ಕವಿತಾಗೋಶ್ಟಿ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕುವೆಯ್ಟಾಂತ್ ಕವಿತಾಗೋಶ್ಟಿ ಆನಿ ಮೆಲ್ಕಿ ಹೊಸ್ಪೇಟಾಕ್ ಸನ್ಮಾನ್

ಕುವೇಯ್ಟ್ (ನವೆಂಬರ್ 24): ಪಾಟ್ಲ್ಯಾ ಚಾಳಿಸ್ ವರ್ಸಾಂ ಥಾವ್ನ್ ಕೊಂಕ್ಣಿ ಸಾಹಿತ್ಯಾಂತ್ ಫಾಮಾದ್ ಜಾಲ್ಲೊ ಸಮಾಜ್‌ಸೆವಕ್ ಯಾಜಕ್ ಮಾ|ಬಾ|ವಿ.ಜೆ.ಮಿನೇಜಸ್ (ಮೆಲ್ಕಿ ಹೊಸ್ಪೆಟ್) ಹಾಂಕಾಂ ಹ್ಯಾಚ್ ನವೆಂಬ್ರಾಚಾ 24 ತಾರಿಕೆರ್ ಕುವೆಯ್ಟಾಂತ್, ದಾಯ್ಜ್ ಪಂಗ್ಡಾನ್ ಸನ್ಮಾನ್ ಕೆಲೊ.

ಕುವೆಯ್ಟಾಂತ್ಲೊ ಫಾಮಾದ್ ಸಮಾಜ್ ಸೆವಕ್ ಆನಿ ಮುಖೆಲಿ ಬಾಬ್ ಎಲಿಯಾಸ್ ಸಾಂಕ್ತಿಸ್ ಹಾಚ್ಯಾ ಅಧ್ಯಕ್ಷ್‌ಪಣಾರ್ ಚಲ್‌ಲ್ಲ್ಯಾ ಹ್ಯಾ ಕಾರ್‍ಯಾಚೆ ಮುಖೆಲ್ ಸಯ್ರೆ ಜಾವ್ನ್ ಫಾಮಾದ್ ಕೊಂಕ್ಣಿ ವಾವ್ರಾಡಿ, ಸಾಹಿತಿ, ಕವಿ ಬಾಬ್ ಬೆನ್ನಾ ಫಜೀರ್ ಆನಿ ಅನ್ಯೇಕ್ಲೊ ಮಾಲ್ಘಡೊ ಸಾಹಿತಿ, ಕವಿ ಬಾಬ್ ಗಿಬ್ಬಾ ಕುಲ್ಶೇಕರ್ ಹಾಜರ್ ಆಸ್‌ಲ್ಲ್ಯಾ ಹ್ಯಾ ಕಾರ್‍ಯಾಂತ್ ಆಯ್ಲೆವಾರ್ ’ದಿವೊ ಸಾಹಿತಿಕ್ ಪುರಸ್ಕಾರ್’ ಜಿಕ್ಪಿ ಮಾ|ವಿ.ಜೆ.ಮಿನೇಜಸ್ ಹಾಂಕಾಂ ಮಾನ್‌ಪತ್ರ್ ಆನಿ ಉಡಾಸಾಚಿ ಕಾಣಿಕ್ ದೀವ್ನ್ ಸನ್ಮಾನ್ ಕೆಲೊ.

ಬಾಯ್ ಪ್ರಿಯಾ ಸಿಕ್ವೇರಾನ್ ಕಾರ್‍ಯಾಚೆಂ ಸುರ್ವಾತ್ ಕರುನ್ ಸಯ್ರ್ಯಾಂಕ್ ಮಾನಾಚಿ ಬಸ್ಕಾ ಸ್ವೀಕಾರ್ ಕರುಂಕ್ ಉಲೊ ದಿತಚ್ಚ್, ಬಾಬ್ ವಲ್ಲಿ ಕ್ವಾಡ್ರಸಾನ್ ಸಯ್ರ್ಯಾಂಚಿ ವಳೊಕ್ ಕರುನ್ ದಿಲಿ. ಬಾಯ್ ಐಡಾ ಡಿ’ಸಿಲ್ವಾ ಪಾಲಡ್ಕಾ ಹಿಣೆಂ ಮೆಲ್ಕಿ ಹೊಸ್ಪೇಟ್ ಹಾಂಚಿ ಸವಿಸ್ತಾರ್ ರಿತಿನ್ ವಳೊಕ್ ಕರುನ್, ತಾಂಚಾ ಸಾಹಿತಿಕ್, ಸಮಾಜಿಕ್ ವಾವ್ರಾಚೆರ್ ವಿವರ್ ದಿಲೊ. ಉಪ್ರಾಂತ್ ಬಾಬ್ ಗಿಬ್ಬಾ ಕುಲ್ಶೇಕರ್ ಹಾಣೆಂ ಮಾನ್‌ಪತ್ರ್ ವಾಚುನ್ ಮಾ|ಬಾ|ವಿ.ಜೆ.ಮಿನೇಜಸ್ ಹಾಂಕಾಂ ಹಸ್ತಾಂತರ್ ಕೆಲೆಂ. ಬಾಬ್ ಎಲಿಯಾಸ್ ಸಾಂಕ್ತಿಸ್ ಹಾಣೆಂ ಉಡಾಸಾಚಿ ಕಾಣಿಕ್ ದಿತೆಚ್ಚ್, ಬಾಬ್ ಬೆನ್ನಾ ಫಜೀರ್ ಹಾಣೆಂ ಅಜೀಕ್ ಪಾಂತ್ತೀಸ್ ವರ್ಸಾಂಧಿಂ ಮಾ|ಬಾ|ವಿ.ಜೆ.ಮಿನೇಜಸಾನ್ ಸುರು ಕೆಲ್ಲ್ಯಾ ಸಾಮಾಜಿಕ್ ಸುಧಾರಣ್ ಸಂಘಾಚಿ ಸವಿಸ್ತಾರ್ ರಿತಿನ್ ವಳೊಕ್ ಕರ್ನ್ ದಿಲಿ. ಹ್ಯಾ ಸಂಘಾಂತ್ ಆಸ್‌ಲ್ಲೆ ದೋಗ್ ಸಾಂದೆ ಬಾಬ್ ಲಾರೆನ್ಸ್ ಪಿಂಟೊ ಕೆಲರಾಯ್ ಆನಿ ಬಾಬ್ ಬೆನ್ನಾ ಫಜೀರ್ ಹಾಜರ್ ಆಸೊನ್, ಹ್ಯಾ ಸಂಘಾಂತ್ ವಾವ್ರ್ ಕರುಂಕ್ ಭಗುಂಕ್ ಮೆಳ್‌ಲ್ಲ್ಯಾ ಆಣ್ಕಣ್ಯಾಂವಿಶಿಂ ಆಪಾಪ್ಲೆ ವಿಚಾರ್ ವೆಕ್ತ್ ಕೆಲೆ.

Placeholder: the original page gave this picture no description, and none has been written yet. It came from daaiz\daaiz\special\news\frvj.asp.

[ದಾವ್ಯಾ ಥಾವ್ನ್ ಉಜ್ವ್ಯಾಕ್ (ಬಸ್‌ಲ್ಲಿಂ): ಗಿಬ್ಬಾ ಕುಲ್ಶೇಕರ್, ಎಲಿಯಾಸ್ ಸಾಂಕ್ತಿಸ್ ಕಿರೆಂ, ಮಾ|ಬಾ|ವಿ.ಜೆ.ಮಿನೇಜಸ್, ಬೆನ್ನಾ ಫಜೀರ್. (ಉಭಿಂ ಆಸ್ಚಿಂ): ಮೆಲ್ವಿನ್ ಜೆ. ವಾಸ್, ಕು|ಪ್ರಿಯಾ ಸಿಕ್ವೇರಾ, ಕು|ರೀನಾ ಕ್ವಾಡ್ರಸ್, ಐಡಾ ಡಿ’ಸಿಲ್ವಾ, ಲಾರೆನ್ಸ್ ಪಿಂಟೊ, ಮಾರಿಯಾನೊ ಲೂಕಸ್ ದಿನಿಜ್, ಆಲ್ಫ್ರೆಡ್ ಲೋಬೊ, ಸಿರಿಲ್ ಪೆರಿಸ್ ಆನಿ ವಲ್ಲಿ ಕ್ವಾಡ್ರಸ್]

ಮಾ|ಬಾ|ವಿ.ಜೆ.ಮಿನೇಜಸ್ ಆಪ್ಲ್ಯಾ ಉತ್ರಾಂನಿ "ಸಾಮಾಜಿಕ್ ಸುಧಾರಣ್ ಸಂಘ್ ಉದೆಂವ್ಕ್ ಹಾಂವ್ ಕಾರಣ್‌ಕರ್ತ್ ಆಸೊಂಕ್ ಪುರೊ ಪುಣ್ ಹಾಂತುಂ ಸಭಾರಾಂನಿ ಜಾಯ್ತ್ಯಾ ರಿತಿಚೊ ವಾವ್ರ್ ಕೆಲಾ ಆನಿ ಹಾಚಿ ಶ್ರೇಣಿ ತಾಂಕಾಂ ಫಾವೊ. ಆನಿ ಬರಿಂ ಕಾಮಾಂ ಕರ್ತಾನಾ ದೆವಾಚೊ ಸಹಕಾರ್ ಜರೂರ್ ಆಸ್ತಾ ಆನಿ ಹ್ಯಾ ಕಾಮಾಂತ್ ಕೊಣಾಕ್‌ಯೀ ಆಡ್ಕಳ್ ಹಾಡುಂಕ್ ಸಾಧ್ಯ್ ನಾ" ಮ್ಹಣಾಲೊ.

ಉಪ್ರಾಂತ್ ಅಧ್ಯಕ್ಶೀಯ್ ಉಲವ್ಪಾಂತ್ ಬಾಬ್ ಎಲಿಯಾಸ್ ಸಾಂಕ್ತಿಸ್ "ಆಮ್ಚಾ ಸಮಾಜೆಂತ್ ಬರಿ ಸಮಾಜ್ ಮಾಂಡುನ್ ಹಾಡ್ಚೆ ದಿಶೆಂತ್ ವಾವ್ರ್ ಕರ್ಚೆ ಮುಖೆಲ್ಯಾಂಚೊ ಆಭಾವ್ ಆಸಾ, ತೆಚ್ಚ್‌ಪರಿಂ ಆಪ್ಲಿ ಜಾಣ್ವಾಯ್ ಎಕಾಮೆಕಾ ವಾಂಟುನ್, ಎಕಾಮೆಕಾ ಕುಮೊಕ್ ಕರ್ನ್ ಜೊಡ್ಚೊ ತೊ ಅನ್ಭೋಗ್ ಭೋವ್ ಮಧುರ್" ಮ್ಹಣಾಲೊ.

ಉಪ್ರಾಂತ್ ಬಾಬ್ ಮೆಲ್ವಿನ್ ಜೆ. ವಾಸ್ ಕೆಲರಾಯ್ ಹಾಚ್ಯಾ ಅಧ್ಯಕ್ಷ್‌ಪಣಾರ್ ಚಲ್‌ಲ್ಲ್ಯಾ ಕವಿತಾಗೋಶ್ಟಿಂತ್ ಕವಯತ್ರಿ ಬಾಯ್ ಐಡಾ ಡಿ’ಸಿಲ್ವಾ ಪಾಲಡ್ಕಾನ್ ಮಾ|ಬಾ|ವಿ.ಜೆ.ಮಿನೇಜಸ್ ಹಾಂಚೆರ್ ಬರಯಿಲ್ಲಿ ಕವಿತಾ ವಾಚುನ್ ಸಾಂಗ್ಲಿ, ಬಾಯ್ ರೀನಾ ಕ್ವಾಡ್ರಸ್ ಪಾಂಗ್ಳಾ, ಬಾಯ್ ಪ್ರಿಯಾ ಸಿಕ್ವೇರಾ ಫೆರಾರ್, ಬಾಬ್ ಬೆನ್ನಾ ಫಜೀರ್, ಬಾಬ್ ಮಾರಿಯಾನೊ ಲೂಕಸ್ ದಿನಿಜ್, ಬಾಬ್ ವಲ್ಲಿ ಕ್ವಾಡ್ರಸ್, ಬಾಬ್ ಸಿರಿಲ್ ಪೆರಿಸ್ ಆನಿ ಬಾಬ್ ಮೆಲ್ವಿನ್ ಜೆ. ವಾಸ್ ಕೆಲರಾಯ್ ಹಾಣಿಂ ಆಪಾಪ್ಲಿಂ ಕವಿತಾ ವಾಚುನ್ ಸಾಂಗ್ಲಿಂ. ಬಾಬ್ ಆಲ್ಫ್ರೆಡ್ ಲೋಬೊ, ಬಾಬ್ ಗಿಬ್ಬಾ ಕುಲ್ಶೇಕರ್, ಬಾಬ್ ಲಾರೆನ್ಸ್ ಪಿಂಟೊ ಹಾಣಿಂ ಭಾಗ್ ಘೆತ್ಲೊ.

ಬಾಬ್ ಮೆಲ್ವಿನ್ ಜೆ. ವಾಸ್ ಕೆಲರಾಯ್ ಹಾಣೆಂ ಉಪ್ಕಾರ್ ಬಾವುಡ್ಲೊ.

ಕವಿತಾಗೋಶ್ಟಿ

ಸಮನ್ವಯಾಂಚೆಂ

ವಸಯಾಂತ್

ಟೊಮಸ್