Ojjikunja
Valley Quadros
Mhojea jinnyek ani ojji kunzak lagsilo sombondh asa. Niguddh sombondh ani ho sombondh ani choddtik mhojea jinnyecho vantto ani prostut kall hanche modhem zorur zahit'to forok asa.
Te bhurgeaponnale dis azun mhojyea motint jive jive uddasak yetat. Tem aplem ghor, ghora pattlo gorvacho gotto, dedd ekro suvatechi aplea pijzacha kallachi asot. Ghora mukhlean choddunne att allancha gunddayechi bam-i. Tantum boglek ascha ponnsa rukache saullek dischem kallem udak. Bamyk lagon bettache gade, gadea boglek udak vallchem todd ani tea toddant kitlexe pauttim fulanchi dali gheun maslli dhorunk vochon mar khaunant? titlenchgi? poilea pausacher todda thaun guddeak choddon yemvcho maslleo(ubher) dhorunk kitlexea ratim gel'leamv? tea pausache dis pinjkor satem gheun varem, ghoddghoddo haka sorvak bhimyeun zaleari amcho khell zaunk puro logori ya kutt'tti donn'nne ya golli... Mugodl'lo na.
Pijza mel'lea uprant aplea ghorchem ghurkarponn ajza samballotalo. Amcho baba edollchch amkam soddun ghattak damvl'lo. Auy thoim hanga mhonn kot'te chakri korno amkam zoulleank koxttamni xikap ditali. Hamv ani xinu, dogamyi zoulli. Soimban pokri hamv, punn xinu somadhani, xikpant, khellant churuk. Taka purtem devan taka bori sobhaiyi dil'li. Punn apunn? ximbrea vonttacho, xikpant dadd'ddo, punn her songteani mukhar. Amcha ghorant monxeanch monxeam. Ojji, amchi am'ma, tancho bhoinneo, hanka sorvank ajza samballotalo. Ani mam' bomboi thaun mohinea mohineak ttoppalar poiso daddtalo. Dogaini satvi mhonnasor xiklear puro. Koxeyi hye pauttim satver asat satvi pas zalear dogamyki bomboi mamasovem dhaddtam mhonnon ajzan ulyil'lem aikal'lo apnnak uddas asl'lo.
Punn maman toxem naka. Dogi dhavi poryant xikondit. Punn satvea klasint konn chodd marks haddta taka apunn bomboi xohrak bhomvddek apoun vortolom mhonn boryil'lem vorvim amche dogam modhem eka thoracho sfordo arombh zal'lo. Hem sorv atti-sonno mohineant ghoddlem.
Amcho gamv karkoll thaun muddlea vatter logbog pondra moilamni mellta. Ojekar tache namv. Sobhit gamv. Ani ojekarak poddla thaun, muddla thaun, tenka thaun, boddga thaun bossam yetalim. Zaunk puro disak ek ya don mholl'lleporim. Penttesalant ubhem aschem bos sttop. Bos sttopa kuxicho zoitakaracho golli ruk ani tye rukar, bossam natl'le vellim rosteak demvchem mankodd... Hem sorv mhojyea bhurgeaponnacha disacha uddasacho ek vantto.
Ojekar thaun logbog don forlangar amim sodam khellchem adrott'tt bakear, ani techch grounddauyor zoitakarachim elekottechim vayaram ani tea adrott'tt bakear grounddant amcho khell.
Ajza amcho sodam sangtalo "hamv poilencha kallar bossam nastana bojgolli kambllak cholon0ch vetalom, cholon0ch yetalom." atam tori satt vorsam utrololo ajza muzur kombea kattak cholon0ch vetalo, cholon0ch yetalo. Amcha ghorcho koddla komboyi amcha sezara mosot namvadd'ddik. Edollchch pondra kombeak tannem marl'lem ani tea pondra kombeanchemyi mas khel'lo dakhlo amcho.
Sanjecha khella uprant lagsilea kazucha paddint thaun amcha ghorak vatt ani tye vatter sodam to brahmunn anim tem madd'ddem... Sodanchem zaun gel'lem. Ghora pavol'lench sodanche purpure ajjiche. Ajjin ulomvchench toxem. Sodam purpurchem. Toxem mhonn tikayi amcher mog kaim unno na. Amkam sangata gheun sagvolli mugodlea gadeant layil'lea tenddlecha mattvalagim asl'lem bhann ani tea bhannak uzo ghalon udak tapoitali ani sodam amchi dixott mollbar ascha neketrank mejchar vetali. Hamv xembor neketram mejtana xinu donxim neketram mejtalo. Toriki novim novim neketram dison yetalim.
Ojekar thaun anddarche vatter, anddar thaun logbog dedd forlangacher ubhe ascho vhodd zoit guddo ojji kunz. Sodam tea guddear uzo distalo. Ajjilagim "tem kitem ajji" mhonn vicharl'le vellar tinne sangl'lo uddas asa. "thoim rakkos rautat ani atam tannimyi nannyek uzo ghala" mhonn zap dil'li amkam bhimyachi zal'li.
Rakkosam vixim, pixachim vixim zahit'tem ami ojji thaun aikal'lem. Toriki ojji kunz amcha jinnyent ek misterchch zaun url'lo. Sezarchim uloitalim. Tea guddear vag asat, katti asat (ran redde) ani ghenddam asat, chitllam asat... Iteadi. Amkamyi eka thorachem bhyem distalem tori ek pauttim to guddo choddazai mholl'lli urbhayi yetali.
Toxem mhonn ojji thodde pauttim bexttem ulyil'liyi asa. Ami sodam rojenim gunddyoddok nhomyok upyeunk vetana tinne sangl'lim utram azuni uddasant asat. "thoim nhomyot sisor asa. Vocha, tumkamyi dhorno gillteli. Por tem vostra dhumvcha kuddpacha sunneak gill'llem khoim" amkamyi ti sisor pollemvcha urbhent khobrevinne hamv ani xinu gel'leamv. Upeun-upeun solvaleamv punn khoimsoryi amkam sisrichi zhollok melll'li na. uprant tea khorkottea votant pattim aileamv. Vatter melll'lem palponnos khele, vatter asl'lem kamrddam kelim, tori bhuk nimvl'li na. Ghora yeun pez jeutchch bhuk damvl'li asa.
Bomboi xohor amcha bhurgeaponnacha disachem ek vhodd svopann. Aple sobhar sangati tancha soiryamni bomboi thaun haddl'leo vostu amkam dakhoitana amimyi motint lekh ghaltaleamv. Hye pauttim amimyi mamalagim vicharno bomboi vochazai. Punn mamachem kagad ayil'lem vachun dogam modhem eka thoracho spordho armobh zal'lo. Mhojea motint eka thorachem bhyem ubzal'lem. Kiteak mhollear amcha dogam poiki khonddit zaun xinu unch asl'lo. Toxem astam xinuk maman hye pauttim bomboi apoun vorchem mhoje prokar khatri. Sodam iskol kabhar zatechch potem khandear ghalon yetana, konni matarim danddo tenkun cholchem distana ami bhimyeteleamv. Ojji kednamyi bexttaitali. "iskola thaun veggim yenatlear matarim yeun bhurgeank dhorno vortat" eka ritichem bhyem motik rigon gel'lem.
Sokallim kanank, mateak ajjin ghal'lem narlachem tel sanz zatana pamyancha ghanttilagim pautalem. Amcha bhurgeapnnacha disancha uddasacho promukh vantto amcha ajjin edollchch ghetl'lo. Tench sodanchem potem ani tem satem votak mhonn ajjin dimvchem. Tea pausaki tench satem, tea votaki tench satem. Ani ti bhuti. Ani tea bhutyent sodam ekek bogachim khannam. Az surnnachem nistem faleam keneachim muttlim, ek pauttim taikulleachi chettnni tor dusre pauttim kemllbeachi chettnni, ek pauttim muttlim tor anyek pauttim koilolli. Ek dis satonnea rukacha kholeanchi patolli tor ek dis holldi kholeacho patolleo. Ek dis manddos tor dusre dis peje sovem mittant ghal'lo ambo. Ek dis boblleachi khir tor ek dis muddo. Lhanponnar ami khel'li polli lekh natl'li. Protyek zaun amcho mam' bomboi thaun ayil'lea vellar disak ekeka bogachi polli. Uddasak haddtana tondda thaun udak yetalem.
Punn az hea sorv pollianchim namvam fokt't namvam zaun matr url'li.
Amchi satve klasichi porikxa mugdon ayil'le porinch, mam' bomboi thaun ayil'lo. Mhojea motint kitengi eka thorachi kaujenni ubzal'li. Kiteak mhollear maman xinuk bomboi vorchem apnnak naka asl'lem. Ekchch amkam dogamyki sangata vorizoi, nam tor dogamyki apoun vorunk nozo mholl'llim chintnam mhojim zaun asl'lim. Poilo ek hopto mama sangata mojen khorchilo.
Maman sangl'lo bomboicho kannio mhojea kallzant udveg choddoitaleo. Tea modhem havem ani xinun amcha sangateam sovem ojji kunzak vechem yozon manddun haddlem. Tea yojnaki ek karann asl'lem. Kukke holl'lli thaun madhu ayil'lo. Bagettea kuddicho madhu bhari karbari monis. Pondra vis allancha maddank ghoddyen sorr korno choddon narlo kaddtalo. Titlem matr noim. Kitlexea gundd bamyk zaleari demvon mosot vell udkant buddon konnacho kollso, konnachi baldi voir haddtalo. Udkant buddon ramvchem maslle porim taka solis zaunasl'lem.
Konni tirthott'tti nhomyok zall ghalunk vetana ya thotto ghalunk vetana madhuk apoun vortale. Kiteak mhollear kedexea gunddiek demvon zaleari maslleo dhorcheant madhuchaki xrexott konni nant. Tache namv xikari korcheantyi prokheat. Hatim bonduk gheun gelo tor bamrkam, somso, ya kitem tori marn haddl'le xivai to ravanatl'lo. Zaunk to kukke holl'lli thaun ayil'lo zaleari ojji kunza guddo choddchi vatt bori korn zannasl'lo. Ek botol kazucho soro dilear konna sovemyi to vetalo. Zamv xikari ya maslli ya ojji kunza.
Azkal to guddo choddonk ordea guddea voreg vatt asa ani zayit'tim vahnam asat. Punn tednam tea guddeacha mullak vechemyi bhyem. Zahit'te pauttim tea guddea thaun demvon ayil'lo vag mosot gamyank dhorn khel'li khobar edollchch sogllo lok zannam. Tea guddeak choddazai tor logbhog tin-char vorank mat pauyet. Uprant pattim ayil'lea porim na. Pattim yeunk dusrochch dis rakazai. Ani ran utron guddo choddonk asl'lem. Am'mkamyi tea guddeak choddazai, rakkosank pollezoi ani ranvott monzatink pollezoi mholl'llo hurup choddon ailo.
Hamv, xinu, madhu, ani her thodde sangati ojzak sanganasotam, mamak sangon ojji kunza bhair sorleamv. Sokallim bhair sorleamv, soglli toyarai kel'li. Madhun hatim bonduk ani tacha poteant kaddiam pett, hatant ek botol chim'mnnechem tel, thoddeo chimnneo ani thoddeo chudd gheun bhair sorleamv. Eklean sorvank puro zamvche titlem khann ghetl'lem. Vatter khonddit xikari zateli mholl'llem chintap madhuchem zaunasl'lem.
Choddunnem ordeavora bhitor ami sogllim guddeacha mullak pauleamv. Ani ranachi vatt dhorli. Vatt mukhar gel'le porinch ekekleanchi tondda bhimyan buddlim. Sureachim kirnnam tez zaleari tea ranant koll'llem na. Amkam tem ran mugdon guddo choddonk asl'lem. Ani madhu amkam somzaitalo. Ajekarak ek vhodd guddo mat distalo. Tea guddea boglecho lhan guddo disanatl'lo. Omi te doni gudde choddonk asl'le. Ranam modhem suknneancho vichitr avaz oykatalo. Monzatincheo avaz natl'lo kiteak mhollear amcho avaz chodd zal'lo.
Logbog donpar zatasotana madhun modlea guddea lagim amka rauylem. Sorvam bhukel'lim oni tanel'lim. Sorvank tea guddea modhem asl'lem ek lhan tollem polleun ojeap zalem. Ranacha saullent tem udak thondd zal'lem. Thondd borpa bori. Sogllim amim poilem tantle udak pieleamv ani sogllim tea udkant namvn porot guddo choddonk aitim zaleamv.
Mukhlem mett mosot bhirankull zaun asl'lem. Samballon te gudde choddonk asl'le. Pamyancho pottreo edollchch duktaleo. Toriki guddo choddle xivai dusri vatt natl'li. Sogllim eka pattlean ek mellon koxemyi sanjecha panch voraxem guddo choddleamv. Guddo choddon kitem polletamv? sogllo gamv eka muyeporim distalo. Khoim asa amcho gamv mholl'llem somzanatl'lem. Madhu amka dakoitalo. Titlear sorvank payanchi duk choddl'lich dixott ghali. Sogllea pamyani ek kidd chabon asl'li ’umburu’ kitlem proitn keleari chabon asl'li kidd pam-i soddinatl'li. Madhun aplea poteantoli suri kaddon ekek umbruk kaddizoi poddlem.
Sogllea gamvam modhem ubhem asl'lem ojjikunza oni tea ojjikunzar ravon thokl'lim ami ekek svopnnam polleteleamv. Madhu amkam somzaitalo kosem monzateo dhamvtana fator adllotat ani tantu kittallam yetat ani tim kittallam hea ranant uzo pettoitat mholl'lle.
Sogllim mellon madhu bhomvari boson tachi xikounn aikataleamv. Madhu amkam tacho adlo onbhog somzaitalo. Amka sorvank bhuk lagli. Sorvam mellon tem sokallinchem khann khaun nidleamv. Madhu edollchch ujeachem agttem toyar korn tantu chimnne tel votun uzo pettoitalo. Ani tea thonddayek ami sorvani ujea bhomvari nidonk asl'lem. Tye ratim khonchiyi monzat te gudde choddl'lem porim na. Toriki madhu bonduk aplea tokle lagim dourn add poddl'lo.
Hamvyi add poddlo xinuyi add poddlo. Thodde ghoddyen nident ghorelagole. Punn mhojea motint tench bomboi xohor ani tem xohor sobhit asa mholl'llem niallilagolom.
Sumar vella uprant hamvem xinuk zagoilem. Ani apnnak hagonk zata dekun sangata ye mhonn uttoilom. Xinu uttlo. Hamv ani xinu guddo demvonk lagleamv. Chondracha ujvaddak to guddo spoxtt distalo zaleari guddo demvcho opayachem mholl'llem amcha nenntea motint edollchch somzal'lem.
Xinu eka fatrar apnnak patt korn boslo ani hamv chodd'ddi kaddon boslom. Titlear guddea mullat kattincho vor vechem spoxtt distalem. Kitem tem mholl'llem somzonchadhim hamve bob ghali. Ani tea bobek madhu ani sogllim uttli. Ani madhu bhimyan hatant bonduk gheun demvon ailo ani vicharilagolo "kitem zalem?" hamv kamptalom. Ani villap kortalom. "xinu poddlo....Ani sokla poddlo...".
Madhun ek ghoddi apnnak ghott'tt dhorn sorvank dhoir dilem. Atam omim kitench korche porim na. Fantem zal'le porinch ami xinuk sodheam. Madhun apnnak xinuk apoun haddl'leak ani apnnak zagoinatl'leak jeor korn sorvank porot pattim apoun vorn gelo. Ratim konni nidlenant. Sogllim bhimyan kampon rat fali keli. Fantem zal'le porinch sureo sodancho ujvadd gheun ailo. Madhu sovem amcha sorvanchi dixtt sokla geli. Xinuchi mustaiki churan chur zaun poddl'li. Punn xinucha kuddichi zhollok natl'li. Eka bhirankull ratim xinucho ani apnnacho vegllachar zal'lo.
Ami sogllim pattim aileamv. Xinuk ranvott monzatenim dhorn vel'li khobar ekeka konxak ekeka ritin pauli. Konn mhonntalim xinuk vagan khelo. Konn mhonntalim xinuk ghenddan velem. Konn mhonntalim kattin(ran reddeanim) xinuk jivexim marlo ani dusrea ranvottini xinuk gill'llo.... Iteadi.
Hea sorvam modhem sot khonche te konnaki somzalem na. Hamvyi ghora pattim ailom. Mhoje mukhar ojzan madhuk jeor kelem. Om'machi bob ani ojjichi bob akasak pavol'li. Madhu gel'loch ojzacha maranchi xikari hamv zalom. Marank mam' natl'lo tor havoyi mortom konn'nna. Rojer ayil'lo mam' mhaka gheun bomboi xohrak vorno gelo. Oni hamv pattim gavank ailom na. Thoinch kamank servolom. Gamvcha eklean khobar dil'liki hamv satvent foil zal'lom mhonn. Punn choddit xikchi urbha makayi natl'li. Punn az? ojza moron edollcho matyek sarem zaun gela. Ojjiyi ojzak patt korn gelea. Om'ma d'dollchch mhatari zalea. Hamv techch zagear, techch ghorant asa. Techch ojjikunzak dixtt laun asam.
Sogllim chintnam eka pattlean ek sanklliporim mhojea uddasacha pordear yeun vetali. Ani hamve fanteachi zop dhauddaunk ojji kunza pottlean tillcha sureak polleun apli kus portili. Ani motik lagl'lim sorv uddasachim khoullam zhoddon poddlim. Tem ojji kunza, madhu, ghendda, xinu, pinjkor vosturam, punn tachaki adhim hamv hagonk bosl'lo ani mhaka patt korn bosl'lo xinu, ani lottun ghalcho hamv.
