ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ನಿರ್ಭಾಗ್ಯಾಚೆಂ ಸ್ವಪಾಣ್
ಜೂನ್ ಮಹಿನಾಂತ್ಲೆ ಸುರ್ವಿಲೆ ದೀಸ್ ತೆ. ಮಂಗ್ಳುರಾಂತ್ ಹ್ಯಾ ಆದಿಂಚ್ ಪಾವ್ಸ್ ಪ್ರಾರಂಭ್ ಜಾಲ್ಲೊ, ತರೀ ತಿತ್ಲೊ ಭೊರ್ ನಾತ್ಲ್ಲೊ. ಗಿಮಾಚಿ ಧಗ್ ಅಜೂನ್ಯಿ ಸೊಸುಂಕ್ ತಾಂಕಾನಾತ್ಲ್ಲೆಂ. ಸಕಾಳಿಂ ಚಾರ್ ಥೆಂಬೆ ಪಾವ್ಸ್ ಪಡ್ಲ್ಲೊ, ಧರ್ಣ್ ಥಂಡ್ ಜಾಲ್ಲಿ. ಸಾಂಜೆಚ್ಯಾ ವೆಳಾರ್ ಅಂತ್ರಳಾರ್ ಥೊಡಿಂ ಕುಪಾಂ ಶಿವಾಯ್, ಶುಭ್ರ್ ಆಸ್ಲ್ಲೆಂ. ವಾತಾವರಣ್ ಸುಂದರ್ ಜಾವ್ನಾಸ್ಲ್ಲೆಂ. ಸಂಗಿಂ ವಾಳೊನ್ ಯೆಂವ್ಚ್ಯಾ ಥಂಡ್ ವಾರ್ಯಾಕ್ ಮತ್ ಪಿಶಿ ಜಾತಾಲಿ.
ಉರ್ವಾ ಇಗರ್ಜೆ ಥಾವ್ನ್ ಥೊಡ್ಯಾ ಪಯ್ಸ್ ತೆಂ ಏಕ್ ಮಜ್ಭೂತ್ ಘರ್, ವಾಡ್ಯಾಂತ್ ನಾಂವಾಡ್ದಿಕ್ ಶ್ರೀಮಂತ್ ಮನ್ವೆಲ್ ಪ್ರಭು ತಾಚೊ ಧನಿ. ಬಂಟ್ವಾಳಾಂತ್ ತಾಕಾ ಜಾಯ್ತಿ ಆಸ್ತ್ ಆನಿಂ ಭುಂಯ್ - ಭಾಟ್ ಆಸಾ ಮ್ಹಣೊನ್ ವಾಡೊ ಸಗ್ಳೊ ಜಾಣಾ. ತ್ಯಾ ಘರಾಕ್ ತೆಂಕೊನ್ಚ್ ಪಾಟ್ಲ್ಯಾನ್ ಲ್ಹಾನ್ಶೆ ದುಸ್ರೆಂ ಘರ್. ತಾಂತುಂ ಬಾಡ್ಯಾಕ್ ವಸ್ತಿ ಕರ್ತಾಲೆಂ ಏಕ್ ದುಬ್ಳೆಂ ಕುಟಾಮ್ ವಿತೊರಾಬಾಚೆಂ. ವಿತೊರಾಬ್ ಮಂಗ್ಳೂರ್ಚ್ಯಾ ಎಕಾ ಬೆಂಕಾಂತ್ ಕ್ಲಾರ್ಕಾಚೆಂ ಕಾಮ್ ಕರ್ತಾಲೊ. ತೊ, ತಾಚಿ ಪತಿಣ್ ಜಿಲ್ಲಿ ಬಾಯ್ ಆನಿಂ ದೋಗ್ ಭುರ್ಗೆ - ಮೆಲ್ವಿನ್ ಆನಿಂ ಲೆನ್ಸಿ - ಇತ್ಲಿಂ ತ್ಯಾ ಘರ್ಚಿಂ ಜಾಣಾ.
ಕಾಮಾಕ್ ಗೆಲ್ಲೊ ವಿತೊರಾಬ್ ಎದೊಳ್ ಪಾಟಿಂ ಘರಾ ಯೇಂವ್ಕ್ ನಾತ್ಲ್ಲೊ. ಜಿಲ್ಲಿ ಬಾಯ್ ಬಿತರ್ ರಾಂದ್ಚ್ಯಾ ಕುಡಾಂತ್ ಕಾಮಾರ್ ಆಸ್ಲ್ಲಿ. ಧಾಕ್ಟೊ ಲೆನ್ಸಿ, ಸ ವರ್ಸಾಂಚೊ ಭುರ್ಗೊ, ಪೆಟ್ಯಾಲಾಗಿಂ ಖೆಳ್ಚಾರ್ ಪಡ್ಲ್ಲೊ. ಪುಣ್ ಮೆಲ್ವಿನ್ ಹಿತ್ಲ್ಯಾಂತ್ಲ್ಯಾ ಎಕಾ ರುಕಾರ್ ಬಸೊನ್ ಅಂತ್ರಳಾಕ್ ದೀಷ್ಟ್ ಲಾವ್ನ್ ಆಸ್ಲ್ಲೊ. ತಾಚ್ಯಾ ತೊಂಡಾರ್ ಘಡಿಯೆಕ್ ಆಶೆಚಿಂ, ಘಡಿಯೆಕ್ ನಿರಾಶೆಚಿಂ ಖುಣಾಂ ಉಬ್ಜೊನ್ ನಪೈಂಚ್ ಜಾತಾಲಿಂ.
ಮೆಲ್ವಿನಾಚ್ಯಾ ಜಿಣಿಯೆಂತ್ ಆಯ್ಚೊ ದೀಸ್ ಏಕ್ ಮಹತ್ವಾ಼ಚೊ ದೀಸ್ ಜಾವ್ನಾಸ್ಲ್ಲೊ. ತ್ಯಾ ಸಕಾಳಿಂ ತಾಚೆಂ ಮೆಟ್ರಿಕಾಚೆಂ ಫಲಿತಾಂಶ್ ಆಯಿಲ್ಲೆಂ ಆನಿಂ ತೊ ಪಾಸ್ ಜಾಲ್ಲೊ. ಸೊಳಾ ವರ್ಸಾಂಚ್ಯಾ ಪ್ರಾಯೆಚ್ಯಾ ತಾಕಾ ಹುಶಾರಾಯೆಚೆಂ ದೆಣೆ ದೆವಾನ್ ದಿಲ್ಲೆಂ. ದುಬ್ಳ್ಯಾಪಣಾನ್ ದೀಸ್ ಕಾಡ್ಚ್ಯಾ ತಾಂಕಾಂ, ಮೆಲ್ವಿನಾನ್ ವರ್ಸಾನ್ ವರ್ಸ್ ಪಾಸ್ ಜಾಲ್ಲೆಂ ತೆಂಚ್ ಏಕ್ ದಿರ್ವೆಂ. ಬಾಪಾಯ್ಚಿ ಜೋಡ್ ಮಾತ್ಯಾಕ್ ವೊಡ್ಲ್ಯಾರ್ ಪಾಯಾಂಕ್ ಪಾವಾನಾ; ಮ್ಹಣ್ತಚ್ ಮೆಲ್ವಿನ್ ಮೆಟ್ರಿಕಾಂತ್ ಪಾಸ್ ಜಾವ್ನ್ ಹ್ಯಾ ಪಾವ್ಟಿಂ ಖೈಂಸರ್ಯಿ ಕಾಮಾಕ್ ಲಾಗ್ತೊಲೊ ಮ್ಹಳ್ಳೊ ಜಾವ್ನಾಸಾಲ್ಲೊ ಆವಯ್ ಬಾಪಾಯ್ಚೊ ಭರ್ವಸೊ. ತಾಚ್ಯಾ ಮೆಟ್ರಿಕಾಕ್ ಲಾಗೊನ್ಂಚ್ ತಾಂಕಾ ಜಾಯ್ತೊ ಖರ್ಚ್ ಜಾಲಾ. ರೀಣ್ಯಿ ತ್ಯಾ ಪರಿಂಚ್ ವಾಡ್ಲಾಂ,. ಯೆದೊಳ್ ತಾಣಿ ಜಾಯ್ತೊ ಸಾಕ್ರಿಫಿಸ್ ಕೆಲಾ. ಪುಣ್ ಆತಾಂ ನಿಮಾಣೆಂ ತಾಂಕಾಂ ಏಕ್ ಸುದೈವ್ ಉದೆಲಾಂ. ಆನಿಂ ಪುಣಿ ತಾಂಚೆಂ ಕಷ್ಟ್ ಪರಿಹಾರ್ ಜಾತಿತ್. ಮೆಲ್ವಿನ್ ಖಂಯ್ ಪುಣಿ ಕಾಮಾಕ್ ಲಾಗಾತ್ ಜಾಲ್ಯಾರ್, ಘರಾಕ್ ಕಿತ್ಲೊ ಆಧಾರ್ ಜಾಯ್ತ್!.....ಪುಣ್.....
ಪುಣ್ ಮೆಲ್ವಿನಾಚ್ಯಾ ಮತಿಂತ್ ಚಿಂತ್ನಾಂ ದುಸ್ರಿಂಚ್ ಖೆಳ್ತಾಲಿಂ. ತಾಕಾ ಏಕ್ಚ್ ಆಶಾ ಆಸ್ಲ್ಲಿ ಕೊಲಿಜಿಕ್ ವಚೊನ್ ಬಿ.ಎ. ಶಿಕಾಜಾಯ್ ಮ್ಹಣ್. ಆವಯ್-ಬಾಪಾಯ್ಚೆ ಕಷ್ಟ್ ತೊ ಜಾಣಾ. ಆಪ್ಲ್ಯಾ ಘರ್ಚಿ ಸ್ಥಿತಿಯಿ ತಾಕಾ ಕಳಿತ್ ಆಸಾ. ತರೀ......ತಾಚ್ಯಾ ಕಾಳ್ಜಾಂತ್ ಲ್ಹಾನ್ಪಣಾರ್ ಕಿರ್ಲೊನ್ ಆತಾಂ ರೂಕ್ ಜಾಲ್ಲಿ ತಿ ಆಶಾ..... ’ಸಕ್ಕಡ್ಯಿ ಕೊಲೆಜಿಚೆಂ ಶಿಕಾಪ್ ಶಿಕೊನ್ ವ್ಹಡ್ ಮನಿಸ್ ಜಾಂವ್ಕ್ ಪಾವ್ಲ್ಯಾತ್.....ತರ್ ಆಪ್ಣೆಂಯ್ ಕಿತ್ಯಾಕ್ ಶಿಕಾಪ್ ಮುಖಾರ್ಸುಂಕ್ ನಜೊ?’
ತಾಚ್ಯಾ ಮತಿಂತ್ ಆಪಧೈರ್ ಭೊಗ್ತಾಲೆಂ. ಬಾಪಯ್ ತಾಚ್ಯಾ ಖುಶೆಕ್ ಬಿಲ್ಕುಲ್ ಕಬ್ಲಾತ್ ದಿಂವ್ಚೊನಾ. ಕೊಲೆಜಿಚ್ಯಾ ಶಿಕ್ಪಾಕ್ ತಾಕಾ ರೀಣ್ ಖೈಂಚೆ ಮೆಳಾತ್? ಆವಯ್ - ತಿಯ್ ಆಪ್ಣಾ ವಿಶ್ಯಾಂತ್ ಬಾಪಾಯ್ ಕಡೆ ಹಟ್ ಧರ್ಚಿನಾ......ಚಿಂತ್ತಾಂ ಚಿಂತ್ತಾಂ.... ಮೆಲ್ವಿನಾಕ್ ಚಾರ್ಯಿ ವಾಟಾಂನಿ ನಿರಾಶಾಚ್ ದಿಸ್ಲಿ. ತಾಣೆಂ ಲಾಂಬ್ ಶ್ವಾಸ್ ಸೊಡ್ಲೊ.
ರವಿರಾಯ್ ಆಸ್ತಮ್ತಿಚ್ಯಾ ದಿಗಂತಾರ್ ನಪೈಂಚ್ ಜಾತಾಲೊ. ಅಂತ್ರಾಳ್ ಆತಾಂ ತಾಂಬ್ಡ್ಯಾ ವರ್ಣಾಕ್ ಪರ್ತಾಲ್ಲೆಂ. ಹೆಣೆ-ತೆಣೆ ಘೊಟೆರಾಕ್ ಉಬೊನ್ ವೆಚಿಂ ಸುಕ್ಣಿಂ ದಿಸ್ತಾಲಿಂ. ಮಿನುಟಾಂ ಪಾಶಾರ್ ಜಾಲಿಂ.... ಪಳೆತಾಂ ಆತಾಂ ಭುಮಿರ್ ಮಾಜ್ವಾಲ್ಲೊ. ಪಳೆತಾಂ ಪಳೆತಾಂ ಆಪೈನಾತ್ಲ್ಲ್ಯಾ ಸುರ್ಯ್ಯಾಬರಿ ಕಾಳೊಕ್ ಭುಮಿರ್ ದೆಂವ್ಲೊ. ಆನಿಂ ಮೆಲ್ವಿನ್ ರೂಕಾರ್ ಥಾವ್ನ್ ಸಕ್ಲಾ ದೆಂವ್ತಾನಾ ಸಂಸಾರ್ ಪುರ್ತೊ ಕಾಳೊ ದಿಸ್ತಾಲೊ.
ತಾಚಿ ತಕ್ಲಿ ಕಠಿಣ್ ಪೊಡ್ತಾಲಿ. ಚಿಂತ್ನಾಂಚ್ಯಾ ಗೊಂದೊಳಾಂತ್ ತಾಚ್ಯಾ ತಕ್ಲೆಚ್ಯೊ ಶಿರೊ ಶಿರೊ ದುಕ್ತಾಲ್ಯೊ. ಘರಾ ವೊಚೊಂಕ್ ತಾಕಾ ಮನ್ ಆಯ್ಲೆಂನಾ. ತಶೆಂಚ್ ಘರ್ಚೊ ಆಕ್ಕಾಡೊ ಉತ್ರೊನ್ ತೊ ರಸ್ತ್ಯಾಕ್ ಆಯ್ಲೊ ಆನಿಂ ಜಾಯ್ ವ್ಹೊರ್ತಾ ವರೇಗ್ ತ್ಯಾ ದಿವ್ಯಾಂಚ್ಯಾ ಮಸ್ಕ್ ಉಜ್ವಾಡಾಕ್ ಚಲೊನ್ ಗೆಲೊ.
ಚಲೊನ್ ತಾಚೆ ಪಾಯ್ ವೊಳ್ಳೆ. ಲಾಗ್ಶಿಲ್ಯಾ ಉರ್ವಾ ಇಗರ್ಜೆಚಿ ಆಮೊರಿಚಿ ಘಾಂಟ್ ವ್ಹಾಜ್ತಾನಾ ಮೆಲ್ವಿನ್ ಎಕಾಚ್ಛಾಣೆಂ ಜಾಗೊ ಜಾಲೊ. ಆನಿಂ ತಡವ್ ಕರ್ಚೊ ನಾಕಾ ಮ್ಹಣ್ ತಾಣೆಂ ಪರ್ತ್ಯಾನ್ ಘರ್ಚಿ ವಾಟ್ ಧರ್ಲಿ. ಘರ್ಚ್ಯಾ ಆಂಗ್ಣಾಂತ್ ಪಾವ್ತಾನಾ ಬಿತರ್ ಆವಯ್ - ಬಾಪಾಯ್ಚೊ ತಾಳೊ ತಾಕಾ ಆಯ್ಕಾಲೊ.
"ನೀಜ್ಗಿ ಜಿಲ್ಲೆ.... ಆಮ್ಚೊ ಮೆಲ್ವಿನ್ ಪಾಸ್ ಜಾಲೊಗಿ......."? ಸಂತೊಸಾನ್ ಉಲೈತಾಲೊ ವಿತೊರಾಬ್. ಬಹುಶಃ ಘರಾ ಆಯಿಲ್ಲ್ಯಾ ಕ್ಷಣ್ ಜಿಲ್ಲಿಬಾಯೆನ್ ತಾಕಾ ಹಿ ಬರಿ ಖಬಾರ್ ಕಳೈಲಿ ಜಾಯ್ಜಾಯ್. "ದೆವಾ, ಜಾಂವ್ ತುಕಾ ಅರ್ಗಾಂ. ಮೆಲ್ವಿನ್ ಖಂಯ್ ಗೆಲಾ?"
"ಎಕಾ ಚಾರ್ ವೊರಾಂಚೆರ್ ಗೆಲ್ಲ್ಯಾ ಚೆಡ್ಯಾಚೊ ಎದೊಳ್ಯಿ ಪಾತ್ತೊ ನಾ. ಖಂಯ್ ಪಟ್ಟಾಂಗಾಂ ಮಾರುಂಕ್ ಬಸ್ಲಾ ಕೊಣಾ!" ಜಿಲ್ಲಿಬಾಯ್ ಮ್ಹಣಾಲಿ.
"ಯೇಂವ್ದಿ ಜಿಲ್ಲಿ, ಸವ್ಕಾಸ್ ಯೇಂವ್ದಿ. ಚೆರ್ಕ್ಯಾಕ್ ಪಾಸ್ ಜಾಲಾ ಮ್ಹಣ್ ಕಿತ್ಲೊ ಆನಂದ್ ಜಾಲಾ ಕೊಣ್ಣಾ! ಸದಾಂ ಕಾಂಯ್ ವೇಳ್ ಕರ್ನ್ ಯೆತಾವೆ?"
ಮೆಲ್ವಿನ್ ಹಳೂ ಘರ್ಚಿಂ ಮೆಟಾಂ ಚಡೊನ್ ಸೊಪ್ಯಾರ್ ಪಾವ್ತಾನಾ ವಿತೊರಾಬಾನ್ ಪಳೆಲೆಂ. "ಏ, ಮೆಲ್ವಿನ್ ಆಯ್ಲೊ.....ತುಂ ಪಾಸ್ ಜಾಲ್ಲಿ ಖಬಾರ್ ಆಯ್ಕಾಲಿ ಆನಿಂ ಮ್ಹಾಕಾ ವೊರ್ತೊ ಸಂತೊಸ್ ಜಾಲೊ" ಸಂತೊಸಾನ್ ತಾಚೆಂ ತೊಂಡ್ ಪರ್ಜಳ್ತಾಲೆ, "ಪುತಾ, ಆತಾಂ ಜಾಲ್ಯಾರ್ ಮ್ಹಜ್ಯಾ ಮಸ್ತಕಾ ವಯ್ಲೆಂ ಭರಾಧಿಕ್ ವೊಜೆಂ ದೆಂವ್ಲ್ಲ್ಯಾಬರಿ ಜಾಲೆಂ. ಖಂಯ್ ಪುಣಿ ಕಾಮಾಕ್ ಲಾಗ್ಶಿ ಜಾಲ್ಯಾರ್......ದೆವಾ ಹೆ ಕಷ್ಟ್ ಸೊಸೊನ್ ಸೊಸೊನ್ ಮ್ಹಜಿ ತಕ್ಲಿ ಕುಂಬು ಜಾಲಿಗೆ ಆವಯ್!"
ಬಾಪಯ್ ಉಲೈತಾನಾ ಮೆಲ್ವಿನಾಚೆಂ ತೊಂಡ್ ಬಾವ್ಲೆಂ.....ಆಪ್ಣಾಕ್ ಕೊಲೆಜಿಚೆಂ ಶಿಕಾಪ್ ಶಿಕ್ಚೆಂ ಭಾಗ್ ನಿರ್ಮಿಲ್ಲೆಂ ನಾ ಮ್ಹಣ್ ಚಿಂತಾನಾ, ತಾಚೆ ಕಾಳಿಜ್ ದುಃಖಾನ್ ರಡ್ಲೆಂ. ಕಾಳ್ಜಾಂತ್ಲಿಂ ಬೊಗ್ಣಾಂ ತೊಂಡಾರ್ ನಿಶೆತಾನಾ, ವಿತೊರಾಬಾಚ್ಯಾ ದೊಳ್ಯಾಂಕ್ ತಿಂ ಕಳನಾಸ್ತಾಂ ಗೆಲಿನಾಂತ್.
"ಆರೇ ಮೆಲ್ವಿನ್, ತುಕಾ ಜಾಲಾಂ ಕಿತೆಂ ಕಾಂಯ್ ಹುಶಾರ್ ನಾಂಯ್ವೇ ಪುತಾ?" ತಾಣೆಂ ಪುತಾಚ್ಯಾ ತೊಂಡಾಕ್ ನದರ್ ಜೊಕ್ಲಿ.
"ನಾ ಬಾಬಾ, ಹಾಂವ್ ಬರೊ ಆಸಾಂ..." ಉತ್ರಾಂ ಗೀಳ್ನ್ ತಾಣೆಂ ಜಾಪ್ ದಿಲಿ, "ಪುಣ್..."
"ಪುಣ್ ಕಿತೆಂ...?"
"ಹಾಂವ್ ಇತ್ಲ್ಯಾ ವೆಗಿಂ ಕಾಮಾಕ್ ವೆಚೊನಾ ಬಾಬಾ" ಅಪ್ರಾಧ್ಯಾಬರಿ ತಕ್ಲಿ ಭಾಗಾಯ್ಲಿ ಮೆಲ್ವಿನಾನ್.
"ಹುಂ? ಕಾಮಾಕ್ ವೊಚಾನಾಂಯ್!?" ವಿತೊರಾಬಾಚೆಂ ತೊಂಡ್ ತಾಂಬ್ಡೆ ಜಾಲ್ಲೆಂ, "ಆನಿಂ ಮೆಟ್ರಿಕ್ ಕಿತ್ಯಾಕ್ ಶಿಕ್ಲಾಯ್, ಘರಾ ಬಸೊಂಕ್ಗಿ? ತುಜ್ಯಾ ತಕ್ಲೆಂತ್ ಕಿತೆಂ ರಿಗ್ಲಾಂ, ಮ್ಹಾಕಾ ಸಮ್ಜಾನಾ" ಖರ್ಕಸ್ ತಾಳ್ಯಾನ್ ತೊ ಮ್ಹಣಾಲೊ.
"ಬಾಬಾ..." ಬಿಂವ್ಕುರ್ಯಾ ತಾಳ್ಯಾನ್ ಮ್ಹಣಾಲೊ ಮೆಲ್ವಿನ್, "ಹಾಂವೆಂ ಕೊಲೆಜಿಕ್ ವೆಚಿ ಆಲೋಚನ್ ಕೆಲ್ಯಾ."
ವಿತೊರಾಬಾಚೆಂ ತೊಂಡ್ ಆಜಾಪ್ಲೆಲ್ಯಾಬರಿ ದಿಸ್ಲೆಂ. ಜಿಲ್ಲಿಬಾಯ್ ಸಗ್ಳಿಚ್ ಶೆರ್ಮೆಲ್ಲಿ.
"ತುಜ್ಯಾ ಕೊಲೆಜಿಕ್ ಕೊಲೊ ವ್ಹರ್ನ್ ವೊಜೊಂದಿ," ಗರ್ಜಾಲೊ ವಿತೊರಾಬ್. "ನಹಿಂ ಚೆಡ್ಯಾಚೊ ಹಂಕರ್ ಪಳೆ! ಆಮ್ಚಿ ಸ್ಥಿತಿ ಖಂಯ್? ನೈಂರೆ ಮೆಲ್ವಿ, ತಿ ಕೊಲೆಜ್ ಆಮ್ಚೆಂ ತಸಲ್ಯಾ ಬಿಕಾರ್ಯಾಂಕ್ವೆರೆ? ತುಂ ಚಿಂತಾಯ್ ಕಿತೆಂ?"
"ಬಾಬಾ....ಹಾಂವೆಂ ಕೊಲೆಜ್ ಶಿಕಾಜಾಯ್ ಮ್ಹಣ್ ಆಶಾ ದವರ್ಲ್ಯಾ ಬಾಬಾ....ಹಿ ಆಶಾ ತುಂ ನಿರಾಶಾ ಕರಿನಾಕಾ..." ಮೆಲ್ವಿನಾಚೊ ತಾಳೊ ರಡ್ಕುರೊ ಜಾಲ್ಲೊ.
"ಮೆಲ್ವಿನ್..." ಏಕ್ಚ್ ಸಬ್ದ್ ವಿತೊರಾಬಾಚ್ಯಾ ತೊಂಡಾಂತ್ಲ್ಯಾನ್ ಭಾಯ್ರ್ ಪಡ್ಲೊ. ಸಬಾರ್ ತೆಂಪಾಚ್ಯಾ ವಾವ್ರಾನ್ ಆನಿಂ ಕಷ್ಟಾಂಚ್ಯಾ ಭಾರಾಧಿಕ್ ವೊಜ್ಯಾನ್ ಧಣ್ಸಾಲ್ಯಾ ತಾಚ್ಯಾ ಕುಡಿರ್ ಹಾಡಾಂ ಆನಿಂ ಕಾತ್ ಮಾತ್ರ್ ಆಸ್ಲ್ಲಿ. ತ್ಯಾ ತರ್ನಾಟ್ಪಣಾರ್ಚ್ ತೊಂಡಾರ್ ತಾಚ್ಯಾ ಮಿರಿಯೊ ಪಡ್ಲ್ಲ್ಯೊ. ತೆ ಪ್ರಕಾಸ್ ನಾತ್ಲ್ಲೆ ದೊಳೆ ಬಿರ್ಮೊತೆಚಿ ದೀಷ್ಟ್ ಫಾಂಕ್ತಾಲೆ.....ಪಳೆತೆಲ್ಯಾ ಮೆಲ್ವಿನಾಚೆಂ ಕಾಳಿಜ್ ಕಸ್ಸ್ ಜಾಲೆಂ.
"ಪುತಾ, ಆಮ್ಚಿಂ ಸ್ಥಿತಿ ತುಂ ಜಾಣಾಂಯ್. ಆಮಿಂ ಜಿಯೆಂವ್ಚೆಂ ಹ್ಯಾ ಭಾಡ್ಯಾಚ್ಯಾ ಬಿಡಾರಾಂತ್. ಸಂಸಾರಾಂತ್ ಆಮ್ಕಾಂ ದೆವಾ ಶಿವಾಯ್ ದುಸ್ರೊ ಆಧಾರ್ ನಾ. ತುಜ್ಯಾ ಮೆಟ್ರಿಕಾಚ್ಯಾ ಶಿಕ್ಪಾಕ್ ಹಾಂವೆಂ ಕಾಡ್ಲ್ಲೆ ಕಷ್ಟ್ ಆನಿಂ ವಾಂವ್ಟ್ ತುಕಾ ಕಳಿತ್ ಆಸ್ಲ್ಲಿ ಗಜಾಲ್. ಆತಾಂ ತುಂ ಕೊಲೆಜಿಕ್ ವೆತಾಂ ಮ್ಹಣ್ತಾಯ್. ತುಜ್ಯಾ ಸಾಂಬಾಳಾಕ್, ಬುಕಾಂಕ್ ಖರ್ಚಾಕ್ ಹಾಂವೆಂ ಖಂಯ್ಚೆಂ ಪಯ್ಶೆ ತಲಾಸ್ ಕರ್ಚೆಂ ಸಾಂಗ್. ಕೊಲೆಜಿಚೆಂ ಶಿಕಾಪ್ ಗ್ರೇಸ್ತಾಂಕ್ ಸೊಡ್ನ್ ಆಮ್ಕಾಂ ದುಬ್ಳ್ಯಾಂಕ್ ಸಾಂಗ್ಲ್ಲೆಂ ನಹಿಂ, ಪಯ್ಶೆ ಕಾಂಯ್ ಕಿರ್ಲಾನಾಂತ್."
ಪಯ್ಶೆ ರುಕಾರ್ ಕಿರ್ಲಾನಾಂತ್ ತೆಂ ಖರೆಂ. ಪುಣ್ ಮೆಲ್ವಿನಾಚ್ಯಾ ಕಾಳ್ಜಾಂತ್ ಬಿ. ಎ. ಶಿಕಾಜಾಯ್ ಮ್ಹಳ್ಳಿ ಆಶಾ ಕಿರ್ಲೊನ್ ರೂಕ್ ಜಾಲ್ಲಿ.
"ಬಾಬಾ..." ಪರಾತ್ತುನ್ ಮ್ಹಣಾಲೊ ಮೆಲ್ವಿನ್, "ಆತಾಂಚ್ಯಾ ಕಾಳಾರ್ ಮೆಟ್ರಿಕ್ ಶಿಕಾಲ್ಯಾಂಕ್ ಖಂಯ್ ಕಾಮಾಂ ಮೆಳಾತ್? ಮೆಳ್ಳ್ಯಾರಿ ತ್ಯಾ ಉಣ್ಯಾ ಸಾಂಬಾಳಾಂತ್ ಆಮ್ಚ್ಯಾ ಘರಾಕ್ ಕಿತ್ಲೊ ಆಧಾರ್ ಜಾಯ್ತ್? ಕಷ್ಟ್ ತೆ ಕಷ್ಟ್ಚ್, ಆನ್ಯೇಕ್ ಚಾರ್ ವರ್ಸಾಂ ಕಷ್ಟ್ ಸೊಸ್ಲ್ಯಾ ಉಪ್ರಾಂತ್......."
"ಕಿತೆಂ, ಚಾರ್ ವರ್ಸಾಂ?" ಮಧೆಂಚ್ ಹಾಂಕ್ರೆಲಿ ಜಿಲ್ಲಿಬಾಯ್ "ಕಿತೆಂ, ಕೊಲೆಜಿಚೆಂ ಶಿಕಾಪ್ ಚಾರ್ ವರ್ಸಾಂ! ತ್ಯಾ ಮ್ಹಣಾಸರ್ ಕಿತೆಂ ವಾಟ್? ಲೆನ್ಸಿ ಆತಾಂ ಧಾಕ್ಟೊ ಮ್ಹಣ್ಯಾ. ಪುಣ್ ಚಾರ್ ವರ್ಸಾಂ ಖೆಳಾಚಿ ಗಜಾಲ್ ನಹಿಂ....."
"ಮಾಂಯ್, ತುಂ ಬಾಬಾಕ್ ಪುಣಿ ಚಿಕ್ಕೆ ಸಾಂಗಾನಾಂಯ್?" ಮೆಲ್ವಿನ್ ಅನ್ಯೇಕ್ ಮಂತ್ರಾಂ ಘಾಲುಂಕ್ ಲಾಗ್ಲೊ.
"ಪುತಾ ಮೆಲ್ವಿನ್....." ವಿತೊರಾಬ್ ಸವ್ಕಾಸ್ ಉಲೈಲೊ. ತಾಚೊ ಛಾರೊ ಆತಾಂ ಚಿಕ್ಕೆ ಬದಲ್ಲೊಲೊ. "ತುಜಿ ಆಶಾ ಮ್ಹಾಕಾ ಸಮ್ಜಾತಾ ಪುತಾ. ಪುಣ್ ಮಾಂದ್ರೆ ತೆಕಿತ್ ಪಾಯ್ ಸೊಡಿಜಾಯ್ ಮ್ಹಳ್ಳೆಂ ವಿಸಾರ್ನಾಯೆ ಆಮಿಂ. ಮತಿಂತ್ ರಾವ್ಳೆರಾಂ ಬಾಂದುನ್ ಝಗಡ್ಲ್ಯಾರ್ ಬರೆಂ ನಹಿಂ....." ಥೊಡ್ಯಾ ವೆಳಾನ್ ತಾಣೆಂಚ್ ಮುಖಾರ್ಸಿಲೆಂ, "ಕೊಲಿಜಿಚೆಂ ಶಿಕಾಪ್ ಉಣ್ಯಾ ಖರ್ಚಾರ್ ಜಾಯ್ನಾ ಸಾಂಬಾಳಾಕ್, ಬುಕಾಂಕ್ ಮ್ಹಣ್ತಾನಾ ವರ್ಸಾಕ್ ಪಾಂಯ್ಶಿಂ ರುಪಿಯಾಂಚಿ ಗಾಂಟ್ ದವರ್ಲ್ಲಿ ಜಾಯ್ಜಾಯ್....ವಯ್ಲ್ಯಾನ್ ಚಾರ್ ವರ್ಸಾಂ......ತ್ಯಾ ಮ್ಹಣಾಸಾರ್ ಸಾಧಾರ್ಣಾಚೆಂ ಕಾಮ್ ಪಳೆವ್ನ್, ಆಮ್ಕಾಂ ನಾಕಾ, ತರೀ ತುಜಿಚ್ ಪೋಡ್ ಜರ್ತರ್ ಜೊಡ್ಶಿ...ಆಮ್ಕಾಂ ಕಿತ್ಲೊ ಆಧಾರ್ ಜಾತೊಲೊ...!"
ತಾಣೆಂ ಸಾಂಗ್ಲ್ಲೆಂ ನಹಿಂ ಮ್ಹಣ್ಚೆಂ ಧೈರ್ ಮೆಲ್ವಿನಾಕ್ ಆಯ್ಲೆಂನಾ. ಆಪ್ಲಿ ಆಶಾ ಸುಫಳ್ ಜಾಂವ್ಚೊ ಭರ್ವಸೊ ದಿಸಾನಾತ್ಲ್ಲ್ಯಾ ಖಂತಿಷ್ಟ್ ಜಾಲೊ.
"ವ್ಹಯ್, ಶಿಕಯೆತ್ ಆಸ್ಲ್ಲೆಂಮೂ!" ಲಾಂಬ್ ಸುಸ್ಕಾರ್ ಸೊಡ್ನ್ ಉಲೈಲಿ ಜಿಲ್ಲಿಬಾಯ್, "ತಿಕ್ಯಾಕ್, ಮ್ಹಜಿ ಏಕ್ ಭಯ್ಣ್ ಆನಿಂ ತಿಚೊ ಘರ್ಕಾರ್ ಬೊಂಬೈಂತ್ ಆಸಾತ್. ಹಜಾರಾಂ ಗಟ್ಲ್ಯಾನ್ ಜೊಡ್ತಾತ್, ಪುಣ್ ಖಾಂವ್ಕ್ ಏಕ್ ಭುರ್ಗೆಂ ನಾ. ಜಾಲ್ಯಾರೀ, ಆಮ್ಕಾಂ ದುಬ್ಳ್ಯಾಂಕ್ ಕೋಣ್ ಲೆಕ್ತಾ? ಆನಿಂ ಹಾಂಗಾ ಕೊಡಿಯಾಳಾಂತ್ಚ್ ಆಸ್ಚೊ ತುಜೊ ಬಾಪ್ಲ್ಯೊಯಿ ಕಾಂಯ್ ಸುಮಾರಾಚೊ ನಹಿಂ. ಪುಣ್ ಭುರ್ಗಿಂ - ಬಾಳಾಂ ಆಸ್ಲ್ಲೊ ಗ್ರಾಯ್ಕ್ ಮ್ಹಣ್ಯಾಂ. ಜಾಲ್ಯಾರಿ ಮನ್ ಆಸ್ಲ್ಲ್ಯಾಕಡೆ ಧನ್ ದೀಂವ್ಕ್ ಕಾಂಯ್ ಹರ್ಕತ್ನಾಂಮೂ! ಒಟ್ಟಾರೆ ನಶಿಬ್ ಆಮ್ಚೆಂ. ಕೊಣಾಕಿಂ ದುರ್ಸೊನ್ ಫಾಯ್ದೊ ನಾ"
ನಿರಾಶೆಚ್ಯಾ ಸಾಗರಾಂತ್ ಆಶೆಚಿ ಲ್ಹಾನ್ ಕಾಡಿ ಮೆಳ್ಲ್ಲ್ಯಾಬರಿ ಜಾಲೆಂ ಮೆಲ್ವಿನಾಕ್. "ಮಾಂಯ್" ಉದ್ವೇಗಾನ್ ತಾಣೆಂ ಬೋಬ್ ಮಾರ್ಲಿ. "ಬೊಂಬಯ್ ಆಸ್ಲ್ಲ್ಯಾ ಆಂಟಿಕ್ ಏಕ್ ಕಾಗಾದ್ ಬರೊವ್ನ್ ಕಾಂಯ್ ಪುಣಿ ಕುಮಕ್..."
"ಆನಿಂ ಮೀಟ್ ಆನಿಂ ಖೊಲೊ ಘೆವ್ನ್ ರಾಕ್, ಧಾಡ್ತೆಲಿ..." ಕೆಂವ್ಚಾಲೊ ವಿತೊರಾಬ್. "ಆಮಿಂ ಕೆದ್ನಾಂಯ್ ಏಕ್ ಘಡಿ ಆಮ್ಚಿಂ ತಾನ್ ಭುಕ್ ಪಳೆಲ್ಲಿಂ ಮನ್ಶಾಂ ಜಾಲ್ಯಾರ್ ನಹಿಂವೆ, ಹ್ಯಾ ವೆಳಾರ್ ಕುಮ್ಕೆಕ್ ಯೆಂವ್ಚಿಂ? ಕುಟಾಮ್ ಮ್ಹಳ್ಯಾರ್ ಖಂಯ್ ವಿಸಾರ್ಲ್ಯಾಂತ್ಗಿ!"
"ತರಿಕ್ಯಿ ಪ್ರಯತ್ನ್ ಕರ್ನ್ ಪಳೆಯಾಂ ಬಾಬಾ.." ಮೆಲ್ವಿನಾನ್ ಆಶಾ ಸಾಂಡ್ಲಿನಾಂ. "ಮ್ಹಜ್ಯಾ ನಶಿಬಾಂತ್ ಆಸಾ ಜಾಲ್ಯಾರ್ ಕುಮಕ್ ಯೆತೆಲಿ...."
"ತ್ಯಾ ಮ್ಹಣಾಸರ್ ಕಿತೆಂ ವಾಟ್ ಮೆಲ್ವಿನಾ?" ನಿರಾಶೆನ್ ಬಾಪುಯ್ ಮ್ಹಣಾಲೊ. "ತುಕಾ ತ್ಯಾ ಕೊಲೆಜಿಚಿ ಪಿಶಿ ಆಲೋಚನ್ ತಕ್ಲಿ ಕಾಂತೈತಾ. ಫಾಲ್ಯಾಂ - ಪೊರ್ವಾಂ ಕ್ಲಾಸ್ ಸುರು ಜಾತಾನಾ ಸಾಂಬಾಳ್ ಬಾಂದುಂಕ್ ಖಂಯ್ಚೆಂ ಪಯ್ಶೆ ಹಾಡ್ಚೆ?"
ಮೆಲ್ವಿನಾನ್ ತಕ್ಲಿ ಖೊರ್ಪುನ್ ಸಬಾರ್ ಆಲೊಚಾನ್ಯೊ ಕೆಲ್ಯೊ. ನಿಮಾಣೆಂ ಏಕ್ ಉಪಾಯ್ ತಾಕಾ ಝಳ್ಕಾಲೊ. "ಬಾಬಾ, ಏಕ್ ಸಂಗತ್ ಜಾಣಾಂಯ್ವೆ? ಶಿಕಾಪ್ ಶಿಕ್ಚ್ಯಾ ವಿದ್ಯಾರ್ಥಿಂಕ್ ದುಡ್ವಾ ಕುಮಕ್ ದೀಂವ್ಕ್ ಏಕ್ ಕ್ರೆಡಿಟ್ ಸೊಸಾಯ್ಟಿ ಆಸಾ. ಥಂಯ್ಸರ್ ಕಾಂಯ್ ಪ್ರಯತ್ನ್ ಕೆಲ್ಯಾರ್ ಮ್ಹಜ್ಯಾ ಶಿಕ್ಪಾಕ್ ರೀಣ್ ಮೆಳ್ಚೆಂನಾಗಿ?"
"ತೆಂ ಹಾಂವೀ ಜಾಣಾಂ..." ಸವ್ಕಾಸ್ ಉಲೈಲೊ ವಿತೊರಾಬ್, "ತುವೆಂ ಸಾಂಗ್ಚ್ಯಾ ತಿತ್ಲೆಂ ಸುಲಾಭಾಯೆಚೆಂ ಕಾಮ್ ನಹಿಂ ತೆಂ ರೀಣ್ ದಿತಾತ್ ತೆಂ ಖರೆಂ. ಪುಣ್ ರಿಣಾಕ್ ಆಧಾರ್ ಜಾವ್ನ್ ಜಾಮೀನ್ ದೀಂವ್ಕ್ ಜಾಯ್. ಆಮ್ಕಾಂ ಖಂಯ್ಚಿ ಆಸ್ತ್ ಆಸಾ? ಹೆರಾಂಚಿ ಆಸ್ತ್ ದಿಂವ್ಚಿ ಜಾಲ್ಯಾರ್ ಆಮ್ಕಾಂ ಆಸಲ್ಯಾ ಕಾಮಾಕ್ ಪಾತ್ಯೆತಾ ಕೋಣ್? ಆಮ್ಚ್ಯಾ ಘರ್ಚೊ ಧನಿಗಿ? ಆಸಲ್ಯಾ ಕಾಮಾಕ್ ಹಜಾರ್ ಕೋಲ್ ಪಾಟಿಂ ಧಾಂವಾತ್ ತೊ!?"
"ಖಂಯ್ ಪುಣಿ ಪ್ರಯತ್ನ್ ಕರ್ನ್ ಪಳೆನಾಂಯ್......ತುಜ್ಯಾ ಇಷ್ಟಾಂ ಪಯ್ಕಿ ತುಕಾ ಪಾತ್ಯೆಂವ್ಚೆಂ ಕೊಣೀ ಆಸ್ಲ್ಯಾರ್ ಧರಿನಾಂಯ್.." ಜಿಲ್ಲಿಬಾಯ್ ಪರಾತ್ತಿಲಾಗ್ಲಿ. ನಿಮಾಣೆಂ, ಪುತಾನ್ ಶಿಕೊನ್ ಬಿ.ಎ. ಕರಿಜಾಯ್ ಆನಿಂ ಶಿಕೊನ್ ವ್ಹಡ್ ಮನಿಸ್ ಜಾಯ್ಜಾಯ್ ಮ್ಹಳ್ಳಿ ಆಶಾ ತ್ಯಾ ಆವಯ್ಚಾ ಕಾಳ್ಜಾಂತ್ಯಿ ಆಸ್ಲ್ಲಿ.
"ಈಷ್ಟ್ ......ಇಷ್ಟಾಂಕ್ ಪಯ್ಲಿ ತಾಮ್ಚಿ ಖಂತ್ ಆನಿಂ ತಾಂಚೆ ಕಷ್ಟ್ ...ಕೊಣಾಚ್ಯಾ ಪೊಟಾಚಿ ತಾನ್-ಭುಕ್ ಕೊಣ್ ಪಳೆತಾ ಜಿಲ್ಲಿ...?" ಪಾಕ್ಯಾಕ್ ದೀಷ್ಟ್ ಲಾಯ್ಲಿ ವಿತೊರಾಬಾನ್, "
ತರೀ, ಪಾತ್ಯೆಣೆಚೊ ಆಸ್ಚೊ ಎಕ್ಲೊ ರ್ಂಗಣ್ಣಾ. ಖಂಯ್ಚಾಕಿ ಫಾಲ್ಯಾಂ ಸಕಾಳಿಂ ತಾಚೆ ಪಾಯ್ ಧರ್ಚೆ ಪಡ್ಲೆ. ತುಕಾ ಕೊಲೆಜ್ ಶಿಕೊಂಕ್ ನಿರ್ಮಿಲಾಂ ತರ್ ಕಾಮ್ ಸುಫಳ್ ಜಾತೆಲೆಂ"
ಮೆಲ್ವಿನಾಕ್ ಬಾಪಾಯ್ಚಿಂ ಉತ್ರಾಂ ಆಯ್ಕೊನ್ ವರ್ತೊ ಸಂತೊಸ್ ಬೊಗ್ಲೊ. ಆಪ್ಣಾಚ್ಯಾ ಮಾಗ್ಣ್ಯಾಕ್ ಆವಯ್-ಬಾಪುಯ್ ನಿಮಾಣೆ ತರೀ ಕಬೂಲ್ ಜಾಲ್ಯಾಂತ್. ಆನಿಂ ಆಪ್ಲೊ ಬಾಪುಯ್ ಹಾತಿಂ ಧರ್ಲ್ಲೆಂ ಕಾಮ್ ಪೊಂತಾಕ್ ಪಾವೈನಾಸ್ತಾಂ ಬಿಲ್ಕುಲ್ ರಾಂವ್ಚೊ ನಾ ಮ್ಹಣ್ ತಾಕಾ ದ್ರಡ್ ಪಾತ್ಯೆಣಿ ಆಸ್ಲ್ಲಿ.
ಇತ್ಲ್ಯಾರ್ ತಾಂಚೆಂ ಉಲೊವ್ಣೆಂ ಸಂಪ್ಲೆಂ. ತೇರ್ಸ್ - ಜೆವಾಣ್ ಜಾತೆಚ್ಚ್ ಮೆಲ್ವಿನ್ ಆಪ್ಲ್ಯಾ ಹಾಂತುಳ್ಣಾರ್ ಪಡ್ಲೊ. ’ಬಾಬಾಚೆಂ ಕಾಮ್ ಫಳಾಭರಿತ್ ಜಾಂವ್ದಿ ದೆವಾ, ಮ್ಹಾಕಾ ಕೊಲೆಜಿಚಿಂ ಮೆಟಾಂ ಚಡೊಂಕ್ ಫಾವೊ ಕರ್....’ ನಿದ್ತಾನಾ ಇತ್ಲೆಂಚ್ ತಾಚೆಂ ಮಾಗ್ಣೆಂ ಜಾವ್ನಾಸ್ಲ್ಲೆಂ. ತ್ಯಾ ರಾತಿಂ ನಿದೆಂತ್ ಕೊಲೆಜಿಚಿಂ ಸುಂದರ್ ಸ್ವಪ್ಣಾಂ ತೊ ಸ್ವಪ್ಣೆಲೊ.
ಪುಣ್ ವಿತೊರಾಬಾನ್ ಚಿಂತ್ಲ್ಲೆಂ ಆನಿಂ ಮೆಲ್ವಿನಾನ್ ಆಶೆಲ್ಲೆಂ ಕಾಮ್ ವೆಗಿಂಚ್ಯಾಕ್ ಜಾಲೆಂನಾ. ಕ್ರಿಸ್ತಾಂವಾಂ ಥಾವ್ನ್ ಮೆಳೊಂಕ್ ನಾತ್ಲ್ಲೊ ಉಪ್ಕಾರ್ ಅನ್ಭಾವಾಡ್ಯಾಲಾಗಿಂ ಸೊಧುನ್ ಗೆಲ್ಲೊ ವಿತೊರಾಬ್. ಪುಣ್ ರಂಗಣ್ಣಾಂಚ್ ತಾಕಾ ಮೆಳ್ಳೊನಾ. ತೊ ಉಡ್ಪಾ ವಚೊನ್ ಥೊಡೆ ದೀಸ್ ಜಾಲೆ ಮ್ಹಣ್ ಘರ್ಚ್ಯಾಂನಿ ಸಾಂಗ್ಲೆಂ.
ವಿತೊರಾಬಾಕ್ ಕಳ್ವಳೆ ಆನಿಂ ಮೆಲ್ವಿನಾಕ್ ನಿರಾಶಾ. ಹೆಣೆಂ ಬೊಂಬಯ್ ಮಾವ್ಶೆಕ್ ಕಾಗಾದ್ ಘಾಲ್ನ್ ದೀಸ್ ಆಟ್ ಉತರ್ಲ್ಯಾರಿ, ಪಾಟಿಂ ಜಾಪ್ ಆಯ್ಯ್ಲಿನಾ. ನಿಮಾಣೆಂಯಿ ವಿತೊರಾಬಾನ್ ಉಚಾರ್ಲ್ಲೆಂ ಭವಿಷ್ಯ್ ನೀಜ್ ಜಾಂವ್ಕ್ ಆಸ್ಲ್ಲೆಂಗಿ...! ಕೊಲೆಜ್ ಪ್ರಾರಂಭ್ ಜಾಂವ್ಕ್ ಆತಾಂ ದೀಸ್ ಸಾತ್ ಉರ್ಲ್ಲೆ.
ತ್ಯಾ ಸಾಂಜೆರ್ ಮೆಲ್ವಿನಾಚ್ಯಾ ಮತಿಂತ್ ವಿಕಾಳ್ ಆನಿಂ ನಿರಾಶಿ ಚಿಂತ್ನಾಂ ಘುಂವ್ತಾಲಿಂ. ದಯಾ ಆನಿಂ ಮಯ್ಪಾಸ್ - ಹ್ಯಾ ಮೂಳ್ ತತ್ವಾಂಚೆರ್ ಮಾಂಡುನ್ ಹಾಡ್ಲ್ಲ್ಯಾ ಕ್ರಿಸ್ತಾಂವ್ ಸಮಾಜೆಂತ್ ಕಾರ್ಯಾನ್ ದಯಾ ದಾಕೈತೆಲೆ. ದಾನ್ - ಧರ್ಮಾಚೆರ್ ವ್ಹಡ್ - ವ್ಹಡ್ ಭಾಷಣಾಂ ದಿಲ್ಲೆ, ಮಾಗೊಂಕ್ ಘರಾ ಬಾಗ್ಲಾರ್ ಆಯಿಲ್ಲ್ಯಾ ಬಿಕಾರ್ಯಾಂಕ್ ಚಾಕ್ರಾಂ ಕರ್ನಾ ಧಾಂವ್ಡಾಯ್ತಾಲೆ. ತ್ಯಾ ಶಿವಾಯ್, ಮಾರ್ಗಾಯೆಚೊ ಕಾಳ್ ತೊ. ’ಆಪುಣ್ ಆಪ್ಣಾಕ್, ದೇವ್ ಸಮೇಸ್ತಾಂಕ್’ ಮ್ಹಣ್ ಲೋಕ್ ಥಂಡ್ ರಾವ್ತಾಲೆ. ಸಕ್ಡಾಂಕ್ಯಿ ತಾಂಚಿಚ್ ಖಂತ್ ವ್ಹಡ್ ಜಾತಾನಾ, ಪೆಲ್ಯಾಚ್ಯಾ ಘರಾ ರಾಂದ್ನಿರ್ ಕಿತೆಂ ಶಿಜ್ತಾ ಮ್ಹಣ್ ಪಳೆಂವ್ಚಿ ಗರ್ಜ್ ದಿಸಾನಾತ್ಲ್ಲಿ. ಮೆಲ್ವಿನ್ ನಿರಾಶೆಚ್ಯಾ ಸಾಗರಾಂತ್ ಉಪ್ಯೆಲೊ. ಕೊಡ್ಸಾಣೆನ್ ತಾಚೆಂ ಕಾಳಿಜ್ ಫುಗಾರ್ ಜಾಲೆಂ.
ಪುಣ್ ದೆವಾಚಿ ಮಾಂಡಾವಳ್ ದುಸ್ರಿಚ್ ಆಸ್ಲ್ಲಿ. ತ್ಯಾ ಎಕಾ ಸಾಂಜೆರ್ ವಿತೊರಾಬ್ ಘರಾ ಯೆತಾನಾ ಬರಿ ಖಬಾರ್ ಹಾಡ್ನ್ ಆಯ್ಲೊ. ರಂಗಣ್ಣ ಆಪ್ಲಿ ಆಸ್ತ್ ಜಾಮೀನ್ ದೀಂವ್ಕ್ ಒಪ್ವಾಲ್ಲೊ. ಸಕ್ಟಾಂನಿ ಸಮಾಧಾನೆಚೊ ಸುಸ್ಕಾರ್ ಸೊಡ್ಲೊ. ಮೆಲ್ವಿನ್ ತ್ಯಾ ರಾತಿಂ ವಾರ್ಯಾರ್ಚ್ ಉಬ್ಲ್ಲೊ.
ಆಯಿಲ್ಲ್ಯಾ ಕಷ್ಟ್ - ಅನ್ವಾರಾಂಚೆರ್ ಜಯ್ತ್ ವರ್ನ್ ಅಖ್ರೇಕ್ ಮೆಲ್ವಿನ್ ಕೊಲೆಜಿಂತ್ ಇಂಟರಾಕ್ ದಾಖಲ್ ಜಾಲೊ. ಕ್ಲಾಸ್ ಪ್ರಾರಂಭ್ ಜಾಂವ್ಚ್ಯಾ ಆದ್ಲ್ಯಾ ದಿಸಾ ಸಕಾಳಿಂ ವಿತೊರಾಬ್ ಪುತಾಕಡೆ ಮ್ಹಣಾಲೊ -
"ಮೆಲ್ವಿನ್, ಫಾಲ್ಯಾಂ ಥಾವ್ನ್ ತುಂ ಕೊಲೆಜಿಕ್ ವೆತಾಯ್ ಬರೆಂ. ಪುಣ್ ಹಾಕಾ ಲಾಗೊನ್ ತುಜ್ಯಾ ಆವಯ್ನ್ ಆನಿಂ ಹಾಂವೆಂ ಕೆಲ್ಲೊ ಸಾಕ್ರಿಫಿಸ್ ಥೊಡೊ ನಹಿಂ. ಪಳೆ, ಹಾಂವೆಂ ತುಕಾ ಪಯ್ಲೆಂಚ್ ಸಾಂಗ್ಲ್ಲ್ಯಾ ಪ್ರಮಾಣೆ ಕೊಲೆಜಿಂತ್ ಶಿಕ್ಚೆ ಚಡ್ತಾವ್ ಗ್ರೇಸ್ತ್ಚ್. ತಾಂಚೆಬರಿ ತುಕಾ ನ್ಹೆಸೊಂಕ್ ಚಡ್ತಾವ್ ಗ್ರೇಸ್ತ್ಚ್. ತಾಂಚೆಬರಿ ತುಕಾ ನ್ಹೆಸೊಂಕ್ ಕಲ್ಸಾಂವಾಂ ಆನಿಂ ಸೂಟ್, ಭೊಂವೊಂಕ್ ಟೆಕ್ಸ್ಯೊ ಆನಿಂ ಖರ್ಚಾಕ್ ಪಯ್ಶೆ ಇತ್ಯಾದಿ ಮೆಳ್ಚೆನಾಂತ್. ಮ್ಹಜೆಲಾಗಿಂ ತಾಂಕ್ ಆಸ್ಲ್ಲಿ ಜಾಲ್ಯಾರ್ ದಿತೊಂ. ಕೊಲೆಜಿಕ್ ಗೆಲ್ಲ್ಯಾ ಫಳಾಕ್ ಬರೆಂ ಕರ್ನ್ ಶಿಕೊನ್ ಪಾಸ್ ಜಾ ಆನಿಂ ನಾಂವ್ ವೊರ್. ಫೆಯ್ಲ್ ಜಾವ್ನ್, ಫಾಲ್ಯಾಂ ಸಕಾಳಿಂ ’ಪಳೆ, ಗತ್ ನಾತ್ಲ್ಲ್ಯಾಂಕ್ ಹಾಂಕಾಂ ಕೊಲೆಜ್ ಖಂಯ್, ಹಂಕಾರಾನ್ ಧಾಡ್ಲೆಂ ಆನಿಂ ಆತಾಂ ಫಯ್ಲ್ ಜಾಲೊ ಪೂತ್....’ ಮ್ಹಣ್ ಲೊಕಾನ್ ಆಮ್ಕಾಂ ಬೊಟ್ ದಾಕೊವ್ನ್ ಹಾಸನಾಶೆಂ ಪಳೆ"
ತಾಣೆಂ ಸಾಂಗ್ಲ್ಲ್ಯಾಕ್ ಮೆಲ್ವಿನಾನ್ ತಕ್ಲಿ ಹಾಲೈಲಿ. ಆಪ್ಣೆಂ ಬರೆಂ ಕರ್ನ್ ಶಿಕಾಜಾಯ್ ಆನಿಂ ಪಾಸ್ ಜಾಯ್ಜಾಯ್ ಮ್ಹಣ್ ತೊ ಜಾಣಾಸ್ಲ್ಲೊ. ವಿತೊರಾಬ್ ಕಾಮಾಕ್ ಗೆಲ್ಲೊಚ್ ತೊ ನ್ಹೆಸ್ಲೊ ಆನಿಂ ಭಾಯ್ರ್ ಸರ್ಲೊ.
ಆಂಗಾಣ್ ಉತರ್ತಾನಾ ಮನ್ವೆಲ್ ಪ್ರಭುನ್ ತಾಕಾ ಆಪಯ್ಲೊ ತಾಳೊ ಆಯ್ಕಾಲೊ. ತೊ ಘರ್ಚೊ ಧನಿ ಜಾಲ್ಯಾರ್ಯಿ, ಧನಿಯಾಕ್ ಆನಿಂ ವಕ್ಲಾಕ್ ತಿತ್ಲಿ ಸಳಾವಳ್ ನಾತ್ಲ್ಲಿ. ಉಲೊಣೆಂಯಿ ಪಾತಳ್....ತಾ ಪರಿಂ ಎಕಾಮೆಕಾಚ್ಯಾ ಘರಾ ವೆಚೆಂಯಿ ಗರ್ಜೆಕ್ ಮಾತ್ರ್. ಧನಿ ಮ್ಹಣ್ ತಾಂಕಾಂ ಪುಟ್ವಾನಾ....ತಶೆಂ ದುಬ್ಳೊ ಮ್ಹಣ್ ಹಾಂಕಾಂ ಬಾಗ್ವಾನಾ.....ತಶೆಂ ಜಾಲ್ಲ್ಯಾನ್ ಅಪ್ರೂಪ್ ಧನಿಯಾನ್ ನಾಂವ್ ಉಲೊ ಕರ್ತಾನಾ, ಮೆಲ್ವಿನಾಕ್ ಅಜಾಪ್ ಜಾಂವ್ಚೆ ಖರೆಂ. ತಶೆಂ ಘುಂವೊನ್ ತೊ ಪರ್ಕಿಂ ಮೆಟಾಂ ಕಾಡ್ನ್ ಧನಿಯಾಚ್ಯಾ ಘರಾ ಪಾವ್ಲೊ.
"ಯೆ , ಯೆ ಮೆಲ್ವಿನ್.......ಬಸ್...." ಮನ್ವೆಲಾಬಾನ್ ಸ್ವಾಗತ್ ದಿತಾನಾ ಲಜೆನ್ ಮೆಲ್ವಿನ್ ಸೊಪ್ಯಾ ವಯ್ಲ್ಯಾ ಕದೆಲಾರ್ ದೊಡ್ಲೊ. ತಾಚಿ ದೀಷ್ಟ್ ಸಟ್ಟ್ ಕರ್ನ್ ಅನ್ಯೇಕಾ ಪೊಂತಾರ್ ಬಸೊನ್ ಬೂಕ್ ವಾಚ್ತೆಲ್ಯಾ ಸಿಂತಿಚೆರ್ ಪಡ್ಲಿ ಆನಿಂ ಕಾಳಿಜ್ ಧಡ್ಧಡ್ಲೆಂ.
ಸಿಂತಿ ಮನ್ವೆಲ್ ಪ್ರಭುಚೆಂ ಎಕ್ಲೆಂಚ್ ಧುವ್. ಮೆಲ್ವಿನಾಚ್ಯಾಕೀ ಸ ಮಹಿನ್ಯಾಂಕ್ ಲ್ಹಾನ್ ಜಾಯ್ತ್. ತಾಚೆಂಯ್ ಮೆಲ್ವಿನಾ ಸಾಂಗಾತಾಚ್ ಮೆಟ್ರಿಕ್ ಜಾಲ್ಲೆಂ. ಸಿಂತಿ ಶಿಕ್ಪಾಂತ್ ಹುಶಾರ್, ತಶೆಂ ರುಪಾನ್ ಸುಂದರ್. ತಾಚ್ಯಾ ಸೊಭಾಯೆಕ್ ವಾಡ್ಯಾಂತ್ಲೆ ತರ್ನಾಟೆ ಸಕ್ಕಡ್ ಪಿಸ್ವಾಲ್ಲೆ. ಪುಣ್ ಸಿಂತಿ ದುಡ್ವಾಚ್ಯಾ ಹಂಕಾರಾನ್ ಆನಿಂ ಬಾಪಾಯ್ಚ್ಯಾ ಕೊಂಡಾಟ್ಯಾನ್ ವಾಡ್ಲ್ಲೆಂ ಧಯ್ರಾಧಿಕ್ ಚೆಡುಂ. ತೆಂ ಕೊಣಾಕ್ಚ್ ಗುಮಾನ್ ಕರಿನಾತ್ಲ್ಲೆಂ. ತ್ಯಾ ಪರಿಂ, ಚೆಡೆ ಲೆಗುನ್ ತಾಕಾ ತಮಾಶೆ ಕರುಂಕ್ ಬಿಯೆತಾಲೆ.
ಮೆಲ್ವಿನ್ ತಾಂಚ್ಯಾಚ್ ಘರಾಂತ್ ಭಾಡ್ಯಾಕ್ ರಾವ್ತಾಲೊ ತರೀ, ಸಿಂತಿಕ್ ಆನಿಂ ತಾಕಾ ಕಾಂಯ್ಚ್ ಚಂಗಾಯ್ ನಾತ್ಲ್ಲಿ. ಚಲ್ಯಾ ಸಂಯ್ಭಾಚ್ಯಾ ಸ್ವಾಭಾವಿಕ್ ವೊಡ್ನೆನ್ ತಾಣೆಂ ಸಿಂತಿ ಲಾಗಿಂ ಉಲೊಂವ್ಕ್ ಪ್ರಯತ್ನ್ ಕೆಲ್ಲೆಂ ಆಸಾ. ಪುಣ್ ಸಿಂತಿ ’ಮೆಲ್ವಿನ್ ಮ್ಹಳ್ಳೊ ಎಕ್ಲೊ ಆಸಾ ಮ್ಹಣ್ ಜಾಣಾಸ್ಲ್ಲೆಂಗಿ ವ ನಾಂಗಿ! ಆತಾಂ ಮೆಲ್ವಿನ್ ಮೆಟ್ರಿಕ್ ಪಾಸ್ ಜಾಲ್ಲೊ ಭುರ್ಗೊ. ಭುರ್ಗ್ಯಾಪಣಾಚಿ ಮತ್ ಬಸೊನ್, ಆತಾಂ ಬರೆಂ ವಾಯ್ಟ್ ಕಿತೆಂ ಸಮ್ಜಾತಾನಾ ಸಿಂತಿಚೆಂ ರುಪ್ಣೆಂ ತಾಚ್ಯಾ ಕಾಳ್ಜಾಂತ್ ವಿಚಿತ್ರ್ ಭೊಗ್ಣಾಂ ಉಬ್ಜಾಯ್ತಾಲೆಂ. ಸಾಂಗಾತಾಚ್ ಮೆಟ್ರಿಕಾಂತ್ ಪಾವ್ಲ್ಲೆಂ ಸಿಂತಿಯಿ ತರ್ನಾಟ್ಪಣಾಚ್ಯಾ ವರ್ಗಾಕ್ ಪಾಯ್ ದವರ್ತಾನಾ, ತಾಚಿ ಸೊಭಾಯ್ ದೊಡ್ತಿ ಜಾಲ್ಲಿ. ತೆಂ ಸುಂದರ್ ಮುಖ್, ಮುದಿಯಾಳೆ ಲಾಂಬ್ ಕೇಸ್, ಮೊತಿಯಾಂಸಾರ್ಕೆಂ ದಾಂತ್ ಆನಿಂ ಲಿಂಬ್ಯಾ ಸಾರ್ಕೆ ವೋಂಟ್.....ಆನಿಂ ತ್ಯಾ ಕವಿಂನಿ ವರ್ಣಿಲ್ಲಿ ಆನಿಂ ವರ್ಣುಂಕ್ ಬಾಕಿ ಆಸ್ಲ್ಲಿ ಸರ್ವ್ ವಿಶೇಷಣಾಂ ಮೆಲ್ವಿನಾ ತಸಲೆ ತರ್ನಾಟೆ ಸಿಂತಿ ಥಂಯ್ ದೆಕ್ತಾನಾ, ಕಾಳಿಜ್ ತಾಚೆಂ ಉಜ್ಯಾಚೆಂ ಆಗ್ಟೆಂ ಜಾಲ್ಲೆಂ ಜಾಯ್ಜಾಯ್. ತರೀ ಸಿಂತಿ ಹೆಂ ನೆಣಾಂಚ್ ಆಸ್ಲ್ಲೆಂ. ತಶೆಂಚ್ ಆಜ್ ಆಪ್ರೂಪ್ ಆಪ್ಲ್ಯಾ ಘರಾ ಆಯಿಲ್ಲ್ಯಾ ತರ್ನಾಟ್ಯಾಕ್ ತಕ್ಲಿ ಉಕೊಲ್ನ್ಯಿ ತಾಣೆಂ ಪಳೆಲೆಂನಾ.
"ಹೆಂ.....ಖಂಯ್ ಸವಾರಿ ಮೆಲ್ವಿನ್? ಕಿತೆಂ ಖಬಾರ್ ತುಜಿ?" ಮನ್ವೆಲಾಬಾನ್ ವಿಚಾರ್ಲೆಂ. ತಾಚೊ ತಾಳೊ ಎಕ್ದಮ್ ಲ್ಹಾನ್. ಜಶೆಂ ತಾಚ್ಯಾ ವೊಂಟಾರ್ ಆಸ್ಲ್ಲ್ಯಾ ಮಿಶಿಯಾಂಚ್ಯಾ ಜಡಾಯೆನ್ ವೋಂಟ್ ಉಕ್ಲುಂಕ್ ಜಾಯ್ನಾ, ತಸೊ ಆಯ್ಕಾತಾಲೊ ತಾಚೊ ತಾಳೊ.
"ಖಂಯ್ ನಾ ಅಂಕಲ್, ಘರಾ ಬಸೊನ್ ಉಬ್ಗೊಣ್ ಯೆತಾ ಮ್ಹಣ್ ಆಶೆಂಚ್ ಭಾಯ್ರ್ ಸರ್ಲೊಂ" ಮ್ಹಣಾಲೊ ಮೆಲ್ವಿನ್.
"ಹಾಂ........ತುಂ ಪಾಸ್ ನಹಿಂವೇ ಮೆಟ್ರಿಕಾಂತ್? ಕಾಂಯ್ ಶೊರ್ಟೆಂಡ್ ಟಾಯ್ಪಿಂಗ್ ಕರ್ಚಿ ಆಲೋಚನ್ ನಾಂವೇ?" ವಿಚಾರಿಲಾಗ್ಲೊ ಧನಿ.
"ಶೊರ್ಟೆಂಡ್ ಟಾಯ್ಪಿಂಗ್ ಕರಿನಾ ಅಂಕಲ್..." ಮೆಲ್ವಿನ್ ಮ್ಹಣಾಲೊ "ಹಾಂವ್ ಕೊಲೆಜಿಕ್ ವೆತಾಂ.."
"ಕಿತೆಂ ಕೊಲೆಜ್...?!" ಹಾಂಕ್ರೆವ್ನ್ ಕದೆಲಾ ವಯ್ರ್ ಹುಳ್ವುಳ್ಳೊ ಮಾನ್ವೆಲಾಬ್. ತ್ಯಾಚ್ ಘಡಿಯೆ ಸಿಂತಿನ್ಯಿ ವಾಚ್ಚೊ ಬೂಕ್ ಸಕ್ಲಾ ಕೆಲೊ. ಮೆಲ್ವಿನಾಚೆ ದೀಷ್ಟ್ ತಾಚ್ಯಾ ದೊಳ್ಯಾಂಕ್ ಮೆಳ್ತಾನಾ ಸಿಂತಿಚ್ಯಾ ದೊಳ್ಯಾಂನಿ ತಿರಾಸ್ಕಾರ್ ಆಸ್ಲ್ಲೊ.
"ಮೆಲ್ವಿನಾ....ಕಿತೆಂ ನವಾಲಾಂ ಉಲೈತಾಯ್ರೆ?" ಆಕ್ಲಾಸ್ಲೊ ಧನಿ.
"ನವಾಲಾಂ ಕಾಂಯ್ ನಹಿಂ ಆಂಕಲ್," ಗಂಭೀರಾಯೆನ್ ಮೆಲ್ವಿನ್ ಉಲೈಲೊ, "ಹಾಂವೆಂ ಕೊಲೆಜಿಕ್ ಎಪ್ಲಿಕೇಶನ್ ಕೆಲ್ಲೆಂ, ಸಿಟ್ ಮೆಳ್ಳ್ಯಾ ಆನಿಂ ಫಾಲ್ಯಾಂ ಕ್ಲಾಸ್ ಸುರು..."
"ತುಕಾ ಕಿತ್ಯಾಕ್ರೆ ಮೆಲ್ವಿನ್ ಹಿ ಕೊಲೆಜ್....?" ತಾಚೆಂ ತೊಂಡ್ ಸಗ್ಳ್ಯಾ ಸಂಸಾರಾಚಿ ಖಂತ್ ಬೆಜಾರಾಯ್ ಆಪ್ಣೆಂಚ್ ವ್ಹಾವೊವ್ನ್ ಘೆತ್ಲ್ಲ್ಯಾಬರಿ ದಿಸ್ತಾಲೆಂ. ಆಳೆ, ಹಾಂವ್ ಸಾಂಗ್ತಾಂ - ಹಿ ಕೊಲೆಜ್ ಪಳೆ, ತುಮ್ಚೆಂ ತಸಲ್ಯಾ ದುಬ್ಳ್ಯಾಂಕ್ ನಹಿಂ. ಇಂಟರ್ ಬಿ.ಎ., ಶಿಕ್ಚೆಂ ಆಮ್ಚೆಂ ತಸಲ್ಯಾ ಗ್ರೇಸ್ತಾಂನಿ. ತುಮ್ಕಾಂ ಜೇಂವ್ಕ್ - ಖಾಂವ್ಕ್ ಸಮಾ ನಾತ್ಲ್ಲ್ಯಾಂಕ್ ಹೆಂ ಕಿತ್ಯಾಕ್ ? ಉಂದ್ರಾಕ್ ಲೊಂಕ್ಡಾಚೊ ವಾವ್ರ್ ಮ್ಹಳ್ಳ್ಯಾಬರಿ...."
ಮೆಲ್ವಿನಾಚಿ ತಕ್ಲಿ ತಾಪ್ಲಿ, ತರೀ ತಾಣೆಂ ತೊಂಡ್ ಉಗ್ತೆಂ ಕೆಲೆಂನಾ.
"ಆಳೆ ಮೆಲ್ವಿನ್, ಹಾಂವ್ ಆಶೆಂ ಉಲೈತಾಂ ಮ್ಹಣ್ ತುಂ ಕಾಂಯ್ ರಾಗ್ ಕರಿನಾಕಾ. ಹಾಂ ಹಾಂವೆಂ ಸಾಂಗ್ಚೆಂ ತುಮ್ಚ್ಯಾಚ್ ಬರ್ಯಾಕ್. ತುಜೊ ಬಾಪುಯ್ ಪಳೆ ಎಕ್ಲೊ ಜೊಡ್ತಾ. ತಾಚ್ಯಾ ಉಣ್ಯಾ ಜೊಡಿನ್ ತುಮ್ಚೆಂ ಇತ್ಲ್ಯಾ ಜಣಾಚೆಂ ಜೀವನ್ ವೊಚಾಜಾಯ್. ತುಂ ಶೊರ್ಟ್ಹೆಂಡ್ ಟಾಯ್ಪಿಂಗ್ ಶಿಕೊನ್, ಕಾಮಾಕ್ ರಿಗ್ಲೊಯ್ ತರ್ ತುಮ್ಚ್ಯಾ ಕುಟ್ಮಾಕ್ ಆಧಾರ್ ಜಾಯ್ನಾಂಗಿ ವ್ಹಯ್ ವ್ ನಹಿಂ ತುಂಚ್ ಸಾಂಗ್..."
"ತುವೆಂ ಸಾಂಗ್ಚೆಂ ಎಕಾ ಲೆಕಾನ್ ಸಮಾ ಅಂಕಲ್" ಚಿಕ್ಕೆ ಬೆಜಾರಾಯೆನ್ ಉಲೈಲೊ ಮೆಲ್ವಿನ್, "ಪುಣ್ ದುಸ್ರ್ಯಾ ವಾಟೆನ್ ಆಮಿಂ ಆಶೆಂ ಚಿಂತ್ಯೆತಾ: ಆತಾಂ ಪಳೆ, ಕಾರ್ಖಾನ್ಯಾಕ್ ಕಾಮಾಕ್ ವೆಚಿಂ ತಿಂ ದುಬ್ಳಿಂ ಮನ್ಶಾಂ. ತಿಂ ತಾಂಕಾಂ ಜಲ್ಮಲ್ಲ್ಯಾ ಭುರ್ಗ್ಯಾಂಕ್ಯಿ ಲ್ಹಾನ್ ಆಸ್ತಾನಾಂಚ್ ಕಾಮಾಕ್ ಧಾಡ್ತಾತ್. ತಾಂಕಾಂ ಭುರ್ಗ್ಯಾಂಚ್ಯಾ ಶಿಕ್ಪಾಚ್ಯಾಕೀ ತಾಣಿ ಜೊಡ್ಲ್ಲೆ ಚಾರ್ ಕಾಸ್ ವ್ಹೊಡ್. ಭುರ್ಗ್ಯಾಂನಿ ಶಿಕೊನ್ ಚಡ್ ಸಾಂಬಾಳ್ ಜೊಡ್ಯೆತ್ ಮ್ಹಣ್ ತಿಂ ಚಿಂತಿನಾಂತ್ ಜಾಲ್ಲ್ಯಾನ್ ತಾಂಚಿಂ ಭುರ್ಗಿಂಯಿ ಕಾರ್ಖಾನ್ಯಾಕ್ಚ್ ವೆತಾತ್..... ಆಶೆಂ ಸಂತತೆ ಥಾವ್ನ್ ಸಂತತೆಕ್ ದುಬ್ಳಿಕಾಯ್ಚ್. ಮ್ಹಜೊ ಬಾಪುಯ್ ಚಡ್ ಶಿಕೊಂಕ್ ನಾ ಮ್ಹಣೊನ್ ಹಾಂವ್ಯಿ ಆತಾಂಚ್ ಕಾಮಾಕ್ ವೊಚಾನ್ ಜಾಲ್ಯಾರ್ ಆಮ್ಚಿ ದುಬ್ಳಿಕಾಯ್ ಕಾಂಯ್ ವೆಚಿನಾ. ಥೊಡೆಂ ಚಡ್ ಶಿಕ್ಲ್ಯಾರ್ ಮುಖಾರ್ ಪುಣಿ ಬರ್ಯಾಕ್ ಪಡಾತ್...."
"ತರ್ ಕಿತೆಂ, ಬಿ.ಎ. ಶಿಕ್ಲ್ಲ್ಯಾಂಕ್ ಆಪವ್ನ್ ’ಧರ್ ಧರ್ ಮ್ಹಣ್ ಕಾಮಾಂ ದಿತಾತ್ ಮ್ಹಣ್ತಾಯ್ಗಿ ತುಂ?" ತಾಂಬ್ಡೊ ಜಾವ್ನ್ ಮ್ಹಣಾಲೊ ಮಾನ್ವೆಲಾಬ್.
"ಫಾಲ್ಯಾಂಚಿ ಸಂಗತ್ ಕೋಣ್ ಜಾಣಾ ಅಂಕಲ್?" ಜಾಪ್ ಮೆಲ್ವಿನಾಚಿ, "ದೆವಾಕ್ ಜರ್ತರ್ ಖುಶಿ ಆಸಾ, ಆಮ್ಕಾಂ ಬರೆಂ ಖಾಂವ್ಕ್ ಮೆಳ್ತೆಲೆಂ ಆನಿಂ ಆಮಿಂ ಮನ್ಶಾಬರಿ ಜಿಯೆಂವ್ಕ್ ಪಾವ್ತೆಲ್ಯಾಂವ್."
"ಹಾಂ....ತರ್ ತುವೆಂ ಕೊಲೆಜಿಕ್ ವೆಚೆಂ ಘಟ್ಟ್ ಕೆಲಾಂಯ್..." ನಂಜ್ಯಾಳಿ ಹಾಸ್ಯಾನ್ ಉಲೈಲೊ ತೊ. ತಾಕಾ ಕಠಿಣ್ ಮೊಸೊರ್ ಜಾಲ್ಲೊ ತಾಚ್ಯಾ ತೊಂಡಾರ್ ರೂಪ್ ರೂಪ್ ದಿಸ್ತಾಲೊ. ತ್ಯಾ ಶಿವಾಯ್ ಎದೆಶ್ಯಾ ಚೆಡ್ಯಾನ್ ಆಪ್ಲಿಂ ಉತ್ರಾಂ ದಿಕ್ಕರ್ಸುನ್ ಉಲೈಲ್ಲೊ ರಾಗ್ಯಿ ತಾಕಾ ಆಯಿಲ್ಲೊ. ತಿತ್ಲ್ಯಾರ್ ಸಿಂತಿ ಉಟೊನ್ ಬಿತರ್ ಚಲ್ಲೆಂ. ತಾಚ್ಯಾ ಪಾಟಿಕ್ಚ್ ಪಳೆವ್ನ್ ಮೆಲ್ವಿನ್ ಮ್ಹಣಾಲೊ.
"ಹಾಂವೆಂ ಕೊಲೆಜಿಕ್ ವೆಚೆಂ ಘಟ್ ಕೆಲಾಂ ಅಂಕಲ್. ತುಮ್ಚೆಂ ಸಿಂತಿಯಿ ಕೊಲೆಜಿಕ್ ವೊಚನಾಂಗಿ?"
"ಹಾಂ ಹಾಂ. ತೆಂ ವೆತೆಲೆಂಚ್!" ಭುಜಾಂ ಫುಲೊವ್ನ್ ಉಲೈಲೊ ಮನ್ವೆಲಾಬ್; "ಸಿಂತಿ ಕೊಲೆಜಿಕ್ ವೊಚನಾ ತರ್ ಆನಿಂ ಕೊಣೆ ವೆಚೆಂ ? ಶಿಕೊಂಕ್ಯಿ ಬರೆಂ ಹುಶಾರ್ ಆಸಾ ಪಳೆ.."
"ಆತಾಂ ಹರ್ಯೇಕ್ ಮೆಟ್ರಿಕ್ ಶಿಕ್ಲ್ಲಿ ಚಲಿ ಕೊಲೆಜಿಕ್ ವೆತಾ.." ದುಸ್ರೆಂ ಸಾಂಗೊಂಕ್ ನಾಸ್ತಾಂ ಮೆಲ್ವಿನ್ ಮ್ಹಣಾಲೊ.
"ತಾಂಕ್ ಆಸ್ಲ್ಲಿಂ ವೆತಾತ್, ಕಿತ್ಯಾಕ್ ವೊಚನಾಂತ್? ತುಜ್ಯಾ ತಸಲಿ ಸ್ಥಿತಿ ಆಸ್ಲ್ಲಿಂ ಮಾತ್ರ್ ಬಿಲ್ಕುಲ್ ವೆಚಿನಾಂತ್"
ಪಯ್ಲೆಂಚ್ ಅಸಮಾಧಾನೆನ್ ಭರ್ಲ್ಲ್ಯಾ ಮನ್ವೆಲಾಬಾಕ್ ಮೆಲ್ವಿನಾನ್ ಜಾಪ್ ದಿಲಿನಾ. ತಾಚಿ ರಜಾ ಮಾಗೊನ್ ತೊ ಘರಾ ಭಾಯ್ರ್ ಪಡ್ಲೊ.
ಫುಲ್ಲ್ಲ್ಯಾ ಫುಲಾಚೊ ಸುವಾದ್ ತರೀ ತಿತ್ಲ್ಯಾ ವೆಗಿಂ ಪಸರ್ತೊನಾ. ಪುಣ್ ಮೆಲ್ವಿನ್ ಕೊಲೆಜಿಕ್ ವೆತಾ ಮ್ಹಳ್ಳಿ ಸಂಗತ್ ಸಗ್ಳ್ಯಾ ವಾಡ್ಯಾಂತ್ ಕರಡಾಕ್ ಲಾಗ್ಲ್ಲ್ಯಾ ಉಜ್ಯಾ ಬರಿ ಪರ್ಗಟ್ ಜಾಲಿ. ಕಿತ್ಯಾಕ್, ಥೊಡ್ಯಾ ವರ್ಸಾಂ ಆದ್ಲೊ ತೊ ಕಾಳ್ ತಸೊ ಆಸ್ಲ್ಲೊ. ತ್ಯಾ ವೆಳಾರ್ ಕೊಂಕ್ಣಿ ಸಮಾಜೆಂತ್ ಶಿಕ್ಪಿ - ಮ್ಹಳ್ಯಾರ್ ಚಡ್ ಶಿಕಾಪ್ ಜೊಡ್ಲ್ಲೆ, ಬೊಟಾಂನಿ ಮೆಜ್ಯೆತ್ ಆಸ್ಲ್ಲ್. ತಶೆಂ ವಾಡ್ಯಾಂತ್ಲೆಂ ಚಡುಣೆ ಎಕಾಮೆಕಾ ವಳ್ಕಾತಾನಾ, ಮೆಲ್ವಿನಾ ತಸಲೊ ದುಬ್ಳ್ಯಾ ಕುಟ್ಮಾಂತ್ಲೊ ಭುರ್ಗೊ ಕೊಲೆಜಿಕ್ ವೆತಾ ಮ್ಹಣ್ ಸಕ್ಡಾಂಕ್ಯಿ ನವಾಲಾಂಚಿ ಗಜಾಲ್ ಜಾಲಿ. ಪೆಂಟೆಕ್ ವೆಚಿಂ ಫುಲ್ಕಾರಾಂ, ಚಾಡಿಯೊ ಆನಿಂ ಖಬ್ರೊ ಉಲೊಂವ್ಚೆ ಕಸಬ್ ಕರ್ಚಿ ಥೊಡಿಂ ಬಾಯ್ಲ್ ಮನ್ಶಾಂ, ಹಿಚ್ ಖಬಾರ್ ಉಲೊಂವ್ಕ್ ಲಾಗ್ಲಿಂ.
"ತೊ ಪಳೆಗೊ, ವಿತೊರಿಚೊ ಪೂತ್ ಮೆಲ್ವಿನ್ ಕೊಲೆಜಿಕ್ ವೆತಾ ಖಂಯ್. ಚೆಡ್ಯಾಕ್ ಕಿತೆಂ ಹಂಕಾರ್ ಮಿರ್ವಾಲಾಗೇ ಬಾಯೆ! ನಹಿಂ, ಪೊಟಾಕ್ ಪುರ್ತೆಂ ಜೆಂವ್ಕ್ ನಾತ್ಲ್ಲ್ಯಾ ಹಾಂಕಾಂ ಕೊಲೆಜ್ ಕಿತ್ಯಾಕ್ ಖಂಯ್? ಹಾಂವ್ ಜಾಲ್ಲಿಂ ಜಾಲ್ಯಾರ್ ತ್ಯಾ ವಿತೊರಿಕ್ ಬರಿ ಬೂದ್ ಸಾಂಗ್ತಿಂ. ಕಸಲಿ ವ್ಹಡಿಲಾಂಗಿ ಮ್ಹಣ್ತಾ ಹಾಂವ್. ಮರೊಂದಿ, ಆಂಕಾಂ ಕಿತ್ಯಾಕ್ ತಾಂಚಿ ಖಬಾರ್? ಕೊಲೆಜಿಕ್ ಧಾಡುಂದಿತ್, ನಾತ್ಲ್ಯಾರ್ ಕಾಟಾಂತ್ ಪಡೊಂದಿತ್...." ಪೆಂಟೆಂತ್ ಎಕ್ಲಿ ನೆರಾಯ್ತಾಲಿ.
"ಹಾವೆಂ ತಾಕಾ ಇತ್ಲೆಂ ಸಾಂಗ್ಲೆಂ, ಕೊಲೆಜಿಕ್ ವೊಚಾನಾಕಾ, ಕಾಮ್ ಪಳೆ ಮ್ಹಣ್ ಉಲೈಲ್ಲೆಂ ಮ್ಹಜೆಂ ತೊಂಡ್ಚ್ ವೊಳ್ಳೆಂ," ಸಮಾಜ್ - ಸೇವಕಿ ಎಕ್ಲಿ ಆಪ್ಣೆಂ ಚಿಂತ್ಲ್ಲೆಂ ಬರೆಂ ಕಾಮ್ ನಿರ್ಫಳ್ ಜಾಲ್ಲ್ಯಾಕ್ ಪುರ್ಪುರ್ತಾಲಿ.
ಮೆಲ್ವಿನಾಕ್ ಹಿ ಖಬಾರ್ ಆಯ್ಕಾತಾನಾ ಪಾಯಾಚೊ ರಾಗ್ ಮಾತ್ಯಾಕ್ ಚಡ್ಲೊ. ಪುಣ್ ತಾಕಾ ಲೊಕಾಚ್ಯಾ ಜೊಬಾಂಕ್ ಗಡ್ ಘಾಲುಂಕ್ ಸಮರ್ಥಿ ನಾತ್ಲ್ಲಿ. ಲೊಕಾಚ್ಯಾ ಮೊಸ್ರಾಕ್ ಅಂತ್ಯ್ನಾ ಮ್ಹಣೊನ್ ತಾಣೆಂ ಆಪ್ಣಾಕ್ಚ್ ಸಮ್ಜಾಯ್ಲೆಂ.
ಥೊಡಿಂ ತಾಕಾ ಪಳೆತಾನಾ ನಂಜ್ಯಾಳಿ ಹಾಸೊ ಹಾಸ್ಲಿ. ಥೊಡೆ ಜಣ್ ತಾಕಾ ಆಯ್ಕಾಸಾರ್ಕೆಂ ವೊಪಾರಿ ಉಲೊಂವ್ಕ್ ಲಾಗ್ಲೆ. ಪುಣ್ ಹೆಂ ಸರ್ವ್ ಸೊಸುನ್ ತಾಣೆಂ ತೊಂಡ್ ಧಾಂಪ್ಲೆಂ. ಕಿತ್ಯಾಕ್, ದುಬ್ಳ್ಯಾಂಚ್ಯಾ ಭುರ್ಗ್ಯಾಂನಿ ಇಸ್ಕೊಲಾಕ್ ಗೆಲ್ಲೆಂಯಿ ಮಹಾಪಾತಕ್. ತಾಂಚೆಂ ಜಲ್ಮಾಚೆಂ ಹಕ್ಕ್ ಜಾವ್ನಾಸಾ - ಪೆಲ್ಯಾಚ್ಯಾ ಘರಾ ಮಾಡಾಂಕ್ ಉದಾಕ್ ಘಾಲ್ಚೆಂ ವ ಗರಿಬಾಂಚ್ಯಾ ಚೆಡ್ಯಾಂನಿ ಬೊಂಬಯ್ ತಸಲ್ಯಾ ಪೈಶಿಲ್ಯಾ ಗಾಂವಾಂತ್ ಲೊಕಾಚ್ಯಾ ದಾರಾರ್ ಘರ್ಚಾಕ್ರಿ ಕರ್ಚೆಂ. ಸಮಾಜೆಂತ್ ಪೈಶೆ ಆಸ್ಲ್ಲೆ ಪಯ್ಶಾಂನಿ ಮಾನ್ ಮೊಲಾಕ್ ಘೆತಾನಾ, ಗರೀಬಾಂನಿ ತೊಂಡಾಂಕ್ ಕರಿ ಪುಸುನ್ ಭೊಂವಾಜಾಯ್. ಹಿ ಆಮ್ಚ್ಯಾ ಗ್ರೇಸ್ತ್ ಸಮಾಜಿಚಿ ನೀತ್!
ಪುಣ್ ಮೆಲ್ವಿನ್ ಹ್ಯಾ ಕಾನಾಂತ್ ಆಯ್ಕಾಲ್ಲೆಂ ತ್ಯಾ ಕಾನಾನ್ ಸೊಡ್ನ್ ಕೊಲೆಜಿಚಿಂ ಮಧುರ್ ಚಿಂತ್ನಾಂ ಮತಿಂತ್ ದವರ್ನ್ ಆಸ್ಲ್ಲೊ. ’ಆಪ್ಣೆಂ ಬರೆಂ ಕರ್ನ್ ಶಿಕಾಜಾಯ್, ಉಂಚ್ಲ್ಯಾ ವರ್ಗಾಂತ್ ಪಾಸ್ ಜಾಯ್ಜಾಯ್, ಕಶೆಂ ಶಿಕ್ಪಾಂತ್ ತಶೆಂ ಖೆಳಾಂತ್ಯಿ ನಾಂವ್ ಜೊಡಿಜಾಯ್, ಉಪ್ರಾಂತ್ ಲೊಕಾಕ್ ಉಲವ್ನ್ ಜೀಬ್ ಆಸ್ಚಿನಾ’ ಖಂಯ್ಚಾಕೀ ಫಾಲ್ಯಾಂಚೊ ದೀಸ್ ತಾಕಾ ವರ್ತೊ. ಕಿತ್ಯಾಕ್ ಫಾಲ್ಯಾಂ ಕ್ಲಾಸ್ ಸುರು ಜಾತಾ. ಜೆದ್ನಾಂ ತಾಚ್ಯಾ ನವ್ಯಾ ಜೀವನಾಚೆಂ ಆರಂಭ್ ಜಾತಾ. ಹಾ, ಕಸಲೆಂ ತೆಂ ವ್ಹಡ್ಪಣ್....!
ದುಸ್ರ್ಯಾ ದಿಸಾ ಸಕಾಳಿಂ ನೋವ್ ವೊರಾಂಚೆರ್ ಮೆಲ್ವಿನ್ ದವ್ಲತೆನ್ ನೆಸೊನ್, ಸಾಂ. ಲುವಿಸ್ ಕೊಲೆಜಿಕ್ ಭಾಯ್ರ್ ಸರ್ಲೊ. ಸಗ್ಳ್ಯಾ ವಾಟೆರ್ ತಾಚ್ಯಾ ಮತಿಂತ್ ವಿವಿಧ್ ಚಿಂತ್ನಾಂ ಘುಂವ್ತಾಲಿಂ......ಸಂತೊಸಾಚಿಂ, ಆಶೆಚಿಂ, ಕೂತೂಹಲಾಚಿಂ. ಕೊಲೆಜಿಂತ್ಲೆಂ ವಾತಾವರಣ್ ಕಸಲೆಂ ಜಾವ್ಯೆತ್.... ಥೈಂಚೆ ನವೆ ಸಾಂಗಾಂತಿ....... ತೆ ಲೆಕ್ಚರರ್...ತಿಂ ಸನ್ನಿವೇಶನಾಂ...ಕೊಲೆಜ್ ಲಾಗಿಂ ಪಾವ್ತಾನಾ ತಾಚೆ ಪಾಯ್ ಬಾರೀಕ್ ಕಾಂಪ್ಲೆ.
ಪುಣ್ ಕೊಲೆಜಿಂತ್ಲೊ ಪಯ್ಲೊ ದೀಸ್ ತ್ಯಾ ಪರಿಂ ಜಾಯ್ತ್ ಮ್ಹಣ್ ತಾಣೆಂ ಸ್ವಪ್ಣಾಂತ್ಯಿ ಚಿಂತುಂಕ್ ನಾತ್ಲ್ಲೆ ಕೊಣ್ಣಾ............ ವ್ಹಡಾ ಆತ್ರೆಗಾನ್ ಕೊಲೆಜ್ ಪ್ರವೇಶ್ ಜಾಲ್ಲ್ಯಾ ತಾಕಾ ದುಸ್ರೆಂಚ್ ರಾಕೊನ್ ಆಸ್ಲ್ಲೆ!
(ಕಿತೆಂ ತೆಂ ರಾಕೊನ್ ಆಸ್ಲ್ಲೆಂ? ನವ್ಯಾ ಗ್ರೇಸ್ತ್ ಸಾಂಗಾತ್ಯಾಂಚೊ ಸ್ವಾಗತ್? ವ ದುರ್ಬಳ್ಯಾ ವಿದ್ಯಾರ್ಥಿಕ್ ಫಾವೊ ಜಾಲ್ಲಿ ನಿರಾಶಾ?...... ಯೆಂವ್ಚ್ಯಾ ಅಂಖ್ಯಾ ಪರ್ಯಾಂತ್ ತುಜಿ ಆತುರಾಯ್ ದಾಂಬುನ್ ಧರ್....)
ನಿರ್ಭಾಗ್ಯಾಚೆಂ ಸ್ವಪಾಣ್: ಪ್ರಸ್ತಾವನ್.
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
