ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ನಿರ್ಭಾಗ್ಯಾಚೆಂ ಸ್ವಪಾಣ್
ಅವಸ್ವರ್ 3
ಮೆಲ್ವಿನ್ ಸಿಂತಿಲಾಗಿಂ ಉಲೈಲ್ಲೊ ಖರೆಂ. ಪುಣ್ ಉಪ್ರಾಂತ್ ತಾಣೆಂ ಚಿಂತ್ಲೆಂ, ಆಪ್ಣೆ ತಶೆಂ ಕಿತ್ಯಾಕ್ ಕೆಲೆಂಗಿ ಮ್ಹಣ್. ಕಿತ್ಯಾಕ್, ಸಿಂತಿಚಿ ಕ್ರೂರ್ ದೀಷ್ಟ್ ತಾಚೆರ್ ಪರ್ತಾಲ್ಲಿ. ತಾಚೆಂ ತೊಂಡ್ ವಿಜ್ಮಿತ್ಕಾಯ್ ತಶೆಂ ದ್ವೇಷ್ ಸಾಂಗಾತಾಚ್ ಪಾಜಾರ್ತಾಲೆಂ.
"ಶಟಪ್" ದೆಂಕ್ಣೊ ದಿಲೊ ಸಿಂತಿನ್. ಬಸ್ಸ್ಟೆಂಡಾಂತ್ ದುಸ್ರೆಂ ಕೊಣೀ ನಾತ್ಲ್ಲ್ಯಾನ್ ಮೆಲ್ವಿನ್ ಬಚಾವ್ ಜಾಲೊ. "ಚೆಡ್ವಾ ಕಡೆ ಉಲೊಂವ್ಕ್ ಲಜ್ ದಿಸಾನಾ?"
"ಲಜ್! ಲಜ್ ಕಿತ್ಯಾಕ್?" ಸಾಂಬಾಳುನ್ ಜಾಪ್ ದಿಲಿ ಮೆಲ್ವಿನಾನ್. "ತುಂ ಕಾಲ್ ಸೆಕೆಂಡ್ ಆಯ್ಲಾಂಯ್, ದೆಕುನ್......"
"ಆನಿಂ ತುಂ ಫಸ್ಟ್ ಅಯ್ಲಾಯ್ ಮ್ಹಣ್ ಮಿಜಾಸ್ಕಿ ದಾಕೊಂವ್ಕ್ ಆಯ್ಲಾಯ್? ತುಜ್ಯಾ ಧನ್ಯವಾದಾಚಿ ಗರ್ಜ್ ನಾ. ಜೀಬ್ ಬಂದ್ ಕರ್" ಕೆಂವ್ಜಾಲೆಂ ತೆಂ.
"ಸಿಂತಿ ತುಕಾ ಹಾಂವೆಂ ಅಕ್ಮಾನ್ ಕರುಂಕ್ ನಾ..." ಕಿತೆಂಗಿ ಸಾಂಗೊಂಕ್ ಸೊಧ್ತಾಲೊ ತೊ.
"ಮ್ಹಾಕಾ ಫುಲಾಂ ಘಾಲುಂಕ್ಯಿ ಪ್ರಯತ್ನ್ ನಾಕಾ.." ಅಶೆಂ ಮ್ಹಣ್ತಾನಾ ಬಸ್ಸ್ ಆಯ್ಲೆಂ ಆನಿಂ ಸಿಂತಿ ಬಸ್ಸಾರ್ ಚಡ್ಲೆಂ.
ಮೆಲ್ವಿನಾಕ್ ಪರ್ತ್ಯಾನ್ ಆಕ್ಮಾನ್ ಮೆಳ್ಲ್ಲೊ. ತಾಚೆಂ ಆಂಗ್ ಜಳೊಂಕ್ ಲಾಗ್ಲೆಂ ರಾಗಾನ್. ಏಕ್ ಚಲಿ ಇತ್ಲಿ ಧಾರುಣ್ ಜಾಂವ್ಕ್ ತಾಣೆಂ ಕಿತೆಂ ವಾಯ್ಟ್ ಕೆಲಾಂ? ತೊ ಕ್ರೋಧಾನ್ ಸಿಂತಿ ಗೆಲ್ಲ್ಯಾ ಬಸ್ಸಾಕ್ಚ್ ಪಳೆಂವ್ಕ್ ಪಡ್ಲೊ.
"ಆತಾಂ ಕಿತೆಂ, ಆಜ್ಚ್ ಸುರು ಕೆಲೆಂಯ್ಗಿ ಸಿಂತಿಚ್ಯಾ ಪಾಟಿಕ್ ಲಾಗೊಂಕ್?" ಪೈಸ್ ಥಾವ್ನ್ ಹಾಂಕಾಂ ಪಳೆಲ್ಲೊ ಶೀನಾ ಮ್ಹಣಾಲೊ. "ಆರೆ ಮೆಲ್ವಿನ್, ಕೊಲೆಜ್ ಪಯ್ಲಿರೆ ಆಪಾ. ಉಪ್ರಾಂತ್ ಚೆಡ್ವಾಂಚಿ ದೊಸ್ತಿ."
ಮೆಲ್ವಿನಾನ್ ಸಬ್ದ್ ಕಾಡ್ಲೊನಾ.
"ತುಜೆಂ ತೊಂಡ್ ಬಾವ್ಲಾಂ ಕಿತೆಂ? ಸಂಗತ್ ಕಿತೆಂ ಕಳಾನಾ"
"ಮ್ಹಾಕಾ ಕೊಲೆಜಿಕ್ ವೇಳ್ ಜಾಲೊ" ಮೆಲ್ವಿನ್ ಮೆಟಾಂ ಕಾಡುಂಕ್ ಲಾಗ್ಲೊ.
"ರಾವ್, ಹಾಂವೀ ಯೆತಾಂ ತುಜೆ ಸಾಂಗಾಂತಾ. ಮ್ಹಾಕಾಯ್ ಶೇಡಿಗುಡ್ಡಾ ಯೇಂವ್ಕ್ ಆಸಾ", ತಾಚ್ಯಾ ಬರಾಬರ್ ಶೀನಾಯಿ ಆಯ್ಲೊ, "ಮೆಲ್ವಿನ್, ಮ್ಹಾಕಾ ದಿಸ್ತಾ ತುಜೆಥಂಯ್ ಕಿತೆಂಗಿ ಘಡ್ಲಾಂ. ಸಾಂಗಾನಾಂಯ್ ಕಿತ್ಯಾಕ್?"
"ಕಾಂಯ್ ನಾ ಶೀನಾ. ಬೆಷ್ಟೊಚ್ ತುಜೊ ದುಬಾವ್". ತಾಣೆಂ ಲಿಪೊಂವ್ಕ್ ಪಳೆಲೆಂ.
"ನಾ, ಮ್ಹಾಕಾ ತುಂ ಫಟೈನಾಕಾ" ಇಲ್ಲೆಂಶೆಂ ದುಕೊನ್ ಮ್ಹಣಾಲೊ ಶೀನಾ. "ಎದೊಳ್ ತುವೆಂ ಕಸಲಿಯ್ ಸಂಗತ್ ಮ್ಹಜೆ ಥಾವ್ನ್ ಲಿಪೈಲ್ಲಿನಾ"
ಆನಿಂ ತಾಚ್ಯಾ ವತ್ತಾಯೆಕ್ ಮೆಲ್ವಿನಾನ್ ಸಗ್ಳಿ ಗಜಾಲ್ ತಾಕಾ ಸಾಂಗ್ಚಿ ಪಡ್ಲಿ.
"ಹಾಂ,ಆಶೆಂಗಿ ತರ್?" ಮೂಟ್ ಅರ್ನುನ್ ಶೀನಾ ಮ್ಹಣಾಲೊ. "ತುಂ ಘಾಬಾರ್ತಾಯ್ ಕಿತ್ಯಾಕ್ರೆ? ತುಜೊ ಧನಿ ಜಾಲ್ಯಾರ್ ಘರಾಕ್ ಜಾಲೊ. ತಾಂಕಾಂ ಬೂದ್ ಶಿಕಯ್ನಾ ಜಾಲ್ಯಾರ್ ಮ್ಹಜೆಂ ನಾಂವ್ಚ್ ಬದ್ಲಿತಾಂ. ತಾಂಚಿಂ ಹಾಡಾಂ ಪೂಡ್ ಕರಿನಾ ಜಾಲ್ಯಾರ್...!"
"ನಾಕಾ ಶೀನಾ. ತೆದಿ ವ್ಹೊಡ್ಲಿ ಲಾಂಬಾಯ್ ರೂಂದಾಯ್ ನಾಕಾ" ಬೆಜಾರಾಯೆನ್ ಮ್ಹಣಾಲೊ ಮೆಲ್ವಿನ್, "ಮೊಸೊರ್ ಪಳೆ ಮನ್ಶಾಚ್ಯಾ ಹಾಡಾಂ. ಹಾಡಾಂನಿ ಉಬ್ಜಾಲಾ, ತೊ ಮೊಸೊರ್ ಕಾಡ್ನ್ ಉಡೈಲ್ಯಾ ಖರಿತ್ ಬರಿಂ ಹಾಡಾಂ ಪೂಡ್ ಕೆಲ್ಲ್ಯಾಂತ್ ಆಮ್ಕಾಂ ಕಿತೆಂ ಫಾಯ್ದೊ? ಪ್ರತಿ ಜಾವ್ನ್ ದ್ವೇಷ್ ಆನಿಂ ರಾಗ್ ಮಾತ್ರ್ ಮೆಳ್ತೊಲೊ"
"ತುಂ ಭಿಂವ್ಕುರೊ ಮ್ಹಳ್ಳ್ಯಾಕ್ ಸಾಸ್ವಾ ತಿತ್ಲೊಯ್ ದುಬಾವ್ ನಾ. ಸಿಂತಿನ್ ತುಕಾ ಇತ್ಲೆಂ ಇನ್ಸಲ್ಟ್ ಕೆಲಾಂ ಆಸ್ತಾಂ...."
"ಶೀನಾ, ಹಾಂವ್ ಸಾಂಗ್ತಾಂ ಆಯ್ಕ್, ಮಧೆಂಚ್ ಮೆಲ್ವಿನ್ ಉಲೈಲೊ, "ತೆಂ ಗ್ರೇಸ್ತಾಗೆಲೆಂ ಚೆಡುಂ. ಹಾಂವ್ ಪಳೆ ಬಿಕಾರಿ. ಆಕ್ಮಾನ್ ಆನಿಂ ಕಷ್ಟ್ ಆಂಕಾಂ ಸದಾಂಚೆಂ ಈಷ್ಟ್. ತರೀ ಹಟಾನ್ ಆನಿಂ ಲಡಾಯೆವಿನಃ ತಾಂಚೆಲಾಗಿಂ ಹಾಂವ್ ಜಿಕ್ತೊಲೊಂ"
"ತುಂ ಸಾಂತ್ರೆ ಮೆಲ್ವಿನ್," ಹಾಸೊನ್ ಶೀನಾನ್ ಸಾಂಗ್ಲೆಂ, "ಬರೆಂ, ಸಿಂತಿಚ್ಯಾ ಪಾಟ್ಲ್ಯಾನ್ ಹಟಾನ್ಂಚ್ ಲಾಗ್. ತಾಚೊ ಹಂಕಾರ್ ಜಿರೊನ್ ತುಜೆಂ ಭೊಗ್ಸಾಣೆ ಮಾಗ್ತಾ ಮ್ಹಣಾಸರ್ ತಾಕಾ ಸೊಡಿನಾಕಾ"
"ಖರೆಂಚ್ ಶೀನಾ. ಸಿಂತಿ ಹಟ್ಟಿ ಚೆಡುಂ. ತೆಂ ಕೊಣಾಕ್ಚ್ ಗುಮಾನ್ ಕರಿನಾ. ಮ್ಹಜೆ ತಸಲ್ಯಾ ಗರೀಬಾಕ್ ತ್ಯಾ ಫುಡೆಂ ಲೆಕಿನಾ. ಪುಣ್ ಶೀನಾ, ಹಾಂವ್ ಪ್ರಯತ್ನ್ ಕರಿನಾಸ್ತಾಂ ರಾವಾನಾ,. ಸಿಂತಿಚೆಂ ಮನ್ ಮ್ಹಜೆಥಂಯ್ ವ್ಹೊಡ್ಲ್ಯಾ ಬಗಾರ್ ಸೊಡ್ಚೊಂನಾ." ಘಟ್ಟ್ ಮ್ಹಣಾಲಾಗ್ಲೊ ಮೆಲ್ವಿನ್.
"ಹುಂ, ಸುಮಾರ್ ನಹಿಂ ತುಂ", ಮೆಲ್ಚಿನಾಚಿ ಪಾಟ್ ಥಾಪುಡ್ನ್ ತೊ ಉಲೈಲೊ, "ತುಂ ಸಿಂತಿಚ್ಯಾ ಮೊಗಾರ್ ಪಡ್ಲಾಯ್ಗಿ ಕಿತೆಂರೆ?"
ಮೆಲ್ವಿನ್ ಲಜೆಲೊ ಆನಿಂ ತಾಂಬ್ಡೊ ಜಾಲೊ "ವ್ಹಯ್, ಹಾಂವ್ ತಾಚೊ ಮೋಗ್ ಕರ್ತಾಂ" ಗಾಗೆಲೊ ಮೆಲ್ವಿನ್, "ಸಿಂತಿ ಕಿತ್ಲೆಂ ಸುಂದರ್, ಶೀನಾ! ಕಸಲೊ ರಂಗೀತ್ ತಾಚೊ ತಾಳೊ!"
"ತುಂ ಎಕ್ಲೊ ಮಹಮ್ಮದ್ ರಫಿ ಆನಿಂ ತೆಂ ಲತಾ..... ಹ...ಹ್ಹ....ಹ್ಹ......" ಶೀನಾ ಹಾಸ್ಲೊ.
"ಶೀನಾ, ಹಾಂಗಾ ಆಯ್ಕ್....." ಥೊಡ್ಯಾ ವೆಳಾನ್ ತೊ ಉಲೈಲೊ, "ಹಾಂವ್ ದುಬ್ಳೊ ನಹಿಂಗಿ ಶೀನಾ? ಮ್ಹಾಕಾ ನ್ಹೆಸೊಂಕ್ ಸಾರ್ಕಿ ಮುಸ್ತಾಯ್ಕಿ ನಾ. ಹಾತಾಂತ್ ಪಯ್ಶೆಯಿನಾಂತ್. ತರ್ ಸಿಂತಿ ಮ್ಹಜೊ ಮೋಗ್ ಕರಿತ್ಗಿ?"
"ಮೋಗ್ ಮ್ಹಳ್ಯಾರ್ ಪಯ್ಶಾಂನಿ ಮೊಲಾಕ್ ಘೆಂವ್ಚೊವೆರೆ ಮೆಲ್ವಿನಾ? ತುಕಾ ಸುಂದರ್ ರೂಪ್ ಆಸಾ. ತೆಂ ಪಾವಾನಾಂಗಿ?"
"ತೆಂ ಮ್ಹಜೊ ಮೋಗ್ ಕರಿತ್ ಜಾಲ್ಯಾರ್ ಸಂಸಾರಾಂತ್ ಹಾಂವ್ ವರ್ತೊ ಭಾಗಿ. ತಾಚೆಂ ಮನ್ ಮ್ಹಜೆಂ ಥಂಯ್ ಖಂಡಿತ್ ವ್ಹೊಯ್ ಕರ್ತೊಲೊ" ಮೆಲ್ವಿನ್ ಮ್ಹಣಾಲೊ.
ಆಶೆಂ ತೆ ಉಲೊವ್ನ್ ಆಸ್ತಾನಾ ಶೇಡಿಗುಡ್ಡಾ ಪಾವ್ಲೆ. ಶೀನಾ ಆಪ್ಲ್ಯಾ ಕಾಮಾಕ್ ಗೆಲೊ. ತಾಕಾ ಆದೇವ್ಸ್ ಮಾಗೊನ್ ಮೆಲ್ವಿನ್ ಕೊಲೆಜಿಚೊ ಗುಡೊ ಚಡ್ಲೊ. ತೊ ಕ್ಲಾಸಿಕ್ ಪಾವ್ತಾನಾ ತಾಕಾ ಆಜಾಪ್ಚ್ ರಾಕೊನ್ ಆಸ್ಲ್ಲೆಂ. ಸನ್ವಾರಾಚ್ಯಾ ಪ್ರಸಂಗಾವರ್ವಿಂ ತಾಚೆ ನಾಂವ್ ಇತ್ಲೆಂ ಪ್ರಚಾರ್ ಜಾಲ್ಲೆಂ ಕಿ, ಸಕ್ಡಾಂಕಿ ತೊ ವಳ್ಕಿಚೊ ಜಾಲ್ಲೊ. ಸಕ್ಕಡೀ ತಾಚೆ ಸರ್ಶಿಂ ಯೇವ್ನ್ ವಳೊಕ್ ದಾಕೊವ್ನ್ ಉಲೊಂವ್ಕ್ ಲಾಗ್ಲೆ. ಜಾಯ್ತೆ ಹೊಗಳ್ಸಿತಾಲೆ. ಆಶೆಂ ತೊ ನಾಂವಾಡ್ದಿಕ್ ಜಾಲೊ - ಎಕಾಚ್ ದಿಸಾನ್.
ಆನಿಂ ತ್ಯಾ ದಿಸಾ ಥಾವ್ನ್ ಪ್ರಾರಂಭ್ ಜಾಲ್ಲೆಂ ತಾಣೆಂ ಚಿಂತ್ಲ್ಲೆಂ ವಿಶೇಷ್ ಕಾಮ್. ಶೀನಾಚ್ಯಾ ವತ್ತಾಯಾನ್, ಗಿಬ್ಬಾಚ್ಯಾ ಪ್ರೋತ್ಸಾಹಾನ್ ಸಿಂತಿ ಮೆಳ್ಲ್ಲ್ಯಾ ಮೆಳ್ಲ್ಲ್ಯಾಕಡೆ ತೊ ಉಲೊಂವ್ಕ್ ಲಾಗ್ಲೊ. ಎಕಾ ಜಿನ್ಸಾಚೆಂ ಹಟ್ ತಾಕಾ ಆಯಿಲ್ಲೆಂ. ಪುಣ್ ತಾಚ್ಯಾ ಹ್ಯಾ ಕರ್ನೆಕ್ ಫಳ್ ಮಾತ್ರ್ ಉಳ್ಟೊ ಮೆಳ್ತಾಲೊ. ಸಿಂತಿಚೆಂ ರಾಗಿಷ್ಟ್ ತೊಂಡ್ ವ ಆಕ್ಮಾನಾಚಿಂ ಉತ್ರಾಂ ಮಾತ್ರ್ ತಾಕಾ ಪಾಟಿಂ ಮೆಳ್ತಾಲಿಂ. ಮೆಲ್ವಿನಾಕ್ ಭ್ಯೆಂಯಿ ಆಸ್ಲ್ಲೆಂ. ಸಿಂತಿ ಘರಾ ಬಾಪುಯ್ ಲಾಗಿ ಹಿ ಖಬಾರ್ ಸಾಂಗಾತ್ಗಿ ಮ್ಹಣ್. ತರೀ ತಶೆಂ ಕಾಂಯ್ ಘಡ್ಲೆಂ ನಾ. ನಿಮಾಣೆಂ ತಾಣೆಂ ಆನಿಂ ಗಿಬ್ಬಾನ್ ದುಸ್ರೊ ಉಪಾಯ್ ಚಾಲು ಕೆಲೊ, - ಸಾಂಜೆರ್ ಕೊಲೆಜ್ ಸುಟ್ಚ್ಯಾ ವೆಳಾರ್ ಸಾಂ. ಅಗ್ನೆಸ್ ಕೊಲೆಜಿಲಾಗಿಂ ವೆಚೆಂ ಮ್ಹಣ್, ಆನಿಂ ತ್ಯಾ ದೀಸ್ ಸಾಂಜೆರ್ ನಿಮಾಣ್ಯಾ ಪಿರೇಡಿಕ್ ರಾವಾನಾಸ್ತಾಂ ದೊಗೀ ಬೆಂದೂರ್ಚ್ಯಾ ವಾಟೆಕ್ ಲಾಗ್ಲೆ.
ಸಾಂ. ಅಗ್ನೆಸ್ ಕೊಲೆಜಿಂತ್ ಸಾಂಜೆಚಿ ಕ್ಲಾಸ್ ಸಂಪ್ಲಿ ಮ್ಹಣೊನ್ ಬೆಲ್ಲ್ ವಾಜ್ಲಿ. ಸಿಂತಿ ಆನಿಂ ತಾಚೆಂ ಇಷ್ಟಿನ್ ಐವಿ ದೊಗಾಂಯ್ ಕ್ಲಾಸಿ ಭಾಯ್ರ್ ಆಯ್ಲಿಂ ಆನಿಂ ಘರ್ಚ್ಯಾ ವಾಟೆಕ್ ಲಾಗ್ಲಿಂ.
"ಏ ಸಿಂತಿ...ತೊ ಕೊಣ್ ಮೆಲ್ವಿನ್ ನಹಿಂವೆ?" ಐವಿನ್ ಮೆಲ್ವಿನಾಕ್ ಪಳೆವ್ನ್ ಮ್ಹಳೆಂ.
"ತಾಚಿ ಖಬಾರ್ ತುಕಾ ಕಿತ್ಯಾಕ್? ದುಸ್ರಿ ಕಸಲಿಯಿ ಖಬಾರ್ ಉಲಯ್" ರಾಗಾನ್ ಮ್ಹಣಾಲೆಂ ಸಿಂತಿ. ತಾಣೆಂಯಿ ಮೆಲ್ವಿನಾಕ್ ಆನಿಂ ಗಿಬ್ಬಾಕ್ ಪಳೆಲ್ಲೆಂ.
"ಓ, ಸಮ್ಜಾಲೆಂ ಸಾಯ್ಬಿಣಿ...." ಮತ್ಲಾಬಿ ಹಾಸೊನ್ ಐವಿ ಸಾಂಗಾಲಾಗ್ಲೆಂ, "ತುಮ್ಚಿ ಖಬಾರ್ ಮ್ಹಾಕಾ ಕಿತ್ಯಾಕ್? ಕಶೆಂಯಿ ಫಾಲ್ಯಾಂ ಪೊರ್ವಾಂ ತುಮಿ ದೊಗಾಂಯಿ..."
"ದೊಗಾಂಯಿ ಕಿತೆಂ ಕಾಜಾರ್ ಜಾತಾಂವ್ ಮ್ಹಣ್ತಾಯ್ಗಿ?" ಕೆಂವ್ಚಾಲೆಂ ಸಿಂತಿ, "ತ್ಯಾ ಅನ್ನಾಡ್ಯಾಚಿ ಖಬಾರ್ ಮ್ಹಕಾ ನಾಕಾ...."
"ಛೆ, ಛೆ, ಇತ್ಲೆಂ ಕಿತ್ಯಾಕ್ ತಾಪ್ಲೆಂಯ್ ಬಾ?" ತಾಕಾ ಸಮಾಧಾನ್ ಕರಿಲಾಗ್ಲೆಂ ಐವಿ. "ಹಾಂವೆಂ ಮ್ಹಳೆಂ ತುಮಿ ದೊಗಾಂಯ್ ಬೆಂಗ್ಳೂರಾಕ್ ವೆಚೆಂ ಆಸಾತ್ ಮ್ಹಣ್.."
"ಹಾಂವ್ ವಚಾನಾ. ಥರ್ಡ್ ಕ್ಲಾಸ್ ಮನ್ಶಾಂಚೊ ಸಾಂಗಾಂತ್ ಮ್ಹಾಕಾ ನಾಕಾ" ತಿಕ್ಸಾಣೆನ್ ಜಾಪ್ ದಿಲಿ ಸಿಂತಿನ್.
"ತುಂ ಕಿತ್ಯಾಕ್ ಕೊಡ್ಸಾಣೆನ್ ಉಲೈತಾಯ್ ಹಾಬಾ?" ಉದ್ಗಾರ್ ಕಾಡ್ಲೊ ತಾಣೆಂ, "ಮೆಲ್ವಿನ್ ಇತ್ಲೊ ಬರೊ ಗಾವ್ಪಿ ಪಳೆಂವ್ಕ್ ಸುಂದರ್ ಆಸಾ........"
"ತಶೆಂ ಜಾಲ್ಯಾರ್ ತುಂ ತಾಚ್ಯಾ ಮೊಗಾರ್ ಪಡ್" ಸಿಂತಿಚಿ ಜಾಪ್ ಆಯ್ಕೊನ್ ಥಂಡ್ ರಾವ್ಲೆಂ ಐವಿ. ಆತಾಂ ಮೆಲ್ವಿನ್ ಆನಿಂ ಗಿಬ್ಬಾ ದೊಗೀ ತಾಂಚ್ಯಾ ಬರಾಬರ್ ಆಯಿಲ್ಲೆ.
"ಮೆಲ್ವಿನ್, ತುಕಾ ಉಡಾಸ್ ಆಯ್ಲೊವೆ? ಆಮಿಂ ತ್ಯಾ ದೀಸ್ ಪಳೆಲ್ಲ್ಯಾ ಇಂಗ್ಲಿಷ್ ಪಿಕ್ಚರಾಂತ್, ತ್ಯಾ ಚಲಿಯೆಚಿ ಚಾಲ್, ನಾಜೂಕ್ ಕೇಸ್....." ಗಿಬ್ಬಾನ್ ತಾಂಕಾಂ ಆಯ್ಕಾ ಸಾರ್ಕೆಂ ಮ್ಹಣೊನ್ ಸೊಡ್ಳೆಂ.
ಜಾಪ್ ಯೇಂವ್ಕ್ ಚಡ್ ವೇಳ್ ಗೆಲೊ ನಾ ಸಿಂತಿ ಥಾವ್ನ್, "ಆನಿಂ ಐವಿ, ತ್ಯಾ ಚೆಡ್ವಾಚ್ಯಾ ಪಾಂಯಾಂಕ್ ವ್ಹಾಣೊ ಪಳೆಂವ್ಕ್ ನಾಂಯ್ವೆ ತುವೆಂ?"
"ತ್ಯೊ ವ್ಹಾಣೊ ಪಳೆಂವ್ಚೆಂಚ್ ವ್ಹೊಡ್ಲೆಂ ಭಾಗ್ ಗಿಬ್ಬಾ" ಹಾಸ್ಲೊ ಮೆಲ್ವಿನ್.
"ಆನಿಂ ತ್ಯಾ ವ್ಹಾಣಾಂನಿ ಮಾರ್ ಖಾಂವ್ಚೆಂ ಪುರುಷತ್ವಾಚೆಂ ಲಕ್ಶಣ್,..." ಕಡ್ಕಡ್ಲೆಂ ಸಿಂತಿ.
"ಪಳೆಂಯಾಬಾ ದಿತಾಯ್ ಜಾಲ್ಯಾರ್ ಖಾವ್ನ್ ಸೊಡ್ಯಾಂ" ಮೆಲ್ವಿನ್ ತಾಪ್ಲೊ.
"ಲಜ್ ನಾತ್ಲ್ಲೆ, ಮಾರ್ ಖಾವ್ನ್ಯಿ ವೀರ್ ಮ್ಹಣ್ ಪಾಚಾರ್ತಿತ್. ಪುಣ್ ಥರ್ಡ್ ಕ್ಲಾಸ್ ಮನ್ಶಾಂಕ್ ಹ್ಯಾ ವ್ಹಾಣಾಂಚೆ ಮಾರ್ ಫಾವೊ ನಹಿಂ. ಕಿತ್ಯಾಕ್ ತಾಂಕಾಂ ವ್ಹಾಣೊ ಘೆಂವ್ಚಿ ಸಕತ್ ಯೇಂವ್ಕ್ಚ್ ಶತಮಾನಾಂ ವೆತಿತ್" ಕ್ರೂರ್ ರಿತಿನ್ ಹಿಣ್ಸಿಲೆಂ ಸಿಂತಿನ್.
ಮೆಲ್ವಿನ್ ಸ್ಥಬ್ದ್ ರಾವ್ಲೊ. ಗಿಬ್ಬಾ ಥಟಾಕ್ಲೊ. ದೊಗಾಂಕಿ ತಳ್ಮಾಟ್ಯಾನ್ ವ್ಹಾಜೈಲ್ಲ್ಯಾಬರಿ ಜಾಲ್ಲೆಂ. ತಾಂಚಿ ಚಾಲ್ ನಿಧಾನ್ ಜಾಲ್ಲಿ. ಮುಖ್ಲ್ಯಾನ್ ವೆಚೆಂ ಸಿಂತಿ ಆನಿಂ ಐವಿ ಜ್ಯೋರಾನ್ ಹಾಸ್ಲಿ.ಹಾಂಕಾಂ ದೊಗಾಂಕ್ ಜೀಬ್ ಪರ್ತಾಲಿನಾ.
"ಗಿಬ್ಬಾ....." ಲಾಂಬಾಯೆಚೆಂ ಮೌನ್ ಮೋಡ್ನ್ ಮೆಲ್ವಿನ್ ಉಲೈಲೊ. ತಾಚೆಂ ಕಪಾಲ್ ಘಾಮಾನ್ ಬಿಜ್ಲ್ಲೆಂ. "ಸರ್ವ್ ಮ್ಹಜೆಂ ಪ್ರಯತ್ನ್ ನಿರ್ಫಳ್ ಜಾಲೆಂ ಗಿಬ್ಬಾ. ಆತಾಂ ಹಾಂವ್ ಖಂಡಿತ್ ಚಿಂತ್ತಾಂ, ತೆಂ ಘರಾ ವಚೊನ್ ಹಿ ಖಬಾರ್ ತಾಚ್ಯಾ ಪಪ್ಪಾಕ್ ಸಾಂಗ್ತೆಲೆಂ...."
"ತುಂ ಎಕ್ಲೊ ಬಿಂವ್ಕುರ್ಯಾಬರಿ ಉಲೈತಾಯ್" ಗಿಬ್ಬಾ ಮ್ಹಣಾಲೊ. "ಸಿಂತಿ ತಾಚ್ಯಾ ಪಪ್ಪಾಲಾಗಿಂ ಹಿ ಖಬಾರ್ ಸಾಂಗ್ತೆಲೆ? ಬಿಲ್ಕುಲ್ ನಾ. ಚೆಡ್ವಾಂಚೊ ಸ್ವಭಾವ್ ಹಾಂವ್ ಬರೊ ಕರ್ನ್ ಜಾಣಾಂ. ಆಮ್ಕಾಂ ಕಶೆಂ ತಾಂಚೆರ್ ಮನ್ ಪಡ್ತಾಗಿ, ತಶೆಂಚ್ ತಾಂಕಾಂ ಆಮ್ಚೆರ್ ಮನ್ ನಾ ಮ್ಹಳ್ಯಾರ್ ಫಟ್. ಸಿಂತಿಚೆಂ ಹೆಂ ನಟನ್ ಮಾತ್ರ್. ತೆಂ ತಾಚ್ಯಾ ಪಪ್ಪಾಲಾಗಿಂ ಹಿ ಖಬಾರ್ ಸಾಂಗೊಂವ್ಕ್ಯಿ ಧೈರ್ ಘೆಂವ್ಚೆನಾ. ಆಳೆ ಮೆಲ್ವಿನ್, ಹಾಂವ್ ಏಕ್ ಸಂಗತ್ ಸಾಂಗ್ತಾಂ, ಆಯ್ಕಾತಾಯ್ವೆ?"
"ಕಿತೆಂ..?" ಮೆಲ್ವಿನಾಚ್ಯಾ ತಾಳ್ಯಾಂತ್ ಉಲ್ಲಾಸ್ ನಾತ್ಲ್ಲೊ.
"ಪಳೆ, ತುಂ ಖಾಲಿ ಆಶೆಂ ವಚೊನ್ ಸಿಂತಿಲಾಗಿಂ ’ಹಾಂವ್ ತುಜೊ ಮೋಗ್ ಕರ್ತಾಂ ಬಾ’ ಮ್ಹಜೆಂ ಜಾಲ್ಯಾರ್ ಕಾನ್ ಹಾಲೊಂವ್ಕ್ ತೆಂ ಪಿಶೆಂ ನಹಿಂ. ತ್ಯಾಚ್ ಪರ್ಮಾಣೆಂ ತಾಚ್ಯಾ ಪಾಟಿಕ್ ಲಾಗೊನ್ ತಮಾಶೆ ಕರ್ನ್ ಮನ್ ಜಿಕೊಂಕ್ ಪಳೆಂವ್ಚೆಂ ಹೀನ್ ಕಾಮ್. ಚೆಡ್ವಾಂ ಖೆಳಾಚ್ಯೊ ವಸ್ತು ನಹಿಂ ಮ್ಹಣ್ ಸಮಜ್. ಚೆಡ್ವಾಂಕ್ ಪೊಕೆಟ್ ಕರ್ಚೆಂ ಖಂಯ್. ಏಕ್ ದೀಸ್ ಸಿನೆಮಾಕ್ಗಿ, ಬೊಂವ್ಡೆಕ್ಗಿ, ರೆಸ್ಟೋರೆಂಟಾಂತ್ ಫೆಮಿಲಿ ರೂಮಾಕ್ಗಿ ಆಪಯ್. ಉಪ್ರಾಂತ್ ಪಳೆತೊಲೊಯ್"
ತಾಚಿಂ ಉತ್ರಾಂ ಆಯ್ಕೊನ್ ಹಾಸ್ಲೊ ಮೆಲ್ವಿನ್, "ತುಜ್ಯಾ ಸಾಂಗ್ಣೆಂತ್ ಹಾಂವ್ ಪಾತ್ಯೆನಾ. ತುಜಿಂ ಹಿಂ ಸಗ್ಳಿಂ ಕಲ್ಪನಾಂ"
"ಸತ್ ವ ಫಟ್, ತೆಂ ಮ್ಹಜ್ಯಾ ಇತ್ಲ್ಯಾ ದಿಸಾಂಚ್ಯಾ ಅನ್ಭೋಗಾನ್ ಹಾಂವ್ ಜಾಣಾಸ್ಲ್ಲಿ ಗಜಾಲ್. ತುಂ ಇತ್ಲೊ ತೇಂಪ್ ಕೊಲೆಜಿಕ್ ವಚೊನ್ ಕಾಂಯ್ ಫಾಯ್ದೊ ನಾ. ಚೆಡೆ-ಚೆಡ್ವಾಂ ಫೆಮಿಲಿ ರೂಮಾಂತ್ ಆಸ್ಚೆಂ, ವ ಸಿನೆಮಾ ಥಿಯೇಟರಾಂತ್ ಬಾಲ್ಕನಿಚೆರ್ ಆಸ್ಚೆಂ ತುವೆಂ ಎದೊಳ್ ಪಳೆಂವ್ಕ್ನಾಂಯ್ ಮ್ಹಳ್ಯಾರ್ ಆಜಾಪ್ ದಿಸ್ತಾ. ತುಕಾ ಜರ್ ತರ್ ಸತ್ ಕಳಾಜಾಯ್, ಫಾಲ್ಯಾಂ ಸಾಂಜೆರ್ ಕ್ಲಾಸ್ ಜಾತ್ಚ್ ಆಮಿಂ ಹಂಪನ್ಕಟ್ಟಾ ಚಲ್ಯಾಂ..." ಗಿಬ್ಬಾ ಮ್ಹಣಾಲೊ.
ಮೆಲ್ವಿನಾಕ್ ಆನಿಕೀ ಸತ್ ಮೆಳೊಂಕ್ ನಾತ್ಲ್ಲೆಂ. ಸಿನೆಮಾ ಆನಿಂ ಹೊಟೆಲಾಂ ಮ್ಹಳ್ಯಾರ್ ತಾಚ್ಯಾ ವಾಂಟ್ಯಾಕ್ ಮ್ಹಾರ್ಗಾಯೆಚ್ಯೊ ವಸ್ತು. ಖಂಯ್ ಎಕೇಕ್ ಪಾವ್ಟಿಂ ಹೊಟೆಲಾಕ್ ವ ಸಿನೆಮಾಕ್ ಗೆಲ್ಲ್ಯಾ ತಾಕಾ ಗಿಬ್ಬಾಕ್ ಸಾಂಗ್ಲ್ಲ್ಯೊ ಸಂಗ್ತಿ ಪಳೆಂವ್ಕ್ ಸಂದರ್ಭ್ಯಿ ನಾತ್ಲ್ಲೊ.
ಕದ್ಳೆ ಥಾವ್ನ್ ಗಿಬ್ಬಾ ಬೊಂದೆಲ್ ವೆಚ್ಯಾ ವಾಟೆಕ್ ಘುಂವ್ಲೊ. ಮೆಲ್ವಿನ್ ತಸೊಚ್ ವಾಟ್ ಮುಖಾರ್ಸುನ್ ಇಜೈಚ್ಯಾ ವಾಟೆನ್ ಘರಾ ಪಾವ್ಲೊ.
ಗಿಬ್ಬಾನ್ ತಾಕಾ ಸಾಂಗ್ಲ್ಲೆಂ - ಚೆಡೆ - ಚೆಡ್ವಾಂ ಸಾಂಗಾಂತಾ ಹೊಟೆಲಾಕ್ ವೆತಾತ್ ಆನಿಂ ಖುದ್ಧ್ ತುಜ್ಯಾ ದೊಳ್ಯಾಂನಿ ಪಳೆ ಮ್ಹಣ್. ತ್ಯಾಚ್ ಪರಿಂ ದುಸ್ರ್ಯಾ ದಿಸಾಚ್ ಆಪುಣ್ ಹೆಂ ಸರ್ವ್ ಪಳೆತೊಲೊಂ ಮ್ಹಣ್ ಸ್ವಪ್ಣಾಂತ್ಯಿ ತಾಣೆಂ ಚಿಂತುಂಕ್ ನಾತ್ಲ್ಲೆಂ.
ದುಸ್ರ್ಯಾ ದಿಸಾ ಸಾಂಜೆರ್ ಕ್ಲಾಸ್ ಸಂಪ್ಲಿ. ಮೆಲ್ವಿನ್ ಆನಿಂ ಗಿಬ್ಬಾ ಬಾವ್ಟ್ಯಾ ಗುಡ್ಯಾಚ್ಯಾ ವಾಟೆನ್ ಹಂಪನ್ಕಟ್ಟಾ ಭಾಯ್ರ್ ಸರ್ಲೆ. ಬಾವ್ಟ್ಯಾ ಗುಡ್ಯಾರ್ ಪಾವ್ತಾನಾ ಗಿಬ್ಬಾ ಮ್ಹಣಾಲೊ - "ಆಮಿಂ ಥೊಡೊ ವೇಳ್ ಗಾರ್ಡನಾಂತ್ ಬಸ್ಯಾಂ ಮೆಲ್ವಿನ್. ಕಸೊಯಿ ವೇಳ್ ಮಸ್ತ್ ಆಸಾ"
ಮೆಲ್ವಿನ್ಯಿ ಒಪ್ಲೊ. ದೊಗೀ ಗಾರ್ಡನಾ ಬಿತರ್ ಸರ್ಲೆ ಆನಿಂ ಎಕಾ ಬಾಂಕಾರ್, ದರ್ಯಾಕ್ ಫುಡ್ ಕರ್ನ್ ಬಸ್ಲೆ.
ಪಾರ್ಕಾಂತ್ಲ್ಯಾ ರೇಡಿಯೋ ಥಾವ್ನ್ ವ್ಹಾಳೊನ್ ಯೆತಾಲೊ ಕಸಲೊಗಿ ತಾಳೊ. ಸಾಂಜೆಚೊ ವೇಳ್ ತೊ ಸುಂದರ್ ಜಾವ್ನಾಸ್ಲ್ಲೊ. ಭಾಗಿಂತ್ ಫುಲಾಂ ಫುಲ್ಲ್ಲಿಂ ಆನಿಂ ನಾನಾ ಥರಾಚ್ಯಾ ಸೊಭಾಯೆನ್ ಭರ್ಲ್ಲಿಂ. ಥಂಡ್ ವಾರೆಂ ದರ್ಯಾ ಕುಶಿ ಥಾವ್ನ್ ವ್ಹಾಳ್ತಾನಾ, ಗಂಭೀರ್ ತೊ ದರ್ಯೊಯಿ ದಿಷ್ಟಿಕ್ ಪಡ್ಟಾಲೊ. ತ್ಯಾ ಹವ್ಯಾಕ್, ತ್ಯಾ ಸೊಭಾಯೆಕ್ ಮೆಲ್ವಿನಾಚಿ ಮತ್ ಪಿಶಿ ಜಾಲಿ.
"ಕಿತ್ಲೆಂ ಸೊಬಿತ್ ಗಿಬ್ಬಾ!"
"ಕೋಣ್, ಸಿಂತಿಗಿ?" ಕಿತೆಂಗಿ ಚಿಂತ್ತಾಲೊ ಗಿಬ್ಬಾ ಸಟ್ಟ್ ಕರ್ನ್ ಮ್ಹಣಾಲೊ.
ಮೆಲ್ವಿನ್ ಎಕಾಚ್ಛಾಣೆ ಲಜ್ಲೊ - "ಛೆ, ಹಾಂವೆಂ ಮ್ಹಳ್ಳೆಂ ಸಾಜೆಚೊ ವೇಳ್....."
"ಹಾಂ ಹಾಂ......ವ್ಹಯ್" ಗಿಬ್ಬಾಯಿ ಲಜ್ಲೊ ಆಫ್ಲ್ಯಾ ಆಜಾಗ್ರುತ್ಕಾಯೆಕ್. ಸಾಂಜೆಚ್ಯಾ ವೆಳಾರ್ ಮತಿಕ್ ಖುಶಾಲಾಯ್ ಕರುಂಕ್ ಜಾಯ್ತೊ ಲೋಕ್ ಗಾರ್ಡನಾಕ್ ಆಯಿಲ್ಲೊ. ವೇಳ್ ಗೆಲೊ ಆನಿಂ ಸುರ್ಯೊ ದಿಗಂತಾರ್ ಬುಡೊನ್ ಮೊಳಾಬ್ ತಾಂಬ್ಡೆ ಜಾಲ್ಲೆಂ. ಥೊಡ್ಯಾ ವೆಳಾನ್ ಮಾರ್ಗಾಚೆ ವೀಜ್ ದಿವೆ ಪೆಟ್ಲೆ ಆನಿಂ ತಕ್ಷಣ್ ಗಿಬ್ಬಾ ಮ್ಹಣಾಲೊ - "ಆಮಿಂ ಆತಾಂ ಚಲ್ಯಾಂ ಮೆಲ್ವಿನ್"
"ತಶೆಂ ದೊಗಿ ಉಟ್ಲೆ ಆನಿಂ ಹಂಪನ್ಕಟ್ಟಾ ವೀಜ್ ದಿವ್ಯಾಂಚ್ಯಾ ಉಜ್ವಾಡಾಕ್ ಸೊಭ್ತಾಲೆಂ. ಲೊಕಾಚೊ ಸಂಖೊಯಿ ಧಾರಾಳ್ ಆಸ್ಲ್ಲೊ. ಕೊಣ್ ಘರಾಂ ವೆತಾಲಿಂ. ಕೊಣ್ ತರ್ನಾಟೆ ಗುಂಪು ಕರ್ನ್ ಪಟ್ಟಾಂಗಾ ಮಾರ್ತಾಲೆ. ಜೊವ್ಳೆ ಶೊಪಾಂನಿ ಲೋಕ್ ಭರ್ಲ್ಲೊ.
ಗಿಬ್ಬಾ ಮ್ಹಣಾಲೊ - "ಮೆಲ್ವಿನ್, ಜಾಯ್ತ್ಯಾ ಪಾವ್ಟಿಂ ಮ್ಹಾಕಾ ಏಕ್ ದೀಷ್ಟ್ ಪಳೆಂವ್ಕ್ ಮೆಳ್ಳ್ಯಾ. ತಿ ಪಳೆವ್ನ್ ತುಕಾ ಕಿತೆಂ ಬೊಗ್ತಾಗಿ ಹಾಂವ್ ನೆಣಾಂ. ಮತಿಂತ್ ನಾನಾಂತೆ ದುಬಾವ್ ಆನಿಂ ಇರಾದೆ ದವರ್ನ್, ಕರ್ಗೊಂಚ್ಯಾ ಬದ್ಲಾಕ್, ಏಕ್ಚ್ ಪಾವ್ಟಿಂ ತಿಜೊ ದುಬಾವ್ ಪರಿಹಾರ್ ಕೆಲ್ಲೊ ಬರೊ ದಿಸ್ತಾ ಮ್ಹಾಕಾ. ಆತಾಂ ಆಮಿಂ ದಾವ್ಯಾಕ್ ಅಸ್ಚ್ಯಾ ಫೆಮಿಲಿ ರುಮಾಕ್ ತುಜಿ ದೀಷ್ಟ್ ವೊಚೊಂದಿ".
ದೊಗಿ ತ್ಯಾ ನವೀನ್ ಹೊಟೆಲಾಂತ್ ಪ್ರವೇಷ್ ಜಾಲೆ. ಗಿಬ್ಬಾನ್ ಸಾಂಗ್ಲ್ಲ್ಯಾಬರಿ ಮೆಲ್ವಿನಾನ್ ಕುಶಿಚ್ಯಾ ಫೆಮಿಲಿ ರುಮಾಕ್ ದೀಷ್ಟ್ ವ್ಹೆಲಿ. ಆನಿಂ......ತೊ ಶಿರಿಂ ಸುಕ್ಲೊ. ತಾಚೆಂ ತೊಂಡ್ ವಿದ್ರೂಪ್ ಜಾಲೆಂ. ಕಾಳಿಜ್ ಜ್ಯೋರಾನ್ ಧಡ್ದಡೊಂಕ್ ಲಾಗ್ಲೆಂ. ಸಂಸಾರ್ಚ್ ವೊಮ್ತೊ ಉದಾರೊ ಜಾತಾಸೊ ಭೊಗ್ಲೆಂ ತಾಕಾ.
"ಕಿತೆಂ ಜಾಲೆಂ ಮೆಲ್ವಿನ್?" ಜಾಣಾ ಆಸೊನಿ ನೆಣಾರ್ಯಾಬರಿ ಮ್ಹಣೊನ್ ಗಿಬ್ಬಾನ್ ತಾಚ್ಯಾ ಬಾವ್ಳ್ಯಾಕ್ ಧರ್ನ್ ಮುಖಾರ್ ವೋದ್ನ್ ವೆಲೆಂ. ತೆ ದೊಗಿ ಸರ್ಶಿಲ್ಯಾ ಖಾಲಿ ಕದೆಲಾರ್ ಬಸ್ಲೆ.
"ಮೆಲ್ವಿನ್....ತುಂ ಘಾಬಾರ್ಲೊಯ್ ಕಿತ್ಯಾಕ್?" ಗಿಬ್ಬಾನ್ ಹಳೂ ವಿಚಾರ್ಲೆಂ.
ಮೆಲ್ವಿನಾಚ್ಯಾ ತಾಳ್ಯಾಂತ್ಲ್ಯಾನ್ ಉತ್ರಾಂ ಸಾರ್ಕಿಂ ಸುಟ್ಲಿನಾಂತ್. ಕಪಲಾ ವಯ್ಲೊ ಘಾಮ್ ಕಾಂಪ್ಚ್ಯಾ ಹಾತಾಂನಿ ತಾಣೆಂ ಪುಸ್ಲೊ ಆನಿಂ "ಸಿಂತಿ.....ಸಿಂತಿ...." ಗಾಗೆಲೊ ತೊ.
"ಸಿಂತಿ? ಸಿಂತಿಕ್ ಕಿತೆಂ ಜಾಲೆಂ?" ಎಕಾ ನಮುನ್ಯಾಚ್ಯಾ ಹಾಸ್ಯಾನ್ ವಿಚಾರ್ಲೆಂ ಗಿಬ್ಬಾನ್.
"ಹಾಸನಾಕಾ ಗಿಬ್ಬಾ," ಕಳ್ವಳ್ಳೊ ತೊ, "ಸಿಂತಿ ಫೆಮಿಲಿ ರುಮಾಂತ್ ಆಮ್ಚ್ಯಾ ಕ್ಲಾಸಿಂತ್ಲ್ಯಾ ಸುಧಾಕರಾ ಸಾಂಗಾಂತಾ.....ಹಾಯ್ ದೆವಾ!" ತಕ್ಲಿ ಪಂದಾ ಘಾಲಿ ತಾಣೆಂ.
"ತುಜಿ ತಕ್ಲಿ ತಾಪ್ಲ್ಯಾ ಮೆಲ್ವಿನ್, ಪಯ್ಲೆಂ ಏಕ್ ಕೋಲ್ಡ್ ಪಿಯೆ" ಗಿಬ್ಬಾನ್ ಕೊಲ್ಡಾಕ್ ಒರ್ಡರ್ ದಿಲೆಂ.
"ಮೆಲ್ವಿನ್", ತಾಣೆಂ ಮೆಲ್ವಿನಾಚ್ಯಾ ದೊಳ್ಯಾಂಕ್ಚ್ ಪಳೆವ್ನ್ ಮ್ಹಳೆಂ, "ಕಾಲ್ ತುಂ ಮ್ಹಜಿಂ ಉತ್ರಾಂ ಪಾತ್ಯೆಂವ್ಕ್ ನಾತ್ಲ್ಲೊಯ್. ಆನಿಂ ಆತಾಂ..?
"ಗಿಬ್ಬಾ....." ಮೆಲ್ವಿನಾಚ್ಯಾ ದೊಳ್ಯಾಂನಿ ದುಕಾಂ ಭರ್ಲ್ಲಿಂ.
"ಛೆ, ಚೆಡ್ಯಾಂನಿ ರಡ್ಚೆಂ ನಹಿಂ ಮೆಲ್ವಿನ್. ರಡ್ಚೆಂ ಬಿಂವ್ಕುರ್ಯಾಂನಿ ಆನಿಂ ಚೆಡ್ವಾಂನಿ. ಸಿಂತಿನ್ ತುಕಾ ಪಳೆಲೆಂವೇ?"
"ಹಾಂವ್ ನೆಣಾ.." ರಾವೊನ್ ರಾವೊನ್ ಮೆಲ್ವಿನ್ ಮ್ಹಣಾಲೊ. "ಸಿಂತಿ....ಆಶೆಂ ಪರ್ಕಿ ಜಾತಿಚ್ಯಾ ತರ್ನಾಟ್ಯಾ ಸಾಂಗಾಂತಾ..."
"ತರ್ನಾಟೊ ನಹಿಂ, ತರ್ನಾಟೆ ಮ್ಹಣ್" ತಿದ್ವಿಲೆಂ ಗಿಬ್ಬಾನ್ ಕೊಡ್ಸಾಣೆಭರಿತ್ ಉತ್ರಾಂನಿ. "ಆಜ್ ಸುಧಾಕರಾ ಸಾಂಗಾಂತಾ, ಫಾಲ್ಯಾಂ ಆನಿಂ ಕೊಣಾ ಸಾಂಗಾಂತಾ. ಮೆಲ್ವಿನ್ ಪಳೆ, ಆತಾಂಚೊ ಕಾಳೊ ತಸೊ. ಥೊಡ್ಯೊ ಚಲಿಯೊ ಸ್ಕರ್ಟ್ ಆನಿಂ ಬ್ಲಾವ್ಜ್ ಕಿತ್ಲೆ ಬದ್ಲಿತಾತ್ಗಿ, ತಿತ್ಲೆಚ್ ಬೊಯ್ ಫ್ರೆಂಡ್ಯಿ ಬದ್ಲಿತಾತ್. ಕೊಲೆಜಿಂತ್ ಶಿಕ್ಚ್ಯೊ ಅಸಲ್ಯೊ ಚಲಿಯೊ- ಸಬಾರ್ ದಿಸಾಕ್ ಎಕ್ಲ್ಯಾ ಸಾಂಗಾಂತಾ ಭೊಂವ್ತಾತ್. ಸಿಂತಿ ಎಕ್ಲೆಂಚ್ ನಹಿಂ ಬಾವಾ. ಮ್ಹೊಂವಾಚ್ಯಾ ಆಶೆಕ್ ಫುಲಾಂ ಥಾವ್ನ್ ಫುಲಾಂಕ್ ಉಬ್ಚ್ಯಾ ಪಿಸೊಳ್ಯಾಂಕ್ ದೆಖ್ತಾನಾ ಮ್ಹಾಕಾ ಭೊಗ್ತಾ ಕಿ ಹಿಂ ಚೆಡ್ವಾಂಯಿ ಪಿಸೊಳಿಂ ಮ್ಹಣ್. ಕಿತ್ಯಾಕ್ ಮ್ಹಜ್ಯಾಚ್ ದೊಳ್ಯಾಂನಿ ಹಾಂವೆಂ ದೆಖ್ಲಾಂ ಸಿಂತಿನ್ ಕೊಲೆಜಿಚ್ಯಾ ಸಬಾರ್ ತರ್ನಾಟ್ಯಾ ಸಾಂಗಾಂತಾ ಭೊಂವ್ಚೆಂ.."
"ತುವೆಂ ಮ್ಹಾಕಾ ಕಿತ್ಯಾಕ್ ಸಾಂಗೊಂಕ್ನಾಂಯ್ ಗಿಬ್ಬಾ?" ಸುಸ್ಕಾರ್ಲೊ ಮೆಲ್ವಿನ್.
"ಸಾಂಗ್ಲ್ಲೆಂ ತರ್ ಕಿತೆಂ ಕರ್ತೊಯ್?" ತಿಕ್ಸಾಣೆನ್ ಸವಾಲ್ ಗಿಬ್ಬಾಚೆಂ.
"ಹಾಂವ್, ಹಾಂವ್.." ಘುಸ್ಪಡ್ಲೊ ಮೆಲ್ವಿನ್, "ಮ್ಹಜಿ ತಕ್ಲಿಚ್ ಸಾರ್ಕಿನಾ. ಚಲ್ಯಾಂ ಗಿಬ್ಬಾ" ದೊಗೀ ಹೊಟೆಲಾ ಭಾಯ್ರ್ ಆಯ್ಲೆ.
ಬಸ್ಸ್ ಸ್ಟೆಂಡಾಕ್ ಪಾವ್ತಾನಾ ತೊ ಮ್ಹಣಾಲೊ "ಗಿಬ್ಬಾ, ಮ್ಹಾಕಾ ಏಕ್ - ದೋನ್ ಆಣೆಂ ಆಸ್ಲ್ಯಾರ್ ದಿ. ಹಾಂವ್ ಬಸಾರ್ ವೆತಾಂ. ಜಿವಾಕ್ ಕಂಯ್ ತಾಂಕಾನಾ"
ಗಿಬ್ಬಾನ್ ದಿಲ್ಲೆ ಪಯ್ಶೆ ಘೆತಾಚ್ಚ್ ಮೆಲ್ವಿನ್ ಉರ್ವಾ ವೆಚ್ಯಾ ಬಸ್ಸಾರ್ ಚಡ್ಲೊ. ಮತಿಂತ್ ತಾಚ್ಯಾ ವಿವಿಧ್ ಚಿಂತ್ನಾಂ ಯೆತಾಲಿಂ. ಚಿಂತ್ನಾಂ ನಿರಾಶೆಚಿಂ,.......’ಸಿಂತಿಚೊ ಆಪುಣ್ ಮೋಗ್ ಕರ್ತಾಂ. ಪುಣ್ ತೆಂ ಆಪ್ಣಾಕ್ ಗುಮಾನ್ ಕರಿನಾ. ಆಪ್ಣಾಕ್ ದುಬ್ಳ್ಯಾಕ್ ಕಿತ್ಯಾಕ್ ತಾಚಿ ಖಂತ್? ಜರ್ತರ್ ಆಪ್ಣಾಲಾಗಿಂ ಪಯ್ಶೆ ಆಸ್ಲ್ಲೆ, ಸಿಂತಿ ಆಪ್ಣಾಲಾಗಿಂ ಉಲೈತೆಂ’ ಪುಣ್ ......ಪರಿಸ್ಥಿತಿ ತಶಿ ನಹಿಂ ಆಸ್ಲ್ಲಿ.
ತಾಚಿ ದೀಷ್ಟ್ ಮುಖಾರ್ ಪಡ್ತಾನಾ, ಲೇಡಿಸ್ ಸಿಟಿಚೆರ್ ತಾಕಾ ತೊಂಡ್ ಕರ್ನ್ ಬಸ್ಲ್ಲೆಂ ಸಿಂತಿ ದಿಸ್ಲೆಂ. ತೆಂ ಮೆಲ್ವಿನಾಕ್ಚ್ ಪಳೆತಾಲೆಂ. ತಾಚ್ಯಾ ಮುಖಾಚೆರ್ ಬಿರಾಂತೆಚಿಂ ಖುಣಾಂ ಸ್ವಷ್ಟ್ ದಿಸ್ತಾಲಿಂ. ಬಹುಶಃ ತಾಣೆಂಯಿ ಮೆಲ್ವಿನಾಕ್ ಹೊಟೆಲಾಂತ್ ಪಳೆಲ್ಲೆಂಗಾಂಯ್... ಮೆಲ್ವಿನಾನ್ ದೀಷ್ಟ್ ಭಾಯ್ರ್ ಜೊಕ್ಲಿ.
ಜ್ಯೋರಾನ್ ಬಸ್ಸ್ ಧಾಂವ್ತಾನಾಂಯೀ ತೊ ಚಿಂತುನ್ಚ್ ಆಸ್ಲ್ಲೊ. ಬಸ್ಸಾಚ್ಯಾ ರೊದಾಂಚ್ಯಾಕಿ ವೇಗಾನ್ ತಾಚ್ಯಾ ಮತಿಂತ್ ಚಿಂತ್ನಾಂ ಧಾಂವ್ತಾಲಿಂ. ಲೇಡಿಹಿಲ್ಲ್ ಬಸ್ಸ್ ರಾವ್ತಚ್ ತೊ ದೆಂವ್ಲೊ ಅನಿಂ ತಕ್ಲಿ ಬಾಗಾವ್ನ್ ಘರ್ಚ್ಯಾ ವಾಟೆಕ್ ಲಾಗ್ಲೊ.
"ಮೆಲ್ವಿನ್.." ಪಾಟ್ಲ್ಯಾನ್ ಥಾವ್ನ್ ಸಿಂತಿಚೊ ತಾಳೊ ಆಯ್ಕಾತಾನಾ, ತೊ ನಿಜಾಕೀ ಘಡ್ಬಡ್ಲೊ. ತಾಚ್ಯಾ ಶಿರಾಂಶಿರಾಂನಿ ವಿದ್ಯುತ್ಶಕ್ತ್ ವ್ಹಾಳಾಲ್ಲ್ಯಾಬರಿ ಜಾಲಿ. ಪಯ್ಲ್ಯಾ ಪಾವ್ಟಿಂ ಸಿಂತಿನ್ ಮೆಲ್ವಿನಾಚೆಂ ನಾಂವ್ ಉಲೊ ಕೆಲ್ಲೆಂ. ಜಾಲ್ಯಾರ್ಯಿ ತಾಣೆಂ ಪಾಟಿಂ ಪಳೆಲೆಂನಾ.
"ಮೆಲ್ವಿನ್....." ತೆಂ ತುರ್ತಾನ್ ಮೆಟಾಂ ಕಾಡ್ನ್ ತಾಚ್ಯಾ ಬರಾಬರ್ ಆಯ್ಲೆಂ. ಮೆಲ್ವಿನ್ ಅಜೂನ್ ಧರ್ಣಿಕ್ ಪಳೆತಾಲೊ. ತೆಂ ಕಿತೆಂ ಸಾಂಗೊಂಕ್ ಖುಶಿ ವರ್ತಾ ಮ್ಹಳ್ಳೆಂ ತಾಕಾ ಸಮ್ಜೊಂಕ್ ನಾ.
"ಪ್ಲೀಸ್ ಮೆಲ್ವಿನ್.." ಸಿಂತಿ ಪರಾತ್ತಾಲೆಂ. "ಹಾಂವೆ ಕಾಲ್ ತುಕಾ ಆಕ್ಮಾನ್ ಕೆಲ್ಲ್ಯಾಕ್ ಮ್ಹಾಕಾ ಮಾಫ್ ಕರ್. ಆಜ್ ಹಾಂವ್ ಹೊಟೆಲಾಂತ್....
ಓ.....ಕಳ್ಳೆಂ ತಾಕಾ. ತಾಣೆಂ ಮುಖಾರ್ ಸಾಂಗೊಂಕ್ ಆಸ್ಚಿ ಸಂಗತ್ಯಿ ತೊ ಜಾಣಾ ಜಾಲೊ. ದೀಷ್ಟ್ ಉಕೊಲ್ನ್ ತಾಣೆಂ ಸಿಂತಿಚ್ಯಾ ತೊಂಡಾಕ್ ಪಳೆಲೆಂ. ತ್ಯಾ ವೀಜ್ ದಿವ್ಯಾಂಚ್ಯಾ ಆಸ್ಕತ್ ಉಜ್ವಾಡಾಕ್ ಸಿಂತಿಚೆಂ ಸುಂದರ್ ಮುಖ್ ರಡ್ಕುರೆಂ ದಿಸ್ಲೆಂ ತಾಕಾ. ತೆಂ ಕಾವ್ಜೆಣೆನ್ ಭರ್ಲ್ಲೆಂ.
"ಸುಧಾಕರಾ ಸಾಂಗಾತಾ ಹಾಂವ್ ಹೊಟೆಲಾಂತ್ ಆಸ್ಲ್ಲಿಂ ಮ್ಹಣ್ ಪಪ್ಪಾಕ್ ಸಾಂಗಾನಾಕಾ ಮೆಲ್ವಿನ್, ಪ್ಲೀಸ್....."
ಮೆಲ್ವಿನಾನ್ ಜಾಯ್ತ್ ಮ್ಹಣ್ಚ್ಯಾ ಅರ್ಥಾರ್ ತಕ್ಲಿ ಹಾಲೈಲಿ. ಕಿತೆಂಗಿ ಆಪುಣ್ ಜಿಕ್ಲೊಂ ಮ್ಹಳ್ಳ್ಯಾಬರಿ ಭೊಗ್ಲೆಂ ತಾಕಾ.
ಸಿಂತಿನ್ ಸಮಾಧಾನೆಚೊ ಶ್ವಾಸ್ ಸೊಡ್ಲೊ. "ಥೇಂಕ್ಸ್ ಮೆಲ್ವಿನ್" ಆಶೆಂ ಮ್ಹಣೊನ್ ತೆಂ ಘರಾ ಚಲ್ಲೆಂ. ಮೆಲ್ವಿನ್ ಆಪ್ಲ್ಯಾ ಘರಾ ಗೆಲೊ.
ತ್ಯಾ ಎಕಾ ಕ್ಷಣಾ ತಾಣೆಂ ಚಿಂತ್ಲೆಂ ಕಿ, ಆನಿಂ ಸಿಂತಿ ಆಪ್ಣಾಚ್ಯಾ ಮುಟಿಬಿತರ್ ಶಿರ್ಕಾಲೆಂ ಮ್ಹಣ್. ಆಪುಣ್ ಜಾವ್ನ್ ಯೇವ್ನ್ ತೆಂ ಉಪ್ಕಾರ್ ಮಾಗೊನ್ ಗೆಲೆಂ ಆನಿಂ ರಾಜಿ ಜಾಲೆಂ - ಆಶೆಂ ಮತಿಂತ್ಚ್ ಮಾಂದ್ಣಿ ಖಾತಾಲೊ ಮೆಲ್ವಿನ್.
ಪುಣ್ ತಾಣೆಂ ಚಿಂತ್ಲ್ಲೆಂ ಫಟ್ ಜಾಂವ್ಕ್ ಏಕ್ಚ್ ತಿ ರಾತ್ ಪಾವ್ಲಿ. ದುಸ್ರ್ಯಾ ಸಕಾಳಿಂ ಕೊಲೆಜಿಕ್ ವೆತಾನಾ, ಬಸ್ಸ್ಸ್ಟೆಂಡಾಂತ್ ಸಿಂತಿಕ್ ಪಳೆಲೆಂ ತಾಣೆಂ. ಧೈರಾನ್ ಅಮ್ರುಕೊ ಹಾಸ್ಲೊ ತೊ. ಪುಣ್ ಸಿಂತಿನ್ ತಿರ್ಕಾಸ್ ದೀಷ್ಟ್ ಜೊಕ್ಲಿ.
ಮೆಲ್ವಿನಾಕ್ ಝಿಂಟ್ ಮಾರ್ಲ್ಲ್ಯಾಬರಿ ಜಾಲಿ. ಸಿಂತಿ ಆಪ್ಣಾಚ್ಯಾ ಲಾಗಿಂ ಆಯ್ಲೆಂ ಮ್ಹಣ್ ತಾಣೆಂ ಲೆಕ್ಲ್ಲೆಂ. ಪುಣ್ ತೆಂ ಅಜೂನ್ಯಿ ಅಂತ್ರಳಾ ವಯ್ಲೆಂ ನೆಕೆತ್ರ್ ಜಾವ್ನ್ ರಾವ್ಲ್ಲೆಂ. ಸಿಂತಿಕ್ ತಾಣೆಂ ಕಿತ್ಲೆಂ ನಿಯಾಳ್ಲೆಂಗಿ, ತಿತ್ಲೊಚ್ ವ್ಹಡ್ ಮಿಸ್ತೆರ್ ಜಾಲ್ಲೆಂ ಸಿಂತಿ. ಕಠಿಣ್ ನಿರಾಶೆನ್ ತೊ ಕೊಲೆಜಿಕ್ ಗೆಲೊ.
ದಿಸಾಂ ಪಾಟ್ಲ್ಯಾನ್ ದೀಸ್ ಧಾಂವ್ತಾಲೆ. ದಸೆಂಬ್ರಾಚೊ ಮಹಿನೊ ಆಯಿಲ್ಲೊ. ತ್ಯಾ ಎಕಾ ದಿಸಾ ಕೊಲೆಜಿಚ್ಯಾ ರೆಕ್ಟರಾಕ್ ತೊ ಮೆಳ್ಲ್ಲೊ. ಆಪ್ಣಾಕ್ ಬೆಂಗ್ಳೂರ್ ವಚೊಂಕ್ ಜಾಯ್ನಾ ಮ್ಹಣ್ ತಾಣೆಂ ತಿಳ್ಸಿಲೆಂ. ರೆಕ್ಟರಾನ್ ತಾಕಾ ಪರಾತ್ಲೆಂ, ಪುಸ್ಲಾಯ್ಲೆಂ. ತರೀ ಮೆಲ್ವಿನ್ ಆಪ್ಣಾಚೆಂ ಹಟ್ ಸೊಡುಂಕ್ ಒಪ್ಲೊನಾ. ಸಿಂತಿಚ್ಯಾ ಪಪ್ಪಾಕ್ ತಾಣೆಂ ಉತಾರ್ ದಿಲ್ಲೆಂ ಆನಿಂ ತೆಂ ಮೊಡುಂಕ್ ತಾಚೆಂ ಹಟ್ ತಾಕಾ ಸೊಡಿನಾತ್ಲ್ಲೆಂ. ಪ್ರಿನ್ಸಿಪಾಲಾಕ್ ಅಖ್ರೇಕ್ ಬೆಜಾರಾಚ್ ಜಾಲೆಂ ಜಾಯ್ಜಾಯ್.
ತಾಂಚಿ ದುಸ್ರಿ ಪರೀಕ್ಶಾ ಪ್ರಾರಂಭ್ ಜಾಲ್ಲಿ. ಮೆಲ್ವಿನ್ ದೀಸ್ - ರಾತ್ ಶಿಕ್ತಾಲೊ. ಸಿಂತಿಚ್ಯಾ ವಿಷ್ಯಾಂತ್ ಚಿಂತ್ನಾಂ ತಾಚಿಂ ಉಣಿಂ ಜಾಲ್ಲಿಂ. ಏಕ್ಚ್ ಧ್ಯಾನ್ ಆನಿಂ ಮನ್ ಶಿಕ್ಪಾಚೆರ್. ಆಪ್ಣೆಂ ಖಂಡಿತ್ ಬರೆಂ ಮಾರ್ಕ್ಸ್ ಜೊಡಿಜಾಯ್ ಮ್ಹಣ್ ತಾಣೆಂ ಘಟ್ಟ್ ಕೆಲ್ಲೆಂ. ತ್ಯಾ ಪರಿಂ ಬರೆಂ ಶಿಕ್ಲೆಲ್ಯಾ ತಾಕಾ ಪರೀಕ್ಶಾ ಕಶ್ಟ್ ಮಾರ್ಲಿನಾ.
ದಸೆಂಬ್ರಾಚಿ ಚೊವ್ದಾ ತಾರಿಕ್. ತ್ಯಾ ದಿಸಾ ತಾಂಚಿ ನಿಮಾಣಿ ಪರೀಕ್ಶಾ. ದನ್ಪಾರಾಚಿ ಎಕಾ ವೊರಾಚಿ ಕಾಂಪಿಣ್ ಜಾತಾನಾ ವಿದ್ಯಾರ್ಥಿ ಕ್ಲಾಸಿ ಭಾಯ್ರ್ ಆಯ್ಲೆ. ತಾಂಕಾಂ ೨೦ ದಿಸಾಂಚಿ ರಜಾ ಮೆಳ್ಲ್ಲಿ.
"ಮೆಲ್ವಿನ್......" ಗಿಬ್ಬಾ ಮ್ಹಣಾಲೊ, "ರಜೆಂತ್ ಕಿತೆಂ ಕರ್ತಾಯ್?"
"ಕಾಂಯ್ ನಾ. ಕರ್ಚೆಂ ಕಿತೆಂ?" ಹಾಸ್ಲೊ ಮೆಲ್ವಿನ್.
"ನತಾಲಾಚೆಂ ಫೆಸ್ತ್ ಧಾಂವೊನ್ ಆಯ್ಲೆಂ ಮೆಲ್ವಿನ್. ತುಂ ಏಕ್ ಕರ್. ನತಾಲಾಂಚ್ಯಾ ಫೆಸ್ತಾ ದಿಸಾ ಸಾಂಜೆರ್ ಘರಾ ಆಮ್ಗೆರ್ ಯೆ. ದೋನ್ ದೀಸ್ ರಾವೊನ್ ಪಾಟಿಂ ವೆಶಿ"
"ಬರೆಂ, ಖಂಡಿತ್ ಯೆತಾಂ ಗಿಬ್ಬಾ" ತಾಣೆಂಯಿ ಉರ್ಬಾ ದಾಕೈಲಿ.
"ವಿಸರ್ನಾಕಾ ಹಾಂ. ಹಾಂವ್ ಖಂಡಿತ್ ತುಕಾ ರಾಕ್ತಾಲೊಂ."
ಮೆಲ್ವಿನಾನ್ ಖಂಡಿತ್ ಬಾಸ್ ದಿಲಿ ತಾಕಾ. ಆಶೆಂ ತತ್ಕಾಲಾಕ್ ಆದೇವ್ಸ್ ಮಗೊನ್ ದೊಗಿ ಆಪಾಪ್ಲ್ಯಾ ಘರ್ಚ್ಯಾ ವಾಟೆಕ್ ಲಾಗ್ಲೆ. ಪುಣ್ ಮೆಲ್ವಿನಾಕ್ ಘರಾ ನವಿಚ್ ಖಬಾರ್ ರಾಕೊನ್ ಆಸ್ಲ್ಲಿ. ಬೊಂಬಯ್ ಥಾವ್ನ್ ತಾಚಿ ಆಂಟಿ ಆನಿಂ ಆಂಕಲ್ ರಜೆರ್ ತಾಂಗೆರ್ ಆಯಿಲ್ಲಿಂ.
"ಗುಡ್ಡೆ ಆಂಟಿ...." ವಿಜ್ಮಿತ್ ಜಾವ್ನ್ ಮೆಲ್ವಿನಾನ್ ಮಿಲ್ಲಿಬಾಯೆಕ್ ವಿಶ್ ಕೆಲೆಂ. "ಕೆದಾಳಾ ಆಯಿಲ್ಲಿಯ್ ತುಂ?"
"ಅರೇ ಮೆಲ್ವಿನ್.....ತುಜಿ ವಳೊಕ್ಚ್ ಕಳಾನಾಮೂರೆ! ಆದ್ಲ್ಯಾ ಪಾವ್ಟಿಂ ಪಳೆತಾನಾ ತುಂ ಎದೊಸೊ ಪೋರ್ ಆಸ್ಲ್ಲೊಯ್"
ನಿಜಾಕೀ ಮೆಲ್ವಿನಾಕ್ ಪಳೆವ್ನ್ ಮಿಲ್ಲಿ ಬಾಯೆಕ್ ಆಜಾಪ್ಚ್ ಜಾಲ್ಲೆಂ. ತಿಂ ಗಾಂವಾಕ್ ಯೇನಾಸ್ತಾಂ ಧಾ ವರ್ಸಾಂ ಉತರ್ಲ್ಲಿಂ. ತಿಕಾ ಪ್ರಾಯ್ ಕಾಂಯ್ ೩೦-೩೫ ಜಾತಿತ್. ತರೀ ತಿಚಿ ಅಖಂಡ್ ಕೂಡ್ ಆನಿಂ ಸುಂದರ್ ರೂಪ್ ಪಳೆತಾನಾ ಕೊಣೀ ತಿಕಾ ೨೫ ವರ್ಸಾಂ ಮ್ಹಣ್ತೊ. ಜಿಲ್ಲಿಬಾಯೆಕ್ ಆನಿಂ ತಿಕಾ ರಾತ್ ದೀಸ್ ವ್ಯತ್ಯಾಸ್ ದಿಸ್ತಾಲೊ.
"ಅಂಕಲ್ ಖಂಯ್ ಗೆಲಾ?" ಮೆಲ್ವಿನಾನ್ ವಿಚಾರ್ಲೆಂ.
"ತೊ ಯೆಂವ್ಚೊ ಜಾಲೊ ಮೆಲ್ವಿನ್. ವ್ಹೊಡೊಲ್ ಗೆಲಾ ಇಗರ್ಜೆಕ್. ತುಮ್ಚೊ ಕಾಜಿತೊರ್ ಆನಿಂ ತೊ ಭಾರೀ ಈಷ್ಟ್ ಖಂಯ್. ತಾಕಾ ಮೆಳೊನ್ ಯೆತಾಂ ಮ್ಹಣ್ ಗೆಲಾ."
"ಮೆಲ್ವಿನಾಚ್ಯಾ ಅಜ್ಯಾಕ್ ಆಪ್ಪೆರ್ಬುಕ್ ದೊಗಾಂಚ್ ಚೆಡ್ವಾಂ ಭುರ್ಗಿಂ - ಜಿಲ್ಲಿ ಆನಿಂ ಮಿಲ್ಲಿ. ತೊ ಪೊಲಿಸ್ ಹೆಡ್ಕೊನ್ಸ್ಟೇಬಲ್ ಜಾವ್ನಾಸ್ಲ್ಲೊ. ತ್ಯಾ ವೆಳಾರ್ ತಾಕಾ ಜೋಡ್ಯಿ ಬರಿ ಆಸ್ಲ್ಲಿ ಆನಿಂ ಮಸ್ತ್ ಪಯ್ಶೆಯಿ ತಾಣೆಂ ಪುಂಜಾಯಿಲ್ಲೆಂ. ಆಪ್ಪೆರ್ಬುನ್ ಜಿಲ್ಲಿ ಆನಿಂ ಮಿಲ್ಲಿಕ್ ಸಾಂಗಾತಾಚ್ ಕಾಜಾರ್ ಕರ್ನ್ ದಿಲ್ಲೆಂ. ಬರ್ಯಾ ಘರಾಣ್ಯಾಂಚ್ಯಾ ತರ್ನಾಟ್ಯಾಂಕ್ ಸೊಧುನ್. ನಶಿಬಾನ್ ಮಿಲ್ಲಿಬಾಯೆಕ್ ಶಿಕ್ಪಿ ಘರ್ಕಾರ್ ಮೆಳ್ಲ್ಲೊ ಆನಿಂ ತಶೆಂ ತಿಚೆಂ ನಶಿಬ್ಯಿ ಉಘಡ್ಲೆಂ. ವಿತೊರಾಬ್ಯಿ ಶಿಕ್ಪಿಚ್, ತರೀ ತಾಚ್ಯಾ ನಶಿಬಾಂತ್ ಬೆಂಕಾಂತ್ಲೆಂ ಗುಮಾಸ್ತೆಚೆಂ ಕಾಮ್ಂಚ್ ನಿರ್ಮಿಲ್ಲ್ಯಾನ್ ತಾಂಚಿ ಸ್ಥಿತಿ ಅಜೂನ್ ದುಬ್ಳಿ ಉರ್ಲ್ಲಿ.
ಆಪ್ಪೆರ್ಬು ಪೊಲಿಸಾಂಚ್ಯಾ ಕಾಮಾಂತ್ಲೊ ನಿವ್ರತ್ತಿ ಜಾತಾನಾ, ತಾಕಾ ಕೆನ್ಸರಾಚಿ ಬಿರಾಂಕುಳ್ ಪಿಡಾ ಉಬ್ಜಾಲ್ಲಿ. ಹಾಕಾ ಲಾಗೊನ್ ತಾಣೆಂ ಕರ್ನ್ ದವರ್ಲ್ಲೊ ದುಡು ಆನಿಂ ಘರ್ ಜಾಗೊ ಲೆಗುನ್ಯಿವಿಕೊನ್ ಗೆಲೊ. ನಹಿಂ ತರ್, ಮೆಲ್ವಿನಾಗೆಲ್ಯಾಂಕ್ ಆಫ್ಲೊಚ್ ಮ್ಹಳ್ಳೊ ರಾವೊಂಕ್ ಏಕ್ ಥಾರೊ ಆಸ್ತೊ. ಹಾತಾಂತ್ಲೆ ಪಯ್ಶೆ ಸಗ್ಳೆ ಕಾಬಾರ್ ಜಾತಾನಾ, ಆಪ್ಪೆರ್ಬುಚೆಂ ಸಂಸಾರಾಂತ್ಲೆಂ ಆವ್ಕ್ಯಿ ಕಾಬಾರ್ ಜಾಲ್ಲೆಂ ದಿಸ್ತಾ. ಮೆಲ್ವಿನ್ ಜಲ್ಮೊನ್ ಎಕಾ ವರ್ಸಾನ್ ಅಪ್ಪೆರ್ಬು ಕಂಕ್ನಾಡಿ ಆಸ್ಪತ್ರೆಂತ್ ಆಂತರ್ಲೊ.
ತಾಚ್ಯಾ ಮರಣಾ ವೆಳಿಮ್ ಮಿಲ್ಲಿಬಾಯ್ ಆನಿಂ ತಿಚೊ ಘರ್ಕಾರ್ ಫ್ರೆಡ್ಡಿಯಾಬಾ ಬೊಂಬಯ್ ಥಾವ್ನ್ ಆಯಿಲ್ಲಿಂ. ಉಪ್ರಾಂತ್ ಮಧೆಂ ಖಂಯ್ ಎಕಾ ಥೊಡ್ಯಾ ವಾಯ್ದ್ಯಾಕ್ ತಿಂ ಗಾಂವಾಕ್ ಆಯಿಲ್ಲಿಂ. ಹ್ಯಾ ಪಾವ್ಟಿಂ ತಾಣಿಂ ಯೆಂವ್ಚೆಂ ಧಾ ವರ್ಸಾಂ ಉಪ್ರಾಂತ್.
ರಾತ್ಚೆಂ ಜೆವಾಣ್ ಜಾತಾಚ್ ಸಕ್ಡಾಂ ಬಾಯ್ರ್ ಜಾಲಾಂತ್ ವಾರ್ಯಾಕ್ ಬಸೊನ್ ಸುಖ್ - ದುಃಖ್ ಉಲೈತಾಲಿಂ.
"ತುಮಿಂ ಮೆಲ್ವಿನಾಕ್ ಬೆಷ್ಟೆಂ ತರಿ ಕೊಲೆಜಿಕ್ ಧಾಡ್ಲೆಂ", ಮ್ಹಣಾಲಿ ಮಿಲ್ಲಿಬಾಯ್. "ಖಂಯ್ ಪುಣಿ ಕಾಮ್ ಪಳೆಲ್ಲೆಂ ಜಾಲ್ಯಾರ್ ಜಾತೆನಾಂಗಿ? ಕಾಂಯ್ ನಾಕಾ, ಆಮ್ಕಾಂ ಏಕ್ ಕಾಗಾದ್ ಬರೊವ್ನ್ ಘಾಲ್ನ್ ತಿಳ್ಸಿಲ್ಲೆಂ ಜಾಲ್ಯಾರ್ ಆಮಿಂ ತಾಕಾ ಬೊಂಅಬಯ್ ಕಾಮ್ ಕರ್ನ್ ದಿತೆನಾಂವ್ಗಿ? ಹ್ಯಾ ತುಮ್ಚ್ಯಾ ದುಬ್ಳಿಕಾತೆಂತ್ ತಾಚ್ಯಾ ಬುಕಾಂಕ್ ಆನಿಂ ಸಾಂಬಾಲಾಕ್ ಪಯ್ಶೆ ದೀಂವ್ಕ್ ಪರ್ವಡ್ತಾಗಿ?"
"ಕರ್ಚೆಂ ಕಿತೆಂ?" ಹಾಸೊನ್ ಮ್ಹಣಾಲೊ ವಿತೊರಾಬ್. "ಶಿಕಾಜಾಯಿಜ್ ಮ್ಹಣ್ ಹಟಾಕ್ ಪಡ್ಲೊ ತೊ. ಶಿಕ್ಪಾಕ್ ರೀಣ್ ಕಾಡ್ಲೆಂ.
"ರೀಣ್ ಕಾಡ್ಲೆಂಗಿ? ಹುಂ ...ಉಪ್ರಾಂತ್ ಎಕಾಕ್ ದುಬಾರಿ ವಾಡಿ ಸಮೇತ್ ಫಾರಿಕ್ ಕರ್ತಾನಾ ಕಳ್ತೆಲೆಂ ತುಮ್ಕಾಂ. ನಹಿಂ, ಆಮ್ಕಾಂ ಕಿತ್ಯಾಕ್ ಪಯ್ಶಾಂ ಖಾತಿರ್ ಕಾಗಾದ್ ಬರೊವ್ನ್ ಘಾಲುಂಕ್ ನಾ ತುಮಿಂ? ಹಾಂವ್ ಫುಲ್ ನಹಿಂ, ಫುಲಾಚಿ ಪಾಕ್ಳಿ ತರೀ ಧಾಡ್ತಿ ನಾಂಗಿ?"
ತಿಕಾ ಖಂದಿತ್ ಜಾವ್ನ್ ಮೆಲ್ವಿನಾನ್ ಕಾಗಾದ್ ಬರೈಲ್ಲೆಂ. ಪುಣ್ ಮಿಲ್ಲಿಬಾಯೆನ್ ತಾಕಾ ಜಾಪ್ಚ್ ದೀಂವ್ಕ್ನಾತ್ಲ್ಲಿ. ಕಿತ್ಯಾಕ್, ಪಯ್ಶೆ ಧಾರಾಳ್ ಆಸ್ಲ್ಯಾರಿ, ತ್ಯಾಚ್ ಮಾಪಾಚೊ ಸುರಾತ್ಯಿ ಆಸ್ಲ್ಲೊ ತಿಕಾ. ಆನಿಂ ಭಯ್ಣಿಕ್, ಎಕಾಚ್ ರಗ್ತಾಚ್ಯಾ ಭಯ್ಣಿಕ್ ಜಾಲ್ಯಾರ್ಯಿ ಕಿತೆಂ? ಪಯ್ಶಾಂ ಮುಖಾರ್ ಕುಟಾಮ್ ಆನಿಂ ರಗಾತ್ ವಿಸರ್ ಪಡ್ಲ್ಲೆಂ.
"ತುಕಾ ಹಾಂವೆಂ ಕಾಗದ್ ಬರಯಿಲ್ಲೆಂ ಆಂಟಿ" ಮೆಲ್ವಿನ್ ಮ್ಹಣಾಲೊ.
"ಆಜ್ಯಾಪ್ಚ್ ಸಹಿ! ತರ್ ತೆಂ ಕಾಗಾದ್ ಮ್ಹಾಕಾ ಕಿತ್ಯಾಕ್ ಪಾವೊಂಕ್ನಾ?" ವಿಜ್ಮಿತ್ ಜಾಲ್ಲ್ಯಾಬರಿ ಉಲೈಲಿ ಮಿಲ್ಲಿಬಾಯ್.
ತಿಚೆಂ ಮನ್ ಖಂಡಿತ್ ಜಾಣಾಸ್ಲ್ಲ್ಯಾ ಮೆಲ್ವಿನಾನ್ ಜಾಪ್ ದಿಲಿ "ಕಾಂಯ್ ಎಡ್ರೆಸಾಂತ್ ಚೂಕ್ ಜಾಲ್ಲಿ ಕೊಣ್ಣಾ ಅಂಟಿ"
"ವ್ಹಯ್, ತಶೆಂಚ್ ಕಾಂಯ್ ಘಡ್ಲಾಂ" ಫ್ರೆಡ್ಡಿಯಾಬ್ ಪತಿಣೆಚ್ಯಾ ಪಾಡ್ತಿಂತ್ ಉಲೈಲೊ.
"ವ್ಹಯ್ ಸಗ್ಳೆಂ ಜಾತಾ. ಕೊಲೆಜ್ ಶಿಕ್ಚ್ಯಾ ಭುರ್ಗ್ಯಾಂಕ್ ಎಡ್ರೆಸ್ಯಿ ಸಾರ್ಕೊ ಬರಂವ್ಕ್ ಕಳಾನಾ.." ದುರ್ಸಾಲಿ ಮಿಲ್ಲಿಬಾಯ್, "ತುಮ್ಚೆಂ ಶಿಕಾಪ್ಗಿ ತುಮಿಂಗಿ!"
"ಬೊಂಬಯಾಂತ್ ಕಾಮಾಂ ಮಸ್ತ್ ಮೆಳ್ತಾತ್ಗಿ ಅಂಕಲ್?" ಮೆಲ್ವಿನ್ ವಿಚಾರ್ತಾಲೊ.
"ಮೆಳ್ತಾತ್ಮೂ.....ತುಕಾ ತಿಕ್ಯಾಕ್ ಇತ್ಲ್ಯಾ ವೆಗಿಂ ಖಂತ್." ಪ್ರೆಡ್ಡಿಯಾಬ್ ಮ್ಹಣಾಲೊ, "ತುಜಿ ಕೊಲೆಜ್ ಅಖೇರ್ ಜಾಂವ್ಕ್ ಚ್ಯಾರ್ ವರ್ಸಾಂ ಉರ್ಲ್ಯಾಂತ್. ಉಪ್ರಾಂತ್ ಪಳೆಂಯಾಂ"
"ಪುರ್ತೆಂ ಶಿಕಾಪ್ ಕಾಬಾರ್ ಕರ್ಚ್ಯಾ ಆದಿಂಚ್ ಮ್ಹಜ್ಯಾ ಪುತಾಕ್ ಕಾಮಾಚಿ ಖಂತ್" ಹಾಸೊನ್ ಮ್ಹಣಾಲೊ ವಿತೊರಾಬ್, "ಕಾಮ್ ಕರ್ರೆ ಮ್ಹಣ್ತಾನಾ, ಕೊಲೆಜ್ ಕರುಂಕ್ ಜಾಯ್ ಬಾಬಾ ಮ್ಹಣ್ತಾಲೊ".
"ಹಾಂ, ಆತಾಂ ಕಿತೆಂ ಗಜಾಲಿ ಕರ್ನ್ಂಚ್ ಬಸ್ತಾತ್ಗಿ? ವೊರಾಂ ಇಕ್ರಾಂ ಜಾಲಿಂ. ಉಲೊಂವ್ಚೆಂ ಕಿತೆಂ ಆಸ್ಲ್ಯಾರ್ ಫಾಲ್ಯಾಂ ಸಕಾಳ್ ಜಾಂವ್ದಿ. ಚಲಾ, ಹಾಂತುಳ್ನ್ ಸೊಡೈಲಾಂ" ಮ್ಹಣಾಲಿ ಜಿಲ್ಲಿಬಾಯ್. ತಿಚ್ಯಾ ಉಲೊವ್ಣ್ಯಾಕ್ ಪಾಳೊ ದೀವ್ನ್ ಗಜಾಲಿ ಅಖೇರ್ ಜಾಲ್ಯೊ. ಸಕ್ಡಾಂ ನಿದೊಂಕ್ ಗೆಲಿಂ.
ದುಸ್ರ್ಯಾ ಸಕಾಳಿಂ ಕಾಫಿ ಪಿಯೆತಾನಾ ಮಿಲ್ಲಿಬಾಯ್ ಮ್ಹಣಾಲಿ - "ಆಮ್ಕಾಂ ಆತಾಂ ಹಂಪನ್ಕಟ್ಟಾ ವಚೊಂಕ್ ಜಾಯ್ ಫ್ರೆಡ್ಡಿ. ಡೊಕ್ಟರಾನ್ ಥೊಡ್ಯೊ ಪಿಲ್ಸ್ ಘೆಂವ್ಕ್ ಸಾಂಗ್ಲ್ಲೆಂ. ಮೆಡೀಕಲ್ ಸ್ಟೋರಾಂತ್ ಮೆಳ್ತೆಲ್ಯೊ"
"ವೆಚೆಂ ಜಾಲ್ಯಾರ್ ಯಾ ಮಿಲ್ಲಿ. ಮ್ಹಜಿ ಕಾಂಯ್ ಅಡ್ಕಳ್ ನಾಂ" ಫ್ರೆಡ್ಡಿಯಾಬ್ ಮ್ಹಣಾಲೊ.
"ತುಂಯಿ ಯೆ ಮೆಲ್ವಿನ್ ಆಮ್ಚ್ಯಾ ಸಾಂಗಾಂತಾ" ಮಿಲ್ಲಿಬಾಯೆನ್ ಸಾಂಗ್ಲೆಂ.
"ಯೇಜಾಯ್ ಜಾಲ್ಯಾರ್ ಯೆತಾಂ"
ನೋವ್ ವ್ಹರಾರ್ಶೆಂ ತಿಂ ನ್ಹೆಸೊನ್ ಆಸ್ತಾನಾ ಮಿಲ್ಲಿಬಾಯ್ ಮ್ಹಣಾಲಿ, "ಹೆಂ ಕಿತೆಂರೆ ಮೆಲ್ವಿನ್, ಲಾಂಬ್ ಇಜಾರ್ ನಾಂಗಿ ತುಜೆಲಾಗಿಂ?"
ಮೆಲ್ವಿನ್ ಅರ್ಧೆಂ ಇಜಾರ್ ಶಿರ್ಕಾಯ್ತಾಲೊ. ಲಜೆನ್ ತೊ ಮ್ಹಣಾಲೊ ’ಎದೊಳ್ಚ್ಯಾಕ್ ಎಕ್ಯಿ ನಾ ಅಂಟಿ"
ಅಂಕಲ್ ಆನಿಂ ಆಂಟಿ ದೊಗಾಂಯ್ ಹಾಸ್ಲಿಂ. "ಹುಂ, ತುಜಿ ಅರ್ಧಿ ಚಡ್ಡಿ ಆನಿಂ ಖಾಲಿ ಪಾಯ್ ಗಾವಾಂತ್ ಚಲಾತ್. ಬೊಂಬಯಾಂತ್ ಪಯ್ಲ್ಯಾ ಕ್ಲಾಸಿಂತ್ಲಿಂ ಭುರ್ಗಿಂಯಿ ಶೂಸ್ ಘಾಲ್ತಾತ್" ಮ್ಹಣಾಲೊ ಫ್ರೆಡ್ಡಿಯಾಬ್.
ತಾರಿಕ್ ಆಸ್ಲ್ಲಿಂ ಇಸ್ಕೊಲಾಕ್ ವೆಚ್ಯಾ ಭುರ್ಗ್ಯಾಂಕ್ ಕಿತ್ಯಾಕ್, ಪಾಳ್ಣ್ಯಾಂತ್ಲ್ಯಾ ಭುರ್ಗ್ಯಾಂಕ್ಯಿ ಸುಟ್ ಕರ್ನ್ ಘಾಲ್ತಿತ್. ಪುಣ್ ಆಪ್ಲಿ ಸ್ಥಿತಿ ಜಾಣಾಸೊನ್ಯಿ ತಿಂ ತಶೆಂ ಮ್ಹಣ್ತಾನಾ, ಮೆಲ್ವಿನಾಕ್ ಬೆಜಾರ್ ಜಾಲೆಂ.
ತಿಂ ಹಂಪನ್ಕಟ್ಟಾ ಪಾವ್ಲಿಂ. ಮಿಲ್ಲಿಬಾಯೆನ್ ತಿಕಾ ಜಾಯ್ ಜಾಲ್ಲಿಂ ವಕ್ತಾಂ ಘೆತ್ಲಿಂ. ಉಪ್ರಾಂತ್ ತಿಂ ಎಕಾ ಜೊವ್ಳೆ ಶೊಪಾಕ್ ರಿಗ್ತಾನಾ ಮೆಲ್ವಿನ್ಯಿ ತಾಂಚ್ಯಾ ಸಾಂಗಾಂತಾ ಗೆಲೊ.
"ಮೆಲ್ವಿನ್ ತುಕಾ ಜಾಯ್ ತೆಂ, ಪೆಂಟಾಚೆಂ ಆನಿಂ ಶರ್ಟಾಚೆಂ ಲುಗಾಟ್ ಕಾಡ್" ಮ್ಹಣಾಲೊ ಫ್ರೆಡ್ಡಿಯಾಬ್. ಮೆಲ್ವಿನಾಕ್ ಕಠಿಣ್ ಅಜಾಪ್ ಜಾಲೆಂ, ದೊಳೆ ರುಂದಾವ್ನ್ ತೊ ಮ್ಹಣಾಲೊ "ಕೊಣಾಕ್, ಮ್ಹಾಕಾ?"
"ವ್ಹಯ್, ತುಕಾಚ್. ಜಾಯ್ ಜಾಲ್ಲೆಂ ಲುಗಾಟ್ ವೀಂಚ್" ಆಯ್ಕೊನ್ ಮೆಲ್ವಿನಾಕ್ ಜಾಲ್ಲೊ ಸಂತೊಸ್ ವರ್ಣುನ್ ತುದಿ ಕರುಂಕ್ ನಜೊ. ಸಂತೊಸ್ ದಾಂಬುನ್ ಧರ್ನ್ ತಾಣೆಂ ಧವೆಂ ಶರ್ಟಾಚೆಂ ಆನಿಂ ನಿಳ್ಶೆಂ ಪೆಂಟಾಚೆಂ ಲುಗಾಟ್ ಪಸಂದ್ ಕೆಲೆಂ.
"ಹೆಂ ಆತಾಂ ಬರ್ಯಾ ಟೇಯ್ಲಾರಾಲಾಗಿಂ ಶಿಂವೊಂಕ್ ದಿ. ಆನಿಂ ನತಲಾಂಚ್ಯಾ ಫೆಸ್ತಾ ಆದಿಂಚ್ ದೀಂವ್ಕ್ ಸಾಂಗ್" ಮ್ಹಣಾಲಿ ಮಿಲ್ಲಿಬಾಯ್. ಉಪ್ರಾಂತ್ ಕಿತೆಂಗಿ ಉಡಾಸ್ ಕರ್ನ್ ತಿ ಹಾಸ್ಲಿ ಆನಿಂ ಘರ್ಕಾರಾಲಾಗಿಂ ಮ್ಹಣಾಲಿ. "ಹೆಂ ಆತಾಂ ಆಮಿಂ ಕೆಲ್ಲೆಂ ಕಾಮ್ ಶಿತ್ ತಯಾರ್ ಕರ್ನ್ ನಿಸ್ತೆಂ ಬಾಕಿ ದವರ್ಲ್ಲ್ಯಾಬರಿ ನಹಿಂವೆ ಫ್ರೆಡ್ಡ್?"
"ತಶೆಂ ಮ್ಹಳ್ಯಾರ್..?" ಪತಿಣೆಚೊ ಮತ್ಲಾಬ್ ಕಳಾನಾಸ್ತಾಂ ಫ್ರೆಡ್ಡಿಯಾಬ್ ಮ್ಹಣಾಲೊ.
"ನಹಿಂ, ಪೆಂಟ್ ಆನಿಂ ಶರ್ಟ್ ಜಾಲೆಂ. ಪಾಯಾಂಕ್ ಘಾಲುಂಕ್ ಮೊಚೆ ನಾಕಾತ್ವೆ? ಮ್ಹಾಕಾ ಉಡಾಸ್ ಜಾಲ್ಲೊ ಬರೊ ಜಾಲೊ"
"ಓ....ಮ್ಹಾಕಾ ಉಡಾಸ್ಚ್ ನಾ," ಫ್ರೆಡ್ಡಿಯಾಬ್ ಬೊಟ್ ಚಾಬೊನ್ ಮ್ಹಣಾಲೊ, "ಮೆಲ್ವಿನ್, ಖಂಯ್ಚೆಂ ಬರೆಂ ಫುಟ್ವೇರ್ ಶೊಪ್ ಆಸಾ ಸಾಂಗ್. ತುಕಾ ಮೆಚೆ ಜಾಯ್ಗಿ ವ್ಹಾಣೊ?"
ಮೆಲ್ವಿನ್ ಕಿತೆಂಗಿ ಸಾಂಗೊಂಕ್ ತೊಂಡ್ ಸೊಡ್ಚ್ಯಾ ಆದಿಂಚ್ ಮಿಲ್ಲಿಬಾಯ್ ಮ್ಹಣಾಲಿ "ವ್ಹಾಣೊ ಕಿತ್ಯಾಕ್? ಮೊಚೆಚ್ ಘೆವ್ನ್ ದಿ. ಪುತ್ನ್ಯೊ ನಹಿಂವೆ? ಫಾಲ್ಯಾಂ ಸಕಾಳಿಂ ಶಿಕೊನ್ ವ್ಹಡ್ ಮ್ಮನಿಸ್ ಜಾತ್ಚ್ಚ್ ತುಕಾಚ್ ಉಪ್ಕಾರಾಕ್ ಪಡ್ತಲೊ."
ತಿಂ ತೆಗಾಂಯ್ ಹಾಸ್ಲಿಂ. ಸರ್ಶಿಲ್ಯಾ ಫುಟ್ ವೇರ್ ಶೊಪಾಂತ್ ಮೆಲ್ವಿನಾನ್ ಆಪ್ಣಾಚ್ಯಾ ಮನಾಕ್ ಜೊಕ್ತೆ ಕಾಳೆ ಮೊಚೆ ಘೆತ್ಲೆ. ಆಶೆಂ ತಾಚೆಂ ಫೆಶಾನ್ಯಿ ಪಾರಾಂಭ್ ಜಾಲೆಂ.
ಆಂಟಿಕ್ ಆನಿಂ ಅಂಕಲಾಕ್ ಎಕಾ ಕ್ಷಣಾಕ್ ಸೊಡ್ನ್ ತೊ ಎಕಾ ನಾಂವಾಡ್ದಿಕ್ ಟೇಯ್ಲರಾ ಸರ್ಶಿಂ ಗೆಲೊ. ಥೊಡೊ ಉಪ್ಕಾರ್ ಮಾಗ್ತಚ್, ಕಶೆಂಯಿ ನತಾಲಾಂಚ್ಯಾ ಫೆಸ್ತಾ ಆದಿಂ ಮುಸ್ತಾಯ್ಕಿ ಶಿಂವೊನ್ ದೀಂವ್ಕ್ ಟೇಯ್ಲರ್ ಒಪ್ಲೊ.
ಕ್ರಿಸ್ತಾಂವಾಂಕ್ ಆಮ್ಕಾಂ ಆತೀ ಮೊಗಾಚೆಂ ಆನಿಂ ದಾದೊಸ್ಕಾಯೆಚೆಂ ತೆಂ ನತಾಲಾಚೆಂ ಫೆಸ್ತ್ ಲಾಗಿಂ ಲಾಗಿಂ ಯೆತಾಲೆಂ. ಜಶೆಂ ಸಗ್ಳ್ಯಾ ಸಂಸಾರಾರ್, ತಶೆಂ ತ್ಯಾ ಉರ್ವಾಂತ್ಯಿ ನತಲಾಂ ಫೆಸ್ತಾಚಿ ತಯಾರಾಯ್ ಭರಾನ್ ಚಲ್ತಾಲಿ. ಕೊಣ್ ಭುರ್ಗಿಂ ಸಾಂಗಾತಾ ಮೆಳೊನ್ ಗರ್ದಾನಾಚೊ ಗೊಟೊ ತಯಾರ್ ಕರ್ತಾಲಿಂ. ಥೊಡಿಂ ನವಿ ಮುಸ್ತಾಯ್ಕಿ ಶಿಂವೊನ್ ದೀ ಮ್ಹಣೊನ್ ಆವಯ್ - ಬಾಪಾಯ್ಲಾಗಿಂ ಝಗಡ್ತಾಲಿಂ. ವ್ಹಡಾಂ ಕೊಣಾಕ್ ಖಂಯ್ಚಿ ಕ್ರಿಸ್ಮಸ್ ಕಾರ್ಡಾಂ ದಾಡ್ಚಿಂ ಮ್ಹಣ್ ತಕ್ಲಿ ವಿರಾರ್ ಕರ್ತಾಲಿ. ಥೊಡಿಂ ಆಪ್ಲ್ಯಾ ಮೊಗಾಚ್ಯಾಂಕ್ ಕಸಲೆಂ ಇನಾಮ್ ದಿಂವ್ಚೆಂ ಮ್ಹಣ್ ವಿಚಾರ್ ಕರ್ತಾಲಿಂ.
ಘರಾಂತ್ಯಿ ಖಳ್ಮಿತ್ ನಾತ್ಲ್ಲೆಂ ಕಾಮ್. ಕುಸ್ವಾರಾಚಿ ತಯಾರಾಯ್ ಭರಾನ್ ಚಲ್ತಾಲಿ. ಲ್ಹಾನ್ ಭುರ್ಗಿಂ ರಾಂದ್ಚಾ ಕುಡಾಂತ್ಚ್ ಬಸೊನ್ ಖಾಣಾಕ್ ಲಡಾಯ್ ಕರ್ಚೆಂಯಿ ಸದಾಂಚೆಂ ದ್ರಶ್ಯ್. ಇಗರ್ಜೆಂತ್ ಪಾದ್ರ್ಯಾಬಾಂಕ್ಯಿ ಪುರ್ಸತ್ಚ್ ನಾತ್ಲ್ಲಿ. ಇಗರ್ಜ್ ಸುಂರ್ಗಾರಾಂವ್ಚೆಂ ಕಾಮ್ ಮಿರ್ಣಿಚೆಂ ಜಾಲ್ಯಾರ್ ಪಾದ್ರ್ಯಾಬಾಂಕ್ ಗರ್ಜೆಚೆಂ ದುಸ್ರೆಂ ಕಾಮ್ ಆಸ್ಲ್ಲೆಂ. ಕಿತ್ಯಾಕ್ ಇಗರ್ಜೆಂತ್ ಲೋಕ್ ಹಾರಿಂ - ಹಾರಿಂನಿ ಭರ್ತಾಲೊ ಕುಮ್ಸಾರಾ ಖಾತಿರ್. ಆನಿಂ ಕುಮ್ಸಾರಾಕ್ ಆಯಿಲ್ಲ್ಯಾ ಲೊಕಾಕ್ ಪಳೆತಾನಾ ಚಿಂತುಂಕ್ ಯೆತಾಲೆಂ ಹೆರಾ ವೆಳಾರ್ ಆಸಲಿ ಗಡ್ದಿ ಕಿತ್ಯಾಕ್ ನಾಂಗಿ ಮ್ಹಣ್. ಲೊಕಾಚ್ಯಾ ಉಲ್ಲಾಸಾಕ್, ಗೊವ್ಜೆಕ್ ಆನಿಂ ಬೊಬೆಕ್ ಅಂತ್ಯ್ಚ್ ನಾತ್ಲ್ಲೆಂ.
ಆನಿಂ ನತಾಲಾಂಚೆಂ ಫೆಸ್ತ್ ಆಯ್ಲೆಂ. ಮೆಲ್ವಿನಾಗೆಲಿಂ ಸಕ್ಡಾಂ ರಾತಿಂ ಮಧ್ಯಾನೆಚ್ಯಾ ಮಿಸಾಕ್ ಗೆಲಿಂ. ಆದ್ಲ್ಯಾ ದಿಸಾ ಶಿಂವೊನ್ ಹಾಡ್ಲ್ಲೆಂ ನವೆಂ ಪೆಂಟ್ ಆನಿಂ ಶರ್ಟ್ ಘಾಲ್ತಾನಾ ಮೆಲ್ವಿನಾಕ್ ಜಾಲ್ಲೊ ಸಂತೊಸ್ ಅಪರಿಮಿತ್. ಮೊಚ್ಯಾಂಕ್ ಜಾತಾ ತಿತ್ಲೊ ವೇಲ್ ಖರ್ಚುನ್ ಉಜ್ವಾಳ್ತಾ ಸಾರ್ಕೆಂ ತಾಣೆಂ ಪೊಲಿಶ್ ಕಾಡ್ಲ್ಲೆಂ. ಮಿಸಾಕ್ ವೆತಾನಾ ತೊ ವಾರ್ಯಾರ್ಚ್ ಮೆಟಾಂ ಕಾಡ್ತಾಲೊ.
ಕಸಲಿ ತಿ ಗಂಭೀರ್ ಆನಿಂ ಖುಶಾಲ್ಭಾರಿತ್ ಘಡಿ! ಸರ್ಗಾ ಸಂಸಾರಾಚೊ ಸೊಡ್ವಣ್ದಾರ್ ದುಬ್ಳೊ ಜಾವ್ನ್ ಗರ್ದನಾಚ್ಯಾ ಗೊಟ್ಯಾಂತ್ ಆಜ್ ಜಲ್ಮಾಲ್ಲೊ. ಸುಂರ್ಗಾರಾಯಿಲ್ಲಿ ತಿ ಇಗರ್ಜ್ ಆನಿಂ ತೊ ಲೋಕ್ ಪಳೆತಾನಾ ತಾಣೆಂ ಭಕ್ತಿಪಣಾನ್ ಕುಮ್ಗಾರ್ ಸೆವ್ಲೊ. ಮೀಸ್ ತಡವ್ ಕರ್ನ್ ಸಂಪ್ಲೆಂ. ಇಗರ್ಜೆಚಾ ಆಂಗ್ಣಾಂತ್ ಎಕಾಮೆಕಾ ಕ್ರಿಸ್ಮಸಾಚೆ ಸಂದೇಶ್ ಪಾಶಾರ್ ಜಾಲೆ. ತೊ ಆಪ್ಲ್ಯಾ ಇಷ್ಟಾಂಕ್ ಮೆಳೊನ್ ಉಲ್ಲಾಸ್ ಪಾಟೈತಾಲೊ. ತಾಂಚೆ ಲಾಗಿಂ ಚ್ಯಾರ್ ಸಬ್ದ್ ಉಲವ್ನ್ ತೊ ಎಕ್ಸುರೊ ಘರ್ಚ್ಯಾ ವಾಟೆಕ್ ಪರ್ತಾಲೊ.
ತೊ ಆತಾಂ ಸರಾರಾಂ ಚಲ್ತಾನಾ, ನವೆಚ್ ಮೊಚೆ ಘಾಲ್ಲ್ಯಾನ್ ತಾಚ್ಯಾ ಪಾಂಯಾಂಕ್ ಪೊಡ್ ಯೇವ್ನ್ ದುಕ್ತಾಲೆ. ಕಠಿಣ್ ಹುಲೊಪ್ ಸುರು ಜಾಲೊ. ತಾಚಿ ಚಾಲ್ ಆತಾಂ ನಿದಾನ್ ಜಾಲ್ಲಿ. ದುಕಿನ್ ಪಾಂಯ್ ವೋಡ್ನ್ ತೊ ಚಲೊಂಕ್ ಲಾಗ್ಲೊ. ಲೇಡಿಹಿಲ್ ಘುಂವ್ಡೆ ಲಾಗಿಂ ತೊ ಪಾವ್ಲಾಂ ಮಾತ್ರ್. ರಸ್ತ್ಯಾರ್ ಮಸ್ತ್ ಚಲಿಯೊ ಕುಡ್ಸೊನ್ ಗಜಾಲಿ ಕರ್ನ್ ರಾವ್ಲ್ಲ್ಯೊ ತಾಕಾ ದಿಸ್ಲೆಂ. ತ್ಯೊ ಮಿಸಾಕ್ ಆಯಿಲ್ಲ್ಯೊ ಚಲಿಯೊ. ಪಳೆತಾನಾ ತಾಂಚೆಂ ಮಧೆಂ ಸಿಂತಿಯಿ ಆಸ್ಲ್ಲೆಂ. ಮೆಲ್ವಿನಾಚೆಂ ಕಾಳಿಜ್ ’ಡವಡವ್’ ಉಡೊಂಕ್ಲಾಗ್ಲೆಂ. ಸಾಂಗಾತಾಚ್ ನವೆಂ ಶರ್ಟ್ ಆನಿಂ ಫೆಂಟ್ ಘಾಲ್ಲ್ಯಾನ್ ತೊ ಗರ್ವಾನ್ಂಚ್ ಚಲ್ಲೊ. ತರೀ ಪಾಂಯಾಚ್ಯಾ ದುಕಿನ್ ತಾಣೆಂ ಕುಂಟೊನ್ ವೆಚೆಂ ಪಡ್ಲೆಂ.
ಸಟ್ಟ್ ಕರ್ನ್ ತ್ಯೊ ಚಲಿಯೊ ’ಕಿಟಿ ಕಿಟಿ’ ಹಾಸ್ಚೊ ಆವಾಜ್ ತಾಕಾ ಆಯ್ಕಾಲೊ. ಮೆಲ್ವಿನಾಕ್ ಲಜೆನ್ ಜೀವ್ ಮುಯೆ ತೆದೊ ಜಾಲೊ. ತಾಣಿಂ ಹಾಸ್ಲ್ಲ್ಯಾಚೆಂ ಕಾರಣ್ಯಿ ತಾಕಾ ಸಮ್ಜಾಲೆಂ. ಆತಾಂ ಕಿತೆಂ ಕರ್ಚೆಂ ಮ್ಹಣ್ ಸಮ್ಜಾನಾಸ್ತಾಂ ತೊ ಉಘಡ್ತಾನಾ ಕೊಣೆಂಗಿ ಹಾಸ್ಯಾಂ ಸಾಂಗಾಂತಾ ವ್ಹಡ್ಲ್ಯಾನ್ ಉಲೈಲೊ ತಾಳೊ ತಾಕಾ ಆಯ್ಕಾಲೊ. ಮಧ್ಯಾನೆಚ್ಯಾ ತ್ಯಾ ಶಾಂತ್ ಗಂಭೀರ್ ವಾತಾವರಣಾಂತ್ ತಿಂ ಉತ್ರಾಂ ಕ್ರೂರ್ ಭಾಲಿಯೆಬರಿ ತಾಚ್ಯಾ ಕಾನಾಕ್ ಆಪ್ಟಾಲಿಂ.
(ಮೆಲ್ವಿನ್ ಲಜೆನ್ ಭರ್ಲೊ, ರಾಗಾನ್ ಕಡ್ಕಡ್ಲೊ. ಕಿತ್ತುನ್ ಪರ್ಯಾಂತ್ ಸೊಸ್ಣಿಕಾಯ್.......? ಯೆಂವ್ಚ್ಯಾ ಹಪ್ತ್ಯಾಂತ್ ಭಾರಿಚ್ ಮಝಾ ಆಸಾ)
ನಿರ್ಭಾಗ್ಯಾಚೆಂ ಸ್ವಪಾಣ್: ಪ್ರಸ್ತಾವನ್. ಅವಸ್ವರ್ 1, 2
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
