ಖುರ್ಸಾ ಗುಡ್ಯಾರ್

ಕಥಾದಾಯ್ಜ್ - 6

Play the video

Watch on YouTube

ಖುರ್ಸಾ ಗುಡ್ಯಾರ್

ನಾಂವ್ : ಸಿರಿಲ್ ಗ್ರೆಗೊರಿ ಸಿಕ್ವೇರಾ

ಲಿಖ್ಣೆ ನಾಂವಾಂ : ಸಿ.ಜಿ.ಭಿರಾವ್‌ಕಾರ್, ಸಿರಿಲ್ ಭಿರಾವ್‌ಕಾರ್, ಸಿ.ಜಿ.ಪ್ರಭು, ಸಿಜ್ಯೆಸ್ ತಾಕೊಡೆ.

ಜನನ್ : 08 ಮಾರ್ಚ್ 1951.

ಜಲ್ಮಾಲ್ಲೊ ಗಾಂವ್ : ತಾಕೊಡೆ.

ಪತಿಣೆಚೆಂ ನಾಂವ್ : ಸಿಲ್ವಿಯಾ ಸಿಕ್ವೇರಾ.

ಇಮೇಯ್ಲ್ : sequeiracg@hotmail.com 

ಸಿಜ್ಯೆಸ್, ತಾಕೊಡೆ

ವಳೊಕ್:

ಆಪ್ಣಾಯಿಲ್ಲಿಂ ಇನಾಮಾಂ/ಪ್ರಶಸ್ತ್ಯೊ ;

’ದುಕಾಂ’ ಬುಕಾಕ್ 1977 ಇಸ್ವೆಂತ್, ಗೊಯ್ಚಿ ಕೊಂಕಣ್ ಭಾಶಾ ಮಂಡಳಿ ಥಾವ್ನ್ ಪ್ರಶಸ್ತಿ.

’ಪಿತುಳ್’ ಬುಕಾಕ್ 1981 ಇಸ್ವೆಂತ್, ಗೊಯ್ಚಿ ಕೊಂಕಣ್ ಭಾಶಾ ಮಂಡಳಿ ಥಾವ್ನ್ ಪ್ರಶಸ್ತಿ.

’ದಾಯ್ಜಿ ದುಭಾಯ್ ಸಾಹಿತ್ಯ್ ಪುರಸ್ಕಾರ್ 2000 ಇಸ್ವೆಂತ್’

ಸಾಹಿತಿಕ್ ಸುರ್‍ವಾತ್ : (1963 ಇಸ್ವೆಂತ್) ’ವಿಶಾಲ್ ಕೊಂಕಣ್’ ಪತ್ರಾರ್ ದೆ|ಚಾ.ಫ಼್ರಾ.ದೆ’ಕೋಸ್ತಾಚಾ ಸಂಪಾದಕ್ಪಣಾಖಾಲ್ ’ಸಿರಿಲ್ ಭಿರಾವ್‌ಕಾರ್’ ಮ್ಹಳ್ಳೆ ನಾಂವಾರ್ ಪಯ್ಲೆಂ ಕವಿತಾ ಪರ್ಗಟ್ ಜಾಲೆಂ.

ಆಟ್ವ್ಯೆ ಕ್ಲಾಶೆಂತ್ ಶಿಕೊನಾಸ್ತಾನಾ ಪಯ್ಲೊ ವಿನೋದ್ ’ಮಿಲ್ಯಾಣಾಮ್ಯೆನ್ ಮೆಲ್ಲೆಂ ಪಳೆಲೆಂ’ ರಾಕ್ಣೊಚೆರ್ ತವಳ್ಚಾ ಸಂಪಾದಕಾನ್ ಮಾ|ಬಾಪ್ ಅಲೆಕ್ಸಾಂಡರ್ ಸೊಜಾನ್ ಪರ್ಗಟ್ ಕೆಲೆಂ.

ಸಾಹಿತಿಕ್ ವಾವ್ರ್ :

’ತಾಕೊಡೆಚೆಂ ನೆಕೆತ್ರ್’ ಮ್ಹಳ್ಳ್ಯಾ ಫಿರ್ಗಜೆಚಾ ಹಾತ್‌ಪತ್ರಾಚೊ ಸಂಪಾದಕ್ ಜಾವ್ನ್ ಸುರ್‍ವಾತ್. ಸೊಭಿತ್ ಹಾತ್ ಬರ್ಪಾರ್‌ಚ್ ಪರ್ಗಟ್ ಜಾಲ್ಲ್ಯಾ ಹ್ಯಾ ಪತ್ರಾರ್ ತಾಕೊಡೆ ಫಿರ್ಗಜೆಚಾ ಉರ್ಬೆವಂತ್ ಯುವಜಣಾಂಚಾ ಬರ್ಪಾಂಕ್ ಗುಂತುನ್ ಯೆಂವ್ಚೆಂ ಹೆಂ ವರ್ಸಾಳೆಂ ಫಿರ್ಗಜ್ ಪತ್ರ್ ಥೊಡಿಂ ವರ್ಸಾಂ ಚಲ್ಲೆಂ.

’ಕಾಣಿಕ್’ ಪತ್ರಾಚೊ ಸಂಪಾದಕ್ ಜಾವ್ನ್ ವಾವ್ರ್.

’ಉಮಾಳೊ’ ಪತ್ರಾಚೊ ಸಂಪಾದಕ್ ಜಾವ್ನ್ ವಾವ್ರ್.

’ರಾಕ್ಣೊ’ ಪತ್ರಾಚೊ ಸಹ-ಸಂಪಾದಕ್ ಜಾವ್ನ್ ವಾವ್ರ್.

ಸಂಪಾದನ್ ಕೆಲ್ಲೆ ಹೆರ್ ಬೂಕ್ :

’ರವಿ ಆನಿ ಕವಿ’ 1978 ಇಸ್ವೆಂತ್.

’ಉಲೊ ಆನಿ ಝೆಲೊ’ 1978 ಇಸ್ವೆಂತ್.

’ಪಾಂಚ್ ಪಾಕ್ಳ್ಯೊ’ 1984 ಇಸ್ವೆಂತ್.

’ಸಾತ್ ಸಾಳ್ಕಾಂ’

ಬುಕಾರುಪಾಚೆಂ ಸಾಹಿತ್ಯ್ (ನೀಳ್ಗಥಾ/ಕಾದಂಬರಿ):

’ಪತ್ತೇದಾರಾಚೆಂ ಸಾಹಸ್’ (1967 ಇಸ್ವೆಂತ್) ರೈಮಂದ್ ಮಿರಾಂದಾನ್ ಪರ್ಗಟ್ಲೊ (ಕೊಂಕ್ಣಿ ಸಾಹಿತ್ಯ್ ಪ್ರಕಾಶನ್).

’ಖುನ್‌ಯೆಗಾರಾಚಿ ಖುನ್’ - 1970 ಇಸ್ವೆಂತ್ ಜೊ.ಸಾ.ಅಲ್ವಾರಿಸಾನ್ ಪರ್ಗಟ್ಲೊ (ಕೊಂಕ್ಣಿ ಸ್ವತಂತ್ರ್ ಪ್ರಕಾಶನ್).

’ಸಿಸ್ಟರ್ ಶೋಭಾ’ (ಸಹಾಯಕ್ - ಹೆರೊಲ್ಪಿಯುಸ್) - 1986 ಇಸ್ವೆಂತ್ (ಸಾಳಕ್ ಪ್ರಕಾಶನ್)

ಮಟ್ವ್ಯಾ ಕಾಣ್ಯಾಂಚೊ ಜಮೊ : ’ದುಕಾಂ’ (ಮಟ್ವ್ಯಾ ಕಾಣ್ಯಾಂಚೊ ಜಮೊ) 1978 ಇಸ್ವೆಂತ್ (ರಾಕ್ಣೊ ಪ್ರಕಾಶನ್)

ಕವಿತಾಂ ಜಮೊ : ’ಇಜ್ಮೊಲಾಚಿ ವಾಟ್ಲಿ’ (ಕವಿತಾ ಪುಂಜೊ) - 1995 ಇಸ್ವೆಂತ್ (ರಾಕ್ಣೊ ಪ್ರಕಾಶನ್)

ಹಾಸ್ಯ್ ಬರ್ಪಾಂಚೊ ಜಮೊ :

’ಫುಗೆಟ್ಯೊ’ - 1979 ಇಸ್ವೆಂತ್ (ಪುನವ್ ಪ್ರಕಾಶನ್)

’ಪೊಕಣಾಂ’ - 1980 ಇಸ್ವೆಂತ್ (ಪುನವ್ ಪ್ರಕಾಶನ್)

’ಗ್ರಹಚಾರ್’ - 1981 ಇಸ್ವೆಂತ್ (ಸಂದೇಶ್ ಪ್ರಕಾಶನ್)

’ಸುರ್‍ಸುರ್‍ಯೊ’ - 1982 ಇಸ್ವೆಂತ್ (ವಿಜಯ್ ಪ್ರಕಾಶನ್)

’ಕುಚಿಲ್ಯೊ’ - 1984 ಇಸ್ವೆಂತ್ (ಗುಲೊಬ್ ಪ್ರಕಾಶನ್)

’ಮಸ್ಕಿರ್‍ಯೊ’ - 1987 ಇಸ್ವೆಂತ್ (ರಾಕ್ಣೊ ಪ್ರಕಾಶನ್)

’ಚಿರ್‌ಮುಲ್ಯೊ’ - 1995 ಇಸ್ವೆಂತ್(ರಾಕ್ಣೊ ಪ್ರಕಾಶನ್)

’ಹಾಯ್ ಹಾಯ್ ದುಭಾಯ್’ - 2004 ಇಸ್ವೆಂತ್ (ವಿಜೇತ ಪ್ರಕಾಶನ್)

ಧಾರ್‍ಮಿಕ್ ಪುಸ್ತಕಾಂ :

’ಇಂಡಿಯಾಚೊ ಅಪೊಸ್ತಲ್’ 1972 ಇಸ್ವೆಂತ್ (ಸಾಂ|ತೊಮಸಾಚಾ ಜಿಣ್ಯೆಚರಿತ್ರಾ).

’ಆಧುನಿಕ್ ಖುರ್ಸಾವಾಟ್’ 1974 ಇಸ್ವೆಂತ್.

’ಪಿಡೆಸ್ತಾಂಚಿ ಖುರ್ಸಾವಾಟ್’ 1976 ಇಸ್ವೆಂತ್.

ನಾಟಕ್ :

’ಚಾರ್ ದಿಸಾಂಚೊ ಸಂಸಾರ್’ - 1975 ಇಸ್ವೆಂತ್ ಬರಯಿಲ್ಲೊ.

’ಹಾಸ್ಚೆಂಗಿ ರಡ್ಚೆಂ’ - 1976 ಇಸ್ವೆಂತ್ ಬರಯಿಲ್ಲೊ.

’ಗೊಂಗೊ’ - 1976 ಇಸ್ವೆಂತ್ ಬರಯಿಲ್ಲೊ.

’ಪಿತುಳ್’ - 1978 ಇಸ್ವೆಂತ್ ಬರಯಿಲ್ಲೊ.

’ಭಾಡ್ಯಾಚಿ ಬಾಯ್ಲ್’ - 1977 ಇಸ್ವೆಂತ್ ಬರಯಿಲ್ಲೊ.

’ರಾನ್ ದುಕೊರ್’ - 1979 ಇಸ್ವೆಂತ್ ಬರಯಿಲ್ಲೊ.

’ಎಕ್ಲೆಂ ಎಕ್ಸುರೆಂ’ - 1979 ಇಸ್ವೆಂತ್ ಬರಯಿಲ್ಲೊ.

’ಜಿರ್ಗಿ ಮಿರ್ಸಾಂಗ್’ - 1976 ಇಸ್ವೆಂತ್ ಬರಯಿಲ್ಲೊ.

’ಡಯಾನಾ’ - 1981 ಇಸ್ವೆಂತ್ ಬರಯಿಲ್ಲೊ.

’ಮರಿ ಮಾಗ್ದಲೆನ್’ - ಚಾ. ಪ್ರಾ. ದೆ’ಕೋಸ್ತಾನ್ ನಿರ್ದೇಶನ್ ಕೆಲ್ಲೊ - 1984 ಇಸ್ವೆಂತ್ ಬರಯಿಲ್ಲೊ.

ನೀಳ್ಗಥಾ :

1 ’ಪತ್ತೇದಾರಾಚೆಂ ಸಾಹಸ್’ ಕಾದಂಬರಿಯೊ:

2 ’ಖುನ್ಯೆಗಾರಾಚಿ ಖುನ್’

3 ’ಸಿಸ್ಟರ್ ಶೋಭಾ’

ಮಟ್ವ್ಯೊ ಕಾಣ್ಯೊ : ಲಗ್ಬಗ್ 100 ವಯ್ರ್.

ಕವಿತಾ/ಚುಟುಕಾಂ : ಲಗ್ಬಗ್ 200 ವಯ್ರ್.

ಅಣ್ಕಾರಿತ್: 5.

ವೇಕ್ ಫೀಲ್ಡಾಚೊ ವಿಗಾರ್ (1974 ಇಸ್ವೆಂತ್).

ಡೋನ್ ಫಿಕ್ಸ್‌ಹಾಟ್ (1976 ಇಸ್ವೆಂತ್).

ಜೀವನ್ ತೂಫಾನ್ (1973 ಇಸ್ವೆಂತ್).

ಅಬೊಲಿನಾ (1985 ಇಸ್ವೆಂತ್).

ಪೆರಿಸ್ (1995).

ಆಕಾಶ್‌ವಾಣಿ ಮಂಗ್ಳುರಾಂತ್ ಜಾಯ್ತಿಂ ಕಾರ್‍ಯಿಂ ದಿಲ್ಯಾಂತ್.

ಅಂಕಣಾಂ/ವ್ಹೊಳಿ :

’ಫುಗೆಟ್ಯೊ’ ’ರಾಕ್ಣೊ’ಚೆರ್ ಪರ್ಗಟ್ ಜಾಲ್ಲಿ ಲೊಕಾಮೊಗಾಳ್ ವ್ಹೋಳ್.

’ಸುಃಖ್-ದೂಃಖ್’ ’ದಿವೊ’ಚೆರ್ ಪರ್ಗಟ್ ಜಾಲ್ಲಿ ವೋಳ್.

ವೆಕ್ತಿತ್ವ್ :

ಸಿಜ್ಯೆಸ್ ತಾಕೊಡೆ ಏಕ್ ಪರಿಪೂರ್ಣ್ ಕಲಾಕಾರ್ ಮ್ಹಣ್ಯೆತಾ. ತಾಚೆಲಾಗಿಂ ತಾಲೆಂತಾಂಚೊ ಪುಂಜೊಚ್ ಆಸಾ, ತೊ ಏಕ್ ಕವಿ, ಬರವ್ಪಿ-ಸಾಹಿತಿ, ನಾಟಕ್‌ಕಾರ್ ಮಾತ್ರ್ ನ್ಹಯ್, ಏಕ್ ಚಿಂತ್ಪಿ, ವಿಮರ್ಶಕ್, ಆನಿಂ ಕಾರ್‍ಯೆಂ ನಿರ್ವಾಹಕ್.

ಲೊಕಾಂಕ್ ಹಾಸಂವ್ಚಿ ವಿಧ್ಯಾ ತೊ ಭೋವ್ ಅಪುರ್ಭಾಯೆನ್ ಜಾಣಾಂ. ತಾಚಾ ಬರ್ಪಾಂಕ್ ಚಾರ್ ಧಾರೆಚಾ ತಾಲ್ವಾರೆಚಿ ಸಕತ್ ಆಸಾ. ಅಪ್ಲ್ಯಾ ಜಿಣ್ಯೆಂತ್ ತಾಣೆಂ ಶಿಕಂವ್ಚಾಕೀ ಚಡ್ ತಾಕಾ ಶಿಕೊಂಕ್ ಪಡ್ಲೆಂ, ಆನಿಂ ಅಜೂನ್ ಶಿಕೊನ್ ಆಸಾ ತರ್‌ಯಿ ಅಜೂನ್ ತಾಚಾ ಕಾಳ್ಜಾಂತ್ ಆಸ್ಚೊ ಕೊಂಕ್ಣಿ ಹುಸ್ಕೊ ಪಳೆತಾನಾ, ಮ್ಹಾಕಾ ತೊ ತಾಚೊ ಹುಸ್ಕೊ ಆನಿಂ ಕೊಂಕ್ಣೆಚೊ ಮೋಗ್ ಪಿಂತ್ರಾಂವ್ಕ್ ಉತ್ರಾಂ ಮೆಳಾನಾಂತ್. ತಾಚೆಲಾಗಿಂ ಆಸ್ಚೊ ಅನ್ಯೇಕ್ ಭೋವ್ ಅಪ್ರೂಪಾಯೆಚೊ, ಜೊ ಕೊಂಕ್ಣೆಂತ್ ಭಾರಿಚ್ ಉಣೊ ಜಾವ್ನಾಸ್ಚೊ ಗೂಣ್ ಜಾವ್ನಾಸಾ, ಪ್ರಾಯೆನ್/ಅನ್ಭೋಗಾನ್ ತಾಚ್ಯಾಕೀ ಲ್ಹಾನ್ ಆಸ್ಚಾ ಬರವ್ಪ್ಯಾಂಕ್ ಸಮ್ಜೊಂಚಿ ಶ್ಯಾಥಿ ಸಿಜ್ಯೆಸಾಕ್ ಆಸಾ. ಹೊ ಖರೊಚ್ ಏಕ್ ಗೂಣ್. ಕಿತ್ಯಾಕ್ ಮ್ಹಳ್ಯಾರ್ ಹಾವೆಂ ಪಾರ್ಕಿಲ್ಲೆಂ ಏಕ್ ಸತ್ ಹೆಂ ಜಾವ್ನಾಸಾಕೀ ಕೊಂಕ್ನೆಚಾ ಚಡ್ತಾವ್ ಬರವ್ಪ್ಯಾಂಕ್ ಹೊ ಶೆಗುಣ್ ನಾ. ದೆಕುನ್ಂಚ್ ಜಾಯ್ಜಯ್ ಉದೆವ್ನ್ ಯೆಂವ್ಚೆ ಕೊಂಕ್ಣಿ ಬರವ್ಪಿ ಆಮ್ಚಾ ಮಾಲ್ಘಡ್ಯಾಂಚಾ ಕೊಂಕ್ಣಿ ಸಾಹಿತ್ಯಾಕ್ ಲಾಗಿಂ ಘೆಂವ್ಕ್ ನರ್ಗಾತಾತ್. ಪುಣ್ ಸಿಜ್ಯೆಸಾಕ್ ಹೊ ಶೆಗುಣ್ ಧಾರಾಳ್ ಮಾಪಾನ್ ಆಸಾ, ತಾಣೆಂ ಮ್ಹಾಕಾ ಜಾಯ್ತ್ಯಾ ಮಿಸಾಂವಾಕ್ ವಾಟ್ ಧಾಖಯ್ಲ್ಯಾ ಮ್ಹಣ್ ಪರ್ಗಟ್ ರಿತಿನ್ ಸಾಂಗೊಂಕ್ ಮ್ಹಾಕಾ ಭೋವ್ ಅಭಿಮಾನ್ ಭೊಗ್ತಾ.

ಚಿಂತಾಪ್ :

ಸಿಜ್ಯೆಸ್ ಕಾಂಯ್ ಕಮ್ಯೂನಿಸ್ಟ್ ನ್ಹಯ್, ಸಿಜ್ಯೆಸಾಚೆಂ ಚಿಂತಾಪ್ ’ಕ್ರಾಂತಿಕಾರಿ’ ಮ್ಹಳ್ಯಾರ್ ಕೊಣ್ಂಚ್ ಪಾತ್ಯೆಂವ್ಚೆ ನಾಂತ್. ಕುವೆಯ್ಟಾಂತ್ ಚಲ್ಚಾ ಕವಿಗೋಶ್ಟಿಂತ್ ತಾಚೆಂ ನಾಂವ್ ಕಾಡ್ತಾನಾಂಚ್ ಲೋಕ್ ನೀಟ್ ಬೊಸ್ತಾ ಆನಿಂ ಕಾನ್-ದೊಳೆ-ತೋಂಡ್ ಏಕ್ ಕರುನ್ ಚೀತ್ ದೀವ್ ತಾಚಿಂ ಕವಿತಾ ಆಯ್ಕತಾ. ಅಶೆಂ ಲೊಕಾಂಕ್ ಅಪ್ಲ್ಯಾ ಬರ್ಪಾಂನಿ ಹಾಸಂವ್ಚೊ ಏಕ್ ಸಾಹಿತಿ ಕಸೊ ಕ್ರಾಂತಿಕಾರಿ ಮ್ಹಳ್ಳೆಂ ಸವಾಲ್ ಉಟ್ತಾ ತರ್‌ಯಿ, ತಾಚಾ ಬರ್ಪಾಂಕ್ ಗೂಂಡ್ ರಿತಿನ್ ಅಧ್ಯನ್ ಕೆಲೆಂ ತರ್, ಸಮಾಜೆಚೆರ್ ತಾಕಾ ಆಸ್ಚೊ ಹುಸ್ಕೊ ತೊ ಬೊಬಾಟುನ್ ಸಾಂಗ್ತಾ, ರಾಗಾನ್ ಪೆಟೊನ್‌ಯಿ ತೊ ಹಾಸೊನ್ಂಚ್ ಸಮಾಜೆಕ್ ಬೆಂಡ್ತಾ. ಸಮಾಜೆಚಾ ಅಸಲ್ಯಾ ಪಾತ್ರಾಂಕ್ (Characters) ಕೆದ್ನಾಂ ಗೋಂಪೆ ಜಾವ್ನ್ ಯೆತಾತ್, ಕೆದ್ನಾಂ ಬಾಬುಟಿ, ರಿಟ್ಟಿ, ಮಾರ್ಸೆಲ್ ಜಾವ್ನ್. ತಾಣೆಂ ಅಪ್ಲ್ಯಾ ಬರ್ಪಾಂನಿ ವಾಪಾರ್ಚಾ ನಾಂವಾಂನಿ ಸಯ್ತ್ ವ್ಯಂಗ್ಯ್ ಭರೊನ್ ಆಸಾ. ಜಿಣ್ಯೆಂತ್ ಅಪ್ಣಾನ್ ಭೊಗ್ಚೆಂ ಸರ್ವ್ ದೂಃಕ್ ಲಿಪವ್ನ್ ಸಂಸಾರಾಕ್ ಹಾಸಂವ್ಚೆಂ ಕಾಮ್ ಭೋವ್ಶಾ ಎಕಾ ಕಲಾಕಾರ್ ಶಿವಾಯ್ ಹೆರಾಂಕ್ ತೆಂ ಅಸಾಧ್ಯ್.

ಮಟ್ವ್ಯೊ ಕಾಣ್ಯೊ :

ಸಿಜ್ಯೆಸಾಚ್ಯೊ ಮಟ್ವ್ಯೊ ಕಾಣ್ಯೊ, ಕೊಂಕ್ಣೆಂತ್ ಅಪ್ಲೊಚ್ ಮ್ಹಳ್ಳೊ ಪ್ರಕಾರ್ ರುತಾಂ ಕರ್ತಾ. ಸಮಾಜೆಂತ್ ಘಡೊನ್ ಆಸ್ಚಾ ಸಂಗ್ತ್ಯಾಂಕ್ ತೊ ವಿಂಚ್ತಾ ಆನಿಂ ಬರೆ ಕರ್ನ್ ಅಪ್ಲ್ಯಾ ಕಾಣ್ಯಾಂನಿ ವಿಣ್ತಾ ಆನಿಂ ಖರಿಚ್ ತಾಚಿ ಕಾಣಿಂ ಏಕ್ ದಿವ್ಟಿ ಜಾಂವ್ಕ್ ಪಾವ್ತಾ. ತಾಚೊ ಚಡ್ತಾವ್ ಕಾಣ್ಯೊ ಗಂಭೀರ್. ತಾಚಿಂ ಸುರ್‍ವಿಲ್ಲಿಂ ಬರ್ಪಾಂ ಪತ್ತೇದಾರಿ, ಭೋವ್ಶಾ ಗೂಡಾಚಾರಿ ಬರ್ಪಾಂಚೆರ್ ತಾಕಾ ವೋಡ್ ಆಸ್‌ಲ್ಲಿ ಜಾವ್ಯೆತ್. ಪುಣ್ ಮಟ್ವ್ಯಾ ಕಾಣ್ಯಾಂಕ್ ತಾಣೆಂ ಇತ್ಲಿ ದೇಣ್ಗಿ ದಿಲ್ಯಾ ತರ್‌ಯೀ ತಾಕಾ ಕೊಂಕ್ಣೆಂತ್ ವಳ್ಕೊಂವ್ಚೆಂ ಹಾಸ್ಯ್ ಬರವ್ಪಿ ಜಾವ್ನ್. ತಾಚಾ ಬರ್ಪಾಂನಿ ಜಾಯ್ತ್ಯಾಂಕ್ ಸಮಾಜೆ ಮುಖಾರ್ ವಿಣ್ಗೊ ಕೆಲಾ. ಹಿಚ್ ತಾಚಾ ಮಟ್ವ್ಯಾ ಕಾಣ್ಯಾಂಚಿ ತಾಂಕ್. ಪುಣ್ ನಿರಾಶೆಚಿ ಗಜಾಲ್ ಹಿಕೀ, ತಾಚೊ ಮಟ್ವ್ಯೊ ಕಾಣ್ಯೊ ಕೊಣಾಯ್ಕ್‌ಯೀ ಜಾಯ್ ಜಾಲ್ಲೆಪರಿಂ, ಜಾಯ್ ಜಾಲ್ಲೆವೆಳಾರ್ ವಾಚುಂಕ್ ಮೆಳಾನಾಸ್ಚೊ. ಕಾರಾಣ್ ಇತ್ಲೆಂಚ್ - ಚಡ್ತಾವ್ ಮಟ್ವ್ಯೊ ಕಾಣ್ಯೊ ಕೊಂಕ್ಣಿ ಪತ್ರಾಂನಿ ಛಾಪೊನ್, ಕೊಣಾಕ್‌ಚ್ ಕಳಾನಾತ್‌ಲ್ಲೆಪರಿಂ ಪತ್ರಾಂಸವೆಂ ನಾಸ್ ಜಾಲ್ಯಾತ್ ಶಿವಾಯ್ ಬುಕಾರುಪಾರ್ ಆಸ್ಚ್ಯೊ ಭೋವ್ ಥೊಡ್ಯೊ.

[ಎಕಾ ಮಾಲ್ಘಡ್ಯಾ ಬರವ್ಪ್ಯಾಕ್ ಜರ್‌ತರ್ ಕೊಣೆಂಯ್ ಎಕ್ಲ್ಯಾನ್ "ತುವೆಂ ಎದೊಳ್ ಕಿತೆಂ ಕೆಲಾಂಯ್?" ಮ್ಹಳ್ಳೆಂ ಸವಾಲ್ ಕೆಲೆಂ ತರ್ ಮ್ಹಜೆ ಪ್ರಕಾರ್ ತಾಚಾಕೀ ವರ್ತಿ ಶಿಕ್ಶಾ ಹೆರ್ ಆಸ್ಚಿನಾ ಮ್ಹಳ್ಳೆಂ ಮ್ಹಜೆಂ ಚಿಂತಾಪ್. ಪುಣ್ ಆಮ್ಚಾ ಕೊಂಕ್ಣೆಂತ್ ಸಿಜ್ಯೆಸಾಚೊ ಸಂಪೂರ್ಣ್ ವಾವ್ರ್ ಸಮ್ಜಾಲ್ಲೆ ಕಿತ್ಲೆ ಆಸ್ತಿತ್? ಭೋವ್ ಥೊಡೆ. ಹಾಕಾ ಕಿತೆಂ ಕಾರಾಣ್? ಸಿಜ್ಯೆಸಾಚಾ ಸಗ್ಳ್ಯಾ ವಾವ್ರಾಚೊ ಉಲ್ಲೇಕ್ ವಾಚುಂಕ್ ಮೆಳ್ಚೊ ಭೋವ್ ಅಪ್ರೂಪ್. ಪುಣ್ ಸಿಜ್ಯೆಸಾಕ್ ಹಾವೆಂ ಹೆಂಚ್ ಸವಾಲ್ ನರ್ಗೊನ್‌ಶೆಂ ಕೆಲೆಂ, ಪುಣ್ ತಾಕಾ ರಾಗ್ ಯೇಂವ್ಕ್‌ನಾ. ಬಗಾರ್ ವ್ಹಡಾಮೊಗಾನ್ ತಾಚಾ ಹರ್‍ಯೆಕಾ ವಾವ್ರಾವಿಶ್ಯಾಂತ್ ಮ್ಹಾಕಾ ಸವಿಸ್ತಾರ್ ವಿವರ್ ದಿಲೊ. ತಾಚೊ ಹಾಂವ್ ಕಾಳ್ಜಾಥಾವ್ನ್ ಉಪ್ಕಾರ್ ಬಾವುಡ್ತಾಂ.] ’ಖುರ್ಸಾ ಗುಡ್ಯಾರ್’ ತಾಚಾ ಬರ್‍ಯಾಂತ್ಲಿ ಬರಿ ಮಟ್ವಿ ಕಾಣಿ.

ಖುರ್ಸಾ ಗುಡ್ಯಾರ್

ಪಿಚ್ಚಾ ಲಿಸಾಂವ್ ಕರುಂಕ್ ಬಸ್‌ಲ್ಲೊ. ತರ್‌ಯಿ ತಾಚಿ ತರ್‍ನಿ ಮತ್ ವಾರ್‍ಯಾರ್ ಶಿರ್‍ಕಲ್ಲೆ ಪಿಕೆ ಖೊಲಿಯೆಪರಿ ಉಭ್ತಾಲಿ.

"ಎರಡೊಂದ್ಲಿ ಎರಡಾ, ಎರಡೆರಡ್ ನಾಲ್ಕ, ಎರಡ್ ಮೂರ್‍ಲಿ ಆರ..." ಮ್ಹಣ್ ಮಾಗ್ಗಿ ವ್ಹಡ್ಲ್ಯಾನ್ ಮ್ಹಣ್ತಾಲೊ. ಮಾವ್ಶಿ ಭಾಯ್ರ್ ಭಿತರ್ ವೆತಾನಾ. ಮಗ್ಗಿ ಬುಕಾಂತ್‌ಯಿ ಕಾಲ್ ಸಾಂಜೆಚೆಂಚ್ ಪಿಂತುರ್.. ಕಾಲ್ ಇಸ್ಕೊಲಾಥಾವ್ನ್ ಪಾಟಿಂ ಯೆತಾನಾ, ರಿಟ್ಟಿಸಂಗಿಂ ತಾಣೆ ತ್ಯಾ ಪಾಲ್ಪೊಣ್ಸಾಚ್ಯಾ ರುಕಾಮುಳಾಂತ್ಲ್ಯಾ ಶೆಮ್ಗೆಚ್ಯಾ ಬೊಲ್ಯಾಂತ್ ಪಳಯಿಲ್ಲೆಂ ದ್ರಶ್... ಏಕ್ ದಾದ್ಲೊ ಆನಿ ಏಕ್ ಸ್ತ್ರೀ...! ಆಂಗಾರ್ ವಸ್ತುರ್ ನಾಸ್ತಾಂ ವಿಣ್ಗೆಂಚ್ ಲೊಳೊನ್ ಆಸ್‌ಲ್ಲಿಂ..

ತಾಚ್ಯಾ ತರ್‍ನ್ಯಾ ಮತಿಂತ್ ಸವಾಲಾಂ ಉದೆಲಿಂ, ಸೊಡಂವ್ಕ್ ತಾಂಕಾನಾತ್‌ಲ್ಲೊ ಮಿಸ್ತೆರ್ ಜಾಲ್ಲೊ. ಆನಿ ಹ್ಯಾ ವಿಶಿಂ ತಾಣೆ ಮಾವ್ಶೆಲಾಗಿಂ ವಿಚಾರಿಜೆ ಮ್ಹಣ್ ದೋನ್ ತೀನ್ ಪಾವ್ಟಿಂ ತೋಂಡ್ ಉಗ್ತೆಂ ಕೆಲ್ಲೆಂ ತರಿ ತಾಚೆ ಜಿಬೆಚಿ ಶೆಳ್ ಸುಕ್‌ಲ್ಲಿ..

"ಪಿಚ್ಚಾ, ಇಸ್ಕೊಲಾಕ್ ವೇಳ್ ಜಾಲೊರೆ"... ಶೆಜಾರ್‍ಚೆಂ ರಿಟ್ಟಿ ಪೊತೆಂ ಆನಿ ಭುತಿ ಘೆವ್ನ್ ದಾರಾರ್ ಉಭೆಂ ಜಾಲ್ಲೆಂ.

"ಹ್ಯಾ ಚೆಡ್ವಾಕ್ ಕಾಂಯ್ ಕಾಮ್ ನಾ" ಪಿಚ್ಚಾನ್ ಬೂಕ್ ದಾಂಪ್ಲೊ. ರಿಟ್ಟಿ ಪೊತ್ಯಾಂತ್ಲಿ ಸ್ಲೇಟ್ ಕಾಡ್ನ್ ಬರಂವ್ಕ್ ಪಡ್ಲೆಂ. ಪಿಚ್ಚಾ ಮಾಡಾಮುಳಾಕ್ ವಚೊನ್ ಮುತ್ಲೊ. ನ್ಹಾಣ್‌ಯೆಕ್ ವಚೊನ್ ಹಾತ್ ಪಾಯ್ ಧುವ್ನ್ ನ್ಹೆಸ್ಲೊ.

"ಧರಾ, ಎಕೇಕ್ ಘೊಟ್ ಕಾಫ಼ಿ ಪಿಯೆಯಾ" ಮಾವ್ಶೆನ್ ದೊಗಾಂಯ್ಕಿ ಲೊಟ್ಯಾಂತ್ ಕಾಫ಼ಿ ಹಾಡ್ನ್ ದಿಲಿ.

"ಅಳೆ ಪಿಚ್ಚಾ, ಆಂಬ್ಯಾಂಕ್ ಆನಿ ಕಾಜುಂಕ್ ಫ಼ಾತೊರ್ ಮಾರುಂಕ್ ವಚೊನ್ ಕೊಣಾಕೊಣಾಚೆ ಮಾಂಡ್ಡೆ ಫ಼ೊಡ್ನ್ ಘಾಲಿನಾಕಾ. ಪಾಳ್ಪೊಣ್ಸಾಚ್ಯಾ ರುಕಾರ್ ಚಡನಾಕಾ. ಹಾಂವೆಂ ಸಾಂಗ್‌ಲ್ಲೆಂ ಆಯ್ಕಾನಾ ತರ್ ರಿಟ್ಟಿನ್ ಮ್ಹಾಕಾ ಯೇವ್ನ್ ಸಾಂಗಾಜೆ... ಹಾಂ ಆತಾಂ ವಚಾ ವೇಳ್ ಜಾಲೊ, ಪಿಚ್ಚಾ ತುಜಿ ಭುತಿ ಕಾಣ್ಘೆ ಸಾಂಜೆರ್ ವೆಗಿಂ ಯೆಯಾ..."

ಪಿಚ್ಚಾ ಆನಿ ರಿಟ್ಟಿ ಉಡೊನ್ ಧಾಂವ್ಲಿಂ ಶೆತಾಂ ಭಾಟಾಂನಿ ಉಲ್ಲಾಸಾಚಿಂ ಉಡ್ಕಣಾ ಘಾಲುನ್, ಪಾಂಪಾಳಿಂ ಚತ್ರಾಯೆನ್ ಉತ್ರೊನ್ ರಾನ್ ವಾಟೆಕ್ ಆಯ್ಲಿಂ ತಿಂ. ಖುರ್‍ಸಾಗುಡೊ ಉತ್ರೊನ್ ಸಕಯ್ಲ್ ದೆಂವ್ಲ್ಯಾರ್ ಜಾಲೆಂ ತಾಂಚೆಂ ಇಸ್ಕೊಲ್. ಖುರ್‍ಸಾಗುಡೊ ಇಸ್ಕೊಲಾಚ್ಯಾ ಭುರ್‍ಗ್ಯಾಂಕ್ ಭಾರಿ ಮೊಗಾಚೊ. ಇಸ್ಕೊಲಾಕ್ ವಚೊಂಕ್ ಮನ್ ನಾತ್‌ಲ್ಲಿಂ ದಾಡ್ಡಿಂ ಪೊಕ್ರಿ ಪೋಲಿ ಭುರ್ಗಿಂ ತ್ಯಾ ಗುಡ್ಯಾರ್ ಬೊಲ್ಯಾಂನಿ ಲಿಪೊನ್ ಬಸೊನ್ ಸಾಂಜೆರ್ ಪಾಟಿಂ ಘರಾ ವೆತಾಲಿಂ.

ಇಸ್ಕೊಲಾಕ್ ವೆಚಿಂ ಸಾಂಜೆಚೆಂ ಗುಡ್ಯಾರ್ ಭಂವೊನ್ ಕಾಜುಚ್ಯೊ ಬಿಯೊ ವಿಂಚುನ್ ಆಂಗ್ಡಿ ವಿಕುನ್ ಮಿಟಾಯಿ ಖಾತಾಲಿಂ. ಆನಿ ಥೊಡಿಂ ಪಾಲ್ಪೊಣೊಸ್, ಆಂಬೆ, ಕಾಜು, ಕಾಣೆರಾಂ, ಸುರ್‍ನಾಂ ಪೊಡ್ಕೊಳಾಂ ಇತ್ಯಾದಿ ಫಳ್ ವಸ್ತುಂಚ್ಯಾ ಸೊಧ್ನೆರ್ ಆಸ್ತಾಲಿಂ. ಚಿಕ್ಕೆ ವ್ಹಡ್ ಭುರ್‍ಗೆ ರಾನ್ ಕುಂಕ್ಡಾಂಕ್, ಕೊವ್ಡ್ಯಾಂಕ್ ವಾ ಚಾನ್‌ಯಾಂಕ್ ಪಾಸ್ ಮಾಂಡುನ್ ದವರ್‍ತಾಲೆ. ಗೊರ್‍ವಾಂ-ಮೊನ್ಜಾತಿಂಕ್ ಪಾಚ್ವೆಂ ತಣ್ ತ್ಯಾ ಗುಡ್ಯಾರ್ ಪುಶ್ಕಳ್ ಮೆಳ್ತಾಲೆಂ. ಸುಕ್ಣ್ಯಾಂ-ಸಾವ್ಜಾಂಕ್ ಜಯ್ತ್ ರೂಕ್ ಆಸ್ರೊ ದಿತಾಲೆ. ಸಭಾರ್ ವರ್‍ಸಾಂ ಆದಿಂ ತ್ಯಾ ಗುಡ್ಯಾರ್ ವಾಗ್, ಸುಣ್ಯಾ ವಾಗುಟಾಂ ರಾವ್ತಾಲಿಂ ಮ್ಹಣ್ ಸೆಜಾರ್‍ಚೊ ಆಬ್ ಕೊಣಾಲಾಗಿಂಗಿ ಸಾಂಗ್ತಾಲೊ ತೆಂ ಪಿಚ್ಚಾನ್ ಆಯ್ಕಾಲ್ಲೆಂ. ಹಪ್ತ್ಯಾಕ್ ದೋನ್-ತೀನ್ ಗಾಯ್ರಾಂ ವಾಗಾಚ್ಯಾ ಪೊಟಾಕ್ ಗ್ರಾಸ್ ಜಾತಾಲಿಂ ಖಂಯ್.

ಗಾಂವ್ಚಿಂ ಏಕ್-ದೋನ್ ಸುಣಿಂಯಿ ಮಾಯಾಕ್ ಜಾತಾಲಿಂ ಖಂಯ್. ಶಿವಾಯ್ ವೊಡಾ ರುಕಾರ್ ಆಮಾಸೆಚೆ ರಾತಿಂ ಮೆಲ್ಲಿಂ ಬೋಬ್ ಮಾರ್‍ತಾಲಿಂ ಖಂಯ್. ಅನಿಕ್‌ಯಿ ಸಬಾರ್ ವರ್‍ಸಾಂ ಆದಿಂ ಥೊಡಿಂ ಇಸ್ಕೊಲಾಚಿಂ ಭುರ್ಗಿಂ ವಾಗಾಚ್ಯಾ ತೊಂಡಾಕ್ ಬಲಿ ಜಾಲ್ಲಿಂ ಖಂಯ್. ಮಾವ್ಶೆನ್ ಸಾಮ್ಗ್ತಾನಾ ಪಿಚ್ಚಾಚಿ ಲೋಂವ್ ಉಬಿ ಜಾಲ್ಲಿ. ಆನಿ ಪಿಚ್ಚಾ ತ್ಯಾ ಗುಡ್ಯಾ ವಯ್ಲ್ಯಾನ್ ವೆತಾನಾ ರಿಟ್ಟಿಲಾಗಿಂ ಸಾಂಗ್‌ಲ್ಲೆಂ ಆನಿ ರಿಟ್ಟಿನ್ ಕಿಂಕ್ರಾಟ್ ಮಾರ್‌ಲ್ಲಿ. ಖುರ್‍ಸಾಗುಡ್ಯಾ ವಯ್ಲ್ಯಾನ್ ವೆತಾನಾ ಪಿಚ್ಚಾಕ್ ಕಾಲ್ಚೆ ಸಾಂಜೆಚೊ ಉದಾಶ್ ಆಯ್ಲೊ.

"ರಿಟ್ಟಿ, ಆತ್ತಾಂ ಆಯ್ಲೊಂ" ಮ್ಹಣ್ ಚಾಡ್ಡೆಚೊ ಬುತಾಂವ್ ಕಾಡ್ನ್ ಬೊಲ್ಯಾಚ್ಯಾ ಆಡೊಸಾಕ್ ಮುತೊಂಕ್ ರಾವ್ಲೊ. ಕಾಲ್ ಸಾಂಜೆರ್ ತಶೆಂಚ್ ಮುತೊಂಕ್ ರಾವ್‌ಲ್ಲೆಕಡೆ ತಾಕಾ ಕೊಣೆಂಗೀ ಹಾಸ್ಚೊ ತಾಳೊ ಆಯ್ಕಾಲ್ಲೊ. ಪಿಚ್ಚಾ ಹಾಳ್ವಾಯೆಚಿಂ ಮೆಟಾಂ ಕಾಡುನ್ ಆವಾಜ್ ಆಯ್ಕಾಲ್ಲೆ ಕುಶಿನ್ ಗೆಲ್ಲೊ. ಆನಿ ಥಂಯ್ಚೆಂ ದ್ರಶ್ಯ್ ಪಳೆವ್ನ್ ತೊ ಥಟಕ್ ಜಾಲ್ಲೊ. ಪಾಟ್ಲ್ಯಾ ಪಾಂಯಾನಿಂಚ್ ಹಾಳ್ವಾಯೆನ್ ಪಾಟಿಂ ಯೇವ್ನ್ ಶೀದಾ ಘರಾ ಧಾಂವ್‌ಲ್ಲೊ. ರಿಟ್ಟಿಕ್ ಪಿಚ್ಚಾಚೆಂ ನಡ್ತೆಂ ವಿಚಿತ್ರ್ ದಿಸ್‌ಲ್ಲೆಂ.

"ಕಾಲೆಂ ಜಾಲೆಂ ಪಿಚ್ಚಾ?" ರಿಟ್ಟಿನ್ ವಿಚಾರ್‍ಲ್ಯಾರ್‌ಯಿ ಪಿಚ್ಚಾನ್ "ಕಾಂಯ್ ನಾ" ಮ್ಹಣ್ ಜಾಪ್ ದಿಲ್ಲಿ. ತರಿ, ಪಿಚ್ಚಾಚೊ ತೊಂಡಾಚೊ ರಂಗ್‌ಚ್ ಬದ್ಲಲ್ಲೊ. ಆನಿ ಆಜ್ ಪಿಚ್ಚಾ ಆನಿ ರಿಟ್ಟಿ ತ್ಯಾ ಜಾಗ್ಯಾರ್ ಪಾವ್‌ಲ್ಲಿಂ. ಪಿಚ್ಚಾಚೆ ಕುಡಿಂತ್ ಅವ್ಯಕ್ತ್ ಆಶಾ ಕಿರ್‍ಲಲ್ಲಿ.

ಮತಿಂತ್ ಆತುರಾಯೆಚಿ ಆಂಕ್ರಿ ಫ಼ುಟೊನ್ ಆಯಿಲ್ಲಿ. ಸುಕಿಂ ಆಡಾರಾಂ, ಕಾಂಟಿ ಪಾಟಿಂ ಸಾರುನ್ ಹಳೂ ಮೆಟಾಂ ಕಾಡುನ್ ತೊ ಫ಼ುಡೆಂ ಗೆಲೊ. ದಾಟ್ ಬೊಲೆಂ ತೆಂ. ಭಿತರ್ ಝಾಡಾಂಚೆ ಫ಼ಾಂಟೆ ಪಾಟಿಂ ವೊಡುನ್ ಪಿಚ್ಚಾ ತಿಳುಂಕ್ ಲಾಗ್ಲೊ. ತಾಕಾ ನಿರಾಶಾ ಭೊಗ್ಲಿ. ಕಾಲ್ಚೆಂ ದ್ರಶ್ ನಾತ್‌ಲ್ಲೆಂ, ತೊ ಖಂತೀಶ್ಟ್ ಜಾವ್ನ್ ಪಾಟಿಂ ಪರ್‍ತಾಲೊ.

"ಚಲ್ಯಾಂ ರಿಟ್ಟಿ" ಪಿಚ್ಚಾ ಭುತಿ ಹಾತಿಂ ಘೆವ್ನ್ ಮ್ಹಣಾಲೊ. ತಿಂ ದೊಗಾಂಯಿ ಫ಼ುಡೆ ಸರ್‍ಲಿಂ. ಕ್ಲಾಸಿಂತ್ ಜಾಲ್ಯಾರ್‌ಯಿ ಪಿಚ್ಚಾಚೆ ಮತಿಂತ್ ಲಿಸಾಂವ್ ರಿಗನಾ ಜಾಲೆಂ. ತಾಚೆ ಮತಿಂತ್ ಲ್ಹಾನ್‌ಶೆಂ ವಾದಾಳ್‌ಚ್ ಉಟ್‌ಲ್ಲೆಂ. ಪಯ್ಲೆಂಚೆಪರಿ ತೊ ತಾಚ್ಯಾ ಸಾಂಗಾತ್ಯಾಂಲಾಗಿಂ ಹಾಸೊನ್, ನಾಚೊನ್, ಉಡ್ಕಾಣಾಂ ಘಾಲ್ನ್ ಖೆಳಾನಾತ್‌ಲ್ಲೊ. ಕ್ಲಾಸಿ ಉಪ್ರಾಂತ್‌ಯಿ ಎಕ್ಸುರೊಚ್ ಬಸೊನ್ ಚಿಂತಾಲೊ. ಹೆರ್ ಭುರ್ಗ್ಯಾಂನಿ ಖೆಳೊಂಕ್ ಆಪಯ್ಲ್ಯಾರಿ ತೊ ವಚಾನಾತ್‌ಲ್ಲೊ. ಎಕಾಚ್ಛಾಣೆ ತ್ಯಾ ನೆಂಟ್ಯಾ ಭುರ್‍ಗ್ಯಾಚೆರ್ ಕಸಲಿಗಿ ಬದ್ಲಾವಣ್ ಘಡ್‌ಲ್ಲಿ! ಸಾಂಜೆರ್ ಇಸ್ಕೊಲ್ ಸಂಪ್ತಚ್ ಪಿಚ್ಚಾ ಆನಿ ರಿಟ್ಟಿ ಪೊತಿಂ ಖಾಂದ್ಯಾರ್ ಆನಿ ಭುತಿ ಹಾತಿಂ ಘೆವ್ನ್ ಘರ್‍ಚೆ ವಾಟೆಕ್ ಲಾಗ್ಲಿಂ. ರಿಟ್ಟಿ ಮಾವ್ನ್‌ಪಣಿಂ ಪಿಚ್ಚಾಚೊ ಪಾಟ್ಲಾವ್ ಕರಿಲಾಗ್ಲೆಂ. ವಾಟೆರ್ ತಾಂಚೆಮಧೆಂ ಚಡ್ ಉಲವ್ಣೆಂ ಚಲ್ಲೆಂನಾ.

ಪಿಚ್ಚಾನ್ ಚಾಡ್ಡೆಚ್ಯಾ ಬೊಲ್ಸಾಂತ್ಲಿ ಕಾಡ್‌ಯಾಂಪೇಟ್ ಭಾಯ್ರ್ ಕಾಡ್ಲಿ. ರಿಟ್ಟಿ ಆತುರಾಯೆನ್ ಲಾಗಿಂ ಆಯ್ಲೆಂ. ಪಿಚ್ಚಾನ್ ಕಾಡ್‌ಯಾಂಪೆಟುಲಾಚೆಂ ಬಾಗಿಲ್ ಹಾಳ್ವಾಯೆನ್ ಉಗ್ತೆಂ ಕೆಲೆಂ. ತಾಚೆಭಿತರ್ ಆಸ್‌ಲ್ಲೆ ತೀನ್ ಚಾರ್ ಹುಂಬ್ಲೆ ಮರೊನ್ ಪಡ್‌ಲ್ಲೆ. ರಿಟ್ಟಿ ವ್ಹಡ್ಲ್ಯಾನ್ ಹಾಸ್ಲೆಂ. ಪಿಚ್ಚಾಕ್‌ಯ್ ಪಿಚ್ಚಾಕ್‌ಯಿ ಹಾಸೊ ಆಯ್ಲ್ಯೊ. ತಾಂಚೆ ಮದ್ಲೊ ಏಕ್ ಹುಂಬ್ಲೊ ತರಿ ಜಿವೊ ಆಸ್‌ಲ್ಲೊ ತರ್, ಪಿಚ್ಚಾ ಎದೊಳ್ ರಿಟ್ಟಿಚೆ ಬಾಜ್ವೆಭಿತರ್ ಘಾಲ್ನ್ ರಿಟ್ಟಿಚೆ ಬೋಬ್ ಪಳೆಂವ್ಕ್ ಸಂತೊಸ್ ಭೊಗ್ತೊ.

ಇಸ್ಕೊಲಾಂತ್ ಜಾಲ್ಯಾರ್‌ಯಿ ಪಿಚ್ಚಾ ಆಪ್ಣೆ ಧರ್‍ನ್ ವೆಲ್ಲೆ ಹುಂಬ್ಲೆ, ಜರ್‍ಲೆ, ಗುಂಗುರ್‍ಲೆ, ದೊಂಬ್ಲೆ ವಾ ಮುಯೊ ಹೆರ್ ಭುರ್ಗ್ಯಾಂಚ್ಯಾ ಆಂಗಾರ್ ಘಾಲ್ನ್ ತಾಂಚಿ ಆವಸ್ತಾ ಪಳೆವ್ನ್ ಸಂತೊಸ್ ಭೊಗ್ಚೊ ತಾಚೊ ಮೊಗಾಚೊ ಹವ್ಯಾಸ್. ಖುರ್‍ಸಾ ಗುಡ್ಯಾಚ್ಯಾ ಮುಳಾಂತ್ ಪಿಚ್ಚಾಗೆಲಿ ಏಕ್ ಗಾಯ್ ಆನಿ ದೋನ್ ವಾಸ್ರಾಂ ಚರೊನ್ ಆಸ್‌ಲ್ಲಿಂ. ಬಾರೀಕ್ ಬೊಡಿ ಘೆವ್ನ್ ಗಾಯ್‌ಚೆ ಪಾಟಿಕ್ ದೋನ್ ವ್ಹಾಜಯ್ಲೆಂ ತಾಣೆ. ಗಾಯ್ ಆನಿ ವಾಸ್ರಾಂ ಶಿಮ್ಟಿ ಉಕಲ್ನ್ ಧಾಂವಾಲಾಗ್ಲಿಂ. ಗುಡ್ಯಾಚೆ ತಕ್ಲೆರ್ ಥೊಡೆ ಭುರ್‍ಗೆ ಪತಂಗ್ ಉಬಯ್ತಾಲೆ.

ಆತಾಂ ಪಿಚ್ಚಾ ತಾಂಚೆ ಸರ್‍ಶಿಂ ಗೆಲೊನಾ. ಕಾರಣ್ ಥೊಡ್ಯಾಚ್ ದಿಸಾಂ ಆದಿಂ ತಾಣೆ ಮಾವ್ಶೆನ್ ದಿಲ್ಲೆ ದೋನ್ ರುಪಯ್ ಖರ್‍ಚುನ್ ಪಾಚ್ವ್ಯಾ ವರ್‍ಣಾಚೊ ಸೊಭಿತ್ ಏಕ್ ಪತಂಗ್ ತಯಾರ್ ಕೆಲ್ಲೊ. ತೊ ಪಳೆವ್ನ್ ರಿಟ್ಟಿಕ್‌ಯಿ ಖುಶಿ ಜಾಲ್ಲಿ. ಖುರ್‍ಸಾಗುಡ್ಯಾಚೆ ತಕ್ಲೆಚೆ ತಕ್ಲೆರ್ ರಾವೊನ್ ಪತಂಗ್ ಸೊಡ್ಲೊ ತಾಣೆ. ತಿತ್ಲ್ಯಾರ್ ಎಕಾ ಮೊಸ್ರಾಳ್ಯಾ ಚೆಡ್ಯಾನ್ ಆಪ್ಲ್ಯಾ ಪತಂಗಾದ್ವಾರಿಂ ಪಿಚ್ಚಾಚ್ಯಾ ಪತಂಗಾಚೆಂ ಸುತ್ ಕಾತರ್‍ಲೆಂ. ಪಿಚ್ಚಾಚೊ ಪತಂಗ್ ಪಯ್ಸ್ ದಿಗಂತಾರ್ ನಪಂಯ್ಚ್ ಜಾಲ್ಲೊ. ತಾಚ್ಯಾ ದೊಳ್ಯಾಂನಿ ದುಕಾಂ ಭರ್‍ಲಿಂ. ಪುಣ್ ತೊ ಅಸಹಾಯಕ್ ಜಾಲೊ. ತ್ಯಾ ವ್ಹಡ್ ಚೆಡ್ವಾಕಡೆ ಜಿಕ್ಚೆಬರಿ ನಾತ್‌ಲ್ಲೆಂ. ಉಪ್ರಾಂತ್ ರಿಟ್ಟಿನ್ ಕಶೇಂಯ್ ತಾಕಾ ಭುಜವ್ನ್ ಘರಾ ಆಪವ್ನ್ ವ್ಹಲ್ಲೊ. ಆತಾಂ ಪತಂಗ್ ಪಳೆತಾನಾ ಪಿಚ್ಚಾಚ್ಯಾ ಆಂಗಾರ್ ಹುಂಬ್ಲೆ ಚರ್‍ತಾಲೆ.

"ರಿಟ್ಟಿ ತುಕಾ ಬಿಂಡಾಂ ಮ್ಹಳ್ಯಾರ್ ಭಾರಿಮೂ? ತುಂ ಹಾಂಗಾ ಸಕಯ್ಲ್ ರಾವ್. ಹಾಂವ್ ಪಿಕಿಂ ಬಿಂಡಾಂ ಕಾಡ್ನ್ ಘಾಲ್ತಾಂ." ಪಿಚ್ಚಾ ಮಾಂಕ್ಡಾಬರಿ ಬಿಂಡಾಂ ರುಕಾಚೆ ಫ಼ಾಂಟ್‌ಯೆಕ್ ಧರ್‍ನ್ ವಯ್ರ್ ಚಡ್ಲೊಚ್ ಪಿಕಿಂ ಪಿಕಿಂ ಬಿಂಡಾಂ ಝಡೊನ್ ಪಡ್ಲಿಂ. ರಿಟ್ಟಿನ್ ಥೊಡಿಂ ಖೆಲಿಂ ಆನಿ ಉರ್‌ಲ್ಲಿಂ ಭುತಿಯೆಂತ್ ಭರ್‍ಲಿಂ. ಪಿಚ್ಚಾ ರುಕಾರ್‌ಚ್ ಬಿಂಡಾಂ ಖಾವ್ನ್ ಸಕಯ್ಲ್ ದೆಂವ್ಲೊ.

ರುಕಾಚೆ ತಕ್ಲೆರ್ ಆಸ್ತಾನಾ ಪಿಚ್ಚಾಚಿ ದೀಶ್ಟ್ ಪಯ್ಶಿಲ್ಯಾ ಶೆಮ್ಗೆಚ್ಯಾ ಬೊಲ್ಯಾರ್ ಖಂಚ್ಲಿ. ಬೊಲ್ಯಾ ಭೊಂವ್ತಿಚಿಂ ಝಾಡಾಂ ಹಾಲ್ಚಿಂ ದಿಸ್ಲಿಂ. ದೊಳೆ ತಾಚೆ ರುಂದಾಲೆ ಆದ್ಲ್ಯಾ ದಿಸಾಚೊ ಉಡಾಸ್ ಪರತ್ ಕಿರ್‍ಲಾಲೊ. ತಾಚಿ ಮತ್ ಚುರುಕ್ ಜಾಲಿ. ಆತುರಾಯ್ ಚಡೊನ್ ಆಯ್ಲಿ. ಬಿಂಡಾಂಚ್ಯಾ ರುಕಾರ್ ಥಾವ್ನ್ ಸಕಯ್ಲ್ ದೆಂವ್‌ಲ್ಲೊಚ್ ವೆವೆಗಿಂ ಪೊತೆಂ ಖಾಂದಾರ್ ಚಡವ್ನ್ ಭುತಿ ಹಾತಿಂ ಘೆವ್ನ್

"ಚಲ್ ರಿಟ್ಟಿ, ವೇಳ್ ಜಾಲೊ" ಮ್ಹಣಾಲೊ. ರಿಟ್ಟಿನ್ ಪಿಚ್ಚಾಚೊ ಪಾಟ್ಲಾವ್ ಕೆಲೊ. ಶೆಮ್ಗೆಚ್ಯಾ ಬೊಲ್ಯಾಥಾವ್ನ್ ಸುಮಾರ್ ದೊನ್ಶಿಂ ಕದಮಾಂ ಪಯ್ಸ್ ಆಸ್ತಾನಾ

"ರಿಟ್ಟಿ ಮ್ಹಾಕಾ ಪೊಟಾಂತ್ ಚಾಬ್ತಾ, ಅತ್ತಾಂ ಆಯ್ಲೊಂ" ಮ್ಹಣ್ ಚಾಡ್ಡೆಚೆ ಬುತಾಂವ್ ಕಾಡೀತ್ ಶೆಮ್ಗೆಚ್ಯಾ ಬೊಲ್ಯಾ ಸರ್‍ಶಿಲ್ಯಾ ಧಾಕ್ಟುಲ್ಯಾ ಬೊಲ್ಯಾಂತ್ ಘುಸ್ಲೊ ಪಿಚ್ಚಾ. ರಿಟ್ಟಿ ಭುತಿಯೆಂತ್ಲಿಂ ಬಿಂಡಾಂ ಕಾಡ್ನ್ ಕಾಡ್ನ್ ಖಾಯಿತ್ ರಾವ್ಲೆಂ. ಪಿಚ್ಚಾನ್ ಹಳೂ ಮಾಜ್ರಾಚಿಂ ಮೆಟಾಂ ಕಾಡ್ಲಿಂ. ಶೆಮ್ಗೆಚ್ಯಾ ದಾಟ್ ಬೊಲ್ಯಾ ಸರ್‍ಶಿಂ ಪಾವ್ಲೊ ತೊ, ಭಿತರ್ ಕೊಣೆಂಗಿ ಘುಣ್ಗುಣ್ಚೆಂ ಆನಿ ಕುಚಿಲ್ಯೊ ಜಾಲ್ಲೆಪರಿಂ ಹಾಸ್ಚೆಂ, ಉಪ್ರಾಂತ್ ಕಸಲೊಗೀ ಆವಾಜ್.. ತೊಂಡಾಂತ್ಲಿ ಥಿಂಪಿ ಹಾಳ್ವಾಯೆನ್ ಗಿಳುನ್ ಪಿಚ್ಚಾನ್ ಫ಼ಾಂಟಿಯೊ ಹೆವ್ಶಿನ್-ತೆವ್ಶಿನ್ ಬಾಗಾವ್ನ್ ಹಳೂ ಭಿತರ್ ತಿಳ್ಳೆಂ.

ಹಾಬ್ಬಾ ವಾಂಚ್ಲಾಗೀ ತೊ! ಏಕ್ ದಾದ್ಲೊ ಆನಿ ಏಕ್ ಸ್ತ್ರೀ! ’ತಿಂ ಕಿತೆಂ ಕರ್‍ತಾತ್ ಹಾಂಗಾಸರ್?’ ಪಿಚ್ಚಾಚಿ ಆತುರಾಯ್ ಚಡ್ಲಿ. ಪರತ್ ತೊ ತಿಳುಂಕ್ ಲಾಗ್ಲೊ. ಏಕ್ ದಾದ್ಲೊ ಆನಿ ಏಕ್ ಸ್ತ್ರೀ! ತಾಂಚಿಂ ತೊಂಡಾಂ ದಿಸನಾತ್‌ಲ್ಲಿಂ ಜಾಲ್ಲ್ಯಾನ್ ಪಿಚ್ಚಾಕ್ ತಾಂಚಿ ಒಳೊಕ್ ಮೆಳ್ಳಿನಾ.

"ಪಿಚ್ಚಾ!" ರಿಟ್ಟಿ ಬೊಬಾಟ್ಲೆಂ, "ಪಾರಿ ಪಾಟ್ಲ್ಯಾನ್ ಧಾವೊನ್ ಘರಾ ಪಾಟ್ಲ್ಯಾನ್ ಯೇ!"

’ಹೆಂ ಏಕ್ ಮಾಲುಂಡ್ ಹ್ಯಾಚ್ ವೆಳಾರ್ ಬೊಬಾಟ್ತಾ!’ ಪಿಚ್ಚಾ ಹಳೂ ಮೆಟಾಂ ಕಾಡುನ್ ಪಾಟಿಂ ಆಯ್ಲೊ. ಸಗ್ಳೊ ಘಾಮೆಲ್ಲೊ ತೊ. "ಕಿತ್ಲೊ ವೇಳ್‌ರೆ ತುಕಾ?"

"ಕಾಂಯ್.. ಕಾಂಯ್ ನಾ ರಿಟ್ಟಿ.." ರಿಟ್ಟಿನ್ ಪಿಚ್ಚಾಕ್ ದೋನ್ ಆಂಬೆ ದಿಲೆ.

ಸದಾಂಚೆಪರಿಂ ದೊಗಾಂಯಿ ಎಕಾಮೆಕಾ ಚಿಡಾವ್ನ್, ಹೆಡಾವ್ನ್, ಖೆಳತ್ ಘರಾ ಪಾವ್ಲಿಂ. ಪಿಚ್ಚಾಚಿ ಮತ್ ಸಗ್ಳಿ ಉಚಾಂಬಳ್ ಜಾಲ್ಲಿ. ಮೊನ್ಜಾತಿ, ಸುಕ್ಣಿಂ ಜಾಲ್ಯಾರ್ ರಾನಾಂತ್ ಖೆಳ್ತಾತ್, ಝಗಡ್ತಾತ್, ಮಸ್ತ್ಯೊ ಘಾಲ್ತಾತ್. ಪುಣ್ ಮನಿಸ್? ’ಮಾವ್ಶೆಲಾಗಿಂ ವಿಚಾರ್‍ಲ್ಯಾರ್ ಕಶೆಂ?’

ಪಿಚ್ಚಾಚ್ಯಾ ಮತಿಂತ್ ಸವಾಲ್ ಉದೆಲೆಂ. ಆಜ್ ತಾಣೆ ’ಮನೆ ಕೆಲಸ’ ವೆಗಿಂ ಕರ್‍ನ್ ಮುಗ್ದಿಲೆಂ. ಸಾಂಜೆಚಿ ಅಮೊರಿ-ತೇರ್ಸ್ ಜಾತಚ್ ಮಾವ್ಶೆನ್ ದೊಗಾಂಯ್ಕೀ ವಾಡ್ಲೆಂ. ದೊಗಾಂಯಿ ಜೆವ್ಲಿಂ. ಮಾವ್ಶಿ ಆಯ್ದಾನಾಂ ಧುತಾನಾ ಪಿಚ್ಚಾ ಹಳೂ ಭಿತರ್ ಗೆಲೊ. "ಕಿತೆಂರೆ ಪಿಚ್ಚಾ?" ಮಾವ್ಶೆನ್ ಮೊಡ್ಕಿ ಧುವ್ನ್ ವೊಮ್ತಿ ಘಾಲಿ.

"ಮಾವ್ಶೆ.. ಆಜ್ ಖುರ್‍ಸಾ ಗುಡ್ಯಾರ್ ಕಿತೆಂ ಜಾಲೆಂರೆ?" ಮಾವ್ಶೆಚೆಂ ಸವಾಲ್. "ಹಾಂವ್ ಆನಿ ರಿಟ್ಟಿ ಚಲೊನ್ ಯೆತಾನಾ, ಶೆಮ್ಗೆಚ್ಯಾ ಬೊಲ್ಯಾಂತ್ ಕೋಣ್‌ಗೀ.. ಏಕ್ ದಾದ್ಲೊ ಮನಿಸ್ ಆನಿ ಏಕ್ ಬಾಯ್ಲ್.."

’ಛಟಲ್ಲ್!!’ ಮಾವ್ಶೆಚ್ಯಾ ಥಾಪ್ಡಾನ್ ಪಿಚ್ಚಾಚೊ ಪೊಲೊ ಮಿರ್‍ಮಿರ್‍ಲೊ.ತೊ ಹುಸ್ಕಾರ್‍ನ್ ಹುಸ್ಕಾರ್‍ನ್ ರಡೊನ್ ನಿದೊಂಕ್ ಗೆಲೊ.

’ಮಾವ್ಶೆನ್ ಮ್ಹಾಕಾ ಕಿತ್ಯಾಕ್ ಮಾರ್‍ಲೆಂ? ಹಾಂವೆಂ ಕಸಲಿ ಚೂಕ್ ಕೆಲಿ? ಶೆಮ್ಗೆಚ್ಯಾ ಬೊಲ್ಯಾಂತ್ ಹಾಂವೆಂ ಪಳೆಲ್ಲೆಂ ತಿಕಾ ಸಾಂಗ್ಲೆಂ ಮಾತ್...’ ಥೊಡ್ಯಾ ವೆಳಾನ್ ಚಿಮ್ಣಿ ಪಾಲ್ವವ್ನ್ ಮಾವ್ಶಿಯಿ ಪಿಚ್ಚಾಚೆ ಬಗ್ಲೆನ್ ನಿದ್ಲಿ. ತಿಣೆ ಪಿಚ್ಚಾಕ್ ಪೊಟ್ಲುನ್ ಧರುನ್ ತಿಣೆ ತಾಚೆಂ ಮಾತೆಂ ಪೊಶೆಲೆಂ. ತಿಚಿಂ ಹುನೊನಿ ದೋನ್ ಥೆಂಬೆ ದುಕಾಂ ಪಿಚ್ಚಾಚ್ಯಾ ಹಾತಾರ್ ಗಳ್ಳಿಂ.

"ಪಿಚ್ಚಾ" ಮ್ಹಣಾಲಿ ಮಾವ್ಶಿ

"ತುಂ ಆನಿ ಮುಕಾರ್ ಖುರ್‍ಸಾಗುಡ್ಯಾ ವಯ್ಲ್ಯಾ ತ್ಯಾ ಶೆಮ್ಗೆಚ್ಯಾ ಬೊಲ್ಯಾಸರ್‍ಶಿಂ ವಚನಾಕಾ. ತೆಂ ಹಳ್ಶಿಕ್ ಪಳೆನಾಕಾ ಪುತಾ, ತುವೆಂ ಬರೊ ಭುರ್ಗೊ ಜಾಯ್ಜೆ ಪುತಾ.."

ತಿಯಿ ತೆ ರಾತಿಂ ಕಸ್ಕಸೊನ್ ರಡ್ಲಿ. ಪಿಚ್ಚಾಕ್ ಸಾರ್‍ಕಿ ನೀದ್ ಪಡ್ಲಿನಾ. ಭಿರಾಂಕುಳ್ ಸಪ್ಣಾಂಯಿ ಪಡ್ಲಿಂ. ದುಸ್ರೊ ದೀಸ್ ಆಯ್ತಾರ್. ಪಿಚ್ಚಾ ಸಕಾಳಿಂಚ್ಯಾ ಮಿಸಾಕ್ ಗೆಲೊ. ಮಿಸಾಉಪ್ರಾಂತ್ ದೊತೊರ್‍ನ್, ದೊತೊರ್‍ನಿಚೆ ಕ್ಲಾಸಿಂತ್ ಆಜ್ ಬೊನಾ ಮೆಸ್ತ್ರಿ ದೆವಾಚ್ಯಾ ಧಾ ಉಪಾದೆಸಾಂವಿಶಿಂ ಸಾಂಗ್ತಾಲೊ. ಸವೊ ಆನಿ ನವೊ ಉಪಾದೆಸ್ ತೊ ಭಾರಿಚ್ ಸೊಭಿತ್ ಥರಾನ್ ವಿವರಿತಾಲೊ.

’ಪ್ರದುವಾರ್ ಕರಿನಾಕಾ ಆನಿ ಪೆಲ್ಯಾಚೆ ಸ್ತ್ರೀಯೆಚಿ ಆಶಾ ಕರಿನಾಕಾ’ ಮ್ಹಳ್ಳೆವಿಶಿಂ ತಾಣೆ ವ್ಹಡ್ಲೊ ಶೆರ್‍ಮಾಂವ್ಂಚ್ ಸಾಂಗ್‌ಲ್ಲೊ. ನಿಸ್ಕಳ್‌ಪಣಾವಿಶಿಂ ತಾಣೆ ಮೊಸ್ತ್ ವಿವರ್ ದಿಲ್ಲೊ. ಪುಣ್ ಪಿಚ್ಚಾಕ್ ಏಕ್‌ಯಿ ಸಮ್ಜಾನಾತ್‌ಲ್ಲೆಂ. ತಾಚೆ ಮತಿಂತ್ ಶೆಮ್ಗೆಚ್ಯಾ ಬೊಲ್ಯಾಂತ್ಲೆಂ ದ್ರಶ್ ಪರತ್ ಉದೆಲೆಂ. ತ್ಯಾ ದ್ರಶ್ಯಾ ಪಾಟ್ಲ್ಯಾನ್ ಮಾವ್ಶೆಚ್ಯಾ ಥಾಪ್ಡಾಚೊ ಮಿರ್‍ಮಿರೊ. ಆನಿಂ ಆತಾಂ ಬೊನಾ ಮೆಸ್ತ್ರಿಚೊ ಶೆರ್‍ಮಾಂವ್. ಪಿಚ್ಚಾ ಗುಸ್ಪೊಡ್ಲೊ. ಘರಾ ಆಯಿಲ್ಲೊಚ್ ತೊ ರಿಟ್ಟಿಕ್ ಸೊದುನ್ ಗೆಲೊ. ರಿಟ್ಟಿಯಿ ಘರಾ ನಾತ್‌ಲ್ಲೆಂ. ತೆಂ ತಾಚ್ಯಾ ವ್ಹಡ್ಲಿಮಾಂಯ್‌ಗೆರ್ ಗೆಲ್ಲೆಂ. ಮಾವ್ಶಿ ಆಪ್ಣಾಚೊ ಇತ್ಲೊ ಮೋಗ್ ಕರ್‍ತಾಲಿ, ತರ್ ತಿಣೆ ಆಪ್ಣಾಕ್ ಕಿತ್ಯಾಕ್ ಮಾರ್‍ಲೆಂ? ಶೆಮ್ಗೆಚ್ಯಾ ಬೊಲ್ಯಾಂತ್ಲೆಂ ದ್ರಶ್ ಪಳೆಲ್ಲೆಂ ಆಪ್ಣಾಚಿ ಚೂಕ್‌ವೆ?

ಪಿಚ್ಚಾಚೆ ಮತಿಂತ್ ಸವಾಲಾಂ ವಯ್ರ್ ಸವಾಲಾಂ. ಅಪುಣ್ ಜಲ್ಮಾತಾನಾಂಚ್ ಆಪ್ಣಾಚಿ ಆವಯ್ ಆಪ್ಣಾಕ್ ಸೊಡ್ನ್ ಧಾಂವ್‌ಲ್ಲಿ ಖಂಯ್. ಆಪ್ಲ್ಯಾ ಬಾಪಾಯ್‌ವಿಶಿಂ ತೊ ಕಾಂಯ್ಚ್ ನೆಣಾ. ಆಪ್ಣಾಕ್ ಮಾವ್ಶೆನ್‌ಚ್ ಲ್ಹಾನ್-ವ್ಹಡ್ ಕೆಲ್ಲೊ. ಮಾವ್ಶೆಚೆಂಯಿ ಕಾಜಾರ್ ಜಾಲ್ಲೆಂ. ಪುಣ್ ಬಾಪ್ಪು ಆನಿ ತಿಕಾ ಸಮಾ ಪಡಾನಾತ್‌ಲ್ಲ್ಯಾನ್ ಮಾವ್ಶೆಕ್ ಸೊಡ್ನ್ ಬಾಪ್ಪು ಘಾಟಾರ್ ಗೆಲ್ಲೊ. ಆನಿ ಥಂಯ್ಸರ್ ತೊ ಎಕೆ ಹಿಂದೂ ಬಾಯ್ಲೆಸಂಗಿಂ ಜಿಯೆತಾ ಮ್ಹಣ್ ಸೆಜಾರ್‍ಚ್ಯಾಂನಿ ಉಲಯಿಲ್ಲೆಂ ಪಿಚ್ಚಾನ್ ಆಯ್ಕಾಲ್ಲೆಂ.

ಮಾವ್ಶಿ ಪಿಚ್ಚಾಚೊ ಮೊಸ್ತು ಮೋಗ್ ಕರ್‍ತಾಲಿ.. ಪಿಚ್ಚಾಚಿ ಮಾವ್ಶಿ ಆಜ್ ಸಾಂಜೆಚ್ಯಾ ಮಿಸಾಕ್ ಗೆಲ್ಲಿ. ಘರಾಚ್ಚ್ ಬಸೊನ್ ಪುರೊ ಜಾಲ್ಲೊ ಪಿಚ್ಚಾ ತಳ್ಯಾಲಾಗಿಂ ಥೊಡೊ ವೇಳ್ ಬೊಸೊನ್, ಮಾಸ್ಳೆಂಕ್ ಫ಼ಾತೊರ್ ಉಡಂವ್ಕ್ ಲಾಗ್ಲೊ. ಉಪ್ರಾಂತ್ ಸವ್ಕಾಸ್ ಉಟೊನ್ ಖುರ್‍ಸಾಗುಡ್ಯಾ ತೆವ್ಶಿನ್ ಮೆಟಾಂ ಕಾಡಿಲಾಗ್ಲೊ. ಶೆಮ್ಗೆಚ್ಯಾ ಬೊಲ್ಯಾ ಸರ್‍ಶಿನ್ ಗೆಲೊ. ಕೊಣೆಂಗಿ ಪುಸ್ಪುಸ್ಚೆಂ ಆಯ್ಕಾಲೆಂ ತಾಕಾ. ಪಿಚ್ಚಾಚಿ ಆತುರಾಯ್ ಚಡ್ಲಿ. ಹಾಳ್ವಾಯೆನ್ ಮುಕಾರ್ ಗೆಲೊ ತೊ. ಏಕ್ ದಾದ್ಲೊ ಆನಿ ಏಕ್ ಸ್ತ್ರೀ! ತೆಂ ದೃಶ್ಯ್ ಪಳೆತಾನಾ ತಾಚೊ ಪೊಲೊ ಮಿರ್‍ಮಿರ್‍ಲೊ. ಆದ್ಲ್ಯಾ ದಿಸಾ ಮಾವ್ಶೆನ್ ಮಾರ್‌ಲ್ಲ್ಯಾ ಥಾಪ್ಡಾಚೊ ತಾಕಾ ಉಡಾಸ್ ಆಯ್ಲೊ. ಬೊನಾ ಮೆಸ್ತ್ರಿನ್ ಪ್ರದುವಾರ್‌ಪಣಾವಿಶಿಂ ದಿಲ್ಲಿ ಶಿಕವ್ಣ್‌ಯಿ ತಾಚೆ ಮತಿಂತ್ ಆಯ್ಲಿ. ಆಜ್ ತೊ ಆಪ್ಲಿ ಆತುರಾಯ್ ದಾಂಬುನ್ ಧರ್‍ನ್, ಬೊಲ್ಯಾಚ್ಯಾ ಆಡೊಸಾಕ್ ಪಾರೊತ್ ಕರ್‍ನ್ ಬಸ್ಲೊ.

ಪಂದ್ರಾ ಮಿನುಟಾಂನಿ ಏಕ್ ಸ್ತ್ರೀ ಆನಿ ದಾದ್ಲೊ ಆಪಾಪ್ಲೆಂ ವಸ್ತುರ್ ನ್ಹೆಸೊನ್ ಬೊಲ್ಯಾಥಾವ್ನ್ ಭಾಯ್ರ್ ಪಡ್ಲಿಂ. ಪಯ್ಲಿ ಸ್ತ್ರೀ ಗೆಲಿ. ಉಪ್ರಾಂತ್ ದಾದ್ಲೊ. ಪಿಚ್ಚಾ ದೊಳೆ ಗಶ್ಟುನ್ ಬೊಲ್ಯಾಚ್ಯಾ ಇಡ್ಯಾಂತ್ಲ್ಯಾನ್ ತ್ಯಾ ದಾದ್ಲ್ಯಾಕ್ ಆನಿ ಸ್ತ್ರೀಯೆಕ್ ಪಳೆವ್ನ್ ಥಟಾಕ್ಲೊ. ತಾಚಿ ಮಾವ್ಶಿ ಆನಿ ಬೊನಾ ಮೆಸ್ತ್ರಿ ಖುರ್‍ಸಾಗುಡೊ ದೆಂವೊನ್ ಘರ್‍ಚೆ ವಾಟೆಕ್ ಲಾಗ್‌ಲ್ಲಿಂ.