Khuni

Khuni

Melvin Pinto

Ek khuni zamvchear asa - khonddit muklea ek-don disamni. Oxem mhonn sesun nir‍dar kor‍no zala. Toxem kaim sesu khuni kor‍chea kaleticho nhoim. Tea dixim taka kaim onbog asa? kaim na. Punn khuni korunk onbog kiteak? sat inchanchi mati kel'li bodd'dd, punn paz‌l'li, churi ek pauttim monxeachea patti konneant rigoilear soi! bhair kaddchi gor‍zo‌cho na; monis khalich. Oxem mhonn pattlea thoddea ghontteam thaun chintun'nch aschea sesun akerik holltar mot ghott kor‍no zalea. Ani faleam bhitor gamvant ekleachem moddem poddta.

Sakallim pottelachea bakimarant hor‍xenchaborich kal-bol'lochem zot bandun nangrachem hitallem zumvak xir‍kaun puddkai hatim dhor‌l'lea sesuchea jivant hurup‌yi nat‌l'lo, vorelam ghalunk talloyi nat‌l'lo. Oxem kedinch zal'lemna. Pottelachea xetant kamak lagon atam vor‍sam bara utor‍tat. Aplench xet koxem suddsuddayen gholl'lla sesu. Kal-bol'l aplech zoulle put mholl'lleabori samball'lleat tannem. Punn az matr tachea talleant vorelam nant, hata-pamyamni boll na. Reddeyi sesuchim ganam nastam nangor voddunk aikanant. Dekun kednamyi boddi dakoinat‌l'lo sesu az reddeanchea pattir borench voddta. Redde bolchetat bhir‍mot. Kuxichea gadeant nez kaddunk devo‌l'lim komol, el'lom'm', modire ho ddrama polleun “o sesu, dayeg hakuvaya er‍leg!” mhonn bobattotat.

Sesuk sosana. Kiteak‌gi dolleam khanchimni dukam futt'tat. Tea dukam modem talleant thaun dukall vorelam umallon yetat. Redde somadhan zatat. Punn sesuk matr kalliz futton fasallon gel'lo onbog zata.
Oxem kiteak kelem randden? kitlim svopnnam dour‌l'lim apnnem? zogasannen ekek ruvi ekttamvon yemvchea zar‍do mohineant fulam mallon mar‍nemiktt'ttechea isvachea puta enkottolagim kazar kor‍no dizoi mhonn chint‌l'lem. Punn titlea bhitor haka khoincho ongalap laglogi? pott bhor‍no‌yi zalem. Az sakallim fuddem kotthinn vorodd kaddtana apnnem chintlem kaim pottkanni asteli mhonn. Punn uprant bailen khobar ditana oskot pakench angar kosallon podd‌l'leabori zal'lem.

"aikalem-i‌ve tuvem? kelam polle duven kor‍mo! khoim‌gi vochon chor‍no khaun ailam. Kaddta polle vorodd atam!"

Sesu poilem patyelona. Punn uprant duvelagim vichar kaddtana tem opvalem. “konn‌go to hoddbo?” mhonn vichar‌l'leak tem sangonk nar‍galem. Kostana reddeank vapar‍chea tas‌l'lea kadreachea boddien sor‍sorit char ghaltana, bonnkean apnnak vaitt kelem mhonnalagolem.

Bonnkean vaitt kelem?

ghoddyek ovakk zal'lo sesu. Taka patyeunk zalemna.

Bonnkean eka mharanchea cheddva songi vaitt adar‍chem dhoir ghetlem tem chintana taka dolleank kallok ayil'lo. Vor‍sam vor‍sam thaun tanche thaun kill mhonn leka bhair ur‌l'lea loka modlea eka cholie songi bonnkean oteachar adar‍lo tem opun ghemvchem tor‌yi koxem?

cheddvak mar‍che mar ghal'le vhoi. Punn toxem mhonn taka logadd kaddunk zata? kitlem mhollear‌yi tem apnnachi duv. Attintlea eka aitara bhum-i podd‌l'lea taka oytu mhonn mogan namv dil'lem. Punn oxem apnnak dhogo dit mhonn chintunk nat‌l'lem sesun. Tachi mot pisantur zal'li.

Az kos‌l'lem soma zaunk nat‌l'lem. Reddeanchea angar marancho ximvor poddon rogat kinddel'lem. Pottel kaim pollet tor apnnache hal zatat khonddit. Sesun reddeank vhallak vor‍no nitoll kelem. Chorvonk soddchea poilem rogot kinddel'leakodde kaibevachem tel puslem. Angar sogllea tillel tel rogddolem. Reddeank kumerint soddon sesuyi vhallant naunk demvlo. Motint duvechinch chintnam.

Atam kitem kor‍chem? chintilagolo sesu. Kill zatint zolmal'lom tor‌yi mor‍yaden jielam. Chougam bhur‍geank mogan vagoilam. Xit na tor ek ghott nis punn‌yi diun samball'llam. Toslea apnnachea kuttmak koxi bhejligai hi kheasot? bonnkea songi miromvchea titli sollgi koxi zali taka, ya bonnkean boltkar kelo?

odikarachea bollar kitem korunk‌yi toyar monis poyil'le pauttim sesun hea porim dedespor zamvchem. Taka mukli vatt koll'llina.

Donparam koddkeant pakeak xir‍kayil'li apli vattli ani gobllo kaddon jeunnak bostanamyi sesuche hat-pam-i kamptale. Pottelachea bailen reuti okkan taka vaddlem.

"kitemre sesu, huxar nam-i‌vere?" tinnem vichar‍lem.

"ham... Na... Na... Okk.."

"jevo.. Jevo, kitengi zalam tuka az.."

to uloilona. Kiteak‌gi poyil'le pauttim pottelagelem xit‌yi ruchlemna taka. Koxttamni tannem char xitam tonddak velim.

Ore, cheddvak kiteak osli bud aili? mot tachi ek‌cho soval vichar‍tali. Kitem unnem kel'lem apnnem taka? zaunk xikap diunk zalemna apnna thaun. Chouti bhongani xiklem. Uprant ghor‍chea kamak, bamvddank polleun ghemvcheak mhonn ghora rauylem. Vaddon ayil'leabori pottelachea tottant apnnench uloun kamak lailem. Reuti okk taka mogan lektali, ani ghor kamak soit sangtali. Tedalla tedalla vosturam, vor‍vi dil'liyi asa. Toxem cheddvak koslench unnem poddonk nat‌l'lem. Kaim unnem zal'lem tor apunn taka ditom. Punn bonnkealagim miromvchea titli khoroz kiteak uttli taka? bonnkea songi chongai kedalla ubzali? bonnkeak ani pottelak modem uzo vochana. Dekun kaim tannem oxem aplea duvek kosai‌garachi xelli keligai? apunn kednanch bonnkeachea khobrek gel'lonch na. Tor hem koxem bonnkeak mellonk gelem? sor‍vo taka ek mister‌cho zaun tokli foddunk suru zali.

Donparam bakimar gadeak mer ghalunk gelo sesu. Punn motint tachea vadallam utt‌l'lim. Pottelalagim hem sangungi mhonn chintilagolo to. Koxem sangchem? aplea kuttmachi nalisai tache mukar patllamv? ghor‍chem dud madda mullak votum? kitem chintlo to? tujea duvek samballunk tankanat‌l'lo tum koslo bapoi‌re mhonnat tor?

chhe! khonddit toxem mhonnsona. To apnnak bapoi‌bori. Tachevinnem khonddit nis‌yi got na apnnak. Kedallayi kumok vichar‍no gel'lea toull tannem na mholl'llemna. Kitlem rinn dilam tannem! azun pattim magonk na. Toslea bor‍ya vyoktilagim aple koxtt sangon mukli vatt chintizoi.

Sanjer reuti okkan dil'li ek gobllo cha talleant golloun reddeank kullit vattun dilea uprant to choukent bos‌l'lea pottela mukar gelo.

"kitem zai‌re sesu? por‍tun poixeank ailai‌yere?" pottelan vichar‍lem taka.

"na.. Na.. Dhonea. Tem.. Tem..?" to pad'delo.

"koslemre tem sesu?"

"tem.. Tem.. Mhoji duv.." tallo bhoron yeun tachea dolleamni dukam udelim.

"ore.. Kitem zalemre sesu? soddoun sang‌re.." pottelan bir‍mot pavon sanglem.

Sesu pattim mukar chintilagolo. Sangongi sor‍vo gozal soddoun? nir‍dar kor‍chem koxttanchem zalem taka.

"kiteak‌re sesu? mhojelagim tuka patyenni nangi? tuka xit ghal'lea, tuka poschea monxalagim kitem lipoitai?" pottelan matsea ragan'nch mhollem.

"na.. To-toxem nhoim dhonia.." sesun dukam puslim.

"toxem nhoim tor ani koxem?"

"tem.. Tem.. Mhojea du..Ven sot'teanas kelem dhonia.." to por‍tun bhur‍geabri roddlo.

"ore.. Tum roddon'nch asai‌mure papia! soddoun sang‌re kitem zalem mhonn.."

sesun bharich koxttamni ani ubdesan bhoron sakallim apnnem aikal'li khobar pottelalagim patllaili. Kalliz tachem dodd'doddotalem, pam-i kamptale. Uloitam uloitam khoros yetali. Pura soddoun sangtana vixes sonkott bhogle sesuk.

Pottelachea motim edoll‌cho gunnakar, bhagakar zal'le.

"hamvem chint‌l'leaborich zalemre sesu.." xir zokun dag dimvcheak‌laglo pottel.

"dho.. Dhonia.." sesu hankrelo.

"ham.. Ham.. Tuvem antxem xer‍melear kainch faido na. Tum ek gorum. Tea bonnkeachi choritra tuka koxi kollit? tannem hea gavant padd korinat‌l'lim cheddvam aslear vichar. Tumcheach kerint kitlea mharanchim bhur‍gim aplea bapoik zal'lim tuka kollit asa? tuka koxem kollit sesu? tea hoddbea bonnkeak somsrak khobor nat‌l'leaborich holk kamam kor‍chem dennench mell'llam. Tachi khoroz asa polle, ti kotthinn. Dekun'nch sosunk tankanasotam bailen tedalla tedalla kullara vochon ramvchem. Ore, tujea duvek vaitt korunk tannem manddaull ghal'li kollit as‌l'lem tor tuvem addvyet as‌l'lem mhonn chintai‌ve tum? tuka hea vixim kaim kollon tum addkoll zal'loi tor tuka titin kuddke korunk pattim sor‍tona to. Kunttimozol ongar koso melo? sor‍vo chintat tannem vik ghetlem mhonn. Pura fott. Hea bonnkeak tachea bailelagim chongai as‌l'li. Ongarak hem koll'llem. Ghorant bailelagim loddai keli tannem. Dusrea disa ongarachem moddem mozalachea merer podd‌l'lem. Bonnkeachea monxamni taka ttik ttventti bhoryil'lemre sesu. Lok chinta ongaran jivghat kelo mhonn. Punn khori gozal vegllich. Toxem astam tujea duvek oxem zala ani tum azun jiunt asai tor tem ek vhodd ojeap mhonn chint..."

souyechea bollan aplo davo hat voir sokoil bizaun pottel sangon gel'leabori sesu pur‍to ghamel'lo. Bonnko itlo vaitt asa mhonn tannem chintunk nat‌l'lem. Zaunk thoddea tempa adim zal'lea ilekxonant hikmoteo khellon to jikon aila mholl'lli khobar tannemyi aikal'li. Punn kosli hikmot, kitem tem taka kollit nat‌l'lem. Punn bonnko hea ritim vikall asa ti khobar tachea vantteak vhodda akantachi.

Sod'deak sesuchi vachach bond poddli. Kitem ulomvchem tem taka bilkul sustalemna.

"ilekxanant jiklea uprant sogllo gamv‌cho aplea chorovak asa mhonn chintlam tea horamean," pottelan mukar‍silem. "hea gavant ani khoinchimyi cheddvam bor‍kat ur‍lear sang mhaka.." pottel sangon gel'leabori sesuchea sogllea jivant soukas uzo pettonk‌laglo. Usvasa veg choddlo. Kalliz hellke bhair boddvonk laglem.
"dho.. Dhonia.." to mhonnalo. "kitem tor‌yi kor dhonia.."

"kitem tor‌yi kor? kitem novalam uloitai‌re sesu? hamvem atam kitem korizoi? tujea duvek haddon am'mger rauyzoi mhonntai‌ve tum?"

"toxem nhoim dhonia. Tea bonnkeak kitem tor‌yi kor dhonia.."

"hamv kitem korum? ore tannem tujea duvek vaitt kelasotam tuvench kitem tor‌yi korizoi.." pottelan holltar sanglem.

"pu.. Punn hamvem dolldir monxan tea bonnkeak kitem kor‍yet dhonia?"

"tujem chintap‌cho hem. Vor‍sam vor‍sam thaun apunn dolldir mhonn tum chintun ailai. Dekun'nch tea bonnkea tosleank tumi, tumchim bhur‍gim solisayen sampddoche undir. Tuminch nitt ravon apunn undir nhoim, zai tor vag zaunk‌yi toyar tem dakoun dia taka. Tedalla tumchea tontteak konn‌yi yemvchona.." pottel aplem turup khell'llo.

"ha..Hamv kitem korum dhonia?"

"tuka khuxi as‌l'lem kor. Punn to bonnko asta mhonnasor tumchea kerichim ek‌yi cheddvam surkxit nant tem uddas dour".”

sesu pur‍to vir‍yar zalo. Eka vatten sogllem ang krodachem agttem zaun zolltalem tor dusrea vatten kitench korunk apunn sokana mholl'llem oshaik‌ponn.

"kitem kor‍tai polle sesu; kosli-i kumok zai tor vichar," sangon pottel aplem puddvem eka hatan uklon dhor‍no xeta teuxim choltoch raulo.

Pottelan aplo khell khellon zal'lo. Sesu kitem nir‍dar gheta mholl'lleacho khoro ondaz pottelak edoll‌cho zal'lo.

Itlea vor‍sam thaun hea gamvant apnnachem yejman‌ponn as‌l'lem, chintilagolo pottel. Apnnem sang‌l'leabori choltalo lok. Kitem gourou, kitem mor‍yad ditalo apnnak! hea vor‍sa thaun tem sor‍vo raulam. Vatter cholon vechemyi okmanachem zalam. Mus‌yi lekina az apnnak. Haka sor‍vo karonn to bonnko. To astam mhonnasor apnnachem kitench xizana tem khonddit. Dekun apnnem khell khellchi gor‍zo asa tem pottelak kedallagi gomlam.

Toxem polleunk gelear gavant sangchea tosle kullvar, giresot mhonn asche hech dog - pottel ani bonnko. Pottelak pur‍vozam thaun ayil'li asot unnear unnem xembor ekre as‌l'li. Choddtavo krixechi bhum-i. Vor‍sak tin bellim kaddtalo to. Voilean tor‍kari, madd, maddi, kemllbe. Gottobhor gairam, moxi, kambllache zoit puddpuddit redde.

Torik‌yi pottelachi axa thambnat‌l'li. Panch vor‍sam adim poixeanchea bollar ponchait ilekxonak ravo‌l'lo pottel, solisayen jik‌l'lo. Ponchaita thaun dublleam khatir mhonn mell‌l'le poixe, holl'llent obhivrid'de kamak mhonn monzur zal'lea poixeant kaldo vanttoyi pavaje zal'leakodde pavanasotam pottelachea astik poddla mhonn lok uloitalo. Ponchait sando zaun odhikarachea rubavar gavant apunn'nch poilo mholl'llebori choltolo pottel lokak khais zaloch na. Voilean tache vixim, tannem adar‍chea vaitt kor‍tubam vixim gupit khobro gamv‌bhor prosar zaun pottelachea ott'ttare bollak sonkott haddvonk pauleo. Oxem hea vor‍sachea elisavant lojebhorit ritin solval'lo pottel.

Gavant atam bonnkeachench kar‍bar. Kiteak nozo, mhonntalo lok. Bonnko bovo koxtt kaddon voir aila. Bhum-i matr nhoim, thoraull ritichem bisnes kor‍no minot kaddon voir aila. Takayi thoddeo vaitt soveo asat; voilean bisnesa khatir sobar onoitik vattoyi to dhor‍ta mhonn gamvar khobar. Punn tea vixim lokak kaim poddon vochonk na. Kiteak pottela thoim nat‌l'lem monxaponn bonnkealagim asa mhonn lok chint'ta. Ani teach khatir lokan taka vinchla. Lokachi patyenni bonnkean fott kelina. Jik‌l'lea hea so mohineamninch gamvak nolla udkachi vyoustha keli tannem. Mar‍gak ddamar poddlo; ek novem bos-stteandd ani dudachea sosaittik novem bandop monzur zalem. Matr nhoim matar‍yank, ong-viklank sor‍kara thaun poixe haddomvcho bhor‍voso dilo. Lokak atam bonnkea vixim choddit otreg ani obhiman. Hench pottelachea potta ujeak karonn zalam. Bonnkean disan-dis probavo‌bhorit zamvchem, lokamogall zamvchem polletana tachea pottantolo uzo kotthinn ritim zhollon inchan inch taka bhosm' kor‍no asa. Ani apnnem gobor zaun var‍yar ubchea poilem bonnkeak ek got dakoina tor apnnem jimyemvchem vyor‍tho mhonn chint‌l'lea pottelak ek opur‍vo ovkas atam udeun ayil'lo sesu ani tachea duvechea rupar. Bonnkeachem sot'teanas kor‍n'nch xud'd mhonn chup mixiam voir bottam choroun mixiam pontar‌cho amruko haso haddun zoitachim mettam kaddon kallok zatam bongleak pavo‌l'lea pottelak eksur‍ponn dosunk‌laglem. Bail kullara vochon yetam mhonn bhair sor‍no gel'li.

Hennem sesuchea motint bhirankull vadallam utt‌l'lim, kallzant bhumykamp. Sogllea jivant rag, hogeacho uzo petton rogtant hulop chor‌l'lo. Ghora teuxim pattim por‍tal'lea sesuchea mettamni avex as‌l'lo. Doddamam oddchun tokli matsi zodd zaun yetali.

Paulam tachi hellke bhair kusachea goddonga teuxim chomkalim. Ekxem satt don'nch ghottamni mholl'llebori talleant demvylo tannem.

"kitem sesu bhari amsor‍tai?" kusan vichar‍lench.

"Vhoi..Vhoi.. Aicho dis bharich koxttancho zalo. Toxem sukur‌nolli sukon chimvollon gelea. Matsi hun kor‍yam mholl'llo otreg.." sesun zap dili.

"Toxem ek‌cho pauttim talleak otlear suk‌l'li nolli bhijchea bodlak kor‍pon vochonk asare sesu, he.. He.. He.." as‌l'le char kiddiare dant dakoile maranchea isvan.

"Kor‍polear kor‍pondire isva; punn tache poilem onyekleachi sukur‌nolli xindunk asa mhaka. Yetai‌ve mhoje sangata tum?" soval uddoilem sesun isvak. Kuddintolo spirit holltar ub ditalo.

"Ore, kitem voparimni uloitai‌re sesu? tem kitem ovchit sukur‌nolli xindcheak bhair sor‍lai tum?" isvan sot'tean vichar‍lem.

"Sovalam vichar‍naka tum; yetai zalear mhoje sangata yeun mhaka kumok kor. Bakichem hamv polleytam."

"Bhari xiknnam uloitai‌re tum sesu. Toslem pura ulomvcho vell nhoim ho. Faleam ulveam."

"Tuka dhoir namre hoddbea. Dekun'nch amchi zat azun oxich asa, tuje tosleam dhor‍man. Hamv tujebori uronk axena. Dekun mharank‌yi kaim thoddi mor‍yad, kim'mot asa mhonn dakvonk asa. Tuvem yemvchem naka. Punn tuka tuvem jiemvchea yem'mkondda thaun suttka dizoi tor hamvench!"

Sesu uttlo. Anyek xembor ghetlo tannem. Jivant atam eka thoracho hurup bhor‍lo. Matsi loknni yetali tor‌yi sudar‍sun ghora teuxim mettam ghalim tannem. Ghora pamvchea bhitor tannem nir‍dar kor‍no zal'lo.

Vhoi, gamvchea omaik lokamayechea cheddvanchem jivit‌cho chimvchea sor‍pak ek vatt dakoizoi. Edoll tannem adar‌l'lim patkam puro. Gavant cheddvank suxeg mellaje tor bonnkean dusrea somsrak vochazoi. Ani tachi vilevari apnnench korizoi. Apunn bhimvkuro nhoim, tujea vantteak yomdut mholl'llem zahir korizoi. Apnnachea duvechem jinnem koxemyi tin-tir‍kutt zalem. Gavantlea cheddvank kaim thoddi bhodroti zai tor bonnkeachea pattik apnnem churi ghalizoi‌cho.

Sesun nir‍dar kor‍no zal'lo.

Koxttamni ghora pavo‌l'lea sesuk az jemvchi axa nat‌l'li. Bhuk mholl'lli aichea disa moila pois dhamvlea koxem bhogtalem taka. Randchea kuddak gel'lea sesun as‌l'li ek‌cho sat inchanchi bodd'dd churi minchli.

"bonnkeachea zolmak hich churi favo.." churi gheun bhair ayil'lo sesu mhonnalagolo, ghor‍cheank aika sar‍kem.

"mhojea duvechem nissontan kel'lem puro tea bailanddean. Gamvchea cheddvamni bochavo zaizoi tor bonnkeak dexantor dhaddizoi zal'lem kor‍mo mhojem.." sesuchea kuddintolo spirit borench kam' kor‍talo.

Sesucho ovtar polleun tachi bail rumi, oytu ani itor tegam bhur‍gim aklason gelim. Sesuk tannim hea sthiter dekchem hench poile pauttim.

"kitem ves pangur‍tai haba tum? vecho kal ailagi tuka?" tachea bailen tallo kaddlo.

"vecho kal mhaka nhoim‌go gaddva, bonnkeak, bonnkeak aila. Faleam sakallim tachem moddem poddtelench.."

"vhoi, moddem poddtelem ani tuka fulam-jhele ghaltele, sonman choltolo," nonji uloilem rumi.

"konn zanna! gamvantlea lokamayechea cheddvank rakonn dil'lea khatir sonman mell'llear‌yi mell'llo," sesun soddon dilemna.

Bapoi ani auy bhair choukent oxem uloun poddtana bhitor oytu mandrer omtench poddon koskoson roddtalem. Koslem dur‍bag apnnachem? chintilagolem tem. Choli zaun zolmalear hich‌gai jinni? temyi mharanchea zatint zolmalear svatontry mholl'llench nangai?

okk nat‌l'lea tea disa ghora bhitor khonddit vochonk nozo as‌l'lem apnnem. Titlemyi okkol kiteak chuklem apnnak? zaunk okkol nat‌l'lem cheddum mhonn'nch olailam ghor‍cheamni apnnak. Punn tea dis tor‌yi kaim thoddem okkol apnnak ayil'lem tor!

Ghor nitoll kor‍no astana pattlean thaun angar podd‌l'lo lojmaddo. Kinkratt marunk‌yi aukas dilona tannem. Uklon bhitor kuddak vor‍no dar pichar kor‍no vagan oskot gor‍vacher zhompoi mar‌l'leabori apli kotthinn khoroz nivar‌l'li tannem.

"zannam-i tum tujea bapoin kitlem rinn ghetlam mhoje thaun?" tannem mholl'llem. "zolmant farik korunk zamvchemna taka. Tum mhaka oslem sukh tedalla tedalla dixi tor sor‍vo rinn mafi zatelem. Tujem kazar‌yi bor‍yan zatelem. Okkak matr hi khobor dixi tor porinnam' vaitt ur‍tolo."

Ang sogllem dukin ek rumv koxem zal'lem tor‌yi kiteak patyelim taka hamv? akerik khorench okkol nat‌l'lem cheddum mhonn apnnench sabit kelem nhoim?

Tea uprant okk kullara gel'lea hor‌eka disa, ani thodde pauttim ranant soit apnnak tannem chimvon chimvdd kor‍no soddlem.

Ani por apunn tachea bhur‍geak pottant vauvn asam tem kollon taka sangtana, tannem dil'li takid aikon mollab‌cho matear kosllon podd‌l'lo onbog zal'lo.

"Bhari khuxechi khobar‌go cheddva," tannem apnnak mudd'ddun mudd'ddun sanglem. "mharanchea zatichea tujea gor‍bant uncholea zatichem bim kir‍lalam. Punn hem bim mhaka naka. Tunch dour. Sangata tujea bapoin kel'lem sor‍vo rinn mafi zalem mhonn chint. Punn tuvem korizoi zal'lem bharich zovabdarechem kam' anyek asa. Tujea pottantlea bhur‍geacho bapoi bonnko mhonn matr tuvem tujea bapoik sangazoi, zorur sangazoi. Hantum tujea kuttmachem boremponn'nch asa, uddas dour."

Tachi takid aikon apunn khorench pamyan chil'luncho kosro koxem bhog‌l'lem nhoim apnnak?

Bhair auy bapoi azun uloun poddtalim. Bapoi vanachea fatrar churi pajtalo.

Tuji churi poddazoi zal'li bonnkeachea pattik nhoim, pottelachea pattik mhonn bhair vochon bapoik xida sangazoi mholl'lli zobbor tallnni oytuk aili tor‌yi, aplea dollidr oshaik poristhitent toxem kor‍chem dhoir hatam payank, jibek ailench na.