Honnem Borap

Placeholder: the original page gave this picture no description, and none has been written yet. It came from daaiz\daaiz\katha\kj\kwk1.asp.

Wilson Kateel

Hea boroupeak buk mhollear olorji.

********

Thap‌l'li dhull nhoim, buk poxel'lem vharem hungleari xinko yetat. Apnne vachchem soddeam.... Konnem tori bhurgean vhodda tallean iskolachem lisamv vachleari korkor zatat haka. Sporx ginean‌yi matxem unnench. Azun tanne apli jinn‌ch apddunk na va apuddleleabori bhogunk na taka. Katkutli lagleari khorpina to. Tachea boddant mendu asa mholl'llench dubhavachi gozal.

********

punn to boroita. Toxem polleunko gelear tannem aplem sahity survat kel'lench ekye vilokxonn borpa xoilent. Panachea voir ’kovita’ mholl'llo bil'lo lagoun potrachea sompadokak dhaddun dil'leo. Surver ek don fais zaunko nant. Bovo‌xa sompadokak pamvonk‌nant konn'nna mhonn apnnak‌ch bhuzoilem. Punn ponchvis-tis dhaddleari fais zaunko nat‌l'lean okhkhea potrikodhyoma voir‌ch kantthallo ailo bauddeak.

********

Uprant tannem vachpeanchim potram borounko survatlim. Fokot potranchi hogllik uchartalo. Hea khatir‌ch tanne jinnient poile pauttim ek buk ghetlo. Tea bukachem namv- ’ddikxinori’. Hantle bore bore sobhd vinchtalo to vachpeanchem potr likcheak. Ucharchi hogllik otirekak pauli. Potrantlea zahiratank‌yi hogllik uchartalo. Eka potrant ’hea pauttim tumchea xrod'danzolint ghal'li tosvir bori as‌l'li’ mhonn‌yi lik‌l'lem tannem. Hachim vachpeanchim potram vachun sompadokak aplea potracher‌ch loz disli. Dekun lachar sompadokan hachim potram vachinch rauylim. Hasonakat gombhir gozal hi.

*********

Hea modhem ek ghoddit ghoddlem. Hache jinniecher khub probhavo ghal'lem ghoddit hem. Tea potrant konnengi lik‌l'lea kovitecho ek sobd chuk ritin chhapon ailo. Kiteak‌gi haka matr toch sobdh bharich amvoddlo. Orth sodhunk ddikxinori gheun kitlem ustileari to sobd‌ch mell'llo na. Hea khatir taka kotthinn rag yeun ddikxinorich lhasun soddli.

Hea borpeak buk mhollear olorji.

*********

Uprant tachye jinnient thoddi bodlaunn aili. Konnengi taka golfak pauylem. Thodde poixeyi kele. Hea modhem-i tanne boromvchem rauylem na. Sumar pon'nas borpam zomtana kovitencho buk kaddchi tallnnim udeli. Poixe khorchile. Borpam ttoip koroilim. Pattlea panar sobcheak likhnnim galak chiddkaun dhorun kitengi gunddayen chintche bori notton kel'li ek klos-op tosvir kaddoili. Prostaun‌yi tannench likhlem. Surver bukak namv ’khochreantleo kovita’ mhonn dour‌l'lem. Punn mukh‌pan pintramvchea kolavidan thoimsor khochro ddobbo pintrayil'lean rag yeun namv bodlilem. Mukh‌panar vhodd gronthanchi ras dakhoili ani namv dilem - ’fais zainatleo kovita’. Xembhor panam. Hozar protio. Hokkam lekhokachim. Buk sod'deak printtingar asa.

*********

Mhojelagim ek buk asa. Bovo vixes buk. Kaim thoddea panancho. Konn puneunt vimorxokan roch‌l'logi. Hea bukak tachench mholl'llem vyoktitv asa; zannvai asa. Probud'd‌ponnachi nixtturai asa. Sporx ginean asa. Disanatlem vharem vhalltana panam portun kitengi purpurta to.

Hea bukachea ontormollant thoddepauttim khub bhogap umallon yeta. Punn utrank kanttallon iron veta. Konna konnache lak sobd hea bukachem ek pan legun jikonk sokonk nant yedoll.

Hea bukacher konnachemyi namv na. Hea bukak‌ch namv na. Surver thaun akher poreant ek sobd soit na! hea bukant fokot't panam ritim... Ritim... Ritim...

Kitem vachteleat?

Hea bukak boroupi mhollear olorji!!