ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ಎಕ್ ನದರ್ಚೆರ್ ಪ್ರತಿಕ್ರಿಯಾ: ಕೃತಿ ಚೋರ್ ಚುಕಾರಿ ಮಾರ್ತಾ..? - ನೆಲ್ಲು ಪೆರ್ಮನ್ನೂರ್.
’ಬೊಂಗೊ’ ಫಕತ್ತ್ ಏಕ್ ನದರ್ ವಾಚುನ್ ಹಾಂವ್ ದೆಧೆಸ್ಪ್ರೊರ್ ಜಾಲಾಂ ಮ್ಹಳಾಂ ಚಿದಾನಂದಾನ್. ಹಾಂವ್ ಖಂಯ್ಚ್ಯಾಯ್ ಸಂಗ್ತಿಂತ್ ಹಾಚೆ ಆಧಿಂಯ್ ದೆಧೆಸ್ಪ್ರೊರ್ ಜಾವ್ನಾ. ಫುಡೆಂಯೀ ಜಾಯ್ನಾ. ತಶೆಂ ಮ್ಹಳ್ಯಾರ್ ಕಿತೆಂ ಮ್ಹಣ್ಂಚ್ ಹಾಂವ್ ನೆಣಾಂ. ಮ್ಹಜೆವಿಶಿಂ ತುವೆಂ ಬೆಜಾರ್ ಪಾಂವ್ಚಿ ಸಿಂಪತಿ ಮ್ಹಾಕಾ ಗರ್ಜ್ ನಾ. ’ನೀಜ್ ವಿಮರ್ಸೊ ಬರಯಿಲ್ಲೊ ತರ್ ಕಿತೆಂ ಕರ್ತೊ?’ ಮ್ಹಣ್ ಬರಯ್ಲಾಂಯ್. ತುಂ ನೀಜ್ ವಿಮರ್ಶಕ್ ಮ್ಹಣ್ ಕೆದ್ನಾಂಯ್ ತುವೆಂ ರುಜು ಕೆಲ್ಲೆಂ ನಾ ಮ್ಹಣ್ತಚ್ ನೀಜ್ ವಿಮರ್ಸೊ ಬರವ್ನ್ ಧಾಖಯ್ತೊಯ್. ತುಂ ಏಕ್ ’ಫಟ್ಕಿರೊ ಖೊಡ್ಯಾರೊ’ - ತುಕಾ ಫುಗಾರ್ತೆಲ್ಯಾಂಕ್ ಫುಲಾಂ ಘಾಲ್ತಾಯ್ ಆನಿ ತುಜೆರ್ ಹೊಗ್ಳಿಕ್ ಉಚಾರಿನಾತ್ಲ್ಲ್ಯಾಂಕ್ ಆಡ್ ನಾಂವಾನಿ ಖೊಡಿ ಉಚಾರ್ತಾಯ್.
ಮ್ಹಾಕಾ ಹೊಗ್ಳಾಪ್ ಗರ್ಜ್ ನಾ, ತಿಯೀ ತುಜೆ ತಸಲ್ಯಾಚಿ. ಸತ್ ಸಾಂಗ್ಚೆಂ ತರ್ ಕೊಂಕ್ಣೆಂತ್ಲೆ ಬರೆ ವಿಮರ್ಶಕಾಂಚೆಂ (ಪ್ರಾಯೆನ್ ತೆ ತುಜ್ಯಾಕೀ ಲ್ಹಾನ್ ಆಸಾತ್ - ಇಲ್ಲೆಂ ತಾಂಚೆ ಥಾವ್ನ್ ಶಿಕೊಂಕ್ ಪ್ರೇತನ್ ಕರ್) ವಿಮರ್ಶೆ ಹಾವೆಂ ಮೊಗಾನ್ ಸ್ವೀಕಾರ್ ಕೆಲ್ಯಾತ್. ಖಂಚ್ಯಾಯ್ ಎಕಾ ಕಲಾಕಾರಾಕ್ ಫಕತ್ತ್ ಹೊಗ್ಳಿಕ್ ಗರ್ಜೆಚಿ ನ್ಹಯ್. ತುವೆಂ ’ತುಕಾಚ್ಚ್’ ಆನಿ ’ತುಜೆ ತಸ್ಲ್ಯಾ ಥೊಡ್ಯಾಂಕ್’ ಚಿದಾನಂದ್ ನಾಂವಾರ್ ’ಮಾನ್ ನಾಟಕಿಸ್ತಾಂಚ್ಯಾ ಮೆಳಿಂತ್’ ದವರ್ಲಾಯ್. ಪಯ್ಲೆಂ ತುಜ್ಯಾ ಭೃಮಿದೆಂತ್ಲೊ ಭಾಯ್ರ್ ಯೇ ಆನಿ ತುಂ ಖಂಯ್ ಆಸೊಂಕ್ ಫಾವೊ ಜಾಲ್ಲೊ ತೆಂ ಸಮ್ಜೊನ್ ಘೆ. ಚಾ.ಫ್ರಾ.ದೆ’ಕೋಸ್ತಾಕ್ ಹಾಂವ್ ಜಾಂವ್ ವಾ ಕೊಂಕ್ಣೆಂತ್ಲೊ ಕೊಣ್ಯೀ ಮಾನ್ ದೀನಾಯೆ ರಾವಾನಾ, ಕಿತ್ಯಾಕ್ ಚಾ.ಫ್ರಾ ಏಕ್ ಸಂಸ್ಥೊ, ತೊ ಕೊಂಕ್ಣೆ ಶಿವಾಯ್ ಇಂಗ್ಲಿಶ್, ಪರ್ಶಿಯನ್, ಹಿಂದಿ, ಮರಾಠಿ, ಕಾನಡಿ, ತುಳು.. ಸಭಾರ್ ಭಾಸೊ ಜಾಣಾಸ್ಲೊ ಪಂಡಿತ್. ತುಂ ಏಕ್ ಪೊಕೊಳ್ ಮನಿಸ್, ಚೊಟ್ಟೊ ಬರವ್ಪಿ, ತುಕಾ ಇಂಗ್ಲಿಶಾಂತ್ ಏಕ್ ವಾಖ್ಯ್ ಬರಂವ್ಕ್ ಯೆತಾ? ಇಂಗ್ಲಿಶ್ ಸೊಡ್, ಕೊಂಕ್ಣಿ ಸಯ್ತ್ ಸಾರ್ಕಿ ಬರಂವ್ಕ್ ಕಳ್ತಾ ಮ್ಹಣ್ ಧಯ್ರಾನ್ ಸಾಂಗ್ಶಿ? ಹಾಂವ್ ತುಜೆಲಾಗಿಂ ಆತಾಂ ಹೆಂ ಶರ್ಥ್ ಮಾರ್ತಾಂ.
ತುಜ್ಯಾ ಮಾನ್ ನಾಟಾಕಿಸ್ತಾಂಚ್ಯಾ ಪಟ್ಟೆಂತ್ ಚುಕ್ಲ್ಲೆ ಮಾನ್ ನಾಟಕಿಸ್ತ್ ಕೊಣ್ ಮ್ಹಳ್ಳೆಂ ಹಾಂವ್ ಸಾಂಗ್ತಾಂ; ’ವಿಲ್ಫಿ ರೆಬಿಂಬಸ್’, ’ಡೊಲ್ಲಾ ನಂದಿಗುಡ್ಡೆ’, ’ಕ್ಲೋಡ್ ಡಿ’ಸೋಜ್’, ’ಬೆನ್ನಾ ರುಜಾಯ್’.... ಹಿಂ ನಾಂವಾ ತುಂ ಕಸೊ ವಿಸರ್ಲೊಯ್? ಮಾನ್ ಸಾಹಿತಿ ಮ್ಹಳ್ಯಾರ್ ಮಾನ್ ಮನ್ಶ್ಯಾಂಸವೆಂ ಉಭೊ ರಾವೊನ್ ಬತ್ತೀಸ್ ದಾಂತ್ ಧಾಖಂವ್ಚೊ ಫೊಟೊ ಕಾಡುನ್ ಆಪ್ಲ್ಯಾ ಪ್ರೊಫಾಯ್ಲಾಂತ್ ಘಾಲ್ಚೆಂ ನ್ಹಯ್ ಚಿದಾನಂದ್. ಚ್ಯಾರ್ ದಿಸಾಂಚ್ಯಾ ಶಿಭಿರಾಕ್ ವಚೊನ್ ತುಂ ’ಅಪುಣ್ ಏಕ್ ತರ್ಭೆತ್ದಾರ್’ ಮ್ಹಣ್ ಥೊಡ್ಯಾಂಕ್ ಬೆಕೂಫ್ ಕರ್ಶಿ, ಪುಣ್ ಸಂಸಾರ್ ಬೆಕೂಫ್ ನ್ಹಯ್, ತೊ ತುಂ ಕಿತ್ಲೊ ಉಂಚ್ಲೊ, ತುಜೆಂ ಮೂಳ್ ಕಿತ್ಲೆಂ ಗುಂಡಾಯೆಚೆಂ ಮ್ಹಳ್ಳೆಂ ಸಾರ್ಕೆಂ ಜಾಣಾ. ದೆಕುನ್ ತುವೆಂ ಗೆಲ್ಲೆಕಡೆ ತುಜೊಚ್ಚ್ ಅಭಿಮಾನಿ ಪಂಗಡ್ ಭಾಂದುನ್, ತಾಂಚೆಥಾವ್ನ್ ಮಾನ್-ಸನ್ಮಾನ್, ಪ್ರಶಸ್ಥ್ಯೊ, ಬಿರುಧೊ ಜೊಡುನ್, ಖಬ್ರೊ ರಚುನ್, ಪತ್ರಾಂಕ್, ಸಾಯ್ಟಿಂಕ್ ಧಾಡುನ್, ತುಕಾ ತುವೆಂಚ್ ಮಾನ್ ಸಾಹಿತಿ ಮ್ಹಣ್ ಚಿಂತ್ಲಾಯ್ ಶಿವಾಯ್ ಹೆರ್ ಕಿತೆಂಚ್ ನ್ಹಯ್. ತುಜೊ ಡೋಂಗ್ ಸಮ್ಜೊನ್ ಪ್ರತಿರೋಧ್ ಧಾಖಯಿಲ್ಲ್ಯಾ ಶಿಕ್ಪ್ಯಾಂಕ್ ತುಂ ಆಡ್ ನಾಂವಾನಿ, ವೆವೆಗ್ಳ್ಯಾ ಚಾಲಿಂನಿ ಖೆಂಡುನ್, ತಾಂಚಿಂ ನಾಂವಾ ಪಾಡ್ ಕರ್ತಾಯ್. ಸತ್ ಗಜಾಲ್ ಹಿಕೀ - ಕೊಣ್ಯೀ ಮರ್ಯಾದ್ ಆಸ್ಚೊ ತುಜೆಸವೆಂ ಖಂಚ್ಯಾಯ್ ಸಂಸ್ಥ್ಯಾಂಕ್ ಆಸೊಂಕ್ ಆಶೆನಾ ಮ್ಹಳ್ಳೆಂ ಸಮ್ಜೊನ್ ಘೆ. ದೆಕುನ್ ತುಕಾ ಕುವೆಯ್ಟಾಂತ್ ಆಜ್ ಸಕ್ಕಡ್ ಸಂಸ್ಥ್ಯಾಂತ್ಲೊ ಧಾಂವ್ಡಾಯ್ಲಾ. ದೆಕುನ್ ತುಜ್ಯಾ ಅಭಿಮಾನಿ ಪಂಗ್ಡಾಕ್ ಘೆವ್ನ್ ತುಜೆಂ ಆಳುಂ ಶಿಜವ್ನ್ ಹಿ ’ಕೊಂಕ್ಣಿ ಸೆವಾ’ ಮ್ಹಣ್ ಧಾಂಗ್ರೊ ಮಾರ್ತಾಯ್. ಹೆಂ ಸರ್ವಾಂಕ್ ಕಳಿತ್ ಆಸ್ಲ್ಲೆಂ ಸತ್, ಜಾವ್ಯೆತಾ ಕೊಣ್ಯೀ ತುಜೆ ಮುಖಾರ್ ಸಾಂಗಾನಾ, ಪುಣ್ ಸರ್ವಾಂಚ್ಯಾ ಮತಿಕ್ ಹೆಂ ಸಮ್ಜಲಾಂ ಚಿದಾನಂದ್. ಮಾಜರ್ ದೊಳೆ ಧಾಂಪುನ್ ದೂದ್ ಪೆಯೆತಾನಾ ಸಂಸಾರ್ ಪಳೆನಾ ಮ್ಹಣ್ ಚಿಂತಾ - ಭಿಲ್ಕುಲ್ ತುಜೆಪರಿಂ. ದಯಕರುನ್ ಅನಿ ಪುಣಿಂ ಇಲ್ಲೆಂ ಸುಧರ್. ನಾಂ ತರ್ ತುವೆಂ ಖೊಂಡ್ಲ್ಲ್ಯಾ ಫೊಂಡಾಕ್ ಎಕಾ ದಿಸಾ ತುಂಚ್ ಪಡ್ತಲೊಯ್.
’ಕುಡ್ಡ್ಯಾಂಚ್ಯಾ ರಾಜಾಂತ್ ಎಕಾ ದೊಳ್ಯಾಂಚೊ ರಾಯ್’ ಮ್ಹಳ್ಳೆಪರಿಂ ತುವೆಂ ಇನಾಮಾಂ ಜೊಡ್ಲ್ಯಾಂಯ್ ಜಾವ್ಯೆತ್ (ತೆಂ ಇನಾಮ್ ಕಶೆಂಯ್ ಜೊಡ್), ಒಪ್ತಾಂ. ತುಜೆಲಾಗಿಂ ನೀಜ್ ನಾಟಕಾಚೆಂ ತಾಲೆಂತ್ ಆಸಾ ತರ್ ಮ್ಹಜೆಲಾಗಿಂ ಸ್ಪರ್ಧ್ಯಾಕ್ ದೇಂವ್. ಹೆಂ ಮ್ಹಜೆಂ ಹಾಂಕಾರಿ ಉಲವ್ಣೆಂ ನ್ಹಯ್, ಖಾಲ್ತಿ ವಿನತಿ, ತುಜ್ಯಾ ಪ್ರಾಯೆಕ್ ತರೀ ಗೌರವ್ ದೀವ್ನ್ ಹಾಂವ್ ಹೆಂ ಸಾಂಗ್ತಾಂ, ತುಂ ಕೊಂಕ್ಣೆಂತ್ ಚಾ.ಫ್ರಾ.ಉಪ್ರಾಂತ್ಲೊ ಉಂಚ್ಲೊ ಸಾಹಿತಿ ಮ್ಹಣ್ ಧಾಂಗ್ರೊ ಮಾರ್ತಾಯ್ ನೆ? ತುಂ ತುಕಾಚ್ ವೊರಾವ್ನ್ ಪಳೆ, ತುವೆಂ ಏಕ್ ಉಂಚ್ಲಿ ಮಟ್ವಿ ಕಾಣಿ ಜಾಂವ್, ಏಕ್ ಉಂಚ್ಲೆಂ ಕವಿತಾ ಜಾಂವ್, ಏಕ್ ಉಂಚ್ಲೊ ನಾಟಕ್ (ತುಜ್ಯಾ ಸೃಜನಾತ್ಮಕ್ ಚಿಂತ್ಪಾಚೊ, ಕೊಣಾ ಕೊಣಾಚೊ ಚೊರ್ಲ್ಲೊ ನ್ಹಯ್) ಜಾಂವ್, ಏಕ್ ಮರ್ಯಾದಿಚೆಂ ವಿಡಂಬನ್ ಬರಯಿಲ್ಲೆಂ ಆಸಾ?. ತುಂ ವಿಡಂಬನ್ ಮ್ಹಳ್ಳ್ಯಾ ನಾಂವಾರ್ ವಾಪಾರ್ಚಿ ಭಾಸ್ ತುಜೆಂ ಚಿಂತಾಪ್, ತುಜೆಂ ಶಿಕಾಪ್, ತುಜೊ ಅನ್ಭೋಗ್ ಪಿಂತ್ರಾಯ್ತಾ. ವಿಚಾರ್ ಕೊಂಕ್ಣೆಚ್ಯಾ ಸಂಪಾದಕಾಂಕ್ - ತುವೆಂ ವಿಡಂಬನ್ ಮ್ಹಳ್ಳ್ಯಾ ಸಬ್ಧಾಚೆರ್ ಅತ್ತ್ಯಾಚಾರ್ ಕರುಂಕ್ ನಾ? ಜೀವ್ ಆಸ್ತಾನಾ ಸೊಡ್, ಮೆಲ್ಲ್ಯಾ ಉಪ್ರಾಂತ್ ಸಯ್ತ್ ತಾಂಚೆವಿಶಿಂ ತುವೆಂ ಬರವ್ನಾ? (ತುಂ ನಾ ಮ್ಹಣ್ ಆನಿ ಹಾಂವ್ ತುಕಾ ಧಾರಾಳ್ ಧಾಖ್ಲೆ ದಿತಾಂ). ಆತಾಂ ಸಾಂಗ್ - ತುಂ ಚಾ.ಫ್ರಾ.ಚ್ಯಾ ಸಾವ್ಳೆಂತ್ ಖಿರ್ಲಲ್ಲ್ಯಾ ಆಳುಂ ದೆಂಟ್ಯಾಕ್ ಪುಣಿ ಸರಿ ಜಾತಾಯ್ಗಿ ಮ್ಹಣ್. ಮ್ಹಜಿ ಭಾಸ್ ಸಾರ್ಕಿ ನಾ ಮ್ಹಣ್ ಬೋಟ್ ಜೊಕ್ಚ್ಯಾ ತುಜಿ ಭಾಸ್ ಕಿತ್ಲಿ ಸಾರ್ಕಿ ಆಸಾ ಮ್ಹಳ್ಳೆಂ ತುಂಚ್ ಕೊಂಕ್ಣಿ ಕಾರ್ಭಾರ್ಯಾಂ ಲಾಗಿಂ ವ್ಹೊರಾವ್ನ್ ಪಳೆ.
’ತಶೆಂ ಚಿಂತ್ಚೆಂ ಉಣೆಂಪಣ್ರೇ ಬಾಬಾ’ ಮ್ಹಳಾಂಯ್ - ತರ್ ’ವ್ಹಡ್ಪಣ್ ಮ್ಹಳ್ಯಾರ್ ಕಿತೆಂ ರೆ ಬಾಬಾ?’ ಮ್ಹಣ್ ಹಾಂವ್ ವಿಚಾರ್ತಾಂ, ತುಜಿ ಜಾಪ್ ಕಸ್ಲಿ?. ಕೊಂಕ್ಣೆಂತ್ ನೀಜ್ ವಿಮರ್ಶೆ ಜಾಯ್ ಮ್ಹಣ್ತೆಲ್ಯಾಂಕ್ ತುಂ ಉಲೊ ದಿತಾಯ್ ನೆ? ’ಕೊಂಕ್ಣೆಂತ್ ವಿಮರ್ಶೆ ಜಾಯ್ತೆ ಪಾಟ್ಲ್ಯಾನ್ ಯೆತೆಲೆ, ರಾಕೊನ್ ರಾವ್’. ವಿಮರ್ಸೊ ಮಾತ್ರ್ ನ್ಹಯ್, ವಿಮರ್ಸೊ ಕರ್ಚಿ ರೀತ್ ಸಯ್ತ್ ತುಕಾ ಸಾಂಗ್ತೆಲೆ.
ಪಯ್ಸ್ ಥಾವ್ನ್ ಪಳಂವ್ಚ್ಯಾಂತ್ ಆನಿ ಖುದ್ದ್ ವಚೊನ್ ಮೆಳೊನ್ ಉಲಂವ್ಚ್ಯಾ ಮಧೆಂ ಫರಕ್ ತುಂ ನೆಣಾಂಯ್. "ಕಲಾಕುಲ್ ಭೆಟ್" ಮ್ಹಣೊನ್ ತುವೆಂ ಕೆಲ್ಲೆಂಯೀ ತಿತ್ಲೆಂಚ್!. ಹಾಂವೆಂ ಚೂಕ್ ಕರುನಾ ದೆಕುನ್ ಹಾಂವ್ ಒಪ್ವೊಂಕ್ ತಯಾರ್ ನಾ. ಮ್ಹಾಕಾ ತುವೆಂ ನಂಜಿ ಉತ್ರಾಂನಿ ಬರೆಂ ಮಾಗ್ಚಿ ಗರ್ಜ್ ನಾ.
’ಬೊಂಗೊ’ ನಾಟಕಾಚೆಂ ಪಯ್ಲೆಂ ಪ್ರದರ್ಶನ್ ಪಳೆವ್ನ್, ಕೊಂಕ್ಣೆಚೊ ಗಂಭೀರ್ ಆನಿ ಖರೊ ವಿಮರ್ಶಕ್ ಎಚ್ಚೆಮ್ ಪೆರ್ನಾಲ್ ರಾಕ್ಣೊಚೆರ್, ತಶೆಂಚ್ ವಿಲ್ಸನ್ ಕಟೀಲ್ ತಾಂಚೊ ಉಗ್ತೊ ವಿಮರ್ಸೊ ಬರಯಿಲ್ಲೊ. ತೊ ವಿಮರ್ಸೊ ಮ್ಹಣ್ ಹಾವೆಂ ವೊಪ್ಲ್ಲೊ. ತಾಂತುಂ ಬರೆಂ ಆನಿ ಪಾಡ್ ದೊನ್ಯೀ ಬರಯಿಲ್ಲೆಂ. ತುವೆಂ ಅಸಲ್ಯಾಂ ಥಾವ್ನ್ ಶಿಕೊಂಕ್ ಜಾಯ್ತೆಂ ಆಸಾ ಚಿದಾನಂತ್. ತುಂ ಮ್ಹಜೆಲಾಗಿಂ ಫೊನಾರ್ ಉಲಂವ್ಕ್ಚ್ ನಾಂಯ್ ಮ್ಹಣ್ ಕೊಣಾಕ್ ಫಟಯ್ತಾಯ್? ಮ್ಹಜೆಲಾಗಿಂ ತುವೆಂ ಫೋನ್ ಕೆಲ್ಲೆ ಧಾಖ್ಲೆ ಆಸಾತ್, ನಂಬ್ರಾಂಯ್ ಆಸಾತ್ [ಸಂಪಾದಕಾನ್ ಪರ್ಗಟುಂಕ್ ನಾಂತ್]. ತುಂ ಕುವೆಯ್ಟ್ ಥಾವ್ನ್ ಫೊನ್ ಕರುನ್ ಕಾನುನ್ ಕ್ರಮ್ ಘೆತಾಂ ಮ್ಹಣ್ ಕೊಣಾಕ್ ಬೆಶ್ಟಾಯ್ತಾಯ್? ತುಕಾ ಆಸ್ಚೆಂಚ್ ಮ್ಹಾಕಾಯ್ ಕಾನುನ್ ನೆ? ವಾ ತುಕಾ ವೆಗ್ಳೆಂ?.
ತುವೆಂ ದೆ|ಜೊರ್ಜಿ ಪೀಂತಾನ್ ತರ್ಜುಮೊ ಕೆಲ್ಲೊ ನಾಟಕ್, ಪಳೆಂವ್ಕ್ ಮ್ಹಣ್ ವ್ಹರುನ್, ತುಜ್ಯಾ ನಾಂವಾರ್ ಪರ್ಗಟುಂಕ್ ಪ್ರೇತನ್ ಕರುಂಕ್ ನಾ? ಆನಿ ತಶೆಂ ಪ್ರೇತನ್ ಕೆಲ್ಲ್ಯಾ ತುಜ್ಯಾ ತೊಂಡಾಕ್ ಸರ್ವಾಂನಿ ಕರಿ ಪುಸ್ತಾನಾ ತುಕಾ ಕಾಂಯ್ ಲಜ್ ಭಗೊಂಕ್ ನಾ? ಮರ್ಯಾದಿಚ್ಯಾ ಮನ್ಶ್ಯಾಕ್ ಇತ್ಲೆಂ ಪಾವಾನಾ?
ದಯಕರುನ್ ಆತಾಂ ಪುಣಿ ಶಿಂತಿದ್ ಖಾಕಿಯೆಪಂದಾ ಆಸ್ಲ್ಲೆಂ ಖಚ್ರ್ಯಾಂತ್ ಘಾಲ್. ಮ್ಹಜೆ ಪಾಟ್ಲ್ಯಾನ್ ಮ್ಹಜೆ ತಶೆಂಚ್ ’ಅಸಲ್ ಕಲಾಕಾರ್’ ಪಂಗ್ಡಾಚೆ ಹಜಾರೊಂ ಅಭಿಮಾನಿ ಆಸಾತ್, ಜೆ ತುಕಾ ಆಸ್ಚ್ಯಾ ಮತ್ ನಾತ್ಲ್ಲ್ಯಾ, ಗತ್ ನಾತ್ಲ್ಲ್ಯಾ ಅಭಿಮಾನಿಂ ತಸ್ಲೆ ನ್ಹಯ್. ದೆಕುನ್ ತುಕಾ ಉಗ್ತ್ಯಾ ಉತ್ರಾಂನಿ ಸಾಂಗ್ತಾಂ’ ’ದಯಕರುನ್ ಆನಿ ಪುಣಿ ತುಜಿಂ ಅಸಲಿಂ ತೀನ್ ಕಾಸಾಂಚಿಂ ಕಾಮಾಂ ಸೊಡ್ನ್ ’ಕಲಾಕಾರ್’ ಹಾಂಕಾಂ ಮರ್ಯಾದಿಚಿಂ ಉತ್ರಾಂ ಉಲೊಂವ್ಕ್/ಬರಂವ್ಕ್ ಶಿಕ್. ತುಂ ’ಬರೆಂ’ ಮ್ಹಣ್ ವಾ ’ಪಾಡ್’ ಮ್ಹಣ್, ಪುಣ್ ತುಜ್ಯಾ ಭಾಸೆಂತ್ ನಿಯಂತ್ರಣ್ ದವರ್. ನೀಜ್ ನಾಂವಾರ್ ವಿಮರ್ಸೊ ಕರ್. ದಾಯ್ಜಾರ್ ಆಡ್ ನಾಂವಾಂನಿ ಬರಯ್ತಾತ್ ಮ್ಹಣ್ ಚಾಟಿಂಗಾರ್ ಕೊಣಾ ಕೊಣಾಕ್ ಸಾಂಗೊನ್ ತಾಂಚೆಂ ನಾಂವ್ ಪಾಡ್ ಕೆಲ್ಲ್ಯಾ ಆನಿ ಕರ್ನ್ ಆಸ್ಚ್ಯಾ ತುವೆಂಯ್ ದಾಯ್ಜಾರ್ ಆಡ್ ನಾಂವಾರ್ ಕಿತ್ಯಾಕ್ ಬರಯ್ಲೆಂ?
ಆನಿ ತುಕಾ ಮ್ಹಜೆಲಾಗಿಂ ಕಿತೆಂಯ್ ವಿಚಾರುಂಕ್ ಆಸಾ ತರ್ ತುಂ ಗಾಂವಾತ್ ಯೆತಾನಾ ಮೇಳ್ ವಾ ಹಾಂವ್ ಯೆಂವ್ಚಾ ವರ್ಸಾ ಕುವೆಯ್ಟಾಕ್ ಯೆತಾನಾ ಮೆಳ್ಯಾಂ. ದಯಕರುನ್ ತುಜ್ಯಾ ’ಆಣ್ವ್ಯಾ ಚಿಂತ್ಪಾಚ್ಯಾ ವಿಮರ್ಶ್ಯಾಂತ್’ ಪತ್ರಾಂಚಿ/ಮಾಧ್ಯಮಾಂಚಿಂ ಪಾನಾಂ ವಿಭಾಡ್ ಕರಿನಾಕಾ.
[ವಿಮರ್ಶಕಾಕ್ ತಶೆಂಚ್ ಕಲಾಕಾರಾಕ್ ಅಪ್ಲೆ ಉಚಾರ್ ಉಗ್ತ್ಯಾನ್ ಉಚಾರುಂಕ್ ದೊದೋನ್ ಆವ್ಕಾಸ್ ದಿಲ್ಯಾತ್ ಆಸ್ತಾಂ, ಹೊ ವಿವಾದ್ ಹಾಂಗಾಸರ್ ಸಂಪ್ತಾ. ಹಾಚೆ ಉಪ್ರಾಂತ್ ಕಸ್ಲೊಯ್ ವಾದ್-ವಿವಾದ್ ಆಸಾ ತರ್ ತೊ ಮುಖಾಮುಖಿ ಇಥ್ಯರ್ಥ್ ಕರ್ಚೊ - ಸಂ.]
- ನೆಲ್ಲು ಪೆರ್ಮನ್ನೂರ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
