ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಪುಸ್ತಕ್ ಏಕ್
ಜಿವಿತ್ ತುಕಾ ಆಪಯ್ತಾ
ಆವಸ್ವರ್ ನೋವ್: ಮಿಶೇಲ್
ಆಸ್ಪತ್ರೆಚೆಂ ಮುಕ್ಲೆಂ ಪ್ರವೇಶ್ ದಾರ್ ಉತ್ರೊನ್ ಮುಕಾರ್ ದಿಸ್ಚಾ ತ್ಯಾ ಲಾಂಭ್ ಕಾರಿಡಾರಾಚೆರ್ ಚಲೊನ್ ಲಿಫ್ಟಾಲಾಗಿಂ ಪಾವ್ಲ್ಲಿಂ ಮಿಶೇಲ್ ಆನಿ ಶೀತಲ್ ಲಿಫ್ಟಾ ಮುಕಾಂತ್ರ್ ಚವ್ತ್ಯಾ ಮಾಳಿಯೆಕ್ ಆಯ್ಲಿಂ. ಲಿಫ್ಟಾ ಥಾವ್ನ್ ಭಾಯ್ರ್ ಆಯಿಲ್ಲೆಂಚ್ ದಾವ್ಯಾಕ್ ಘುಂವ್ಲ್ಯಾರ್ ಮುಖಾರ್ಚ್ ತಾಂಬ್ಡ್ಯಾ ಅಕ್ಷರಾಂನಿ ಸ್ವಾಗತ್ ಕರ್ಚೊ ಐ.ಸಿ.ಯು. ಚೊ ಬೋರ್ಡ್.
ಐ.ಸಿ.ಯು. ಚ್ಯಾ ಮುಕಾರ್ ಯೇವ್ನ್ ಉಭಿಂ ಜಾಲ್ಲಿಂ ಮಿಶೇಲ್ ಆನಿ ಶೀತಲ್ ಶೂನ್ಯ್ ದೃಶ್ಟೆನ್ ಐ.ಸಿ.ಯು. ಚ್ಯಾ ತ್ಯಾ ತಾಂಬ್ಡ್ಯಾ ಅಕ್ಶರಾಂಕ್ ವೆಂಗೆಂತ್ ಘೆವ್ನ್ ಉಭೆಂ ಜಾಲ್ಲ್ಯಾ ತ್ಯಾ ದಾರಾಕ್ಚ್ ಪಳಂವ್ಚ್ಯಾರ್ ಪಡ್ಲಿಂ.
ತ್ಯಾ ದಾರಾಚಾ ಪಾಟ್ಲ್ಯಾನ್ ಖಂಯ್ಚರ್ಗೀ ಆಪ್ಲೊ ಆಜೊ ನಿದೊನ್ ಆಸಾ ತಶೆಂ ಮಿಶೇಲಾಕ್ ಭೊಗ್ತಾನಾ ತಾಚಿ ಮತ್ ತಾಚ್ಯಾ ಮತಿಂತ್ಲ್ಯಾ ಭಿರಾಂತೆಚಿಂ ಪಾನಾಂ ಉಸ್ತುಂಕ್ ಲಾಗ್ಲಿ.
ಕಾಲ್ಚ್ಯಾ ರಾತಿಂ ಜೆರೊಮಾಕ್ ತ್ಯಾ ದಾರಾಚಾ ಪಾಟ್ಲ್ಯಾನ್ ವೆಲ್ಯಾ ಉಪ್ರಾಂತ್ ಮಿಶೇಲಾನ್ ಆಪ್ಲ್ಯಾ ಆಜ್ಯಾಕ್ ಪಳಂವ್ಕ್ ನಾತ್ಲೆಲೆಂ.
ಘರಾ ಆಸ್ತಾನಾ ಜಿಮ್ಮಿಚಾ ಉತ್ರಾಂನಿ, ಆಜಿಯೆಚಾ ಭರ್ವಾಸ್ಯಾನ್ ಆನಿ ರಾಯನಾಚಾ ಅವ್ಚಿತ್ತ್ ಸಾಂಗಾತಾನ್ ತಾಚ್ಯಾ ಮತಿಕ್ ಸಮಾಧಾನ್ ದಿಲ್ಲೆಂ ಜಾಲ್ಯಾರ್ಯ್ ಆತಾಂ ಶೀತಲಾಚಾ ವತ್ತಾಯೆಕ್ ಆಸ್ಪತ್ರೆಕ್ ಆಯಿಲ್ಲ್ಯಾ ಮಿಶೇಲಾಚಾ ಕಾಳ್ಜಾಚೆ ದಡ್ದಡೆ ವಾಡ್ಲ್ಲೆ.
ಐ.ಸಿ.ಯು. ಚ್ಯಾ ಮುಕಾರ್ ರಾವ್ಲೆಲ್ಯಾ ಮಿಶೇಲಾಕ್ ಆನಿ ಶೀತಲಾಕ್ ಖಂಯ್ಚರ್ಯ್ ಜಿಮ್ಮಿಚಿ ಝಳಕ್ ದಿಸೊಂಕ್ ನಾ.
ತ್ಯಾ ಭಾಯ್ರ್!,
ಆಪ್ಲ್ಯಾ ಆನಿ ಆಪ್ಲ್ಯಾ ಆಜ್ಯಾಚಾ ಸಂಭಂಧಾ ಮಧೆಂ ಹೆಂ ಐ.ಸಿ.ಯು. ಚೆಂ ದಾರ್ ಏಕ್ ರಗ್ತಾಳಿ ವೊಣೊದ್ ಮ್ಹಳ್ಳ್ಯಾ ಪರಿಂ ಮಿಶೇಲಾಕ್ ದಿಸ್ಲಿ. ತಾಚೊ ವಿಶ್ವಾಸ್ ಸವ್ಕಾಸ್ ದಂಡೊಳೊನ್ ಯೆತಾಲೊ. ಎದೊಳ್ ಪಾಸೊನ್ ಆಸ್ಲ್ಲೊ ಭರ್ವಸೊ ಖಂಯ್ಚರ್ಗೀ ಗಯ್ರೊ ಗಯ್ರೊ ಜಾವ್ನ್ ಮಾಯಾಗ್ ಜಾತಾ ತಶೆಂ ತಾಕಾ ಭೊಗ್ಲೆಂ.
"ಸೆಕ್ಯೂರಿಟಿ ಲಾಗಿಂ ವಿಚಾರ್ಯಾಂ?" ಹೆವ್ಶಿಂ ತೆವ್ಶಿಂ ಸಗ್ಳ್ಯಾಂನಿ ದೀಶ್ಟ್ ಭೊಂವ್ಡಾಯಿಲ್ಲ್ಯಾ ಶೀತಲಾಕ್ ಜಿಮ್ಮಿಚಿ ಸಾವ್ಳಿ ಪಾಸೊನ್ ದಿಸಾನಾಸ್ತಾನಾ ವೆತಾನಾ ತಾಣೆಂ ಮಿಶೇಲಾಕ್ ಸವಾಲ್ ಕೆಲೆಂ. ಐ.ಸಿ.ಯು. ಚೆಂ ದಾರ್ ಲೊಟುನ್ ತಾಣಿಂ ಭಿತರ್ ವೆಚ್ಯಾ ಪರಿಂ ನಾತ್ಲ್ಲೆಂ. ತ್ಯಾ ದಾರಾ ಮುಕಾರ್ ಸೆಕ್ಯೂರಿಟಿಮ್ಯಾನ್ ಉಭೊ ಆಸ್ಲ್ಲೊ.
ತಿತ್ಲ್ಯಾರ್!
ಮಿಶೇಲಾಕ್ ಕಿತೆಂಗೀ ಉಡಾಸ್ ಆಯಿಲ್ಲ್ಯಾ ಪರಿಂ ಜಾವ್ನ್,
"ಜಿಮ್ಮಿ ಕಾಂಯ್ಪುಣಿಂ ಮೆಡಿಕಲಾಕ್ ವಕ್ತಾಂ ಹಾಡುಂಕ್ ಗೆಲಾ ಜಾವ್ಯೆತ್?" ಉದ್ಗಾರ್ಲೆಂ ತೆಂ.
"ಹಾಂ! ಜಾಂವ್ಕ್ ಸಕ್ತಾ! ಚಲ್..... ಮೆಡಿಕಲಾಂತ್ ಪಳವ್ಯಾಂ!"
ದೊಗಾಂಯ್ ಆತಾಂ ವೇಳ್ ಕಾಡಿನಾಸ್ತಾನಾ ಲಿಫ್ಟಾ ತೆವ್ಶಿಂ ಚಮ್ಕಾಲಿಂ. ಥೊಡ್ಯಾ ವೆಳಾನ್ ಲಿಫ್ಟ್ ಯೇವ್ನ್ ತಾಚೆಂ ದಾರ್ ಉಗ್ತೆಂ ಜಾಲೆಂ. ಉಗ್ತೆಂ ಜಾಲ್ಲ್ಯಾ ದಾರಾ ಮುಕಾಂತ್ರ್ ಭಾಯ್ರ್ ಆಯಿಲ್ಲೊ ಲೋಕ್ ಕೋಣ್ ಕೊಣಾಕ್ ಮ್ಹಳ್ಳೆಂ ಪಳಂವ್ಕ್ ಪುರ್ಸತ್ ನಾಸ್ತಾನಾ ಥೊಡೊ ತೆವ್ಶಿಂ ತರ್ ಥೊಡೊ ಹೆವ್ಶಿಂ ಚಲ್ಲೊ. ಲಿಫ್ಟಾ ಭಿತರ್ಲೊ ಲೋಕ್ ಭಾಯ್ರ್ ಯೆತಾನಾ ಮಿಶೇಲ್ ಆನಿ ಶೀತಲ್ ದೊಗಾಂಯ್ ಲಿಫ್ಟಾ ಭಿತರ್ ಘುಸ್ಲಿಂ.
ಆಸ್ಪತ್ರೆಚೆಂ ವಾತಾವರಣ್ಚ್ ವೆಗ್ಳೆಂ! ಹಾಂಗಾಸರ್ ಕೊಣಾಯ್ಚಾ ತೊಂಡಾರ್ ಹಾಸೊ ನಾಂತ್. ಸಗ್ಳಿಂ ತಾಂಚಾ ತಾಂಚಾ ಪಿಡೆಂತ್ ಆನಿ ತಾಂಚಾ ಪಿಡೆಸ್ತಾಂಚಾ ಪಿಡೆಂತ್ ಮೆತೆರ್ ಜಾಲ್ಯಾಂತ್ ಮ್ಹಳ್ಳ್ಯಾ ಪರಿಂಚ್ ದಿಸ್ಚಿಂ!
ಹ್ಯಾ ಆಸ್ಪತ್ರೆಂತ್ ಪಾಂಚ್ ಮಿನಿಟಾಂ ರಾವ್ಲ್ಯಾರ್ ಆಪುಣ್ ಖಂಡಿತ್ ಪಿಡೆಸ್ತ್ ಜಾಂವ್ಕ್ ಆಸಾಂ!" ಮಿಶೇಲ್ ಮತಿಂತ್ಚ್ ಚಿಂತಾಲೆಂ.
ಲಿಫ್ಟ್ ಗ್ರೌಂಡ್ ಫ್ಲೋರಾಕ್ ಯೇವ್ನ್ ರಾವ್ಲಿ. ಮೆಡಿಕಲ್ ಸ್ಟೋರ್ ಗ್ರೌಂಡ್ ಫ್ಲೋರಾಚೆರ್ ಆಸ್ಲ್ಲೊ. ಲಿಫ್ಟಾ ಥಾವ್ನ್ ಭಾಯ್ರ್ ಆಯಿಲ್ಲಿ ದೊಗಾಂಯ್ ಮುಕ್ಲ್ಯಾ ತ್ಯಾ ಲಾಂಬ್ ಪ್ಯಾಸೇಜಿಚೆರ್ ಚಲೊಂಕ್ ಲಾಗ್ಲಿಂ..... ಮೆಡಿಕಲ್ ಸ್ಟೋರಾ ತೆವ್ಶಿಂ!
ಮೆಡಿಕಲ್ ಸ್ಟೊರಾ ಮುಕಾರ್ ಲೊಕಾಚಿ ಖೆಟ್! ಜಶೆಂ ದಿಸಾಚಿ ಪೋಡ್ ಜೊಡ್ಲೊಲೊ ಮನಿಸ್ ಸಾಂಜೆರ್ ಮೆಡಿಕಲಾಚಾ ಮುಕಾರ್ ಉಭೊ ಜಾಲಾ ತಶೆಂ.
’ಸಂಸಾರಾಂತ್ಲೊ ಸಗ್ಳೊ ಲೋಕ್ ಪಿಡೆಸ್ತ್?’
’ಸಗ್ಳ್ಯಾಂಕ್ಯ್ ಪಿಡಾ?’
’ಹರ್ಯೆಕ್ಲ್ಯಾಚಾ ದಾರಾರ್ ದೂಖ್ಃಚ್?’
ಸವಾಲಾ ವಯ್ರ್ ಸವಾಲ್ ಮಿಶೇಲಾಚಾ ಮತಿಂಕ್ ಉದೆವ್ನ್ ಆಯ್ಲೆಂ ಆಸ್ತಾನಾಂಯ್ ತಾಚಿ ದೀಶ್ಟ್ ಮಾತ್ರ್ ತ್ಯಾ ದುಖೇಸ್ತ್ ಲೊಕಾಂ ಮಧೆಂ ಜಿಮ್ಮಿಕ್ ಸೊಧ್ತಾಲಿ.
’ನಾ! ಮೆಡಿಕಲ್ ಸ್ಟೋರಾಚಾ ಮುಕಾರ್ಯ್ ಜಿಮ್ಮಿಚಿ ಝಳಕ್ ನಾ!’ ಸಗ್ಳ್ಯಾನಿತ್ಲ್ಯಾನ್ ಭೊಂವ್ಲ್ಲ್ಯಾ ಮಿಶೇಲಾಚಾ ನದ್ರೆನ್ ತಾಕಾ ಜಾಗಯ್ಲೆಂ.
"ಮಿಶೇಲ್...! ತುಂ ಜಿಮ್ಮಿಕ್ ಪೋನ್ ಕರ್!" ಶೀತಲಾನ್ ತಾಂಚ್ಯಾ ಮುಕ್ಲ್ಯಾ ನಿಮಾಣ್ಯಾ ವಾಟೆಕ್ ಮಿಶೇಲಾಚಾ ಮುಕಾರ್ ದವರ್ಲೆಂ.
ತಿತ್ಲೆಂಚ್!
ದುಸ್ರೊ ಉಪಾಯ್ ನಾಸ್ತಾಂ, ಮಿಶೇಲಾನ್ ಆಪ್ಲ್ಯಾ ಹಾತಾಂತ್ಲೆಂ ಸೆಲ್ಪೊನ್ ಆನ್ ಕರುನ್ ತಾಂತುಂ ತೆಂ ಜಿಮ್ಮಿಚೆಂ ನಂಬರ್ ಡಯಲ್ ಕರ್ತಾ ಮ್ಹಣ್ತಾನಾ, ಎಕಾಚ್ಚ್ ಫರಾ ಕಿತೆಂಗೀ ಉಡಾಸ್ ಆಯಿಲ್ಲ್ಯಾ ಪರಿಂ ಜಾವ್ನ್,
"ಶೀತಲ್....? ತುಂ ಡಯಲ್ ಕರ್!" ಶೀತಲಾಕ್, ಮಿಶೇಲಾನ್ ವಿನತಿ ಕೆಲಿ.
"ಕಿತ್ಯಾಕ್? ಕಿತೆಂ ಜಾಲೆಂ?" ಆಚಾನಕ್ ಬದ್ಲಾಲ್ಲ್ಯಾ ಮಿಶೇಲಾಚಾ ನಿರ್ಧಾರಾ ಪಾಟ್ಲೊ ಮಿಸ್ತೆರ್ ಶೀತಲಾಕ್ ಸಮ್ಜಾಲೊ ನಾ.
"ಜಸ್ಟ್ ಡೂ ಇಟ್!"
ಮಿಶೇಲಾನ್ ಆರ್ಡರ್ ಮ್ಹಳ್ಳ್ಯಾ ಪರಿಂ ದಿತಾನಾ ದುಸ್ರಿ ವಾಟ್ ನಾತ್ಲ್ಲ್ಯಾ ಶೀತಲಾನ್ ಜಿಮ್ಮಿಕ್ ಪೋನ್ ಡಯಲ್ ಕೆಲೆಂ.
ಪೋನ್ ರಿಂಗ್ ಜಾತಾಲೆಂ.
ಮಿಶೇಲ್ ದೊಳೆ ರೂಂದಾವ್ನ್ ಶೀತಲಾಕ್ಚ್ ಪಳಂವ್ಚ್ಯಾರ್ ಪಡ್ಲೆಂ.
ತಿತ್ಲ್ಯಾರ್!
ತ್ಯಾ ಕುಶಿನ್ ಥಾವ್ನ್ ಪೋನ್ ಕಾಡ್ಲಲೊ ಆವಾಜ್! ತಾಚ್ಯೆ ಪಾಟ್ಲ್ಯಾನ್...
"ಹಲೋ.....!" ತ್ಯಾ ಕುಶಿಕ್ ಜಿಮ್ಮಿಚೊ ತಾಳೊ ಆಯ್ಕಾಲೊ.
"ಹಲೋ? ಜಿಮ್ಮಿ....? ಖಂಯ್ ಆಸಾಯ್ ತುಂ....?"
"ಹಾಂಗಾ..... ಆಸ್ಪತ್ರೆಂತ್!"
"ಆಸ್ಪತ್ರೆಂತ್.....? ಆಮಿಂ ಆಸ್ಪತ್ರೆಂತ್ಚ್ ಆಸಾಂವ್! ತುಕಾ ಸೊಧುನ್ ಸೊಧುನ್ ಪುರೊ ಜಾಲೆಂ!"
"ಕೋಣ್ ಡ್ಯಾಡಿ ಆಯ್ಲಾ....?"
"ನಾ! ಹಾಂವ್ ಆನಿ ಮಿಶೆಲ್ ಮಾತ್ರ್!"
"ತುಮಿಂ ಮಾತ್ರ್.....?"
"ವ್ಹಯ್! ಹಾಂವ್ ಸಾಕಾಳಿಂ ಏರ್ಪೋರ್ಟಾಕ್ ಗೆಲ್ಲಿಂ. ತಶೆಂ ಮ್ಹಾಕಾ ಸಾಕಾಳಿಂ ಯೇಂವ್ಕ್ ಜಾಂವ್ಕ್ ನಾ!"
"ಏರ್ಪೊರ್ಟಾಕ್ ಕಿತ್ಯಾಕ್......?"
"ವಿಶು ಆಜ್ ಮುಂಬಯಿ ಪಾಟಿಂ ಗೆಲೊ! ತ್ಯಾ ಪಾಸೊನ್.....! ತುಂ ಆತಾಂ ಖಂಯ್ ಆಸಾಯ್ ಸಾಂಗ್!"
"ಹಾಂವ್ ಹಾಂಗಾ ಚವ್ತ್ಯಾ ವಾರ್ಡಾಂತ್ ಆಸಾಂ! ತುಮಿಂ ವಯ್ರ್ ರಾವಾ. ಹಾಂವ್ ಯೆತಾಂ ಥಂಯ್ಚರ್!"
"ಬರೆಂ. ಬಾಯ್!"
ಶೀತಲಾನ್ ಪೋನ್ ಭಂಧ್ ಕೆಲೆಂ.
"ಚಲ್ ಮಿಶೇಲ್! ಜಿಮ್ಮಿ ಐ.ಸಿ.ಯು. ಲಾಗಿಂ ಯೆತಾ ಖಂಯ್!" ಸಾಂಗ್ಲೆಲೆಂ ಶೀತಲ್ ಮುಕಾರ್ ಚಲೊಂಕ್ ಲಾಗ್ತಾನಾ ಮಿಶೇಲಾನ್ ತಾಚ್ಯಾ ಸಾಂಗಾತಾ ಮೆಟಾಂ ಕಾಡ್ಲಿಂ. ಲಿಫ್ಟ್ ಧರುನ್ ತಿಂ ಐ.ಸಿ.ಯು. ಲಾಗಿಂ ಪಾವ್ತಾನಾ ಎದೊಳ್ಚ್ ಜಿಮ್ಮಿ ಥಂಯ್ಚರ್ ಉಭೊ ಆಸ್ಲ್ಲೊ.
"ತುಕಾ ಸೊಧುನ್ ಆಮಿಂ ಮೆಡಿಕಲಾಕ್ ಗೆಲ್ಲ್ಯಾಂವ್!" ಜಿಮ್ಮಿಚಾ ಲಾಗಿಂ ಯೆತಾನಾ ಶೀತಲ್ ಉಲಯ್ಲೆಂ.
ಥೊಡ್ಯಾ ಕ್ಷಣಾಂಕ್ ಜಿಮ್ಮಿ ಶೀತಲಾಕ್ಚ್ ಪಳಂವ್ಚ್ಯಾರ್ ಪಡ್ಲೊ. ಜಿಮ್ಮಿಚಿ ತಿ ದೀಶ್ಟ್ ಶೀತಲಾಚಾ ಮುಖಮಳಾರ್ ಚರ್ತಾನಾ ತ್ಯಾ ದಿಶ್ಟೆಂತ್ ಕಸಲೆಂಗೀ ಏಕ್ ಅವ್ಯಕ್ತ್ ಭೊಗಾಪ್ ಆಸಾ ಮ್ಹಳ್ಳ್ಯಾ ಪರಿಂ ಶೀತಲಾಕ್ ಜಾಲೆಂ.
"ಆಜ್ ತುಂ ಮಸ್ತ್ ಖುಶ್ ಆಸ್ಲ್ಲ್ಯಾ ಪರಿಂ ದಿಸ್ತಾಯ್!"
ಜಿಮ್ಮಿಚಿಂ ಉತ್ರಾಂ ಆಯ್ಕೊನ್ ಶೀತಲಾನ್ ಜಿಮ್ಮಿಕ್ಚ್ ಪಳೆಲೆಂ. ಆಪ್ಣಾಚಾ ಮತಿಚಾ ಸಮಾಧಾನೆಕ್ ಆನಿ ಕಾಳ್ಜಾಂತ್ಲ್ಯಾ ಸಂತೊಸಾಕ್ ತೊಂಡಾರ್ಚ್ ವಾಚುಂಕ್ ಸಕ್ಲೆಲ್ಯಾ ಜಿಮ್ಮಿಕ್ ಪಳವ್ನ್ ತಾಕಾ ಆಶ್ಚರ್ಯ್ ಜಾಲೆಂ.
ಆಜ್ ನಿಜಾಯ್ಕ್ಯ್ ಶೀತಲ್ ಮಸ್ತ್ ಖುಶ್ ಆಸ್ಲ್ಲೆಂ. ತಾಚ್ಯಾ ಜಿವಿತಾಂತ್ ಏಕ್ ನವೊ ಅಧ್ಯಾಯ್ ಆರಂಭ್ ಜಾಲ್ಲೊ. ತಾಚೆಂ ಆವ್ಕ್ ಆಜ್ ಎಕಾ ನವ್ಯಾ ಪಾಂವ್ಡ್ಯಾಕ್ ಚಡ್ಲ್ಲೆಂ. ತಾಚಿ ಜಿಣಿ ನವ್ಯಾಸಾಂವಾಚಾ ದಾರ್ವಾಟ್ಯಾರ್ ಉಭಿ ಜಾಲ್ಲಿ.
ಜಿಮ್ಮಿಚಾ ಉತ್ರಾಂನಿ ಮಿಶೇಲಾಕ್ ಆನಿ ಶೀತಲಾಕ್ ದೊಗಾಂಯ್ಕ್ಯ್ ಮಿಸ್ತೆರಾಂತ್ ಶೆವ್ಟಾಯಿಲ್ಲೆಂ. ಆಯ್ಚಾ ಪಾಂತ್ಯಾಚಾ ಘಡಿತಾ ಉಪ್ರಾಂತ್ ಮಿಶೇಲ್ ಜಿಮ್ಮಿಲಾಗಿಂ ಉಲಂವ್ಕ್ ತಯಾರ್ ನಾತ್ಲ್ಲೆಂ. ಪಯ್ಲ್ಯಾಚ್ ನದ್ರೆನ್ ಚಲಿಯೆ ಜಾತಿಚಾ ಲಜೆಕ್ ಜಿಮ್ಮಿನ್ ಉಗ್ತೆಂ ಕರ್ತಾನಾ ಶೀತಲ್ ತರ್ಯ್ ಕಿತೆಂ ಉಲಯ್ತೆಲೆಂ? ದೊಗಾಂಯ್ಚಾ ಜಿಬೆಕ್ ಖಾಡುಂ ಪಡ್ಲ್ಲೆಂ.
"ಆಬ್ ಕಸೊ ಆಸಾ?" ಥೊಡ್ಯಾ ವೆಳಾನ್ ಮಿಶೇಲಾನ್ಚ್ ಉಲಂವ್ಚೆಂ ಪ್ರಯತ್ನ್ ಕೆಲೆಂ.
"ಆತಾಂ ಮಸ್ತ್ ಬರೊ ಆಸಾ!" ಜಿಮ್ಮಿಚಿ ತಿಚ್ಚ್ ಶಾಂತ್ ಜವಾಬ್.
"ಡಾಕ್ಟರ್ ಆಯಿಲ್ಲೊ?" ಮಿಶೇಲಾಚೆಂ ದುಸ್ರೆಂ ಸವಾಲ್.
"ರಾಯನಾನ್ ವಿಚಾರ್ಲಾಂ?" ಮಿಶೇಲಾಕ್ ಜಿಮ್ಮಿ ಪ್ರತಿ ಸವಾಲ್ ಕೆಲೆಂ.
"............!"
ಜಿಮ್ಮಿಚಾ ಪ್ರತಿ ಸವಾಲಾಕ್ ಕಾಂಯ್ಚ್ ಜವಾಬ್ ದೀನಾಸ್ತಾನಾ ಮಿಶೇಲಾನ್ ಏಕ್ ಘಡಿ ಜಿಮ್ಮಿಕ್ಚ್ ಪಳೆಲೆಂ.
"ಹಾಂಗಾಸರ್ ದಾಕ್ತೆರಾಂಕ್ ದಿಸಾಕ್ ಚ್ಯಾರ್ ಆಸ್ಪತ್ರೆಂಕ್ ವಚೊಂಕ್ ಆಸ್ತಾ!" ಉಲಯಿಲ್ಲೊ ಜಿಮ್ಮಿ "ತುಮಿ ಉಭಿಂ ಕಿತ್ಯಾಕ್ ರಾವ್ಲ್ಯಾತ್? ಯೆಯಾ ಬಸಾ!" ಜಿಮ್ಮಿ ಐ.ಸಿ.ಯು. ಚ್ಯಾ ಮುಕ್ಲ್ಯಾ ಬಾಂಕಾಂ ತೆವ್ಶಿಂನ್ ಚಮ್ಕಾಲೊ. ತಾಚ್ಯೆ ಪಾಟ್ಲ್ಯಾನ್ ಮೆಟಾಂ ಕಾಡ್ಲ್ಲಿಂ ದೊಗಾಂಯ್ ಜಿಮ್ಮಿ ಎಕಾ ಬಾಂಕಾರ್ ಬಸ್ತಾನಾ ತಿಂಯ್ ತ್ಯಾ ಬಾಂಕಾರ್ ಬಸ್ಲಿಂ.
"ಬಾಬಾಚೊ ರಿಪೊರ್ಟ್ ದೀಂವ್ಕ್ ದಾಕ್ತೆರ್ ಸಾಂಜೆರ್ ಯೆತಲೊ!" ಬಾಂಕಾರ್ ಬಸ್ಲೆಲ್ಯಾ ಕಡೆನ್ ಮೌನ್ ತುಟವ್ನ್ ಜಿಮ್ಮಿನ್ ಸಾಂಗ್ಲೆಂ.
"ಕಾಜಾರ್ ಕಶೆಂ ಜಾಲೆಂ ಶೀತಲ್?" ತೊ ಆತಾಂ ಶೀತಲಾ ತೆವ್ಶಿಂ ಘುಂವ್ಲೊ.
"ಜಾಲೆಂ!" ಹಾಸೊನ್ ಸಾಂಗ್ಲ್ಲೆಂ ಶೀತಲ್ ಸವ್ಕಾಸ್ ಖಂತೀಶ್ಟ್ ಜಾಲ್ಲ್ಯಾ ಪರಿಂ ಜಾವ್ನ್ "ಅಂಕಲಾಕ್ಯ್ ಕಾಲ್ಚ್ ಆಶೆಂ ಜಾಂವ್ಕ್ ಜಾಯ್ ಆಸ್ಲ್ಲೆಂ?" ಖಂತಿನ್ ಉದ್ಗಾರ್ಲೆಂ ತೆಂ.
"ವೆಳಾಕ್ ಆನಿ ಘಡಿತಾಂಕ್ ಏಕ್ ಅನೋನ್ಯ್ ಸಂಭಂಧ್ ಆಸಾ ಶೀತಲ್!" ಜಿಮ್ಮಿ ಉಲಯ್ಲೊ. "ಮನ್ಶ್ಯಾ ಜಾತ್ ಫಕತ್ತ್ ಘಡಿತಾಕ್ ಮಾತ್ರ್ ದೆಖ್ತಾ ಜಾಲ್ಲ್ಯಾನ್ ತಾಕಾ ತೆಂ ಸಮ್ಜಾನಾ. ವೆಳಾಕ್ ಪಳಂವ್ಕ್ ಕೊಣಾಯ್ಕ್ಯ್ ನಾಕಾ. ಮನಿಸ್ ಹಾಂಗಾ ಪೃಕೃತಿಚ್ಯಾ ನಿಯಮಾಂಕ್ ಪಾರ್ಕುಂಕ್ ಸಕ್ತಾ. ಜಶೆಂ ಮುಡ್ಲಾ ಥಾವ್ನ್ ವಾರೆಂ ಪಡ್ಲಾ ಧಾಂವ್ತಾನಾ ವಯ್ಲ್ಯಾ ಮೊಳಾಬಾರ್ ಮೊಡಾಂಕ್ ಕಾಳ್ಬಾಣ್ ಮಾಂಡಿತ್ ಜಾಲ್ಯಾರ್ ಪಾವ್ಸ್ ಖಂಡಿತ್ ಯೆತಲೊ. ಶಿರಾಂಧಾರಿ ವೊತ್ಚ್ಯಾ ಪಾವ್ಸಾಂತ್ ಅಚಾನಕ್ ವೊತಾನ್ ಸಾಂಗಾತ್ ದಿಲ್ಯಾರ್ ಮನಿಸ್ ಮೊಳಾಬಾರ್ ಪಾವ್ಸಾ ಧೊಣ್ವಾಕ್ ಸೊಧ್ತಾ. ಪುಣ್ ಜಿವಿತಾಂತ್ ವೆಳಾನ್ ಉಟಂವ್ಚ್ಯಾ ಘಡಿತಾಂಕ್ ಮಾತ್ರ್ ತೊ ಪಾರ್ಕುಂಕ್ಯ್ ಸಕಾನಾ ಆನಿ ತಾಂಕಾಂ ತೊ ಸಮ್ಜೊಂಕ್ಯ್ ಸಕಾನಾ!" ಜಿಮ್ಮಿಚಾ ಉಲವ್ಣ್ಯಾಂತ್ ಎಕಾ ಥರಾಚಿ ಖಂತ್ ಆನಿ ಬೆಜಾರಾಯ್ ಆಸ್ಲ್ಲಿ.
"ಮ್ಹಳ್ಯಾರ್.....?" ಶೀತಲಾಕ್ ಜಿಮ್ಮಿ ಕಸಲ್ಯಾ ವಿಶಯಾ ವಿಶಿಂ ಉಲಯ್ತಾ ತೆಂ ತಾಕಾ ಸಮ್ಜಾಲೆಂ ನಾ.
"ಹೆಂ....., ಹಾವೆಂ ತುಕಾ ಸಾಂಗ್ಚೆಂ ನ್ಹಯ್ ಶೀತಲ್! ಪ್ಲೀಸ್.... ಬೆಜಾರ್ ಕರಿನಾಕಾ!"
"ಬೆಜಾರ್!? .......ಎಕೇಕ್ ಪಾವ್ಟಿಂ ಆಶೆಂ ದಿಸ್ತಾ ಕೀ ತುಜ್ಯಾ ಉಲವ್ಣ್ಯಾಂತ್ ರಾಜಾಂವ್ ಆಸಾ!"
"ಕಸಲೆಂ ರಾಜಾಂವ್ ಶೀತಲ್? ಏಕ್ ದೀಸ್ ಹ್ಯಾ ಆಸ್ಪತ್ರೆಂತ್ ರಾವ್ಲ್ಯಾರ್.....? ಹೊ ಸಂಸಾರ್ಚ್ ನಾಕಾ!" ಕುಶಿಚಾ ಜನೆಲಾಂತ್ಲ್ಯಾನ್ ಆಪ್ಲ್ಯಾ ದೀಶ್ಟಿಕ್ ಜಿಮ್ಮಿ ಭಾಯ್ರ್ ಧಾಂವ್ಡಾಯ್ಲಿ.
"ಚವ್ತ್ಯಾ ವಾರ್ಡಾಂತ್ ಕೋಣ್ ಆಸಾ?"
ಶೀತಲಾಚಾ ಸವಾಲಾಕ್ ಎಕ್ಚ್ಚ್ ಪಾವ್ಟಿಂ ಜಿಮ್ಮಿ ಉಡೊನ್ ಪಡ್ಲೆಲ್ಯಾಪರಿಂ ಜಾವ್ನ್ ತಾಣೆಂ ಆಪ್ಲಿ ದೀಶ್ಟ್ ತ್ಯಾ ಜನೆಲಾ ಥಾವ್ನ್ ಹೆವ್ಶಿಂ ವೊಡ್ಲಿ. ಅಚಾನಕ್ ಶೀತಲಾನ್ ಕೆಲ್ಲ್ಯಾ ಸವಾಲಾನ್ ತಾಚಿ ಮತ್ ಚವ್ತ್ಯಾ ವಾರ್ಡಾಕ್ ಧಾಂವ್ಲಿ. ಆತಾಂ ಆರಂಭ್ ಜಾಲೆಂ ಜೀವನ್ ಆನಿ ಮರ್ಣಾಚೆಂ ಝುಜ್! ಜಿಮ್ಮಿಚ್ಯಾ ದೊಳ್ಯಾಂ ಸಾಮ್ಕಾರ್ ತಾಣೆಂ ದಿಸಾಂದೀಸ್ ಪಳಂವ್ಚೆಂ ಹ್ಯಾ ಸಂಸಾರಾಂತ್ಲೆಂ ಅತೀ ಭಯಾನಕ್ ಝುಜ್ ಉಭೆಂ ಜಾಲೆಂ. ಮಾಸಾಕ್ ರಗಾತ್ ದುಸ್ಮಾನ್ ಆನಿ ಅತ್ಮ್ಯಾಕ್ ಉಸ್ವಾಸ್ ದುಸ್ಮಾನ್! ಭಯಾನಕ್ ಝುಜ್! ಜಿಮ್ಮಿಚ್ಯಾ ಜಿಬೆರ್ ಥಾವ್ನ್ ಉತ್ರಾಂ ಸುಟ್ಲಿಂ ನಾಂತ್. ತೊ ಮೌನ್ ಜಾಲ್ಲೊ. ತ್ಯಾ ಮೌನ್ಪಣಾಂತ್ಯ್ ತಿ ತಾಚಿ ದೀಶ್ಟ್ ಬೊಬೊ ಮಾರುನ್ ರುದಾನ್ ಕರುಂಕ್ ಲಾಗ್ಲಿ. ತೊ ಆತಾಂ ಪರ್ತ್ಯಾಕ್ ತ್ಯಾ ಜನೆಲಾ ಕುಶಿಕ್ ಘುಂವೊನ್ ಭಾಯ್ರ್ ಪಳೆಂವ್ಕ್ ಲಾಗ್ಲೊ.
"ಚವ್ತ್ಯಾ ವಾರ್ಡಾಂತ್ ತುಜೆಂ ಕೋಣ್ ಆಸಾ?" ಹರ್ಧ್ಯಾ ಗುಡಾ ಭಿತರ್ ಕೋಣ್ಗೀ ಆಪ್ಲ್ಯಾ ಕಾಳ್ಜಾಕ್ ಸುವಿಯೊ ತೊಪುನ್ ವಿಚಾರ್ತಾ ತಶೆಂ ಜಿಮ್ಮಿಕ್ ಭೊಗ್ಲೆಂ. ತಾಣೆಂ ತಿ ದೂಖ್ ಥಂಯ್ಚ್ ದಾಂಬುನ್ ಧರ್ಲಿ ಶಿವಾಯ್ ತ್ಯಾ ಸವಾಲಾಕ್ ಜವಾಬ್ ದಿಲಿ ನಾ. ಜನೆಲಾಂತ್ಲ್ಯಾನ್ ಭಾಯ್ರ್ ಪಳೆಂವ್ಚ್ಯಾ ತಾಕಾ ಪಯ್ಶಿಲ್ಯಾ ತ್ಯಾ ಮಾಡಾಂ ಮಧ್ಲ್ಯಾನ್ ದಿಸೊನ್ ಯೇನಾತ್ಲ್ಲ್ಯಾ ರೈಲ್ವೇ ಟ್ರ್ಯಾಕಾರ್ ಸವ್ಕಾಸ್ ಚಲ್ಚೆಂ ರೈಲ್ ದಿಸ್ಲೆಂ. ವ್ಹಳೂ.... ವ್ಹಳೂ.....! ತಾಚ್ಯೆ ಸವೆಂ ಖಂಯ್ಚರ್ಗೀ ಏಕ್ ಉಸ್ವಾಸ್ ಆಪ್ಲ್ಯಾ ಅತ್ಮ್ಯಾ ಸವೆಂ ಝಗ್ಡೊನ್ ವ್ಹಳೂ ವ್ಹಳೂ ಸಲ್ವೊನ್ ಯೆತಾ ತಶೆಂ ಜಾತಾನಾ,
’ಸಟ್ಟ್’ ಕರುನ್ ಬಸ್ಲೆಲ್ಯಾ ಕಡೆನ್ ಥಾವ್ನ್ ಉಟ್ಲೊ ಜಿಮ್ಮಿ. ತೊ ಆತಾಂ ತ್ಯಾ ಜನೆಲಾಕ್ ಫುಡ್ ಕರುನ್ ರಾವ್ಲೊ.
"ಚವ್ತ್ಯಾ ವಾರ್ಡಾಂತ್ ತುಜೆಂ ಕೊಣ್ಯ್ ಆಸಾ?" ಬಸ್ಲೆಲ್ಯಾ ಕಡೆನ್ ಥಾವ್ನ್ ಉಟೊನ್ ರಾವ್ಲೆಲ್ಯಾ ಜಿಮ್ಮಿಚೊ ಭರ್ತಾವ್ ಸಮ್ಜಾನಾಸ್ತಾನಾ ಶೀತಲಾನ್ ಪರ್ತ್ಯಾಕ್ ವಿಚಾರ್ಲೆಂ.
"ಕಾಜಾರಾಚಿ ಪಾರ್ಟಿ ಕಶಿ? ಗಮ್ಮತ್.....?" ಜಿಮ್ಮಿನ್ ವಿಶಯ್ ಬದ್ಲಿಲೊ.
"ತುಕಾ ಕಶೆಂಯ್ ಯೇಂವ್ಕ್ ಮನ್ ನಾತ್ಲ್ಲೆಂ. ತಶೆಂಚ್ ಜಾಲೆಂ....!" ಶೀತಲಾನ್ ಗುನ್ಯಾಂವ್ ಜಿಮ್ಮಿಚೆರ್ ಥಾಪ್ಲೊ.
"ತಶೆಂ ಕಾಂಯ್ ನಾ ಶೀತಲ್! ಪುಣ್....!" ಆತಾಂ ಕಿತ್ಯಕ್ಗೀ ಜಿಮ್ಮಿ ಚಿಂತ್ಚ್ಯಾರ್ ಪಡ್ಲೆಲ್ಯಾ ಪರಿಂ ದಿಸ್ಲೊ.
"ಪುಣ್ ಕಿತೆಂ......?" ಶೀತಲಾನ್ ಸವಾಲ್ ಕೆಲೆಂ.
"ಮ್ಹಕಾ ಕಾಜಾರಾಂತ್ ವಿಶ್ವಾಸ್ ನಾ ಶೀತಲ್!"
ಜಿಮ್ಮಿಚಾ ತೊಂಡಾ ಥಾವ್ನ್ ಭಾಯ್ರ್ ಪಡ್ಲ್ಲ್ಯಾ ಉತ್ರಾಂಕ್ ಆಯ್ಕೊನ್ ಶೀತಲ್ ಆನಿ ಮಿಶೇಲ್ ದೊಗಾಂಯ್ ಉಡೊನ್ ಪಡ್ಲಿಂ. ಶೀತಲ್ ಜರೀ ನವೆಂಚ್ ಕಾಜಾರಾ ಭಾಂದಾಂತ್ ಎಕ್ವಟ್ಲೆಲೆಂ ಜಾಲ್ಯಾರ್ ಮಿಶೇಲ್ ಆಜ್ ಫಾಲ್ಯಾಂ ಮ್ಹಣ್ತಾನಾ ಕಾಜಾರಾಕ್ ಆಯ್ತೆಂ ಜಾಂವ್ಚೆಂ ಹೊಕಾಲ್! ತ್ಯಾ ಭಾಯ್ರ್, ಕಾಜಾರಿ ನ್ಹಯ್ ಆಸ್ಲ್ಲ್ಯಾ ಜಿಮ್ಮಿನ್ ಆಪ್ಣಾಕ್ ಕಾಜಾರಾಂತ್ ವಿಶ್ವಾಸ್ ನಾ ಮ್ಹಣೊನ್ ಉಚಾರ್ತಾನಾ ದೊಗಾಂಯ್ಕ್ಯ್ ಆಶ್ಚರ್ಯ್ ಜಾಲೆಂ. ತಾಂಕಾ ಜಿಮ್ಮಿ ಕಿತೆಂ ಉಲಯ್ತಾ ತೆಂ ಸಮ್ಜಾಲೆಂ ನಾ.
"ಕಿತ್ಯಾಕ್?" ಶೀತಲಾನ್ ಅಜ್ಯಾಪಾನ್ ಸವಾಲ್ ಕೆಲೆಂ.
ಶೀತಲಾಚಾ ಸವಾಲಾಕ್ ಜಿಮ್ಮಿನ್ ಕಾಂಯ್ ಜವಾಬ್ ದಿಲಿ ನಾ. ತೊ ಮೌನ್ ಆಸ್ಲ್ಲೊ.
"ಹಾಂವ್ ಜಾಣಾಂ ಜಿಮ್ಮಿ! ತುಂ ಭಾಯ್ಲ್ಯಾನ್ ದಿಸ್ತಾಯ್ ತಶೆಂ ಭಿತರ್ಲ್ಯಾನ್ ನಾಂಯ್!" ಥೊಡ್ಯಾ ಖಿಣಾಂಕ್ ಮೌನ್ ಜಾಲ್ಲೆಂ ಶೀತಲ್ "ಏಕ್ ವಿಶಯ್ ಸಾಂಗೊಂ....?" ತಾಣೆಂ ವಿಚಾರ್ಲೆಂ.
"ಕಿತೆಂ.....?" ಜಿಮ್ಮಿನ್ ಶೀತಲಾಕ್ಚ್ ಪಳೆಲೆಂ.
"ಆಜ್ ಹಾಂವ್ ನಿಜಾಯ್ಕ್ಯ್ ಖುಶಿಯೆರ್ ಆಸಾಂ! ಜಾಣಾಂಯ್ ಕಿತ್ಯಾಕ್?"
ಶೀತಲಾಚಾ ಸವಾಲಾಕ್ ಜಿಮ್ಮಿನ್ ಕಾಂಯ್ಚ್ ಜವಾಬ್ ದಿಲಿ ನಾ. ತೊ ಫಕತ್ತ್ ಶೀತಲಾಕ್ ಪಳೆತಾಲೊ. ಮಿಶೇಲ್ ದೊಗಾಂಯ್ಕ್ಯ್ ಆಯ್ಕಾತಾಲೆಂ ಮಾತ್ರ್.
"ಆಜ್ ಮ್ಹಜ್ಯಾ ಜಿವಿತಾಚಿ ದುಸ್ರಿ ಜಿಣಿ ಆರಂಭ್ ಜಾಲ್ಯಾ...." ಶೀತಲ್ ಉಲಂವ್ಕ್ ಲಾಗ್ಲೆಂ "..... ಎದೊಳ್ಚಿ ಮ್ಹಜಿ ಜಿಣಿ ಖಂಯ್ ನಾ ಖಂಯ್ ಮ್ಹಜ್ಯಾ ಆವಯ್ ಬಾಪಾಯ್ಚ್ಯಾ ಹಾತಿಂ ಕಯ್ದ್ ಆಸ್ಲ್ಲಿ! ಆಜ್ ಹಾಂವ್ ಆಪ್ಣಾಚಿ ಜಿಣಿ ಸ್ವತಂತ್ರಾಯೆಂತ್ ಜಿಯೆಂವ್ಕ್ ಭಾಯ್ರ್ ಸರ್ಲ್ಯಾಂ! ಆಜ್ ಥಾವ್ನ್ ಆಪ್ಣಾಚಿ ಜಿಣಿ ಆಪ್ಣೆ ಕಶೆಂ ಜಿಯೆಂವ್ಕ್ ಜಾಯ್ ಮ್ಹಳ್ಳೊ ನಿರ್ಧಾರ್ ಕರ್ಚೆಂ ಹಕ್ಕ್ ಫಕತ್ತ್ ಮ್ಹಾಕಾ ಮಾತ್ರ್ ಆಸಾ! ಫಕತ್ತ್ ಮ್ಹಾಕಾ!" ಶೀತಲ್ ಕಸಲ್ಯಾಗೀ ಭಾವನಾಂನಿ ಮ್ಹಳ್ಳ್ಯಾ ಪರಿಂ ಉಲಯ್ತಾಲೆಂ.
"ತುಂ ಜಾಣಾಂಯ್? ಬೋವ್ಶ್ಯಾ ತುಂ, ಮಿಶೇಲಾಕ್ ಆನಿ ಮ್ಹಾಕಾ ಏಕ್ ಡ್ರೈವರ್ ಮಾತ್ರ್! ತಾಚ್ಯೆ ಭಾಯ್ರ್ ಆಮ್ಚೆ ಮಧೆಂ ಕಾಂಯ್ ಸಂಭಂಧ್ ನಾ! ಜಾಲ್ಯಾರ್ಯ್ ಕಿತ್ಯಾಕ್ಗೀ ಮ್ಹಾಕಾ ಆಮ್ಚೆ ಮಧೆಂ ಸಂಭಂಧ್ ಆಸಾ ಮ್ಹಣೊನ್ ಭೊಗ್ತಾ! ಸಂಸಾರ್ ಕಿತೆಂ ಮ್ಹಣೊನ್ ನೆಣಾಂ ಆಸ್ಲ್ಲ್ಯಾ ಮ್ಹಾಕಾ ತುವೆಂ ಸಂಸಾರಾಕ್ ದಾಖಯಿಲ್ಲೊ ಸಂಭಂಧ್....! ಜಿವಿತಾಚೊ ಅರ್ಥ್ ಕಳಿತ್ ನಾತ್ಲೆಲ್ಯಾ ಮ್ಹಾಕಾ ತುವೆಂ ಜಿವಿತಾಕ್ ಜಿಯೆಂವ್ಕ್ ಶಿಕಯಿಲ್ಲೊ ಸಂಭಂಧ್....! ವಾಸ್ತವಾಚಾ ಸತಾ ಥಾವ್ನ್ ಚಡ್ ಪಯ್ಸ್ ಆಸ್ಲ್ಲ್ಯಾ ಹ್ಯಾ ದೊಳ್ಯಾಂಕ್ ಉಜ್ವಾಡ್ ಫಾಂಕಯಿಲ್ಲೊ ಸಂಭಂಧ್....!" ಉಲಂವ್ಚ್ಯಾ ಶೀತಲಾನ್ ಸವ್ಕಾಸ್ ಆಪ್ಲ್ಯಾ ದಾವ್ಯಾ ಹಾತಾನ್ ಆಪ್ಲ್ಯಾ ಕಪಾಲಾಕ್ ಪೊಶೆಲೆಂ.
"ಶೀತಲ್....?" ಜಿಮ್ಮಿ ಆತಾಂ ಉಲಯ್ಲೊ. "ಪಳೆ ಶೀತಲ್! ಆತಾಂ ತುಂ ಕಾಜಾರ್ ಜಾಲ್ಲೆಂ ನವೆಂ ಹೊಕಾಲ್! ತುವೆಂ ಆತಾಂ ಸಂತೊಸಾನ್ ರಾವೊಂಕ್ ಜಾಯ್! ಖಂಯ್ಚರ್ ತುಂ ಆಸ್ಲ್ಯಾರ್ಯ್ ಜರ್ ತರ್ ತುಂ ಖುಶ್ ಆಸ್ಲ್ಯಾರ್ ಹಾಂಗಾ ಹಾಂವ್ ಆನಿ....." ಥೊಡೊ ವೇಳ್ ಮೌನ್ ರಾವ್ಲ್ಲೊ ಜಿಮ್ಮಿ "ತುಂ ಖುಶ್ ಆಸ್ಲ್ಯಾರ್ ಹಾಂಗಾ ಮಿಶೇಲ್ಯ್ ಖುಶ್ ಆಸ್ಲ್ಲ್ಯಾಪರಿಂಚ್! ತುಜೆ ಸಂಭಂಧ್ ಸಗ್ಳೆ ತುಜ್ಯಾ ಸಾಂಗಾತಾ ಆಸ್ತೆಲೆ! ಮ್ಹಜೆಂ ಕೋಣ್ ಜಾಣಾಂ? ಕಿತೆಂಯ್ ಜಾಂವ್ ತುಮಿ ದೊಗಾಂಯ್ನಿ ಸಂತೊಸಾನ್ ಆಸೊಂಕ್ ಜಾಯ್!" ಜಿಮ್ಮಿ ಉಲಯ್ತಾನಾ ಮಿಶೇಲ್ ಜಿಮ್ಮಿಕ್ಚ್ ಪಳೆತಾಲೆಂ. ಜಿಮ್ಮಿಚಾ ತಾಳ್ಯಾಂತ್ ಕಸಲಿಗೀ ಏಕ್ ಖರ್ಗೊಣಿ ತಾಕಾ ಸ್ಪಶ್ಟ್ ದಿಸೊಂಕ್ ಲಾಗ್ಲಿ.
"ಎಕೇಕ್ ಪಾವ್ಟಿಂ ಆವೇಶಾಂತ್, ಹಾವೆಂ, ತುಜ್ಯಾ ಯಾ ಮಿಶೇಲಾಚಾ ಖಾಸ್ಗಿ ಜಿವಿತಾಂತ್ ಪ್ರವೇಶ್ ಕೆಲ್ಲಿ ಖಂಡಿತ್ ಮ್ಹಜಿ ಚೂಕ್!" ಜಿಮ್ಮಿನ್ ಮುಖಾರ್ಸಿಲೆಂ "ಪುಣ್ ಮ್ಹಜೊ ಉದ್ದೇಶ್ ಫಕತ್ತ್ ತುಮ್ಚ್ಯಾ ಫುಡಾರಾಚಾ ಬರ್ಯಾಪಣಾಚೊ ಶಿವಾಯ್ ದುಸ್ರೊ ಕಾಂಯ್ಚ್ ನಾ! ಆಜ್ ತುಂ ಕಾಜಾರ್ ಜಾಲಾಂಯ್. ಫಾಲ್ಯಾಂ ತುಂ ಆಮ್ಕಾಂ ಸೊಡುನ್ ವೆತೆಲೆಂಯ್. ಪೊರ್ವಾಂ ಮಿಶೇಲ್ಯ್ ವೆತೆಲೆಂ! ಬಾಬ್ ಆನಿ ಮಾಂಯ್ ಕಿತ್ಲೊ ಥೇಂಪ್ ಆಸ್ತೆಲಿಂ? ತಿಂ ಆಸ್ತಾ ವರೇಗ್ ಹಾಂವ್ ಆಸಾಂ! ತ್ಯಾ ಉಪ್ರಾಂತ್......!" ಜಿಮ್ಮಿಕ್ ಮುಕಾರ್ ಉಲಂವ್ಕ್ ಜಾಲೆಂ ನಾ.
ತಿತ್ಲ್ಯಾರ್!
ತಾಚ್ಯಾ ದೊಳ್ಯಾಂ ಮುಕಾರ್ ತೆಂಚ್ ಜಿರೊನ್ ಗೆಲ್ಲ್ಯಾ ಪೊಲ್ಯಾಂಚೆಂ..... ರಗಾತ್ ನಾಸ್ತಾಂ ಧವೆಂ ಜಾಲ್ಲ್ಯಾ ಮುಖಮಳಾಚೆಂ.... ಕಾಳ್ಬಾಣ್ ಪಡ್ಲೆಲ್ಯಾ ದೊಳ್ಯಾಂಚೆಂ ಮುಗ್ದ್ ಮುಖಮಳ್ ತಾಚ್ಯಾ ದೊಳ್ಯಾಂ ಫುಡೆಂ ಯೇವ್ನ್ ಉಭೆಂ ಜಾಲೆಂ. ತಾಣೆಂ ಆತಾಂ ತ್ಯಾ ಜನೆಲಾಚಾ ಲೊಂಕ್ಡಾಚಾ ಸರಳಾಂಕ್ ಭಳಾನ್ ಮ್ಹಳ್ಳ್ಯಾಪರಿಂ ಆಪ್ಲ್ಯಾ ಹಾತಾನ್ ದಾಂಬುನ್ ಧರ್ಲೆಂ.
ತಿತ್ಲ್ಯಾರ್!
ಜಿಮ್ಮಿ ಮೌನ್ ಜಾಲ್ಲೊ ಪಳೆಲ್ಲೆಂ ಶೀತಲ್,
"ಪುಣ್ ತುಜೊ ಉಡಾಸ್ ಮಾತ್ರ್ ಸದಾಂ ಯೆತಲೊ!" ಜಿಮ್ಮಿನ್ ಅರ್ಧ್ಯಾರ್ ರಾವಯಿಲ್ಲ್ಯಾ ಉತ್ರಾಂಕ್ ಉಡಾಸ್ ಕಾಡುನ್ ತ್ಯಾ ಉತ್ರಾಂಕ್ ಶೀತಲಾನ್ ಸಂಪೂರ್ಣ್ ಕೆಲೆಂ.
ತಿತ್ಲೆಂಚ್!
ಭಲಾತ್ಕಾರೆನ್ ಮ್ಹಳ್ಳ್ಯಾಪರಿಂ ಜಿಮ್ಮಿನ್ ಆಪ್ಲ್ಯಾ ವೊಂಟಾರ್ ಹಾಸೊ ಹಾಡ್ಲ್ಯೊ. ತೊ ಆತಾಂ ಶೀತಲಾಚಾ ತೆವ್ಶಿಂ ಘುಮ್ವ್ಲೊ.
ಶೀತಲಾಚಾ ಮುಕಾರ್ ತಾಣೆಂ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡ್ಲ್ಯೊ.
"ಮ್ಹಜ್ಯೆರ್ ತುಕಾ ರಾಗ್ ಆಸಾ ಶೀತಲ್?" ತಾಣೆಂ ವಿಚಾರ್ಲೆಂ.
"ಕಿತ್ಯಾಕ್?"
"ಹಾಂವ್ ಜಾಣಾಂ! ಹಾಂವ್ ಜಾಣಾಂ ಕೀ ಸಭಾರ್ ಪಾವ್ಟಿಂ ತುಜಿ ನೀದ್ ಫಾರುಂಕ್ ಹಾಂವ್ ಕಾರಾಣ್ ಜಾಲಾಂ!"
"ತ್ಯಾಚ್ ಖಾತಿರ್ ಆಜ್ ಹಾಂವ್ ಮ್ಹಜ್ಯಾ ಫುಡಾರಾಚೆಂ ಚಿಂತುನ್ ಸಂತೊಸಾನ್ ಆಸಾಂ!" ಶೀತಲಾಚ್ಯಾ ಮುಖಮಳಾರ್ ಸಂತೊಸ್ ಉಮಾಳ್ಳೊ.
"ತುಕಾ ಏಕ್ ಸವಾಲ್ ವಿಚಾರುಂ.....?"
"ವಿಚಾರ್!" ಶೀತಲಾನ್ ಆಪ್ಲ್ಯಾ ಕಪಾಲಾರ್ ಗಳ್ಚ್ಯಾ ಕೆಸಾಂಕ್ ಆಪ್ಲ್ಯಾ ಹಾತಾನ್ ಪಾಟಿಂ ಕೆಲೆಂ.
"ತುಂ ನಿಜಾಯ್ಕ್ಯ್ ತುಜ್ಯಾ ಜಿವಿತಾಂತ್ ನವೆಂಸಾಂವ್ ಹಾಡುಂಕ್ ಪಾವ್ತೆಲೆಂಯ್.....?"
"ತುಕಾ ದುಬಾವ್ ದಿಸ್ತಾ?"
"ನಾ! ಪುಣ್ ಕಿತ್ಯಾಕ್ಗೀ ತುಕಾ ಪಳೆತಾನಾ ಬಾಪಾಯ್ಚಾ ಗುಸ್ತಾರ್ ತಾಚ್ಯಾ ಜಿವಿತಾಚೊ ವಾಂಟೊ ಜಾಲ್ಲೆಂ ತುಂ ಸಮ್ಜಣಿ ಯೆವ್ನ್ಯ್ ತ್ಯಾ ವಾಂಟ್ಯಾ ಥಾವ್ನ್ ವಿಂಗಡ್ ಜಾಂವ್ಕ್ ಸಕ್ಲೆಂ ನಾಂಯ್. ತರ್, ಆಜ್ ತುಜ್ಯಾ ಘೊವಾಚ್ಯಾ ಜಿವಿತಾಚೊ ವಾಂಟೊ ಜಾಂವ್ಕ್ ವೆಚೆಂ ತುಂ......!"
"ಹಾಂವ್ ಜಾಣಾಂ ಜಿಮ್ಮಿ ತುಂ ಕಿತೆಂ ಸಾಂಗೊಂಕ್ ಸೊಧ್ತಾಯ್ ತೆಂ!" ಜಿಮ್ಮಿಚಿಂ ಉತ್ರಾಂ ಮಧೆಂಚ್ ತುಟವ್ನ್ ಶೀತಲ್ ಉಲಯ್ಲೆಂ. "ಬಾಪಾಯ್ಚಾ ಗುಸ್ತಾರ್ ಹಾಂವ್ ಮ್ಹಾಕಾ ಸಮ್ಜಣಿ ಯೆಂವ್ಚ್ಯಾ ಪಯ್ಲೆಂಚ್ ತಾಚ್ಯಾ ಜಿವಿತಾಚೊ ವಾಂಟೊ ಜಾಲ್ಲಿಂ! ಘೊವಾಚ್ಯಾ ಗುಸ್ತಾರ್, ತಾಚ್ಯಾ ಜಿವಿತಾಚೊ ವಾಂಟೊ ಜಾಂವ್ಚ್ಯಾ ಪಯ್ಲೆಂಚ್ ಹಾಂವ್ ಜಿವಿತಾಕ್ ಸಮ್ಜಾಲ್ಯಾಂ!"
"ಪುಣ್ ತುಂ ಎದೊಳ್ಚ್ ತುಜ್ಯಾ ಘೊವಾಚಾ ಜಿವಿತಾಚೊ ವಾಂಟೊ ಜಾಲಾಂಯ್!"
"ಹೆಂ ಚಲಿಯೆಚೆಂ ದುರ್ಭಾಗ್ಯ್ಪಣ್!"
"ಹೆಂಚ್ ತುಜೆಂ ಸೌಭಾಗ್ಯ್ಪಣ್ ಕಿತ್ಯಾಕ್ ಜಾಂವ್ಕ್ ನಜೊ....?"
"ಮ್ಹಳ್ಯಾರ್......?"
"ಜಿವಿತ್ ಆಪಾಪಿಂಚ್ ಸಗ್ಳೆಂ ಲಿಸಾಂವ್ ಶಿಕಯ್ತಾ ಶೀತಲ್. ಹ್ಯಾ ಲಿಸಾಂವಾಕ್ ಆಮಿಂ ಕಿತ್ಲೆಂ ಮಾಂದುನ್ ಘೆತಾಂವ್ ಆನಿ ಆಮಿ ಹೆಂ ಮಾಂದುನ್ ಘೆತ್ಲ್ಯಾ ಉಪ್ರಾಂತ್ ಆಮ್ಚಿ ಜಿಣಿ ಕಸಲ್ಯಾ ಪಾಂವ್ಡ್ಯಾರ್ ಉಭಿ ಆಸಾ ಮ್ಹಳ್ಳೆಂ ತೆಂ, ಆಮಿ ಶಿಕ್ಲೆಲ್ಯಾ ತ್ಯಾ ಲಿಸಾಂವಾ ಸವೆಂ ತುಕುನ್ ಪಳಂವ್ಚ್ಯಾಂತ್ ಸಗ್ಳೆಂ ಹೊಂದೊನ್ ಆಸಾ! ನಾ ತರ್....?"
"ವೇಳ್ ಯೆತಾ ಆನಿ ಘಡಿತ್ ಘಡ್ತಾ!""ಹೆಂಚ್ ಸಾಂಗೊಂಕ್ ಆಶೆತಾಯ್ ತುಂ?" ಜಿಮ್ಮಿನ್ ಅರ್ಧ್ಯಾರ್ಚ್ ರಾವಯಿಲ್ಲ್ಯಾ ಉತ್ರಾಂಕ್ ಶೀತಲಾನ್ ಸಂಪೂರ್ಣ್ ಕೆಲಿಂ.
ಶೀತಲಾಚಾ ಸಮ್ಜಣೆಕ್ ಪಳವ್ನ್ ಜಿಮ್ಮಿಕ್ ಆಜ್ಯಾಪ್ ಜಾಲೆಂ.
’ಕೋಣ್ ಸಾಂಗ್ತಾ.... ಚಲಿ ಚಲ್ಯಾಚಾ ಬರಾಬರ್ ರಾವೊಂಕ್ ಸಕಾನಾ ಮ್ಹಣ್?’ ಜಿಮ್ಮಿ ಮತಿಂತ್ಚ್ ಉದ್ಗಾರ್ಲೊ.
"ತೆಂ ಸಗ್ಳೆಂ ಸೊಡ್ ಆತಾಂ! ಮಿಶೇಲಾಕ್ ತುಜ್ಯಾ ಕಾಜಾರಾಚಿ ಪಾರ್ಟಿ ಪಾವೊಂಕ್ ನಾ. ಮುಂಬಯಿ ವೆಚ್ಯಾ ಪಯ್ಲೆಂ ಹ್ಯಾ ಪಾರ್ಟೆಚೊ ಉಡಾಸ್ ದವರ್! ಏಕ್ ಪಾವ್ಟಿಂ ಮುಂಬಯಿ ಪಾವ್ಲ್ಯಾ ಉಪ್ರಾಂತ್ ಘೊವ್, ಭುರ್ಗಿಂ, ಘರ್ ಮ್ಹಣ್ತಾನಾ ತುಕಾ ಮಿಶೆಲಾಚೊ ಉಡಾಸ್ ಆಯ್ಲೊ ಜಾಲ್ಯಾರ್ ತೆಂಚ್ ವರ್ತೆಂ! ಕೆದಾಳಾ ದಿತಾಯ್ ಪಾರ್ಟಿ? ಹಾಂವ್ ಡ್ರೈವರ್ ಜಾವ್ನ್ ಮಾತ್ರ್ ಯೆತಾಂ!"
ಜಿಮ್ಮಿಚ್ಯಾ ತೊಂಡಾ ಥಾವ್ನ್ ಆಯ್ಕಾಲ್ಲ್ಯಾ ಹ್ಯಾ ಉತ್ರಾಂಕ್ ಪಳವ್ನ್ ಶೀತಲ್ ಆಪ್ಣಾಕ್ಚ್ ಪಾತ್ಯೆಲೆಂ ನಾ. ಎದೊಳ್ ಜಿಮ್ಮಿನ್ ಆಶೆಂ ತಾಂಚೆ ಲಾಗಿಂ ಉಲಯಿಲ್ಲೆಂ ತೆಂ ನೆಣಾಂ. ಹರ್ಯೆಕಾ ವಗ್ತಾರ್ ಆಪ್ಲ್ಯಾಚ್ ತ್ಯಾ ದ್ರಡ್ ವ್ಯಕ್ತಿತ್ವಾಚಾ ಸ್ವಭಾವಾನ್ ಆಸ್ಚ್ಯಾ ಜಿಮ್ಮಿಕ್ ಶಿವಾಯ್ ಹ್ಯಾ ಆತಾಂ ತಾಚ್ಯೆಲಾಗಿಂ ಉಲಂವ್ಚ್ಯಾ ಜಿಮ್ಮಿಕ್ ಹ್ಯಾ ಆದಿಂ ತಾಣೆಂ ಪಳಯಿಲ್ಲೆಂ ನಾ. ಇತ್ಲೆಂ ಪರಿವರ್ತನ್.....? ಖಂಯ್ ಕಶೆಂ ಕಿತ್ಯಾಕ್ ಮ್ಹಳ್ಳೆಂ ತೆಂ ಕಾಂಯ್ಚ್ ಶೀತಲಾಕ್ ಕಳ್ಳೆಂ ನಾ. ತೆಂಯ್ ಥೊಡ್ಯಾಚ್ ಖಿಣಾ ಭಿತರ್....!?
"ಆಶೆಂಚ್ ತುಂ ಸಂತೊಸಾನ್ ಉಲವ್ನ್ ಆಸ್ಲ್ಲೊಯ್ ಜಾಲ್ಯಾರ್.....!?"
ಶೀತಲಾನ್ ಸಾಂಗ್ಲ್ಲೆಂ ಆಯ್ಕಾಲ್ಲೊ ಜಿಮ್ಮಿ ಏಕ್ಚ್ ಪಾವ್ಟಿಂ ಪರ್ತ್ಯಾಕ್ ಆಪ್ಲ್ಯಾ ಸಂಸಾರಾಕ್ ಪಾಟಿಂ ಆಯ್ಲೊ.
"ಬೋವ್ಶಾ ಹಾವೆಂ ತುಕಾ ಪಯ್ಲೆ ಪಾವ್ಟಿಂ ಆಶೆಂ ಉಲಂವ್ಚೆ ಪಳಂವ್ಚೆಂ!" ಶೀತಲ್ ಉದ್ಗಾರ್ಲೆಂ.
"ಸಗ್ಳೆಂ ಆಪಾಪ್ಲ್ಯಾಂಚೆಂ ಶೀತಲ್! ಹ್ಯಾ ಸಂಸಾರಾಂತ್ ಕೋಣ್ ಆಪ್ಣಾಚೆಂ ಚಿಂತಾ ಪಳೆ ತೊ ಮಾತ್ರ್ ಖುಶ್ ರಾವೊಂಕ್ ಸಕ್ತಾ ಶಿವಾಯ್ ತುವೆಂ ದುಸ್ರ್ಯಾಂಚೆಂ ಚಿಂತುಂಕ್ ಗೆಲ್ಯಾರ್..... ತುಂ ಹಾಸೊಂಕ್ ಕಿತೆಂ ರಡೊಂಕ್ಯ್ ಸಕಾನಾಂಯ್!"
ಉಲಯಿಲ್ಲೊ ಜಿಮ್ಮಿ ಮಿಶೇಲಾಚಾ ಕುಶಿಕ್ ಘುಂವ್ಲೊ.
"ಮಿಶೇಲಾಕ್ಚ್ ಪಳೆ! ಫಾಂತ್ಯಾರ್ ಥಾವ್ನ್ ಮ್ಹಜ್ಯೆರ್ ರಾಗಾರ್ ಆಸಾ!"
ಜಿಮ್ಮಿಚಿಂ ಉತ್ರಾಂ ಆಯ್ಕೊನ್ ಮಿಶೇಲಾನ್ ತಕ್ಲಿ ಉಕ್ಲುನ್ ಜಿಮ್ಮಿಕ್ಚ್ ಪಳೆಲೆಂ. ತಾಣೆಂ ಚಿಂತುಂಕ್ ಪಾಸೊನ್ ನಾತ್ಲ್ಲೆಂ ಜಿಮ್ಮಿ ಇತ್ಲ್ಯಾ ಧಯ್ರಾನ್ ಶೀತಲಾಲಾಗಿಂ ಹ್ಯಾ ವಿಶಯಾಂತ್ ಉಲಯ್ತ್ ಮ್ಹಣೊನ್.
"ರಾಗಾರ್.....? ಕಿತ್ಯಾಕ್?"
ಶೀತಲ್ ಆತಾಂ ಜಿಮ್ಮಿಲಾಗಿಂ ತೊ ಆಪ್ಣಾಚೊಚ್ ಮ್ಹಳ್ಳ್ಯಾ ಭಾಶೆನ್ ಉಲಯ್ತಾಲೆಂ.
"ಆತಾಂ ಕಿತೆಂ ಸಾಂಗೊಂ ತುಕಾ?" ಮ್ಹಳ್ಳೊ ಜಿಮ್ಮಿ ಎಕಾಚ್ ಫರಾ ಕಿತೆಂಗೀ ಉಡಾಸ್ ಆಯಿಲ್ಲ್ಯಾ ಪರಿಂ ಜಾವ್ನ್ "ತುಜ್ಯಾ ಕಾಜಾರಾಕ್ ಹಾಂವ್ ಯೇಂವ್ಕ್ ನಾ. ಪುಣ್ ತುಜ್ಯಾ ಕಾಜಾರಾ ಬಾಬ್ತಿನ್ ತುಕಾ ಏಕ್ ಗಿಫ್ಟ್ ಮಾತ್ರ್ ದಿತಾಂ. ತಶೆಂ ವ್ಹಡ್ಲೆಂ ಕಾಂಯ್ ನಾ. ಪುಣ್ ತುಕಾ ಪಸಂದ್ ಜಾತೆಲೆಂ!"
"ಕಾಜಾರಾಕ್ ಯೆಂವ್ಚೊ ನಾ ಮ್ಹಣೊನ್ ಇನ್ಕಾರ್ ಕೆಲ್ಲ್ಯಾ ತುಜೆ ಥಾವ್ನ್ ಹಾಂವ್ ಗಿಫ್ಟ್ ಘೆತೆಲಿಂ ಮ್ಹಣೊನ್ ತುಂ ಚಿಂತಾಯ್?" ಶೀತಲಾನ್ ಆಪ್ಲ್ಯಾ ತೊಂಡಾರ್ ಕ್ರತಕ್ ರಾಗ್ ಹಾಡವ್ನ್ ಮ್ಹಳ್ಳ್ಯಾಪರಿಂಸಾಂಗ್ಲೆಂ.
"ಚಲ್ಯಾಂ ಮಿಶೇಲ್ ಘರಾ ರಾಕ್ತಾತ್ ಕೊಣ್ಣಾ! ಬರೆಂ ಜಾಲೆಂ ಎದೊಳ್ ಕೊಣಾಯ್ಚೆಂಯ್ ಪೋನ್ ಯೇಂವ್ಕ್ ನಾ ತೆಂ. ಜೆವ್ಣಾಚೊ ವೇಳ್ಯ್ ಜಾಲೊ. ಅಂಕಲಾಕ್ ಪಳಂವ್ಕ್ ಸಾಂಜೆರ್ ಯೆವ್ಯಾಂ!" ಶೀತಲ್ ಉಟೊನ್ ಉಭೆಂ ಜಾಲೆಂ.
"ಶೀತಲ್....!" ವ್ಹಳೂ ಉಲಯ್ಲೊ ಜಿಮ್ಮಿ. ಹ್ಯಾ ತಾಚ್ಯಾ ಆತಾಂಚಾ ತಾಳ್ಯಾಂತ್ ತೆಂ ಸ್ವಾಭಾವೀಕ್ ದ್ರಡ್ಪಣ್ ನಾತ್ಲೆಲೆಂ. ಎಕಾ ಥರಾಚಿ ಮೊವಾಳಾಯ್ ಆಸ್ಲ್ಲಿ. "ಶೀತಲ್... ಆಜ್ ಪಯ್ಲ್ಯಾ ಪಾವ್ಟಿಂ ಆಮಿಂ ಎಕಾಮೆಕಾ ಇತ್ಲ್ಯಾ ಬರ್ಯಾ ಭಾಶೆನ್ ಉಲಯ್ಲ್ಯಾಂವ್. ಫಾಲ್ಯಾಂ ಪೊರ್ವಾಂ ತುಂ ಮುಂಬಯಿ ವೆತೆಲೆಂಯ್. ಕಿತೆಂ ಆಮಿ ಆಜ್ ಹಾಂಗಾ ಕ್ಯಾಂಟೀನಾಂತ್ ಸಾಂಗಾತಾ ಜೇಂವ್ಕ್ ಸಕಾನಾಂವ್.....?"
"ಘರಾ ರಾಕ್ತಾತ್ ಜಿಮ್ಮಿ!"
"ತುಜ್ಯಾ ಕಾಜಾರಾ ಲೆಖಾರ್ ಮ್ಹಜ್ಯಾ ತರ್ಫೆನ್!"
ಜಿಮ್ಮಿಚಾ ವಿನತೆಕ್ ತಾಚೆಂ ತೊಂಡ್ ಆನಿ ತ್ಯಾ ತೊಂಡಾ ವಯ್ಲೊ ತೊ ಛಾರೊ ತಾಕಾ ಸಾಂಗಾತ್ ದಿತಾ ತೆಂ ಪಳವ್ನ್ ಶೀತಲಾಕ್ ಕಾಂಯ್ಚ್ ಕರುಂಕ್ ಜಾಲ್ನಾ. ತೆಂ ತಶೆಂಚ್ ಜಿಮ್ಮಿಕ್ ಪಳಂವ್ಚ್ಯಾರ್ ಪಡ್ಲೆಂ.
"ಚಲ್ ಯಾ....! ವ್ಹಳೂ ತೊಂಡಾರ್ ಹಾಸೊ ಹಾಡಿತ್ತ್ ಶೀತಲಾನ್ ಪರ್ವಣ್ಗಿ ದಿಲಿ.
*************
ವೊರಾಂ ಸಾಂಜೆಚಿಂ ಸ ಜಾಲ್ಲಿಂ.
ಧನ್ಫಾರಾಂ ಆಸ್ಪತ್ರೆಕ್ ಆಯಿಲ್ಲ್ಯಾ ಮಿಶೇಲಾಕ್ ಆಪ್ಲ್ಯಾ ಆಜ್ಯಾಕ್ ಪಳಂವ್ಕ್ ಸಾದ್ಯ್ ಜಾಂವ್ಕ್ ನಾತ್ಲೆಲೆಂ. ಹ್ಯಾಚ್ ಖಾತಿರ್ ತೆಂ ಆತಾಂ ಆಸ್ಪತ್ರೆಕ್ ಆಯಿಲ್ಲೆಂ.
ಐ.ಸಿ.ಯು. ಚ್ಯಾ ದಾರಾ ಮುಕ್ಲ್ಯಾ ಪಾರ್ಲಾರಾಂತ್ಲ್ಯಾ ಬಾಂಕಾರ್ ಬಸ್ಲೆಲ್ಯಾ ಮಿಶೇಲಾಚಾ ಕಾಳ್ಜಾಂತ್, ವೆಳಾಸೊ ಕಾಂಟೊ ಧಕ್... ಧಕ್... ಕರುನ್ ಮಾರ್ಲ್ಲ್ಯಾ ಪರಿಂ ಜಾಂವ್ಕ್ ಜಾಲೆಂ.
ಆಪ್ಣಾ ಭೊಂವಾರಿ ಭೊಂವ್ಚೊ ವೇಳ್ ಕಿತ್ಯಾಕ್ಗೀ ಆಪ್ಣಾಕ್ ಚಡ್ ಆನಿ ಚಡ್ ಲಾಗಿಂ ಜಾವ್ನ್ ಯೆತಾ ತಶೆಂ ತಾಕಾ ದಿಸ್ಲೆಂ. ತಾಚ್ಯಾ ದಿಸವ್ಣೆಕ್ ಸಾಂಗಾತ್ ದೀವ್ನ್ ಕಾಳ್ಜಾಚಿ ಉಡಿ ತೊ ಸೆಕುಂದಾಚೊ ಕಾಂಟೊ ಟಕ್... ಟಕ್.... ಕರುನ್ ಮಾರ್ಚ್ಯಾ ಪರಿಂ ಮಾರ್ತಾಲಿ.
ಐ.ಸಿ.ಯು.ಚ್ಯಾ ಮುಖ್ಲ್ಯಾ ಬಾಂಕಾರ್ ಬಸ್ಲೆಲ್ಯಾ ಕಡೆನ್ ಮಿಶೇಲಾಕ್ ಬಸೊಂಕ್ ಜಾಲ್ನಾಂ. ತೆಂ ಸವ್ಕಾಸ್ ಉಟೊನ್ ಉಭೆಂ ಜಾಲೆಂ. ಕಸಲೆಂಗೀ ಏಕ್ ಅವ್ಯಕ್ತ್ ವಾತಾವರಣ್ ತಾಚ್ಯಾ ಭೊಂವಾರಿ ರುತಾ ಜಾತಾಲೆಂ.
ತಶೆಂಚ್ ಉಭೆಂ ಜಾಲ್ಲ್ಯಾ ಕಡೆನ್ ಥಾವ್ನ್ಚ್ ಮಿಶೇಲಾನ್, ಆಪ್ಲಿ ನದರ್ ತೆವ್ಶಿಂ ಜಿಮ್ಮಿ ವಯ್ರ್ ವೆಲಿ. ತೊ ಆಪ್ಣಾಕ್ಚ್ ಪಳೆತಾ ತಶೆಂ ದಿಸ್ತಾನಾ, ಆಪ್ಣಾಚಾ ದೊಳ್ಯಾಂನಿ ರೂಪ್ ರೂಪ್ ಉಪ್ಯೆವ್ನ್ ಯೆಂವ್ಚ್ಯಾ ಅವ್ಯಕ್ತ್ ರಿತಿಚಾ ಭಗ್ಣಾಂಕ್ ತಾಚ್ಯಾ ದೊಳ್ಯಾಂ ನದ್ರೆ ಥಾವ್ನ್ ಮಿಶೇಲಾನ್ ಚುಕಂವ್ಚೆಂ ಪ್ರಯತ್ನ್ ಕೆಲೆಂ.
ತಿತ್ಲ್ಯಾರ್!
ಐ.ಸಿ.ಯು. ಚೆಂ ದಾರ್ ಉಗ್ತೆಂ ಜಾವ್ನ್ ತ್ಯಾ ದಾರಾ ಥಾವ್ನ್ ಭಾಯ್ರ್ ಆಯಿಲ್ಲೆಂ ಏಕ್ ಚಲಿ ಮುಕಾರ್ ಚಲೊಂಕ್ ಲಾಗ್ತಾನಾ ಏಕ್ ಪಾವ್ಟಿಂಚ್ಯಾಕ್ ಮಿಶೇಲಾನ್ ಆಪ್ಲೊ ಉಸ್ವಾಸ್ ದಾಂಬುನ್ ಧರ್ಲ್ಲೊ.
ಉಗ್ತೆಂ ಜಾಲ್ಲ್ಯಾ ದಾರಾ ಥಾವ್ನ್ ತಾಚಿ ಆಜಿಚ್ ಭಾಯ್ರ್ ಆಯ್ಲಿ ಮ್ಹಣೊನ್ ಮಿಶೇಲಾನ್ ಚಿಂತ್ಲ್ಲೆಂ.
ಆತಾಂ ಪರ್ತ್ಯಾಕ್ ಮಿಶೇಲಾಚಾ ಕಾಳ್ಜಾಂತ್ ದಡ್ದಡೆ ವ್ಹಾಡೊಂಕ್ ಲಾಗ್ಲೆ.
ತೆಂ ಆಸ್ಪತ್ರೆಕ್ ಯೇವ್ನ್ ಎದೊಳ್ಚ್ ವೀಸ್ ಮಿನುಟಾಂ ಜಾಲ್ಲಿಂ.
ಹ್ಯಾ ವೀಸ್ ಮಿನುಟಾಂಕ್ ವೀಸ್ ವರ್ಸಾಂ ಮ್ಹಳ್ಳ್ಯಾ ಪರಿಂ ಮಿಶೇಲಾನ್ ಪಾಶಾರ್ ಕೆಲ್ಲಿಂ.
ಐ.ಸಿ.ಯು. ಂತ್ಲ್ಯಾ ಪಿಡೆಸ್ತಾಂಕ್ ವಿಸಿಟಿಂಗ್ ಕರ್ಚ್ಯಾಕ್ ಐ.ಸಿ.ಯು. ಚೆಂ ದಾರ್ ಉಗ್ತೆಂ ಜಾವ್ನ್ ಫಕತ್ತ್ ಪಾಂಚ್ ಮಿನುಟಾಂ ಮಾತ್ರ್ ಜಾಲ್ಲಿಂ. ಐ.ಸಿ.ಯು. ಂತ್ಲ್ಯಾ ಪಿಡೆಸ್ತಾಂ ಪಯ್ಕಿ ಜೆರೊಮಾಕ್ ಪಳಂವ್ಕ್ ಮ್ಹಣೊನ್ ರಾಕೊನ್ ಬಸ್ಲೆಲ್ಯಾಂತ್ ಆಸ್ಲ್ಲಿ ಮ್ಹಳ್ಯಾರ್ ಎಸ್ತೆಲ್, ಮಿಶೇಲ್ ಆನಿ ಜಿಮ್ಮಿ ಮಾತ್ರ್. ಜಿಮ್ಮಿ ತರ್ಯ್ ಕಾಲ್ಚ್ಯಾ ರಾತಿ ಥಾವ್ನ್ ಐ.ಸಿ.ಯು.ಚಾ ದಾರಾಕ್ ಸಾಂಗಾತ್ ದೀವ್ನ್ ಆಸ್ಲ್ಲೊ.
ಮೊನೆ ಸಾಂಗಾತಿ!
ತೆಂ ಐ.ಸಿ.ಯು ಚೆಂ ದಾರ್ಯ್ ಕಾಂಯ್ ಉಲಯ್ನಾತ್ಲ್ಲೆಂ..... ಆಪ್ಲ್ಯಾ ಹರ್ಧ್ಯಾರ್ ಬರವ್ನ್ ಘಾತ್ಲೆಲ್ಯಾ ರಗ್ತಾಳ್ಯಾ ಅಕ್ಷರಾಂಚಾ ವಳ್ಕೆ ಶಿವಾಯ್!
ಹೊ ಜಿಮ್ಮಿಯ್ ತ್ಯಾ ದಾರಾ ಮುಖ್ಲ್ಯಾ ಬಾಂಕಾರ್ ಬಸೊನ್, ಆಪ್ಲ್ಯಾ ಜಿವಿತಾಂತ್ ಉಟೊನ್ ಗೆಲ್ಲ್ಯಾ ತಳ್ಮಳ್ಯಾಂಕ್, ಹ್ಯಾ ಆಸ್ಪತ್ರೆಚಾ ವಾತಾವರಣಾಂತ್ ಉಡಾಸ್ ಹಾಡವ್ನ್, ಆಪ್ಲ್ಯಾ ಕಾಳ್ಜಾಂತ್ ಖತ್ಕತೊನ್ ಯೆಂವ್ಚ್ಯಾ ತ್ಯಾ ಉಮಾಳ್ಯಾಂಕ್, ಅಸಹಾಯಕ್ಪಣಿ ಆಪ್ಲ್ಯಾ ಆತ್ಮ್ಯಾ ಸಂಗಿಂ ನಿವೇದನ್ ಕರ್ಚ್ಯಾ ಶಿವಾಯ್!
ದೊಗ್ಯ್ ಮೊನೆ ಸಾಂಗಾತಿ!
ಎಕ್ಲೊ ಕಾಂಯ್ಚ್ ಕರುಂಕ್ ಸಕಾನಾತ್ಲಲೊ!
ದುಸ್ರೊ ಕಾಂಯ್ ತರ್ಯ್ ಕರುಂಕ್ ಸಕೊನ್ಯ್ ಅಸಹಾಯಕ್ ಜಾಲ್ಲೊ!
ಆನಿ ಆತಾಂ......! ತಿಸ್ರೆಂ!
ಮಿಶೇಲ್.....!
ಸಗ್ಳೆಂ ಆಪ್ಣಾಚಾ ಹಾತಿಂತ್ ಆಸೊನ್ಯ್ ಪರಿಸ್ಥಿತೆಚಾ ಹಾತಾಂತ್ಲ್ಯಾ ಬಾವ್ಲೆ ಪರಿಂ!
ಆಶೆಂಚ್ ಹ್ಯಾ ಐ.ಸಿ.ಯು. ಚ್ಯಾ ದಾರಾಕ್, ದೀಸ್ ರಾತ್ ಸಾಂಗಾತ್ ದಿಂವ್ಚಿಂ, ಆನಿ ಕಿತ್ಲಿಂ ಜಣಾಂ ಆಸ್ತೆಲಿಂ ತೆಂ ಫಕತ್ತ್ ತೆಂ ದಾರ್ ಮಾತ್ರ್ ಜಾಣಾಂ!
ಎದೊಳ್ ಪಾಸೊನ್ ಆಪ್ಲಿ ಆಜಿ ಆಪ್ಲ್ಯಾ ಸವೆಂ ಭಾಯ್ಲ್ಯಾ ಬಾಂಕಾರ್ ಬಸೊನ್ ಠರಾಯಿಲ್ಲ್ಯಾ ಪಿಡೆಸ್ತಾಂಚಾ ಸಂದರ್ಶನಾಚಾ ವೆಳಾಚಿ ರಾಕೊಣ್ ಕರ್ತಾನಾ ಮಿಶೇಲ್ ಇತ್ಲೆಂ ಕಾಳ್ಜಾ ಮನಾಂತ್ ಹಾಲ್ಲ್ಲೆಂ ನಾ.
ಜೆದ್ನಾಂ ಸಂದರ್ಶನಾಚೊ ವೇಳ್ ಆಯಿಲ್ಲೊ ಆನಿ ಎಸ್ತೆಲ್ ಪಯ್ಲೆಂ ಜಾವ್ನ್ ಐ.ಸಿ.ಯು. ಚ್ಯಾ ಭಿತರ್ ಗೆಲ್ಲಿ ತೆದ್ನಾಂ ತಿಚ್ಯಾ ಪಾಟ್ಲ್ಯಾನ್ ದಾಂಪ್ಲ್ಲ್ಯಾ ದಾರಾನ್ ಮಿಶೇಲಾಚಾ ಕಾಳ್ಜಾ ಮನಾಕ್ ಧರುನ್ ಹಾಲಂವ್ಕ್ ಶುರು ಕೆಲ್ಲೆಂ!
ಕಸಲೆಂಗೀ ಏಕ್ ಅವ್ಯಕ್ತ್ ಭ್ಯೆಂ ಭಿರಾಂತ್ ತಾಚ್ಯಾ ಕುಡಿಚಾ ಶಿರಾಂ ಶಿರಾಂನಿ ವ್ಹಾಳೊನ್ ಯೇವ್ನ್ ಆಪ್ಲೆಂ ಸಾಮ್ರಾಜ್ಯ್ ಚಲಯ್ತಾ ತಶೆಂ ತಾಕಾ ಜಾಂವ್ಕ್ ಲಾಗ್ಲ್ಲೆಂ.
ಎಕಾ ಮೊನ್ಯಾ ಖಾಂಬ್ಯಾಕ್ ದುಸ್ರೊ ಮೊನೊ ಖಾಂಬೊಚ್ ಖರೊ ಸಾಂಗಾತಿ!
ದೊಗ್ಯ್ ಎಕಾಮೆಕಾ ಫಕತ್ತ್ ಮೌನ್ಪಣಿ ಉಲಂವ್ಕ್ ಸಕ್ತಾತ್ ಶಿವಾಯ್ ಉತ್ರಾಂನಿ ಉಲಂವ್ಕ್ ನೆಣಾಂತ್! ತಶೆಂಚ್ ಮಿಶೇಲ್ ಆನಿ ಹೆಂ ಐ.ಸಿ.ಯು.ಚೆಂ ದಾರ್!
"ಮಿಶೇಲ್....! ಬಸ್!"
ಬಾಂಕಾರ್ ಬಸ್ಲೆಲ್ಯಾ ಕಡೆನ್ ಥಾವ್ನ್ ಉಟೊನ್ ಮಿಶೇಲಾಚಾ ಲಾಗಿಂ ಆಯಿಲ್ಲ್ಯಾ ಜಿಮ್ಮಿನ್ ಮಿಶೆಲಾಕ್ ಸಾಂಗ್ಲೆಂ.
ಮಿಶೇಲಾಕ್ ಪಳಯ್ತಾನಾ, ತಾಚ್ಯಾ ಚಾಲ್ ಚಮ್ಕಾಣೆಕ್ ಪಳಯ್ತಾನಾ ತೆಂ ಎಕ್ಸುರ್ಪಣಾಚಾ ಆಸ್ಪತ್ರೆಚ್ಯಾ ಭಿರಾಂತೆಚ್ಯಾ ತಳ್ಮಳ್ಯಾಂ ಮಧೆಂ ಶಿರ್ಕಾಲಾಂ ಮ್ಹಳ್ಳೆಂ ತೆಂ ಜಿಮ್ಮಿ ಜಾಣಾಂ ಜಾಲ್ಲೊ.
".........."
ಜಿಮ್ಮಿನ್ ಆಪ್ಣಾಕ್ ಸಾಂಗ್ಲೆಲೆಂ ಆಯ್ಕೊನ್ ಫಕತ್ತ್ ಮಿಶೇಲಾನ್ ಜಿಮ್ಮಿಕ್ ಪಳೆಲೆಂ ಮಾತ್ರ್ ಶಿವಾಯ್ ತೆಂ ಕಾಂಯ್ ಉಲಯ್ಲೆಂ ನಾ.
ತಿತ್ಲೆಂಚ್!
ತಾಚ್ಯಾ ಮತಿಂತ್ ಕಿತೆಂ ತಾಕಾ ಭೊಗ್ಲೆಂ ತೆಂ ತೆಂಚ್ ನೆಣಾಂ. ಏಕ್ ಲಾಂಭ್ ಶ್ವಾಸ್ ಸೊಡ್ಲ್ಲೆಂ ತೆಂ ಹೆವ್ಶಿಂ ಯೇವ್ನ್ ಬಾಂಕಾರ್ ಬಸ್ಲೆಂ. ಕಿತ್ಲ್ಯಾ ವೆಳಾ ಥಾವ್ನ್ ಹೊ ಶ್ವಾಸ್ ತಾಣೆ ಆಪ್ಣಾ ಭಿತರ್ ದಾಂಬುನ್ ಧರ್ಲ್ಲೊ ತೆಂ ತೆಂಚ್ ನೆಣಾಂ.
ಮನಿಸ್ ಶ್ವಾಸಾಕ್ ವೊಡ್ತಾನಾ ಕಿತ್ಲ್ಯಾ ಶಾಂತ್ಪಣಿ ವೊಡುನ್ ಘೆತಾ ತಿತ್ಲಿಚ್ ಶಾಂತಿ ತಾಚ್ಯಾ ಅತ್ಮ್ಯಾಕ್ ಲಾಭ್ತಾ! ಅರಾಮಾಯೆರ್, ಆಪ್ಲ್ಯಾ ಜಿವಾಚೊ ಜೀವ್ ಮ್ಹಣೊನ್ ಮೊಗಾನ್ ವೊಡುನ್ ಘೆತ್ಲ್ಲ್ಯಾ ಶ್ವಾಸಾಂತ್ ಸಗ್ಳಿ ಮನ್ಶಾ ಕೂಡ್ಚ್ ವಿಶ್ರಾಂತಿ ಘೆತಾ.
ಪುಣ್ ಮಿಶೇಲ್.....!
ಮಿಶೇಲ್ ಸಗ್ಳೆಂಚ್ ವಿಸ್ರಾಲ್ಲೆಂ!
ಐ.ಸಿ.ಯು.ಚ್ಯಾ ಭಿತರ್ಲ್ಯಾ ಖಟ್ಲ್ಯಾ ವಯ್ಲ್ಯಾ ಆಪ್ಲ್ಯಾ ಆಜ್ಯಾಕ್ ಸೊಡುನ್ ಮಿಶೆಲ್ ಸಗ್ಳೆಂಚ್ ವಿಸ್ರಾಲ್ಲೆಂ! ಆಪ್ಲ್ಯಾ ಜಿವಾಕ್, ಆಪ್ಲ್ಯಾ ಸಂಸಾರಾಕ್, ನಿಮಾಣೆಂ ಜಾವ್ನ್ ಆಪ್ಲ್ಯಾ ಉಸ್ವಾಸಾಕ್ ಸಯ್ತ್! ತಾಚ್ಯಾ ಮತಿಂತ್ಚ್ ಏಕ್ ಕಾಲ್ಪನಿಕ್ ಸಂಸಾರ್ ಉದೆಲ್ಲೊ. ತ್ಯಾ ಸಂಸಾರಾಂತ್ ತಾಣೆಂ ಜಿವಿತಾಚಾ ವಾಟೆರ್ ಆಪ್ಲ್ಯಾಚ್ ದೊಳ್ಯಾಂನಿ ಪಳೆಲ್ಲಿಂ ಥೊಡಿಂ ಪಿಂತುರಾಂ ಜಿಂ ತಾಚ್ಯಾ ಮತಿಚಾ ಸ್ಪಂದನಾಕ್ ಹಾಲಂವ್ಕ್ ಪಾವ್ಲ್ಲಿಂ. ಜ್ಯಾ ಸ್ಪಂದನಾಂನಿ ಎದೊಳ್ಚ್ ತಾಚ್ಯಾ ಮತಿಚ್ಯಾ ಕೊನ್ಶಾ ಕೊನ್ಶಾಂತ್ ಆಪ್ಲೆಂ ಬಿಡಾರ್ ಕೆಲ್ಲಿಂ ತಿಂ ಪಿಂತುರಾಂ ತಾಕಾ ಆತಾಂ ತ್ಯಾ ಐ.ಸಿ.ಯು. ಚಾ ದಾರಾ ಪಾಟ್ಲೆಂ ದ್ರಶ್ಯ್ ಗುಪಿತ್ ದಾಖಯ್ತಾಲಿಂ. ಹ್ಯಾ ಪಿಂತುರಾ ಥಾವ್ನ್ ಸುಟ್ಕಾ ಜೊಡುಂಕ್ ಸಕಾನಾತ್ಲ್ಲೆಂ ಮಿಶೇಲ್ ಸವ್ಕಾಸ್ ತ್ಯಾ ಪಿಂತುರಾಂಚಾ ಸಂಸಾರಾಂತ್ ವಿಲೀನ್ ಜಾತಾಲೆಂ.
ತಿತ್ಲ್ಯಾರ್!
"ಹಾಯ್ ಮಿಶೇಲ್!"
ಪರಿಚಿತ್ ತಾಳೊ ಆಯ್ಕೊನ್, ಹೆವ್ಶಿಂ ತಾಳೊ ಆಯ್ಕಾಲ್ಲ್ಯಾ ಕುಶಿನ್ ಘುಂವ್ಲ್ಲ್ಯಾ ಮಿಶೇಲಾಕ್, ಮುಕಾರ್ ರಾಯನ್ ದಿಸ್ತಾನಾ ಥೊಡಿಂ ಕ್ಷಣಾಂ ಲಾಗ್ಲಿಂ ತಾಕಾ ತಾಚ್ಯಾ ಮತಿಂತ್ಲ್ಯಾ ಸಂಸಾರಾ ಥಾವ್ನ್ ಭಾಯ್ರ್ ಯೇವ್ನ್ ರಾಯನಾಚಾ ಸಂಸಾರಾಕ್ ಪಾವೊಂಕ್!
"ಹಾಯ್....!" ಸವ್ಕಾಸ್ ಆಪ್ಲ್ಯಾ ತೊಂಡಾರ್ ತಾಣೆಂ ಹಾಸೊ ಹಾಡ್ಲ್ಯೊ.
"ಖಂತಿನ್ ಆಸ್ಲೆಲ್ಯಾ ಪರಿಂ ದಿಸ್ತಾಯ್! ಕಾಂಯ್ ಪ್ರಾಬ್ಲೆಮ್?"
ರಾಯನ್ ಮಿಶೇಲಾಚಾ ಮುಕಾರ್ ಉಭೊ ಜಾಲ್ಲೊ. ತಾಚೆ ದೊನ್ಯ್ ಹಾತ್ ತಾಚ್ಯಾ ಪ್ಯಾಂಟಾಚಾ ಬೊಲ್ಸಾಂತ್ ವಿಶೆವ್ ಘೆತಾಲೆ. ದೊಳ್ಯಾಂಕ್ ದವರ್ಲೆಲೆಂ ರೇಬನ್ ಗಾಗಲ್ ತಾಚ್ಯಾ ದೊಳ್ಯಾಂಕ್ ಥಂಡಾಯ್ ದಿತಾಲೆಂ. ತಕ್ಲೆಕ್ ಕ್ರೀಮ್ ಸಾರವ್ನ್ ಉಗಯಿಲ್ಲೆ ಕೇಸ್ ಸಾರ್ಕೆ ಮಾತ್ಯಾರ್ ಬಸ್ಲ್ಲೆ.
ತಶೆಂಚ್ ತಕ್ಲಿ ಉಭಾರುನ್ ರಾಯನಾಕ್ ಪಳೆಲ್ಲ್ಯಾ ಮಿಶೇಲಾಕ್ ಕಿತ್ಯಾಕ್ಗೀ ರಾಯನ್ ಸಾಕಾಳಿಂ ಆನಿ ಕಾಲ್ ಪಳೆಲ್ಲ್ಯಾಚ್ಯಾಕ್ಯ್ ತಾಕಾ ಆತಾಂ ಚಡ್ ಬರೊ ದಿಸ್ಲೊ.
"ಕಿತೆಂ ಜಾಲೆಂ?" ರಾಯನಾನ್ ಆಪ್ಲ್ಯಾ ಪ್ಯಾಂಟಾಚಾ ಬೊಲ್ಸಾಂತ್ ರಿಗಯಿಲ್ಲ್ಯಾ ಹಾತಾಂಕ್ ಭಾಯ್ರ್ ಕಾಡ್ಲೆ ಆನಿ ತೊ ಮಿಶೇಲಾಚಾ ಲಾಗಿಂ ಬಸ್ಲೊ.
ತಿತ್ಲೆಂಚ್!
"ಬೋವ್ಶಾ ಫ್ರೆಂಚ್ ಫರ್ಫ್ಯೂಮ್ ಜಾಯ್ಜಯ್!" ರಾಯನ್ ಆಪ್ಣಾಚಾ ಲಾಗಿಂ ಬಸ್ತಾನಾ ಆಯಿಲ್ಲ್ಯಾ ಸುಗಂಧ್ ಪರ್ಮಾಳಾಕ್, ಆಪ್ಲ್ಯಾ ಶ್ವಾಸಾಂತ್ ಶ್ವಾಸ್ ಜಾವ್ನ್ ಕರ್ಗಾಲ್ಲ್ಯಾ ತ್ಯಾ ಸುಮಧುರ್ ಪರ್ಮಾಳಾಕ್ ಆಪ್ಲ್ಯಾ ಕುಡಿ ಭಿತರ್ಚ್ ಭೊಗ್ಲ್ಲೆಂ ಮಿಶೇಲ್ ಮನಾಂತ್ಚ್ ಉದ್ಗಾರ್ಲೆಂ.
"ತುಂ ಎಕ್ಲೊಚ್ ಆಯ್ಲೊಯ್?" ಮಿಶೇಲಾನ್ ವಿಚಾರ್ಲೆಂ.
"ಆನಿ ಕಿತೆಂ? ಸದ್ದ್ಯಾಕ್ ಬ್ಯಾಚುಲರ್ ಮ್ಹಣ್ತಾನಾ ಎಕ್ಲ್ಯಾನ್ಚ್ ಯೆಂವ್ಚೆಂ ಪಡ್ಲೆಂ!" ಮಿಶೇಲಾಚಿಂ ಉತ್ರಾಂ ಆಯ್ಕೊನ್ ರಾಯನ್ ಹಳ್ತಾರ್ ಹಾಸ್ಲೊ. ತಾಚ್ಯಾ ವೊಂಟಾ ವಯ್ಲ್ಯಾ ತ್ಯಾ ದಾಟ್ ಮಿಶಿಯಾಂ ಮಧೆಂ ತಾಚ್ಯೊ ಹಾಸೊ ಹಿಂದ್ಳ್ಯಾಚೊ ಖೆಳ್ ಖೆಳ್ಲ್ಲ್ಯಾ ಪರಿಂ ಮಿಶೇಲಾಕ್ ದಿಸೊಂಕ್ ಲಾಗ್ಲ್ಯೊ.
"ತಶೆಂ ನ್ಹಯ್!" ಬಸ್ಲೆಲ್ಯಾ ಕಡೆಚ್ ಮಿಶೇಲಾನ್ ಸಾರ್ಕೆಂ ಬಸೊಂಕ್ ಪ್ರಯತ್ನ್ ಕೆಲೆಂ.
"ಮಾಗಿರ್......?" ರಾಯಾನಾಚೆಂ ಸವಾಲ್.
"ಹಾವೆಂ ಚಿಂತ್ಲೆಂ ತುಂ ಮಾಧವ ಅಂಕಲಾ ಸಾಂಗಾತಾ....!"
"ನಾ! ತಾಕಾ ಹಾವೆಂ ಪೋನ್ ಕೆಲ್ಲೆಂ. ತಾಣೆಂ ಯೆತಾಂ ಮ್ಹಳಾಂ. ಪಳೆಯಾಂ.... ಮಾಂಯ್ ಖಂಯ್ ಆಸಾ.....?" ಮಿಶೇಲಾ ಲಾಗಿಂ ಉಲಂವ್ಚೊ ರಾಯನ್ ಎಸ್ತೆಲಾಕ್ ಸೊಧುನ್ ಹೆವ್ಶಿಂ ತೆವ್ಶಿಂ ಪಳಂವ್ಕ್ ಲಾಗ್ಲೊ. ತಾಚ್ಯಾ ದೊಳ್ಯಾಂಕ್ ತ್ಯಾ ವೊಣ್ತಿಚ್ಯಾ ಜನೆಲಾಂತ್ಲ್ಯಾನ್ ಭಾಯ್ರ್ ಪಳಂವ್ಚೊ ಜಿಮ್ಮಿ ಮಾತ್ರ್ ದಿಸ್ಲೊ ಶಿವಾಯ್ ತಾಕಾ ಎಸ್ತೆಲ್ ದಿಸ್ಲಿ ನಾ.
"ಮಾಂಯ್ ಆಬಾಕ್ ಪಳಂವ್ಕ್ ಭಿತರ್ ಗೆಲ್ಯಾ!" ಮಿಶೇಲಾನ್ ಸಾಂಗ್ಲೆಂ.
"ಓಹ್! ಹಾಂವ್ ಯೇಂವ್ಕ್ ವೇಳ್ ಜಾಲೊ?" ರಾಯನಾನ್ ಆಪ್ಲ್ಯಾ ಹಾತಾಕ್ ಬಾಂದ್ಲೆಲ್ಯಾ ವೊಚ್ಯಾ ವಯ್ರ್ ಆಪ್ಲಿ ದೀಶ್ಟ್ ವೆಲಿ. ತಾಚ್ಯಾ ಸವೆಂ ಮಿಶೇಲಾಚಿ ದೀಶ್ಟ್ ಆಪಾಪಿಂಚ್ ರಾಯಾನಾಚಾ ಹಾತಿರ್ ಘೆಲಿ.
"ಒಮೇಗಾ!"
ರಾಯನಾನ್ ವೊರಾಂ ಪಳಂವ್ಕ್ ಹೆವ್ಶಿಂ ಘುಂವ್ಡಾಯಿಲ್ಲೊ ಹಾತ್ ಪಾಟಿಂ ಕಾಡ್ತಾನಾ ವಯ್ಲ್ಯಾ ಸೀಲಿಂಗಾರ್ ಜಳ್ಚಾ ವೀಜ಼್ ದಿವ್ಯಾಚೊ ಉಜ್ವಾಡ್ ತ್ಯಾ ವೊಚಾ ವಯ್ರ್ ಪಡ್ಲ್ಲೊ ತೊ ರಿಫ್ಲೆಕ್ಟ್ ಜಾತಾನಾ ಎಕಾ ಕ್ಷಣಾಕ್ ತೆಂ ವೋಚ್ ಉಜ್ವಳ್ಚ್ಯಾ ಪರಿಂ ಜಾಲೆಂ. ತ್ಯಾ ವೊಚ್ಯಾ ಭಿತರ್ಲ್ಯಾ ಭಾರೀಕ್ ಡೈಮಂಡಾಂ ಥಾವ್ನ್ ಉಜ್ವಾಡ್ ಭಾಯ್ರ್ ಧಾಂವೊನ್ ಆಯಿಲ್ಲ್ಯಾ ಪರಿಂ ಜಾವ್ನ್ ತೆಂ ವೋಚ್ ಉಜ್ವಳ್ಳೆಂ.
"ಧನ್ಫರಾಂ ಮಾಧವ ಅಂಕಲಾಚಾ ಘರಾಚ್ ಜೆವಾಣ್ ಜಾಲೆಂ. ಥಂಯ್ ಥಾವ್ನ್ ಹೊಟೆಲಾಕ್ ವಚೊನ್ ಥೊಡಿ ಜೆಮ್ ಕಾಡ್ಲಿ. ತಶೆಂ ಉಟ್ತಾನಾ ಲೇಟ್ ಜಾಲೊ!" ರಾಯನ್ಚ್ ಉಲಯ್ಲೊ.
"ದಿಸಾಕ್ಯ್ ನಿದ್ತಾಯ್....?" ಕಶೆಂ ಮಿಶೇಲಾಚಾ ತೊಂಡಾ ಥಾವ್ನ್ ಉತಾರ್ ಭಾಯ್ರ್ ಪಡ್ಲೆಂ ತೆಂಚ್ ನೆಣಾಂ.
"ಹಾಂಗಾ ಕಾಂಯ್ ಕಾಮ್ ನಾತ್ಲೆಲ್ಯಾನ್......!" ಉಲವ್ನ್ ಆಸ್ಲ್ಲೊ ರಾಯನ್ ಎಕಾಚ್ಫರಾ ಮೌನ್ ಜಾಲೊ. ಅಚಾನಕ್ ಉಗ್ತೆಂ ಜಾಲ್ಲ್ಯಾ ಐ.ಸಿ. ಯು. ಚ್ಯಾ ದಾರಾನ್ ಎಕಾ ಖಿಣಾಕ್ ರಾಯನಾಚಾ ಜಿಬೆಕ್ಯ್ ಖಾಡುಂ ಮಾರ್ಲೆಂ.
ಖಂಯ್ ತೆಂ ಮೌನ್ ದಾರ್? ಖಂಯ್ ಹೊ ರಾಯನ್? ದೊಗಾಂಯ್ಕ್ಯ್ ಕಾಂಯ್ ಸಂಭಂಧ್ ನಾತ್ಲೊಲೊ. ಪುಣ್ ವೇಳ್ ಉದೆತಾನಾ ಘಡಿತ್ ಘಡೊನ್ ಗೆಲ್ಲೆಂ. ಬೋವ್ಶಾ ಹ್ಯಾ ಘಡಿತಾಕ್ ವಾರಾವ್ನ್ ಪಳಂವ್ಕ್ ಕೊಣಾಯ್ ಲಾಗಿಂ ವೇಳ್ ನಾತ್ಲಲೊ.
ಐ.ಸಿ.ಯು. ಚೆಂ ದಾರ್ ಉಗ್ತೆಂ ಕರುನ್ ಎಸ್ತೆಲ್ ಭಾಯ್ರ್ ಆಯ್ಲಿ.
ತಿತ್ಲೆಂಚ್!
ಮಿಶೇಲ್ ಆನಿ ರಾಯನ್ ಆಪ್ಲ್ಯಾ ಬಸ್ಕೆಕ್ ಸೊಡುನ್ ಉಭಿಂ ಜಾಲಿಂ.
"ಮಾಂಯ್ ....., ಆಬ್ ಕಸೊ ಆಸಾ?" ಆಜ್ಯಾ ವಿಶಿಂ ಜಾಣಾಂ ಜಾಂವ್ಕ್ ಆತುರಾಯೆರ್ ಆಸ್ಲ್ಲ್ಯಾ ಮಿಶೇಲಾನ್ ಆಜಿಯೆಕ್ ಸವಾಲ್ ಕೆಲೆಂ.
"ಬರೊ ಆಸಾ ಪುತಾ! ಬರೊ ಉಲಯ್ಲೊ! ವಚ್ ತುಂ ವಚೊನ್ ಯೇ" ಮ್ಹಳ್ಳಿ ಎಸ್ತೆಲ್ ರಾಯನಾಕ್ ಪಳವ್ನ್ "ಕೆದಾಳಾ ಆಯ್ಲೊಯ್ ಬಾ ರಾಯನ್?" ತಿಣೆಂ ರಾಯನಾಕ್ ಸವಾಲ್ ಕೆಲೆಂ.
"ಅತ್ತಾಂ ಆಯ್ಲೊಂ ಮಾತ್ರ್ ಆಂಟಿ!" ರಾಯನಾಚಿ ಜವಾಬ್.
ಆತಾಂ ಸವ್ಕಾಸ್ ಮಿಶೇಲ್ ತ್ಯಾ ಐ.ಸಿ.ಯು ಚ್ಯಾ ದಾರಾ ತೆವ್ಶಿಂ ಚಮ್ಕಾಲೆಂ. ಆಪ್ಲ್ಯಾ ಹಾತಾಂನಿ ವ್ಹಾಣೊ ನಿಕ್ಳಾವ್ನ್ ಥಂಯ್ಚರ್ ಸ್ಟ್ಯಾಂಡಾರ್ ದವರ್ಲೆಲ್ಯಾ ಚಪ್ಪಲಾಂಕ್ ಪಾಂಯ್ ರಿಗವ್ನ್ ತೆಂ ಆತಾಂ ಐ.ಸಿ.ಯು.ಚಾ ಭಿತರ್ ಪ್ರವೇಶ್ ಜಾಲೆಂ.
ತಿಂಚ್ ಪಿಂತುರಾಂ!
ಥೊಡ್ಯಾಚ್ ವೆಳಾ ಪಯ್ಲೆಂ ಭಾಯ್ರ್ ಎಕ್ಸುರೆಂ ಬಸೊನ್ ಆಸ್ತಾನಾ ಮಿಶೇಲಾಚಾ ದೊಳ್ಯಾಂ ಮುಕಾರ್ ಉದೆವ್ನ್ ಗೆಲ್ಲಿಂ ತಿಂಚ್ ಪಿಂತುರಾಂ! ಮಿಶೇಲಾಚಾ ದೊಳ್ಯಾಂ ಮುಕಾರ್ ಆತಾಂ ರೂಪ್ ರೂಪ್ ದಿಸೊಂಕ್ ಲಾಗ್ಲಿಂ.
ಪುಣ್ ಎಕ್ಚ್ ವ್ಯತ್ಯಾಸ್!
ಥಂಯ್ಚರ್ ತ್ಯಾ ಪಿಂತುರಾಂನಿ ಕಾಂಯ್ಚ್ ಆವಾಜ್ ನಾತ್ಲ್ಲೊ!
ಸಗ್ಳೆಂಚ್ ಶಾಂತ್ ಆನಿ ಸಗ್ಳೆಂಚ್ ಮೌನ್ ಆಸ್ಲ್ಲೆಂ!
ಪುಣ್ ಹಾಂಗಾ......!
ಹಾಂಗಾ ಹ್ಯಾ ಏರ್ಕಂಡಿಶನಾಚಾ ಥಂಡ್ ಹವ್ಯಾಚಾ ಮೌನಾಂತ್ಯ್ ..... ಭೀಫ್.... ಭೀಫ್.... ಮ್ಹಳ್ಳೊ ಆವಾಜ್!
ಮೊನಿಟರಾಚೆರ್ ಧಾಂವ್ಚ್ಯಾ ಮನ್ಶಾ ಕಾಳ್ಜಾ ಉಡಿಯೆಚಾಸಬ್ದಾಕ್ ಗ್ರಾಫಿಕ್ಸಾ ಮಾರಿಫಾತ್ ವಾಚ್ಚಾ ಮೆಶಿನಾಚೊ ಆವಾಜ್!
ಹೊ ಆವಾಜ್ ಖಂಯ್ಚರ್ಗೀ ಆಪ್ಲ್ಯಾಯ್ ಕಾಳ್ಜಾ ಉಡಿಯೆಕ್ ಮೆಜ್ತಾ ಮ್ಹಳ್ಳ್ಯಾ ಪರಿಂ ಮಿಶೇಲಾಕ್ ಜಾತಾನಾ ತಾಚ್ಯಾ ಕಾಳ್ಜಾಚಿ ಉಡಿ ವೆಗಾನ್ ಉಡೊಂಕ್ ಲಾಗ್ಲಿ. ತಾಚ್ಯೆ ಸವೆಂ ತಾಚ್ಯೆ ದೊಳೆ ಆಪ್ಲ್ಯಾ ಆಜ್ಯಾಕ್ ಸೊಧಿಲಾಗ್ಲೆ.
ಏಕ್..... ದೋನ್..... ತೀನ್.... ಚ್ಯಾರ್....
ವ್ಹಯ್! ಥಂಯ್ಚರ್ ಆಸ್ಲ್ಲೊ ಜೆರೊಮ್! ಚವ್ತ್ಯಾ ಖಾಟಿಯೆರ್!
"ಕಸೊ ಆಸಾಯ್ ಆಬಾ?"
ಥೊಡೊ ವೇಳ್ ಆಪ್ಲ್ಯಾ ಆಜ್ಯಾಕ್ಚ್ ಪಳವ್ನ್ ರಾವ್ಲ್ಲ್ಯಾ ಮಿಶೇಲಾನ್ ಸವ್ಕಾಸ್ ಉತ್ರಾಂ ವಿಂಚ್ಲಿಂ.
ಆಪ್ಲ್ಯಾ ದೊಳ್ಯಾಂ ಮುಕಾರ್ ಖಂತಿನ್ ಬುಡ್ಲೆಲ್ಯಾ ನಾತಿಕ್ ಪಳವ್ನ್ ಜೆರೊಮಾನ್ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡ್ಚೆಂ ಪ್ರಯತ್ನ್ ಕೆಲೆಂ.
ತಿತ್ಲೆಂಚ್!
ದಿಶಾ ನಾಸ್ತಾಂ ಉಭೊನ್ ಯೆಂವ್ಚ್ಯಾ ಪಾರ್ವ್ಯಾ ಪಾಟಿರ್ ಬಸೊನ್ ಆಯಿಲ್ಲ್ಯಾ ಹಾಸ್ಯಾಂನಿ ಅಚಾನಕ್ ವಾಟೆರ್ ಭೆಟ್ಲ್ಲ್ಯಾ ಮಿಶೇಲಾಚಾ ವೊಂಟಾಂಕ್ ಬುಲೊನ್ ತ್ಯಾ ವೊಂಟಾಂಕ್ ವೆಂಗ್ಲ್ಲ್ಯಾ ಪರಿಂ ಮಿಶೇಲಾಚಾ ವೊಂಟಾರ್ಯ್ ಹಾಸೊ ಪ್ರತ್ಯಕ್ಶ್ ಜಾಲ್ಯೊ.
"ಬರೊಂ ಆಸಾಂ ಪುತಾ!" ಜೆರೊಮ್ ವ್ಹಳೂ ಉಲಯ್ಲೊ. ತಾಚ್ಯಾ ಪಾಟ್ಲ್ಯಾನ್ ಸವ್ಕಾಸ್ ತಾಣೆಂ ಆಪ್ಲೊ ಹಾತ್ ಉಕಲ್ಲೊ ಆನಿ ಮಿಶೇಲಾಚಾ ಹಾತಾಕ್ ಧರ್ಲೊ. ತ್ಯಾ ಹಾತಾ ವಯ್ರ್ ಮಿಶೇಲಾನ್ ದೀಶ್ಟ್ ವೆಲಿ.
ತ್ಯಾ ಹಾತಾ ತಾಳುವೆಚ್ಯಾ ಪಾಟ್ಲ್ಯಾ ಕುಶಿನ್ ಏಕ್ ಸುವಿ ತೊಪುನ್ ತಾಕಾ ಪ್ಲಾಸ್ಟರ್ ಮಾರ್ಲ್ಲೆಂ. ಆಪ್ಲ್ಯಾ ಹಾತಾಕ್ ಧರ್ಲೆಲ್ಯಾ ಆಜ್ಯಾಚೊ ಹಾತ್ ಮಿಶೇಲಾಕ್ ಥಂಡ್ ಲಾಗ್ಲೊ. ಜಶೆಂ ರಗ್ತಾಚಿ ಊಭ್ ನಾ ತಶೆಂ!
ಆಜ್ಯಾಕ್ ಹ್ಯಾ ಸ್ಥಿತೆರ್ ಪಳಯಿಲ್ಲ್ಯಾ ಮಿಶೇಲಾಚಿ ತಕ್ಲಿ ಪಿಸಾಂತುರ್ ಜಾಲಿ. ತಾಚೆಂ ಕಾಳಿಜ್ ಭರೊನ್ ಆಯಿಲ್ಲ್ಯಾ ಪರಿಂ ಜಾಲೆಂ.
ಜಿವಿತಾಂತ್ ಪಯ್ಲ್ಯಾ ಪಾವ್ಟಿಂ ಮಿಶೇಲ್ ಐ.ಸಿ.ಯು. ಚ್ಯಾ ಭಿತರ್ ರಿಗ್ಲ್ಲೆಂ ಆನಿ ಪಯ್ಲೆ ಪಾವ್ಟಿಂ ತಾಣೆ ಆಸ್ಪತ್ರೆಚ್ಯಾ ಖಾಟಿಯೆರ್ ಎಕಾ ಜಿವಾಚಿ ಹಿ ವೀದ್ವಾವ್ಳಿ ಪಳೆಲ್ಲಿ!
ಆಪ್ಲ್ಯಾ ಆಜ್ಯಾಚಾ ಅಸಹಾಯಕ್ ಪರಿಸ್ಥಿತೆಕ್ ಪಳವ್ನ್ ಮಿಶೇಲಾಚಾ ಕಾಳ್ಜಾಕ್ ಹಜಾರ್ ಕಾಂಟೆ ತೊಪ್ಲ್ಲೊ ಅನ್ಭೋಗ್ ಜಾಲೊ. ಭಿತರ್ಲ್ಯಾ ಭಿತರ್ಚ್ ತೆಂ ಕಳ್ವಳ್ಳೆಂ.
ಚಡ್ ವೇಳ್ ಮಿಶೇಲಾಕ್ ತಶೆಂ ಆಪ್ಲ್ಯಾ ಆಜ್ಯಾಕ್ ಪಳಂವ್ಕ್ ಜಾಲೆಂ ನಾ.
ಸವ್ಕಾಸ್ ತಾಚ್ಯಾ ದೊಳ್ಯಾಂನಿ ಗಯ್ರೆಂಪಣ್ ಉಮಾಳುನ್ ಆಯ್ಲೆಂ.
"ಪುತಾ!" ಜೆರೊಮ್ ಉಲಯ್ಲೊ. "ಮ್ಹಜಿ ಮಸ್ತ್ ಖಂತ್ ಕರ್ತಾಯ್?" ತಾಣೆಂ ವಿಚಾರ್ಲೆಂ.
ಆಪ್ಣಾಖ್ಯಾ ಪರಿಸ್ಥಿತೆಂತ್ ಪಳೆಲ್ಲ್ಯಾ ಆಪ್ಲ್ಯಾ ನಾತಿಚಾ ಜಿವಾ ಭಿತರ್ಲ್ಯಾ ವಳ್ವಳ್ಯಾಂಕ್ ಆನಿ ಕಳ್ವಳ್ಯಾಂಕ್ ತೊ ಪಾರ್ಕುಂಕ್ ಸಕ್ಲೊ. ಮಿಶೇಲಾಚಾ ಲ್ಹಾನ್ಪಣಾರ್ ಥಾವ್ನ್ ಜೆರೊಮ್ ತಾಕಾ ಚಡ್ ಲಾಗ್ಶಿಲೊ ಆಸ್ಲ್ಲ್ಯಾನ್ ತಾಚ್ಯಾ ಮತಿಕ್ ತೊ ಸಾರ್ಕೆಂ ವಾಚುಂಕ್ ಸಕ್ತಾಲೊ. ಆಪ್ಲೆಂ ನಾತ್ ಸಿಂತಿಮೆಂತಾಂಚ್ಯಾ ಸಂಸಾರಾಂತ್ ಚಡ್ ಅಸ್ಕತ್ ಮ್ಹಣೊನ್ ತೊ ಜಾಣಾಂ ಆಸ್ಲ್ಲೊ.
"ಕಾಲ್ ರಾತಿಕ್ ನಿದೊಂಕ್ ನಾತ್ಲ್ಲೆಂಯ್ ಖಂಯ್!" ಮಿಶೇಲ್ ಕಾಂಯ್ಚ್ ಉಲೊಂಕ್ ಕಶ್ಟಾತಾನಾ ಜೆರೊಮ್ಚ್ ಉಲಯ್ಲೊ.
"ಕೊಣೆ ಸಾಂಗ್ಲೆ? ಮಾಂಯ್ನ್.....?" ಮಿಶೇಲಾನ್ ಆತಾಂ ತೋಂಡ್ ಉಘಡ್ಲೆಂ.
ತಾಚ್ಯಾ ಸವಾಲಾಕ್ ಜೆರೊಮಾನ್ ’ವ್ಹಯ್’ ಮ್ಹಳ್ಳ್ಯಾ ಭಾಶೆನ್ ಫಕತ್ತ್ ತಕ್ಲಿ ಹಾಲಯ್ಲಿ.
"ಪಳೆ ಪುತಾ.....!" ಜೆರೊಮಾನ್ ಮಿಶೇಲಾಚೊ ಹಾತ್ ತಿಕ್ಕೆ ಘಟ್ ದಾಂಬುನ್ ಧರ್ಲೊ. "...... ಆಪ್ಣಾಚಾ ವಿಶಿಂ ಚೀಂತ್. ಬೆಶ್ಟೆಂ ತಕ್ಲಿ ಆಟಯ್ನಾಕಾ. ತುಕಾ ಜಾಯ್ ಜಾಲ್ಲೆಂ ಸಗ್ಳೆಂ ಹಾವೆಂ ದಿಲೆಂ. ಪುಣ್ ಹ್ಯಾ ತುಜ್ಯಾ ತಕ್ಲೆಕ್ ಘಟಾಯ್ ದೀಂವ್ಕ್ ಮಾತ್ರ್ ಮ್ಹಜ್ಯಾನ್ ಸಾದ್ಯ್ ಜಾಲೆಂ ನಾ!" ಜೆರೊಮ್ ಆತಾಂ ಮೌನ್ ಜಾಲೊ. ತಾಕಾ ವೋಳ್ ಆಯ್ಲಿ. ಥೊಡ್ಯಾ ವೆಳಾನ್,
"ಮ್ಹಜ್ಯಾ ಭಲಾಯ್ಕೆಚೊ ಹೊ ಲ್ಹಾನ್ ವಿಶಯ್!" ಜೆರೊಮಾನ್ ಮುಖಾರ್ಸಿಲೆಂ "ಹ್ಯಾ ಲ್ಹಾನ್ ವಿಶಯಾಕ್ ಲಾಗೊನ್ ತುವೆಂ ಧಯ್ರ್ ಸಾಂಡ್ಚೆಂ ನ್ಹಯ್! ತುಕಾ ಏಕ್ ಚೆಡೊ ಜಾವ್ನ್ ವಾಗಂವ್ಕ್ ಹಾವೆಂ ಮಸ್ತ್ ಪ್ರಯತ್ನ್ ಕೆಲೆಂ ಪುಣ್ ಮ್ಹಾಕಾ ಸಾದ್ಯ್ ಜಾಂವ್ಕ್ ನಾ. ಆತಾಂ ತುಂ ತರ್ಯ್ ಥೊಡೆಂ ಪ್ರಯತ್ನ್ ಕರ್! ಆಪ್ಣಾಕ್ಚ್ ಸಾಂಬಾಳುಂಕ್ ಶಿಕ್!" ಜೆರೊಮ್ ಪರ್ತ್ಯಾಕ್ ಮಾಉನ್ ಜಾಲೊ.
’ಹಾಂಗಾಸರ್ ಪಿಡೆಸ್ತ್ ಕೋಣ್? ಹಾಂವ್ ಯಾ ಆಬ್.....?’ ಮಿಶೇಲಾಕ್ ಕಾಂಯ್ಚ್ ಸಮ್ಜಾಲೆಂ ನಾ.
"ಅಬಾ..... ತುಂ ಆತಾಂ ಆರಾಮ್ ಕರ್! ಕಾಂಯ್ ಉಲಯ್ನಾಕಾ! ಮಾಂಯ್ ಏಕ್ ತುಕಾ ಸಾಂಗೊಂಕ್ ಆನಿ ತುಂ ಏಕ್ ಆಯ್ಕೊಂಕ್!"
ಕಸಲೆಂಗೀ ಧಯ್ರ್ ಭಲಾತ್ಕಾರೆನ್ ಮ್ಹಳ್ಳ್ಯಾ ಪರಿಂ ಹಾಡುನ್ ಉಲಯಿಲ್ಲ್ಯಾ ಮಿಶೇಲಾಕ್ ಪಳವ್ನ್ ಜೆರೊಮ್ ಹಾಸ್ಲೊ. ತಾಕಾ ತಾಚೆಂ ಮಿಶೇಲ್ ಅಜೂನ್ ತಶೆಂಚ್ ತೆಂ ನೆಣ್ತೆಂ ತೀನ್ ವರ್ಸಾಂಚೆಂ ಮಿಶೇಲ್ ಮ್ಹಳ್ಳ್ಯಾಪರಿಂಚ್ ಭೊಗ್ಲೆಂ.
"ಕಿತೆಂ ಹಾಸ್ತಾಯ್?" ಆಜ್ಯಾಚೊ ಹಾಸೊ ಪಳವ್ನ್ ವಿಜ್ಮಿತ್ ಜಾಲ್ಲ್ಯಾ ಮಿಶೇಲಾನ್ ವಿಚಾರ್ಲೆಂ. ಆಜ್ಯಾಚಾ ತೊಂಡಾರ್ ಉದೆಲ್ಲ್ಯಾ ಹಾಸ್ಯಾಂನಿ ಮಿಶೇಲಾಚಾ ತೊಂಡಾರ್ಯ್ ಹಾಸ್ಯಾಂಚೆ ಲಕ್ಶಣ್ ದಾನ್ ದಿಲೆಂ.
"ಕಾಂಯ್ ನಾ! ಮಸ್ತ್ ಪಯ್ಲೆಂಚೊ ತುಜೊ ಉಡಾಸ್ ಆಯ್ಲೊ!" ಜೆರೊಮಾನ್ ಹಾಸೊನ್ಚ್ ಜವಾಬ್ ದಿಲಿ.
ತಿತ್ಲ್ಯಾರ್!
ಮಿಶೇಲಾಚಾ ಲಾಗಿಂ ಆಯಿಲ್ಲೆಂ ಏಕ್ ನರ್ಸ್...
"ಚಡ್ ವೇಳ್ ಉಲಯ್ನಾಕಾತ್! ತಾಕಾ ರೆಸ್ಟ್ ಜಾಯ್!" ಮ್ಹಣೊನ್ ಸಾಂಗೊನ್ ತೆವ್ಶಿಂ ಗೆಲೆಂ.
"ಬರೆಂ ಆಬಾ. ತುಂ ರೆಸ್ಟ್ ಕರ್. ತುಂ ಬರೊ ಜಾವ್ನ್ ಘರಾ ಆಯ್ಲ್ಯಾ ಉಪ್ರಾಂತ್ ಆಮಿ ಉಲವ್ಯಾಂ!"
ಮಿಶೇಲಾಚಾ ಉತ್ರಾಂಕ್ ’ಜಾಯ್ತ್’ ಮ್ಹಳ್ಳ್ಯಾ ಭಾಶೆನ್ ಜವಾಬ್ ದೀವ್ನ್ ಜೆರೊಮಾನ್ ಆಪ್ಲ್ಯಾ ನಾತಿಕ್ ಧರ್ಲಲೊ ಹಾತ್ ಸೊಡ್ಲೊ.
"ಬರೆಂ ಆಬಾ. ಫಾಲ್ಯಾಂ ಸಾಕಾಳಿಂ ಯೆತಾಂ!"
ಮಿಶೇಲ್ ಆತಾಂ ಸವ್ಕಾಸ್ ಪಾಟಿಂ ಘುಂವ್ಲೆಂ. ಐ.ಸಿ.ಯು. ಥಾವ್ನ್ ಎಕೇಕ್ಚ್ ಮೇಟ್ ಭಾಯ್ರ್ ಕಾಡ್ತಾನಾ ಆಪುಣ್ ಹಾಂಗಾಸರ್ ಕಿತೆಂಗೀ ಸಾಂಡುನ್ ವೆತಾಂ ಮ್ಹಳ್ಳ್ಯಾ ಪರಿಂ ತಾಕಾ ಭೊಗ್ತಾನಾ ಏಕ್ ಪಾವ್ಟಿಂ ಘುಂವೊನ್ ತಾಣೆಂ ಪಾಟಿಂ ಪಳೆಲೆಂ. ಉಪ್ರಾಂತ್ ತೆಂ ಭಾಯ್ರ್ ಆಯ್ಲೆಂ.
ಮಿಶೇಲ್ ಭಾಯ್ರ್ ಪಾವ್ತಾನಾ ತಾಕಾ ಅಜ್ಯಾಪ್!
ಭಾಯ್ರ್ ಮಾಧವ ಅಂಕಲ್, ಸರಿತಾ ಆಂಟಿ, ಆನಿ ಶೀತಲ್, ರಾಯನಾ ಸಂಗಿಂ ಎಕಾಚ್ ಬಾಂಕಾರ್ ಬಸೊನ್ ಆಸ್ಲ್ಲಿಂ. ದುಸ್ರ್ಯಾ ಬಾಂಕಾರ್ ಜಿಮ್ಮಿ ಆನಿ ತಾಚಿ ಆಜಿ ಬಸೊನ್ ಆಸ್ಲ್ಲಿಂ.
ಆತಾಂ ಮಾಧವ ಐ.ಸಿ.ಯು. ಭಿತರ್ ವಚೊಂಕ್ ಉಟ್ಲೊ.
"ಆಬ್ ಕಸೊ ಆಸಾ ಮಿಶೇಲ್.....?" ಶೀತಲಾನ್ ಸವಾಲ್ ಕೆಲೆಂ.
"ಬಸ್!" ರಾಯನಾನ್ ಬಸೊಂಕ್ ಜಾಗೊ ಕರ್ತಾನಾ ಮಿಶೇಲ್ ಥಂಯ್ಚರ್ ಶೀತಲ್ ಆನಿ ರಾಯನಾಚಾ ಮಧೆಂ ಬಸ್ಲೆಂ.
"ಕೆದಾಳಾ ಆಯ್ಲಿಯ್ ಆಂಟಿ?" ಮಿಶೇಲಾನ್ ಶೀತಲಾಚಾ ಆವಯ್ಕ್ ಪಳವ್ನ್ ವಿಚಾರ್ಲೆಂ.
"ಅತ್ತಾ ಆಯ್ಲ್ಯಾಂವ್ ಮಾತ್ರ್! ಪಾಂಚ್ ಮಿನುಟಾಂ ಜಾಲಿಂ! ಆಬ್ ಹುಶಾರ್ ಆಸಾ...?" ತಿಣೆಂ ವಿಚಾರ್ಲೆಂ.
"ಹಾಂ! ಬರೊ ಆಸಾ!" ಮಿಶೇಲಾನ್ ತೊಂಡಾರ್ ಹಾಸೊ ಹಾಡ್ಲ್ಯೊ.
"ಹಾವೆಂ ಸಾಂಗೊಂಕ್ ನಾ ತುಕಾ? ಹಾಂವ್ ಹಾಂಗಾ ಯೆತಾನಾ ಮಿಶೇಲ್ ತಕ್ಲೆರ್ ಮೊಳಾಬ್ ಕೊಸ್ಳೊನ್ ಪಡ್ಲೆಲ್ಯಾ ಪರಿಂ ಬಸ್ಲ್ಲೆಂ. ಎಟ್ಲೀಸ್ಟ್ ಆತಾಂ ಜಾಲ್ಯಾರ್ ಹಾಕಾ ಪಳಯಾಂ ಮ್ಹಣೊನ್ ಜಾತಾ!" ರಾಯನ್ ಮಧೆಂ ಉಲಯ್ಲೊ.
"ಟೆನ್ಶನ್ ಕರಿನಾಕಾ ಮಿಶೇಲ್. ಆಬ್ ವೆಗ್ಗಿಂ ಬರೊ ಜಾವ್ನ್ ಘರಾ ಯೆತಾ ಪಳೆ!" ಶೀತಲಾಚಾ ಆವಯ್ನ್ ಮಿಶೇಲಾಕ್ ಭರ್ವಸೊ ದಿಲೊ.
ತಿತ್ಲ್ಯಾರ್, ಮಾಧವ ಶೀತಲಾಚೊ ಬಾಪಯ್ ಐ.ಸಿ.ಯು. ಥಾವ್ನ್ ಭಾಯ್ರ್ ಆಯ್ಲೊ. ತಾಚ್ಯೆ ಉಪ್ರಾಂತ್ ತಾಚಿ ಬಾಯ್ಲ್ ಸರಿತಾ ಜೆರೊಮಾಕ್ ಪಳವ್ನ್ ಆಯ್ಲಿ. ತ್ಯಾ ಉಪ್ರಾಂತ್ ಶೀತಲ್ ಆನಿ ನಿಮಾಣೊ ಜಿಮ್ಮಿ ಭಿತರ್ ಗೆಲೊ.
ಹ್ಯಾ ಮಧೆಂ ಆಯಿಲ್ಲ್ಯಾ ದಾಕ್ತೆರಾನ್ ಜೆರೊಮಾಚಾ ಭಲಾಯ್ಕೆ ವಿಶಿಂ ಸಗ್ಳೊ ವಿವರ್ ದೀವ್ನ್, ತಾಚ್ಯಾ ಭಲಾಯ್ಕೆಚಿ ಖಾತ್ರಿ ಕರ್ತಾನಾ ಸಗ್ಳ್ಯಾಂಕ್ಯ್ ಸಮಾಧಾನ್ ಜಾಲೆಂ.
"ತಿತ್ಲೊ ವ್ಹಡ್ಲೊ ವಿಶಯ್ ಕಾಂಯ್ ನಾ. ತಾಚ್ಯೊ ದೋನ್ ಆರ್ಟಿಲ್ಲರಿ ಥೊಡ್ಯೊ ಬ್ಲಾಕ್ ಜಾಲ್ಯಾತ್. ತಾಕಾ ಅಂಜಿಯೋಗ್ರಾಫಿ ಕರುಂಕ್ ಪಡ್ತೆಲೆಂ. ಪುಣ್ ಹೊ ಕಾಂಯ್ ವ್ಹಡ್ಲೊ ವಿಶಯ್ ನ್ಹಯ್. ಹಾಂತುಂ ಭಿಯೆಂವ್ಚಿ ಕಾಂಯ್ ಗರ್ಜ್ ನಾ!" ದಾಕ್ತೆರಾನ್ ಸ್ಪಶ್ಟ್ ಸಾಂಗ್ಲೆಂ.
"ಕಿತೆಂ ಕರುಂಕ್ ಜಾಯ್ ತೆಂ ಕರ್ಯಾ ಡಾಕ್ಟರ್. ಐ ವಾಂಟ್ ಹಿಮ್ ಟು ಬಿ ಫರ್ಫೆಕ್ಟ್! ರಾಯನಾನ್ ದಾಕ್ತೆರಾಲಾಗಿಂ ವಿನತಿ ಕೆಲಿ.
"ಪೇಶಂಟಾಚ್ಯಾ ಭಲಾಯ್ಕೆ ಖಾತಿರ್ ಕಿತೆಂ ಕರುಂಕ್ ಜಾಯ್ ತೆಂ ಆಮಿ ಕರ್ತಾಂವ್. ಪುಣ್ ಹ್ಯಾ ವೆಳಾರ್ ಆಮಿ ಹೆಂಯ್ ಉಡಾಸ್ ದವರುಂಕ್ ಜಾಯ್ ಕೀ ಪೇಶಂಟ್ ಏಕ್ ಪ್ರಾಯೆಸ್ತ್! ಆಶೆಂ ಆಸ್ತಾನಾ ಕಾಂಪ್ಲಿಕೇಶನ್ಸ್ ಆಸ್ತಾತ್! ತಾಕಾ ರಿಕವರ್ ಜಾಂವ್ಕ್ ವೇಳ್ ಲಾಗ್ತಾ. ಸಗ್ಳೆಂ ಸಾರ್ಕೆಂ ಜಾತೆಲೆಂ!" ದಾಕ್ತೆರ್ ಉಲಯ್ಲೊ.
"ತರ್ ಕಾಂಯ್ ಪ್ರಾಬ್ಲೆಮ್ ನಾಂತ್ ಡಾಕ್ಟರ್?" ರಾಯನಾನ್ ಪರ್ತ್ಯಾಕ್ ವಿಚಾರ್ಲೆಂ.
"ತಾಕಾ ಆತಾಂ ಟ್ಯಾಬ್ಲೆಟ್ಸ್ ಘೆಂವ್ಕ್ ಪಡ್ತೆಲ್ಯೊ! ರಿಜಲ್ಟ್ ಪಳವ್ನ್ ಮಾಗಿರ್ ಮುಕ್ಲೆಂ ಡಿಸೈಡ್ ಕರಿಯಾಂ!" ದಾಕ್ತೆರ್ ಥಂಯ್ ಥಾವ್ನ್ ಮುಕಾರ್ ಚಲ್ಲೊ.
ಥೊಡೊ ವೇಳ್ ರಾವ್ಲ್ಲೊ ಮಾಧವ ಅತಾಂ ಘರಾ ವಚೊಂಕ್ ಭಾಯ್ರ್ ಸರ್ಲೊ.
"ರಾಯನ್... ಕಿತೆಂ ಕರ್ತಾಯ್?" ಮಾಧವಾನ್ ರಾಯನಾಕ್ ವಿಚಾರ್ಲೆಂ.
"ಹಾಂವ್..... ಥೊಡೊ ವೇಳ್ ರಾವ್ತಾಂ! ......ಉಪ್ರಾಂತ್? ಹಾಂವ್ ಹೊಟೇಲಾಕ್ ವೆತಾಂ!" ರಾಯನ್ ಥೊಡೆಂ ಚಿಂತುನ್ ಮ್ಹಳ್ಳ್ಯಾಪರಿಂ ಉಲಯ್ಲೊ.
"ಘರಾಚ್ ಜೆವಾಣ್ ಕರುನ್ ವಚ್ಯೆತ್!" ಮಾಧವಾನ್ ಜೆವ್ಣಾಕ್ ಆಹ್ವಾನ್ ದಿಲೆಂ.
"ಹಾಂವ್ ತುಕಾ ಪೊನ್ ಕರ್ತಾಂ!" ರಾಯನಾನ್ ಸಾಂಗ್ತಾನಾ,
"ಬರೆಂ ತರ್....! ಉಪ್ರಾಂತ್ ಉಲವ್ಯಾಂ!"
ಮಾಧವ ಆನಿ ತಾಚೆಂ ಕುಟಾಮ್ ಲಿಫ್ಟಾ ತೆವ್ಶಿಂ ಚಮ್ಕಾಲೆಂ.
"ಬಸ್ ಮಿಶೇಲ್!"
ಮಾಧವ ಆನಿ ತಾಚೆಂ ಕುಟಾಮ್ ಲಿಫ್ಟಾ ಭಿತರ್ ಪ್ರವೇಶ್ ಜಾವ್ನ್ ಲಿಫ್ಟಾಚೆಂ ದಾರ್ ದಾಂಪ್ತಾನಾ, ರಾಯನ್, ತ್ಯಾ ಆಪ್ಣೆ ಪಯ್ಲೆಂ ಬಸ್ಲೆಲ್ಯಾ ಬಾಂಕಾರ್ ಬಸ್ಲೊ.
ತಿತ್ಲ್ಯಾರ್!
ರಾಯನಾಚೆಂ ಸೆಲ್ಪೋನ್ ವ್ಹಾಜ್ಲೆಂ.
ಸೆಲ್ಪೋನ್ ಹಾತಿಂ ಘೆವ್ನ್ ತಾಚ್ಯಾ ಡಿಸ್ಪ್ಲೇ ವಯ್ರ್ ಆಯಿಲ್ಲ್ಯಾ ನಾಂವಾಕ್ ಪಳವ್ನ್ ಕಿತ್ಯಾಕ್ಗೀ ರಾಯನಾಚಾ ತೊಂಡಾಚೊ ಛಾರೊ ಬದ್ಲಾಲೊ.
"ಹಾಂ ಮಿಸ್ಟರ್ ಭಂಡಾರ್ಕಾರ್!" ರಾಯನಾನ್ ಪೋನ್ ಆನ್ ಕೆಲೆಂ.
"............"
"ಹಾವೆಂ ತುಕಾ ಪಯ್ಲೆಂಚ್ ಸಾಂಗ್ಲೆಲೆಂ.....!"
"............."
"ಆತಾಂ ಹಾಂವ್ ಕಿತೆಂ ಕರುಂ....?"
"............"
"ಆಯ್ಕ್! ಆಯ್ಕ್! ಹಾವೆಂ ಸಾಂಗ್ಚೆಂ ಆಯ್ಕ್! ಇಂಡಸ್ಟ್ರಿಂತ್ ಪಯ್ಶೆ ಮ್ಹಜೆ ಲಾಗ್ತಾತ್. ತುಂ ಫಕತ್ತ್ ಏಕ್ ಡೈರಕ್ಟರ್ ಮಾತ್ರ್! ತುಕಾ ಫಿಲ್ಮಾಚಿ ಫಿಕಿರ್ ಆಸಾ. ಪುಣ್ ಮ್ಹಾಕಾ ತ್ಯಾ ಫಿಲ್ಮಾ ಸವೆಂ ಮ್ಹಜ್ಯಾ ಪಯ್ಶ್ಯಾಚಿಂಯ್ ಫಿಕಿರ್ ಆಸಾ!"
"............"
"ನಾ! ನಾ! ತ್ಯಾ ವಯ್ರ್ ಹಾಂವ್ ತ್ಯಾ ಫಿಲ್ಮಾಚೆರ್ ಪಯ್ಶೆ ಘಾಲಿನಾ. ಆದ್ಲೆ ಪಾವ್ಟಿಂಯ್ತುವೆಂ ತಶೆಂಚ್ ಕೆಲ್ಲೆಂಯ್! ಇಂಡಸ್ಟ್ರಿಂತ್ ಫಕತ್ತ್ ಆಪ್ಲೆಂ ನಾಂವ್ ಮಾತ್ರ್ ಚಿಂತ್ಲ್ಯಾರ್ ಜಾಯ್ನಾ!"
"..........."
"ಚಲ್! ಪಳೆಯಾಂ...! ಪುಣ್ ಕಾಸ್ಟಿಂಗ್ ಕಿತೆಂ?"
"..........."
"ಥೊಡೆಂ ನವೆಂ ಸೊದ್. ಫಿಲ್ಮಾಕ್ ಪಳಂವ್ಚ್ಯಾ ಲೊಕಾಕ್ ತಾಂಚೆ ಪಯ್ಶೆ ವಸೂಲ್ ಜಾಂವ್ಕ್ ಜಾಯ್! ತಾಂಕಾ ತಾಂಚಾ ಪನ್ನಾಸ್ ರುಪ್ಯಾಂಚಿ ಫಿಕಿರ್ ಆಸ್ತಾ. ಹಾಂವ್ ತರ್ಯ್ ಹಾಂಗಾ......" ಮ್ಹಳ್ಳೊ ರಾಯನ್ ಆತಾಂ ಬಸ್ಲೆಲ್ಯಾ ಕಡೆನ್ ಥಾವ್ನ್ ಉಟ್ಲೊ. "ತೆಂ....., ಹ್ಯಾ ವರ್ಸಾಚೆಂ ಮಿಸ್ ಇಂಡಿಯಾ....! ಖಂಯ್ ಗೆಲೆಂ ತೆಂ? ಪಳೆ ತಾಕಾ ಬ್ರೇಕ್ ದೀ. ಜಿತ್ಲಿಂ ನವಿಂ ಯೆತಾತ್ ತಿತ್ಲೆಂ... ಕಾಂಪ್ರಮೈಸ್ ಚಡ್ ಕರ್ತಾತ್! ಸಮ್ಜಾಲೆಂ....?"
"..........."
"ತುಂ ಪಯ್ಲೆಂ ಕಾಸ್ಟಿಂಗ್ ಪಳೆ! ತೆಂ ಉಪ್ರಾಂತ್ ಪಳವ್ಯೆತ್!"
"..........."
"ಕೋಣ್......?"
".........."
"ತಾಕಾ ಹಾಂವ್ ಸಾಂಗ್ತಾಂ! ನೋ ಪ್ರಾಬ್ಲೆಮ್!"
".........."
"ವ್ಹಯ್! ಜಾಯ್ತ್ ಬರೆಂ ತರ್!"
ರಾಯನಾನ್ ಆಪ್ಲೆಂ ಪೋನ್ ಭಂಧ್ ಕೆಲೆಂ.
ಥೊಡಿಂಚ್ ಖಿಣಾಂ!
ಮಿಶೇಲಾನ್ ಆನಿ ಎಸ್ತೆಲಾನ್ ಪಳವ್ನ್ ಆಸ್ಲ್ಲ್ಯಾ ಪರಿಂಚ್ ರಾಯನಾಕ್ ತಾಚ್ಯಾ ತ್ಯಾ ಬಿಜ್ನೆಸಾಚಾ ಸಂಸಾರಾ ಥಾವ್ನ್ ಹ್ಯಾ ಸಂಸಾರಾಕ್ ಯೇಂವ್ಕ್ ಥೊಡಿಂಚ್ ಖಿಣಾಂ ಪಾವ್ಲ್ಲಿಂ. ಖಿಣಾಭಿತರ್ ತಾಚ್ಯಾ ತೊಂಡಾಚೊ ತೊ ಬದ್ಲಾಲ್ಲೊ ಛಾರೊ ನಪಂಯ್ಚ್ ಜಾಲೊ. ಕಾಂಯ್ಚ್ ಜಾಂವ್ಕ್ ನಾ ಮ್ಹಳ್ಳ್ಯಾಪರಿಂ.
"ಐ ಯಮ್ ಸಾರ್ರಿ ಹಾಂ!"
ರಾಯನ್ ಸವ್ಕಾಸ್ ಬಾಂಕಾರ್ ಬಸ್ಲೊ.
"ತುಂ ಸದಾಂ ಆಸೊಚ್ ಬಿಜಿ ಆಸ್ತಾಯ್?" ಮಿಶೇಲಾಕ್ ರಾಯನಾಚಾ ಪೊನಾ ವಯ್ಲ್ಯಾ ಸಂಭಾಶಣಾಕ್ ಪಳವ್ನ್ ಆಶ್ಚರ್ಯ್ ಜಾಲೆಂ.
"ಬಿಜ್ನೆಸ್ ಮ್ಹಣ್ತಾನಾ ಹೆಂ ಸದಾಂಚೆಂ!"
"ಕಿತೆಂ......? ನವೆಂ ಫಿಲ್ಮ್ ಕಾಡ್ಚ್ಯಾರ್ ಆಸಾಯ್...?"
ಮಿಶೇಲಾಚೆಂ ಸವಾಲ್ ಆಯ್ಕೊನ್ ರಾಯನ್ ವ್ಹಳೂ ಹಾಸ್ಲೊ.
"ಫಿಲ್ಮ್.....? ಫಿಲ್ಮಾಂತ್ ಮ್ಹಾಕಾ ಕಿತೆಂ ಆಸಾ ಮಿಶೆಲ್? ಮ್ಹಾಕಾ ಹಾವೆಂ ಘಾಲ್ಚೆ ಪಯ್ಶೆ ಮಾತ್ರ್ ದೊಡ್ಯಾನ್ ಯೇಂವ್ಕ್ ಜಾಯ್ ತಿತ್ಲೆಂಚ್!"
"ಹೆಂ ತುಂ ಎಕ್ಲೊಚ್ ಮ್ಯಾನೇಜ್ ಕರ್ತಾಯ್?"
"ಹಾಕಾಚ್ ಬಿಜ್ನೆಸ್ ಮ್ಹಣ್ತಾತ್! ಹೆಂಚ್ ಶಿಕೊಂಕ್ ಜಾಯ್!"
"ಪುಣ್ ಕಶೆಂ....?" ಮಿಶೆಲಾಚೆಂ ತೆಂಚ್ ನೆಣ್ತೆಂ ಸವಾಲ್. ಜಶೆಂ ಲ್ಹಾನ್ ಭುರ್ಗೆಂ ವಿಚಾರ್ತಾ ತಶೆಂ.
ಮಿಶೆಲಾಚಾ ಸವಾಲಾಕ್ ಆಯ್ಕೊನ್ ರಾಯನ್ ಮನಾಂತ್ಚ್ ಹಾಸ್ಲೊ.
"ದೇಟ್ಸ್ ಯುನೀಕ್! ಆಂಡ್ ದೇಟ್ಸ್ ರಾಯನ್..... ಆಲ್ಪ್ರೆಡ್ ರಾಯನ್!"
ಮಿಶೇಲಾಕ್ಚ್ ಪಳವ್ನ್ ತೊ ದೊಳ್ಯಾಂನಿಚ್ ಉಲಯ್ಲೊ.
************
ಫಾಂತ್ಯಾಫರಾಚಾ ಧೊವಾಕ್ ಕರ್ಗಾಯಿಲ್ಲಿ, ಸಾಕಾಳಿಂಚಿಂ ಸುರ್ಯಾಚಿಂ ಕಿರ್ಣಾಂ, ಆಪ್ಲ್ಯಾ ವೆಂಗೆಂತ್ ತ್ಯಾ ಧೊವಾಚಾ ಜಿವ್ಸಾಣೆಕ್ ಘೆವ್ನ್ ಉಭಾಳ್ ಜಾಲ್ಲಿಂ ತಿಂ ಚಡ್ ಸುಡ್ಸುಡೀತ್ ಜಾಲ್ಲಿಂ.
ಜಶೆಂ ಮಿಶೇಲ್!
ಐ.ಸಿ.ಯು. ಚ್ಯಾ ದಾರಾಚಾ ಉಜ್ವ್ಯಾ ಕುಶಿಕ್ ಆಸ್ಲ್ಲ್ಯಾ ಜನೆಲಾ ಮುಕಾರ್ ಮಿಶೇಲ್ ಉಭೆಂ ಆಸ್ಲ್ಲೆಂ. ತ್ಯಾ ಉಗ್ತ್ಯಾ ಜನೆಲಾಂತ್ಲ್ಯಾನ್ ತಾಚಿ ದೀಶ್ಟ್ ಭಾಯ್ರ್ ಧಾಂವ್ತಾಲಿ.
ಪಯ್ಸ್ ಪಯ್ಸ್ ದೊಳ್ಯಾಂಕ್ ದಿಸ್ತಾ ವರೇಗ್ ಪಾಚ್ವೆಂಚ್ ಪಾಚ್ವೆಂ! ಚಡಾವತ್ ಜಾವ್ನ್ ಪೃಕೃತೆಚೆರ್ ನಾರ್ಲಾ ಮಾಡಾನಿಂಚ್ ಆಪ್ಲಿ ರಾಜ್ವಟ್ಕಾಯ್ ಚಲಯಿಲ್ಲಿ. ಹ್ಯಾ ನಾರ್ಲಾ ಮಾಡಾಂ ಮಧೆಂಯ್ ಮನ್ಶಾ ಜಿಣೆಂ ಆಸಾ ಮ್ಹಳ್ಳೆಂ ತೆಂ ಖಾತ್ರಿ ಕರುಂಕ್ ಮಿಶೇಲಾಕ್ ಕಷ್ಟ್ ಮಾರಿಲಾಗ್ಲೆ. ಆಪ್ಲ್ಯಾ ಪಾಚ್ವ್ಯಾಪಣಾಂತ್ ಸಗ್ಳೆಂಚ್ ದಾಂಪುನ್ ದವರ್ಲ್ಲೆಂ ಹ್ಯಾ ಮಾಡಾಂನಿ!
ತಶೆಂಚ್ ಹಿಂ ಸಾಕಾಳಿಂಚಿಂ ಕಿರ್ಣಾಂ!
ಪಯ್ಶಿಲ್ಯಾ ತ್ಯಾ ಸುರ್ಯಾ ಥಾವ್ನ್ ಉದೆವ್ನ್ ಯೆಂವ್ಚ್ಯಾ ತಾಂಕಾ ಆಪ್ಲಿ ಕೂಡ್ ದೀಂವ್ಕ್ ಮಿಶೇಲಾಕ್ ಕಿತ್ಯಾಕ್ಗೀ ಆನಂದ್ ಭೊಗ್ಲೊ.
ತ್ಯಾ ಕಿರ್ಣಾಂ ಮಧೆಂಯ್ ಏಕ್ ವಿಶೇಶ್ ಸಕತ್ ಆಸ್ಲ್ಲಿ!
ಸಾಕಾಳಿಂಚಾ ಧೊವಾಕ್ ಪೊಶೆವ್ನ್ ಆಪ್ಲಿ ತಾನ್ ಭಾಗಂವ್ಚಾ ತ್ಯಾ ಕಿರ್ಣಾಂಚಿ ಸಾಕಾಳಿಂಚಿ ಊಭ್!
ತಶೆಂಚ್ ಜನೆಲಾ ಥಾವ್ನ್ ಭಾಯ್ರ್ ಪಳವ್ನ್ ಆಸ್ಲ್ಲ್ಯಾ ಮಿಶೆಲಾಚಾ ವೊಂಟಾರ್ ಆಪ್ಲೆಸ್ತಕಿಂ ಹಾಸೊ ಉದೆಲ್ಯೊ. ಪೃಕೃತಿಚಿ ರೀತ್ಯ್ ವಿಚಿತ್ರ್. ಜಶೆಂ ಚಲಿಯೆಚೆಂ ಜಿವಿತ್!
ಫಾಂತ್ಯಾಫರಾರ್ ಹಿ ಸೃಶ್ಟಿ ಕಿತ್ಲಿ ಪವಿತ್ರ್! ಕಿತ್ಲಿ ನಿತಳ್! ಜಶೆಂ...., ದೆವಾಳಾಚಾ ಮೆಟಾಂನಿ ಪಾಂವ್ಡ್ಯಾ ವಯ್ರ್ ಪಾಂವ್ಡೆ ಕಾಡ್ಚ್ಯಾ ಪಯ್ಲೆಂ ದೆವಾಕ್ ನೈವೇದ್ಯ ಘೆವ್ನ್ ತಯಾರ್ ಜಾಂವ್ಚೆಂ ಚಲಿ!
ಸಾಕಾಳಾರ್ಯ್ ಹಿ ಸೃಶ್ಟಿ ಕಿತ್ಲಿ ಸೊಭಿತ್! ಕಿತ್ಲಿ ಆಂಕ್ವಾರ್! ಜಶೆಂ..., ಹಾತಿಂತ್ ನೈವೇದ್ಯಾಚಿ ಥಾಲಿ ಘೆವ್ನ್ ಪಾಲ್ವಾ ಪೊಂತಾಕ್ ಭಕ್ತಿಪಣಾಚೊ ಘುರ್ತ್ ಜಾವ್ನ್ ಮಾತ್ಯಾಕ್ ರೆವ್ಡಾವ್ನ್ ತ್ಯಾ ದೆವಾಳಾಚಾ ಮೆಟಾಂನಿ ಪಾಂವ್ಡ್ಯಾ ವಯ್ರ್ ಪಾಂವ್ಡೆ ಕಾಡ್ಚೆಂ ಚಲಿ!
ಹ್ಯಾ ಸಾಕಾಳಾಕ್ ಆಪ್ಲೆ ದೊಳೆಭರ್ ಸೊಭವ್ನ್ ರಾವ್ಲ್ಲ್ಯಾ ಮಿಶೇಲಾಕ್ ತೆಂ ಏಕ್ ಆಪ್ಣಾಚೆಂಚ್ ಪ್ರತಿರೂಪ್ ಮ್ಹಳ್ಳ್ಯಾ ಪರಿಂ ದಿಸ್ಲೆಂ!
ಆಪುಣ್ಯ್ ತಶೆಂಚ್! ಚಿಂತಾಲೆಂ ತೆಂ.
ತ್ಯಾ ಮಧೆಂ,
ತಾಚ್ಯಾ ಚಿಂತ್ನಾಂಚಿ ಪರ್ವಾ ನಾಸ್ತಾನಾ ಆಪ್ಲ್ಯಾಚ್ ಮರ್ಜೆನ್ ಮ್ಹಳ್ಳ್ಯಾಪರಿಂ ತ್ಯಾ ಸಾಕಾಳಿಂಚಾ ವೊತಾಚಿ ಊಭ್ ತ್ಯಾ ಉಗ್ತ್ಯಾ ಜನೆಲಾ ಮುಖಾಂತ್ರ್ ಮಿಶೇಲಾಚಾ ನಾಜೂಕ್ ಪೊಲ್ಯಾಂಕ್ ಊಭ್ ಚಡಯ್ತಾಲಿ.
ಭಿತರ್ಲ್ಯಾ ಥಂಡಾಯೆಕ್ ಭಾಯ್ಲಿ ಊಭ್!
ಹ್ಯಾ ಸಾಕಾಳಿಂಚಾ ಊಭೆ ಥಾವ್ನ್ ಮಿಶೇಲಾಚ್ಯಾ ಜಿವಾಕ್ ಉಲ್ಲಾಸ್ ಜಾಲ್ಲ್ಯಾ ಪರಿಂ ಭೊಗ್ಲೆಂ. ಹ್ಯಾ ಉಲ್ಲಾಸಾಂತ್ಯ್ ತಾಚ್ಯಾ ಮತಿಚ್ಯಾ ಕೊನ್ಶಾ ಥಾವ್ನ್ ಉಟೊನ್ ಆಯಿಲ್ಲೆಂ ಏಕ್ ಪಿಂತುರ್ ಸವ್ಕಾಸ್ ತ್ಯಾ ದೊಳ್ಯಾಂಚಾ ದಿಶ್ಟೆ ಸಾಂಗಾತಾ ಆಪಾಲಿಪಾ ಖೆಳೊನ್ ತ್ಯಾ ನಾರ್ಲಾ ಮಾಡಾಂಚಾ ಕುಬ್ಯಾ ಥಾವ್ನ್ ಕುಬ್ಯಾಕ್ ಉಡೊನ್ ಆಪ್ಣಾ ಸಾಂಗಾತಾ ಖೆಳ್ಚೆಂ ತೆಂ ತಾಕಾ ದಿಸ್ಲೆಂ.
ತೆ ಪಿಂತುರ್ ತಾಚ್ಯಾ ದೊಳ್ಯಾಂ ಮುಕಾರ್ ಕಶೆಂ ಆಯಿಲ್ಲೆಂ ತಶೆಂಚ್ ತಾಚ್ಯಾ ಮತಿಂತ್ಯ್ ಖಂಚ್ಲ್ಲೆಂ!
ಅಚಾನಕ್ ಅಪರಿಚಿತ್ ಜಾವ್ನ್ ಆಯಿಲ್ಲೆಂ ತೆಂ ಪಿಂತುರ್ ತಿತ್ಲ್ಯಾಚ್ ಅಚಾನಕ್ಪಣಾಂತ್ ಪರಿಚಿತ್ ಜಾವ್ನ್ ಮಿಶೇಲಾಚಾ ಮತಿ ಪರ್ದ್ಯಾರ್ ಬಸ್ಲ್ಲೆಂ!
ತೆಂಚ್ ಪಿಂತುರ್ ತೆಂ!
ರಾಯನಾಚೆಂ!
ಆಲ್ಪ್ರೆಡ್ ರಾಯನಾಚೆಂ!
"ತ್ಯಾ ಒಮ್ಜೂರ್ಚ್ಯಾ ತೊಟಾಂತ್ಲ್ಯಾ ಮಗ್ಗಿಬಾಯೆಚಾ ಪುತಾಕ್ ಆಲ್ವಿನಾಕ್ ಪಿಂತುರಾಂ ಪಿಂತ್ರಾಂವ್ಚಿ ಕಲಾ ಕಶಿ ಆಯ್ಲಿ?" ಅಚಾನಕ್ ಮಿಶೇಲ್ ಪಿಂತುಂರಾಂಚಾ ಸಂಸಾರಾಂತ್ ಘುಸ್ಪಾಲೆಂ.
ಮನ್ಶಾಚಿ ಮತ್ಯ್ ವಿಚಿತ್ರ್ ಸಕ್ತೆಚಿ!
ದಾಗೊ ತುಟ್ಲಲೊ ಸೊಂರ್ಗೊ ತ್ಯಾ ಮೊಳಾಬಾ ಪಂದ್ಲ್ಯಾನ್ ಉಭ್ಚ್ಯಾ ಕುಪಾಂ ಮಧೆಂ ಅತ್ತಾಂ ಥಂಯ್ ಅತ್ತಾಂ ಹಾಂಗಾ ಘುಸ್ಪಡೊನ್ ಧಾಂವ್ಚ್ಯಾ ಪರಿಂ ಮಿಶೇಲಾಚಿ ಮತ್ಯ್ ಧಾಂವ್ತಾಲಿ.
ಆಲ್ವಿನಾನ್ ಆಪ್ಣಾಚಿಂ ಪಿಂತ್ರಾಯಿಲ್ಲಿಂ ಎಕೇಕ್ಚ್ ಪಿಂತುರಾಂ ತಾಚ್ಯಾ ದೊಳ್ಯಾಂ ಮುಕಾರ್ ಆಯ್ಲಿಂ. ತಿಂ ಪಿಂತುರಾಂ ತಾಕಾ ತ್ಯಾ ಮಗ್ಗಿಚಾ ನೆಣ್ತ್ಯಾ ನಾತ್ರಾಂ ವರ್ವಿಂ ಮಾತ್ರ್ ಫ್ಹಾವೊ ಜಾಲ್ಲಿಂ!
ಲವೀನಾ ಆನಿ ಲಾಯ್ಡ್!
ಒಮ್ಜೂರ್ಚೊ ತೊ ಏಕ್ ಸಂಸಾರ್ಚ್ ವಿಂಗಡ್ ಮ್ಹಳ್ಳ್ಯಾ ಪರಿಂ ಮಿಶೇಲಾಕ್ ದಿಸ್ಲೊ.
ತ್ಯಾ ಭಾಯ್ರ್ ಆಲ್ವಿನಾನ್ ಪಿಂತ್ರಾಯಿಲ್ಲಿಂ ಆಪ್ಣಾಚಿಂ ಪಿಂತುರಾಂ!
ಕೆದ್ನಾಂ ಹಾಂವ್ ಶೆತಾ ಮೆರೆರ್ ಬಸೊನ್ ಆಸ್ಲ್ಲ್ಯಾ ಪರಿಂ ತರ್ ಕೆದ್ನಾಂ ಆಪುಣ್ ತ್ಯಾ ವಾಟೆ ವಯ್ಲ್ಯಾ ತಳ್ಯಾಂತ್ ಫುಲ್ಲ್ಲ್ಯಾ ಧೊವ್ಯಾ ಸಾಳಕಾಕ್ ಪೊಶೆಂವ್ಕ್ ಬಾಗ್ವೊಂಚಾ ಪರಿಂ. ಕೆದ್ನಾಂ ಹಾಂವ್ ಆಪ್ಲ್ಯಾ ಆಜ್ಯಾ ಸಂಗಿಂ ತರ್ ಕೆದ್ನಾಂ ಆಪುಣ್ ತ್ಯಾ ಶೀನಾನ್ ವೊಡುನ್ ಘಾಲ್ಲ್ಯಾ ತ್ಯಾ ತಾಂಬ್ಡ್ಯಾ ತಾಂಬ್ಡ್ಯಾ ಪೊಪ್ಳಾಂ ಶಿಮ್ಟ್ಯಾಕ್ ಉಕ್ಲುನ್ ಪಳೆತಾಂ ತಶೆಂ!
ಸಗ್ಳಿಂ ಆಪ್ಣಾಚಾ ಜಿವಿತಾಂತ್ಲಿಂ ಘಡಿತಾಂ!
ಪಳಂವ್ಕ್ ಕಾಂಯ್ಚ್ ಮೋಲ್ ನಾ ಮ್ಹಣೊನ್ ಚಿಂತ್ಲ್ಯಾರ್ಯ್ ತ್ಯಾ ಪಿಂತುರಾಂನಿ ಜಾಯ್ತೆಂ ಆಸ್ಲ್ಲೆಂ.
ಮೌನ್ಪಣಿ ಕಾಂಯ್ಚ್ ರುಜ್ವಾತ್ ನಾಸ್ತಾಂ ಮಾಜ್ವೊನ್ ಯೆಂವ್ಚ್ಯಾ ಆಪ್ಲ್ಯಾ ಹ್ಯಾ ಜಿವಿತಾಚ್ಯೊ ಜಿವ್ಯೊ ಜಿವ್ಯೊ ರುಜ್ವಾತಿ!
ಮ್ಯಾಂಚೆಸ್ಟರಾಂತ್ ಇಂಗ್ಲಿಶ್ ಆವಯ್ಕ್ ಜಲ್ಮಾಲ್ಲೆಂ, ಪಳಂವ್ಕ್ಯ್ ಗೊರ್ಯಾಂಚಾ ರುಪಾಚೆಂ ಆಜ್ ಮ್ಯಾಂಚೆಸ್ಟರಾಚಾ ಧರ್ತೆ ವಯ್ರ್ ತ್ಯಾ ವೀಜ಼್ ದಿವ್ಯಾಂಚಾ ಉಜ್ವಾಡಾಂತ್ ಆಪ್ಲೆಂ ನಾಜೂಕ್ ಜೀವನ್ ಕಾಡುಂಕ್ ಜಾಯ್ ಆಸ್ಲ್ಲ್ಯಾ ಆಪ್ಣಾಚಾ ನಶೀಬಾಚಿಂ ಜೀವಂತ್ ಕರ್ತುಬಾಂ..... ಆಲ್ವಿನಾಚಿಂ ಪಿಂತುರಾಂ!
ಹ್ಯಾ ಸರ್ವ್ ಪಿಂತುರಾಂತ್ಲ್ಯಾ ಘಡಿತಾಂಕ್ ಘಡ್ಚಿ ವೇಳ್ ಘಡಿ ಯೆತಾನಾ ಆಲ್ವಿನ್ ಖಂಯ್ ಆಸ್ಲ್ಲೊ ತೆಂ ಆಪುಣ್ ಭಿಲ್ಕುಲ್ ನೆಣಾಂ!
ಹಾಂ! ಪುಣ್ ತಾಚೆಂ ಘರ್ ಮಾತ್ರ್ ತ್ಯಾ ಉಭಾರ್ ದಿಣ್ಣ್ಯಾರ್ ಆಸಾ ಆನಿ ಥಂಯ್ ಥಾವ್ನ್ ತಾಕಾ ಆಪ್ಣಾಚೆಂ ತೋಟ್ ಸಗ್ಳೆಂ ದಿಸ್ತಾ ಮ್ಹಳ್ಳೆಂ ಮಾತ್ರ್ ಮಿಶೇಲ್ ಜಾಣಾಂ. ಜಾಲ್ಯಾರ್ಯ್ ಹಿಂ ಪಿಂತುರಾಂ ಪಳಯ್ತಾನಾ ತ್ಯಾ ಪಿಂತುರಾಂತ್ಲಿ ಘಡಿತಾಂ ಘಡ್ಚ್ಯಾ ವಗ್ತಾರ್ ಆಲ್ವಿನ್ ಆಪ್ಣಾಚಾಚ್ ಭೊಂವಾರಿ ಹೆವ್ಶಿಂ ತೆವ್ಶಿಂ ಖಂಯ್ಚರ್ಗೀ ಆಸ್ಲ್ಲ್ಯಾ ಪರಿಂ ಆನಿ ತಾಣೆಂ ಆಪ್ಣಾಚಾ ಸೊಭಾಯೆಕ್, ಆಪ್ಣಾಚಾ ಚಾಲ್ ಚಮ್ಕಾಣೆಕ್ ಭೋವ್ ಲಾಗ್ಶಿಲ್ಯಾನ್ ಸಾರ್ಕೆಂಚ್ ಪಾರ್ಕಿಲಾಂ ಮ್ಹಳ್ಳ್ಯಾ ಪರಿಂ ಮಿಶೇಲಾಕ್ ದಿಸ್ತಾಲೆಂ.
ಹಿಂ ಪಿಂತುರಾಂ ಅಜೂನ್ ಮಿಶೇಲಾನ್ ಜೊಗಾಸಾಣೆನ್ ಸಾಂಬಾಳುನ್ ದವರ್ಲ್ಲಿಂ. ಜಶೆಂ ತಾಣೆಂ ಆಪ್ಣಾಚ್ಯಾ ಭುರ್ಗ್ಯಾಪಣಾಚಾ ಕ್ಯಾಥರೀನಾನ್ ದಾಡುನ್ ದಿಲ್ಲ್ಯಾ ತ್ಯಾ ತಸ್ವೀರೆಂಕ್ ಸಾಂಬಾಳುನ್ ದವರ್ಲ್ಲ್ಯಾ ಪರಿಂ!
ದೋನ್ಯ್ ಕುಶಿಂನ್ ತಾಚೆಂ ಜಿವಿತ್ ಆಸ್ಲ್ಲೆಂ!
ಎಕಾ ಕುಶಿನ್ ಅಸ್ಪಶ್ಟ್! ಫಕತ್ತ್ ತಸ್ವೀರೆಂಕ್ ಪಳವ್ನ್ ತೆಂ ಮತಿಂತ್ಚ್ ತ್ಯಾ ಜಿವಿತಾಕ್ ಕಲ್ಪನ್ ಕರುಂಕ್ ಸಕ್ತಾಲೆಂ. ತ್ಯಾ ಭಾಯ್ರ್ ಕಾಂಯ್ಚ್ ನಾ! ತ್ಯಾ ತಸ್ವೀರೆಂತ್ಲಿಂ ಮುಖಮಳಾಂ ಪಾಸೊನ್ವ್ಹಳಕ್ ನಾತ್ಲೆಲಿಂ. ಹೊ ಆಪ್ಣಾಚೊ ಬಾಪಯ್! ಹೆ ಆಪ್ಣಾಚಿ ಆವಯ್! ಹಿ ಕ್ಯಾಥರೀನ್.... ಹೊ ಸೈಮನ್.... ಹೆಂ ಕ್ರಿಸ್ಟಿನಾ... ಹೊ ಅಲೆಕ್ಸ್.... ತ್ಯಾ ತಸ್ವೀರೆಚಾ ಪಾಟ್ಲ್ಯಾನ್ ಮಿಶೇಲಾನ್ ಬರವ್ನ್ ದವರ್ಲ್ಲೆಂ. ಹ್ಯಾ ನಾಂವಾಂಕ್ ಆನಿ ತ್ಯಾ ಮುಖಮಳಾಂಕ್ ಆಪ್ಣಾ ಸಂಗಿಂ ಸಂಭಂಧ್ ಖಂಡಿತ್ ಆಸಾ. ಪುಣ್ ತೊ ಸಂಭಂಧ್ ಚಡ್ ಪಯ್ಶಿಲ್ಯಾ ತ್ಯಾ ಮ್ಯಾಂಚೆಸ್ಟರಾಂತ್ ಆಸಾ! ದೀಸ್ ಆನಿ ರಾತಿಕ್ ಜಾಗೆಂ ಆಸ್ಚಾ ತ್ಯಾ ಮ್ಯಾಂಚೆಸ್ಟರಾಚಾ ಶ್ಹೆರಾಂತ್ ಲಿಪೊನ್ ಗೆಲ್ಲ್ಯಾ ಕಾಳೊಕಾ ಸವೆಂ ಆಪ್ಣಾಚೆ ಹೆ ತಸ್ವೀರೆಂತ್ಲೆ ಸಂಭಂಧ್ಯ್ ಲಿಪೊನ್ ಗೆಲ್ಯಾತ್ ಮ್ಹಳ್ಳೆಂ ಮಿಶೇಲ್ ಜಾಣಾಂ ಆಸ್ಲ್ಲೆಂ! ಆಪ್ಣಾ ಆನಿ ಮ್ಯಾಂಚೆಸ್ಟರಾ ಮಧ್ಲೊ ಸಾಂಖೊವ್ ಮ್ಹಳ್ಯಾರ್ ಹ್ಯಾ ತಸ್ವೀರೆಚೊ ಆಲ್ಬಮ್! ಹೊ ಆಲ್ಬಮ್ ನಾ ಜಾಲ್ಯಾರ್ ಆಪ್ಣಾಕ್ ಮ್ಯಾಂಚೆಸ್ಟರ್ ನಾ! ಹೆಂ ಖಂಡಿತ್ ಜಾಣಾಂ ಜಾಲ್ಲ್ಯಾ ಮಿಶೇಲಾನ್ ತ್ಯಾ ತಸ್ವೀರೆಂಕ್ ಸಾಂಬಾಳುನ್ ದವರ್ಲ್ಲೆಂ. ಆಪ್ಣೆ ಅನಿಭವಿಸುನ್ ನೆಣಾಂ ಆಸ್ಲ್ಲ್ಯಾ ಜಿವಿತಾಕ್ ಮಿಶೇಲಾನ್ ಜೊಗಾಸಾಣೆನ್ ಸಾಂಬಾಳ್ಲ್ಲೆಂ!
ದುಸ್ರ್ಯಾ ಕುಶಿನ್ ಸ್ಪಶ್ಟ್! ಮಿಶೇಲಾಚಿ ಮತ್ ಬಸ್ಲೆಲ್ಯಾ ಥಾವ್ನ್ ತಾಚೆಂ ಜಿವಿತ್ ಕಶೆಂ ಚಲೊನ್ ಆಯ್ಲಾಂ ಮ್ಹಳ್ಳೆಂ ಮಿಶೇಲ್ ಜಾಣಾಂ. ಹಾಂಗಾಸರ್ ತಸ್ವೀರೆಂಚಿ ತಾಕಾ ಗರ್ಜ್ ನಾತ್ಲ್ಲಿ! ದೊಳ್ಯಾಂ ಮುಕಾರ್ಚ್ ಜಿಯೆಂವ್ಚ್ಯೊ ಆನಿ ಜಾಗ್ಯೊ ಆಸ್ಚ್ಯೊ ತಸ್ವೀರ್ಯೊ! ಆಪ್ಲೊ ಆಜೊ....... ಆಪ್ಲಿ ಆಜಿ.... ಆಪ್ಲೆಂ ಘರ್...... ಒಮ್ಜೂರ್ಚೆಂ ತೋಟ್.... ಪಾಚ್ವಿ ಸೃಶ್ಟಿ.....! ಶೀತಲ್.... ಅಂಕಲ್.... ಆಂಟಿ....! ಅಪ್ರೂಪ್ ಆಸ್ಟ್ರೇಲಿಯಾ, ಕೆನಡಾ ಥಾವ್ನ್ ಯೆಂವ್ಚಿಂ ತಾಚ್ಯಾ ರಗ್ತಾ ಸಂಭಂಧಾಚಿಂ! ಜಿಮ್ಮಿ.... ಆನಿ.....! ಸಗ್ಳಿಂಚ್ ಆಸ್ಲ್ಲಿಂ. ಹಾಂಗಾಸರ್ ಸಗ್ಳೆಂ ಸ್ಪಶ್ಟ್ ಆಸ್ಲ್ಲೆಂ! ಮಿಶೇಲಾಚಾ ಮತಿಚ್ಯಾ ಕೊನ್ಶ್ಯಾ ಕೊನ್ಶ್ಯಾರ್ ತಾಚೆಂ ಹೆಂ ಜಿವಿತ್ ಸಾರ್ಕೆಂ ಉಡಾಸಾಚೆಂ! ಜಾಲ್ಯಾರ್ಯ್.... ಆಪ್ಣಾಚೆಂ ಜಿವಿತ್ ಖಂಯ್ಚರ್ಗೀ ಪಯ್ಸ್ ಆಸಾ. ಕ್ಯಾಥರೀನಾನ್ ಪೊನಾರ್ ಆಪ್ಣಾಕ್ ಸಾಂಗ್ಚಾ ಪರಿಂ ಆಪ್ಣೆ ರಾಯ್ ಕುಂವರಿ ಜಾಂವ್ಕ್ ಆಸಾ! ಮ್ಹಜ್ಯಾ ಬಾಪಾಯ್ಚಾ ಸಪ್ಣಾಕ್ ಸತ್ ಕರುಂಕ್ ಆಸಾ! ಮ್ಹಜ್ಯಾ ದೊಳ್ಯಾಂ ಭಿತರ್ಲ್ಯಾ ಸಂಸಾರಾಂತ್ ಆಪ್ಣೆ ಪಳಂವ್ಚ್ಯಾ ತ್ಯಾ ರಂಗ್ ರಂಗೀನ್ ರಂಗ್ ಭರ್ಲೆಲ್ಯಾ ಸಂಸಾರಾಂತ್ ಆಪ್ಲೆ ರಾಣಿಯೆ ಪಾಟಾರ್ ಚಡೊಂಕ್ ಆಸಾ! ಮಿಶೇಲಾಚೆಂ ಭಗಾಪ್ ಹೆಂ.
ಹ್ಯಾ ತಾಚ್ಯಾ ಭೊಗಾಪಾಕ್ ಮಿಶೇಲಾಚೆಂ ಆತಾಂಚೆಂ ಜೀವನ್ ಕಿತ್ಯಾಕ್ಗೀ ಆಪ್ಣಾಕ್ ಸಾಂಗಾತ್ ದೀನಾ ಮ್ಹಳ್ಳ್ಯಾ ಪರಿಂ ಮಿಶೇಲಾಕ್ ಭೊಗ್ತಾಲೆಂ. ಹ್ಯಾಚ್ ಖಾತಿರ್ ಆಲ್ವಿನಾನ್ ಪಿಂತ್ರಾಯಿಲ್ಲಿಂ ತಿಂ ತಾಚ್ಯಾ ಚಾಲ್ತ್ಯಾ ಜಿವಿತಾಚಿಂ ಪಿಂತುರಾಂ ತಾಕಾ ಚಡ್ಚ್ ಪಸಂದ್ ಜಾಲ್ಲಿಂ. ತಾಣೆಂ ತಾಂಕಾ ಜೊಗಾಸಾಣೆನ್ ಸಾಂಬಾಳುನ್ ದವರ್ಲ್ಲೆಂ ಆಪ್ಣಾಚಾ ಹ್ಯಾ ಜಿವಿತಾಚಿ ಕುರ್ಹು ಜಾವ್ನ್! ಮಿಶೇಲಾಚೆಂ ಸಗ್ಳೆಂ ಜೀವನ್ಚ್ ಆಸ್ಲ್ಲೆಂ ತ್ಯಾ ಪಿಂತುರಾಂನಿ!
ಆನಿ ಆತಾಂ......!
ರಾಯನ್!
ಜೆದ್ನಾಂ ಥಾವ್ನ್ ಮಿಶೇಲಾಚ್ಯಾ ಜಿವಿತಾಂತ್ ರಾಯನಾನ್ ಪ್ರವೇಶ್ ಘೆತ್ಲ್ಲೊ ತೆದ್ನಾಂ ಥಾವ್ನ್ ಮಿಶೇಲಾಕ್ ಕಸಲೆಂಗೀ ಏಕ್ ನವೆಂಸಾಂವ್ ಭೊಗ್ಲ್ಲ್ಯಾ ಪರಿಂ ಜಾತಾಲೆಂ. ರಾಯನಾನ್ ಮಿಶೇಲಾಚಾ ಜಿವಿತಾಂತ್ ಪ್ರವೇಶ್ ಪಯ್ಲೆಂ ಘೆತ್ಲ್ಲೊ? ಯಾ ಆಪ್ಣೆ ತಾಕಾ ಪಯ್ಲೆಂ ಪ್ರವೇಶ್ ದಿಲ್ಲೊ? ತೆಂ ಸಮ್ಜೊನ್ ಘೆಂವ್ಕ್ ಮಿಶೇಲ್ ಉಡ್ಡಾತಾಲೆಂ ಜಾಲ್ಯಾರ್ಯ್ ಹ್ಯಾ ದಿಸಾಂನಿ ರಾಯನ್ ಆಪ್ಣಾಕ್ ಲಾಗಿಂ ಜಾಲಾ ತಶೆಂ ಮಿಶೇಲಾಕ್ ಭೊಗ್ತಾಲೆಂ.
ರಾಯನಾಚೆಂ ವ್ಯಕ್ತಿತ್ವ್ಯ್ ತಸಲೆಂಚ್!
ತಾಚೆಂ ಶಾಂತ್ ಉಲೊಣೆಂ! ಹಳ್ತಾಚೊ ಆಕರ್ಶಿತ್ ಜೀವ್! ಕಸಲ್ಯಾಯ್ ಸಂದರ್ಭಾಕ್ ಸುಲಾಭಾಯೆನ್ ಹಾತಿಂ ಘೆಂವ್ಚಿ ತಾಚಿ ಚಾಲ್! ಮತಿಚೆಂ ಸಂತುಲನ್! ಮರ್ಯಾದಿಚೊ ಸಮಾಧಾನಿ ಸ್ವಭಾವ್! ಹೆರಾಂಕ್ ದಿಂವ್ಚೊ ಗೌರವ್....!
ಮಿಶೇಲಾಕ್ ಜರ್ಯ್ ರಾಯನ್ ಪಸಂದ್ ಜಾಲ್ಲೊ.! ಪುಣ್ ರಾಯನಾಕ್ ಮಿಶೇಲ್ ಪಸಂದ್ ಆಸಾ ಮ್ಹಳ್ಳೊ ವಿಶಯ್ ಮಾತ್ರ್ ಮಿಶೇಲಾಕ್ ಕಾಲ್ಚ್ ಕಳ್ಲ್ಲೊ!
ಕಾಲ್ಚ್ಯಾ ಸಾಂಜೆರ್ ಪೋನ್ ಕೆಲ್ಲೊ ರಾಯನ್ ಮಿಶೇಲಾ ಲಾಗಿಂ ಮಸ್ತ್ ಉಲಯಿಲ್ಲೊ. ಕಿತ್ಯಾಕ್, ಆಯ್ಚಾ ಸಾಕಾಳಿಂ ತಾಕಾ ಮುಂಬಯಿ ಪಾಟಿಂ ವಚೊಂಕ್ ಆಸ್ಲ್ಲೆಂ. ರಾಯನಾಚೊ ಉಡಾಸ್ ಕಾಡ್ತಾನಾ ಮಿಶೇಲಾಕ್ ಕಾಲ್ಚ್ಯಾ ಸಾಂಜೆಚೊ ಉಡಾಸ್ ಆಯ್ಲೊ.
ಕಾಲ್ಚ್ಯಾ ಸಾಂಜೆರ್....!
"ಫಾಲ್ಯಾಂ ಸಾಕಾಳಿಂ ಅಂಕಲಾಚೆಂ ಆಸ್ಪತ್ರೆ ಥಾವ್ನ್ ಡಿಸ್ಚಾರ್ಜ್ ಜಾತಾ. ಹ್ಯಾ ದಿಸಾಂನಿ ಹಾಂವ್ ನಿಜಾಯ್ಕ್ಯ್ ಮಸ್ತ್ ಖುಶ್ ಆಸಾಂ! ಹಾಂವ್ ಆಯಿಲ್ಲ್ಯಾ ಥಾವ್ನ್ ಆರಂಭ್ ಜಾಲ್ಲೆಂ ಹೆಂ ಘಡಿತ್ ಬರ್ಯಾನ್ ನಿವಾರ್ಲೆಂ. ಥ್ಯಾಂಕ್ ಗಾಡ್!" ರಾಯನ್ ಉಲಯಿಲ್ಲೊ.
ಸವ್ಕಾಸ್ ತ್ಯಾ ಆಸ್ಪತ್ರೆಚ್ಯಾ ಜನೆಲಾ ಥಾವ್ನ್ ಭಾಯ್ರ್ ಪಳಂವ್ಚ್ಯಾ ಮಿಶೇಲಾಚಾ ದೊಳ್ಯಾಂಕ್ ರಾಯನಾಚಿ ತಸ್ವೀರ್ ಉಟೊನ್ ದಿಸ್ಲ್ಲ್ಯಾ ಪರಿಂ ಜಾತಾನಾ ತಾಣೆ ಕಾಲ್ ಸಾಂಜೆರ್ ಪೊನಾರ್ ಉಲಯಿಲ್ಲೆಂ ಉಲೊಣೆಯ್ ತ್ಯಾ ವಾರ್ಯಾಂತ್ ವ್ಹಾಳೊನ್ ಹಾಲೊನ್ ಧಲೊನ್ ಆಪ್ಣಾಚಾ ಕಾನಾಂಕ್ ಪಡ್ತಾ ತಶೆಂ ಮಿಶೇಲಾಕ್ ಭೊಗ್ಲೆಂ.
"ಫಾಲ್ಯಾಂ ಸಾಕಾಳಿಂ ಮುಂಬಯಿ ಥಾವ್ನ್ ಶೀತಲಾಚಾ ನೊವ್ರ್ಯಾಗೆಲಿಂ ಶೀತಲಾಕ್ ಮುಂಬಯಿ ಆಪವ್ನ್ ವರುಂಕ್ ಯೆತೆಲಿಂ. ಹ್ಯಾ ಉಪ್ರಾಂತ್ ತುಂ ಎಕ್ಸುರೆಂ ಜಾತೆಲೆಂಯ್!"
ವ್ಹಯ್! ರಾಯನಾನ್ ಸಾರ್ಕೆಂಚ್ ಸಾಂಗ್ಲ್ಲೆಂ! ಎದೊಳ್ ಪಾಸೊನ್ ಶೀತಲ್ ತಾಚ್ಯಾ ಬಗ್ಲೆಕ್ ಆಸ್ಲ್ಲೆಂ. ಸುಖ್ ಜಾಂವ್ ದೂಖ್ ಜಾಂವ್ ದೊಗಾಂಯ್ ಸಾಂಗಾತಾ ಆಸ್ಲ್ಲಿಂ. ಪುಣ್ ಫಾಲ್ಯಾಂಚ್ಯಾನ್.....?
ಫಾಲ್ಯಾ ಶೀತಲ್ ತಾಚ್ಯಾ ಘೊವಾ ಆನಿ ತಾಂಚಾ ಕುಟ್ಮಾ ಸವೆಂ ಮುಂಬಯಿ ವೆತೆಲೆಂ. ತ್ಯಾ ಉಪ್ರಾಂತ್....? ತ್ಯಾ ಉಪ್ರಾಂತ್ ಆಪುಣ್ ಎಕ್ಸುರಿಂ! ರಾಯನಾನ್ ಖರೆಂಚ್ ಸಾಂಗ್ಲ್ಲೆಂ.
"ಕಿತೆಂ ಕರುಂ ಮಿಶೇಲ್? ತುಕಾ ಆನಿ ಹ್ಯಾ ಗಾಂವಾಕ್ ಸೊಡುನ್ ವಚೊಂಕ್ ಮನ್ ಯೇನಾ. ಪುಣ್ ಜಿವಿತ್ ಆಶೆಂ ಮ್ಹಣ್ತಾನಾ ತೆಂ ನೆಗಾರ್ ಕರುಂಕ್ ಜಾಯ್ನಾಂ! ಶೀತಲ್ ಕಾಳ್ಜಾಚಾ ಗೂಂಡಾಯೆ ಥಾವ್ನ್ ಉಲಯಿಲ್ಲೆಂ.
"ತುಂ ಮ್ಹಾಕಾ ವಿಸ್ರೊಂಚೆಂ ನಾಂಯ್?" ಖಂಯ್ಚರ್ಗೀ ಶೂನ್ಯ್ ಸಂಸಾರಾಕ್ ಪಾವ್ಲ್ಲ್ಯಾ ಮಿಶೆಲಾನ್ ಸವಾಲ್ ಕೆಲ್ಲೆಂ.
"ತುಕಾ? ಖಂಡಿತ್ ನಾ!" ಮ್ಹಳ್ಳ್ಯಾ ಶೀತಲಾನ್ ಮಿಶೇಲಾಚೊ ಹಾತ್ ಆಪ್ಲ್ಯಾ ಹಾತಾಂತ್ ಧರುನ್, "ತೆದಾಳಾ ತೆದಾಳಾ ತುಕಾ ಪೋನ್ ಕರುನ್ ಆಸ್ತಾಂ! ತುಕಾ ಮ್ಹಜೊ ಉಡಾಸ್ ಯೆತಾನಾ ತುಂ ಮ್ಹಾಕಾ ಪೋನ್ ಕರ್! ತಶೆಂ ಮುಂಬಯಿ ಕಾಂಯ್ ಆತಾಂ ಚಡ್ ಪಯ್ಸ್ ನಾ. ಚಿಂತ್ಲ್ಲ್ಯಾ ಫರಾಕ್ ವಚೊನ್ ಯೇಂವ್ಕ್ ಜಾತಾ!" ತೊಂಡಾರ್ ಹಾಸೊ ಹಾಡುನ್ ಮ್ಹಳ್ಳ್ಯಾ ಪರಿಂ ಶೀತಲಾನ್ ಸಾಂಗ್ಲ್ಲೆಂ.
"ವ್ಹಯ್! ಮುಂಬಯಿ ಚಡ್ ಕಾಂಯ್ ಪಯ್ಸ್ ನಾ! ಮಂಗ್ಳುರಾ ಥಾವ್ನ್ ಫಕತ್ತ್ ಎಕಾ ವೊರಾಚಿ ವಾರ್ಯಾ ವಯ್ಲಿ ಉಭವ್ಣಿ ಮಾತ್ರ್! ಪುಣ್ ಹೆಂ ಶೀತಲಾನ್ ಆಪ್ಣಾಯಿಲ್ಲೆಂ ನವೆಂ ಜಿವಿತ್, ತಾಕಾ ಹ್ಯಾ ತಾಚ್ಯಾ ಜಿವಿತಾ ವಾಟೆರ್ ತಾಕಾ ಕಿತ್ಲೆಂ ಉಭೊಂಕ್ ಪರ್ವಣ್ಗಿ ದಿತಾ? ಹ್ಯಾ ತಾಚ್ಯಾ ನವ್ಯಾ ಜಿವಿತಾಂತ್ ತುಜ್ಯಾ ವಿಶಿಂ ಸೊಡ್ ತಾಚ್ಯಾಚ್ ವಿಶಿಂ ತಾಕಾ ಚಿಂತುಂಕ್ ಕಿತ್ಲೊ ಆವ್ಕಾಸ್ ಕರುನ್ ದಿತಾ ಮ್ಹಳ್ಳೆಂ ಚೀಂತ್! ಸಗ್ಳಿಂ ಮನ್ಶಾಚಿಂ ಚಿಂತ್ನಾಂ ಮಾತ್ರ್! ಜಶೆಂ ತ್ಯಾ ವಾರ್ಯಾರ್ ಉಭೊನ್ ವೆಚ್ಯಾ ಸುಕ್ಣ್ಯಾ ಪರಿಂ ಉಭೊನ್ ವೆತಾತ್! ಪುಣ್ ಸತ್ ಕಿತೆಂ ಮ್ಹಳ್ಯಾರ್ ತಿಂ ಚಿಂತ್ನಾಂ ಸದಾಂಚ್ ಭಾಂಗ್ರಾಳ್ಯಾ ಪಿಂಜ್ರ್ಯಾಂತ್ ಕಯ್ದ್ ಜಾವ್ನ್ ಆಸ್ತಾತ್!" ಜಿಮ್ಮಿ ಉಲಯಿಲ್ಲೊ.
ಶೀತಲ್ ಆಪ್ನಾಕ್ ಸಾಂಡುನ್ ವೆತಾ ತೆಂ ಕಳಿತ್ ಜಾತಾನಾ ನಿಜಾಯ್ಕ್ಯ್ ಮಿಶೇಲ್ ಖಂತಿಶ್ಟ್ ಜಾಲ್ಲೆಂ. ತಾಚ್ಯಾ ಮುಕಾರ್ ಹೆಂ ಮಾಂದುನ್ ಘೆಂವ್ಚೆಂ ಸೊಡ್ಲ್ಯಾರ್ ದುಸ್ರಿ ಕಸಲಿಯ್ ವಾಟ್ಯ್ ನಾತ್ಲ್ಲಿ. ಪುಣ್, ಮಿಶೇಲಾಕ್ ಹೆಂ ಮಾಂದುನ್ ಘೆಂವ್ಕ್ ತಿತ್ಲೆಂ ಸುಲಭ್ ನಾತ್ಲ್ಲೆಂ.
"ತುಂ ಕಾಳಿಜ್ ನಾತ್ಲೆಲ್ಯಾ ಧಾರುಣ್ ಮನಾಚಾ ಮನ್ಶ್ಯಾ ಪರಿಂ ಉಲಯ್ತಾಯ್ ಜಿಮ್ಮಿ!" ಪಯ್ಲೆ ಪಾವ್ಟಿಂ ಜಿಮ್ಮಿಚಾ ಸ್ವಭಾವಾಕ್ ತಾಚ್ಯಾ ದೊಳ್ಯಾಂ ಮುಕಾರ್ ದವರ್ಚೆಂ ಪ್ರಯತ್ನ್ ಮಿಶೇಲಾನ್ ಕೆಲ್ಲೆಂ. ಆಶೆಂ ತೆಂ ಕೆದ್ನಾಂಚ್ ಜಿಮ್ಮಿಲಾಗಿಂ ಉಲಯಿಲ್ಲೆಂ ನಾ.
"ಪಳೆ ಮಿಶೇಲ್! ಥೊಡೆ ಪಾವ್ಟಿಂ ಆಮಿಂ ಆಮ್ಚೆಂ ಕಾಳಿಜ್ ಧಾರುಣ್ ಕರುಂಕ್ ಪಡ್ತಾ! ಅಫ್ಟಾರಾಲ್ ಆಮಿ ಹಾಂಗಾ ಸಗ್ಳಿಂ ಪಯ್ಣಾರಿ! ಆಮ್ಚೆಂ ಹೆಂ ಜಿಣಿಯೆಚೆ ಪಯ್ಣ್ ಕಾಬಾರ್ ಜಾತಾಚ್ ಆಮಿಂ ಸಗ್ಳ್ಯಾಂನಿ ಎಕಾಮೆಕಾ ಆದೇವ್ಸ್ ಮಾಗೊಂಕ್ಚ್ ಆಸಾ! ತ್ಯಾ ಆದೇವ್ಸಾ ಮುಕಾರ್....! ಶೀತಲ್ ಆಫ್ಟರಾಲ್ ಹೊ ಆದೇವ್ಸ್ ಮಾಗಾನಾ. ತೆಂ ಫಕತ್ತ್ ಮುಂಬಯಿ ವೆತಾ! ತಿತ್ಲೆಂಚ್!"
ರಾಯನಾಚಾ ಉತ್ರಾಂನಿಯ್ ಸತ್ ಆಸ್ಲ್ಲೆಂ! ತಾಚೆಂ ಉಲೊಣೆಂ ಕಿತ್ಯಾಕ್ಗೀ ಆಪ್ಣಾಕ್ ಚಡ್ಚ್ ಪಸಂದ್ ಜಾತಾ. ಕಾಂಯ್ ಹಾಂವ್ ತಾಕಾ ಚಡ್ಚ್ ಪಸಂದ್ ಕರುಂಕ್ ಲಾಗ್ಲ್ಯಾಂ? ಮಿಶೇಲ್ ಮತಿಂತ್ಚ್ ಚಿಂತಾಲೆಂ. ಜಿಮ್ಮಿನ್ ಉಲಂವ್ಚ್ಯಾ ಫಿಲೋಸೊಫಿಚ್ಯಾ ತತ್ವಾಂ ಮುಕಾರ್ ರಾಯನಾಚಿಂ ಸಿಂತಿಮೆಂತಾಳ್ ಭುಜವ್ಣೆಚಿಂ ಉತ್ರಾಂ ಮಿಶೇಲಾಕ್ ಚಡ್ ಸಮಾಧಾನ್ ದೀಂವ್ಕ್ ಪಾವ್ತಾಲಿಂ.
"ಚಲಿಯೆಚೆಂ ಪಸಂದ್ ಯಾ ನಾ ಪಸಂದ್ ಕೋಣ್ ಪಳಂವ್ಕ್ ವೆತಾ ಮಿಶೇಲ್? ಚಡಾವತ್ ಜಾವ್ನ್ ಚಲಿಯೆ ಮುಕಾರ್ ವಿಂಚವ್ಣ್ಚ್ ಆಸಾನಾ! ಆಸ್ಲ್ಯಾರ್ಯ್ ತಿ ವಿಂಚವ್ಣ್, ತಾಕಾ ತಾಚ್ಯಾ ಫಾಯ್ದ್ಯಾಚಿ ಜಾಯ್ನಾ!"
ಜಿಮ್ಮಿಚೆಂ ಕೆದಾಳಾಯ್ ರಾಜಾಂವಾಚೆಂ ಉಲೊಣೆಂ. ತಾಚ್ಯಾ ದಿಶ್ಟೆಂತ್ ಕಿತ್ಲಿ ತೀಕ್ಷ್ಣಾತಾ ಆಸ್ತಾಲಿ ತಿತ್ಲಿಚ್ ಧಾರ್ ತಾಚ್ಯಾ ಉತ್ರಾಂಕ್ಯ್ ಆಸ್ತಾಲಿ.
"ಎಕೇಕ್ ಪಾವ್ಟಿಂ ಆಶೆಂ ದಿಸ್ತಾ ಕೀ ಹೊ ಜಿಮ್ಮಿ ಚಲಿಯೆಕ್ ಭೊವ್ ಲಾಗ್ಶಿಲ್ಯಾನ್ ವಳ್ಕಾತಾ! ಸ್ಟಿಲ್ ಹಿ ಇಸ್ ವೆರ್ರಿ ಟಫ್!" ದೋನ್ ದಿಸಾಂ ಪಯ್ಲೆಂ ತ್ಯಾ ಕ್ಯಾಂಟೀನಾಂತ್ ಜೆವಾಣ್ ಜಾವ್ನ್ ಘರ್ಚ್ಯಾ ವಾಟೆರ್ ವೆಚ್ಯಾ ವಗ್ತಾರ್ ಶೀತಲಾನ್ ಜಿಮ್ಮಿ ವಿಶ್ಯಾಂತ್ ಉಚಾರ್ಲ್ಲೆಂ.
"ತುಕಾ ಏಕ್ ಸವಾಲ್ ವಿಚಾರುಂ ಮಿಶೇಲ್?" ಕಾಲ್ಚ್ಯಾ ಸಾಂಜೆರ್ ನಿಮಾಣೆಂ ಪೋನ್ ಭಂಧ್ ಕರ್ಚ್ಯಾ ವಗ್ತಾರ್ ರಾಯನಾನ್ ವಿಚಾರ್ಲ್ಲೆಂ. ತಾಚ್ಯಾ ಸವಾಲಾಕ್ ಮಿಶೇಲಾನ್ ಕಾಂಯ್ಚ್ ಜವಾಬ್ ದಿಲ್ಲಿ ನಾ.
"ಹಾವೆಂ ಆಶೆಂ ವಿಚಾರ್ಲೆಂ ಮ್ಹಣೊನ್ ತುಂ ಬೆಜಾರ್ ಕರಿನಾಕಾ. ಹ್ಯಾ ದಿಸಾಂನಿ ತುಮ್ಚೆ ಸಾಂಗಾತಾ ರಾವ್ಲಾಂ ನೆ ತಶೆಂ.....!" ರಾಯನ್ ಸಾಂಗ್ತಾಲೊ.
"ಹೆಂ ಕಿತೆಂ ಜಿಮ್ಮಿ?"
ಶೀತಲಾಕ್ ಘರಾ ಪಾವಂವ್ಚ್ಯಾ ವಗ್ತಾರ್ ತಾಚ್ಯಾ ಘರಾ ಲಾಗಿಂ ಪಾವ್ತಾನಾ ಜಿಮ್ಮಿನ್ ಏಕ್ ಲ್ಹಾನ್ ಗಿಫ್ಟ್ ರ್ಯಾಪಿಂಗ್ ಪೇಪರಾಂತ್ ರ್ಯಾಪ್ ಕರುನ್ ದವರ್ಲೆಲೆಂ ತೆಂ ಕಾಡುನ್ ಶೀತಲಾಚಾ ಹಾತಿಂತ್ ದಿಲ್ಲೆಂ ಪಳವ್ನ್ ಶೀತಲಾನ್ ವಿಚಾರ್ಲೆಂ.
"ಹೆಂ ತುಕಾ! ತುಜ್ಯಾ ಕಾಜಾರಾಚ್ಯಾ ಬಾಬ್ತಿನ್! ವ್ಹಡ್ಲೆಂ ಕಾಂಯ್ ಚಡ್ ಮೊಲಾಚೆಂ ಹಾಡುಂಕ್ ಮ್ಹಾಕಾ ಸಾದ್ಯ್ ಜಾಂವ್ಕ್ ನಾ. ಪುಣ್ ತುಕಾ ತುಜ್ಯಾ ಕಾಜಾರಾಚೆಂ ಪ್ರೆಸೆಂಟ್ ದಿತಾಂ ಮ್ಹಣೊನ್ ಹಾವೆಂ ಸಾಂಗ್ಲ್ಲೆಂ! ಆಜ್ ತುವೆಂ ಮ್ಹಾಕಾ ಆನಿ ಮಿಶೇಲಾಕ್ ಡಿನ್ನರ್ ದೀವ್ನ್ ತುಜಿ ಭಾಸ್ ಪಾಳ್ಳಿಯ್. ಆತಾಂ ಮ್ಹಾಕಾ ಮ್ಹಜಿ ಭಾಸ್ ಪಾಳುಂಕ್ ಆವ್ಕಾಸ್ ದೀ!"
"ಪ್ರೆಸೆಂಟಾಚೆಂ ಸೊಡ್ ಮಿಶೇಲ್! ತ್ಯಾ ಸಗ್ಳ್ಯಾ ವಿಶಯಾನಿಂ ಮ್ಹಾಕಾ ಇಂಟ್ರೆಸ್ಟ್ ನಾ! ಜಿಮ್ಮಿನ್ ತ್ಯಾ ದಿಸಾ ಸಾಂಗ್ಲೆಲ್ಯಾ ಉತ್ರಾಂಚೊ ಉಡಾಸ್ ಮ್ಹಾಕಾ ಅಜೂನ್ ಆಸಾ. ತಾಣೆಂ ನಿಜಾಯ್ಕ್ಯ್ ಮ್ಹಜ್ಯಾ ಜಿವಿತಾಚಿ ವಾಟ್ ಕಸಲಿ ತಿ ದಾಖವ್ನ್ ದಿಲ್ಯಾ. ಪುಣ್ ಹೆಂ ಮ್ಹಜೆಂ ಜಿವಿತ್ ಮ್ಹಜೆಂ ಜಾವ್ನ್ ತರ್ಯ್ ಖಂಯ್ ಆಸಾ? ಸಗ್ಳೆಂ ಮ್ಹಜ್ಯಾ ಬಾಪಾಯ್ಚೆಂ ಆನಿ ಆವಯ್ಚೆಂ! ಪುಣ್ ಆತಾಂ ಮ್ಹಜೆಂ ನವೆಂ ಜಿವಿತ್ ಆರಂಭ್ ಜಾಲಾಂ! ಹ್ಯಾ ಜಿವಿತಾಂತ್ ಹಾಂವ್ ಕಸಲ್ಯಾಯ್ ಅಸತಾಕ್ ಆನಿ ಅನೀತಿಕ್ ಹಾಡ್ಚಿಂ ನಾ. ಹಾಂಗಾಸರ್ ಮ್ಹಾಕಾ ಸಂಪೂರ್ಣ್ ಹಕ್ಕ್ ಆಸಾ! ತ್ಯಾ ಹಕ್ಕಾಂತ್ ಹಾಂವ್ ಮ್ಹಜೆಂ ಜಿವಿತ್ ಚಲಯ್ತೆಲಿಂ. ಹ್ಯಾ ಜಿವಿತಾಂತ್ ಖಂಯ್ಚಾಯ್ ಭುರ್ಗ್ಯಾಚೆಂ ರಡ್ಣೆಂ... ವಿಧವ್ ಬಾಯ್ಲೆಚೆ ವಿಳಾಪ್..... ಕುಟ್ಮಾಚೆ ಹಾಲ್... ಭಯ್ಣ್ಯಾಂಚಿ ಖರ್ಗೊಣಿ.... ಆವಯಾಂಚಿ ಬೋಬ್ ಆಯ್ಕೊನ್ ಯೆಂವ್ಚಿ ನಾ!"
ಭರ್ವಸ್ಯಾನ್ ಮ್ಹಳ್ಳ್ಯಾಪರಿಂ ಶೀತಲ್ ಉಲಯ್ತಾಲೆಂ. ತಾಚ್ಯಾ ಫುಡಾರಾಚ್ಯಾ ಜಿವಿತಾಚಿ ತಾಣೆಂ ಎದೊಳ್ಚ್ ಬುನ್ಯಾದ್ ತಯಾರ್ ಕೆಲ್ಲಿ ಆನಿ ತಾಚ್ಯಾ ಫುಡಾರಾಕ್ ತೆಂ ಸ್ಪಶ್ಟ್ ಆಸಾ ಮ್ಹಳ್ಳ್ಯಾ ಪರಿಂ ದಿಸ್ತಾಲೆಂ.
"ಹೆಂ ಪ್ರೆಸೆಂಟ್ ಆತಾಂ ಸೊಡಯ್ನಾಕಾ ಶೀತಲ್! ಹಾಂತುಂ ಹಾವೆಂ ತುಜ್ಯಾ ಫುಡಾರಾಕ್ ಭರ್ವಸೊ ಸೊಭಿತ್ತ್ ರಿತಿರ್ ಭಾಸಾಯ್ಲಾ! ಜಿವಿತಾಂತ್ ಕಿತೆಂಯ್ ಆಯ್ಲ್ಯಾರ್ಯ್ ಕಸಲೆಂ ಆನ್ವಾರ್ ಆಯ್ಲ್ಯಾರ್ಯ್ ಆಪ್ಣಾ ವಯ್ಲೊ ಭರ್ವಸೊ ಮಾತ್ರ್ ಸಾಂಡಿನಾಕಾ! ಹೆಂ ತುಂ ಮುಂಬಯಿ ಪಾವ್ಲ್ಯಾ ಉಪ್ರಾಂತ್ ಸೊಡಯ್ ತುಕಾ ಸಗ್ಳೆಂ ಸಮ್ಜಾತೆಲೆಂ ಆನಿ ತುಂ ಖುಶ್ ಜಾತೆಲೆಂಯ್!"
"ಥ್ಯಾಂಕ್ ಯು!" ಹಾತಾಂತ್ಲ್ಯಾ ಪ್ರೆಸೆಂಟಾಕ್ ತಶೆಂಚ್ ವಯ್ರ್ ಪಂದಾ ಪಳವ್ನ್ "ಎಸ್ಪೆಶಿಯಲೀ ತುಂ ಆನಿ ಮಿಶೇಲ್ ಮ್ಹಾಕಾ ಸದಾಂಚ್ ಉಡಾಸ್ ಉರ್ತೆಲ್ಯಾತ್!" ಜಿಪಾರ್ ಥಾವ್ನ್ ದೆಂವ್ತಾನಾ ನಿಮಾಣೆಂ ಮ್ಹಳ್ಳ್ಯಾಪರಿಂ ಶೀತಲ್ ಉಲಯಿಲ್ಲೆಂ.
"ಪಳೆ ಮಿಶೇಲ್! ಹ್ಯಾ ವಿಶಿಂ ಹಾಂವ್ಚ್ ತುಜ್ಯಾ ಘರ್ಚ್ಯಾಂ ಲಾಗಿಂ ಉಲಯ್ತಾಂ! ಪುಣ್ ತಾಚ್ಯಾ ಪಯ್ಲೆಂ ಮ್ಹಾಕಾ ತುಜಿ ಆಭಿಪ್ರಾಯ್ ಜಾಯ್!"
ಪೊನಾಚ್ಯಾ ತ್ಯಾ ಕುಶಿನ್ ಥಾವ್ನ್ ಉಲಂವ್ಚ್ಯಾ ರಾಯನಾಚಾ ತಾಳ್ಯಾಂತ್ ಕಸಲೊಗೀ ನಿರ್ಧಾರ್ ಆಸಾ ಮ್ಹಳ್ಳ್ಯಾ ಪರಿಂ ಮಿಶೇಲಾಕ್ ಭೊಗ್ಲೆಂ. ತಾಚ್ಯಾ ತಾಳ್ಯಾಂತ್ ದ್ರಡತಾ ಆಸ್ಲ್ಲಿ. ಜಶೆಂ ಕಸಲೊಯ್ ನಿರ್ದಾರ್ ಘೆಂವ್ಚ್ಯಾ ಪಯ್ಲೆಂ ಆಪ್ಲಿ ಮತ್ ಸಾಂಗಾತ್ ದಿತಾ ತಶೆಂ!
ತ್ಯಾ ಐ.ಸಿ.ಯು. ಚ್ಯಾ ಉಜ್ವ್ಯಾ ಕುಶಿಚ್ಯಾ ಜನೆಲಾ ಥಾವ್ನ್ ಭಾಯ್ರ್ ಪಳವ್ನ್ ಆಸ್ಲ್ಲ್ಯಾ ಮಿಶೇಲಾಚಾ ಮುಖಮಳಾರ್ ಪಡ್ಚಿಂ ಸುರ್ಯಾಚಿಂ ಉಭಾಳ್ ಮೋವ್ ಕಿರ್ಣಾಂ ಮಿಶೇಲಾಚ್ಯಾ ಪೊಲ್ಯಾಂ ಭಿತರ್ ರಿಗೊನ್ ತ್ಯಾ ಪೊಲ್ಯಾಂಕ್ ತಾಂಬ್ಸಾಣ್ ಚಡೊನ್ ಯೆತ್ರಾಲಿ. ಜಶೆಂ ತಾಚ್ಯಾ ಜಿವಿತಾಂತ್ಲೊ ಉಡಾಸ್ ಎಕಾ ಥಾವ್ನ್ ಎಕಾಕ್ ಘುಂತೊನ್ ಗಾಂಟಾವ್ನ್ ಎಕಾಮೆಕಾ ಸಂಭಂಧ್ ಜೊಡುಂಕ್ ಪಾವ್ಲಾ ತಶೆಂ.
ತ್ಯಾ ಸುರ್ಯಾಚಾ ಕಿರ್ಣಾಂಚಾ ಉಭೆಕ್, ಮಿಶೇಲಾಚೆ ಪೊಲೆ ತಾಂಬ್ಡೆ ಜಾತಾತ್ ತಶೆಂ, ತಾಚ್ಯಾ ಜಿವಿತಾಂತ್ಲೆ ಎಕೇಕ್ಚ್ ಪ್ರಕಾರಾಚೆ ರಂಗ್, ತ್ಯಾ ಮೊಳಾಬಾರ್ ಸಾಂಗಾತಾ ಖೆಳೊನ್, ರಂಗ್ ರಂಗೀನ್ ತಿಂತೆರಾಚಿಂ ಪಿಂತುರಾಂ ಉಭಿಂ ಜಾತಾತ್ ತಶೆಂ ಮಿಶೇಲಾಕ್ ದಿಸ್ಲೆಂ.
ಜಿಂ ಪಿಂತುರಾಂ ಆಪ್ಲ್ಯಾ ರಂಗಾಂತ್ ಕಿತ್ಲೆ ಮಿಸ್ತೆರ್ ಲಿಪವ್ನ್ ಆಸ್ತಾತ್ ತಿತ್ಲೆಂಚ್ ತ್ಯಾ ಮಿಸ್ತೆರಾಂತ್ ರಂಗ್ಯ್ ಲಿಪೊನ್ ಆಸ್ತಾತ್!
ಸಗ್ಳೆಂ ಆಪ್ಣೆಂ ಸಮ್ಜೊಂಚಾ ಆನಿ ದೆಖ್ಚಾ ನದ್ರೆ ವಯ್ರ್ ಹೊಂದೊನ್ ಆಸಾ!
ವ್ಹಯ್! ಮಿಶೇಲ್ ಆಜ್ ಸಮ್ಜೊಂಕ್ ಆನಿ ದೆಖೊಂಕ್ ಪ್ರಯತ್ನ್ ಕರ್ತಾಲೆಂ.
ತೆಂ ಸಮ್ಜೊಂಕ್ ಪ್ರಯತ್ನ್ ಕರ್ತಾಲೆಂ ತ್ಯಾ ತಾಚ್ಯಾ ದೊಳ್ಯಾಂನಿ ಲ್ಹಾನ್ಪಣಾರ್ ಥಾವ್ನ್ ಪಳವ್ನ್ ಆಯಿಲ್ಲ್ಯಾ ಸೊಭಿತ್ ಸೊಭಿತ್ ರಂಗಾಂಕ್!
ತೆಂ ಸಮ್ಜೊಂಕ್ ಪ್ರಯತ್ನ್ ಕರ್ತಾಲೆಂ ತಾಚ್ಯಾ ಆವಯ್ನ್ ತಾಚ್ಯಾ ನೆಣ್ತ್ಯಾ ದೊಳ್ಯಾಂನಿ ಪಳೆಲ್ಲ್ಯಾ ತ್ಯಾ ಸಪ್ಣಾಂಕ್!
ತೆಂ ಸಮ್ಜೊಂಕ್ ಪ್ರಯತ್ನ್ ಕರ್ತಾಲೆಂ ತಾಚ್ಯಾ ಬಾಪಾಯ್ಚಾ ಸಪ್ಣಾಕ್! ಜ್ಯಾ ಸಪ್ಣಾಕ್ ಕ್ಯಾಥರೀನಾನ್ ತಾಚೊ ಜೀವ್ ಆಸ್ತಾ ವರೇಗ್ ಮಿಶೇಲಾಕ್ ಉಡಾಸ್ ಹಾಡಯಿಲ್ಲೆಂ ತೆಂ ರಾಯ್ ಕುಂವರಿ!
ಹ್ಯಾ ಸಗ್ಳ್ಯಾ ಮಧೆಂ ಮಿಶೇಲ್ ತಾಕಾಚ್ ಸೊಧ್ತಾಲೆಂ!
ಆಪ್ಣಾಚಿಂಚ್ ತೆಂ ಸೊದ್ನಾಂ ಕರ್ತಾಲೆಂ!
ತ್ಯಾ ಜನೆಲಾ ಭಾಯ್ರ್......!
ತ್ಯಾ ಶೂನ್ಯ್ ದಿಶ್ಟಿಂತ್......!!
ತ್ಯಾ ನಿಳ್ಶ್ಯಾ ಮೊಳಾಬಾರ್.....!!!
ಮಿಶೇಲ್ ಸೊದ್ನಾಂ ಕರ್ತಾಲೆಂ..... ಆನಿ ಸೊದ್ನಾಂ ಕರ್ತಾಲೆಂ....!
ತಿತ್ಲ್ಯಾರ್!
ಅವ್ಚಿತ್ತ್ ಏಕ್ ಹಾತ್ ಯೇವ್ನ್ ಆಪ್ಲ್ಯಾ ಖಾಂದಾರ್ ಬಸ್ಲೆಲ್ಯಾ ಪರಿಂ ಜಾವ್ನ್ ಮಿಶೇಲ್ ಉಡೊನ್ ಪಡ್ಲೆಂ. ತಾಚ್ಯೆ ಸವೆಂ....!
"ಕಿತೆಂ ಚಿಂತಾಯ್ ಪುತಾ?" ಆಜಿಯೆಚೊ ತಾಳೊ ಆಯ್ಕೊನ್ ಪಾಟಿಂ ಮಿಶೇಲ್ ಘುಂವ್ಲೆಂ.
"ಮಾಂಯ್ ತುಂ......?" ಚಿಂತ್ನಾಂ ಸಾಗೊರಾಂತ್ ಆಸ್ಲ್ಲೆಂ ಮಿಶೇಲ್ ಆಪ್ಲ್ಯಾ ಪಾಟ್ಲ್ಯಾನ್ ಆಪ್ಲಿ ಆಜಿ ರಾವೊನ್ ಆಸ್ಲ್ಲಿ ಪಳವ್ನ್ ಉದ್ಗಾರ್ಲೆಂ.
"ಜಿಮ್ಮಿ ಸಕಯ್ಲ್ ಘೆಲಾ ಪುತಾ! ನರ್ಸಾನ್ ಫೈಲ್ ದಿಲಾಂ. ಆಫೀಸಾಂತ್ ಪಯ್ಲೆಂ ಬಿಲ್ಲ್ ಜಾಂವ್ಕ್ ಜಾಯ್ ಖಂಯ್!" ತಿಣೆಂ ಸಾಂಗ್ಲೆಂ.
"ದಾಕ್ತೆರ್ ಆಯ್ಲೊ.....?’
"ತೊ ಯೇವ್ನ್ ಗೆಲೊ! ತಾಣೆಂ ಸಿಗ್ನೇಚರ್ ಕೆಲ್ಯಾ!"
"ಬರೆಂ! ಹಾಂವ್ ಪಳಯ್ತಾಂ.....!"
ಮಿಶೇಲ್ ಆಪ್ಲ್ಯಾ ಚಿಂತ್ನಾಂಚಾ ಸಂಸಾರಾ ಥಾವ್ನ್ ಭಾಯ್ರ್ ಯೇವ್ನ್ ಹ್ಯಾ ಸಂಸಾರಾಕ್ ಪಾವ್ಲೆಂ. ಆಜ್ ಜೆರೊಮಾಕ್ ಆಸ್ಪತ್ರೆ ಥಾವ್ನ್ ಡಿಸ್ಚಾರ್ಜ್ ಜಾಂವ್ಚೆಂ ಆಸ್ಲ್ಲೆಂ.
"ಯೆತಾಂ ಮಾಂಯ್.... ಹಾಂವ್ ಪಳೆತಾ! ಬಿಲ್ಲ್ ಭರುಂಕ್ ಆಸ್ತೆಲೆಂ.....!" ಮಿಶೇಲ್ ಆತಾಂ ಸವ್ಕಾಸ್ ಲಿಫ್ಟಾ ತೆವ್ಶಿಂ ಚಮ್ಕಾಲೆಂ.
ದಾಕ್ತೆರಾನ್ ಸಿಗ್ನೇಚರ್ ಕೆಲ್ಯಾ ಉಪ್ರಾಂತ್ ಸುಮಾರ್ ಅರ್ಧ್ಯಾ ವೊರಾನ್ ಸಗ್ಳೆಂ ಕಾಮ್ ಜಾಲ್ಲೆಂ. ಜೆರೊಮಾಚೆಂ ಆಸ್ಪತ್ರೆಚೆಂ ಬಿಲ್ಲ್ ತಯಾರ್ ಜಾತಾಲೆಂ. ಹ್ಯಾ ಮಧೆಂ ರಾಯನಾನ್ ಮಿಶೇಲಾಕ್ ಪೋನ್ ಕರುನ್ ಆಪುಣ್ ಫಕತ್ತ್ ಧಾ ಮಿನುಟಾಂ ಭಿತರ್ ಪಾವ್ತಾಂ ಮ್ಹಣೊನ್ ಸಾಂಗ್ಲ್ಲೆಂ. ಸಾಂಗ್ಲ್ಲ್ಯಾ ಉತ್ರಾಂ ಪರ್ಮಾಣೆಂ ರಾಯನ್ ಧಾ ಮಿನುಟಾಂ ಭಿತರ್ ಆಸ್ಪತ್ರೆಕ್ ಪಾವ್ಲ್ಲೊ. ತೊ ಪಾಂವ್ಚ್ಯಾ ವರೇಗ್ ಸಾದಾರ್ಣ್ ಆಫೀಶಿಯಲ್ ಕಾಮಾಂ ಸಗ್ಳಿಂ ಕರುನ್ ಜಾಲ್ಲಿಂ. ಫಕತ್ತ್ ಬಿಲ್ಲ್ ಬಾಂದುನ್ ಜೆರೊಮಾಕ್ ಘರಾ ಆಪವ್ನ್ ವರ್ಚೆಂ ಮಾತ್ರ್ ಬಾಕಿ ಉರ್ಲೆಲೆಂ.
ಹ್ಯಾ ಮಧೆಂ ರಾಯನಾಕ್ ಮಿಶೇಲ್ ಕಿತ್ಯಾಕ್ಗೀ ಚಿಂತೆಸ್ತ್ ಆಸಾ ಮ್ಹಳ್ಳ್ಯಾ ಪರಿಂ ದಿಸ್ಲೆಂ. ’ಎಕಾ ಕುಶಿನ್ ತಾಚ್ಯಾ ಹ್ಯಾ ಬಾವ್ಲೆಲ್ಯಾ ಮುಖಮಳಾಕ್ ಆಪುಣ್ ಕಾರಾಣ್ ಜಾಂವ್ಕ್ಯ್ ಪುರೊ’ ರಾಯನಾನ್ ಚಿಂತ್ಲೆಂ. ಕಿತ್ಯಾಕ್, ಮಿಶೆಲಾನ್ ಕಾಲ್ಚ್ಯಾ ಸಾಂಜೆಚಾ ರಾಯನಾಚಾ ಪೊನಾ ವಯ್ಲ್ಯಾ ನಿಮಾಣ್ಯಾ ಸವಾಲಾಕ್ ಕಾಂಯ್ ಜವಾಬ್ ದೀಂವ್ಕ್ ನಾತ್ಲ್ಲಿ.
"ಮಿಶೇಲಾಕ್ ಆಪ್ಣಾ ಥಾವ್ನ್ ಕಾಂಯ್ ದೂಖ್ ಭೊಗ್ಲಾಂ ಜಾವ್ಯೆತ್?" ಆಪ್ಣಾಕ್ಚ್ ತಾಣೆ ಸವಾಲ್ ಕೆಲೆಂ ಜಾಲ್ಯಾರ್ಯ್ ತಾಚಿ ಜವಾಬ್ ತಾಕಾಚ್ ಲಾಭ್ಲಿ ನಾ.
ಆಸ್ಪತ್ರೆಂತ್ ತ್ಯಾ ವಿಶಿಂ ಕಾಂಯ್ ಉಲಂವ್ಕ್ಯ್ ಸಾದ್ಯ್ ನಾತ್ಲ್ಲೆಂ.
ಜೆರೊಮಾಕ್ ಆಸ್ಪತ್ರೆ ಥಾವ್ನ್ ಡಿಸ್ಚಾರ್ಜ್ ಜಾವ್ನ್ ತೊ ಘರಾ ಪಾವ್ಲೊ.
ತ್ಯಾ ಕುಶಿನ್ ಶೀತಲಾಚೊ ಘೊವ್ ಆನಿ ತಾಚ್ಯಾ ಕುಟ್ಮಾಚಿಂ ಶೀತಲಾಕ್ ನವ್ಯಾ ಹೊಕ್ಲೆಕ್ ಮುಂಬಯಿ ಆಪವ್ನ್ ವರುಂಕ್ ಕಾಲ್ಚ್ಯಾ ದಿಸಾ ಆಯಿಲ್ಲಿಂ.
ಜೆರೊಮ್ ಜಿವಾಂತ್ ತಿಕ್ಕೆ ನಿತ್ರಾಣ್ ಜಾಲ್ಲ್ಯಾ ಪರಿಂ ದಿಸ್ತಾಲೊ ಜಾಲ್ಯಾರ್ಯ್ ತಿತ್ಲೊ ಕಾಂಯ್ ಭಲಾಯ್ಕೆಂತ್ ಹಾಲೊಂಕ್ ನಾತ್ಲ್ಲೊ.
ಆಸ್ಪತ್ರೆ ಥಾವ್ನ್ ಘರಾ ಯೆತಾನಾ ನಿಮಾಣೆಂ ದಾಕ್ತೆರಾಕ್ ಮೆಳೊಂಕ್ ಗೆಲ್ಲ್ಯಾ ವೆಳಾರ್ ದಾಕ್ತೆರಾನ್ ತಾಕಾ ತಾಚ್ಯಾ ಭಲಾಯ್ಕೆ ವಿಶಿಂ ಸರ್ವ್ ಜಾಗ್ವಣಿ ದಿಲ್ಲಿ. ತಾಣೆಂ ಘೆಂವ್ಕ್ ಆಸ್ಚಾ ವಕ್ತಾಂ ವಿಶ್ಯಾಂತ್ ತಾಕಾ ಜಾಗ್ರುತ್ಕಾಯ್ ಸಾಂಗ್ಲ್ಲಿ. ತ್ಯಾ ಶಿವಾಯ್ ಹ್ಯಾ ಉಪ್ರಾಂತ್ ಮತಿಕ್ ಆನಿ ಕಾಳ್ಜಾಕ್ ಭೊರ್ ಪಡಾನಾತ್ಲ್ಲ್ಯಾ ಪರಿಂ ಜಾಗ್ರುತ್ಕಾಯ್ ಸಾಂಬಾಳುಂಕ್ ತಾಕಿದ್ ದಿಲ್ಲಿ.
ಧಾ ದಿಸಾಂ ಉಪ್ರಾಂತ್ ಪರ್ತ್ಯಾಕ್ ಜೆರೊಮಾಕ್ ಚೆಕ್ಅಫಾಕ್ ಆಪಯಿಲ್ಲೆಂ. ತ್ಯಾ ಉಪ್ರಾಂತ್ ತಾಕಾ ಆಂಜಿಯೋಗ್ರಾಫಿ ಕೆದಾಳಾ ಕರುಂಕ್ ಮ್ಹಳ್ಳ್ಯಾ ವಿಶ್ಯಾಂತ್ರ್ ನಿರ್ದಾರ್ ಘೆಂವ್ಕ್ ಆಸ್ಲ್ಲೊ.
"ಖಂಯ್ಚೆಂ ಜಾಲ್ಯಾರ್ಯ್ ವ್ಹಯ್ ಪುತಾ! ಪುಣ್ ಹ್ಯಾ ಆಸ್ಪತ್ರೆಂತ್ ನಿದ್ಚೆಂ ನ್ಹಯ್!" ಘರಾ ಪಾವುಲ್ಲೊ ಜೆರೊಮ್ ಸಮಾಧಾನೆನ್ ಸುಸ್ಕಾರ್ ಸೊಡುನ್ ಸೋಫಾಕ್ ವೊಣ್ಕಾಲೊ. ತಾಕಾ ಆಪ್ಲ್ಯಾ ಘರಾಕ್ ಪಾಟಿಂ ಪರ್ತಾಲ್ಲೊ ಸಂತೊಸ್ ಜಾಲ್ಲೊ.
"ಬಸ್ ಬಾ ರಾಯನ್ ಬಸ್! ಹಾಂವ್ ಕಾಂಯ್ ಥೊಡೆಂ ಪಿಯೆಂವ್ಕ್ ಹಾಡ್ತಾಂ!" ಎಸ್ತೆಲ್ ಜೆರೊಮಾಕ್ ಭಾಯ್ಲ್ಯಾ ಸೊಫಾರ್ ಬಸವ್ನ್ ಕುಜ್ನಾ ತೆವ್ಶಿಂ ಚಮ್ಕಾಲಿ.
ಎಕಾ ಕುಶಿನ್ ಸಗ್ಳ್ಯಾಂಚಾ ತೊಂಡಾರ್ ಸಮಾಧಾನೆಚೊ ಛಾರೊ ಸಾರ್ಕೊ ಉಡೊನ್ದಿಸ್ತಾಲೊ ತರ್, ಎಕಾ ಕುಶಿನ್ ಆಪ್ಣಾಕ್ ಹ್ಯಾ ಚಾರ್ ದಿಸಾಂನಿ ಹ್ಯಾ ಸರ್ವಾಂನಿ ದಿಲ್ಲ್ಯಾ ಮೊಗಾಕ್ ಚಿಂತುನ್ ಜೆರೊಮಾಚ್ಯಾ ತೊಂಡಾರ್ ಕೃತಜ್ಞತಾ ಝಳ್ಕಾತಾಲಿ.
ತಿತ್ಲ್ಯಾರ್ ಎಸ್ತೆಲಾನ್ ಹಾಡ್ಲ್ಲ್ಯಾ ಥಂಡ್ ಪೀವನಾನ್ ಸಗ್ಳ್ಯಾಂಚೊ ಗಳೊ ಥಂಡ್ಸಾಣೆಂತ್ ಭರ್ಲೊ.
"ಸಗ್ಳ್ಯಾಂನಿ ತುಜಿ ಮಸ್ತ್ ಸೆವಾ ಕೆಲ್ಯಾ ಅಂಕಲ್! ಸ್ಪೆಶಲೀ ಜಿಮ್ಮಿನ್! ದೀಸ್ರಾತ್ ತ್ಯಾ ಆಸ್ಪತ್ರೆಚ್ಯಾ ಬಾಂಕಾರ್ ಬಸೊನ್ ತಾಣೆಂ ತುಮ್ಚ್ಯಾ ಭಲಾಯ್ಕೆಚೆಂ ಮಾಗ್ಣೆಂ ಕೆಲಾಂ"
"ಹೊ ಚೆಡೊ ಏಕ್ ಆಸ್ಲ್ಲ್ಯಾನ್ ಮಾತ್ರ್ ಜಾಲೆಂ!" ರಾಯನಾನ್ ಉಲಯಿಲ್ಲ್ಯಾ ಉತ್ರಾಂಕ್ ಎಸ್ತೆಲಾನ್ ಸಾಂಗಾತ್ ದಿಲೊ.
"ತಶೆಂ ಮಿಶೇಲ್ಯ್ ಕಾಂಯ್ ಉಣೆಂ ನಾ!" ರಾಯನಾನ್ ಮಿಶೇಲಾಕ್ ಪಳಯ್ಲೆಂ.
"ಆನಿ ತುಂ ಕಿತೆಂ ಉಣೊ ಆಸಾಯ್?" ಜೆರೊಮಾನ್ ರಾಯನಾಕ್ಚ್ ಪಳೆಲೆಂ. "ಕಾಂಯ್ಚ್ ಸಂಭಂಧ್ ನಾತ್ಲ್ಲೊ ತುಂ ಕಸಲ್ಯಾಗೀ ಸಂಭಂಧಾನ್ ಮ್ಹಳ್ಳ್ಯಾಪರಿಂ ಮ್ಹಜ್ಯಾ ಲಾಗಿಂ ಆಸ್ಲ್ಲೊಯ್. ಮ್ಹಾಕಾ ಬರೆಂ ಲಾಗ್ಲೆಂ!"
"ತಶೆಂ ಕಾಂಯ್ ನಾ ಅಂಕಲ್! ಮ್ಹಜ್ಯಾ ಸಾಮ್ಕಾರ್ ಘಡ್ಲೆಲ್ಯಾ ಘಡಿತಾಕ್ ಸಾಂಡುನ್ ವಚಾನಾಸ್ತಾನಾ ಹಾವೆಂ ತುಮ್ಕಾಂ ಸಾಂಗಾತ್ ದಿಲಾ ಮಾತ್ರ್! ತ್ಯಾ ಶಿವಾಯ್ ಕಾಂಯ್ ನಾ!"
"ಜಾಲ್ಯಾರ್ಯ್.....!" ರಾಯನಾಚಾ ಲ್ಹಾನ್ಪಣಾಚಾ ಉಲೊಣ್ಯಾ ಮುಕಾರ್ ಜೆರೊಮಾನ್ ತಾಕಾ ಲ್ಹಾನ್ ಜಾಂವ್ಕ್ ದಿಲೆಂ ನಾ.
"ತುಂ ಆತಾಂ ಆರಾಮ್ ಕರ್ ಅಂಕಲ್! ಥೊಡೆ ದೀಸ್ ತುವೆಂ ಜಾಗ್ರುತ್ ಕರುಂಕ್ ಜಾಯ್. ಚಡ್ ಉಲಂವ್ಚೆಂಯ್ ತುಕಾ ಆತಾಂ ತಿತ್ಲೆಂ ಬರೆಂ ನ್ಹಯ್!" ರಾಯನ್ ಜೆರೊಮಾಚ್ಯಾ ಭಲಾಯ್ಕೆ ವಿಶಿಂ ಹುಸ್ಕೆಲೊ.
"ಕಾಂಯ್ ನಾ ರಾಯನ್! ಹಾಂವ್ ಆತಾಂ ಬರೊಂ ಆಸಾಂ! ಘರಾ ಪಾವ್ಲೊಂ ನೆ ಆತಾಂ ಮತಿಕ್ ತಿಕ್ಕೆ ಸಮಾಧಾನ್ ಜಾಲೆಂ. ತ್ಯಾ ಆಸ್ಪತ್ರೆಂತ್.......!" ತೊ ಮುಕಾರ್ ಉಲಯ್ಲೊ ನಾ. ಆಪ್ಲ್ಯಾ ಘರಾ ಯೇವ್ನ್ ಪಾವ್ಲ್ಲೊ ಸಂತೊಸ್ ಜೆರೊಮಾಚ್ಯಾ ತೊಂಡಾರ್ ಸ್ಪಶ್ಟ್ ಝಳ್ಕಾತಾಲೊ.
"ಆಶೆಂ ಕಾನ್ಫಿಡೆನ್ಸ್ ಆಸೊಂಕ್ ಜಾಯ್!" ರಾಯನಾನ್ ಜೆರೊಮಾಕ್ ಪಳವ್ನ್ ಆಪ್ಲ್ಯಾ ತೊಂಡಾರ್ ಹಾಸೊ ಪಾಟಯ್ಲ್ಯೊ.
"ಮ್ಹಜೆಂ ಬರೆಂ ಆಶೆಂವ್ಚಿಂ ಸಗ್ಳಿಂ ಮ್ಹಜ್ಯೆ ಸಂಗಿಂ ಆಸ್ತಾನಾ ಕಾನ್ಫಿಡೆನ್ಸ್ ಖಂಯ್ ವೆತಾ?" ಆತಾಂ ಜೆರೊಮಾಚ್ಯಾ ತೊಂಡಾರ್ಯ್ ತ್ಯೊಚ್ ಹಾಸೊ ಉದೆವ್ನ್ ಆಯ್ಲ್ಯೊ.
"ಅಂಕಲ್.....?" ರಾಯನ್ ಜೆರೊಮಾಲಾಗಿಂ ಕಿತೆಂಗೀ ಉಲಂವ್ಕ್ ಆಶೆಲೊ. "ಅಂಕಲ್ ಆಜ್ ಧನ್ಫಂರಾಂಚಾ ಫ್ಲೈಟಾರ್ ಮ್ಹಾಕಾ ಮುಂಬಯಿ ಪಾಟಿಂ ವಚೊಂಕ್ ಆಸಾ. ತ್ಯಾ ಪಯ್ಲೆಂ ತುಂ ಬರ್ಯಾ ಭಾಶೆನ್ ಘರಾ ಪಾವ್ಲೊಯ್ ಮ್ಹಳ್ಳೊ ಸಂತೊಸ್ ಮ್ಹಾಕಾ!" ಉಲಯಿಲ್ಲೊ ರಾಯನ್ ಕಿತ್ಯಾಕ್ಗೀ ಥೊಡೊ ನರ್ಗಾಲ್ಲ್ಯಾ ಪರಿಂ ಜಾವ್ನ್,
"ಅಂಕಲ್! ತುಮ್ಚೆ ಲಾಗಿಂ ಏಕ್ ವಿಚಾರ್ತಾಂ. ಹ್ಯಾ ವಿಶಯಾಂತ್ ತುಮ್ಚೆ ಲಾಗಿಂ ಉಲಂವ್ಕ್ ಹಾಂವ್ ಕಿತ್ಲೊಂ ಸಾರ್ಕೊಂ ತೆಂ ಹಾಂವ್ ನೆಣಾಂ. ಪುಣ್ ಮ್ಹಜ್ಯಾ ತರ್ಫೆನ್ ತುಮ್ಚೆಲಾಗಿಂ ಉಲಂವ್ಚೆಂ ಮ್ಹಾಕಾ ಕೋಣ್ಯ್ ನಾಂತ್. ಮ್ಹಜ್ಯಾ ವಿಶಯಾಂತ್ ತುಮ್ಕಾಂ ಕಿತೆಂಯ್ ವಿಚಾರುಂಕ್ ಜಾಯ್ ಜಾಲ್ಯಾರ್ ಮಾಧವ ಅಂಕಲಾಕ್ ತುಮಿ ವಿಚಾರ್ಯೆತ್!"
ಜೆರೊಮಾಕ್ ಜಾಂವ್ ಎಸ್ತೆಲಾಕ್ ಜಾಂವ್ ರಾಯನ್ ಕಸಲ್ಯಾ ವಿಶಯಾ ವಿಶಿಂ ಉಲಯ್ತಾ ತೆಂ ಕಾಂಯ್ ಸಮ್ಜಾಲೆಂ ನಾ.
"ತುಂ ಖಂಯ್ಚಾ ವಿಶಯಾಂತ್ ಉಲಯ್ತಾಯ್ ಬಾ ರಾಯನ್?" ಜೆರೊಮಾನ್ ರಾಯನಾಕ್ಚ್ ಪಳೆಲೆಂ.
"ಕಿತೆಂ ಹಾಂವ್ ತುಮ್ಚ್ಯಾ ಮಿಶೇಲಾಚೊ ಹಾತ್ ಧರುಂಕ್ ಫಾವೊ ಆಸಾಂ? ತುಮಿಂ ಖುಶಿ ವರ್ತಾತ್ ಜಾಲ್ಯಾರ್.....!"
ರಾಯನಾಚಾ ಸವಾಲಾನ್ ಎಕಾ ಕ್ಷಣಾಕ್ ಸಗ್ಳ್ಯಾಂಚಾ ಕಾಳ್ಜಾಚಾ ಉಡಿಯೆಕ್ ಥಾಂಬಯ್ಲೆಂ!
***************
[ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]
ಕಾದಂಬರಿಕಾರಾಚಿಂ ಉತ್ರಾಂ: 1, 2, 3, 4, 5, 6, 7, 8
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
