ್ವಿನ್. ಆಪ್ರೂಪ್ ಆಯಿಲ್ಲ್ಯಾ ತುಕಾ ಸ್ವಾಗತ್.."
ಪಪ್ಪಾ ನಾ..?"
"ವ್ಹಯ್...ತುಜೆಲಾಗಿಂ ಥೊಡೆಂ ಉಲೊಂವ್ಚ್ಯಾ ಇರಾದ್ಯಾನ್ ಹಾಂವೆಂ ತುಕಾ ಆಪಯ್ಲೆಂ. ಆಮಿಂ ಹಾಂಗಾಂ ಬಸೊನ್ ಉಲೊಂವ್ಚೆಂ ನಾಕಾ. ಬಿತರ್ ಮ್ಹಜ್ಯಾ ಕುಡಾಕ್ ಯಾ....ಯೆ, ಬಿತರ್ ಯೆ..."
ಬೊಂಬ್ಯಾಬರಿ ತೊ ಸಾಲ್ ಪ್ರವೇಶ್ ಜಾಲೊ. "ಬಿಯೆನಾಕಾ, ಪಪ್ಪಾ ಸಾಂಜೆಚ್ಯಾ ಪಯ್ಲೆಂ ಯೆಂವ್ಚೊ ನಾ,.." ಮೆಲ್ವಿನ್ ಕಾಂಪ್ತಾಲೊ.
"ತುಂ ಕಿತ್ಯಾಕ್ ಬಿಯೆತಾಯ್ ಹಾಬಾ..? ಹಾಂವ್ ಕಾಂಯ್ ತುಕಾ ಖಾಯ್ನಾ.." ತಾಣೆಂ ತಾಚೊ ಹಾತ್ ಧರ್ನ್ ಮ್ಹಳೆ, "ಯೆ ಮ್ಹಜ್ಯಾ ಕುಡಾಕ್ ಯೆ..."
ಆನಿಂ ಹಾತ್ ದರ್ನ್ಂಚ್ ತಾಕಾ ವೋಡ್ನ್ ವರ್ನ್ ಗೆಲೆಂ ತೆಂ. ಮೆಲ್ವಿನ್ ಬಾರಾಧಿಕ್ ಉಸ್ವಾಸ್ ಸೊಡ್ತಾಲೊ. ಆಪ್ಲೊ ಹಾತ್ ಸಿಂತಿಚ್ಯಾಂತ್ ಆಸ್ತಾನಾ ತಾಚ್ಯಾ ಕುಡಿಂತ್ ವಿಚಿತ್ರ್ ಭೊಗ್ಣಾಂ ಜಾತಾಲಿಂ, ಸಿಂತಿಚೆಂ ಹೆಂ ವಿಶೇಷ್ ನಡ್ತೆಂ, ಸ್ವಪ್ಣಾಂತ್ಯಿ ತಾಣೆಂ ಚಿಂತುಕ್ ನಾತ್ಲ್ಲೆಂ... ಕಾಂಯ್ ಆಪಾಯ್ ಕರಿಶೆಂನಾಮೂ..?
"ಬಸ್ ...ಮೆಲ್ವಿನ್" ತಾಣೆಂ ಮೆಲ್ವಿನಾಕ್ ಕದೆಲ್ ದಾಕಯ್ಲೆಂ. ಆನಿಂ ಸಿಂತಿ ಆಪ್ಲ್ಯಾ ಖಟ್ಲ್ಯಾರ್ ಬಸ್ಲೆಂ.
"ತುಕಾ ನಿಜಾಕೀ ಆಜ್ಯಾಪ್ ಜಾಲಾಂ ಆಸ್ತೆಲೆಂ, ಮ್ಹಜೆಂ ಆಯ್ಚೆಂ ನಡ್ತೆಂ ಪಳೆವ್ನ್," ಮೆಲ್ವಿನಾಚ್ಯಾ ದೊಳ್ಯಾಂಕ್ಚ್ ದೀಷ್ಟ್ ಲಾವ್ನ್ ತೆಂ ಉಲಯ್ಲೆಂ, "ಹಾಂವೆಂ ತುಕಾ ಆಪಯ್ಲೆಂ ದುಸ್ರ್ಯಾ ಇರಾದ್ಯಾನ್ ನ್ಹಂಯ್, ಬಗಾರ್, ಪೋಯ್ರ್ಚ್ಯಾ ಸಂಗ್ತಿಂ ವಿಶ್ಯಾಂತ್ ಮ್ಹಜೊ ಪಶ್ಚತ್ತಾಪ್ ಉಚಾರುಂಕ್. ಮ್ಹಜಿ ನಿಜಾಕೀ ಚೂಕ್ ಜಾಲಿ. ಮ್ಹಾಕಾ ಮಾಫ್ ಕರ್"
"ತ್ಯಾ ವಿಶ್ಯಾಂತ್ ಮ್ಹಾಕಾ ಕಾಂಯ್ ಬೆಜಾರ್ ನಾ..." ಮೆಲ್ವಿನಾನ್ ಕಪಾಲಾಚೊ ಘಾಮ್ ಪುಸ್ಲೊ. ಸಿಂತಿಚಿಂ ಉತ್ರಾಂ ಆಯ್ಕೊನ್ ಗೆಲ್ಲೊ ಜೀವ್ ಪಾಟಿಂ ಆಯಿಲ್ಲ್ಯಾಬರಿ ಬೊಗ್ಲೆಂ ತಾಕಾ.
"ಕಿತೆಂಗಿ ಭುರ್ಗ್ಯಾ ಬುದಿನ್ ತಶೆಂ ಹಾಂವೆಂ ಮ್ಹಳೆಂ ಮೆಲ್ವಿನ್. ಪುಣ್, ಉಪ್ರಾಂತ್ ಮ್ಹಜ್ಯಾ ಚುಕಿಕ್ ಹಾಂವ್ ರಡ್ಲಿಂ."
"ತ್ಯಾ ವಿಶ್ಯಾಂತ್ ತುಂ ಪ್ರಸ್ತಾಪ್ಚ್ ಕರಿನಾಕಾ ಸಿಂತಿ," ಮೆಲ್ವಿನ್ ಸಾಂಗಾಲಾಗ್ಲೊ. "ಜಾಲ್ಲೆಂ ತೆಂ ಆಮಿಂ ವಿಸರ್ಯಾಂ. ಬರೆಂ ತರ್, ಹಾಂವ್ ಚಲ್ತಾಂ"
"ನಾ, ಥೊಡೊ ವೇಳ್ ಬಸ್. ಹಾಂವ್ ತುಕಾ ಪಿಯೆಂವ್ಕ್ ಕಾಂಯ್ ತ್ರೀ ಹಾಡ್ಟಾಂ. ಬೊಟ್ಲೆರ್ ಮಾರ್ಕೆಟೆಕ್ ಗೆಲ್ಲೊ ಎದೊಳ್ಯಿ ದಿಸಾನಾ..." ತೆಂ ಉಟೊನ್ ರಾಂದ್ಚ್ಯಾ ಕುಡಾಕ್ ಗೆಲೆಂ.
ಕಸಲಿ ಬದ್ಲಾವಣ್! ಮೆಲ್ವಿನ್ ನಿಜಾಕೀ ವಿಜ್ಮಿತ್ ಪಾವ್ಲ್ಲೊ. ಆಪ್ಣೆಂ ತ್ಯಾ ರಾತಿಂ ಉಲೈಲ್ಲಿಂ ಉತ್ರಾಂ, ಸಿಂತಿಚ್ಯಾ ಕಾಳ್ಜಾಂತ್ ರೊಂಬ್ಲ್ಯಾಂತ್ ಆಸ್ತೆಲಿಂ. ವ್ಹಯ್, ತೆಂ ಆತಾಂ ಸಂಪೂರ್ಣ್ ಬದಲ್ಲಾಂ.......ಬರೆಂಚ್ ಜಾಲೆಂ ಆಪುಣ್ ತಸೊ ಉಲೈಲ್ಲೊಂ.
ಸಟ್ಟ್ ಕರ್ನ್ ತಾಕಾ ರಾಂದ್ಚ್ಯಾ ಕುಡಾ ಥಾವ್ನ್ ಸಿಂತಿನ್ ಗಾಯನ್ ಕರ್ಚೊ ತಾಳೊ ಆಯ್ಕಾಲೊ. ವ್ಹಯ್, ತೆಂಚ್ ತೆಂ ಗಾಯನ್, ತ್ಯಾ ದಿಸಾ ಪಂದ್ಯಾಟಾಂತ್ ತಾಣೆಂ ಮ್ಹಳ್ಳೆಲೆಂ ಆನಿಂ ದುಸ್ರೆಂ ಸ್ಥಾನ್ ತಾಕಾ ಮೆಳ್ಲ್ಲೆಂ....ಕಾನ್ ದೊಳೆ ಸೊಡ್ನ್ ತೊ ಸಿಂತಿಚೊ ತಾಳೊ ಆಯ್ಕೊಂಕ್ ಪಡ್ಲೊ. ಮಧುರ್ ತ್ಯಾ ತಾಳ್ಯಾನ್ ವಿಚಿತ್ರ್ ಭೊಗ್ಣಾಂ ತಾಚೆಥಂಯ್ ಉಬ್ಜಾಯ್ಲಿಂ ಆನಿಂ ತ್ಯಾ ದಿಸಾಚೊ ಅನ್ಭೋಗ್ ಪರ್ತ್ಯಾನ್ ಜಾಲೊ ತಾಕಾ.
ಗಾಯನ್ ರಾವ್ಲ್ಲೆಂ ತರ್, ತ್ಯಾಚ್ ನಿಯಾಳಾಂತ್ ತೊ ಆಸ್ಲ್ಲೊ. ಸಿಂತಿ ಯೇವ್ನ್ ತಾಚ್ಯಾ ಮುಖಾರ್ ಉಬೆಂ ಜಾಲ್ಲೆಂಯಿ ತೊ ನೆಣಾ.
"ಮೆಲ್ವಿನ್, ಕಿತೆಂ ಚಿಂತ್ತಾಯ್?"
"ಹಾಂ..." ತೊ ಅಮ್ರುಕೊ ಹಾಸ್ಲೊ. ಸಿಂತಿನ್ ಶರ್ಬತಾಚೆಂ ಪಾನಕ್ ತಾಕಾ ದೀವ್ನ್ ವಿಚಾರ್ಲೆಂ - "ಹಾಸೊಂಕ್ ಕಿತೆಂ ಕಾರಣ್ ಆಸಾ ಮೆಲ್ವಿನ್?"
"ನಾ...ಮ್ಹಾಕಾ ತ್ಯಾ ದಿಸಾಚೊ ಉಗ್ಡಾಸ್ ಆಯ್ಲೊ ಸಿಂತಿ. ತೆಂಚ್ ಗಾಯನ್ ....ಕಿತ್ಲೊ ಸುಂದರ್ ತುಜೊ ತಾಳೊ" ತಾಣೆಂ ಜಾಪ್ ದಿಲಿ.
"ತರೀ ತುವೆಂ ಮ್ಹಾಕಾ ಸಲ್ವಯ್ಲೆಂಯ್.." ಸಿಂತಿಚ್ಯಾ ತಾಳ್ಯಾಂತ್ ರಾಗಾಚಿ ಖುಣಾಂ ನಾತ್ಲ್ಲಿ ಹ್ಯಾ ಪಾವ್ಟಿಂ, "ಉಪ್ರಾಂತ್ ತುಜೆ ಧನ್ಯವಾದ್ಯಿ ಮ್ಹಾಕಾ ಮೆಳ್ಲ್ಲೆ, ಹಾಂವೆಂ ತಿರಸ್ಕಾರ್ ಕೆಲ್ಲೆ. ಪುಣ್ ಮೆಲ್ವಿನ್, ಸಕ್ಡಾಂ ಪ್ರಾಸ್ ಚಡ್ ಮ್ಹಾಕಾ ದುಃಕ್ ದಿಸ್ತಾ ತುಕಾ ಬೆಂಗ್ಳೂರಾಕ್ ಟ್ರಿಪ್ ಚುಕ್ಲ್ಲೆಂ"
"ತುಕಾಯಿ ಚುಕ್ಲೆಂ. ಕಾಂಯ್ ವ್ಹಡ್ ನ್ಹಂಯ್. ದೊಗಾಂಯ್ಕಿ ನಶಿಬ್ ನಾತ್ಲ್ಲೆಂ" ತೊ ಸಾಂಗೊನ್ ಹಾಸ್ತಾನಾ ಸಿಂತಿಯಿ ಹಾಸ್ಲೆಂ
ವೇಳ್ ಪಾಶಾರ್ ಜಾಲೊ ಆನಿಂ ತಿಂ ತಶಿಂಚ್ ಉಲೊವ್ನ್ ಬಸ್ಲ್ಲಿಂ. ಸಿಂತಿ ಕೊಲೆಜಿಚೆ, ಇತರ್ ಖಾಸ್ಗಿ ವಿಷಯ್ ಪೂರಾ ಉಲಯ್ತಾಲೆಂ. ಮೆಲ್ವಿನಾಕ್ಯಿ ತಾಚೆಲಾಗಿಂ ಉಲೊವ್ನ್ ಉಬ್ಗೊಣ್ ಆಯ್ಲಿನಾ. ಸಿಂತಿಕ್ ಘರಾ ಆಯಿಲ್ಲ್ಯಾ ಬೊಟ್ಲೆರಾಚಿ ಪರ್ವಾಯಿ ನಾತ್ಲ್ಲಿ. ಚಡ್ ಪ್ರೀತಿಚ್ಯಾ ಇಷ್ಟಾಂನಿ ಸಬಾರ್ ತೆಂಪಾ ಉಪ್ರಾಂತ್ ಮೆಳೊನ್ ಉಲೊಂವ್ಚ್ಯಾ ಬರಿ ದೊಗಾಂಯಿ ಉಲಯ್ತಾಲಿಂ.
"ಹಾಂವ್ ಚಲ್ತಾಂ ಸಿಂತಿ...." ದುಸ್ರ್ಯಾ ಪಾವ್ಟಿಂ ತೊ ಉಟ್ಲೊ. ವೊರಾಂ ಬಾರಾ ವ್ಹಾಜ್ಲ್ಲಿಂ.
"ರಾವ್ ಮೆಲ್ವಿನ್, ಮ್ಹಾಕಾ ತುಜೆಲಾಗಿಂ ಉಲೊಂವ್ಕ್ ಬರೆಂ ಜಾತಾ..." ಆನಿಂ ಸಿಂತಿನ್ ಮೆಲ್ವಿನಾಚ್ಯಾ ಭುಜಾಂಕ್ ಧರ್ನ್ ತಾಕಾ ಬಸಯ್ಲೆಂ. ಮೆಲ್ವಿನಾಕ್ ತ್ಯಾ ಘಡಿಯೆ ಕಿತೆಂ ಭೊಗ್ಲೆಂ ತೆಂ ತೊಚ್ ನೆಣಾಂ. ತೆಂ ಕೋಮಲ್ ಹಾತ್ ತಾಚ್ಯಾ ಶರೀರಾಕ್ ಲಾಗ್ತಾನಾ ತಾಚ್ಯಾ ಮತಿಕ್ ಅಮಾಲ್ ಜಾಲ್ಲ್ಯಾಬರಿ ಭೊಗ್ಲೆಂ ತಾಕಾ.
"ಸಿಂತಿ.." ತೊ ಗಾಗೆಲೊ.
"ಹೂಂ..." ತಾಚ್ಯಾ ಕುಶಿನ್ಂಚ್ ತೆಂ ಬಸಲ್ಲೆಂ.
"ಎಕಾಚ್ಛಾಣೆಂ ತುಕಾ ಮ್ಹಜೆರ್ ಇತ್ಲೊ ಮೋಗ್ ಕಸೊ ಆಯ್ಲೊ ಹಾಂವ್ ನೆಣಾಂ. ಮ್ಹಾಕಾ ಘರಾ ವೊಚೊಂಕ್ಯಿ ಸೊಡಿನಾಂಯ್"
"ಆನಿಂ ತುಂ ಆತಾಂ ರಸ್ತ್ಯಾರ್ ನಾಂಯ್..." ಪ್ರಜಳಿಕ್ ದೊಳೆ ತಾಚೆರ್ ಫಾಂಕೊವ್ನ್ ತೆಂ ಉಲೈಲೆಂ. "ಕಿತೆಂ, ಮ್ಹಜ್ಯಾ ಸಾಂಗಾತಾ ರಾವೊಂಕ್ ಉಬ್ಗೊಣ್ ಜಾತಾಗಿ ಮೆಲ್ವಿನ್?"
"ಬಿಲ್ಕುಲ್ ನಾ, ಮ್ಹಾಕಾ ವೇಳ್ ಗೆಲ್ಲೊಚ್ ಕಳಾನಾ"
"ಕಿತ್ಯಾಕ್ ಹಾಬಾ...!" ತಾಕಾ ದುಸ್ರೆಂ ಉಲೊಂವ್ಕ್ ಕಳ್ಳೆಂನಾ.
ವೇಳ್ ಥೊಡೊ ಆಸೊಚ್ ಪಾಶಾರ್ ಜಾಲೊ.....
ಸಬಾರ್ ವೆಳಾ ಉಪ್ರಾಂತ್ ಎಕಾಚ್ಛಾಣೆಂ ಜಾಗೆಂ ಜಾಲ್ಲ್ಯಾಬರಿ ಸಿಂತಿನ್ ಹಾಳ್ವಾಯೆನ್ ಉಲೊ ಕೆಲೆಂ.
"ಮೆಲ್ವಿನ್...",
"ಸಿಂತಿ.."
"ಮೆಲ್ವಿನ್, ತುಂ ಕಿತ್ಲೊ ಬರೊ..."
ತೊ ತಾಚೆಥಾವ್ನ್ ಪಯ್ಸ್ ಸರೊನ್ ಮ್ಹಣಾಲೊ. ಆವ್ಯಕ್ತ್ ಸಂತೊಸಾನ್, "ಹಾಂವ್ ಚಲ್ತಾಂ ಸಿಂತಿ. ಮಾಂಯ್ ಘಡ್ಬಡ್ತಾ ಕೊಣ್ಣಾ"
"ಆನಿಂ ಕೆದಾಳಾ ಯೆತಾಯ್?" ವ್ಹಡಾ ಆಶೆನ್ ಮ್ಹಳ್ಳ್ಯಾಬರಿ ತೆಂ ವಿಚಾರಿಲಾಗ್ಲೆಂ.
"ತುಂ ಎಕ್ಸುರೆಂ ಆಸ್ಲ್ಲ್ಯಾ ವೆಳಾರ್" ತೊ ಹಾಸ್ಲೊ.
"ಜಾಯ್ತ್, ಪಪ್ಪಾ ಘರಾ ನಾತ್ಲ್ಲ್ಯಾ ವೆಳಾ ಹಾಂವ್ ತುಕಾ ಆಪಯ್ತೆಲಿಂ.." ತೆಂ ಲಜೆವ್ನ್ ಮ್ಹಣಾಲೆಂ.
ಘರಾ ಯೆತಾನಾ ಮೆಲ್ವಿನಾಕ್ ವಾರ್ಯಾರ್ ಧಲ್ಲ್ಲ್ಯಾಬರಿ ಬೊಗ್ತಾಲೆಂ. ಎಕಾ ನಮುನ್ಯಾಚಿ ಅವ್ಯಕ್ತ್ ಆಶಾ ತಾಚ್ಯಾ ಮತಿಂತ್ ಉದೆತಾನಾ, ದುಸ್ರ್ಯಾ ವಾಟೆನ್ ತಾಕಾ ಬೊಗ್ತಾಲೆಂ.
’ಸಿಂತಿ ಕಶೆಂ ಆನಿಂ ಖಂಯ್ಚ್ಯಾ ರಿತಿರ್ ಬದ್ಲಾಲೆಂ? ಕಿತ್ಯಾಕ್ ತಾಣೆ, ತಾಚೊ ಪಪ್ಪಾ ನಾತ್ಲ್ಲ್ಯಾ ವೆಳಾರ್ ಖುಶೆಚೊ ಸ್ವಾಗತ್ ದಿಲೊ?......ಕಿತ್ಯಾಕ್...? ಎಕಾ ತೆಂಪರ್ ಹಾಂವ್ ತಾಕಾ ಕಾಂಟಾಳ್ಲ್ಲೊಂ... ಆಜ್,....... ಆಜ್.......ಹಾಂವೆಂ ತೆಂ ಎಕ್ಸುರೆಂ ಆಸ್ತಾನಾ ವಚೊಂಕ್ ನಜೊ ಆಸ್ಲ್ಲೆಂ....
ಘರಾ ವಚೊನ್ ಆಫ್ಲ್ಯಾ ಖಟ್ಲ್ಯಾರ್ ಆಡ್ ಪಡ್ಲ್ಲ್ಯಾ ಕಡೆ ಮೆಲ್ವಿನ್ ನಿಯಾಳ್ತಾಲೊ, ತಶೆಂ ನಿಯಾಳ್ತಾನಾ, ಎಕಾ ವಾಟೆನ್ ಸಿಂತಿ, ದುಸ್ರ್ಯಾ ವಾಟೆನ್ ಜೆಸ್ಸಿ ತಾಚ್ಯಾ ಮತಿಂತ್ ಉದೆಲಿಂ. ತ್ಯಾ ವೆಳಾ ಆಪ್ಣೆಂ ಜೆಸ್ಸಿಕ್ ಕಸಲೊಗಿ ಘಾತ್ ಕೆಲಾ - ಕರ್ತಾಂ ಮ್ಹಳ್ಳೆಂ ಚುರ್ಚುರೆ ತಾಕಾ ಭೊಗೊಂಕ್ ಲಾಗ್ಲೆ.
ಸಿಂತಿ ಆನಿಂ ಜೆಸ್ಸಿ....ಹ್ಯಾ ದೋನ್ ತೊಂಡಾಂ ಮಧೆಂ ಚಿರ್ಡೊನ್ ಭಂಗ್ಲ್ಲ್ಯಾ ಬರಿ ಜಾಲೆಂ ಮೆಲ್ವಿನಾಕ್. ಜೆಸ್ಸಿ.......ಜೆಸ್ಸಿ ಥಂಯ್ ತಾಚೆಂ ಕಾಳಿಜ್ ವೊಡ್ತಾಲೆಂ ಆನಿಂ ತಾಚೊ ಮೋಗ್ ಕಸೊ ಪುಣಿ ಜೊಡೀಜಾಯ್ ಮ್ಹಣ್ ತಾಣೆಂ ನಿಶ್ಚಯ್ ಕೆಲ್ಲೊ ಆನಿಂ ಆತಾಂ ಸಿಂತಿ,......
ಸಿಂತಿನ್ ಆಪ್ಣಾಬರಿ, ಹೆರಾ ಕಿತ್ಲ್ಯಾ ತರ್ನಾಟ್ಯಾಂಕ್ಯಿ ಭುಲೈಲಾಂ. ಖುದ್ದ್ ದೊಳ್ಯಾಂನಿ ಆಪ್ಣೆಂ ದೆಖ್ಲಾಂ - ತೆಂ ಹೆರಾಂ ಸಾಂಗಾತಾ ಭಂವ್ತಾನಾ. ಆನಿಂ ಆಜ್ ಆಪುಣ್ಯಿ ತಾಕಾ ಪಿಸ್ವಾಲೊಂ.
ನಾ, ಆನಿಂ ಬಿಲ್ಕುಲ್ ಸಿಂತಿಕ್ ಎಕ್ಸುರೆಂ ಆಸ್ತಾನಾ ಮೆಳ್ಚೊಂನಾ. ತೆಂ ಉಲೈಲ್ಯಾರ್ ಬರ್ಯಾನ್ ಉಲಯ್ತೊಲೊಂ ಶಿವಾಯ್, ಚಡ್ ಸಳ್ಗಿ ಬಿಲ್ಕುಲ್ ಘೆಂವ್ಚೊಂನಾ. ಏಕ್ ನ್ಹಂಯ್ ಏಕ್ ದೀಸ್ ಹೆಂ ವಾಯ್ಟಾಕ್ ಪಡ್ತೆಲೆಂ.
ತರೀ ತಾಚೊ ಮಧುರ್ ಸಾಂಗಾಂತ್ ವಿಸ್ರೊಂಕ್ ತಾಕಾ ಜಾಯ್ನಾತ್ಲ್ಲೊ. ವಿವಿಧ್ ಥರಾಚ್ಯಾ ಚಿಂತ್ನಾಂ ಮಧೆಂ ತೊ ಕಷ್ಟಾತಾನಾ, ತಾಕಾ ಸುಟ್ಕಾ ದೀಂವ್ಕ್ ಮ್ಹಳ್ಳ್ಯಾ ಜಿನ್ಸಾರ್ ಆವಯ್ಚೊ ತಾಳೊ ಆಯ್ಕಾಲೊ.
"ಮೆಲ್ವಿನ್...ಜೇಂವ್ಕ್ ಯೇನಾಂಯ್ವೆ ತುಂ?"
ತೊ ಎಕಾಚ್ಛಾಣೆಂ ಉಟ್ಲೊ ಆನಿಂ ತೊಂಡ್ ಧುಂವ್ಕ್ ನ್ಹಾಣೆಯೆಕ್ ಗೆಲೊ. ಜೇಂವ್ಕ್ ಬಿತರ್ ಪ್ರವೇಶ್ ಜಾತಾನಾ, ಆವಯ್ಚೆಂ ತೊಂಡ್ ಪಳೆಂವ್ಕ್ ಲಜ್ ದಿಸ್ಲಿ ತಾಕಾ. ತಶೆಂಚ್ ತಕ್ಲಿ ಬಾಗಾವ್ನ್ ತೊ ಜೆವ್ಲೊ.
ಸಾಂಜೆರ್ ಭವೊಂಕ್ ಭಾಯ್ರ್ ಸರ್ತಾನಾ, ಸಿಂತಿ ದಿಸಾನಾತ್ಲ್ಲ್ಯಾ ವೆಳಾಕ್ ಪಳೆವ್ನ್ ತೊ ಚಲ್ಲೊ. ಖಂಯ್ ಪುಣಿ ಪರ್ತ್ಯಾನ್, ತಾಳ್ಣೆಕ್ ಸಾಂಪ್ಡೊಂಕ್ ನಜೊ ಮ್ಹಣ್ ತಾಣೆಂ ಚಿಂತ್ಲ್ಲೆಂ.
ದುಸ್ರ್ಯಾ ದಿಸಾ, ಸಿಂತಿ ಜನೆಂತ್ಲ್ಯಾನ್ ಹಾಸ್ತಾನಾ ತಾಣೆಂ ಪಳೆಲೆಂ. ಆನಿಂ ತೊಯಿ ಹಾಸ್ಲೊ. ಪುಣ್ ತಾಚೆಲಾಗಿಂ ಉಲೊಂವ್ಕ್ ಸಂದರ್ಭ್ಚ್ ಮೆಳೊಂಕ್ ನಾ. ಮನ್ವೆಲಾಬ್ ಘರಾಚ್ ಆಸ್ಲ್ಲೊ. ಪುಣ್ ಸಾಂಜೆರ್ ತೊ ಗರ್ಜೆಚ್ಯಾ ಕಾಮಾನ್ ಹಂಪನ್ಕಟ್ಟಾ ಭಾಯ್ರ್ ಸರ್ತಾನಾ, ಸಿಂತಿ ಜನೆಂತ್ಲ್ಯಾನ್ ಮೆಲ್ವಿನ್ ದಿಸ್ತಾಗಿ ಮ್ಹಣ್ ತಿಳ್ತಾಲೆಂ.
ತಾಚ್ಯಾ ಕಾಳ್ಜಾಂತ್ ಮೆಲ್ವಿನಾಚೊ ಮೋಗ್ ಮ್ಹಳ್ಳೆಂ ಕಾಂಯ್ ನಾತ್ಲ್ಲೊ. ತಾಣೆಂ ಆಪ್ಲ್ಯಾ ಜೀವನಾಂತ್ ಕೊಣಾಕೀ ಮೋಗ್ ಸಮರ್ಪುನ್ ದೀಂವ್ಕ್ ನಾತ್ಲ್ಲೊ. ತರ್ನಾಟೆ...ವ್ಹಯ್, ತೆಂ ಸಬಾರ್ ತರ್ನಾಟ್ಯಾ ಸಾಂಗಾಂತಾ ಭಂವ್ಲ್ಲೆಂ ಖರೆಂ. ತಿ ಏಕ್ ಜೀವನಾಚಿ ವೈವಿಧ್ಯತಾ. ತರೀ ಮೋಗ್ ಮ್ಹಳ್ಳೊ ಸಿಂತಿನ್ ಕೊಣಾಕ್ಯಿ ದೀಂವ್ಕ್ ನಾ. ಮೆಲ್ವಿನಾಕ್ ತೆಂ ಪಯ್ಲೆಂ ಕಾಂಟಾಳ್ತಾಲೆಂ. ಪುಣ್ ತ್ಯಾ ರಾತಿಂ ತಾಚಿಂ ಉತ್ರಾಂ ಆಯ್ಕಾತಾನಾ ನಿಜಾಕೀ ತೆಂ ರಡ್ಲ್ಲೆಂ. ತಾಚ್ಯಾ ಗರ್ವಾಕ್ ಆನಿಂ ಸ್ವಾಭಿಮಾನಾಕ್ ಕುರಾಡ್ ಮಾರ್ಲ್ಲ್ಯಾಬರಿ ಆಯಿಲ್ಲಿಂ ಮೆಲ್ವಿನಾಚಿ ಉತ್ರಾಂ. ದುಸ್ರ್ಯಾ ದಿಸಾ ತಾಚೆಥಂಯ್ ಪರಿವರ್ತನ್ ಜಾಲ್ಲೆಂ ಆನಿಂ ಆದ್ಲಿ ಅಬಿಪ್ರಾಯ್ ತಾಣೆಂ ಸಾಂಡ್ಲ್ಲಿ.
ಆನಿಂ ಆತಾಂ ಆದ್ಲ್ಯಾ ದಿಸಾಚೆಂ ಘಡಿತ್ ನಿಯಾಳ್ತಾನಾ ತೆಂ ಮತಿಂತ್ಚ್ ಹಾಸ್ತಾಲೆಂ ’ಮೆಲ್ವಿನ್ ನಿಜಾಕೀ ಭುರ್ಗೊಚ್ - ಕಾಂಯ್ಚ್ ನೆಣಾಂ. ಪಯ್ಲ್ಯಾ ಪಾವ್ಟಿಂ ತಾಣೆಂ ಎಕಾ ಚಲಿಯೆ ಸಂಗಿಂ ಆಸ್ಚೆಂ ಮ್ಹಣ್ ದಿಸ್ತಾ. ಬಿಂಯಾನ್ ಆನಿಂ ಕಾವ್ಜೆಣೆನ್ ತೊ ಕಾಂಪ್ತಾಲೊ’ ತೆಂ ಆಮ್ರುಕೆ ಹಾಸ್ಲೆಂ.
ಮೆಲ್ವಿನ್ ಘರಾ ಥಾವ್ನ್ ನ್ಹೆಸೊನ್ ಭಾಯ್ರ್ ಸರ್ತಾಲೊ. ತಾಚಿ ದೀಷ್ಟ್ ಸಿಂತಿಚೆರ್ ಪಡ್ಲಿ. ತಾಣೆಂ ಹಾಸಾಜಾಯಿಚ್ಚ್ ಪಡ್ಲೆಂ.
"ಖಂಯ್ ವೆತಾಯ್, ಮೆಲ್ವಿನ್?"
"ಸುಲ್ತಾನ್ ಬತ್ತೇರಿಕ್. ಸಾಂಜೆಚೆಂ ವಾರೆಂ ಘೆಂವ್ಕ್" ತೊಂಡಾಕ್ ಆಯಿಲ್ಲೆಂ ನಾಂವ್ ತಾಣೆಂ ಸಾಂಗ್ಲೆಂ.
"ಹಾಂವೀ ಯೆತಾಂ ತುಜ್ಯಾ ಸಾಂಗಾಂತಾ. ಪ್ಲೀಸ್ ಘರಾ ಯೇ.." ಸಿಂತಿನ್ ಹಾಳ್ವಾಯೆನ್ ಮ್ಹಳ್ಳಿಂ ಉತ್ರಾಂ ತರೀ ಆಯ್ಕಾಲಿ ಕೊಣ್ಣಾಂ ಮ್ಹಣ್ ತೊ ಕಾವ್ಜೆಲೊ. ಪಾಟಿಂ ಪಳೆತಾನಾ ಜಿಲ್ಲಿಬಾಯ್ ವ ಹೆರ್ ಕೊಣ್ ದಿಸ್ಲಿನಾಂತ್. ತಾಣೆಂ ಸಮಾಧಾನೆಚೊ ಶ್ವಾಸ್ ಸೊಡ್ಲೊ.
"ಬಿಂಯೆಲೊಯ್ ಕಿತ್ಯಾಕ್?’ ಸಿಂತಿನ್ ಹಾಸೊನ್ ವಿಚಾರ್ಲೆಂ
"ಕಾಂಯ್ ನಾಂ.."
"ಯೆ, ಘರಾ ಯೆ ಮೆಲ್ವಿನ್.."
ತಾಕಾ ದುಸ್ರೊ ನಿರ್ವೊಗ್ಚ್ ನಾತ್ಲ್ಲೊ. ಮತಿಂತ್ ಆಪ್ಣಾಕ್ಚ್ ಚ್ಯಾರ್ ಗಾಳಿ ದೀವ್ನ್ ತೊ ಸಿಂತಿಗೆರ್ ಗೆಲೊ. ಭಾಯ್ರ್ ಸೊಪ್ಯಾರ್ ಬಟ್ಲೆರ್ ಕದೆಲಾಂ ಪುಸ್ಚೊ ಪಳೆವ್ನ್ ಮತಿಂತ್ಚ್ ಅರ್ಗಾಂ ದೀವ್ನ್ ಸರ್ಶಿಚ್ಲ್ಯಾ ಕದೆಲಾರ್ ತೊ ಗಳ್ಳೊ.
"ಮೆಲ್ವಿನ್, ಏಕ್ ಮಿನುಟ್ ಬಸ್. ಮ್ಹಜೆಂ ಆತಾಂಚ್ ನ್ಹೆಸೊನ್ ಜಾತಾ...." ತೆಂ ಬಿತರ್ ಗೆಲೆಂ. ಮೆಲ್ವಿನ್ ಜಾಪ್ ಕಾಡಿನಾಸ್ತಾಂ ಥಂಡ್ ಬಸ್ಲೊ.
ಸಿಂತಿ ಸಾಂಗಾಂತಾ ವೆತಾನಾ ಕೊಣಿ ಪಳೆತಿತ್ ಜಾಲ್ಯಾರ್ ವ ಘರಾ ಖಬಾರ್ ಮೆಳ್ಳ್ಯಾರ್ ಗತ್ ಕಿತೆಂ? ತೊ ಸಗ್ಳೊಚ್ ಬಿಂಯೆಲ್ಲೊ. ಮನ್ವೆಲಾಬಾಕ್ ಜರ್ ಖಬಾರ್ ಮೆಳ್ಳಿ, ಉಪ್ರಾಂತ್ ಸಗ್ಳೊಚ್ ಖುಬಾಳುಂಕ್ ಆಸಾ. ತುಮ್ಚ್ಯಾ ಘರಾಂತ್ ವಸ್ತಿ ಕರ್ಚ್ಯಾ ತಾಂಕಾಂ ಭಾಯ್ರ್ ಲೊಟುಂಕ್ ಆಸಾ ತೊ. ಹಿ ಶನಿ ಕಿತ್ಯಾಕ್ ಗಾಂಟ್ ಪಡ್ಲಿಗಾಯ್! ಮಾತೆಂ ಖೊರ್ಪಿತಾಲೊ ಮೆಲ್ವಿನ್.
ಪಾಂಚ್ ಮಿನುಟಾಂನಿ ಸಿಂತಿ ನ್ಹೆಸೊನ್ ಭಾಯ್ರ್ ಆಯ್ಲೆಂ. "ಹೂಂ....ಚಲ್ಯಾಂ.."
ದೊಗಾಂಯ್ ರಸ್ತ್ಯಾರ್ ಸಾಂಗಾಂತಾ ಮೆಟಾಂ ಕಾಡುಂಕ್ ಲಾಗ್ಲಿಂ. "ಆಮ್ಕಾಂ ಆಶೆಂ ವೆತಾನಾ ವಳ್ಕಿಚಿಂ ಕೊಣೀ ಪಳೆತಿತ್ ಜಾಲ್ಯಾರ್?" ಮೆಲ್ವಿನಾನ್ ದುಬಾವ್ ಉಚಾರ್ಲೊ.
"ಕಿತೆಂ ಜಾಲೆಂ?" ತಿರ್ಕಾಸ್ ಸವಾಲ್ ಸಿಂತಿಚೆಂ.
"ನ್ಹಂಯ್, ತುಜ್ಯಾ ಪಪ್ಪಾಕ್...."
"ದುವೆಚ್ಯಾ ಖಂಯ್ಚಾಯಿ ಸ್ವತಂತ್ರಾಕ್ ಆಡ್ ಯೇನಾ ಪಪ್ಪಾ. ಪಳೆತೆಲ್ಯಾಂಚೆ ದೊಳೆ ಪೆಲ್ಯಾಚ್ಯಾ ಜನೆಂತ್ಲ್ಯಾನಿ ತಿಳ್ತಾತ್. ಉಲಯ್ತೆಲ್ಯಾಂಚ್ಯೊ ಜಿಬೊ, ದೆವಾಳಾಚ್ಯಾ ಬಿತರ್ ಘುಂವ್ತಾತ್. ತುಕಾ ಭೆಂ ಕಿತೆಂ?"
ಪುಣ್ ಮೆಲ್ವಿನಾಚೆಂ ಭ್ಯೆಂ ಪಯ್ಸ್ ಸರೊಂಕ್ ನಾತ್ಲ್ಲೆಂ. ತೊ ಪಾರ್ಕೊ ಜಾವ್ನ್ಂಚ್ ಸಿಂತಿ ಸಾಂಗಾಂತಾ ಚಲ್ತಾಲೊ. ಸುಲ್ತಾನ್ ಬತ್ತೇರಿಕ್ ಪಾವ್ತಾ ಮ್ಹಣಾಸರ್ ಕೊಣೀ ವಳ್ಕಿಚಿಂ ಬೆಟಾನಾತ್ಲ್ಲಿ ತಾಚೆಂ ಸುದೈವ್ಚ್ ಸಯ್. ಸುಲ್ತಾನ್ ಬತ್ತೇರಿಚ್ಯಾ ವಯ್ರ್ ದೊಗಾಂತ್ ಚಡೊನ್ ಬಸ್ಲಿಂ.
"ಸಾಂಗ್ ಮೆಲ್ವಿನ್, ಆತಾಂ ಜಾಲ್ಯಾರ್ ಸುಡಾಳ್ ಉಲಯ್" ಸಿಂತಿನ್ ಉಲಣ್ಯಾಕ್ ಬುನ್ಯಾದ್ ಘಾಲಿ.
"ತುಜೆಂ ತಸಲೆಂ ಸುಂದರ್ ಚೆಡುಂ ಸಾಂಗಾತಾ ಆಸ್ತಾನಾ, ಕಿತೆಂ ಉಲೊಂವ್ಚೆಂ ಕಳಾನಾ"
"ಓ....ಹಾಂವ್ ತಿತ್ಲಿಂ ಸೊಭಿತ್ಗಿ?" ತಾಂಬ್ಡೆ ಜಾವ್ನ್ ತೆಂ ಮ್ಹಣಾಲೆಂ.
ಹೊಗ್ಳಿಕ್ ಚೆಡ್ವಾಂಕ್ ಪಿಶ್ಯಾರ್ ಘಾಲ್ತಾಂ ತೆಂ ಮೆಲ್ವಿನ್ ಜಾಣಾಸ್ಲ್ಲೊ. ವೆಳಾಚೊ ಫಾವೊತೊ ಪ್ರಯೋಗ್ ಕರ್ನ್ ತಾಣೆ ಮ್ಹಳೆಂ "ನಿಜಾಕೀ ಸಿಂತಿ...ತುಜ್ಯಾ ತಸಲ್ಯಾ ಸುಂದರ್ ಚೆಡ್ವಾಕ್ ಹಾಂವೆಂ ಎದೊಳ್ ಪಳೆಂವ್ಕ್ ನಾ"
ತೆಂ ಅನಿಕೀ ಲಜ್ಲೆಂ. ಧರ್ಣಿಕ್ ದೀಷ್ಟ್ ಜೊಕುನ್ ಸಿಂತಿ ಸಾಂಗಾಲಾಗ್ಲೆಂ - "ಬೆಂದೂರ್ ಕೊವೆಂತಾಲಾಗಿಂ ಸಾಂಜೆಚೆಂ ಖಂಯ್ಚ್ಯಾ ಸೊಭಿತ್ ಚೆಡ್ವಾಕ್ ಪಳೆಂವ್ಕ್ ಪಾಸಾಯೊ ಮಾರ್ತಾಲೊಯ್ ತುಂ?"
"ತುಕಾಚ್ ಸಿಂತಿ.." ತೊ ಹಾಸ್ಲೊ
"ಆನಿಂ ತುಂ ಮ್ಹಾಕಾ ತಮಾಷೆ ಕರ್ತಾಲೊಯ್"
"ತುಜೆರ್ ಮ್ಹಾಕಾ ಮೋಗ್ಯಿ ಆಸ್ಲ್ಲೊ ಆನಿಂ ತುಂ ಉಲಯ್ನಾಂಯ್ ಮ್ಹಣ್ ದ್ವೇಷ್ಯಿ ಉಬ್ಜಾಲ್ಲೊ..."
"ಆನಿಂ ಆತಾಂ?" ಸಿಂತಿನ್ ಮಧೆಂಚ್ ಮ್ಹಳೆಂ.
"ಬಿಲ್ಕುಲ್ ದ್ವೇಷ್ ನಾ" ಉದ್ದೇಶಾನ್ ತಿತ್ಲ್ಯಾರ್ಚ್ ರಾವಯ್ಲೆಂ ತಾಣೆಂ.
"ಮ್ಹಜೆಂ ಇಷ್ಟಿನ್ ಐವಿ, ತುಜ್ಯಾ ಮೊಗಾರ್ ಪಡ್ಲ್ಲೆಂ, ತುಂ ಸೊಬಿತ್ ದಿಸ್ತಾಯ್ ಮ್ಹಣ್ ....." ಸಿಂತಿನ್ ಸಾಂಗ್ಲೆಂ.
ಆಪ್ಣಾಚ್ಯಾ ರುಪಾಚಿ ಪ್ರಶಂಸಾ ಕರ್ತಾನಾ ಮೆಲ್ವಿನ್ಯಿ ಪುಗ್ಲೊ. ಸಿಂತಿಚ್ಯಾ ಉಲಣ್ಯಾಕ್ ಉಮೆದಿನ್ ಆಯ್ಕೊಂಕ್ ಪಡ್ಲೊ ತೊ.
"ಹಾಂವ್ ಕೊಣಾಯ್ಚೊ ಮೋಗ್ ಕರಿನಾ ಮೆಲ್ವಿನ್..." ಗಂಭೀರ್ ತಾಲ್ಯಾನ್ ಉಲಯ್ಲೆಂ ಸಿಂತಿ ಥೊಡ್ಯಾ ವೆಳಾನ್. "ಮೋಗ್, ಕಾಜಾರ್ ಮ್ಹಣೊನ್ ವೆಗಿಂಚ್ ಕೊಣಾಯ್ಚ್ಯಾ ಘರಾ ಪ್ರವೇಶ್ ಜಾಂವ್ಕ್ ಮ್ಹಾಕಾ ಖುಶಿನಾ. ಕಾಜಾರಿ ಜೀವನ್ ಸ್ತ್ರೀಯೆಚ್ಯಾ ಸ್ವತಂತ್ರಾಕ್ ಬಂದಡ್ ಹಾಡ್ಟಾ. ಭುರ್ಗಿಂ, ಘೊವ್ ಇತ್ಯಾದಿ ಮ್ಹಣೊನ್ ಜೈಲಾಚೆಂ ಜೀವನ್ ಸಾರುಂಕ್ ಹಾಂವ್ ತಯಾರ್ ನಾ. ಹಾಂವೆಂ ಚಿಂತ್ಲಾಂ ದಾಕ್ತೆರ್ನ್ ಜಾಂವ್ಕ್. ತುಂ ಕಿತೆಂ ಕರ್ತೊಲೊಯ್?"
"ಎದೊಳ್ ಕಾಂಯ್ ಆಲೋಚನ್ ನಾ" ಸಿಂತಿಚಿಂ ಉತ್ರಾಂ ನಿಯಾಳಿತ್ತ್ ತೊ ಮ್ಹಣಾಲೊ.
"ಹುಂ, ಉಪ್ರಾಂತ್ ಸಿಂತಿಕ್ ತುಂ ವಿಸರ್ತೊಲೊಯ್"
"ತೆಂ ಕಶೆಂ ಸಾಧ್ಯ್? ಸುಂದರ್ ಗುಲೊಬಾಕ್ ಕೊಣೀ ವಿಸರ್ಲ್ಲೆನಾಂತ್"
ಸುರ್ಯೊ ಬುಡ್ಲ್ಲೊ. ಪುಣ್ ತಾಂಬ್ಡಿಂ ಕೀರ್ಣಾಂ ಭುಮಿರ್ ಅಪೂರ್ವ್ ರತ್ನಾಂಬರಿ ಪಸರ್ಲೆಲಿಂ. ವ್ಹಾಳ್ಚ್ಯಾ ಥಂಡ್ ವಾರ್ಯಾಕ್ ಸಿಂತಿಚೆ ಮುದಿಯಾಳೆ ಕೆಸ್ ಉಬ್ತಾಲೆ. ಮೆಲ್ವಿನಾಚ್ಯಾ ಉತ್ರಾಂನಿ ತಾಚ್ಯಾ ಮುಖಮಳಾರ್ ತಾಂಬ್ಡಿ ಖುಣಾಂ ಹಾಡೈಲಿಂ. ತೆಂ ಲಜೆಲೆ ಆನಿಂ ಲಜೆನ್ ಸಿಂತಿಕ್ ದೊಡ್ತಿ ಸೊಭಾಯ್ ದಿಲ್ಲಿ.
ತಿಂ ಉಲೊವ್ನ್ ಬಸ್ಲ್ಲಿಂ ಆನಿಂ ವೇಳ್ ಪಾಶಾರ್ ಜಾತಾಲೊ. ಆನಿಂ ಸಂಸಾರಾ ವಯ್ಲೊ ಉಜ್ವಾಡ್ ಮಾಜ್ವಾಲೊ ಆನಿಂ ಕಾಳೊಕ್ ಚೊರಾಬರಿ ಶಿಂಪಡ್ಲೊ. ಪಳೆತಾಂ ಪಳೆತಾಂ ಪ್ರಕಾಸ್ ಸಂಪೂರ್ಣ್ ನಾಶ್ ಜಾವ್ನ್ ಕಾಳ್ಕಾಚೆಂ ರಾಜ್ ಭುಮಿರ್ ಆರಂಭ್ ಜಾಲೆಂ. ಸಂಗಿಂ , ಸರ್ಶಿಲ್ಯಾ ದರ್ಯಾಚಿ ಗಾಜ್ಯಿ ಶಾಂತ್ ವಾತಾವರಣಾಂತ್ ಆಯ್ಕಾತಾಲಿ.
ಹಿಂವಾಳ್ ವಾರೆಂ ವ್ಹಾಳೊನ್ ಯೆತಾಲೆಂ ತೆಂ ಸಿಂತಿ. ಮೆಲ್ವಿನಾಚ್ಯಾ ಮನಾಂತ್ ಪರ್ತ್ಯಾನ್ ಕಾಲ್ಚೊ ಉಗ್ಡಾಸ್ ಹಾಡುಂಕ್ ಲಾಗ್ಲೆಂ. ತೆಂ ತಾಚ್ಯಾ ಅಂಗಾಕ್ ತೆಂಕ್ತಾನಾ, ಕೆಲ್ಲೊ ನಿಚೆವ್ ಮೆಲ್ವಿನ್ ವಿಸರ್ಲೊ. ವೇಳ್ ಪಾಶಾರ್ ಜಾಲ್ಲೊ ತಾಂಕಾಂ ಕಳ್ಳೊಚ್ ನಾ. ದಾಟ್ ಜಾಲ್ಲೊ ಕಾಳೊಕ್ ಬೋವ್ ವೆಳಾ ಉಪ್ರಾಂತ್, ದೊಗಾಂಕೀ ಘರ್ಚೊ ಉಗ್ಡಸ್ ಹಾಡ್ನ್ ಆಯ್ಲೊ.
ತಿಂ ಕೊಟೆಂ ದೆಂವೊನ್ ಘರ್ಚಿ ವಾಟ್ ಧರುಂಕ್ ಲಾಗ್ಲಿಂ. ದೊಗಾಂಯ್ ರಸ್ತ್ಯಾರ್ ಉಲೈಲಿನಾಂತ್. ಸಿಂತಿ ಕಿತೆಂಗಿ ದಿರ್ವೆಂ ಜೊಡ್ಲ್ಲ್ಯಾಬರಿ ಮತಿಂತ್ಚ್ ಹಾಸ್ತಾಲೆಂ. ಮೆಲ್ವಿನ್, ಕೆಲ್ಲೊ ನಿಚೆವ್ ಸಾಂಬಾಳಿನಾತ್ಲ್ಲ್ಯಾಕ್ ಕರ್ಗಾತಾಲೊ.
’ಪುರುಷಾಚೆಂ ಉತಾರ್ಚ್ ತಿತ್ಲೆಂ, ಥೊಡ್ಯಾ ಪಾವ್ಟಿಂ ಅಸ್ಕತ್ ಸ್ತ್ರೀಯೆಚ್ಯಾಕಿ ಚಡ್ ಲಜೆನ್ ತೊ ಪಡ್ತಾ. ಆನಿಂ ತಾಂತ್ಲೊ ಉಟೊಂಕ್ ಸೊಧ್ತಾನಾ, ಪರ್ತ್ಯಾನ್ ಪಡ್ತಾ....’ ಖಂಯ್ಽಽಗಿ ವಾಚ್ಲ್ಲೆಂ ಮೆಒಲ್ವಿನ್ ನಿಯಾಳ್ತಾಲೊ. ಆಪ್ಣಾಕ್ ಹಾಂತ್ಲಿ ಸುಟ್ಕಾನಾಂಗಿ? ಆಶೆಂ ಕರ್ಚೆಂ ಬಿಲ್ಕುಲ್ ಸಮಾ ನ್ಹಂಯ್. ತಾಚೆಂ ಕಾಳಿಜ್ ರಡ್ತಾಲೆಂ. ಪುಣ್ ತರ್ನಾಟ್ಪಣಾಚೆಂ ಹುನ್ ರಗಾತ್, ಸಿಂತಿಕ್ ನಿಯಾಳಿಶೆಂ ಕರ್ತಾಲೆಂ. ತ್ಯಾ ವೆಳಾ ಜ್ಞಾನ್ ಆಸ್ಲ್ಲೊ ಮನಿಸ್ಯಿ ಮನ್ಜಾತ್ ಜಾತಾಲೊ. ಹಿ ಅಸ್ಕತ್ಕಾಯ್ ....ಛಿ.....ಲಜ್.....ತೊ ಲಜೆಲೊ ಆನಿಂ ಕಳ್ವಳ್ಳೊ.
ತ್ಯಾ ರಾತಿ ತಸೊ ದುಸ್ರೊ ದಿಸಾ ತ್ಯಾಚ್ ಚಿಂತ್ನಾಂನಿ ಮೆಲ್ವಿನ್ ಭರ್ಲ್ಲೊ. ಘರಾಚಿಂ ಮೆಟಾಂ ಭಾಯ್ರ್ ದವ್ರುಂಕ್ ತಾಕಾ ಎಕಾ ನಮುನ್ಯಾಚಿ ಲಜ್ ದಿಸ್ತಾಲಿ. ತ್ಯಾ ಫುಡೆಂ ಸಿಂತಿಚೆಂ ದರ್ಶನ್ ಪರ್ತ್ಯಾನ್ ಜಾಯ್ತ್ ಮ್ಹಣ್ ತೊ ಬಿಂಯೆಲ್ಲೊ. ಪುಣ್ ಸಿಂತಿ ತ್ಯಾ ವೆಳಾ ಆಪ್ಲ್ಯಾ ಎಕಾ ಇಷ್ಟಾ ಸಾಂಗಾಂತಾ ಸಿನೆಮಾ ಮಂದಿರಾಂತ್ ’ಪಿಕ್ಚರ್’ ದೆಖ್ತಾ ತೆಂ ತಾಕಾ ಕಳಿತ್ ಜಾಂವ್ಕ್ ಕಾರಣ್ ನಾತ್ಲ್ಲೆಂ. ಸಾಂಜ್ ಜಾತಾನಾ, ತಾಚೆಂ ಮನ್ ತಡ್ವೊಂಕ್ ನಾ. ಕಿತ್ಲೊ ವೇಳ್ ಘರಾಂತ್ ಬಸ್ಚೆಂ? ಬಸೊನ್, ಬಸೊನ್ ಉಬ್ಗೊಣ್ ಜಾಲಿ ತಾಕಾ. ತೊ ನ್ಹೆಸ್ಲೊ ಆನಿಂ ಸಿಂತಿ ಮೆಳಾನಾ ಜಾಲ್ಯಾರ್ ಪುರೊ ಮ್ಹಣ್ ಮತಿಂತ್ಚ್ ಮಾಗ್ಣೆಂ ಕರ್ನ್ ರ್ಸ್ತ್ಯಾಕ್ ಆಯ್ಲೊ.
ಲೇಡಿಹಿಲ್ಲ್ ಘುಂವ್ಡೆಲಾಗಿಂ ಪಾವ್ತಾನಾ, ಖಂಯ್ ವೆಚೆಂ ಮ್ಹಣ್ ತಾಕಾ ಕಳ್ಳೆಂನಾ. ಸಟ್ತ್ ಕರ್ನ್ ಜೆಸ್ಸಿಚೊ ಉಗ್ಡಾಸ್ ತಾಕಾ ಆಯ್ಲೊ. ತಶೆಂಚ್, ಸುಲ್ತಾನ್ ಬತ್ತೇರಿಚಿ ವಾಟ್ ಧರ್ನ್ ತೊ ಚಲ್ಲೊ. ’ಜೆಸ್ಸಿ ಆನಿಂ ತಾಚ್ಯಾ ಘರ್ಚಿಂ ಕೊಡಿಯಾಳ್ ಆಯ್ಲ್ಯಾಂತ್ಗಾಯ್?’
ತೆರೆಜ್ ಬಾಯ್ ಗೆಲೆಂ ಘರ್ ದಿಸ್ಲೆಂ, ತಾಕಾಚ್ ಲಾಗೊನ್ ಆಸ್ಚ್ಯಾ ದುಸ್ರ್ಯಾ ಘರಾಕ್ ದೀಷ್ಟ್ ವರ್ತಾನಾ, ಸಟ್ಟ್ ಕರ್ನ್ ತಾಚೆಂ ಕಾಳಿಜ್ ಉಡ್ಲೆಂ. ಜಾಲಾಂತ್ ಜೆಸ್ಸಿ ಉಬೆಂ ಆಸ್ಲ್ಲೆಂ. ತಾಣೆಂಯಿ ಮೆಲ್ವಿನಾಕ್ ದೆಖ್ಲೆಂ ಮ್ಹಣ್ ದಿಸ್ತಾ, ತುರ್ತಾಚಿಂ ಮೆಟಾಂ ಕಾಡ್ನ್ ಗೆಟಿಲಾಗಿಂ ತೆಂ ಆಯ್ಲೆಂ. ಮೆಲ್ವಿನ್ಯಿ ಅಮ್ರುಕೊ ಹಾಸೊನ್ ಚ್ಯಾರ್ ಮೆಟಾಂ ಮುಖಾರ್ ಗೆಲೊ.
"ಓ....ತುಜೊ ಉಗ್ಡಾಸ್ ಆಜ್ ಕಿತ್ಲ್ಯಾ ಪಾವ್ಟಿಂ ಆಯ್ಲೊ ಮ್ಹಣ್ ನಾ. ಆಮಿಂ ಆಜ್ ಸಕಾಳಿಂಚ್ ಆಯಿಲ್ಲ್ಯಾಂವ್. ಯೆ, ಆಮ್ಗೆರ್ ಯೆ, ಮಾಂಯ್ಕ್ ಆನಿಂ ವ್ಹಡ್ಲಿಮಾಂಯ್ಕ್ ಪಳೆ.."
ತೊ ನಾರ್ಗಾಲೊ. ಜೆಸ್ಸಿಗೆರ್ ವಚೊಂಕ್ ತಾಕಾ ಮನ್ ಆಸ್ಲ್ಯಾರಿ, ಬೆಷ್ಟೆಂ ತರಿ ಲಜ್ಲ್ಲ್ಯಾ ಬರಿ ದಾಕಯ್ಲಾಗ್ಲೊ ಮೆಲ್ವಿನ್.
"ಚಿಂತ್ತಾಯ್ ಕಿತೆಂ?" ವಿಚಾರ್ಲೆಂ ಜೆಸ್ಸಿನ್. :ಮ್ಹಜಿ ಮಾಂಯ್ ಕಾಂಯ್ ತುಕಾ ಖಾತಾ ಮ್ಹಣ್ ಬಿಯೆನಾಕಾ. ಯೆ ಮೆಲ್ವಿನ್, ದುಬ್ಳ್ಯಾಂಚೆಂ ಘರ್ ಏಕ್ ಪಾವ್ಟಿಂ ಪಳೆವ್ನ್ ವಚ್..."
ತೊ ಬಿತರ್ ಸರ್ಲೊ. ತೆದಾಳಾಚ್ ಜೆಸ್ಸಿಚಿ ಆತಾಂಚಿ ಧನಿನ್ ತೆರೆಜ್ಬಾಯ್ ಮೆಟಾಂ ದೆಂವೊನ್ ಜಾಲಾಕ್ ಆಯ್ಲಿ. "ಏ ತೂಂಗಿ" ತಿ ಹಾಸ್ಲಿ ಮೆಲ್ವಿನಾಕ್ ಪಳೆವ್ನ್, "ತುಕಾ ಪಳೆಲಾಂ ಹಾಂವೆಂ, ಇಗರ್ಜೆ ಲಾಗಿಂ ರಾವ್ತಾಯ್ ನ್ಹಂಯ್ವೇ ತುಂ..?"
"ತ್ಯಾ ದಿಸಾ ತುಮ್ಚೆಂ ಘರ್ ದಾಕೈಲ್ಲೆಂ ಹಾಣೆಂಚ್ ಆಂಟಿ.." ಜೆಸ್ಸಿ ಮ್ಹಣಾಲೆಂ.
"ತುಜೆಂ ನಾಂವ್ ಕಿತೆಂ ಪುತಾ" ಸವಾಲ್ ತೆರೆಜ್ಬಾಯೆಚೆಂ.
"ಮೆಲ್ವಿನ್.."
"ಆಮ್ಗೆರ್ ಚಿಕ್ಕೆ ಆಪೊವ್ನ್ ವೊರ್ತಾಂ ತಾಕಾ ಆಂಟಿ.."
ಜೆಸ್ಸಿನ್ ಸಾಂಗ್ಲೆಂ.
"ವಚಾ, ವಚಾ......" ತೆರೆಜ್ಬಾಯೆ ಆಪ್ಲ್ಯಾ ರಾಟಾವಳೆಕ್ ಗೆಲಿ.
ತಾಂಚೆಂ ಘರ್ ಸಾಧಾರ್ಣ್ ವ್ಹಡ್ ಆಸ್ಲ್ಲೆಂ. ಸಕಾಳಿಂ ಆಯಿಲ್ಲ್ಯಾನ್, ಎದೊಳ್ಚ್ ಸಾಮಾನ್ ಮಾಂಡುನ್ ದವರ್ಲ್ಲೊ. ಘರ್ ಆತಾಂ ನಿತಳ್ ಜಾವ್ನ್ ಸೊಭ್ತಾಲೆಂ.
"ಹಿ ಮ್ಹಜಿ ಮಾಂಯ್" ಜೆಸ್ಸಿನ್ ಸೊಪ್ಯಾ ಬಸ್ಲ್ಲ್ಯಾ ಸ್ತ್ರೀಯೆಕ್ ದಾಕೊವ್ನ್ ವಳೊಕ್ ಸಾಂಗ್ಲಿ. ಮಾಗ್ಗಿಬಾಯ್ ಮೆಲ್ವಿನಾಕ್ ಪಳೆವ್ನ್ ಹಾಸೊನ್ ಮ್ಹಣಾಲಿ. "ಯೆ, ಯೆ, ಜೆಸ್ಸಿ, ಹಾಚಿ ವಳೊಕ್ ತುವೆಂ ಮ್ಹಾಕಾ ಸಾಂಗ್ಲಿನಾಂಯ್?"
ಜೆಸ್ಸಿನ್, ಆವಯ್ಕ್ ಮೆಲ್ವಿನಾಚಿ ವಳೊಕ್ ಸಾಂಗ್ಲಿ, ಇತ್ಲ್ಯಾರ್ ಬಿತರ್ ರಾಂದ್ಪಾರ್ ಆಸ್ಲ್ಲಿ ಜೆಸ್ಸಿಚಿ ಆಜಿಯಿ ಭಾಯ್ ಆಯ್ಲಿ. ತಿಕಾ ಭಾಯ್ರ್ ಉಲೈಲ್ಲೆಂ ಆಯ್ಕಾಲ್ಲೆಂ ಮ್ಹಣ್ ದಿಸ್ತಾ. ಮೆಲ್ವಿನಾನ್ ತಿಚೆಲಾಗಿಂ ಬೆಸಾಂವ್ ಮಾಗ್ಲೆಂ.
ಮ್ಹಾತಾರಿ ಪೊಟ್ಭರ್ ಹಾಸೊನ್ ಮ್ಹಣಾಲೊ " ದೆವಾಚೆಂ ಬೆಸಾಮ್ವ್ ತುಕಾ ಪುತಾ. ತುಜಿ ವಳೊಕ್ ಜಾಲ್ಲಿ, ಭಾರಿ ಸಂತೊಸಾಚಿ ಗಜಾಲ್. ಪಳೆ ಪುತಾ ಆತಾಂಚ್ಯಾ ಕಾಳಾರ್ ಮನ್ಶಾಕ್ ಮನಿಸ್ ಲೆಕ್ತಾ ಖಂಯ್? ಆಮಿಂ ಪಳೆ, ತೆಗಾಂಯ್ ಸ್ತ್ರೀಯೊಚ್. ಆಮ್ಚೆಂ ವರ್ವಿಂ ಜಾತಾ ಕಿತೆಂ ಸಾಂಗ್. ಹ್ಯಾ ಪರ್ಕಿ ಗಾಂವಾಂತ್ ಆಮ್ಕಾಂ ಕೊಣೀ ಬರ್ಯಾ ಮನ್ಶಾಂಚಿ ಗರ್ಜ್ ಪಡ್ತೆಲಿ. ಆತಾಂ ತುಂಚ್ ಇಷ್ಟಾಗತೆಚೊ ಹಾತ್ ವೊಡ್ಡಾವ್ನ್ ಆಯ್ಲಾಯ್. ಆಮಿಂ ತುಕಾ ಮಸ್ತ್ ಋಣಿ".
"ನಾ, ನಾ ವ್ಹಡ್ಲಿಮಾಂಯ್.." ಮೆಲ್ವಿನ್ ದಾಕ್ಶೆಣೆನ್ ಉಲೈಲೊ. "ಹಾಂವೆಂ ಕಸಲೊ ಉಪ್ಕಾರ್ ತುಮ್ಕಾಂ ಕೆಲಾ ಮ್ಹಣ್ತಾಯ್? ಆಶೆಂಚ್ ಅವ್ಚಿತ್ತ್ ಜೆಸ್ಸಿಚಿ ವಳೊಕ್ ಜಾಲ್ಲ್ಯಾನ್ ಹಾಂಗಾಸರ್ ಪಾವ್ಲೊಂ. ದೆವಾಚಿಂ ಘಡಿತಾಂ"
"ತುವೆಂ ಸಾಂಗ್ಲ್ಲೆಂ ಖರೆಂ" ಮಾಗ್ಗಿಬಾಯ್ ಮ್ಹಣಾಲಿ, "ಘಡಿತ್ ಆಸ್ಲ್ಲ್ಯಾ ಥಂಯ್ ವೊಡಿತ್ ಖಂಯ್. ತುಜಿ ಇಷ್ಟಾಗತ್ ಆಮ್ಕಾಂ ಲಾಬ್ಲ್ಲಿ ನಿಜಾಕಿ ಧಾದೊಸ್ಕಾಯೆಚಿ ಸಂಗತ್. ಹೆಂ ಪುತಾ, ತುಂ ಕಾಮಾಕ್ ವೆತಾಯ್ಗಿ ವ..."
"ನಾಂ ಮಾಂಯ್, ತೊ ಕೊಲೆಜಿಂತ್ ಇಂಟರ್ ಶಿಕ್ತಾ." ಮಧೆಂಚ್ ಜೆಸ್ಸಿ ಸಾಂಗಾಲಾಗ್ಲೆಂ ಆನಿಂ ಬಿತರ್ ಗೆಲೆಂ.
"ಮ್ಹಾಕಾ ಭಾರಿ ಖುಶಿ ಜಾಲಿ ತುಂ ಕೊಲೆಜಿಂತ್ ಶಿಕ್ತಾಯ್ ಮ್ಹಣ್. ಮ್ಹಾಕಾಯಿ ಮನ್ ಆಸ್ಲ್ಲೆಂ ಜೆಸ್ಸಿಕ್ ಕೊಲೆಜಿಚೆಂ ಶಿಕಾಪ್ ದಿಂವ್ಚೆಂ ಜಾಯ್ ಮ್ಹಣ್. ಪುಣ್, ದೆವಾಚಿ ಮಾಂಡಾವಳ್ ದುಸ್ರಿಚ್ ಆಸ್ಲ್ಲಿ" ಆನಿಂ ತಿಚೆಂ ಸಂಕ್ಷಿಪ್ತ್ ಥರಾನ್ ಆಪ್ಲಿ ಗಜಾಲ್ ಸಾಂಗ್ಲಿ. ಮೆಲ್ವಿನಾನ್ ಪಯ್ಲೆಂಚ್ ಜೆಸ್ಸಿ ಥಾವ್ನ್ ತಾಂಚಿ ಸ್ಥಿತಿಗತ್ ಆಯ್ಕಾಲ್ಲಿ.
ತಿತ್ಲ್ಯಾರ್ ಜೆಸ್ಸಿ ಬಿತರ್ ಥಾವ್ನ್ ಏಕ್ ಗ್ಲಾಸ್ ಕಾಫಿ ಹಾಡ್ನ್ ಆಯ್ಲೆಂ. ಮೆಲ್ವಿನ್ ನಾರ್ಗೊನ್ ಸಾಂಗಾಲಾಗ್ಲೊ. "ಹಾಂವ್ ಆತ್ತಾಂ ಪಿಯೆವ್ನ್ ಆಯಿಲ್ಲೊಂ ಮಾತ್ರ್. ನಾಕಾ ಆಸ್ಲ್ಲಿ ಮ್ಹಾಕಾ..."
"ಆತ್ತಾಂ ಪಿಯೆಲ್ಯಾರ್ ಕಿತೆಂ ಜಾಲೆಂ? ಏಕ್ ಗ್ಲಾಸ್ ಪೊಟಾಕ್ ಚಡ್ ಜಾಂವ್ಚಿ ನಾ" ಜೆಸ್ಸಿನ್ ಸಾಂಗ್ತಾನಾ ತಾಣೆಂ ಕಾಫಿ ಘೆತ್ಲಿ.
"ಕಾಫಿ ಬರಿ ಆಸಾ. ಮಸ್ತ್ ಥ್ಯಾಂಕ್ಸ್" ಏಕ್ ಘೊಟ್ ಗೀಳ್ನ್ ತೊ ಮ್ಹಣಾಲೊ.
"ಮ್ಹಾಕಾ ಥ್ಯಾಂಕ್ಸ್ ದೀನಾಕಾ. ಕಾಫಿ ಕೆಲ್ಲಿ ವ್ಹಡ್ಲಿಮಾಂಯ್ನ್" ತೆಂ ಹಾಸ್ಲೆಂ.
ಥೊಡೊ ವೇಳ್ ಗಜಾಲಿ ಮಾರ್ನ್ ತಿಂ ಬಸ್ಲ್ಲಿಂ. ವೊರಾಂ ಪಾಂಚ್ ವ್ಹಾಜ್ತಾನಾ ಮೆಲ್ವಿನ್ ಉಟ್ಲೊ. "ಹಾಂವ್ ಆತಾಂ ಚಲ್ತಾಂ. ಮ್ಹಾಕಾ ಇತ್ಲೊ ಸತ್ಕಾರ್ ಕೆಲ್ಲ್ಯಾಕ್ ದೇವ್ ಬರೆಂ ಕರುಂ ತುಮ್ಕಾಂ"
"ಛೆ, ಛೆ, ಆಮಿಂ ಕಸಲೊ ಸತ್ಕಾರ್ ಕೆಲಾ?" ಜೆಸ್ಸಿಚಿ ಆವಯ್ ಉಲೈಲಿ, "ಹೆಂ, ಇತ್ಲ್ಯಾ ದರ್ವಡ್ಯಾನ್ ವೆತಾಂಯ್ ಕಿತ್ಯಾಕ್? ಥೊಡೊ ವೇಳ್ ಬಸ್ಲ್ಯಾರ್ ಜಾಯ್ನಾಂಗಿ?"
"ರಾವೊಂಕ್ ರಾವ್ಯೆತೆ ಮಾವ್ಶೆ. ಪುಣ್ ಸಾಂಜೆಚಿ ಇಲ್ಲಿ ಭಂವ್ಡಿ ಮಾರ್ಲ್ಯಾ ಬಗಾರ್ ಮ್ಹಾಕಾ ನೀದ್ ಪಡಾನಾ" ಮೆಲ್ವಿನಾನ್ ಜಾಪ್ ದಿಲಿ.
"ಭವೊಂಕ್ ಹಾಂಗಾ ಪ್ರಸಿದ್ಧ್ ಜಾಗೆ ಕಸಲೆ ಆಸಾತ್ ?" ವಿಚಾರಿಲಾಗ್ಲೆಂ ಜೆಸ್ಸಿ.
"ಓ...ಕೊಡಿಯಾಳಾಂತ್ ಕಿತೆಂ ಬರ್ಗಾಲ್ ಆಯ್ಲಾಗಿ ಪ್ರಸಿದ್ಧ್ ಜಾಗ್ಯಾಂಕ್?" ಮೆಲ್ವಿನ್ ಹಾಸ್ಲೊ. "ತಾಂತುಂ ಉರ್ವಾ ಚರಿತ್ರ್ ಪ್ರಸಿದ್ಧ್ ಜಾಲಾಂ"
"ತಶೆಂ ಮ್ಹಳ್ಯಾರ್.."
"ಹಾಂಗಾ ಟಿಪ್ಪು ಸುಲ್ತಾನಾಚೆಂ ಕೊಟೆಂ ಆಸಾ. ನ್ಹಂಯ್ಚ್ಯಾ ದೆಗೆರ್ ತೆಂ ಬಾಂದ್ಲಾಂ. ತಾಚೆರ್ ಬಸ್ಲ್ಯಾರ್ ಮುಖ್ಲೊ ದರ್ಯೊ ಆನಿಂ ಮಾಡಾಂ ಝಡಾಂನಿ ಸೊಭ್ಚಿ ಪ್ರಥ್ವಿ ದಿಷ್ಟಿಕ್ ಪಡ್ತಾ" ತಾಣೆಂ ವಿವರ್ಸಿಲೆಂ.
"ಓ..... ಹಾಂವೆಂ ತೊ ದರ್ಯೊ ಕಿತೆಂ ಮ್ಹಣ್ ಎದೊಳ್ ಪಳೆಂವ್ಕ್ ನಾಂ. ಆನಿಂ ಟಿಪ್ಪು ಸುಲ್ತಾನಾಚೆಂ ಕೊಟೆಂ ಮ್ಹಳ್ಳೆಂ ನಾಂವ್ ಆತ್ತಾಂಚ್ ಆಯ್ಕಾಲ್ಲೆಂ. ಮೆಲ್ವಿನ್ ಹಾಂವ್ಯಿ ತುಜ್ಯಾ ಸಾಂಗಾಂತಾ ಯೇಂವ್ಗಿ? ಮಾಂಯ್, ವಚಾಜಾಯ್ಗಿ?" ಅತ್ರೆಗಾನ್ ಮ್ಹಣಾಲೆಂ.
ಮೆಲ್ವಿನ್ ಥಟಾಕ್ಲೊ. ಜೆಸ್ಸಿ ತಶೆಂ ಉಲೈತ್ ಮ್ಹಣ್ ಸ್ವಪ್ಣಾಂತ್ಯಿ ತಾಣೆಂ ಚಿಂತುಂಕ್ ನಾತ್ಲ್ಲೆಂ. ಎಕಾಚ್ಚಾಣೆಂ ಆಪ್ಣಾ ಸಾಂಗಾತಾ ನ್ಹಂಯ್ ದೆಗೆರ್ ಯೆತಾ ಮ್ಹಳ್ಯಾರ್....! ತೊ ವಿಜ್ಮಿತ್ ಜಾಲೊ ಆನಿಂ ಬೊಂಬ್ಯಾಬರಿ ದೊಳೆ ವಾಟಾರ್ನ್ ಜೆಸ್ಸಿಕ್ಚ್ ಪಳೆಂವ್ಕ್ ಪಡ್ಲೊ. ಸಾಂಗಾತಾಚ್ ಜೆಸ್ಸಿಚಿ ಆವಯ್ ಕಿತೆಂ ಮ್ಹಣಾತ್ ಮ್ಹಣ್ ಶಿಂತಿದ್ ತಾಚೆಂ ರಾಕ್ತಾಲೆಂ.
[ಮಾಗ್ಗಿಬಾಯೆನ್ ಕಿತೆಂ ಜಾಪ್ ದಿಲಿ? ಆದ್ಲ್ಯಾ ದಿಸಾ ಸಿಂತಿ...ಆನಿಂ ಆಜ್ ಜೆಸ್ಸಿ ತ್ಯಾಚ್ ಸುಲ್ತಾನ್ಬತ್ತೇರಿರ್? ನ್ಹಂಯ್ ಆನಿಂ ದರ್ಯಾಚ್ಯಾ ಮಧ್ಗತ್ ಮ್ಹಳ್ಳ್ಯಾಬರಿ ಸಾಂಪಡ್ಲೆಲ್ಯಾ ಮೆಲ್ವಿನಾಚೆಂ ಜೀವನ್ ಖಂಯ್ಚ್ಯಾ ವಾಟೆನ್ ಗೆಲೆಂ..? ಮುಖ್ಲ್ಯಾ ಅಂಕ್ಯಾಂತ್ ಪಳೆಯಾಂ]
ನಿರ್ಭಾಗ್ಯಾಚೆಂ ಸ್ವಪಾಣ್: ಪ್ರಸ್ತಾವನ್. ಅವಸ್ವರ್ 1, 2, 3, 4
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
