Gunnakar (- Stan Ageira)

Gunnakar

Stan Ageira

Rukkoppon kantarak sokoil thaun voir ek pauttim polleun tonddant vomtonchi pik bhair uddoili.

"kitem kantaram?" vixoi kollit ason‌yi tanne nenna’schaprim notton kelem.

"amcher doya korizai dhonea" kantaran tokli bhagaili. 

he sudhroncha vorgache nhom. Mukli ek hozar vorsam paxar zalear‌yi he sudhronchenant - rukkopp motint haslo.. Devo‌raz orsacha sorkaran dhoneachi asot voklanchank dilear kitem zalem, tanchi riti-rivaji, noddtem bodlunk sadhy zalengi?

"vegim bhogoll‌re.. Mhojelagim ttoim' na." vonttam thaun khaddkek demv‌l'li pik tanne tuvalean pusli.

"dhonea.." pimrgalo kantara. "ek donxim rupoi.. Zai. Devikak polleunk az soirim yetat."

"oho.. Devika kazarak toyar zalangi? porcha poir itlem lhan as‌l'lem. Chodd'ddi ghalnasotana hitlant khelltalem.." rukkoppan vontt lemvle.

"vorsam rautat‌ve dhonea? hhi.. Hhi.." haslo kantara. Orth nat‌l'leo haso.

"tujem edoll poreant rinn kitlem zalam mhonn zannam-i? ek hozar pamyxi ani bara rupoi. Atam porot donxim rupoi. Hem sorv kedalla farik kor‍tai‌re?" rukkoppon bolsak hat ghalo.

"sorv tumchi doya dhonea. Yemvcha mohinea thaun hor‍yek pauttim narol vikchor kontar bhandtam." hem utar pattlea eka vorsa thaun kantara sangon ayil'lo.

Kagda kuddkeacher kantarachem bott dhambun rukkoppon donxim rupoi mezun opsile. Kantaran rukkoppoche pam-i apddun taka patt keli.

Rukkoppocha mukhmollar motlobhi haso chor‍leo. Apnnacho irado pontak pautolo. Rinnant ghal dauli rund kor.. Veginch kantarachi don ekre asot apnnachi zateli. Nhoim.. Ti kantarachi asot bhilkul nhoim. Opunn tacho khoro varesodar. Ti suvat aplea purvozanchem daiz. Sorkaracha kanunan apnnak nit diunk na. Vorsam utralear‌yi opnnachi nit opunn kor‍no ghetlom.

Krodhan khorxelo rukkopp.

Adle ugddas tacha niallant jivall'lle.

Toullocha disamni sorkari iskolant to mestri. Kexou tacho ekloch put. Purvozam thaun demvon ayil'li tacha vantteachi don ekre asot tanne kantarak gennik dil'li. Rukkoppan nivrit't zamvcha vorsa kanun hadd‌l'lem, ddiklerexon diun kantara norgal'lo tori okhrecha vogta heranche vot'tayek rukkoppochi asot tanne aplea namvar kel'li.

Rukkopp solval'lo.

Nivrit't zaun muklim don vorsam tache jinnyent oteant kotthinn vorsam zaunk paulim. Bhuk mhollear kitem mhonn kollit nat‌l'lea taka ani tacha kuttmak nis-pejeche dis ayil'le. Bailek ar mar‌l'li. Kolejint xikcha kexvachem xikap rauvn taka kama khaitir bomboi dhadd‌l'lo. Kexou budhvont ani churuk bhurgo. Bomboi vhochon chalak zal'lo. Hottlant kamak bhorti zaun thoddeach vorsamni eke kompenicha keanttinachem konttreakott ghet‌l'lem. Uprant don 

vorsam bhitor porelant eka resttorenttacho to mhalok zal'lo. Puta vorvim ubhzal'lea bhangrallea dismachem sukh bhogunk auy jivont urlina.

Toull‌cho rukkoppan soput ghal'lo.

Apnnacha hatam thaun chok‌l'li purvozanchi asot kantaracha hatam thaun pattim opnnamvocha iradean tanne motint gunnakar ghal'le. Boglechi don ekre suvat moikol sozan viktana tanne kexvadvarim ti asot molak ghet‌l'li. Kantarak to sezari zal'lo. Adlem visral'lea porim tannem ixttagotechem notton kel'lem. Beuddea kamtarak tanne ugtea hatamni rinn dil'lem. Rukkoppan aple dange mojbhut kel'le. To vell ghoddiek raktalo. Az nhoim tor faleam...

Kantara gel'li vatt polleyit't ravo‌l'lea rukkoppochi khoros demvli. Taka tan lag‌l'li. Gurguletantolem udak to pielo. Danddier umkallochem xal pangrun to angnnak demvlo. Madda hitlant tannem paulam vinchlim. Maddank kattem bhandchem kam' choltalem. Goddi lagim ascha tollealagim pautana tachi chal ochanok rauli. Henne-tenne konn'nch nat‌l'le. Tolleant ekh choli patoll vostur reuddaun nhatali.

Devika!

kantarachi dhuv.

Rukkoppan thimpi gill'lli. Dixott bodlunk tachean osadhy zalem. Kedallayi mhellem ani bhurxem dischem tem az udkant opsora koxem sobhta? vha.. Rukkoppan vontt lemvle. Angak chiddkal'lea patoll vostura thaun tillche devikache movo vixve dolleank fesot ditale.

Udrekit bhognnamni to piklo. Rukkopp sant nhoim, bail sor‌l'lea thoddea vorsam uprant ghor kamak yemvcha girizak ek pauttim tannem nhannyent arayil'lem.

Az hye prayer‌yi porot to striyecha sporxa khatir otregolo. Choddaut kanniamni vach‌l'leprim faleam thaun devikak apnnacha ghora kamak dhaddunk kantarak sangazoi mhonn taka bhoglem. Ya.. Rinn mafi korn devika songim ek rat paxar korchem sondhan korum? na.. Opnne pallnek sampddonk nhozo. Opnnachem topsy bhong zaunk nhozo.

Udrekit bhognnancher zoit vhorn devikak titlear‌cho visron tanne vatt keli. Gunnakar mumamuki korchi ichcha taka nat‌l'li. Mukhlea thoddea disamni kantaran choddit rinn ghet‌l'lem. Devikachi soirik chuk‌l'lean to choddit pieunk lagla mhonn kollon ayil'lem.

Hea iddeant kexva khatir rukkoppan ek cheddum pollel'lem. Tanne kuddle kexvak gamvak yeunk tar dhaddlem. Kexou vimanar gamvak ayil'lo. Rukkoppacho sontos ani sombhrom' sangcho nhoim.

"kitem poppa, tteligram' diun gamvak apoilem-i?" kexvak vixoi kollit nat‌l'lo.

"hamv kitemyi kis ghoddlam mhonn ghabrolom."

"poilem tum nhaun jevann kor."

bapain hukum' dili. "kitemyi kis ghoddlear matr gamvak yezai‌ve. Na tor yeunk zaina?"

"sorri poppa." kexvan kuddle mafi magli.

Girizan kurluanchem nistem rand‌l'lem. Kexvak lhan thaun masall kurleancher angalap. Sangatach sunkttam bhaz‌l'lim. Jevann zatchch kexva sofacher add portalo. Rukkoppan tonddak pan cheplem.

"itli prai zali. Tuka aniki kazar zamvchi alochon na?"

"polleyam, yemvcha vorsa." kexvachi mottvi zap. Apnnak tar dhadd‌l'lem karonn atam taka sustal'lem. Opunn bombomyt eka moratthi cheddvacha mogar asam mhonncho vixoi tanne gupit dourolo. Bapaichem mon dukhvonk taka khuxi nat‌l'li.

"havem tuka ek cheddum polleylam."

rukkoppon vixoi kolloilo. "tum ek pauttim polle. Narainn xett'ttichi dhuv. Soroz mhonn tachem namv. Sobhayechem mannik. Man oni mannsugent anz. Cheddvak heach vorsa kazar koromvche alochoner asat tim."

khexvan zap dilina.

"onyek vixoi" rukkoppon mukharsilem.

"kamtarak havem rinnant buddoila. Eka vorsa bhitor amchi asot amkam pattim mellazoi."

"poixeamvixim tum fikir korinaka." angnnak mett dourolem.

"hamv hitlant ek bhomvddi marn yetam." kexvak sangat nastana ubgonn ayil'li.

"goddilagim ascha tollealagim vhochanaka."

bapain chotrai dili. "thoimsor vikall jivdalli asat."

bapaicher eka thoracho ovyokt rag ayil'lo kexvak. Yedexea lhan karanna khatir tar dhaddon apomvchi gorz as‌l'li? soirik as‌l'li tor kagdar borvyet as‌l'lem nhoim‌gi? thoimsor resttorentt konna-konnacha hatant diun yezai zalem.. Haka aple gunnakar soddlear dusri khont na.

Konnengi tallio pettoun aiyil'lo avaz zalo. Tanni ghumvon nodor marli. Kantara aplea amgha thaun hat haloitalo. Yantrik ritin kexvan teuxin mettam kaddlim. Devika irvoll katrtalem.

"tum yemvcho asai mhonnon dhoni sangtalo. Gamvant chodd dis ramvchi alochon asagi kexou‌babu?.. Tum kohlem pollemvchear poddlam-i‌go?" kantaranodhuvek dhenkhnno marlo. "polleyam.. Kexou‌babu amcha irvollanchi ruch pollemvdi."

"kexou norgalo tori kantaran vot'tai keli. Devikan sol‌l'le irvoll kexvak dile. Goddsann chak‌l'lea tanne choddit ir‍vollank hat ghalo. Kantara bhitor gel'lea sondrbhim tanne devikacher ek sarki nodor marli. Nodor bodlunk taka koxott mar‍le.

"tum mhaka toxem kiteak polletai?" devika lojlem.

"tum sobhit zalam-i devika.." kexou bhaunatmok zalo.

"ani tum?" devikan soddon dilem na. 

"tum sinema hiroporim distai."

"tuka amche lhan‌ponnache dis ugddasant asat?" kexvan ir‍vollak ghas mar‍lo.

"lhanponnache dis konn‌yi visratat?"

devikan pattim soval kelem. "toull gimecha disamni sorxilea gamva thaun hea gamvak rojer tumvem yemvchem as‌l'lem. Ami khellanat‌l'lo khell nat‌l'lo. Beatt‌bol, buguri, kutt'tidonn'nne, berchonddi, goli, zubili.. Ugddas asa tankam? ek dis hindllear thaun mhaka lottun ghalon tum dhamv‌l'loi, tea dis mhojem muskar futt‌l'lem.."

"mhaka ugddas asa." haslo kexou.

Ulonne cholat't raulem. Uloitam uloitam apnnem kitle ir‍voll khele mhonn taka khobar nat‌l'li. Sanz utron poixilea nogaricho avaz aikonk laglo. Tachem pott bhor‌l'lem.

Pattim ghora teuxin paulam kaddtana ek soval kexvak dhosunk laglem. Zago hogddaun itlim vorsam paxar zal'lea uprant atam porot to zago apnnamvoche khatir gunnakar ghalchant orth asa? kanun sorvamok ek‌chch.. Tea xivai az apnnak ya aplea bapaik kitem unnem asa?

rat paxar zaun sokall udelo.

Kexvachi bhomvddim arombh zali. Xuny chintnamni sasponcho to khobar nastana goddilagim pavo‌l'lo. Tolleant upyemvocha devikak dekhtana ek tallni khott marunk‌lagli. To lagim sorlo.

"toxem kiteak polletai kexou babu?"

kiddkiddon haslem devika. "dhoir aslear udkak demv."

"nott'tti gorol." kexou tollealagim yeun boslo. "hi upyemvochi pisai tumvem kedalla arombh keli-i?"

"sodam-i tolleant nhaun durga devicha divllachem dorxon kelar mhaka boro fuddar melltolo kom-i" tem gombir zalem.

"toxem mhonn konne sanglem?"
"divllacha puzarin."
"tolleant tuvem upyetana tujem dorxon korchi ichchha asteli tachi" 

haslo kexou.

"xxi.. Tum naka zal'lem uloitai."

devikan nokli rog dakoun udak usllailem.

Udak kexvak apttal'lem.

"yuv.." dant chabon kexvan nitt zamvchem proitn kortana tacho pam-i nisral'lo.

"oh gadd.." bob marli kexvan. Tachem xorik tolleant malvon udak fasllal'lo avaz zalo. Devika jeoran haslem.

Ubho zamvcha kexvacha angant viz sokot chorli. Tache hat devikacha hordhea bhomvtim reuddal'le. Tannem veng bholl keli. Sporxanchim torongam ogochor anond diunk laglim. Tache vontt devikache kuddicher mhor marunk logle.

"sodd mhaka.." tem kexvak lottun voir dhamvlem.

To pattim jnanaz ailo. Opunn penktta mhonnasor udkant ubho aschem tacha gomnak gelem. Devika dixttik nat‌l'lem. Tollea thaun voir yeun to ghoralagim paulo. Rukkoppochi nodor tacher chorli.

"tum bhijloi koso puta?" bapain ojeap vyokt kelem.

"tollealagim ek jivdall dixttik poddli. Bhimyan dhamvtam mhonntana nisron tolleant poddlom" tuvalo vinchun to nhannyek riglo.

Ek songot kexvak khochit zal'li. Gamvant chodd dis raulear devika songim loingik somprk ani zamvcho sombhou chodd as‌l'lo. Voddni katt tutton vomtoncha xikhrak pavo‌l'li. Hem addamvchem taka somonzos koxem dislem. Na tor bapaicha gunnakarachem lekh chukcho sombhou as‌l'lo. Muklo ek hofto tanne tallnecher niyontronn dourolem. Bapain dakyil'lye soirikek na khuxi dakoun tanne pattim bomboi vhechi tarik nighontt keli.

Tea donparam to xohrak gel'lo. Inddiyon er‌loinsachi tanne ttikett ghetli. Kuddle holl'llek vhochanasotana to thiettorant riglo. Sanjechi dakhoun zatchch tanne don botli bir golleant votli. Bossar holl'llek pautana voram sadde-dha zal'lim. Roste nirzon zal'le. Sankhealagim eka madda mullant taka ek pimrgonni aikali. Tachi chal rauli.

"ko.. Konn..? kantaracho svor.

Nak‌bhor pimyeun lele kortalo.

"hamv kexou." tanne vollok sangli. "polleyam hamv tuka ghora pauytam."

tanne kamtarak aplea bhuzancher adharsilo. Kantara inglixant kitengi pimrgatalo. Ghora pautana taka gham' suttlo. Angnnak pautana kantara sokla goll'llo. Taka thoinch soddun tanne darak tthoke mar‍le.

"ailai‌gi dukraporim ghottun?..."

bhitor devika purpurtalem. "khoncha kormak tum mhozo bapuy‌gi? sunnea pras pasott."

devikan dar ughddolem.

"tum?" tem hankrelem. "mhoji chuk zali. Hamve oppa ailo mhonn chintlem."

"tuzo oppa sankhealagim lollon as‌l'lo." kexvan vivrsilem. 

"hamvem koxttamni taka hanga mhonnasor haddlo."

"kiteak haddloi?" devikan tokli bhagaili. "pirvatoch yeto as‌l'lo. Tuvem ovanxyok tras ghetley."

pusvecho chondr devikacher khonch‌l'lo. Hoftea adle tolleantolem drixy kexvacha dolleam hujrim udeun ailem. Movall vixveancho sporx.. Udrekit bhognnam.. Hunoni voddni.. Loingik milnache otreg..

"de... Vi.. Ka.." tache vontt usvale. Svorant ahvan nixetalem. Tacho hat devikacha bhuzacher boslo.

Devikachem sorvang ’jim'm'’ anondan kamplem. Tanne dolle dhample. Usvas bholl zalo. Palomv bhuzancher boslo. Kexvak sosunk zalemna. Tanne bollixott veng marli. Bakichi triptebhorit korni solisayen ghoddon geli.

Rat utron sokall udelo.

Kexvan bomboichi vatt dhorli

tin mohine ubon gele.

Eke sokallim rukkoppan kitem mhonn somzoncha poilem usvas bandhun dhamvon ayil'lo kantara tacha pamyank poddlo.

"goddbodd zali dhonea.. Hamv atam kitem korum? mhaka mozot kor dhonea.." kantara golloglleam roddlo.

"ho koslo nattok kantara?" rukkoppan ghoroz ghali. "poixe zai tor vichar."

"somsea poixeanchi nhoim dhonea.. Mhoza ghoracher mollab kosall'llam. Mhoza cheddvan amche mor‍yadicher gos puslea."

"vixoi xida bhogoll‌re."

"devika ankvar auy zamvchar asa. Taka atam tin moine kom-i. Hem koslem porajit zalem dhoneam?"

"khoncha poli on'naddeachim kamamre him?"

"haka karonn kexou babu mhonnon tem sangta." "tondd dhamp bekufa." rogtacha vot'taddan bobattolo rukkoppa. Onyek utar uloixi tor jib katrn hatant diunk asam."

"ragar zainaka dhoneam.. " kantaran duHkham puslim. "devikachim utram hamv‌yi patyena. Tori keddou babucha tondda thaun hamv ek utar aikonk axetam. Tannem negar kelem tor devika kitlem fottkirem mhonnchem ruzu zatelem."

tacha utramni rukkoppak razamv dislem. Tanne kantarak somdhan korn dhaddlem. Rukkoppan amsoran posott afisachi vatt dhorli. Putak tteligram' patthoun pattim ghora teuxin cholcha tachim chintnam ganch chukon ximpddal'lim. Apnnacha gunnakarachem lekh chukchar asa.

To dis rukkoppacha ugddasak ailo. Tea disa kexou tolleant bizon ghora ayil'lo.. Tor kexvan nizaik‌yi devika songim goddbodd kelea? hantum noval kitem?

ti udrikt soundryota dekhon hye prayer opnnak somet dadlemponn zagem zal'lem tor kexva toslea dhridd‌kai tornattean nisral'leant kitem chuk asa?

tor apnnachi topsea?

tye hogddayil'lye asti khatir opunn kitlemyi vorsam rakonk toyar as‌l'lom. Punn hem kitem kelem-i puta tuvem? hea somseak porihar koslo? ek vatt asa.. Devika songim kexouchem logn zalem tor? kill zatichem tor kitem? ti sobhai hea gamvant konnak‌cho na. Tea xivai devika kantarachem ek‌cho bhurgem. Yantrik ritin hogddayil'li purvozanchi asot pattim apnnacha kuttmak yetli.

Rukkoppan nove gunnakar ghale.

Dusrea disa sanjer vimanar kexvachem yennem zal'lem. Horxem putak pollel'leafora oti anond vyokt korcha rukkoppan hea pauttim tondd hivllailem.

"kiteak chil'lor karnnam khatir mhaka tteligram' diun apoitai tum?" kexou ayil'leafora dursalo.

"hea pauttim karonn chil'lor nhoim kexou.."

"tor titlea mohtvachem koslem karonn tem?"

"karonn devika zaunasa." dant chable rukkoppan. "tin moinea adhim gamvak ayil'lea sondrbhim tuvem devikasovem kitemyi lofdde kel'ley?"

kexvan tokli pondak ghali.

"devika ankvar auy zamvchar asa". Puspusolo rukkoppa. "atam tum kitem kortoloi? tachelagim kazar zatloi?"

"somseam hamve rochlea. Hacho porihar‌yi hamv‌cho sodhun kaddtolom." svoxott zovab dil'lea kexvan vegan pam-i dourolo.

Taka kantaracha ghora teuxin vechem rukkoppan pollelem. Putachi zap aikon to thottak zal'lo. Tanne opekxil'lea formanne kexvan chuk vollkon bhyem vyokt korunk nat‌l'lem. Bodlak dhoiran porigot fudd kel'li. Kantaracha ghora don vorancho zunt choloun kexou pattim ailo. Tacha mukhamollar xanti raz kortali.

"somsea hollu zaligi puta?" rukkoppan aturayen vicharolem.

"vhoi" kexou ijichheracher goll'llo.

"mhollear kazarak tum raji zaloi?" rukkoppak asot pattim mell‌l'lo onbhog zalo.

"kazar zalem tor amche ani tanche modhem forok koslo? hamve veglli ek vatt vinchlea. Yemvcha hoftea thaun tum mhojesongim bomboi yetloi, ami gamv visrateleamv."

"punn amchi hi asot? ani ti purvozanchi asot." rukkoppachem tondd vivrnn zalem.

"amcha purvozanchi asot kantaralagim asom." kexvan dhridd foisol ucharolem.

"devikak porihar zaun hi don ekre suvat hamve tancha namvar korchi bhas dilea. Sangatach rinn mafi kelam."

"khobddodar, tum astivixim oslo nirdhar ghexi tor!" rukkoppa kamplo.

"tum onbauxyok ragar zatai"

haslo Kexou. "mhoje gunnakar tuka orth zaunk nant. Okhrek hi sorv asot devikacha pottant ascha mhoza bhurgeacha namvar vheteli-mu? tor hantum amkam kosli luksann?"

rukkoppa guspoddolo. He nove gunnakar orth korn gheunk taka kotthinn tras bhogle.

Eka hoftea uprant kexvan bapaik vimanar bomboi apoun vhelo. Tankam er‌portta poreant pauvonk kantara gel'lo. Voir sorcha vimanak tanne dollebhor pollel'lem. Vichitr haso tacha tonddar udel'leo.. Thoddea vorsam adim ek suvat ddiklerexona mukhantr mell‌l'li tor teach monxachi onyek asot hea pauttim funkea sovai mell‌l'li. Tacha gunnakaramni to sofol zal'lo. Aplea tornattoponna dhvarim rukkoppak mankodd korunk devika solval'lem. Tori kexou solisayen korgal'lo.

Kexvacher kantarak doya udeli. Devika gurvar mhonnon apnne sanglem ani te dog‌yi patyele.. Vha!