ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾ: ಮ್ಹಜ್ಯೆ ಆವಯ್ ಖಾತಿರ್
ಎಚ್.ಜೆ.ಗೋವಿಯಸ್: ಕೊಂಕ್ಣಿ ಸಾಹಿತ್ಯಾಂತ್ ಏಕ್ ಭಳ್ವಂತ್ ಕಾಣ್ಯೆಗಾರ್, ಅಪುರ್ಭಾಯೆಚ್ಯೊ ಮಟ್ವ್ಯೊ ಕಾಣ್ಯೊ, ಸಾಂಕಳ್ ಕಾಣ್ಯೊ ತಶೆಂಚ್ ಕಾದಂಬರಿ ಹಾಣೆ ಬರಯ್ಲ್ಯಾತ್. ವಾಚ್ಪ್ಯಾಂಕ್ ಭರ್ಪೂರ್ ಮನರಂಜನ್ ದಿಂವ್ಚ್ಯಾಂತ್ ಹಾಚ್ಯೊ ಕಾಣ್ಯೊ ಸಲ್ವಾನಾಂತ್. ಹಾಚ್ಯಾ ಕಾಣ್ಯಾಂನಿ ವಾಪಾರ್ಚಿ ಭಾಸ್ ಸಾದಿ, ಆನಿ ವಿಶಯ್ ಸಾಮಾಜಿಕ್ ಮನರಂಜನ್ ದೆಕುನ್ ಚಡಿತ್ ಲೋಕ್ ಹಾಚ್ಯೊ ಕಾಣ್ಯೊ ಖಾಯ್ಸ್ ಕರ್ತಾ. ’ಯೆತಾಂ ತುಜಿ ವಾಟ್ ಧರುನ್’, ’ಕಾಳೊಕಾಂತ್ಲೆ ದೊಳೆ’, ’ಹಾಂವ್ ತುಕಾ ನಾಸ್ ಕರ್ತೆಲಿಂ’, ’ಭುಂಯಾರಾಂತ್ಲೊ ಘುಟ್’ ಹಾಚ್ಯಾ ಲೊಕಾಮೊಗಾಳ್ ಕಾದಂಬರೆ ಪಯ್ಕಿಂತ್ಲ್ಯೊ ಥೊಡ್ಯೊ.
ಹೆರ್ ಕಾಣ್ಯೊ: ಹಾಂವ್ ತುಜಿಂ ಜಾಂವ್ಕ್ ಆಶೆತಾಂ.
ಎಚ್.ಜೆ.ಗೋವಿಯಸ್
“ಬೆಡ್ಡ್ ನಂಬರ್ 215....." ಸೆಕ್ಯೂರಿಟಿ ಗಾರ್ಡಾಚಾ ತಾಳ್ಯಾಕ್ ಹಾಂವ್ I.C.U. (ತುರ್ತು ಪರಿಸ್ತಿಥಿ ವಾರ್ಡ್) ಪಿಡೆಸ್ತಾಂಚಾ ವಾರೆಸ್ಧಾರಾಂಕ್ ರಾವೊಂಕ್ ಆಸ್ಲ್ಲ್ಯಾ ಕುಡಾ ಥಾವ್ನ್ ಭಾಯ್ರ್ ಆಯ್ಲೊಂ.
“ತುಕಾ, ದಾಕ್ತೆರಾನ್ ಆಪಯ್ಲಾಂ......" ಸೆಕುರಿಟಿ ಗಾರ್ಡಾನ್ ಮ್ಹಾಕಾ ಸಾಂಗ್ತಾನಾ, ಹಾಂವ್ ಮ್ಹಜಿ ಮಾಂಯ್ ಆಸ್ಚ್ಯಾ I.C.U. ವಾರ್ಡಾಕ್ ಗೆಲೊಂ.
ಮಾಂಯ್ಚೆಂ (Bypass surgery) ಕಾಳ್ಜಾಚೆಂ ಒಪ್ರೇಶೆನ್ ಜಾಲ್ಲೆಂ!
ನಾಕಾಂತ್ ಒಕ್ಸಿಜೆನಾಚ್ಯೊ ನಳಿಯೊ, ಹಾತಾಂಚೆರ್ ಹೆರ್ ವೊಕಾತ್ ವೆಚ್ಯೊ ಇಂಜೆಕ್ಷನಾಂಚಾ ಸುವಿಯೆಂಚ್ಯೊ ತೀನ್ ಚಾರ್ ನಳಿಯೊ ಪಳೆವ್ನ್ ಹಾಂವ್ ದುಖೆಸ್ತ್ ಜಾಲೊಂ.
ಮ್ಹಜಿ ಮಾಂಯ್ ಮ್ಹಜೆ ಖಾತಿರ್ ಬೋವ್ ಆಮೊಲೀಕ್ ಜಾವ್ನಾಸ್ಲ್ಲಿ. ತಿಚೆ ಖಾತಿರ್ ಹಾಂವ್ ಕಿತೆಂಯ್ ಕರುಂಕ್ ತಯಾರ್ ಆಸ್ಲ್ಲೊಂ; ಆನಿ ಹಾಂವೆಂ ತಿಚೆ ಖಾತಿರ್ ಜಾಯ್ತೆಂ ಕೆಲ್ಲೆಂ.
ಜಾಯ್ತೆಂ ಕೆಲ್ಲೆಂ.....?
ವ್ಹಯ್, ಹಾಂವೆಂ ಮಾಂಯ್ ಖಾತಿರ್ ಮ್ಹಜೊಚ್ ಮೋಗ್ ಸಾಕ್ರಿಫೀಸ್ ಕೆಲ್ಲೊ!
ಸುಚಿತ್ರಾ.....!
ಮ್ಹಜೆಂ; ಹಾಂವೆಂ ಮೋಗ್ ಕೆಲ್ಲೆಂ, ಮ್ಹಜೆ ಖಾತಿರ್ ಮಾತ್ರ್ ಜಿಯೆತಾಂ ಮ್ಹಳ್ಳೆಂ; ಆನಿ ಹಾಂವೆಂ ತಾಕಾ ಕೆದಿಂಚ್ ನೆಗಾರ್ ಕರ್ಚೊ ನಾ ಮ್ಹಣ್ ಉತಾರ್ ದಿಲ್ಲೆಂ ಮ್ಹಜೆಂ ಸುಚಿತ್ರಾ! ಅಸಲ್ಯಾ ಚಲಿಯೆಚೊ ಮೋಗ್ ಕರುನ್, ದೀಸ್ ರಾತ್ ಆಶೆವ್ನ್, ಲಾಲೆವ್ನ್ ಸಭಾರ್ ಭಾಸೊ ದೀವ್ನ್ ಕಾಜಾರಾಚಿಂ ಸ್ವಪ್ಣಾಂ ಪಳಯಿಲ್ಲ್ಯಾ ಸುಚಿತ್ರಾಕ್ ಹಾಂವೆಂ ಮ್ಹಜ್ಯೆ ಆವಯ್ಕ್ ಖಾತಿರ್ ಸೊಡ್ಲ್ಲೆಂ!
ಸೊಡ್ಲ್ಲೆಂ.....?
ಕಿತ್ಯಾಕ್.....??
ಮ್ಹಜ್ಯೆ ಮಾಂಯ್ಕ್ ತೆಂ ಗರೀಬ್ ಮ್ಹಣೊನ್ ಪಸಂದ್ ನಾತ್ಲ್ಲೆಂ. ಗರೀಬ್ ಜಾಲ್ಯಾರ್ ಕಿತೆಂ ಜಾಲೆಂ? ವ್ಹಯ್ ತೆಂ ಲ್ಹಾನ್ಶ್ಯಾ ಘರಾಂತ್ ಜಿಯೆಂವ್ಚೆಂ ದುಬ್ಳೆಂ ಚೆಡುಂ. ಲ್ಹಾನ್ಶೆಂ ಘರ್ ಮ್ಹಣ್ಚ್ಯಾ ಬದ್ಲಾಕ್ ಝೊಪ್ಡೆಂ ಮ್ಹಳ್ಯಾರ್ ಚಡ್ ಸಾರ್ಕೆಂ ಜಾಯ್ತ್.
ಪುಣ್ ಸುಚಿತ್ರಾ ಮಸ್ತು ಸೊಭಿತ್ ಆಸ್ಲ್ಲೆಂ. ಸೊಭಿತ್ ಮಾತ್ರ್ ನ್ಹಂಯ್, ಶಿಕ್ಪಾಂತ್ಯೀ ಹುಶ್ಯಾರ್ ಆಸೊನ್ ತಾಕಾ ಮಿಕ್ವಾಲ್ಲೊ ಕೊಣ್ಯಿ ನಾತ್ಲ್ಲೊ.
ಹ್ಯಾಚ್ ಗುಣಾಂಕ್ ಮೆಚ್ವೊನ್ ಹಾಂವ್ ತಾಚಾ ಮೊಗಾರ್ ಪಡ್ಲ್ಲೊಂ.
ತಾಣೆಂಯೀ ಮ್ಹಜೊ ಮೋಗ್ ಕೆಲ್ಲೊ.
“ಹಾಂವ್ ತುಜೊ ಆಜ್ ಮೋಗ್ ಕರುಂಕ್ ಆಶೆತಾಂ ಮೊಗಾ....." ಹಾಂವೆಂ ವಿಚಾರ್ಲ್ಯಾ ತ್ಯಾ ನಜೊ ಜಾಲ್ಲ್ಯಾ ಕರ್ನೆಕ್, ಮ್ಹಜೆರ್ ಆಸ್ಲ್ಲ್ಯಾ ಮೊಗಾನ್, ಉತ್ರಾನ್, ಭರ್ವಶ್ಯಾನ್, ತಾಣೆ ಮ್ಹಜೆಂ ಮೋನ್ ಮಡಿನಾಸ್ತಾಂ, ಆಪ್ಣಾಕ್ ಮ್ಹಾಕಾ ಸಪರ್ಪಿಲ್ಲೆಂ, ಸಾಂಗೊನ್-
“ರೋಹಿತ್, ಹಾಂವ್ ತುಜಿಂಚ್ ಮ್ಹಣ್ತಾನಾ, ಆಮ್ಚೆ ಮಧೆಂ ವೊಣೊದ್ ಹಾಂವ್ ದವರ್ಚಿನಾ. ಪೂಣ್, ಖಂಚಾಯ್ ಸಂದರ್ಭಾರ್ ತುಂ ಮ್ಹಾಕಾ ಸೊಡ್ಶಿ ತರ್, ಹಾಂವ್ ಪರಾತ್ ತುಕಾ ಮೆಳ್ಚಿಂ ನಾ"
ಹಾಂವೆಂ ತಾಚೆಂ ಉತಾರ್ ಮಾಂಧುನ್ ಕಾಜಾರಾಚೆಂ ತೆಂ ಸುಃಖ್ ಭಗುನ್ ಜಾಲ್ಲೆಂ! ಆನಿ ಜೆದ್ನಾಂ ಹಾಂವೆಂ ಸುಚಿತ್ರಾವಿಶಿಂ ಮ್ಹಜ್ಯಾ ಮಾಂಯ್ಕ್ ಸಾಂಗ್ಲ್ಲೆಂ, ತಿಣೆ ಪಯಿಲ್ಲೆಂ ವಿಚಾರ್ಲ್ಲೆಂ- ‘ರೋಹಿತ್, ತೆಂ ಕೋಣ್....?’
ಹಾಂವೆಂ ಸುಚಿತ್ರಾಚಿ ಖರಿ ಪರಿಸ್ಥಿತಿ ಮಾಂಯ್ಕ್ ಸಾಂಗ್ಲ್ಲಿ.
ಮಾಂಯ್ನ್ ತಕ್ಷಣಾ ಮ್ಹಜೆರ್ ರಾಗಾರ್ ಜಾವ್ನ್ ಸುಚಿತ್ರಾಕ್ ನಿರಾಕರ್ಸುನ್ ತಾಕಾ ವಿಸ್ರೊಂಕ್ ಸಾಂಗ್ಲ್ಲೆಂ. ಹಾಂವೆಂ ಹಟ್ಟ್ ಕೆಲ್ಯಾರ್ ಆಪುಣ್ ವೀಕ್ ಪಿಯೆವ್ನ್ ಮೊರ್ತಾಂ ಮ್ಹಣ್ ಮ್ಹಾಕಾ ದಮ್ಕಿಲ್ಲೆಂ.
ಪೂಣ್ ಕಿತ್ಯಾಕ್.....?
ವ್ಹಯ್ ತಿ ಚಲಿ ಆಮ್ಚೆ ಪರಿಂ ಫ್ಲೆಟಾಂತ್ ರಾವಾನಾತ್ಲ್ಲಿ. ವ್ಹಡಾ ಘರಾಣ್ಯಾಂತ್ಲಿ ನ್ಹಂಯ್. ಸೊಭಿತ್ ಆಸ್ಲ್ಯಾರ್ ಕಿತೆಂ ಜಾಲೆಂ? ಸೊಭಾಯ್ ಜೇಂವ್ಕ್ ದೀನಾ. ಸೊಭಾಯ್ ಧನ್ ದೀನಾ. ತಸಲ್ಯಾ ಗರೀಬ್ ಝೊಪ್ಡ್ಯಾಂತ್ಲ್ಯೆ ಚಲಿಯೆಕ್ ತಿ, ತಿಚಿ ಸುನ್ ಕರುನ್ ಘೆಂವ್ಕ್ ಬಿಲ್ಕುಲ್ ತಯಾರ್ ನಾತ್ಲ್ಲಿ.
ಕೂಡ್ಲೆಚ್ ಮಾಂಯ್ನ್ ಮ್ಹಜೆಂ ಕಾಜಾರ್ ಗ್ರೇಸ್ತ್ ಕುಟ್ಮಾಂತ್ ಉಲೊವ್ನ್ ಜಾಲ್ಲೆಂ.
ಆವಯ್ ಖಾತಿರ್ ಹಾಂವ್ ಚುಕೊನ್ ಪಡ್ಲ್ಲೊಂ!
ಚುಕೊನ್ ಪಡ್ಲ್ಲೊಂ ಮ್ಹಜೆ ಭಾಷೆಚೆರ್!
ಚುಕೊನ್ ಪಡ್ಲ್ಲೊಂ, ಹಾಂವೆಂ ಮೋಗ್ ಕೆಲ್ಲ್ಯಾ ಸುಚಿತ್ರಾಕ್ ಸೊಡುನ್ ಹೆರ್ ಚಲಿಯೆ ಕಡೆನ್ ಕಾಜಾರ್ ಜಾವ್ನ್!
ವ್ಹಯ್ ಮ್ಹಜೆಂ ಕಾಜಾರ್ ಮಾಂಯ್ಚ್ಯೆ ಖುಶೆ ಪ್ರಕಾರ್ ಬೊಲ್ತ್ಯೆಚ್ ಚಲಿಯೆಸಂಗಿಂ ಜಾಲ್ಲೆಂ. ಸುಚಿತ್ರಾ ಮಸ್ತು ರಡ್ಲ್ಲೆಂ! ಮಾಂಯ್ ಖಾತಿರ್ ಮ್ಹಜಾ ದೊಳ್ಯಾಂತ್ಲಿ ದುಃಖಾಂ ಹಾಂವೆಂ ಕಾಳ್ಜಾಂತ್ಚ್ ಲಿಪೊವ್ನ್ ಜಿರಯಿಲ್ಲಿಂ. ಮಾಂಯ್ ಖಾತಿರ್ ಬಿವ್ಕುರೊ ಜಾಲ್ಲೊಂ ಹಾಂವ್, ಮ್ಹಜ್ಯೆಚ್ ನದ್ರೆಂತ್ ಪಡ್ಲ್ಲೊಂ.
ಹಾಂವೆಂ ಕಾಜಾರ್ ಜಾಲ್ಲಿ ಚಲಿ, ಫಕತ್ತ್ 99 ದಿಸಾಂಚ್ಯೆ ಆವ್ದೆಂತ್ ಸರ್ಲ್ಲಿ!
ಭೋವ್ಶಾ ತಿಕಾ ರಗ್ತಾ ಕೆನ್ಸರ್ ಆಸ್ಲ್ಲೆಂ, ಜೆಂ ಕೊಣ್ಯಿ ನೆಣಾಸ್ಲ್ಲೊ.
ಹಾಂವ್ ವಿಧೂರ್ ಜಾಲ್ಲೊಂ. ಹಾಂವೆಂ ಕಾಜಾರ್ ಜಾಲ್ಲಿ ಹೊಕಾಲ್, ಫಕತ್ತ್ ತೀನ್ ಮಹಿನ್ಯಾಂನಿ ಮ್ಹಾಕಾ ಸೊಡುನ್ ವೆತಾನಾ, ಜೀವನಾಂತ್ ಹಾಂವ್ ನಿರಾಶಿ ಜಾಲ್ಲೊಂ. ಭೋವ್ಶಾ ಮ್ಹಜಾ ಬಿವ್ಕುರ್ಪಣಾಕ್ ಮ್ಹಾಕಾ ಮೆಳ್ಲ್ಲಿ ಶಿಕ್ಷಾ, ವ ಶಿರಾಪ್!
ತರೀ, ಹಾಂವ್ ಮಾಂಯ್ಕ್ ದುರ್ಸೊಂಕ್ ನಾ.
“ನಶಿಭಾಚೊ ಖೆಳ್, ತಾಂತುಂ ತುಜಿ ಕಾಂಯ್ ಚೂಕ್ ನಾ ಮಾಂಯ್" ಮ್ಹಣ್ ಸಾಂಗ್ತಾನಾ, ತಿಕಾ ಸಂತೋಸ್ ಜಾಲ್ಲೊ. ತಿಕಾ ಜಾಲ್ಲ್ಯಾ ಸಂತೋಸಾ ತಿತ್ಲೊಚ್ ದುಃಖಿ ಹಾಂವ್ ಜಾಲ್ಲೊಂ ಮ್ಹಳ್ಳೆಂ ಮಾತ್ರ್, ಮಾಂಯ್ ಸಮ್ಜೊಂಕ್ ನಾತ್ಲ್ಲಿ.
ಮಾಂಯ್ನ್ ಮ್ಹಾಕಾ ಪರಾತ್ ಕಾಜಾರ್ ಜಾ ಮ್ಹಳ್ಳ್ಯಾ ಉತ್ರಾಕ್, ಹಾಂವೆಂ ತೆಂ ಉತಾರ್ ಪಾಳ್ಳೆನಾ. ತಿಚಾ ಸುಃಖಾ ದುಃಖಾಂತ್ ತಿಚೊ ಅಧಾರ್ ಜಾವ್ನ್ ತಿಚೆಸಂಗಿಂ ತಿಚಿಚ್ ಚಾಕ್ರಿ ಕರುನ್ ಉರ್ಲೊಂ. ಆನಿ ಜೆದ್ನಾಂ, ಬಾಬ್ ಸರ್ಲೊ, ತೆದ್ನಾಂ ಮಾಂಯ್ಕ್ ತಿ ದೂಕ್ ಕಿತೆಂ ಮ್ಹಣ್ ಕಳ್ಲ್ಲೆಂ. ತಿಕಾ ಜಾಂವ್ಚೆ ಕಷ್ಟ್, ತಿಕಾ ಭಗ್ಚೆಂ ಉಣೆ ಪಣ್ ತಿಚೆರ್ ಝುಲುಮ್ ಚಲೈತಾನಾ ತಿಚೆ ದೊಳೆ ಉಘಡ್ಲ್ಲೆ ಆನಿ ತಿಕಾ ಮ್ಹಜಿ ದೂಕ್ ಕಳ್ಲ್ಲಿ.
.....ಪೂಣ್ ವೇಳ್ ಉತ್ರಾಲ್ಲೊ. ಸಭಾರ್ ವರ್ಸಾಂ ಪಾಶಾರ್ ಜಾಂವ್ಚೆಂ ಸಂಗಿಂ ಹಾಂವ್ಯಿ ಪ್ರಾಯೆಸ್ತ್ ಜಾಲ್ಲೊಂ. ಮತಿಂತ್ಲ್ಯೆ ಕರಾಂದಾಯೆಸಂಗಿಂ, ಪ್ರಾಯ್ ಉತರ್ತಾನಾ, ಖಾಡ್ ಪಿಕೊನ್ ಮೊಟಾಯ್ ಯೇವ್ನ್, ಕೇಸ್ ಝಡೊನ್, ದೊಳ್ಯಾಂಕ್ ವೊಕ್ಲ್ ಚಡೊನ್, ಮ್ಹಜೆಂ ರೂಪ್ಚ್ ವಿಂಗಡ್ ಜಾಲ್ಲೆಂ.
ಮಾಂಯ್ಕ್ ಕಾಳ್ಜಾ ಪಿಡಾ ಸುರು ಜಾಲ್ಲಿ. ತಿಕಾ ಘೆವ್ನ್ ಹಾಂವ್ ಬೊಂಬೈಂತ್ಲ್ಯಾ ಸಭಾರ್ Cardiac (ಕಾಳ್ಜಾಚಿ ಚಿಕಿತ್ಸಾ) ಆಸ್ಪತ್ರೆಕ್ ಪಾವ್ಲೊಂ. ಒಪ್ರೇಶೆನ್ ಕೆಲ್ಯಾರ್ ಮಾತ್ರ್ ತಿಣೆ ವಾಂಚೊ ಭರ್ವೊಸೊ ಆಸ್ಲ್ಲೊ; ಪೂಣ್ ತಿಚೆ ಪ್ರಾಯೆಕ್ ಲಾಗೊನ್, ಖಂಚಿಯ್ ಆಸ್ಪತ್ರ್ ತಿಚೆಂ ಒಪ್ರೇಶೆನ್ ಕರುಂಕ್ ತಯಾರ್ ಜಾಲ್ಯಾರ್ಯೀ ವಾಂಚಾತ್ ಮ್ಹಳ್ಳಿ ಖಾತ್ರಿ ದೀನಾ ಜಾಲಿ.
ಅಸಲ್ಯೆ ಪರಿಸ್ಥಿತೆರ್ ಮ್ಹಜೆಲಾಗಿಂ ಏಕ್ಚ್ ವಾಟ್ ಆಸ್ಲ್ಲಿ, ಮಾಂಯ್ಕ್ ‘Save Your Heart’’ ಮ್ಹಳ್ಳ್ಯೆ ಆಸ್ಪತ್ರೆಕ್ ವರ್ಚಿ. ಪೂಣ್ ತಿ ಆಸ್ಪತ್ರ್ ಬೋವ್ ವ್ಹಡ್ ಆನಿ ಮಸ್ತು ಮಾರೊಗ್ ಜಾವ್ನಾಸ್ಲ್ಲ್ಯಾನ್ ಸ್ವಾಭಾವೀಕ್ ಪುಣಿ ಹಾಂವ್ ಖಂತಿಷ್ಟ್ ಜಾಲ್ಲೊಂ.
ವ್ಹಯ್, ಆತಾಂ ಆಮಿ ತಿತ್ಲಿಂ ಗ್ರೇಸ್ತಾಂ ನ್ಹಂಯ್. ಒಪ್ರೇಶೆನಾಕ್ ಲಾಖಾಂನಿ ಖರ್ಸುಂಕ್ ಆಮ್ಚೆ ಲಾಗಿಂ ತಾಂಕ್ ನಾತ್ಲ್ಲಿ. ಪೂಣ್ ಮಾಂಯ್ಕ್ ವಾಂಚಂವ್ಕ್ ಜಾಯ್ ಮ್ಹಳ್ಳ್ಯೆ ಮ್ಹಜೆ ಆಶೆನ್, ಆಮ್ಚೆಂ ಘರ್ ವಿಕೊನ್ಂಚ್ ತೆಂ ಒಪ್ರೇಶೆನ್ ಸಾಧ್ಯ್ ಆಸ್ಲ್ಲೆಂ.
ಹಾಂವೆಂ ಮಾಂಯ್ಕ್ ತ್ಯೆ ಆಸ್ಪತ್ರೆಕ್ ಭರ್ತಿ ಕೆಲ್ಲೆಂ. ಘರ್ ವಿಕೊನ್ ಪಯ್ಶೆ ಫಾರಿಕ್ ಕರ್ತಾಂ ಮ್ಹಣ್ ಸಾಂಗೊನ್ ಹಾಂವೆಂ ರೀಣ್ ಕಾಡುನ್ ಮ್ಹಜೆಂ ಆವಯ್ಚೆಂ ಒಪ್ರೇಶೆನ್ ಕರಯಿಲ್ಲೆಂ.
“ತುಜ್ಯಾ ಆವಯ್ಚೆಂ ಒಪ್ರೇಶೆನ್ ‘ಸಕ್ಸೆಸ್’ ಜಾಲಾಂ. ತಿ ಆನಿಕೀ ಸುಮಾರ್ ವರ್ಸಾಂ ಜಿಯೆತೆಲಿ....."”I.C.U-ಂತ್ಲ್ಯಾ ದಾಕ್ತೆರಾನ್ ಮ್ಹಜಿ ಪಾಟ್ ಥಾಪ್ಡುನ್ ಸಾಂಗ್ತಾನಾ, ಹಾಂವ್ ಚಿಂತ್ನಾಂತ್ಲೊಂ ಪಾಟಿಂ ಪರ್ತಾಲೊಂ.
“ಮಸ್ತು ಥೇಂಕ್ಸ್ ಡೊಕ್ಟರ್....."”ಹಾಂವ್ ಸಂತೊಸಾನ್ ದಾಕ್ತೆರಾಕ್ ಸಾಂಗೊನ್ ಮಾಂಯ್ಕ್ ಪಳೆಲಾಗ್ಲೊಂ.
ತಿಚಾ ದೊಳ್ಯಾಂತ್ ದುಃಖಾಂ ಆಸ್ಲ್ಲಿಂ.
ಸೊಂತೊಸಾಚಿಂ ದುಃಖಾಂ.....?
“ತುಂ ರಡ್ತಾಯ್ ಮಾಂಯ್.....? ತುಜ್ಯಾ ಜಿವಾಕ್ ಆನಿ ಬಾದಕ್ ನಾ. ತುಂ ಬರಿ ಜಾಲಿಯ್...." ಹಾಂವೆಂ ಮಾಂಯ್ಕ್ ಸಾಂಗ್ಲೆಂ.
ತಿ ಉಲೊಂಕ್ ಸಕಾನಾತ್ಲ್ಲಿ; ಪೂಣ್ ತಿಚಾ ದೊಳ್ಯಾಂನಿ ಜಾಯ್ತೆಂ ಉಲೊವ್ಪ್ ಸಾಂಗೊಂಕ್ ಆಸಾ ಮ್ಹಣ್ ಕಳ್ತಾಲೆಂ. ದುಃಖಾಂನಿ ಬಿಜ್ಲ್ಲೆಂ ದೊಳೆ ತಿಣೆ ಧಾಂಪ್ಲೆ.
ಹಾಂವ್ ತಿಕಾ ಸೊಡುನ್ I.C.U-ಂತ್ಲೊ ಭಾಯ್ರ್ ಆಯ್ಲೊಂ.
ಪಾಂಚ್ ದಿಸಾಂನಿ ಮಾಂಯ್ಕ್ ಘರಾ ವರುಂಕ್ ಪರ್ವಣ್ಗಿ ಮೆಳ್ತಾನಾ, ಹಾಂವೆಂ ತಿಕಾ ಘರಾ ಹಾಡ್ಲೆಂ.
4,70,815 ರುಪಯ್ (ಚಾರ್ ಲಾಕ್ ಸತ್ತರ್ ಹಜಾರ್ ಆಟ್ಶಿಂ ಪಂದ್ರಾ) ಹಾಂವೆಂ ಆಸ್ಪತ್ರೆಚೆಂ ಬಿಲ್ಲ್ ಫಾರಿಕ್ ಕೆಲ್ಲೆಂ. ಆತಾಂ ಕೂಡ್ಲೆಚ್ ಘರ್ ವಿಕೊನ್, ರೀಣ್ ಫಾರಿಕ್ ಕರುನ್ ಆಮಿ ಪಯ್ಸ್ ಸವಾಯೆನ್ ಮೆಳ್ಚ್ಯಾ ಘರಾಕ್ ಸೊಧುನ್ ರಾವೊಂಕ್ ಆಸ್ಲ್ಲೆಂ. ಹ್ಯಾ ವಿಶಿಂ ಹಾಂವ್ ಬೆಜಾರಾಯೆನ್ ಚಿಂತುನ್ ಆಸ್ತಾನಾ, ದಾರಾಚಿ ಕೋಲ್ ಬೆಲ್ಲ್ ಆಯ್ಲಿ.
ದಾರ್ ಉಘಡ್ತಾನಾ, ಮ್ಹಜಾ ನಾಂವಾಂರ್ ಆಯಿಲ್ಲೆಂ Courier (ತಪ್ಪಲ್) ಹಾಂವೆಂ ದಸ್ಕತ್ ಕರುನ್ ಘೆತ್ಲೆಂ. ಲೊಕಾಟ್ಯಾಚಾ ಪಾಟ್ಲ್ಯಾನ್ ‘Save Your Heart’ ಆಪತ್ರೆಚೆಂ ನಾಂವ್ ಆಸ್ಲ್ಲೆಂ.
ಹಾಂವೆಂ ಕೊಪಾಲಾರ್ ಮಿರಿಯೊ ಘಾಲುನ್ ಲೊಕಾಟೊ ಫೊಡ್ಲೊ.
ಬಿತರ್, 4,70,815 ರುಪ್ಯಾಂಚಿ ಚೆಕ್ಕ್ ಆಸ್ಲ್ಲಿ! ಸಾಂಗಾತಚ್ ಏಕ್ ಲಾನ್ಸೊ ನೋಟ್ ಬರವ್ನ್ ಆಸ್ಲ್ಲೊ, ‘ಆಸ್ಪತ್ರೆನ್ ತುಜೆ ಪಯ್ಶೆ ಪಾಟಿಂ ಕೆಲ್ಯಾತ್; ತುಜ್ಯಾ ಆವಯ್ಕ್ ಆಸ್ಪತ್ರ್ ಬರಿ ಬಲೈಕಿ ಮಾಗ್ತಾ’
ಹಾಂವ್ ಅಜಾಪ್ ಜಾಲೊಂ!
ಹಾಂವೆಂ ಮಾಂಯ್ಕ್ ಹಿ ಗಜಾಲ್ ಸಾಂಗ್ಲಿ.
ತೆದ್ನಾಂ ತಿಚಾ ದೊಳ್ಯಾಂನಿ ಪರಾತ್ ಹಾಂವೆಂ ದುಃಖಾಂ ಪಳೆಲಿಂ.
“ಹೆಂ ಕಿತೆಂ ಮಾಂಯ್, ತುಜ್ಯಾ ದೊಳ್ಯಾಂನಿ ದುಃಖಾಂ.....? ಹ್ಯಾ ವಿಶಿಂ ತುಂ ಕಿತೆಂ ಜಾಣಾಂಯ್ ಮಾಂಯ್.....?" ಭೋವ್ಶಾ ಮಾಂಯ್ ಕಾಂಯ್ ತರೀ ಜಾಣಾ ಮ್ಹಳ್ಳೊ ಅಂದಾಜ್ ಲಾವ್ನ್ ಹಾಂವೆಂ ತಿಕಾ ವಿಚಾರ್ಲೆಂ.
“ಮ್ಹಜೆಂ ಒಪ್ರೇಶೆನ್ ಸುಚಿತ್ರಾನ್ ಕೆಲ್ಲೆಂ ಪುತಾ.....” ಮಾಂಯ್ ಕಷ್ಟಾಂನಿ ಮ್ಹಣಾಲಿ.
“ಸುಚಿತ್ರಾ.....!!!???" ಹಾಂವ್ ಉಡೊನ್ ಪಡ್ಲೊಂ. “ಹೆಂ ಕಶೆಂ ಸಾಧ್ಯ್ ಮಾಂಯ್? ತುಜೆಂ ಒಪ್ರೇಶೆನ್ ಡೊ. ಸಕ್ಸೆನಾ ಕರ್ತಾ ಮ್ಹಣ್ ಹಾಂವೆಂ ಆಯ್ಕಾಲ್ಲೆಂ....." ಹಾಂವೆಂ ಮಾಂಯ್ಕ್ ಸಾಂಗ್ಲೆಂ.
“ವ್ಹಯ್ ಪುತಾ, ಡೊ. ಸಕ್ಸೆನಾ ಮ್ಹಳ್ಳ್ಯಾ ನಾಂವಾನ್ಂಚ್ ತಾಕಾ ವಳ್ಕಾತಾತ್. ತೆಂ ಥಂಯ್ಚರ್ ಬೋವ್ ವ್ಹಡ್ Cardiac surgeon (ಕಾಳ್ಜಾಚೆರ್ ಶಾಸ್ತ್ರ್ ಕ್ರೀಯ ಕರ್ಚಿ ದಾಕ್ತೆರ್ನ್) ಜಾವ್ನಾಸಾ. Anaesthesiologist (ಮೋತ್ ಚುಕಂವ್ಚೊ ದಾಕ್ತೆರ್) ಮ್ಹಜಿ ಮೋತ್ ಚುಕೈತಾನಾ, ಸುಚಿತ್ರಾ ಥಂಯ್ಚರ್ ಹಾಜರ್ ಆಸ್ಲ್ಲೆಂ.....
“ಹಾಂವ್ ತಾಕಾ ತಕ್ಷಣಾ ವಳ್ಕಾಲಿಂ. ತಾಕಾ ಪ್ರತ್ಯಕ್ಶ್ ಪಳಂವ್ಕ್ ಹಾಂವೆಂ ನಾತ್ಲ್ಲೆಂ ತರೀ, ತಾಚಿ ತಸ್ವೀರ್ ತುಂವೆಂ ತುಜ್ಯಾ ಹರ್ದ್ಯಾಕ್ ಧರುನ್ ಮ್ಹಜೆ ದೊಳೆ ಚುಕೊನ್ ರಡ್ಚೆಂ ಹಾಂವೆಂ ಮೊಸ್ತು ಪಾವ್ಟಿಂ ಪಳಯ್ಲಾಂ. ತೆಂ ಮ್ಹಾಕಾ ಪಳವ್ನ್ ಬಾರಿ ಮೊಗಾನ್ ಮ್ಹಣಾಲೆಂ- ‘ಆಂಟಿ, ಕಾಂಯ್ ಭಿಯೆನಾಕಾ, ತುಜೆಂ ಒಪ್ರೇಶೆನ್ ಬರ್ಯಾ ಥರಾನ್ ಜಾವ್ನ್ ತುಂ ವೆಗ್ಗಿಂಚ್ ಘರಾ ವೆತಲಿಯಿ"
“ಹಾಂವ್ ತಾಕಾ ವಳ್ಕಾಲ್ಯಾಂ ಮ್ಹಣ್ ಭೋವ್ಶಾ ತೆಂ ನೆಣಾ ಜಾಂವ್ಕ್ ಪುರೊ. ಪುಣ್ ಹಾಂವ್ ಕೋಣ್ ಮ್ಹಣ್ ತೆಂ ಖಂಡಿತ್ ಜಾಣಾ ಜಾಲ್ಲೆಂ ಪುತಾ....."
ಆಯ್ಕೊನ್ ಹಾಂವ್ ಆಜಾಪ್ ಪಾವ್ಲೊಂ! ಮನ್ಶ್ಯಾಚೆಂ ಮೋಲ್ ಕೊಣೆಂಚ್ ಬಾಂಧುಂಕ್ ಜಾಯ್ನಾಂ ಮ್ಹಳ್ಳೆಂ ಖರೆಂ ಜಾಲ್ಲೆಂ. ಮನಿಸ್ ಗರೀಬ್ ಆನಿ ಝೊಪ್ಡ್ಯಾಂತ್ ರಾವ್ಲ್ಯಾರ್ಯಿ ಫಾಲ್ಯಾಂ ತೊ ಖಂಯ್ ಪಾವಾತ್ ಮ್ಹಳ್ಳೆಂ ಕೊಣೆಂಯ್ ಸಾಂಗೊಂಕ್ ಸಾಧ್ಯ್ ನಾತ್ಲ್ಲೆಂ.
ಮ್ಹಜಾ ಮಾಂಯ್ನ್ ಸುಚಿತ್ರಾ ಗರೀಬ್ ಮ್ಹಳ್ಳ್ಯಾ ಲ್ಹಾನ್ ಚಿಂತ್ಪಾನ್ ತಾಕಾ ಮ್ಹಜ್ಯೆ ಜಿಣ್ಯೆಂತ್ಲೆಂ ಪಯ್ಸ್ ಕೆಲ್ಲೆಂ, ಪುಣ್ ಆಜ್ ತೆಂ ಆಮ್ಚೆ ಪ್ರಾಸ್ ಮಸ್ತು ವಯ್ರ್ ವಚುನ್, ಆಮಿ ತಾಚೆ ಪ್ರಾಸ್ ಮಸ್ತು ಲ್ಹಾನ್ ಜಾವ್ನ್ ಉರ್ಲ್ಲ್ಯಾಂವ್.
ವ್ಹಯ್, ಶಿಕ್ಪಾಂತ್ ಹುಶ್ಯಾರ್ ಆಸ್ಲ್ಲ್ಯಾ ಸುಚಿತ್ರಾಕ್ ಸರ್ಕಾರಾಚಾ ಖರ್ಚಾನ್ ದಾಕ್ತೆರ್ಗಿ ಶಿಕ್ಚೆಂ ನಶೀಬ್ ಫಾವೊ ಜಾಲ್ಲೆಂ. ಆಪ್ಲ್ಯಾ ಸ್ವತಾಚಾ ಮ್ಹಿನತಿನ್ ತೆಂ ಬೋವ್ ವ್ಹಡ್ ದಾಕ್ತೆರ್ನ್ ಜಾಲ್ಲೆಂ.
‘Save Your Heart’ ಆಸ್ಪತ್ರೆಚೊ ಧನಿ ಬೋವ್ ವ್ಹಡ್ Cardiac Specialist (ಕಾಳ್ಜಾ ಪಿಡೆಚೊ ಖಾಸ್ ದಾಕ್ತೆರ್ ಜಾವ್ನಾಸ್ಲ್ಲೊ ಆನಿ ತಾಚೊ ಪುತ್ ವಿಜಯ್ ಸಕ್ಸೆನಾ ಮೆಡಿಕಲ್ ಕೊಲೆಜಿಂತ್ ಶಿಕ್ತಾನಾ, ಸುಚಿತ್ರಾಕ್ ವಳ್ಕಾತಾಲೊ ಆನಿ ತಾಣೆಂಚ್ ಜಾವ್ನ್ ಸುಚಿತ್ರಾಕ್ ಕಾಜಾರಾಚಿ ಸೈರಿಕ್ ಧಾಡ್ತಾನಾ, ಮೊಗಾಚ್ಯೆ ಜಿಣ್ಯೆಂತ್ ಸಲ್ವಾಲ್ಲೆಂ ಸುಚಿತ್ರಾ, ವಿಜಯಾ ಕಡೆನ್ ಕಾಜಾರ್ ಜಾಲ್ಲೆಂ.
ಆಜ್ ಸುಚಿತ್ರಾ ತ್ಯಾ ಬೋವ್ ವ್ಹಡ್ ಆಸ್ಪತ್ರೆಚಿ ಸಮಾಸಮ್ ಹಕ್ಕಾಚಿ ಧನಿನ್ ಜಾವ್ನಾಸ್ಲ್ಲೆಂ!
ಸುಚಿತ್ರಾನ್ ಮ್ಹಜಾ ಮಾಂಯ್ಕ್ ನವೆಂ ಜೀವನ್ ದಿಲ್ಲೆಂ ಆನಿ ಖಂಚಾಯ್ ಅರ್ಥಾರ್ ತೆ ಪಯ್ಶೆ ಹಾಂವೆಂ ಪಾಟಿಂ ಘೆಂವ್ಕ್ ಸಾಧ್ಯ್ ನಾತ್ಲ್ಲೆಂ.
ಹಾಂವ್ ತಿ ಚೆಕ್ಕ್ ಘೆವ್ನ್ ರಿಕ್ಷಾರ್ ತಕ್ಷಣಾ ತ್ಯೆ ಆಸ್ಪತ್ರೆಕ್ ಗೆಲೊಂ. ಸುಚಿತ್ರಾ ಕಡೆನ್ ಮಾಫಿ ಮಾಗೊನ್, ಹಾಂವೆಂ ತಾಚೆ ಥಂಯ್ ಕೆಲ್ಲ್ಯಾ ಭಗ್ಸುಂಕ್ ನಜೊ ತಸಲ್ಯಾ ಗುನ್ಯಾವಾಚೆಂ ಭಗ್ಸಾಣೆ ಮಾಗೊನ್ ತಿ ಚೆಕ್ಕ್ ಪಾಟಿಂ ದೀಂವ್ಕ್.
ವಿಚಾರಣ್ ಕರ್ಚ್ಯಾ ಜಾಗ್ಯಾರ್ ವಚುನ್, ಹಾಂವೆಂ ಡೊ. ಸುಚಿತ್ರಾಕ್ ವಿಚಾರ್ತಾನಾ, ತೊ ಮನಿಸ್ ಮ್ಹಾಕಾ ವಯ್ರ್ ಸಕೈಲ್ ಪಳವ್ನ್, “ಡೊ. ಮೆಡಮ್ ಸಕ್ಸೆನಾ?" ಮ್ಹಣ್ ವಿಚಾರಿಲಾಗ್ಲೊ.
ಹಾಂವೆಂ ವೆಗ್ಗಿಂ ವ್ಹಯ್ ಮ್ಹಳೆಂ.
“ಸರ್, ತಿ ದಾಕ್ತೆರ್ನ್ ಆಜ್ ಸಾಂಜೆಚಾ ಪ್ಲಾಯ್ಟಾರ್ ಆಪ್ಲ್ಯಾ ಡೊಕ್ಟರ್ ಘೊವ್, ವಿಜಯಾಸಂಗಿಂ ಲಂಡನ್ ವೆಚಾರ್ ಆಸಾ, ಎಕಾ ಅರ್ಜಂಟ್ ಮಿಟಿಂಗಾಕ್ ಎಟೆಂಡ್ ಕರುಂಕ್. ತಿ ಆತ್ತಾಂಚ್ ಆಸ್ಪತ್ರೆಚಾ ಭಾಯ್ರ್ ಗೆಲ್ಯಾ. ಜರ್ತರ್ ತುಮಿ ಕೂಡ್ಲೆ ಭಾಯ್ರ್ ಗೆಲ್ಯಾರ್ ತುಮ್ಚಿ ಮುಲಾಕಾತ್ ಜಾಂವ್ಕ್ ಸಾಧ್ಯ್ ಆಸಾ".
“ಥೆಂಕ್ಯೂ ವೆರಿಮಚ್....." ತಾಕಾ ಮ್ಹಣೊನ್ ಹಾಂವ್ ಆಸ್ಪತ್ರೆಚಾ ಭಾಯ್ರ್ ಧಾಂವ್ಲೊಂ.
ಭಾಯ್ರ್ ಪಾವ್ತಾನಾಂಚ್ ಹಾಂವೆಂ ಪಳೆಲೆಂ, ಎಕಾ ಬೋವ್ ಮಾರೊಗ್ ನವ್ಯಾ ದೊವ್ಯಾಚ್ ಮಾರ್ಸಿಡೀಸ್ ಕಾರಾ ತೆವ್ಶಿನ್ ಏಕ್ ಬಾರಿಕ್ಶಿ ಆಕರ್ಶಿತ್ ಸ್ತ್ರೀ ಮೆಟಾಂ ಕಾಡ್ತಾಲಿ. ಯುನಿಫೊರ್ಮಾರ್ ಆಸ್ಲ್ಲ್ಯಾ ಡ್ರಾವರಾನ್, ತಿಕಾ ಸೆಲ್ಯೂಟ್ ಮಾರುನ್ ದಾರ್ ಉಘಡ್ಲೆಂ. ತಿ ಭಿತರ್ ಸರ್ತಾನಾ, ಹಾಂವ್ ಲಾಗ್ಗಿಂ ಪಾವ್ಲ್ಲೊಂ.
ತಿಚಿ ದೀಶ್ಟ್ ಮ್ಹಜೆರ್ ಪಡ್ಲಿ!
ವ್ಹಯ್ ತೆಂ ಹಾಂವೆಂ ಮೋಗ್ ಕೆಲ್ಲೆಂ ಸುಚಿತ್ರಾಚ್ ಜಾವ್ನಾಸ್ಲ್ಲೆಂ!!!
ಮ್ಹಜಾ ಹಾತಾಂತ್ ಚೆಕ್ಕ್ ಆಸ್ಲ್ಲಿ ತಾಣೆ ಪಳೈಲಿ. ತಾಚಾ ತೊಂಡಾರ್ ಶೂನ್ಯತಾ ಆಸ್ಲ್ಲಿ. ಮ್ಹಜೆರ್ ಆಸ್ಲ್ಲಿ ದೀಶ್ಟ್ ಬದ್ಲುನ್-
“ಲೆಟ್ಸ್ ಗೊ ಡ್ರಾವರ್....." ತೆಂ ಡ್ರಾಯ್ವರಾಕ್ ಸಾಂಗಾಲಾಗ್ಲೆಂ.
ಕಾರ್ ತಕ್ಷಣಾ ಫುಡೆಂ ಸರ್ಲೆಂ.
ಹಾಂವ್ ಮಿಟಾ ಖಾಂಭ್ಯಾ ಪರಿಂ ಥಂಯ್ಚ್ ಉಭೊ ರಾವುನ್ ವೆಚಾ ಸುಚಿತ್ರಾಚಾ ಕಾರಾಕ್ ಪಳವ್ನ್ ರಾವ್ಲೊಂ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
