LØUKIKTAYENT PØVITRTAY: FR. PRATAPANANDA NAIK-ACHYO ØDHYATMIK KØVITA (- Fr.Jason Pinto)
Survatnni
Konknni bhaxen, Bharøtiy sønvskrutayek ani ødhyatmiktayek ek girest dennem dilam. Khub kalla thavn ødhyatmik ønnbhov uktovpachem ek sadhøn zavn Konknni bhas ful’lya. Adlya amchya Bharøtiy Sant-Køvim pasun aychya hya kallachya børovpyam pøryant, Konknni køviten møn’xachya atmyache khol ønnbhov-øn’bhog manddlyat. Hyach adhunik kallant, Fr. Pratapananda Naik, SJ, ek mhøtvacho ødhyatmik ani krantikari chintøk zavn fuddem yeta. To ek Jezuit padri, xikxøk, bhaxaxastri (linguist) ani børovpi. Tachi køvita føkøt igrøjechya vørtula purti møryadit nam. Ti sruxttichya rukam-panamni, gøribanchya køxttam-ønvaramni ani møn’xachya kallzam-mønamni Devak sodun asat. Ødhyatmikpønn mhønnje kitem? What is spirituality? Haka ek zokhti zap Fr. Pratap-alyo køvita mhønnlyar øtitay zanvchi nam. Tuka sodun vetalom hye køvitent to amkam sangta:
Tuka sodun vetalom møndiranti,
Tu`ji vatt raktalom dongra tengxeri,
Tujim pavlam sodtalom tirthsthanamni.
Tujim utram vinchtalom dhørmgrønthamni,
Tuji khøbør kaddttalom axrømamni,
Tujem dørxøn axetalom møllbari.
Hai Deva! Vatt chukli, pavlom gøl’lyamni,
Tuka dekhlo pavsan ponvchya khompttyamni.
Hai Deva! Pavlom niraxitangeri,
Tum uløylo tanchya mon’ya utramni.
Tanchya køvita punjyantlim him utram aykon, tachya køvitanchyo ek mottvo niyall tumche mukhar døvørtam. Hanvem hache char vantte kelyat -
1. Ødhyatmiktay (Spirituality) ani Dhørm (Religion): Ek Khaxelo Førøk
Fr. Pratapananda-chem hem dharmik sahity sømzonk, pøylem ami dhørm ani ødhyatmiktay hantlo førøk sømzonk khub gørjechem. Dhørm mhønnlyar ek sønsvtha, nem’-kayde ani kherit riti-rivaji. Fr. Pratap aplya køvitam vørvim hantlo amkam bhayr yenvk ulo dita. Tachi køvita sangta, dhørm mhønnlyar ek 'aydøn', punn ødhyatmiktay mhønnlyar tantlem 'udøk'. Tacher ami chødd bhør dinvk favo.
Futtko Buddkulo hye køvitent to amkam hache vixim sangta:
Østømtechye pøltøddi,
Sørg mhøji vatt rakta,
Østømtechye altøddi,
Lok mhøji seva magta.
Deva, hanv kørum kitem?
Thøklølem jivit mhøjem,
Vhørum hanv fuddem køxem?
Kitle dis jiyenv øxem?
Ver aylølo buddkulo?
Ason to faydo køslo?
Az na tor falyam futtcho,
Matiyent mati zavn vecho.
Ødhyatmiktay mhønnlyar ek khaxelo ønnbhov, zo møn’xak Devachya rupant zata. Ti føkøt dhørmachya bøndønamni urønam. Fr. Pratap-achya køvitamni Dev føkøt ek fatranchya møndirant va igørjent ravpi nyayadhix nhøy. To amcho ixtt, to amcho sangati. To amchya bhaxent, Konknnint, amkam ho ek jivo Devacho ønnbhov dinvk yøtn kørta. Tachem børovp "dhørm pallpachya" pørøs "lokachi seva kørun ek ødhyatmik jivit jiyevpacher" chødd bhør ghalta.
2. Bhøkti-marg: Lok-marg ani Tøtv-gin’yan hantlo førøk
Fr. Pratap-achya køvitechi mull-khunna mhønnlyar bhøkti. Bharøtiy ødhyatmik pørømpørent, 'Bhøkti' mhønnlyar Deva lagim ami zoddchem ek mogachem natem. Hem gin’yan (knowledge) va tøtv-gin’yana (philosophy) pørøs vegllem. Tøtv-gin’yan Devak sømzonk prøytn kørta, punn Bhøkti Devak ønnbhovunk prøytn kørta. Vatt chukon hye køvitent amkam tem dista.
Vatt chukon tujya møndirant pavlam,
Aylam dekhun char gøzali sangtam.
Cheplølyam lokachim rudønam,
Zalyant mhaka tujim bhøjønam.
Dubllya lokan sonschi dogdavnni,
Hich tuka mhøgeli bhettovnni.
Fr. Pratap-achyo køvita mhonnlyar eke tørechim aychya kallachim 'bhøjønam.' Tantum Devak sømzonk køtthin øso vixøy nhøy. To ek Guru, ixtt va mogi zavn fuddem yeta. Bhøkti amchya kallzachi ødhyatmiktay. Tantum bhøkt (devotee) bhøttak va padrik mellønastanam, føkøt lokachi seva kørunk veta.
Dev mhøzo Guru, dita mhaka kuru,
Apøyta khunnamni, uløyta kurvamni,
Hansøyta ul’lasamni, røddøyta umallyamni,
Xikøyta ghødditamni, zagøyta akantamni
3. Fr. Pratap-achi ødhyatmiktay: Mønis ani Sruxtti-kendrit (søimb)
Fr. Pratap-achi ødhyatmiktay møn’xapønnant dison yeta. Tachya møtan, Devachem bhøjøn kørøp mhønnje møn’xacho ani søimabcho mog kørøp, va sruxtticho samball kørøp. Tachya Bhøkti Sobhann køvita punjyant aschya 85 køvitanchya rupan ami tachya hya ødhyatmik prøvasachem øxem vørgikørønn kørum yeta:
1. Devacho ulo
Vønditam, Aylam hanv, Prarthønam mhøji Deva hantum mønis Devak sodun asa mhønnlo søndex amkam melltta. Hanga mønis aplem hanvpønn va øhønkar soddun Devache fuddem yeta. Dekhik, Prarthønam Mhøjim Deva køvitentlyo hyo vølli:
Prarthønam mhøjim Deva, Sadhønam tuji seva,
Vøndønam mhøjim tuka, Bøndønam tujim mhaka.
Kadd mhøzo rog, divn tuzo mog,
Kadd mhøzo rag, divn tuzo dag.
Kadd mhøjem gørv, hadd tujem sørv,
Kadd mhøjem søll, hadd tujem bøll.
2. Mønis Devachem Møndir
Møn’xachi kudd ani øtmo hem Devachem khørem ghør mhønn ‘Ami Devmøndir’ hye køvitent to sangta. Dev Mhøzo Guru ani Mhøjya Deva hantum to Deva lagim ek ixttagøticho sømbønd dakhøyta. Tujem Bhøjøn hantunt to Devospønn (sacredness) ami møn’xachi seva kørun ani søimbachi rakhønn kørun, amchya jivitant Devak suvat dinv yeta mhønn to sangta. ‘Ami Dev møndir’ hantlyo hyo vølli pøllenvya:
Ami Dev møndir, tantum Dev hajir.
Amchi jinni, khalti nennti, Møndirantli zøllti pønntti.
Mogall utram, movall sutram, møndirantlim
3. Khønt ani Døya (Empathy)
Tachi ødhyatmiktay sønvsarant aschya dukhank vengøyta. Mhøzo Dev røddla hi ek khol køvita, ji dakhovn dita ki mønis dukhi astanam Devuy dukhi zata. Møn’xa Kiteak Bhiyetay? hantunt møn’xachya bhiranticho pørinnam’ tannem sangla ani vachpyak atmik bøll dilam. Mhøzo Dev Røddla hye køvitent to øxem mhønntta:
Mhøjya Devak kednam tøri tumi dekhla? Mhøzo Dev røddtanam taka tumi choyla?
Sita øpøhørønna vellar to røddla, Draupadichem vøstrøhørønn zatanam to røddla, Khursar umkøllttana amche pasøt to røddla…
4. Søimb ani Jivitant dixttavo
Dev, Mønis ani Søimbachem natem, Sallkachem Rup Tugelem hantum bhov børye ritin vørnnnilam. Dekhun søimbachi zøtøn khub mhøtvachi hem ami amchya mønant døvrunk zay.
Sallkachem rup tugelem, dekhunk Deva øtrektam
Merum udkak taneta, vasrum dudak bhuketa,
Bhumi pavsak laleta, gavpi gitak axeta.
5. Ekchar ani Mukti-Suttka
Prøvasacho xevøtt mhønnje Devachea tya rupant ek zavøp. “Ami Ek” ani “Hanv Altøddi Tum Pøltøddi” hantum mønis ani Deva mødlo førøk køso unno zata tem dakhøylam. Tujya Rinnantli Suttka mhønnje atmyachi khøri suttka va mukti. Hanv Altøddi, tum pøltøddi, hye køvitentlim him utram hanga moladik:
Hanv altøddi, tum pøltøddi, bøson ulonvya ek ghøddi.
Utør tujem ømrutachi dhar, nødør tuji khaltikaye lhar.
Sruxtti tuji gazøyta priti, pruthvi tuji zagøyta bhøkti.
4. Fr. Pratap-achem Konknni Bhaxek ani Sahityak Yogdan
Fr. Pratapananda Naik-achem yogdam føkøt ødhyatmik nhøy, to bhaxechya vavrant legun dison yeta. Thomas Stephens Konknni Kendr (TSKK)-cho direktor zavn tannem Konknni bhaxechi seva kelya. Bhaxecher ønit zatanam to titlech nettan uløyla. Konknni bhas xallamni ani igrøjamni vaprunk tannem mhøtvacho vavr kela ani pustøkam legun chhaplyant. Ekdøm’ sørøll søbhavacho Fr. Pratap Naik, aplim moladik zannvayechim utram divn “Ximpiyentlim motiyam” vørvim youtube-acher aplya pøllevpyam mukhar azun, hye pirayer legun søtøt døvrun asa. Hya søgllya tachya Konknni vavrant tachi føkøt Devak ani Møn’xakuch nhøy, punn Konknni thøny aschi tachi bhøkti legun tannem dakhovn dilya.
Sompovnni
Ødhyatmik søtam, møn’xa jivitachi molam amchya avøy-bhaxentlyan amkam sørølltayen vyøkt kørunk zatat mhønn Fr. Pratapananda Naik-achyo køvita amkam hem dakhovn dita. Jivitacho søntos, søimbachi rakhønn ani Devak mellpachi axa, hyo søgllyo gøzali ektthany haddun tannem ek moladik sahitya ghøddlam. Tachi køvita amkam xikøyta ki ødhyatmiktay mhønnje sønvsar soddun vøchøp nhøy, punn sønvsarant ason Devacho onnbhov ghevøp. Dev møn’xa søvem vøsta. Konknni sahityachya møllar tacho tallo ek uzvadd zavn Konknni møn’xak sødanch vatt dakhøyt ravtølo. Salløk køvitechim utram sangon sompøytam:
Salløk chiklant zølmøta, punn udkar tem fulta, Deva panyaxim sobta.
Deva kør mhaka salløk, di tuji atmik zhølløk, parkunchi døivik vølløkh.
