ಕಾಗ್ದಾಚಿ ಸ್ತ್ರೀ
ಲಿಖ್ಣೆ ನಾಂವ್ : ಎಡ್ವಿನ್ ಜೆ.ಎಫ್.ಡಿ’ಸೋಜ್, ವಾಸು ವಾಲೆನ್ಸಿಯಾ.
ಜನನ್ : 14 ಜೂನ್ 1948.
ಜಲ್ಮಾಲ್ಲೊ ಗಾಂವ್ : ವಾಲೆನ್ಸಿಯಾ.
ಪತಿಣೆಚೆಂ ನಾಂವ್ : ಜೇನ್ ಡಿ’ಸೋಜ್.
ಇಮೇಯ್ಲ್ : edwinjfd@gmail.com
ವೆಬ್ಸಾಯ್ಟ್ : www.angelfire.com/home/edwin/edwin.html
ಎಡ್ವಿನ್ ಜೋಸೆಫ್ ಫ್ರಾನ್ಸಿಸ್ ಡಿ’ಸೋಜ್.
ವಳೊಕ್:
ಆಪ್ಣಾಯಿಲ್ಲಿಂ ಇನಾಮಾಂ/ಪ್ರಶಸ್ತ್ಯೊ ;
’ಹಾಂವ್ ಜಿಯೆತಾಂ’ ಬುಕಾಕ್ 1973 ಇಸ್ವೆಂತ್, ಕೊಂಕ್ಣಿ ಭಾಷಾ ಮಂಡಳಿ ಗೊಯಾಂ ಥಾವ್ನ್ ಪ್ರಶಸ್ತಿ.
’ಹಾಂವ್ ಜಿಯೆತಾಂ’ ಬುಕಾಕ್ 1988 ಇಸ್ವೆಚಿ ದೆ|ಲುವಿಸ್ ಮಸ್ಕರೇನ್ಹಸ್ ಜಲ್ಮಾ ಶತಾಬ್ಧಿಚಿ ಪ್ರಶಸ್ತಿ.
’ವಿಂಚುನ್ ಕಾಡ್ಲೆಲಿ ಪರ್ಜಾ’ 1992 ಇಸ್ವೆಂತ್ ಡಾ|ಟಿ.ಎಮ್.ಎ.ಪೈ ಫ಼ೌಂಡೇಶನ್ ಮಣಿಪಾಲ್ ಥಾವ್ನ್ ಪ್ರಶಸ್ತಿ.
’ವಿಂಚುನ್ ಕಾಡ್ಲೆಲಿ ಪರ್ಜಾ’ ಬುಕಾಕ್ 1993 ಇಸ್ವೆಂತ್, ಕೊಂಕ್ಣಿ ಭಾಷಾ ಮಂಡಳಿ ಗೊಯಾಂ ಥಾವ್ನ್ ಪ್ರಶಸ್ತಿ.
’ವಿಂಚುನ್ ಕಾಡ್ಲೆಲಿ ಪರ್ಜಾ’ ಬುಕಾಕ್ 1994 ಇಸ್ವೆಚಿ ದೆ|ಲುವಿಸ್ ಮಸ್ಕರೇನ್ಹಸ್ ಜಲ್ಮಾ ಶತಾಬ್ಧಿಚಿ ಪ್ರಶಸ್ತಿ.
’ಬೆತ್ಲೆಹೆಮ್’ ಬುಕಾಕ್ 1995-97 ಇಸ್ವೆಚಿ ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿ ಪ್ರಶಸ್ತಿ.
1997-98 ಇಸ್ವೆಚಿ ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿ ಥಾವುನ್ ಸಾಹಿತಿಕ್-ಪ್ರಶಸ್ತಿ.
1998 ಇಸ್ವೆಂತ್ ’ಸಂದೇಶಾ’ ಪ್ರಶಸ್ತಿ.
2003 ಇಸ್ವೆಂತ್ ’ದಾಯ್ಜಿ ದುಭಾಯ್’ ಪ್ರಶಸ್ತಿ.
ಸಾಹಿತಿಕ್ ವಾವ್ರ್ :
1992 ಇಸ್ವೆಂತ್ ಸಾಂತ್ ಎಲೋಶಿಯಸ್ ಕೊಲೆಜಿಂತ್ ಕೊಂಕ್ಣಿ ಸಾಹಿತ್ಯ್ ಶಿಕವ್ಪಿ ಜಾವ್ನ್ ವಾವ್ರ್.
ಆಜೂನ್ಯ್ ಸಯ್ರೊ-ಶಿಕವ್ಪಿ (Guest Lecturer ಜಾವ್ನ್ ವಾವ್ರ್) 1992 ಇಸ್ವೆಂತ್ ಕಾರ್ವಾರಾಂತ್ ಚಲ್ಲ್ಲ್ಯಾ ಇಕ್ರಾವ್ಯಾ ಕೊಂಕಣಿ ಸಾಹಿತಿಕ್ ಸಮ್ಮೇಳನಾಚೊ ಅಧ್ಯಕ್ಶ್ ಜಾವ್ನ್ ವಾವ್ರ್.
ಬರವ್ಪ್ಯಾಂಚೊ ಎಕ್ತಾರ್ - ಮಂಗ್ಳುರ್ ಹಾಚೊ ಪಯ್ಲೆಂಚೊ ಅಧ್ಯಕ್ಶ್ ಜಾವ್ನ್ ವಾವ್ರ್.
ಸಂಪಾದನ್ ಕೆಲ್ಲಿಂ ಪತ್ರಾಂ :
’ಅಮರ್ ಕೊಂಕಣಿ’ ’ರೋಟಲೋರ್’
’ರಾಕ್ಣೊ (ಸಾಹಿತಿಕ್ ಸಂಪಾದಕ್ ಜಾವ್ನ್)’
’ದಿ ಎಲೋಶಿಯನ್’
ಅಣ್ಕಾರಿತ್/ತರ್ಜಣ್ ಜಾಲ್ಲೆಂ ಸಾಹಿತ್ಯ್ :
’215 ಧಾರುವಾಲ ಎಸ್ಟೇಟ್’ ದೆ|ಗಾಬ್ರಿಯೆಲ್ ಅಗೇರಾನ್ ಕಾಂದ್ಡ್ಯಾ ಭಾಸೆಕ್ ತರ್ಜಣ್ ಕರುನ್ ’ಜ್ನಾನ ಪ್ರಕಾಶನಾ ಥಾವ್ನ್ ಮಾನೆಸ್ತ್ ಚಂದ್ರಕಾಂತ ಕಂಬಾರಾನ್ ಪ್ರಸ್ತಾವನಾಚಿಂ ಉತ್ರಾಂ ಬರವ್ನ್ ಪರ್ಗಟ್ಲಾ.
'A Cup of hot coffee' ಇಂಗ್ಲಿಶಾಕ್ ತರ್ಜಣ್ ಕೆಲ್ಲ್ಯಾ ಮಟ್ವ್ಯಾ ಕಣ್ಯೆಕ್ ಖುಶ್ವಂತ್ ಸಿಂಘಾನ್ 'Our Favourite Indian Short Stories' ಮ್ಹಳ್ಳ್ಯಾ ಬುಕಾರ್ ಫಾಯ್ಸ್ ಕೆಲ್ಯಾ.
’ದೇವ್ ದೀವ್ಳ್ ಆನಿಂ ರಗಾತ್’ ಮಾಣೆಸ್ತ್ ವಾಸುದೇವ್ ಶ್ಯಾನ್ಭೋಗಾನ್ ಹಿಂದಿಕ್ ತರ್ಜಣ್ ಕರುನ್ ಸಾಹಿತ್ಯ್ ಎಕಾಡೆಮಿನ್ ’ಭಗ್ವಾನ್, ಮಂದಿರ್ ಔರ್ ಲಹೂ’ ಮ್ಹಳ್ಳ್ಯಾ ನಾಂವಾರ್ ಫಾಯ್ಸ್ ಕೆಲ್ಯಾ.
'A Collar For Moti' ಇಂಗ್ಲಿಶಾಕ್ ತರ್ಜಣ್ ಕರ್ನ್ ಸಾಹಿತ್ಯ್ ಅಕಾಡೆಮಿನ್ ಪರ್ಗಟ್ ಕೆಲ್ಯಾ.
’ಎಜಿಪ್ತಾಕ್ ಪೊಳಾಪೊಳಿ’ ಕಾಣ್ಯೆಕ್ ಮಾನೆಸ್ತ್ ಪುಂಡಲಿಕ್ ನಾಯಕ್ ’ದಿರ್ವೆಂ’ ಬುಕಾರ್ ಪರ್ಗಟ್ ಕೆಲ್ಯಾ.
'A Collar For Moti', 'I Confess', 'The Paper Woman' www.ndtv.com ಹಾಚೆರ್ಯ್ ಪರ್ಗಟ್ಲ್ಯಾತ್.
ಕಾದಂಬರಿಂಚೊ ವಿವರ್:
’ನಿಮಾಣಿ ಶೆಳಿ’
’ರಾಜ್ ಧ್ರೋಹಿ’
’ಪಿಲಾತಾನ್ ದಿಲ್ಲೆಂ ಫರ್ಮಾಣ್’
’ಜೊವ್ಳಿಂ ವಜ್ರಾಂ’
’ಶೆತಾಂತ್ಲಿಂ ಫುಲಾಂ ’
’ಏಕ್ ಮನಿಸ್ ದೋನ್ ಸಾವ್ಳ್ಯೊ’
’ಚಾರ್ ದೀಸ್ ಪಾಂಚ್ ರಾತಿ’
’ಜುದಾಸಾಂಕ್ ಕುರೊವ್’
’ಖುರ್ಸಾ ಪಾಟ್ಲೊ ಉಜ್ವಾಡ್’
’ತಾಂಬ್ಡೊ ಸಾಳ್ಯೊ’
’ಮ್ಹಜಾ ವೊಡ್ತಾಂತ್ಲೆ ಗುಲೊಬ್’
’ಮೊಗಾಚಿ ರಾತ್’
’ತರ್ನಿಂ ಕಿರ್ಣಾಂ’
’ಹಾಂವ್ ಜಿಯೆತಾಂ’
’ತೆ ಆಯ್ಲ್ಯಾತ್’
’ಹಾಂವ್ ಪಾಟಿಂ ಆಯ್ಲಾಂ’
’215 ಧಾರುವಾಲಾ ಎಸ್ಟೇಟ್’
’ಜೆರಿಕೊಚೆ ಪಾಗೊರ್’
’ಆಜ್ ಆಮಿಂ ಪೊಯ್ಶೆ ಕರ್ಯಾಂ’
’ತಾಕಾ ಆಮಿ ಫಾಶಿ ದಿವ್ಯಾಂ’
’ಸಿರೆನಾಂತ್ಲೊ ಜುದಾಸ್ ’
’ಆಜ್ ಆಮಿ ಖುನ್ ಕರ್ಯಾಂ’
’ವಿಂಚುನ್ ಕಾಡ್ಲೆಲಿ ಪರ್ಜಾ’
’ಆಯ್ಚಿ ರಾತ್ ಮ್ಹಜಿ’
’ಮ್ಹೊಂವ್ ಆನಿ ರಗಾತ್’
’ದರ್ಯಾಂತ್ ಪಾವ್ಸ್ ಪಡ್ಲೊ’
’ರೆಂವೆಂತ್ಲೆ ಫಾತೊರ್’
’ಬೆತ್ಲೆಹೆಮ್’
’ಉಣ್ಯಾ ಭಾವಾಡ್ತಾಚೆ’
ಚಿಂತಾಪ್ :
ಎಡ್ವಿನ್ ಜೆ.ಎಫ್.ಡಿ’ಸೋಜ್ ಹಾಚೆಂ ಚಿಂತಾಪ್ ವಿಶಾಲ್, ತಾಚೆಂ ಬರಾಪ್ ತೀಕ್ಷ್ಣ್ ಆನಿಂ ಚುರುಕ್. ತಾಚಾ ಬರ್ಪಾಚಾ ತಾಲ್ವಾರೆಕ್ ಧಾರ್ ಆಸಾ ಆನಿಂ ಹಾಚಾ ಕಾಣ್ಯೆಂತ್ ಜಾಂವ್, ಕಾದಂಬರಿಯಾಂನಿ ಜಾಂವ್ ವಾಚುಂಕ್ ಮೆಳ್ಚಾ ಸಂಭಾಶಣಾಂನಿ ಸಯ್ತ್ ಹಾಚಿಚ್ ಮ್ಹಳ್ಳಿ ಶೈಲಿ ಆಸಾ ಆನಿಂ ಹಾಚಾ ಬರ್ಪಾಂಕ್ ಪಿಸ್ವಂವ್ಚೊ ಲೋಕ್ ಅಜೂನ್ ಆಸಾ. ಹಾಚಾ ಚಡ್ತಾವ್ ಸಾಹಿತ್ಯಾಕ್ ಇಂಗ್ಲಿಶ್ ಸಾಹಿತ್ಯಾಚೊ ಪ್ರಭಾವ್ ಆಸಾ ಮ್ಹಳ್ಳೆ ಸಭಾರ್ ಬರವ್ಪ್ಯಾಂಚೊ ವಾದ್ ತರ್ಯ್ ತಾಚಾ ಕಾಣ್ಯಾಂನಿ ಆಮ್ಚಾ ಸಮಾಜೆಂತ್ಯ್ ಘಡ್ಯೆತ್ ಜಾಲ್ಲಿಂ ಸತಾಂ, ಘಡಿತಾಂ ಆಸಾತ್. ನವೆಂಸಾವಾಕ್ ಸಲೀಸಾಯೆನ್ ಒಪುನ್ ಘೆಂವ್ಚೊ ಹೊ ನ್ಹಯ್. ಎಡ್ವಿನ್ ದೆವಾಸ್ಪಣಾಚೊ ಮನಿಸ್. ತಾಚಾ ಕಾದಂಬರೆಂಚಿಂ ತಕ್ಲೆನಾಂವಾಂ ವಾಚ್ತಾನಾಂಚ್ ತೆಂ ಸುಸ್ತಾತಾ. ಎಡ್ವಿನಾನ್ ಕೊಂಕ್ಣೆಂತ್ ಮಾತ್ರ್ ನ್ಹಯ್, ಇಂಗ್ಲಿಶಾಂತ್ ಸಯ್ತ್ ಥೊಡ್ಯೊ ಕಾಣ್ಯೊ, ಕವಿತಾಂ ಲಿಖ್ಲ್ಯಾಂತ್. ತರ್ಯ್ ಕೊಂಕ್ಣೆಂತ್ ತೊ ಏಕ್ ಭಳ್ವಂತ್ ಕಾದಂಬರಿಕಾರ್ ಮ್ಹಣ್ಂಚ್ ಫಾಮಾದ್ ಜಾಲಾ.
ಮಟ್ವ್ಯೊ ಕಾಣ್ಯೊ :
ಎಡ್ವಿನ್ ಜೆ.ಎಫ್.ಡಿ’ಸೋಜ್ ಮ್ಹಳ್ಳೆಂ ನಾಂವ್ ಆಯ್ಕಾತಾನಾಂಚ್ ಕೊಂಕ್ಣಿ ಸಾಹಿತ್ಯಾಚಿ ರೂಚ್ ಆಸ್ಚಾಂಚಾ ಮತಿಂತ್ ಏಕ್ ವೆಗ್ಳೊಚ್ ಅನ್ಭೋಗ್ ಜಾತಾ. ಹಾತಾ ಕಾರಾಣ್ ತಾಚಾ ಬರ್ಪಾಚಿ ರೀತ್ ಆನಿಂ ಹಾಚಾ ಕಾಣ್ಯಾಂಚಿ ಸೊಭಾಯ್. ಏಕ್ ಮಟ್ವಿ ಕಾಣಿ ಕಿತ್ಲಿ ಮಟ್ವಿ ಆಸಾಜಯ್? ತಾಂತುಂ ಕಸಲೆ ಪಾತ್ರ್ ಆಸಾಜಯ್ ತೆಂ ಕೊಣಾಯ್ಕ್ಯಿ ಸಮ್ಜಾಜಾಯ್ ತರ್ ತಾಣಿಂ ಎಡ್ವಿನಾಚೊ ಮಟ್ವ್ಯೊ ಕಾಣ್ಯೊ ವಾಚಿಜಯ್. ಮಟ್ವ್ಯಾ ಕಾಣ್ಯಾಂವಿಶಿಂ ಜಾಯ್ತಿಂ ಶಿಭಿರಾಂ ತಾಣೆಂ ಚಲವ್ನ್ ವೆಲ್ಯಾಂತ್. ಹಾಚೊ ಸಭಾರ್ ಮಟ್ವ್ಯೊ ಕಾಣ್ಯೊ ಇಂಗ್ಲಿಶಾಕ್ ತರ್ಜಣ್ ಜಾಲ್ಯಾತ್. ಆಯ್ಲೆವಾರ್ ಖುಶ್ವಂತ್ ಸಿಂಘಾನ್ ಪರ್ಗಟ್ಲೆಲ್ಯಾ ಬುಕಾಕ್ ವಿಂಚ್ಲ್ಲ್ಯಾ ವಿಂಚ್ಣಾರ್ ಕಾಣ್ಯಾಂ ಪಯ್ಕಿ ಎಡ್ವಿನಾಚಿ ಮಟ್ವಿ ಕಾಣಿಯ್ ಏಕ್ ಜಾವ್ನಾಸಾ.
ಹಾವೆಂ ತಾಚೊ ಚಡಾವತ್ ಬರ್ಯಾಂತ್ಲ್ಯೊ ಬರ್ಯೊ ಮಟ್ವ್ಯೊ ಕಾಣ್ಯೊ ವಾಚ್ಲ್ಯಾತ್ ತರ್ಯ್ ಮ್ಹಜಾ ಚಿಂತ್ಪಾ ಪ್ರಕಾರ್ ತಾಚಿ ’ಕಾಗ್ದಾಚಿ ಸ್ತ್ರೀ’ ಮಟ್ವಿ ಕಾಣಿ ಕೊಂಕ್ಣೆಂತ್ಲ್ಯಾ ಶ್ರೇಷ್ಟ್ ಕಾಣ್ಯಾಂ ಪಯ್ಕಿ ಏಕ್. ಹಿ ಕಾಣಿ ತಾಣೆಂ ಇಂಗ್ಲಿಶಾಕ್ ತರ್ಜಣ್ ಕೆಲ್ಲಿ, www.ndtv.com ಸಾಯ್ಟಾಚೆರ್ ಪರ್ಗಟ್ಲ್ಯಾ.
ಕಾಗ್ದಾಚಿ ಸ್ತ್ರೀ
ಪಯ್ಲೆಂ ತಾಚೆಂ ಗಮನ್ ವೊಡ್ಲ್ಲೆಂ ತ್ಯಾ ಕಾಳ್ಯಾಚ್ ಫಳ್ಪಳೀತ್ ಕಾರಾನ್. ಸದಾಂಯೀ ಸಕಾಳಿಂ ತೆಂ ಕಾರ್ ತ್ಯಾ ಟ್ರಾಫಿಕ್ ಸಿಗ್ನಲಾ ಸರ್ಶಿಂ ಉಭೆಂ ಜಾತಾಲೆಂ. ತಾಚಿ ಸಿಗ್ನೆಲ್ ತಿ ಸಕ್ತಿವಂತ್, ಆಕಸ್ಮಿತ್ ಆನಿ ವಿಚಿತ್ರ್. ತ್ಯಾ ಟ್ರಾಫಿಕ್ ಸಿಗ್ನೆಲಾಚಿ ಯಾಂತ್ರಿಕ್ ಘಡಾವಳ್ ತಾಕಾ ಪರಿಪೂರ್ಣ್ ಸಮ್ಜೊಂಕ್ಚ್ ನಾತ್ಲ್ಲಿ. ತರ್ಯೀ ತಿ ಸಕ್ತೆವಂತ್ ಸಿಗ್ನೆಲ್. ತಿ ತಾಂಬ್ಡಿ ಜಾತಾನಾ ಸರ್ವ್ ವಾಹನಾಂ ಉಭಿಂ ಜಾತಾಲಿಂ. ತಾಕಾ ತಾಚೊ ದಿಸ್ಪಡ್ತೊ ಗ್ರಾಸ್ ದಿತಾಲಿಂ; ತ್ಯಾ ವಾಹನಾಂತ್ಲ್ಯಾಂಕ್ ತೊ ದೈನಿಕ್ ಪತ್ರಾಂ ವಿಕ್ತಾಲೊ.
ಹ್ಯಾ ಕಾಳ್ಯಾ ಕಾರಾಚಾ ಚಾಲಕಾನ್ ಆಪ್ಣಾಕ್ ಜಾಯ್ ಜಾಲ್ಲ್ಯಾ ಪತ್ರಾಚೆಂ ನಾಂವ್ ಉಚಾರ್ಲೆಂ, ಆನಿಂ ಪತ್ರಾಂ ವಿಕ್ಚಾ ಬುರ್ಗ್ಯಾನ್ ತೆಂ ತಾಕಾ ಕಾಡುನ್ ದಿಲೆಂ ತವಳ್ ತಿ ತಾಚಾ ಗಮನಾಕ್ ಆಯ್ಲಿ. ಕಾರಾಚ್ಯೆ ಪಾಟ್ಲೆ ಸಿಟಿರ್ ತಿ ಬೊಸೊನ್ ಆಸ್ಲ್ಲಿ. ಚಾಲಕಾನ್ ತೆಂ ಪತ್ರ್ ಘೆತ್ಲೆಂ ಆನಿಂ ಏಕ್ ನೋಟ್ ತಾಕಾ ದಿಲೊ. "ಸುಟೆ ಪಯ್ಶೆ ತುವೆಂ ದವರ್ಯೆತ್!" ತೊ ಮ್ಹಣಾಲೊ. ಬುರ್ಗ್ಯಾನ್ ತೆ ಸುಟೆ ಪೊಯ್ಶೆ ದವರ್ಲೆ ಆನಿಂ ಕಾಳ್ಜಾಂತ್ ತಿಚೆಂ ರುಪ್ಣೆಂಯೀ.
ಸುಂದರ್ ತಿ ಜಾವ್ನಾಸ್ಲ್ಲಿ, ಉತ್ರಿಕ್ತ್ ಆನಿಂ ವಿಚಿತ್ರ್. ಬುರ್ಗ್ಯಾಚಿ ತೆರಾ ವರ್ಸಾಂಚಿ ಮತ್ ವಿವಂದ್ ನಾತ್ಲ್ಲ್ಯಾ ಎಕ್ಯೆ ರಿತಿರ್, ಎಕ್ಯೇ ಘುಸ್ಪಡೀತ್ ರಿತಿನ್ ತಿಚೆರ್ ಆಕರ್ಶಿತ್ ಜಾಲ್ಲಿ. ತಿಚೆಂ ಮುಖಮಳ್ ಧೊವೆಂಚ್, ಮೆಜೂನ್ ಕೆಲ್ಲ್ಯಾ ಬಾಯ್ಲೆಂ ಮುಖಮಳಾ ಪರಿಂ ತಿಚೆಂ ಹರ್ಶೆಂ..... ಪಳೆತಾನಾ ಕಸಲ್ಯಾಗೀ ಪರ್ಕ್ಯಾ ಭೊಗ್ಣಾಂಚೆ ಬುಳ್ಬುಳೆ ತಾಚಾ ತರ್ನ್ಯಾ ಕುಡಿಂತ್ಲ್ಯಾನ್ ಧಾಂವ್ತಾಲೆ. ಕಾಳಿಚ್ ಮುಸ್ತಾಯ್ಕಿ ತಿ ನ್ಹೆಸ್ಲ್ಲಿ; ದೊಳ್ಯಾಂಕ್ ಕಾಳಿಂಚ್ ಚಷ್ಮಾ, ಎಕಾ ಥರಾಚಿ ನಿಗೂಡತಾ ತಿಚ್ಯೆ ಭಂವ್ತಿಂ ಧಾಂವ್ತಾಲೆ. ಕಾಳಿಚ್ ಮುಸ್ತಾಯ್ಕಿ ತಿ ನೆಸ್ಲ್ಲಿ; ದೊಳ್ಯಾಂಕ್ ಕಾಳಿಂಚ್ ಚೆಷ್ಮಾ, ಎಕಾ ಥರಾಚಿ ನಿಗೂಡತಾ ತಿಚ್ಯೆ ಭೊಂವ್ತಿಂ ಆಸ್ಲ್ಲಿ.
ಥಾಪಡ್ ಮಾರ್ಚೊ ಹಾತ್ ಆನಿಂ ಮೊಗಾನ್ ಪೊಶೆಂವ್ಚೊ ಹಾತ್ ಹಾಂಚೆ ಮಧ್ಲೆಂ ಫರಕ್ ಜಾಣಾ ಜಾಂವ್ಚ್ಯೆ ಪ್ರಾಯೆಕ್ ತೊ ಪಾವ್ತಾನಾ ಎಕಾ ಜಿನ್ಸಾಂಚಾ ವ್ಯಾಪಾರಿ ಸಂಗಿಂ ತೊ ಕಾಮ್ ಕರ್ತಾಲೊ. ಹೆಣೆತೆಣೆ ಪೊಟ್ಲ್ಯೊ ವ್ಹಾವಂವ್ಚ್ಚೊ, ದುಖಾನ್ ಸಾಫ್ ಕರ್ಚೆಂ ಇತ್ಯಾದಿ ತೊ ಕರ್ತಾಲೊ. ಹ್ಯಾ ವಾವ್ರಾಚೆಂ ಭಾತೆಂ ಜಾವ್ನ್ ಹರ್ಯೆಕ್ಯೆ ಸಾಂಜೆರ್ ಏಕ್ ಚೊಬ್ಕೊ ’ಚೀಜ್’ ಆನಿ ಫುಂರ್ಗೆಲ್ಲೊ ಉಂಡೊ ಮೆಳ್ತಾಲೊ. ದುಕಾನಾಂತ್ಚ್ ನಿದೊಂಕ್ ಜಾಗೊಯೀ ತಾಕಾ ಆಸ್ಲ್ಲೊ. ದೀಸ್ ಪಾಶಾರ್ ಜಾತಾಂ ಜಾತಾಂ ಸಂಸಾರಾಂತ್ ಆವಯ್-ಬಾಪುಯ್, ಭಾವ್-ಭಯ್ಣಿ ಮ್ಹಳ್ಳೊ ವಸ್ತು ಆಸಾತ್ ಮ್ಹಣ್ ತಾಕಾ ಕಳಿತ್ ಜಾಯಿತ್ ಆಯ್ಲೆಂ. ಹ್ಯೊ ವಸ್ತು ಸುಂದರ್ ಜಾವ್ನಾಸಾತ್, ಎಕ್ಲೊ ತಾಕಾ ಸಾಂಗಾಲಾಗ್ಲೊ. ಎಕ್ಲೊ, ಜಾಕಾ ಹ್ಯೊ ’ವಸ್ತು’ ಎಕಾ ತೆಂಪಾರ್ ಆಸ್ಲ್ಲ್ಯೊ ಪುಣ್ ಆತಾಂ ನಾತ್ಲ್ಲ್ಯೊ.
ಹ್ಯಾ ಬುರ್ಗ್ಯಾಕ್ ತ್ಯೊ ಪ್ರಾರಂಭಾರ್ಚ್ ನಾತ್ಲ್ಲ್ಯೊ.
ತರ್ಯೀ ಏಕ್ ವಿಚಿತ್ರ್ ಸಂಗತ್ ತಾಚಾ ತರ್ನ್ಯಾ ಗಮನಾಕ್ ಗೆಲ್ಲಿ. ಆವಯ್-ಬಾಪುಯ್, ಭಾವ್-ಭಯ್ಣಿ ಆಸ್ಲ್ಲ್ಯೊ ವೆಕ್ತಿ, ಕುಟಾಮ್ ಆಸ್ಲ್ಲ್ಯೊ ವ್ಯಕ್ತಿ ತ್ಯಾ ಜಿನ್ಸಾಂಚಾ ದುಕಾನಾಂತ್ ಧಾರಾಳ್ ಯೆತಾಲ್ಯೊ. ತಾಂಚ್ಯಾ ಮುಖಮಳಾರ್ ಸಂತೊಸ್ ದಿಸಾನಾತ್ಲ್ಲೊ. ಸಮಧಾನ್ ಝಳ್ಕಾನಾತ್ಲ್ಲೆಂ. ದುಕಾನಾಂತ್ಲ್ಯಾ ವಸ್ತುಂಚಿ ಮ್ಹಾರ್ಗಾಯ್, ರಾಂದ್ವಯ್, ಫಳಾಂ ಇತ್ಯಾದಿಂಚೆಂ ಮೋಲ್ ತ್ಯೊ ವ್ಯಕ್ತಿ ಚರ್ಚೆ ಕರ್ತಾಲ್ಯೊ. ಪುರ್ಪುರ್ತಾಲ್ಯೊ ಆನಿ ದುಕಾನ್ದಾರಾಲಾಗಿಂ ವಾರ್ಜಿಕ್ ಕರ್ತಾಲ್ಯೊ. ಸಂಸಾರಾಂತ್ಲಿ ಖಂಚಿಯೀ ವಸ್ತ್ ತಾಂಕಾಂ ಸಂಪೂರ್ಣ್ ಸಮಧಾನ್ ದಿಂವ್ಚ್ಯೆ ಪರಿಂ ದಿಸಾನಾತ್ಲ್ಲಿ.
ಬುರ್ಗೊ ಗುಸ್ಪಡ್ಲೊ.
ಸರ್ವಾಂಕ್ ಸುಖ್ ಆನಿ ಸಮಧಾನ್ ದಿಂವ್ಚಿ ಏಕ್ ವಸ್ತ್ ಆಸಾಜಾಯ್ ಮ್ಹಳ್ಳೊ ಏಕ್ ಅಪೂರ್ಣ್ ಆನಿ ಘುಸ್ಪಡಿತ್ ವಾದ್ ತಾಚೆಥಂಯ್ ಉದೆಲೊ, ಹ್ಯೆಚ್ ಘುಸ್ಪಡಾಯೆ ಮಧೆಂ ತಾಣೆ ದೈನಿಕ್ ಪತ್ರಾಂ ವಿಕ್ಚೆಂ ಕಾಮ್ ಧರ್ಲೆಂ.
ಆನಿ ಆತಾಂ, ಕಾಳ್ಯಾ ಕಾರಾಂತ್ಲ್ಯೆ ಸ್ತ್ರೀಯೆಕ್ ಪಳೆಲ್ಲ್ಯಾಫರಾ ತಾಚೆ ಥಂಯ್ ಸುಪ್ತ್ ಆಸ್ಲ್ಲಿ ಘುಸ್ಪಡ್ ಸ್ವಷ್ಟ್ ರೂಪ್ ಘೆಂವ್ಕ್ ಲಾಗ್ಲಿ. ತಿ ಸ್ತ್ರೀ ಜಾವ್ನಾಸ್ಲ್ಲಿ ಜಾಪ್ ತಾಚ್ಯೆ ಘುಸ್ಪಡಾಯೆಕ್; ವಕಾತ್ ತಾಚ್ಯೆ ತರ್ನೆ ಮತಿಕ್.
ತಿ ರಾತ್ ತಾಣೆ ನಿದೆವಿಣೆಂಚ್ ಪಾಶಾರ್ ಕೆಲಿ.
ದುಸ್ರ್ಯೆ ಸಕಾಳಿಂ ತೆಂ ಕಾಳೆಂ ಕಾರ್ ಆಯ್ಲೆಂ. ಸಿಗ್ನೆಲ್ ತಾಂಬ್ಡಿ ಜಾಲ್ಲ್ಯಾನ್ ರಾವ್ಲೆಂ. ಕಾರಾಚೊ ಚಾಲಕ್ ದೈನಿಕ್ ಪತ್ರಾಕ್ ಹಾತ್ ವೊಡ್ಡಾಯ್ಲಾಗ್ಲೊ. ಪುಣ್ ಬುರ್ಗ್ಯಾನ್ ತಾಚೆಂ ಗುಮಾನ್ ಕೆಲೆಂನಾ. ಪತ್ರ್ ಘೆವ್ನ್ ತೊ ಶೀದಾ ತಿಚ್ಯೆ ಸರ್ಶಿಂ ಗೆಲೊ.
ತಿಣೆ ತೆಂ ಘೆತ್ಲೆಂ ನಾ.
ತಾಚ್ಯೆ ಕುಶಿನ್ ಘುಂವೊನ್ ಸಯ್ತ್ ಪಳೆಲೆಂನಾ. ಕಾಳ್ಯಾ ಚೆಷ್ಮಾಂ ಪಾಟ್ಲ್ಯಾನ್ ತಿಚೆ ದೊಳೆ ’ಧರುಂಕ್’ ತೊ ಉರ್ಡಾಲೊ. ಪುಣ್ ವ್ಯರ್ಥ್.
ಸಿಗ್ನೆಲ್ ಬದ್ಲಾತಾನಾ ಚಾಲಕಾನ್ ಪಾಟಿಂ ಘುಂವೊನ್ ಪತ್ರ್ ಝೊಂಪಯ್ ಮಾರುನ್ ಘೆತ್ಲೆಂ ಆನಿ ಏಕ್ ನಾಣೆಂ ತ್ಯಾ ಬುರ್ಗ್ಯಾಕ್ ಉಡಯ್ಲೆಂ.
ಕಾರ್ ಥಂಯ್ಸರ್ ಥಾವ್ನ್ ಧಾಂವ್ಲೆಂ.
ಆಪ್ಣಾ ಭಿತರ್ ಕಸಲೆಂಗೀ ಏಕ್ ’ಫಟ್ಕ್’ ಕರುನ್ ತುಟ್ಲೆಲ್ಯೆ ಪರಿಂ ತ್ಯಾ ಬುರ್ಗ್ಯಾಕ್ ಭೊಗ್ಲೆಂ. ಕಸಲೆಂಗಿ ಭೊಗಾಪ್, ಘಡ್ಸುನ್ ಯೆಂವ್ಚೊ ಏಕ್ ಗಾಂಚ್, ಸ್ವಷ್ಟ್ ಜಾಯಿತ್ ಯೆಂವ್ಚೆಂ ಏಕ್ ಪಿಂತುರ್ ನಾಸ್ ಜಾಲ್ಲೆಂ. ತ್ಯೆ ಸ್ತ್ರೀಯೆನ್ ತಾಚೆಂ ಕುಸ್ಕುಟ್ ಗಮನ್ ಕರುಂಕ್ ನಾತ್ಲ್ಲೆಂ.
ದುಸ್ರ್ಯೆ ಸಕಾಳಿಂ ತಿ ಆಯ್ಲಿ.
ಆನಿ ತಿಸ್ರ್ಯಾ, ಚೊವ್ತ್ಯಾ.... ತರ್ಯೀ ತಿಚೆಂ ಗಮನ್ ಜಿಕುಂಕ್ ತೊ ಸಕ್ಲೊನಾ. ಕಸಲೊಚ್ ಜೀವ್ ತಿಚ್ಯೆ ಥಂಯ್ ನಾತ್ಲ್ಲೊ. ನಿಸ್ತೇಜ್ ತಿ, ಪತ್ರಾಂನಿ ಛಾಪುನ್ ಯೆಂವ್ಚಾ ತಸ್ವೀರ್ಯೆಂ ಪರಿಂ, ಸುಂದರ್ ತಸ್ವೀರ್ಯೊ ತ್ಯೊ ಪುಣ್ ನಿಸ್ತೇಜ್, ವ್ಹಯ್ ತಿ ಜಾವ್ನಾಸ್ಲ್ಲಿ ಕಾಗ್ದಾಚಿ ಸ್ತ್ರೀ.
ಕಾಗ್ದಾಚಿ ಸ್ತ್ರೀ.
ದೀಸ್ ಪಾಶಾರ್ ಜಾಲೆ.
ಆಜ್ ತಾಚಾ ಕುಡಿಂತ್ ನವೊ ಹುರುಪ್ ಆಸ್ಲ್ಲೊ. ತಾಣೆ ದೈನಿಕ್ ಪತ್ರಾಂ ವಿಕ್ಚಾ ಸಂಸ್ಥ್ಯಾಚಾಂನಿ ತಾಕಾ ನಿಳ್ಸೆಂ ಸಮ ವಸ್ತ್ರ್ ದಿಲ್ಲೆಂ. ಸುಂದರ್ ಯುನಿಫೋರ್ಮ್ ತೆಂ. ಪಿತುಳೆಚೆ ಥಳ್ಥಳೀತ್ ಬುತಾಂವ್ ತಾಚೆರ್ ಆಸ್ಲ್ಲೆ. ಆಜ್ ಪುಣ್ಯೀ... ತೊ ಭರ್ವಾಸ್ಲೊ.
ತೆಂ ಕಾಳೆಂ ಕಾರ್ ಘುಸ್ಪಡೇನ್ ಮ್ಹಳ್ಳ್ಯೆಪರಿಂ ಸಿಗ್ನೆಲಾ ಸರ್ಶಿಂ ಎಕ್ಟಾಂಯ್ ಜಾಲ್ಲ್ಯಾ ಜಮ್ಯಾ ಸರ್ಶಿಂ ಉಭೆಂ ಜಾಲೆಂ.
"ಕಿತೆಂ ಸಂಗತ್?" ತಿ ವಿಚಾರಿಲಾಗ್ಲಿ ಚಾಲಕಾಲಾಗಿಂ,
"ಹಿ ಸದಾಂಚಿ ಸಿಗ್ನೆಲ್ ನ್ಹಂಯ್ಗೀ?" ತಿಚೊ ತಾಳೊ ಯಾಂತ್ರಿಕ್ ಜಾವ್ನಾಸ್ಲ್ಲೊ.
"ವ್ಹಯ್" ಜಾಪ್ ದಿಲಿ ಚಾಲಕಾನ್,
"ಹಿ ಸಿಗ್ನೆಲ್ ಆಜ್ ಪಾಡ್ ಜಾಲ್ಯಾ, ಪಾವಾನಾತ್ಲ್ಲ್ಯಾಕ್ ಹಾಂಗಾಸರ್ ಏಕ್ ಆವ್ಘಡ್ಯೀ ಘಡ್ಲಾಂ!".
"ಆವ್ಘಡ್?" ತಿ ವಿಚಾರಿ,
"ಕೊಣ್ಯೀ ಮೆಲಾ?" ತಿಚಾ ತಾಳ್ಯಾಂತ್ ವಿಧಿಚಿ ಸಾಯ್ ಆಸ್ಲ್ಲಿ.
"ವ್ಹಯ್" ಚಾಲಕ್ ಆಪ್ಲಿ ಗೊಮ್ಟಿ ಲಾಂಬ್ ಕರಿಲಾಗ್ಲೊ."
"ದೆವಾ! ಪತ್ರಾಂ ವಿಕ್ಚೊ ಬುರ್ಗೊ!" ತಾಚಾ ತಾಳ್ಯಾಂತ್ ಆಕಾಂತ್ ಆಸ್ಲ್ಲೊ.
"ತೊ ಬುರ್ಗೊ?" ತಿ ಮ್ಹಣಾಲಿ.
"ಜೊ ಮ್ಹಜಾ ಹಾತಾಂನಿ ಪತ್ರಾಂ ಚೆಪುಂಕ್ ಪಳೆತಾಲೊ?"
"ವ್ಹಯ್ ತೊಚ್!"
ತಿಣೆ ನೀಳ್ ಸ್ವಾಸ್ ಸೆವ್ಲೊ. ತಿಚೊ ಹಾಸೊ ಜಾವ್ನಾಸ್ಲ್ಲ್ಯೊ ಮಟ್ವ್ಯೊ.
"ಅಸಲ್ಯಾ ಸಂದರ್ಭಾಂನಿ" ತಿ ಮ್ಹಣಾಲಿ ಪೊಕೊಳ್ ತಾಳ್ಯಾನ್,
"ಮ್ಹಜಾ ದೊಳ್ಯಾಂಚಿ ದೀಷ್ಟ್ ಉಬಾಶೆಂ ಕೆಲ್ಲ್ಯಾ ದೆವಾಕ್ ಹಾಂವ್ ಅರ್ಗಾಂ ದಿತಾಂ. ಚೀಂತ್ ತುಂ, ಕಿತೆಂ ಮ್ಹಾಕಾ ಆಜ್ ಭೊಗ್ತೆಂ ಆಸ್ಲ್ಲೆಂ ಕಾಲ್ ಪಳೆಯಿಲ್ಲೊ ಬುರ್ಗೊ ಆಜ್ ಮೊರೊನ್ ಪಡ್ತಾನಾ?"
ಚಾಲಕಾನ್ ಭುಜಾಂ ಹಾಲಯ್ಲಿಂ ಆನಿ ಯೆದೊಳ್ಚ್ ಥಂಯ್ಸರ್ ಹಾಜರ್ ಜಾಲ್ಲ್ಯಾ ದುಸ್ರ್ಯಾ ಚಲ್ಯಾ ಥಾವ್ನ್ ದೈನಿಕ್ ಪತ್ರ್ ಘೆಂವ್ಕ್ ಲಾಗ್ಲೊ.
"ತರ್ಯೀ ಏಕ್ ಸಂಗತ್ ಮ್ಹಾಕಾ ಸಮ್ಜಾನಾ" ತಿ ಮ್ಹಣಾಲಿ ಕಾರ್ ಚಾಲು ಜಾತಾನಾ.
"ಮ್ಹಜೆಂ ಗಮನ್ ವೊಡ್ಚೆಂ ಪ್ರಯತನ್ ತೊ ಬುರ್ಗೊ ಕಿತ್ಯಾಕ್ ಕರ್ತಾಲೊ ಜಾವ್ಯೆತ್?"
