ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಂಕರ್ - 10
ಸ್ಟ್ಯಾನಿ ಮೆಂಡೊನ್ಸಾ: ಯು.ಕೆಂ.ತ್ ವಾವ್ರ್ ಕರ್ನ್ ಆಸೊನ್ಯೀ ಕೊಂಕ್ಣಿ ಭಾಸೆಚೆಂ ಬೊಂದೆರ್ ಉಭಾರ್ನ್ ದವರ್ನ್ ವಾವ್ರ್ ಕರ್ಚ್ಯಾಂತ್ಲೊ ಎಕ್ಲೊ ಜಾವ್ನಾಸ್ಚೊ ಹೊ ಏಕ್ ಪದಾಂ ಘಡ್ಪಿ, ಗಾವ್ಪಿ ತರ್ಯೀ ಕೊಂಕ್ಣಿ ಮೊಗಿ ಆನಿ ಕೊಂಕ್ಣಿ ವಾವ್ರಾಡಿ. ಕೊಂಕ್ಣಿ ಭಾಸೆ ಸುಡಾಳ್ ಬರಂವ್ಕ್ ಸಕ್ಚಾ ಹಾಣೆಂ ಪ್ರೇತನ್ ಕೆಲೆಂ ತರ್ ಫುಡ್ಲೆ ದಿಸಾಂನಿ ಏಕ್ ಸಾಹಿತಿ ಜಾವ್ನ್ ಉದೆಂವ್ಚಿಂ ಲಕ್ಷಣಾಂ ದಿಸೊನ್ ಯೆತಾತ್.
ಸ್ಟ್ಯಾನಿ ಮೆಂಡೊನ್ಸಾ
ಕಥಾಂಕರ್ - 10. ಮಿನಿಸ್ಟರ್ ಪಾಶಾರ್ ಜಾತಾಲೊ
ಧಾ ಪಾಂದ್ರಾ ವರ್ಸಾಂ ಆದ್ಲಿಂ ಘಡಿತಾಂ ಹಿಂ ಅಜೂನೀ ಮತಿ ಭಿತರ್ ಘುಂವ್ತಾನಾ, ತಿಂ ಪಿಂತುರಾಂ ದೊಳ್ಯಾಂ ಮುಕಾರ್ ರಾವ್ತಾನಾ ಮ್ಹಜಾನ್ ತಡ್ವೊಂಕ್ ಜಾಲೆಂ ನಾ. ಪಯ್ಸಿಲ್ಯಾ ಪರ್ಗಾವಾಂತ್ ತೆಂಯೀ ಫಿಂರ್ಗಿ ಗಾವಾಂತ್ ಪಾವ್ತಾನಾ ಮಾಂಯ್ ಗಾಂವಾಚಿ ಯಾದ್ ಮತಿಕ್ ಕಾಂತಯ್ಲಾಗ್ಲಿ. ಅಂತರ್ಜಾಳಾರ್ ಕಾಂಯ್ ಪುಣೀ ಕೊಂಕ್ಣೆ ವಿಶಿಂ ವಾಚುಂಕ್ ಮೆಳ್ತಾಗೀ ಮ್ಹಣ್ ಸೊಧ್ತಾಸ್ತಾನಾ ದಾಯ್ಜ್ ಡಾಟ್ ಕೋಮ್ ಝಳ್ಕಾಲಿ. ತಾಂತ್ಲಿ ತಿಂ ಉತ್ತೀಮ್ ಕೊಂಕ್ಣಿ ಲೇಖನಾಂ ವಾಚ್ತಾನಾ ಮನಾಂತ್ ಎಕಾ ಥರಾಚಿ ಧಾಧೊಸ್ಕಾಯ್, ಇಡ್ಯಾಂತ್ ಹಾಂವೆಂಯೀ ಕಾಂಯ್ ತರೀ ಬರಂವ್ಕ್ ಜಾಯ್ತ್ಗಾಯ್ ಮ್ಹಳ್ಳೆಂ ಚಿಂತಾಪ್ ಆನಿ ಹ್ಯಾ ವಗ್ತಾ ಮತಿಕ್ ಝಳ್ಕಾಲ್ಲೊ ವಿಷಯ್ ಜಾವ್ನಾಸಾ "ಮಿನಿಸ್ಟರ್ ಪಾಶಾರ್ ಜಾತಾಲೊ"
ಗಾವಾಂತ್ ಕಾಜಾರಾಂಚಿಂ ಸೀಜನ್. ದಿಸ್ಪಡ್ತೊ ಗ್ರಾಸ್ ಜೊಡುಂಕ್ ಏಕ್ ಕಾಮ್ ಆಸ್ಲ್ಯಾರೀ ದೆವಾನ್ ದಿಲ್ಲಿಂ ತಾಲೆತಾಂ ಘೆವ್ನ್ ಗಾಂವ್ಚಾ ಕಾಜಾರಾಂಕ್ ಸಂಗೀತ್ ದಿಂವ್ಚಾಕ್ ಆಮಿ ಥೊಡೆ ಈಷ್ಟ್ ಸಾಂಗಾತಾ ಮೆಳೊನ್ ಏಕ್ ಪಂಗಡ್ ರಚ್ಲೊ. ಭಾರೀಚ್ ಉರ್ಬೆನ್ ಸರ್ವ್ ಜಾಯಿತ್ತಿ ತಯಾರಾಯ್ ಕರುನ್ ಕಾರ್ಯಾ ರುಪಾಕ್ ದೆಂವ್ಲ್ಯಾಂವ್. ಥೊಡ್ಯಾಚ್ಚ್ ತೆಂಪಾ ಭಿತರ್ ಆಮ್ಚೊ ಪಂಗಡ್ ಲೊಕಾ ಮೊಗಾಳ್ ಜಾಂವ್ಕ್ ಪಾವ್ಲೊ ಆನಿ ಜಾಯಿತ್ತ್ಯಾ ಕಾಜಾರಾಂಚೆಂ ಬುಕ್ಕಿಂಗ್ ಜಾಲೆಂ. ಸಾಕಾಳಿ ಸಾಂಜೆರ್ ಮ್ಹಳ್ಳೆ ಬರಿ ಬುಕ್ಕಿಂಗ್ ಜಾತಾಲೆಂ ಜಾಲ್ಲ್ಯಾನ್ ಉಪ್ರಾಂತ್ ಆಯಿಲ್ಲೆಂ ಬುಕ್ಕಿಂಗ್ ಸೊಡ್ನ್ ಸೊಡಿಜಾಯ್ ಪಡ್ತಾಲೆಂ.
ಆಜ್ ದೊನ್ಪಾರಾಂ ಬೆಂದುರ್ ಹೊಲಾಂತ್, ಸಾಂಜೆರ್ ವಾಲೆನ್ಸಿಯಾ, ಫಾಲ್ಯಾಂ ಕುಲ್ಶೇಕರ್, ಉರ್ವಾ ....... ಇತ್ಯಾದಿ.. ಕಾಜಾರಾಂಚ್ ಕಾಜಾರಾಂ. ಎಕಾ ವಾಟೆನ್ ಸಂಗೀತ್ ಪಂಗಡ್ ಫಾಮಾದ್ ಜಾಲ್ಲೊ ಸಂತೊಸ್ ತರ್ ಅನ್ಯೇಕಾ ವಾಟೆನ್ ಚಾರ್ ಕಾಸ್ ಕರುಂಕ್ ಮೆಳ್ತಾತ್ನೆ ಮ್ಹಳ್ಳಿ ಆಶಾ. ಚಾರ್ ಕಾಸ್ ಸೊಡ್ ಪುಣ್ ಥೊಡೆ ಪಾವ್ಟಿಂ ಹಾತಾಂತ್ಲೆಂ ಘಾಲ್ಲೆ ಸಂದ್ರಾಪ್ಯೀ ಕಾಂಯ್ ಉಣೆ ನಾಂತ್. ಸುರ್ವೆರ್ ಸಾಂಗ್ಲ್ಲಿ ರೇಟ್ ದಿತಾಲಿಂ ಜಾಲ್ಯಾರೀ ದೀಸ್ ವೆತಾಂ ವೆತಾಂ ಹೆರ್ ಸಂಗೀತ್ ಪಂಗಡ್ ವಾಡೊನ್ಂಚ್ ಯೆತಾಲೆ ಜಾಲ್ಲ್ಯಾನ್ ಮೊಸ್ತ್ ವಾರ್ಜಿಕ್ ಕರ್ನ್ ಕರ್ನ್ ಉಣ್ಯಾ ದರಿರ್ ಸಂಗೀತ್ ಖೆಳಾಜಾಯ್ ಪಡ್ತಾಲೆಂ. ಥೊಡ್ಯಾನಿಂ ಸಂಗೀತ್ ಖೆಳ್ಲ್ಲ್ಯಾಚೆ ಪಯ್ಶೆ ಫಾಲ್ಯಾಂ ದಿತಾಂ ಮ್ಹಣ್ ಸಾಂಗ್ಲ್ಲೆಂ ತರೀ ಅಜೂನ್ ಪರ್ಯಾಂತ್ ತಾಂಚೆಂ ಫಾಲೆಂ ಯೇಂವ್ಕ್ ನಾ. ತಾಚಾ ಇಡ್ಯಾಂತ್ ಆಪ್ಣಾಕ್ ಸಂಗೀತಾಚೆಂ ಆರ್ಡರ್ ಮೆಳೊಂಕ್ನಾ ಮ್ಹಣ್ ಅನ್ಯೇಕಾ ಪಂಗ್ಡಾಚಾನ್ ಆಡ್ಪಾಯ್ ದವರ್ಲಾ.
ಕಾಜಾರಾಚಾ ಸಾಲಾಕ್ ಪಾವ್ತಾನಾ ಸೌಂಡ್ಸಿಸ್ಟಮ್ ನಾ, ಫೋನ್ ಕರ್ನ್ ವಿಚಾರ್ತಾನಾ ತುಮಿಂಚ್ ಕೊಣೆಗೀ ಫೋನ್ ಕರ್ನ್ ರದ್ದ್ ಕೆಲಾ ಮ್ಹಣ್ ಸೌಂಡ್ಸಿಸ್ಟಮ್ವಾಲ್ಯಾಚಿ ಜವಾಬ್. ಕಾಜಾರಾಚಾ ಸಾಲಾಂತ್ ಸಂಗೀತ್ ನಾಸ್ತಾನಾ ಗಲಾಟೊಚ್ಚ್ ಗಲಾಟೊ , ಸಂಗೀತ್ಗಾರಾಂಕ್ ಮಾರ್ ಪೊಡ್ಚೆಂ ಏಕ್ ಬಾಕಿ, ಉಪ್ರಾಂತ್ ಹೊಲಾಚಾ ಮೆನೆಜಾರಾನ್ ಕೆಸೆಟ್ ಪ್ಲೇಯರ್ ಘಾಲ್ನ್ ಕಾರ್ಯೆಂ ಮುಂದರುಂಕ್ ಕುಮಕ್ ಕರ್ಚಿ. ಹ್ಯಾ ಸಂಗೀತ್ ಪಂಗ್ಡಾಚಾ ರಾಜಕೀಯ್ ಧರ್ಮಾನ್ ಸುಡ್ಸುಡಿತ್ ಜಾವ್ನ್ ನಾಚೊಂಕ್ ಆಯ್ತೆ ಜಾಲ್ಲ್ಯಾ ತರ್ನಾಟ್ಯಾಂಚಿಂ ತೊಂಡಾಂ ಕೊರ್ಪೊನ್ ವೆತಾಲಿಂ, ರಾಗಾಚಾ ಭರಾನ್ ಕಾಲ್ದಿ ಮಾರ್ಚೆ ಕಡೆ ಅರ್ಧಿ ಬೋತ್ಲ್ ಮಾರ್ನ್ ಯೇವ್ನ್ ಆಪ್ಣಾಯಿತ್ಲ್ಯಾಕ್ ಪೊದಾಂ ಮ್ಹಣೊನ್ ನಾಚ್ತಾತ್ ತರ್, ಕಾರ್ಯೆಂ ನಿರ್ವಾಹಕಾಚಿ ಗತ್ ಸಾಂಗ್ಚಿಚ್ ನಾಕಾ. ಕೆದಾಳಾ ಏಕ್ ಪಾವ್ಟಿಂ ಕಾರ್ಯೆಂ ಸಂಪವ್ನ್ ಧಾಂವ್ತಾಂಗೀ ಮ್ಹಣ್ ಘಡ್ಯೆ ಘಡ್ಯೆ ಆಪ್ಲೆಂ ಹಾತಾಚೆಂ ಘಡ್ಯಾಳ್ ಪಳೆವ್ನ್ಂಚ್ ಕಾರ್ಯೆಂ ಅರ್ಧ್ಯಾ ಮನಾನ್ ಮ್ಹಳ್ಳೆ ಪರಿಂ ಚಲವ್ನ್ ವರ್ತಾಲೊ. ಹೆಣೆಂ ಕೊಣೆ ಹೆಂ ಸಂಗೀತಾಚೆಂ ಆರ್ಡರ್ ಕಾಣ್ಗೆಲಾಂಗೀ ತಾಣೆ ಸಗ್ಳೊ ಖರ್ಚ್ ನಿಬಾಯ್ಜೆ ಪಡ್ತಾಲೊ.
ಹಿ ಕಶಿಯ್ ಜಾಲಿ ಶ್ಹೆರಾ ಭಿತರ್ಲಿ ಗಜಾಲ್, ಫಾಮಾದ್ ಜಾಲ್ಲೊ ಪಂಗಡ್ ಹಳ್ಳೆ ಹಳ್ಳೆಂನಿ, ಗಾಂವಾ ಗಾಂವಾಂನಿ ಮ್ಹಳ್ಳೆ ಬರಿ ಲೊಕಾ ಮೊಗಾಳ್ ಜಾಲೊ. ಶ್ಹೆರಾ ಭಾಯ್ರ್ ವಚಾಜಯ್ ತರ್ ಮೆಟಾಡೋರ್ ಭಾಡ್ಯಾಕ್ ಘೆಜಾಯ್, ಆಪ್ಣಾಕ್ ಇತ್ಲೊ ಖರ್ಚ್ ಕರುಂಕ್ ತಾಂಕ್ ನಾತ್ಲ್ಯಾರೀ ಭಿರ್ಮತ್ ಥೊಡ್ಯಾ ನೊವ್ರ್ಯಾಂಕ್ ಸಂಗೀತಾ ವಿಣೆಂ ಕಾಜಾರ್ಚ್ಚ್ ಜಾಂವ್ಕ್ ಮನ್ ನಾ. ಕೆಟರಿಂಗ್ವಾಲೊ ಆಪ್ಣಾಕ್ ಜಾಯಿತ್ತೊ ಲಾಭ್ ಆಸ್ಲ್ಯಾರೀ ಸಗ್ಳಿ ಜವಾಬ್ದಾರಿ ಆಮಿಂ ಪಳೆವ್ನ್ ಘೆತಾಂವ್ ತುಮ್ಕಾಂ ಕಿತ್ಯಾಕ್ ತಿ ಕಿರ್ಕಿರಿ ಮ್ಹಣ್ ಸಾಂಗೊನ್ ಸಗ್ಳೆಂ ತೊಚ್ಚ್ ವಹಿಸುನ್ ಘೆತಾಲೊ. ಲಾಭ್ ನಾಸ್ತಾಂ ನಾಯ್ತೊ ವ್ಹಳಾಕ್ ವಚಾನಾ ಮ್ಹಣ್ತಾತ್ ತಶೆಂಚ್ ಕೆಟರಿಂಗ್ವಾಲ್ಯಾಚೊಯೀ ಇರಾದೊ ಹೊಚ್ಚ್ ಹರ್ಯೇಕ್ಲ್ಯಾ ಕಡೆನ್ಯೀ ಕಮಿಷನ್ ಘೆಂವ್ಚೆಂ. ಥೊಡೆ ಪಾವ್ಟಿಂ ಎಂ.ಸಿ ಆನಿ ಗಾವ್ಪಿ ಎಕ್ಲೊಚ್ಚ್ ಪುರೊ ಮ್ಹಣ್ ತಾಂತುನೀ ಉರಂವ್ಕ್ ಪಳೆಂವ್ಚೆಂ, ಲಾಭಾ ವಯ್ರ್ ಲಾಭ್.
ತಾಂಚಿ ಗಜಾಲ್ ಥಂಯ್ಚ್ ಆಸೊಂ. ಪಯ್ಸ್ ಪಯ್ಣ್ ಕರುನ್ ವಚೊಂಕ್ ಆಸಾ ಮ್ಹಣ್ ಸಕಾಳಿಂ ಸಕ್ಡಾಂನಿ ನೋವ್ ವರಾಂ ಭಿತರ್ ಪಲಾಣ್ಯಾ ಜಾಗ್ಯಾರ್ ಮೆಳೊಂಕ್ ಸಾಂಗ್ಚೆಂ, ಸುರ್ವೆರ್ ಸಗ್ಳೆ ವೆಳಾರ್ ಪಾವ್ತಾಲೆ ತರೀ ದೀಸ್ ವೆತಾಂ ವೆತಾಂ ಎಕೆಕ್ಲ್ಯಾನ್ ಎಕೇಕಾ ವೆಳಾರ್ ಪಾವೊಂಕ್ ಸುರು ಕೆಲೆಂ. ನೀಜ್ ಘಡಿಯಾಳಾರ್ ನೋವ್ ವ್ಹರಾಂ ಜಾಲ್ಯಾರೀ ತಾಂಚಾ ಘಡಿಯಾಳಾಂನಿಂ ಎಕೇಕ್ ಘಂಟೊ ಪಾಟಿಂ ದಾಕಯಿಲ್ಲ್ಯಾನ್ ಕೊಣ್ಣಾ ಪಾವ್ತಾನಾ ಧಾ ಉತರ್ತಾಲಿಂ.
ಜಾಲೆಂ ಕಶೆಂಯ್ ಸಕ್ಡಾಂಕ್ ಸಾಂಗಾತಾ ಘಾಲ್ನ್ ಆಮ್ಚೆಂ ಪಯ್ಣ್ ಸುರು. ಮಾರೊಗ್ ಬರೆ ಆಸ್ಲ್ಯಾರ್ ಪಯ್ಣ್ ಸಲೀಸ್ ನಾ ತರ್ ಜಿವಾರ್ ಯೆತಾಲೆಂ. ಪಯ್ಣಾ ವೆಳಾರ್ ಗಜಾಲಿ, ಪದಾಂ, ತಮಾಸೊ, ಜೋಕ್ಸ್ ವಾರೆವಾ ವೇಳ್ ಪಾಶಾರ್ ಜಾಂವ್ಚೊಚ್ಚ್ ಕಳಾನಾತ್ಲೊ. ಖಂಯ್ ಪುಣೀ ಎಂ.ಸಿ ಆಮ್ಚೆ ಸಾಂಗಾತಾ ಯೆಂವ್ಚೆಂ ಆಸ್ಲ್ಯಾರ್ ಮ್ಹಧೆಂ ಮಧೆಂ ತಾಂಚೆಯೀ ಥೊಡೆ ಪೋಟ್ ಫುಟ್ತಾ ವರೆಗ್ ಹಾಸೊಂವ್ಚೆ ಥೊಡೆ ಜೋಕ್ಸ್ ಆಸ್ತಾಲೆ. ತಾಂತುಂ ಮನು ಬಂಟ್ವಾಳಾಚೊ "ಬಾಬು ಸೆಟ್ರ್ ಸಾಯ್ತೆರಾ" ಮ್ಹಳ್ಳೊ ಜೋಕ್ ಆಜೂನ್ಯೀ ಉಗ್ಡಾಸ್ ಕಾಡುನ್ ಹಾಸ್ಚೆಂ ಆಸಾ. ಎಂ.ಸಿ ಜೆರಿ ಆಸ್ಲೊ ತರ್ ಸಾಂಗ್ಚೆಂ ನಾಕಾ, ಖಂಚೆಯ್ ಏಕ್ ವಾಹನ್ ಆಮ್ಚಾ ಮೆಟಾಡೋರಾಕ್ ಪಾಟಿ ಘಾಲುನ್ ಗೆಲೆಂ ತರ್ ತಕ್ಷಣ್ಂಚ್ ತಕ್ಲಿ ಭಾಯ್ರ್ ಘಾಲ್ನ್ "ದಾನೆ ಸಾಯ್ಪಾನಾ ರಂ......... ಮಗಾ" ಮ್ಹಣ್ ಬೊಬಾಟ್ತಾನಾ ಮುಕಾರ್ ಗೆಲ್ಲೊ ವಾಹನ್ ವಾಲೊ ಆಮ್ಕಾಂ ಮುಕಾರ್ ವಚೊಂಕ್ ವಾಟ್ ಕರ್ನ್ ದಿತಾಲೊ, ತಾಣಿಂ ವಾಹನ್ ನಿಧಾನ್ ಕರ್ಚೆಂ ಪಳೆವ್ನ್ ಜೆರಿ ಇಲ್ಲೆಶೆಂ ಕಾಂಪ್ಚಾ ಆವಾಜಾನ್ ಮ್ಹಜಾ ಕಾನಾಂತ್ ಪುಸ್ಪುಸ್ತಾಲೊ" ಪಾಟ್ಲ್ಯಾನ್ ಸೌಂಡ್ಸಿಸ್ಟಮಾಚಾಕ್ ಮೈಕ್ ಸ್ಟೇಂಡಾಚೆ ರೋಡ್ ತಯಾರ್ ದವರುಂಕ್ ಸಾಂಗ್ ಧೈಯ್ರಾಕ್".
ಏಕ್ ವಾ ದೇಡ್ ಘಂಟ್ಯಾಚಿ ವಾಟ್ ಚಮ್ಕಾಜಾಯ್ ತರ್ ಆಮ್ಚೆಂ ಪಯ್ಕಿ ಥೊಡ್ಯಾ ಭುಕೆಲ್ಲ್ಯಾ ಕುಟ್ಮಾಚಾಂಕ್ ಜೋರ್ ಭುಕ್, ಮ್ಹಾಕಾ ಭುಕ್ ಲಾಗ್ತಾ, ಘರಾ ನಾಸ್ಟೊಯೀ ಕರುಂಕ್ನಾ ಮುಕಾರ್ ಹೊಟೆಲಾ ಕಡೆ ರಾವಯ್. ಜಾಲೆಂ ದುಸ್ರೆಂ ಉತಾರ್ ಉಲಂವ್ಕ್ಚ್ಚ್ ನಾ, ಹೋಟೆಲಾ ಮುಕಾರ್ ರಾವವ್ನ್ ಹೊಟೆಲಾಕ್ ವಚೊನ್ ಎಕೆಕ್ಲ್ಯಾಚೆಂ ಎಕೆಕಾ ರಿತಿಚೆಂ ಆರ್ಡರ್, ಭೋವ್ಶಾ ತಾಂಚಾ ಹಾತಾಂತ್ಲೆ ಪಯ್ಶೆ ಖರ್ಸುನ್ ತ್ಯಾ ನಮುನ್ಯಾರ್ ಏಕ್ಯೀ ಪಾವ್ಟಿಂ ಖಾಂವ್ಚೆಂ ಸೊಡ್ ಹೊಟೆಲಾಕ್ ಗೆಲ್ಯಾತ್ಗೀ ನಾಂಗೀ.
ಕಾಂಟ್ರೆಕ್ಟ್ ಕಾಣ್ಘೆತಾನಾ ಕಾಫಿ ಫಳಾರಾಚೆಯೀ ಪಯ್ಶೆ ಕುಡ್ಸುನ್ ಸಾಂಗಾಜಾಯ್ ಮ್ಹಣ್ ತಾಂಚೊ ವಾದ್, ತಶೆ ಕರುಂಕ್ ಗೆಲ್ಯಾರ್ ಮೆಳ್ಚೆಂ ಆಸ್ಲ್ಲೆಂಯ್ ಮೆಳಾನಾ ಜಾಯ್ತ್ ಮ್ಹಣ್ ಮ್ಹಜೆಂ ಚಿಂತಾಪ್ ಜಾಲ್ಲ್ಯಾನ್ ಹೊಯೀ ಖರ್ಚ್ ಮ್ಹಜ್ಯಾಚ್ಚ್ ಮಾತ್ಯಾರ್. ಜಾಲೆಂ ಸಕ್ಡಾಂಚಾ ಪೊಟ್ ಜಡ್ ಜಾಲ್ಲೆಂಚ್ ಥಂಯ್ ಥಾವ್ನ್ ಸುಟ್ಚೆಂ, ವ್ಹರಾಂ ಪಳೆಯ್ತಾನಾ ಸಾಡೆ ಬಾರಾ ಪಡ್ಚಾ, ಡ್ರೈವಾರಾ ಕಡೆ ಸಾಂಗ್ಚೆಂ ಧಾಂವ್ಡಾಯ್ ವೇಳ್ ಜಾಲೊ, ಬಾವ್ಡೊ ತೊಯ್ ಸಾಂಗ್ಲೆ ಪರಿಂ ಕರ್ತಾಲೊ. ಆಮ್ಚೊ ವೇಗ್ ಪಳೆವ್ನ್ ಆತಾಂ ಉರ್ಲ್ಲ್ಯಾ ವಾಹಾನಾಂಚಾನಿಂ ಆಮ್ಕಾಂ ಗಾಳಿ ದಿಂವ್ಚ್ಯೊ ಆಸ್ಲ್ಲ್ಯೊ. ಹೆಣೆಂ ಪೋಟ್ ಜಡ್ ಜಾಲ್ಲೆಂಚ್ ಸಗ್ಳೆ ಹೊಲಾಕಡೆ ಪಾವ್ತಾ ಪರ್ಯಾಂತ್ ಆಪ್ಲಿಂ ತೊಂಡಾಂ ಆಂ ಕರ್ನ್ ಉಗ್ತಿಂ ದವರ್ನ್ ತಾತಿ.
ವೋರ್ ಏಕ್, ಕಶೆಂಯ್ ಕಾಜಾರಾಚಾ ಹೊಲಾಕಡೆ ಪಾವ್ಲ್ಯಾಂವ್, ಹೊಕಾಲ್ ನೊವ್ರೊ ರಾಕೊನ್ ರಾಕೊನ್,ಆಸ್ಲ್ಲ್ಯಾ ಪಾರ್ಕಾಂಕ್ ವಚೊನ್ ಫೊಟೊ ಕಾಡ್ನ್ ಆಖ್ರೇಕ್ ಹೊಲಾಚಾ ಭಾಯ್ರ್ಚ್ಚ್ ಕದೆಲ್ ಘಾಲ್ನ್ ಧರಣಿ ಬಸ್ಲ್ಲ್ಯೆ ಪರಿಂ ಬಸ್ಲ್ಯಾಂತ್. ಮೆಟಾಡೋರಾ ಥಾವ್ನ್ ಸಕಯ್ಲ್ ದೆವಾಜೆ ತರ್ ಸುರು, ಕೆಟರಿಂಗ್ವಾಲೊ, ನೊವ್ರ್ಯಾಚಾ ಪಾಡ್ತಿಚೊ, ಹೊಕ್ಲೆಚಾ ಪಾಡ್ತಿಂಚಾಚೊ ವಿಚಾರ್ಚ್ಚ್ ವಿಚಾರ್." ತುಮ್ಕಾಂ ಕಾಲೆಂ ಸಾಯ್ಬಾ ವೆಳಾರ್ ಯೇಂವ್ಕ್ ಜಾಯ್ನಾಂಗೀ, ತುಮಿ ಕಿತೆಂ ಧರ್ಮಾಕ್ ಖೆಳ್ತಾತ್ಗೀ,ಆಶೆಂ ಕೆಲ್ಯಾರ್ ತುಮ್ಕಾಂ ಆನಿ ಮುಕಾರ್ ಆಮಿ ಮ್ಯೂಜಿಕ್ ದೀನಾಂವ್" ತಿತ್ಲ್ಯಾರ್ ಆಮ್ಚೆ ಮಧೆಂ ಎಕ್ಲ್ಯಾಚೆಂ ಹಾಂಕಾರಾಚೆಂ ಉಲವ್ಣೆಂ "ಚಡ್ ಉಲಯ್ಲ್ಯಾರ್ ಪಾಟಿಂಚ್ ವೆತಾಂ ಮ್ಹಣ್ ಸಾಂಗ್ರೆ" ವಗೆಚ್ಚ್ ರಾವೊನ್ ಪಾಟಿಂ ಉಲಯ್ನಾಸ್ತಾನಾ ವೆಗ್ಗಿಂ ವೆಗ್ಗಿಂ ಪೂರಾ ಶಿರ್ಕಾಯ್ಲೆಂಚ್ ಎಂ.ಸಿ’ನ್ ಕಾರ್ಯೆಂ ಸುರು ಕೆಲೆಂ, ಸಿಜ್ಯೆಸ್ ತಸಲೊ ಎಂ.ಸಿ ತರ್ "ತುಮ್ಚ್ಯಾ ಹಾಕಾ ಮ್ಹಜೆಂ ಹೆಂ" ಮ್ಹಣ್ ಏಕ್ ಡಯಾಲೊಗ್ ಸೊಡಿತ್ ತರ್ ರಾಗಾನ್ ತಾಪ್ಲ್ಲ್ಯಾ ಲೊಕಾಚಿಂ ತೊಂಡಾಂ ಎಕಾಚ್ಛಾಣೆ ಹಾಸೊನ್ ಫುಲ್ತಾಲಿಂ ಆನಿ ಉಪ್ರಾಂತ್ಲೆ ಕಾಮ್ ಆಮ್ಚೆಂ, ಮಧುರ್ ಸಂಗೀತಾನ್ ಲೊಕಾಕ್ ನಾಚೊವ್ನ್ ಖುಶ್ ಕರ್ಚೆಂ. ತ್ಯಾ ವಿಷ್ಯಾಂತ್ ಕಾಂಯ್ ದುಬಾವ್ ನಾ ಲೋಕ್ ಖುಶ್ ಜಾವ್ನ್ ಆಖ್ರೇಕ್ ವೆತಾನಾ ಆಮ್ಚಿಂ ಫೋನ್ ನಂಬರಾಂ ಕಾಣ್ಘೆವ್ನ್ಂಚ್ ವೆತಾಲೊ.
ಕಾರ್ಯೆಂ ಸಂಪ್ಲೆಂ ವಯ್ಜ್ ಮೆಲೊ ಖಂಯ್, ಆತಾಂ ಪಯ್ಶೆ ವಿಚಾರ್ಚಿ ಜವಾಬ್ದಾರಿ ಮ್ಹಜಿಚ್ಚ್. ತುಮ್ಚೆಂ ಬರೆಂ ಜಾಲೆಂ, ಪುಣ್ ವೇಳ್ ಕರ್ನ್ ಮಾತ್ರ್ ಆಯಿಲ್ಲಿ ಮಾತ್ರ್ ಬೆಜಾರಾಯ್, ಕಿತ್ಯಾಕ್ ವೇಳ್ ಜಾಲೊ ಮ್ಹಣ್ ಪರತ್ ತಾಂಚೆಂ ದೀನ್ಪಣಾಚೆಂ ಸವಾಲ್ ವಿಚಾರ್ತಾನಾ, ಆಯೆರಾ ವೆಳಾರ್ ಮೆಳ್ಚ್ಯಾ ಇಲ್ಲೆಶ್ಯಾ ಸುಟ್ಕೆ ವೆಳಾರ್ ಆಮಿ ಕಿತೆಂ ಸಾಂಗ್ಚೆಂಗೀ ಮ್ಹಣ್ ತರ್ಕ್ ಕರ್ತಾಸ್ತಾನಾ ಎಕ್ಲೊ ಸಾಂಗಾಲಾಗ್ಲೊ" ಮಿನಿಸ್ಟರ್ ಪಾಶಾರ್ ಜಾತಾಲೊ ಮ್ಹಣ್ ಸಾಂಗ್" ವಾವ್ ಸೂಪರ್ ಐಡಿಯಾ ಸಗ್ಳೆ ಒಪ್ಲೆ, ತ್ಯಾಚ್ ಪ್ರಕಾರ್ ಹಾಂವೆಂ ಕಾರಣ್ ಸಾಂಗ್ಲೆಂ "ಸನಿ ಸನಿ ಮ್ಹಣ್ ಆಮಿ ಯೆಂವ್ಚಾ ವಾಟೆನ್ ಮಿನಿಸ್ಟರ್ ಪಾಶಾರ್ ಜಾತಾಲೊ ಜಾಲ್ಲ್ಯಾನ್ ಸಗ್ಳೆಂ ಟ್ರಾಫಿಕ್ ಬ್ಲಾಕ್ ಕೆಲ್ಲೆಂ, ಜಾಲ್ಯಾರೀ ಆಮಿ ದುಸ್ರ್ಯಾ ವಾಟೆನ್ ಆಮಿ ಜಾತಾ ತಿತ್ಲ್ಯಾ ವೆಗ್ಗಿಂ ಯೇವ್ನ್ ಪಾವ್ಲ್ಯಾಂ" ಮ್ಹಣ್ತಾನಾ ಛೆ..ಛೆ ತುಮಿ ಸುರ್ವೆರ್ಚ್ಚ್ ಕಿತ್ಯಾಕ್ ಸಾಂಗೊಂಕ್ನಾ ಮ್ಹಣ್ ತಾಂಚಾ ಸಮಾಧಾನೆಚಾ ಉತ್ರಾಂ ಸಂಗಿಂ ಆಮ್ಚೆ ಪಯ್ಶೆ ಮೆಳ್ತಾಲೆ ತಾಚೆ ವಯ್ರ್ ಆನ್ಯೇಕ್ ಕಾಜಾರಾಕ್ ಆರ್ಡರ್ ಬುಕ್ಕಿಂಗ್ ಥಂಯ್ಚ್ ಜಾತಾಲೆಂ ಎಡ್ವಾನ್ಸಾ ಸವೆಂ.
ವೆಳಾರ್ ಪಾವ್ಲ್ಯಾರ್ ಹೆರ್ ರಗ್ಳೆ, ಗಿಟಾರಾಚಾ ಕೇಜಿ (ಬೊಕ್ಸ್) ಭಿತರ್ ಗಿಟಾರ್ ಆಸಾನಾ, ಡ್ರಮ್ಸ್ ಹಾಡ್ಲ್ಯಾರ್ ಪೆಡಲ್ ನಾ, ಆನಿ ಥೊಡೆ ಪಾವ್ಟಿಂ ಸ್ನೇರ್ ನಾ, ತುರ್ತಾನ್ ಫೋನ್ ಕರ್ನ್ ಎಕ್ಲ್ಯಾಕಡೆ ಹಾಡುಂಕ್ ಸಾಂಗ್ಲ್ಯಾರ್ ಅರ್ಧೆಂ ಕಾರ್ಯೆಂ ಸಂಪ್ತಾಲೆಂ ತೊ ಪಾವ್ತಾನಾ, ವೇಳ್ ಕಿತ್ಯಾಕ್ ಮ್ಹಣ್ ವಿಚಾರ್ಲ್ಯಾರ್ ತಾಚಿ ಜವಾಬ್ ಬಸ್ಸ್ ಎಕ್ದಮ್ ಸಾವ್ಕಾಸ್ ರಾವೊನ್ ರಾವೊನ್ ಯೆತಾಲೆಂ (ಬಾವ್ಡ್ಯಾನ್ ಎಕ್ಸ್ಪ್ರೆಸ್ಸ್ ಮ್ಹಣ್ ಸೆಟ್ಲ್ ಬಸ್ಸಾಚೆರ್ ಯೆಂವ್ಚೆಂ ಆಸ್ಲ್ಲೆಂ) ಹೆರ್ ಸಂಗೀತ್ ಪಂಗಡ್ಯೀ ಎಕಾವರ್ನಿ ಏಕ್ ಅಸ್ಸಲ್ ಜಾಲ್ಲ್ಯಾನ್, ಆಮ್ಚಿ ಹಿ ಸೂಪರ್ ಐಡಿಯಾ ತಾಣಿಂಯೀ ವ್ಹಾಪಾರುಂಕ್ ಸುರು ಕೆಲ್ಲಿ. ಕಿತ್ಲೊ ತೇಂಪ್ ಲೊಕಾಕ್ ಫಟವ್ಯೆತ್? ದುರಾದೃಷ್ಟ್ ಮ್ಹಳ್ಳೆ ಬರಿಂ ಏಕ್ ಸಂಗೀತ್ ಪಂಗಡ್ ಹಾಂತುಂ ಸಾಂಪ್ಡಾಲೊ ಮಿನಿಸ್ಟರ್ ಮ್ಹಣೊಂಕ್ ಉಪಾವ್ ನಾ ಧಡ್ ಬಡ್ ಕರ್ನ್ ಖಂಯ್ ಥಾವ್ನ್ ಪಡ್ಲ್ಯಾತ್ ಮ್ಹಣ್ ಕಳಿತ್ ನಾ, ಉರ್ಲ್ಯಾರ್ ಮಾತಿ ಖಾವ್ನ್ ವಾಂಚ್ತಾ ಮ್ಹಳ್ಳೆ ಬರಿಂ ಪಾಟಿಂ ಧಾಂವೊನ್ ಆಯಿಲ್ಲೆ ಮಾಗಿರ್ ತ್ಯಾ ಜಾಗ್ಯಾರ್ ಚಡಿತ್ ಪಯ್ಶೆ ದಿತಾಂ ಮ್ಹಳ್ಯಾರೀ ವಚಾನಾತ್ಲ್ಲೆ.
ಕಥಾಂಕರ್ ಪಾನಾಕ್: 1, 2, 3, 4, 5, 6, 7, 8, 9
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
