ಕಾಣ್ಯೊ
ಸಾಹಿತಿಕ್ ಸ್ಪರ್ಧೊ 2004
ಕಥಾಪಾಠ್
ಅಂಕಣಾಂ
ಸಾಹಿತಿಕ್ ಸ್ಪರ್ಧೊ 2005
ಕವಿತಾಂ
ಸಾಹಿತಿಕ್ ಸ್ಪರ್ಧೊ 2006
ದಾಯ್ಜ್ ಶಿಭಿರ್ 2006
ವಿಡಂಬನಾಂ
ದಾಯ್ಜ್ ಶಿಭಿರ್ 2007
ಕಥಾಮೃತ್
ವಿಮರ್ಶೆ
ಕೆನಡಾಂತ್ ಮಜೆದಾರ್ ಮೊಂತಿ ಸಾಯ್ಭಿಣೆಚೆಂ ಫೆಸ್ತ್
ಅಖ್ಖ್ಯಾ ಬಡ್ಗಾ ಅಮೇರಿಕಾಂತ್ ನಾಮ್ಣೆಚೊ ಮಂಗ್ಳುರ್ಗಾರಾಂಚೊ ಸಂಘ್ "ಮೆಂಗ್ಲೋರಿಯನ್ ಅಸೋಸಿಯೇಶನ್ ಆಫ್ ಕೆನಡಾ" (ಮ್ಯಾಕ್) ಹಾಣಿಂ ಕೆನಡಾಂತ್ಲ್ಯಾ ಮಿಸ್ಸಿಸ್ಸಾಗಾ ಶ್ಹೆರಾಂತ್ಲ್ಯಾ ಸಾಂ.ಮ್ಯಾಕ್ಸ್ಮಿಲಿಯನ್ ಕೊಲ್ಬೆ ಫಿರ್ಗಜೆಂತ್ ಹ್ಯಾಚ್ ಸಪ್ತೆಂಬರ್ 11 ವೆರ್ ಮಾಂಡುನ್ ಹಾಡ್ಲ್ಲೆಂ ಮೊಂತಿ ಫೆಸ್ತ್ ವ್ಹರ್ತ್ಯಾ ಗದ್ದಳಾಯೆಚೆಂ ಜಾಂವ್ಕ್ ಪಾವ್ಲೆಂ.
ಸಾಂಜೆಚ್ಯಾ 3.30 ವರಾರ್ ಜೆರಿ ಡಿ’ಮೆಲ್ಲೊ ಬೆಂದುರ್ ಹಾಚ್ಯಾ ಯೆವ್ಕಾರಾಚ್ಯಾ ಉತ್ರಾನಿಂ ತಸೆಂಚ್ ನೊವೆನಾಚ್ಯಾ ಮಾಗ್ಣ್ಯಾನ್ ಲಿತುರ್ಜಿಕ್ ಕಾರ್ಯಾವಳ್ ಸುರ್ವಾತ್ಲಿ. "ಸಕ್ಕಡ್ ಸಾಂಗಾತಾ ಮೆಳ್ಯಾಂ.. ಸಕ್ಕಡ್ ಲಾಗಿಂ ಸರ್ಯಾಂ" ತಸೆಂಚ್ "ಮರಿಯೆಕ್ ಹೊಗೊಳ್ಸಿಯಾಂ" ಗಾಯಾನಾಂಚ್ಯಾ ಮಧುರ್ ಆವಾಜಾ ಮಧೆಂ ಸುಮಾರ್ ಶೆಂಬರ್ ಭುರ್ಗ್ಯಾನಿಂ ಫುಲಾಂ ಅರ್ಪುನ್ ಬಾಳೊಕ್ ಮರಿಯೆಕ್ ಮಾನ್ ಕೆಲೊ. ಉಪ್ರಾಂತ್ ಮರಿಯೆ ಮಾಯೆಚಿ ಇಮಾಜ್ ಪುರ್ಶಾಂವಾನ್ ದೆವಾಳಾಕ್ ವ್ಹರ್ಚ್ಯಾ ಸಂಬ್ರಮಾಂತ್ ಸುಮಾರ್ 500 ಲೊಕಾನ್ ಭಾಗ್ ಘೆತ್ಲೊ.
ಟೊರೊಂಟೊಚ್ಯಾ ಆರ್ಚ್ದಿಯೆಸೆಜಿಚೆ ಧರ್ಮಾಧ್ಯಕ್ಶ್ ಬೋ|ಮಾ|ದೊ| ವಿಲ್ಲಿಯಮ್ ಮ್ಯಾಕ್ಗ್ರಾಟನ್ ಹಾಚ್ಯಾ ಹಾಜ್ರೆಂತ್ ಭೆಟಯ್ಲೆಲ್ಯಾ ಮಿಸಾಬಲಿದಾನಾಂತ್ ಮ್ಯಾಕ್ ಹಾಚೆ ಅತ್ಮೀಕ್ ದಿರೆಕ್ತೊರ್, ಮಾರ್ತಾ ಆನಿ ಮರಿಯೆಚ್ಯಾ ಫಿರ್ಗಜೆಚೆ ವಿಗಾರ್ ತಸೆಂಚ್ ಲೊಕಾಮೊಗಾಳ್ ಬಾಪ್ ಎಡ್ವಿನ್ ಡಿ’ಸೊಜಾ ಪ್ರಧಾನ್ ಯಾಜಕ್ ಜಾವ್ನ್ ಆಸ್ಲ್ಲೆ. ತಾಂಚೆ ಸಂಗಿಂ ಬಾಪ್ ರುಡೊಲ್ಫ್ ಪಿಂಟೊ, ಬಾಪ್ ಹೆನ್ರಿ ಆಳ್ವಾ, ಬಾಪ್ ಆಂಡ್ರು ಲುವಿಸ್ ತಸೆಂಚ್ ಬಾಪ್ ಕಿಮ್ ಡಿ’ಸೊಜಾ ಹಾಣಿಂ ಸಹ-ಬೆಟವ್ಣಿ ಕೆಲಿ. ಹ್ಯಾ ಮಿಸಾ ಬಲಿದಾನಾ ವೆಳಾರ್ ಮಂಗ್ಳುರಿ ಧರ್ಮ್-ಭಯ್ಣ್ ಭ|ಫರ್ಡಿನಾಂಡಾ ಹಾಜರ್ ಆಸ್ಲ್ಲಿ.
ಬಾಪ್ ರುಡೊಲ್ಫ್ ಪಿಂಟೊನ್ ಆಪ್ಲ್ಯಾ ವಿಂಚ್ಣಾರ್ ಉತ್ರಾನಿಂ ದಿಲ್ಲ್ಯಾ ಪ್ರಸಂಗಾಂತ್ ಆಯ್ಚ್ಯಾ ಕಾಳಾರ್ ಮರಿಯೆಕ್ ವ್ಹರ್ತೊ ಮಾನ್ ಕಸೊ ದಿಜಾಯ್ ಮ್ಹಳ್ಳೊ ವ್ಹರ್ತೊ ಸಂದೇಶ್ ತಾಣೆಂ ದಿಲೊ. ಕೆನಡಾಂತ್ಲಿ ಫಾಮಾದ್ ಸಂಗೀತ್ ನಿರ್ದೇಶಕಿ ಮರ್ಲಿನ್ ರೊಡ್ರಿಗಸ್ ಹಿಚ್ಯಾ ಶಾತೆವಂತ್ ಮುಕೇಲ್ಪಣಾನ್ ಪೇಶ್ ಕೆಲ್ಲ್ಯಾ ಉತ್ತೀಮ್ ಗಾಯಾನಾನಿಂ ಕೆನಡಾಂತ್ಲ್ಯಾ ಫಾಮಾದ್ ಗಾವ್ಪಿ-ಗಾವ್ಪಿಣ್ಯೊ ತಸೆಂಚ್ ಸಂಗೀತ್ಗಾರಾಂನಿಂ ವಾಂಟೊ ಘೆತ್ಲೊ.
ಮಿಸಾಬಲಿದಾನಾ ವೆಳಾರ್ ಆಪ್ಣೆಂ ದಿಲ್ಲ್ಯಾ ಉಲೊವ್ಪಾಂತ್ ಬಿಸ್ಪ್ ಮ್ಯಾಕ್ಗ್ರಾಟನ್ ಹಾಣೆಂ ಮೊಂತಿ ಫೆಸ್ತಾದ್ವಾರಿಂ ಆಂಕ್ವಾರ್ ಮರಿಯೆಕ್ ಮಾನ್ ಕರ್ಚ್ಯಾ ಬರಾಬರ್ ಕೊಂಕ್ಣಿ ಭಾಸ್ ಕಲಾ ಆನಿ ಸಂಸ್ಕ್ರತಿ ಹ್ಯಾ ಪಯ್ಶಿಲ್ಯಾ ಕೆನಡಾಂತ್ ಜಿವಂತ್ ದವರುಂಕ್ ಪೆಚಾಡ್ಚ್ಯಾ ಮ್ಯಾಕ್ ಸಂಸ್ಥ್ಯಾಕ್ ತಸೆಂಚ್ ಸರ್ವ್ ಮಂಗ್ಳುರ್ಗಾರಾಂಕ್ ಉಲ್ಲಾಸಿಲೆಂ ಆನಿ ತಾಂಚಾ ಸರ್ವ್ ಮುಕ್ಲ್ಯಾ ಯೋಜನಾಂಕ್ ಬರೆಂ ಮಾಗ್ಲೆಂ.
ಮಿಸಾಬಲಿದಾನಾ ಉಪ್ರಾಂತ್ ಕೆನಡಾಂತ್ ನಾಂವ್ ವ್ಹೆಲ್ಲ್ಯಾ ಪಾಪಾ ಜುವಾಂವ್ ಪಾವ್ಲ್ II ಸಾಲಾಂತ್ ಮ್ಯಾಕ್ ಕಾರ್ಯಾಕಾರಿ ಸಮಿತಿನ್ ಆಸಾ ಕೆಲ್ಲೆಂ ಸಾಂಸ್ಕ್ರತಿಕ್ ಕಾರ್ಯೆಂ ಮ್ಯಾಕ್ ಅಧ್ಯಕ್ಶ್ ರೊನಾಲ್ಡ್ ಫೆರ್ನಾಂಡಿಸ್ ಹಾಚ್ಯಾ ಘನಾಧಿಕ್ ಯೆವ್ಕಾರಾಚ್ಯಾ ಉತ್ರಾನಿಂ ಆರಂಬ್ಲೆಂ. ಆಪ್ಲ್ಯಾ ಉಂಚ್ಲ್ಯಾ ಸ್ವಾಗತಾಚ್ಯಾ ಭಾರತೀ ನಾಚಾನ್ ರೆನಿಟಾ ಫೆರ್ನಾಂಡಿಸ್ ಹಿಣೆಂ ಸಭಿಕಾಂಕ್ ಚಕಿತ್ ಕೆಲೆಂ. ಸರ್ವ್ ಪೋಶಕಾಂಕ್ ಗೊವ್ಳಿಬಾಪ್ ವಿಲ್ಲಿಯಮ್ ಮ್ಯಾಕ್ಗ್ರಾಟನ್ ಹಾಣೆಂ ಮುಡ್ದೊಮಾಂಚಿ ಬೆಂಜಾರ್ ವಾತ್ ದೀವ್ನ್ ಮಾನ್ ಕೆಲೊ. ಬಾಪ್ ಎಡ್ವಿನ್ ಡಿಸೊಜಾಚ್ಯಾ ಆಶೀರ್ವಾದಾನ್ ನವೆಂ ಸೆಂವ್ಕ್ ವಿವಿಧ್ ಕೊಂಕ್ಣಿ ಪ್ರತಿನಿಧಿಂಕ್ ವೆದಿರ್ ಯೇಂವ್ಕ್ ಆಪವ್ಣೆ ದೀವ್ನ್ ನವ್ಯಾ ಜೆವ್ಣಾಚಿ ಸುರ್ವಾತ್ ಕೆಲಿ.
ನವೆಂ ಜೆವಾಣ್ ಸೆಂವ್ಚ್ಯಾ ಪಯ್ಲೆಂ ಫಾಮಾದ್ ಕೊಂಕ್ಣಿ ಕಲಾಕಾರ್ ಮನೋಹರ್ ಪಾಯ್ಸ್ ಹಾಣೆಂ ಲಿಖುನ್ ದಿಗ್ದರ್ಶಿಲ್ಲೊ "ಮರಿ ಜಲ್ಮಲಿ" ಸಂಗೀತ್ಮಯ್ ನಾಟ್ಕುಳೊ ಸಾಲ್ಭರ್ ಹಾಜರ್ ಆಸ್ಲ್ಲ್ಯಾ ಸಭಿಕಾಂಚಿ ಕಾಳ್ಜಾಂ-ಮನಾಂ ಜಿಕುಂಕ್ ಸಕ್ಲೊ. ಹ್ಯಾ ನಾಟ್ಕುಳ್ಯಾಂತ್ ಪಾತ್ರ್ ಘೆತ್ಲ್ಲ್ಯಾ ರೊನಾಲ್ಡ್ ಡಿಸೊಜಾ, ಪ್ರೆಸಿಲ್ಲಾ ಡಿ’ಕುನ್ಹಾ, ಲೂಸಿ ಡಿ’ಮೆಲ್ಲೊ, ರೊನಾಲ್ಡ್ ಮೊಂತೆರೊ, ಕ್ಯಾಸಂದ್ರಾ ಡಿ’ಕುನ್ಹಾ, ನೈರಾ-ನೇಟನ್ ಮಿನೆಜಸ್, ಟೆರೆನ್ಸ್ ಡಿಸೊಜಾ ಆನಿ ಸೆನೆಕಾ ರೇಗೊ ಹಾಂಚೆ ನಟನ್ ಬೋವ್ ಉಂಚ್ಲ್ಯಾ ಮಟ್ಟಾಚೆಂ ಜಾವ್ನ್ ಆಸ್ಲ್ಲೆಂ. ಹ್ಯಾ ನಾಟ್ಕುಳ್ಯಾಂತ್ ನಾಚಾಚೊ ಸಾಂಗಾತ್ ದಿಲ್ಲ್ಯಾ ತಾಲೆಂತ್ವಂತ್ ವಿನಿಶಾ-ಕೆರಿಸ್ಸಾ ಡಿಸೊಜಾ ಆನಿ ನತಾಶಾ ಡಿ’ಸೊಜಾ ಹಾಣಿಂ ಆಪ್ಲ್ಯಾ ಉಂಚ್ಲ್ಯಾ ನಾಚಾನ್ ಸಭಿಕಾಂಕ್ ಖುಶ್ ಕೆಲೆಂ.
ಹರ್ಯೆಕ್ ವರ್ಸಾ ಶಿಕ್ಪಾಂತ್ ಊಂಚ್ಲೆಂ ಪ್ರದರ್ಶನ್ ದಾಖಯ್ಲೆಲ್ಯಾ ಮಂಗ್ಳುರಿ ವಿದ್ಯಾರ್ಥಿಂಕ್ ಸ್ಕೊಲರ್ಶಿಪ್ ದಿಂವ್ಚೆಂ ವೆದಿ ಕಾರ್ಯೆಂ ಮ್ಯಾಕ್ ಉಪಾಧ್ಯಕ್ಶ್ ಜೆನೆಟ್ ಡಿ’ಸೊಜಾನ್ ಅಪುರ್ಭಾಯೆನ್ ಚಲವ್ನ್ ವ್ಹೆಲೆಂ. ಯು.ಎ.ಇ.ಎಕ್ಸ್ಚೆಂಜ್ ತರ್ಫೆನ್ ದಿವ್ಯಾ ಕಾಮತ್ ಹಿಣೆಂ 500 ಡೊಲ್ಲರಾಂಚಿ ಚೆಕ್ಕ್ ಕ್ಲಿಂಟನ್ ಡಿಸಿಲ್ವಾಕ್ ತಸೆಂಚ್ ರೆಜಿನಾಲ್ಡ್ ಆನಿ ಮೇರಿ ಫೆರ್ನಾಂಡಿಸ್ ಹಾಣಿಂ 250 ಡೊಲ್ಲರಾಂಚಿ ಚೆಕ್ಕ್ ಮಿಚೆಲ್ ಡಿಮೆಲ್ಲೊಕ್ ಹಾತಾಂತರ್ ಕೆಲಿ.
ಮೊಂತಿ ಫೆಸ್ತ್ ಸಂಬ್ರಮಾಂತ್ ವಾಂಟೊ ಘೆತ್ಲ್ಲ್ಯಾ ಫಾಮಾದ್ ಕೊಂಕ್ಣಿ ನಾಟಕಿಸ್ತ್, ಹಾಸ್ಯ್ ಚಕ್ರವರ್ತಿ, "ಮ್ಹಾತಾರೊ-ಚರ್ಬೆಲಾ" ಖ್ಯಾತೆಚೊ ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾ ಹಾಕಾ ಕೆನಡಾಂತ್ಲ್ಯಾ ಮಂಗ್ಳುರ್ಗಾರಾಂ ತರ್ಫೆನ್ ಬಾಪ್ ಎಡ್ವಿನ್ ಡಿ’ಸೊಜಾ ಮಾನಾಚೊ ಶೆಲೊ ಪಾಂಗ್ರುನ್ ಮಾನ್ ಕೆಲೊ. ಕಾರ್ಯಸುತಾರಿ ಮನೋಹರ್ ಪಾಯ್ಸಾನ್ ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾಚಿ ಮಟ್ವಿ ವಳಕ್ ದೀವ್ನ್ ತಾಚ್ಯಾ ಆಪಾರ್ ಕೊಂಕ್ಣಿ ದೇಣ್ಗೆಚಿ ಝಳಕ್ ಸಭಿಕಾಂಕ್ ದಿಲಿ. ಸನ್ಮಾನಾ ಉಪ್ರಾಂತ್ ಪ್ರಾನ್ಸಿಸಾಬಾನ್ ಆಪ್ಲ್ಯಾ ಉಲೊವ್ಪಾಂತ್ ಲೊಕಾಕ್ ಪೊಟ್ಭರ್ ಹಾಸಯ್ಲೆಂ.
[ತಸ್ವೀರ್ಯೊ ವ್ಹಡ್ ಕರುಂಕ್, ತಸ್ವೀರೆಂಚೆರ್ ಕ್ಲಿಕ್ ಕರಾ]
ಕೆನಡಾಂತ್ ನಾಂವ್ ವ್ಹೆಲ್ಲ್ಯಾ ಕೊಂಕಣ್ ಡಿಲೈಟ್ ಹಾಣಿಂ ದಿಲ್ಲೆಂ ರುಚಿಕ್ ನವೆಂ ಜೆವಾಣ್ ಸಭಿಕಾಂಕ್ ಖುಶೆಚೊ ಧೇಂಕ್ ದೀಂವ್ಕ್ ಸಕ್ಲೆಂ. ಕಾರ್ಯಾಚ್ಯಾ ಆಕ್ರೇಕ್ ಖ್ಯಾತ್ ಸಂಗೀತ್ಗಾರ್ನ್ ಮರ್ಲಿನ್ ರೊಡ್ರಿಗಸ್ ಆನಿ ಸಾಂಗಾತ್ಯಾನಿಂ ಗಾಯ್ಲೆಲ್ಯಾ "ಹೊ ಬೇಲೆ" ಆನಿ "ರವಿ ಬುಡೊನ್ ಗೆಲೊ" ಪದಾನಿಂ ಸರ್ವಾಂಕ್ ಸಂಗೀತಾಚ್ಯಾ ಲಾರಾನಿಂ ಧಲಯ್ಲೆಂ. ನಿಮಾಣೆಂ ಲಾವ್ದಾತೆ ಗಾಯಾನಾಂಧ್ವಾರಿಂ ಕಾರ್ಯೆಂ ಸಮಾಪ್ತ್ ಜಾಲೆಂ. ಅಖ್ಖೆಂ ಸಾಂಸ್ಕ್ರತಿಕ್ ಕಾರ್ಯೆಂ ಕೊಂಕ್ಣೆಚೊ ಮಹಾನ್ ಕಾರ್ಯಸುತಾರಿ ತಶೆಂಚ್ ಉಂಚ್ಲ್ಯಾ ತಾಲೆಂತಾಂಚೆ ಭಂಡಾರ್ ಮನೋಹರ್ ಪಾಯ್ಸ್ ಹಾಚ್ಯಾ ಗುರ್ಕಾರ್ಪಣಾಖಾಲ್ ಚಲ್ಲೆಂ.
ಉತ್ತೀಮ್ ಡಿಜೆ ಬ್ಲೂಲೈಟ್ ಆಡಿಯೊ ಹಾಚೊ ಮ್ಹಾಲಕ್ ರುಡಿ ಡಿಸೊಜಾ, ಆಡಿಯೊ ವಿಜುವಲ್ ಹಾಚಿ ಜವಾಬ್ದಾರಿ ಖಾಂದ್ ಮಾರ್ಲ್ಲ್ಯಾ ಲಿಯೊನ್ ಲೊಬೊ ಆನಿ ಮ್ಯಾಕ್ಸಿಮ್ ಡಿ’ಮೆಲ್ಲೊ ಹಾಂಕಾ ಸಾಂಗಾತಾಚ್ ಸಾಂಸ್ರ್ಕತಿಕ್ ಕಾರ್ಯದರ್ಶಿ ಜೆರಿ ಕಾರ್ಡೊಜಾ ಆನಿ ಮ್ಯಾಕ್ ಕಾರ್ಯಕಾರಿ ಸಮಿತಿಕ್ ತಾಂಚಾ ಸರ್ವ್ ವಾಂವ್ಟಿಕ್ ಆನಿ ಉಂಚ್ಲ್ಯಾ ಪ್ರದಶ್ರನಾಖಾತಿರ್ ಕೆನಡಾಂತ್ಲಿ ಕೊಂಕ್ಣಿ ಪರ್ಜಾ ಚೆಪೆಂ ಉಕಲ್ನ್ ಮಾನ್ ಭಾಗಾಯ್ತಾ ಆನಿ ಮುಕಾರೀ ತಾಂಚೆ ಥಾವ್ನ್ ಅಸಲಿಂಚ್ ಊಂಚ್ಲಿ ಕಾರ್ಯಿಂ ಕೆನಡಾಂತ್ಲ್ಯಾ ಕೊಂಕ್ಣಿ ಪರ್ಜೆಕ್ ಫಾವೊ ಜಾಂವ್ದಿತ್ ಮ್ಹಣ್ ಆಂವ್ಡೆತಾ.
ಭಾತ್ಮಿ: ಜೆರಿ ಡಿ’ಮೆಲ್ಲೊ ಬೆಂದುರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
