ಕವಿತಾ’,

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ವಿಮರ್ಶ್ಯಾ ಲೇಖನ್ - 5

ಎಚ್ಚೆಮಾಚ್ಯಾ ’ಚಲ್ಯಾಂಕ್ ಚತ್ರಾಯ್’, ’ಕಯ್ದ್ಯಾಚ್ಯೊ ಕವಿತಾ’, ’ಬಾಮುಣಾಂಚೆಂ ಚೆಡುಂ’ ಬುಕಾಂಚೆರ್ ಲೇಖನ್. 

ಕವಿ: ಎಚ್ಚೆಮ್.

ಪ್ರಕಾಶಕ್: ಪೆರ್ನಾಲ್ ಪ್ರಕಾಶನ್, ಆಶಾವಾದಿ ಪ್ರಕಾಶನ್.

ಶ್ಹರೊ: ಮೋಗ್, ಸಂಘರ್ಷ್, ವಿಶಾಲ್ ನದರ್ - ಎಚ್ಚೆಮಾಚೊ ಕಾವ್ಯಾ ಸಂಸಾರ್ ಹೊ. ತಾಚೆ ತೀನ್‌ಯಿ ಕವಿತಾ ಸಂಗ್ರಹ್ ಸೂಕ್ಶಿಮ್ ರಿತಿಂ ಅಭ್ಯಾಸ್ ಕರ್ನ್ ಕವಿಕ್ ಸಮ್ಜೊಂಚೆಂ ಪ್ರೇತನ್ ಹಾಂವೆಂ ಹಾಂಗಾಸರ್ ಕೆಲಾಂ. - ಮೆಲ್ವಿನ್ ಪಿಂಟೊ.

ಎಚ್ಚೆಮ್

ಎಚ್ಚೆಮಾಚೊ ಕಾವ್ಯಾಸಂಸಾರ್

ಮೆಲ್ವಿನ್ ಪಿಂಟೊ, ನೀರುಡೆ

ಇಂಗ್ಲಿಶ್ ಸಾಹಿತ್ಯಾಂತ್ ರೊಮ್ಯಾಂಟಿಕ್ ಪ್ರಕಾರಾನ್ ಥಂಯ್ಚ್ಯಾ ಕಾವ್ಯಾ ಸಂಸಾರಾಂತ್ ನವೆಂ ಲ್ಹಾರ್ ವ್ಹಾಳಾಶೆಂ ಕೆಲೆಂ. ಕನ್ನಶಾಂತ್ ನವೋದಯ್, ತ್ಯಾ ಉಪ್ರಾಂತ್ ನವ್ಯ್ ಪ್ರಕಾರಾನ್‌ಯಿ ಅಸಲೆಂಚ್ ಲ್ಹಾರ್ ಹಾಡ್ಲೆಂ. ಸದ್ದ್ಯಾಕ್ ನವ್ಯೋತ್ತರರಾಚೆಂ ಅಶೀರ್ ಲ್ಹಾರ್ ಸವ್ಕಾಸ್ ವ್ಹಾಳೊನ್ ಆಸಾ.

ಸಭಾರ್ ತೆಂಪಾ ಉಪ್ರಾಂತ್ ಕೊಂಕ್ಣಿ ಕಾವ್ಯಾ ಸಂಸಾರಾಂತ್‌ಯಿ ನವೆಂ ಲ್ಹಾರ್ ವ್ಹಾಳ್ಚೆಂ ದಿಸ್ತಾ. ಪಾಟ್ಲ್ಯಾ ಸುಮಾರ್ ಚಾರ್-ಪಾಂಚ್ ವರ್ಸಾಂನಿ ಹಾಂಗಾಚ್ಯಾ ಕಾವ್ಯಾ ಸಂಸಾರಾಂತ್ ಪ್ರಭುದ್ದ್ ಕವಿ ಉಂಚ್ಲೆಂ ಕವಿತಾ ಸಾಹಿತ್ಯ್ ರಚುನ್ ಆಸಾತ್. ಹಿ ಗೋಷ್ಟಿ ಖಂಡಿತ್ ಕವಿತಾ ಮೊಗಿಂಕ್ ಧಾದೊಸ್ಕಾಯೆಚಿ. ಮೆಲ್ವಿನ್ ಲುದ್ರಿಗ್, ಎಚ್ಚೆಮ್, ಆಂಡ್ರು ಎಲ್. ಡಿ’ಕುನ್ಹಾ, ವಿಲ್ಸನ್ ಕಟೀಲ್, ವಲ್ಲಿ ಕ್ವಾಡ್ರಸ್, ಅವಿನಾ ಮಿಯಾರ್ ’ನವೆಂ ಲ್ಹಾರ್’ ಮೆಳಿಕ್ ಮೆಳ್ಚಿಂ ಕವಿ-ಕವಯತ್ರಿ. ಹಾಂಚ್ಯಾ ಕವಿತೆಚೆರ್ ಲಾಗ್ಸಿಲ್ಯಾನ್ ನದರ್ ಮಾರ್‌ಲ್ಲ್ಯಾ ಮ್ಹಾಕಾ ಕೊಂಕ್ಣಿ ಕವಿತಾ ಶೆತ್ ಪರಿಪಿಕಾಯೆಕ್ ಪಾವ್ಲಾಂ (’Come of age’) ಕಶೆಂ ಭಗ್ತಾ.

ಕವಿ ಎಚ್ಚೆಮ್ (ಪುರ್‍ತೆಂ ನಾಂವ್ - ಹೆನ್ರಿ ಮೆಂಡೊನ್ಸಾ, ಪೆರ್‍ನಾಲ್) ’ನವೆಂ ಲ್ಹಾರ್’ ಮೆಳಿಂತ್ ಪ್ರಮುಕ್ ಮ್ಹಣ್ಯೆತ್. ಎದೊಳ್‌ಚ್ ತಾಚೆ ತೀನ್ ಕವಿತಾ ಸಂಗ್ರಹ್ ಪ್ರಕಟ್ ಜಾಲ್ಯಾತ್. ಹೆ ತೀನ್‌ಯಿ ಸಂಗ್ರಹ್ ಸೂಕ್ಶಿಮ್ ರಿತಿಂ ಅಭ್ಯಾಸ್ ಕರ್‍ನ್ ಕವಿಕ್ ಸಮ್ಜೊಂಚೆಂ ಪ್ರೇತನ್ ಹಾಂವೆಂ ಹ್ಯಾ ಲೇಕನಾಂತ್ ಕೆಲಾಂ.

ತೀನ್ ಕವಿತಾ ಸಂಗ್ರಹ್:’ಚಲ್ಯಾಂಕ್

ಚತ್ರಾಯ್’, ’ಕಯ್ದ್ಯಾಚ್ಯೊ ಕವಿತಾ’, ’ಬಾಮುಣಾಂಚೆಂ ಚೆಡುಂ’ - ಎಚ್ಚೆಮಾಚೆ ತೀನ್ ಕವಿತಾ ಸಂಗ್ರಹ್. ತಾಚೊ ಪಯ್ಲೊ ಸಂಗ್ರಹ್ ’ಚಲ್ಯಾಂಕ್ ಚತ್ರಾಯ್’ ಪೆರ್‍ನಾಲ್ ಪ್ರಕಾಶನಾದ್ವಾರಿಂ 1999 - ಂತ್ ಪರ್‍ಗಟ್ ಜಾಲೊ. ಪಯ್ಲ್ಯಾಚ್ ಸಂಗ್ರಹಾಂತ್ ಹೊ ಕವಿ ಖರೊಚ್ ಪ್ರಬುದ್ದ್ ಆನಿ ಪರಿಪಿಕಾಯೆಕ್ ಪಾವ್‌ಲ್ಲೊ ಕಸೊ ದಿಶ್ಟಿಕ್ ಪಡ್ತಾ. ದಾಕ್ಲ್ಯಾಕ್, ’ಚಲ್ಯಾಂಕ್ ಚತ್ರಾಯ್’ ಕವಿತೆಚ್ಯೊ ಹ್ಯೊ ದೋನ್ ಪಂಗ್ತಿಚ್ ಸಾಕ್ಸ್:
’ಫುಲ್ ಉಬೊನ್ ಕಾಂಟಿಯೆರ್ ಬಸ್ಲೆಂ ಮುಸಾಕ್ ಖುಂಟುನ್ ಚೆಡ್ವಾನ್ ಪಾಂತಿಯೆರ್ ಮಾಳ್ಳೆಂ.’

ವಿಶೇಸ್ ಕರ್‍ನ್ ಜಿಣಿಯೆಂತ್ ವಿಂಚವ್ಣ್ ಕರ್‍ಚೆವಿಶಿಂ ಜಾಣ್ತೆಂ ಚಿಂತಪ್ ಆಟಂವ್ಚಿ ಕವಿತಾ ಹಿ.

ಸಹಜ್ ಮ್ಹಳ್ಳೆಪರಿಂ ಆಪ್ಲ್ಯಾ ಪಯ್ಲ್ಯಾ ಸಂಗ್ರಹಾಂತ್ ಎಚ್ಚೆಮ್ ಮೊಗಾವಿಶಿಂಚ್ ಚಡಿತ್ ಉಲಯ್ತಾ. ತಶೆಂ ಮ್ಹಣ್ ತಾಚ್ಯಾ ಮೊಗಾಂತ್ ಅಥ್ವಿಚ್ ದೀಶ್ಟ್ ಆಸಾ:

’ಹಾಸಾನಾಕಾಗೊ ಆಂಬೊರ್ ಪಿಕೆಂ
ಗಾಲಾಕ್ ಬಸಯ್ ಫೊಂಡ್ಕುಲಾಂತ್ ಲಿಪ್ತಾಂಗೊ’ (’ಉಡಾಸಾಂತ್ ರಾವ್ತಾಂ’)

’ಕಯ್ದ್ಯಾಚ್ಯೊ ಕವಿತಾ’ ಸಂಗ್ರಹ್ ಆಶಾವಾದಿ ಪ್ರಕಾಶನಾ ಥಾವ್ನ್ 2005 - ಂತ್ ಪರ್ಗಟ್ ಜಾಲ್ಲೊ ತಾಚೊ ದುಸ್ರೊ ಸಂಗ್ರಹ್. ಖೊಲಾಯೆನ್ ಪಳೆಲ್ಯಾರ್ ಹೊ ಸಂಗ್ರಹ್‌ಯಿ ಎಕೆ ರಿತಿಂ ’ಮೊಗಾ ಕವಿತೆಂ’ನಿಂಚ್ ಭರ್‌ಲ್ಲೊ ದಿಸ್ತಾ. ಮೋಗ್‌ಚ್ ಥಂಯ್ಚೊ ಪ್ರಮುಕ್ ವಿಶಯ್. ತಶೆಂ ಮ್ಹಣ್ ತೊ ತೆಲ್ತೊ ಮೋಗ್ ನ್ಹಂಯ್; ಬಗಾರ್, ಚಡಿತ್ ಜವಾಭ್ದಾರಿಯೆಚೊ ಮೋಗ್. ಅನ್‌ಎಕೆ ರಿತಿಂ ಪಳೆಲ್ಯಾರ್ ಹೊ ಮೋಗ್ ಸಾಮಾಜಿಕ್ ಹುಸ್ಕೊ ಜಾವ್ನ್‌ಯಿ ಬದಲ್ಲೊ ಆಮಿ ದೆಕ್ತಾಂವ್:

’ಕೆನ್ನಾಂಯಿ ಅಸೊ ಉಜೊ ಪೆಟಯ್ನಾಕಾತ್
ಮಾಸಾಂ ಭಾಜ್ತಾತ್, ಸಗ್ತಾಂ ಪೆಟ್ತಾತ್
ಬೊಬೆಕ್, ಶ್ಹೆರ್ ಲುಟ್ತಾನಾ
ಪಿರಾಣ್-ಲಜ್ ಸಾಂಗಾತಾ ಲುಟ್ತಾತ್’ (ವಿನತಿ)

ನವ್ಯ್ ಶಯ್ಲಿ, ಥಂಯ್ಚಿ ಸಾಂಕೇತಿಕತಾ ಹ್ಯಾ ಸಂಗ್ರಹಾಂತ್ ಭರ್ಪೂರ್ ವ್ಹಾಳ್ಳ್ಯಾ. ಹ್ಯಾ ಸಂಗ್ರಹಾದ್ವಾರಿಂ ಎಚ್ಚೆಮಾನ್ ಅಪುಣ್‌ಯಿ ನವ್ಯಾ ಲ್ಹಾರಾಚೊ ಕವಿ ಸಂಯ್ಬಾನ್ ಝುಜಾರಿ ಜಾಲ್ಲ್ಯಾ ಖರಿತ್ ನೈಜ್ ಕವಿ ಜಾಂವ್ಚೆಂ ಕಶ್ಟಾಂಚೆಂ. ತಾಂಚೆಂ ಝುಜ್ ಎಕ್ಸುರ್ಪಣಾ ವಿರೋದ್ ಆಸ್ಯೆತ್, ಸಾಮಾಜಿಕ್ ಖರ್ಗಾಂ ವಿರೋದ್ ಆಸ್ಯೆತ್ ವಾ ಅಧಿಕಾರ್‌ಶಾಹಿ, ಪುರೋಹಿತ್‌ಶಾಹಿ ವರ್ಗಾಂ ವಿರೋದ್ ಆಸ್ಯೆತ್. ಹ್ಯಾ ಸಂಗ್ರಹಾದ್ವಾರಿಂ ಎಚ್ಚೆಮ್‌ಯಿ ಏಕ್ ಲಿಖ್ಣೆ ಝುಜಾರಿ ಕಸೊ ಉಜಳ್ತಾ.

’ಬಾಮುಣಾಂಚೆಂ ಚೆಡುಂ’ 2006 -ಂತ್ ಆಶಾವಾದಿ ಪ್ರಕಾಶನಾದ್ವಾರಿಂ ಪರ್ಗಟ್ ಜಾಲ್ಲೊ ಎಚ್ಚೆಮಾಚೊ ತಿಸ್ರೊ ಕವಿತಾ ಸಂಗ್ರಹ್. ಸಾಮಾನ್ಯ್ ವಾಚ್ಪ್ಯಾಕ್‌ಯಿ ಪಾವಾಜೆ ಮ್ಹಳ್ಳ್ಯಾ ಇರಾದ್ಯಾನ್ ತಾಣೆ ಶಯ್ಲಿ ಜಾತಾ ತಿತ್ಲಿ ಸಾದಿ ಕರ್‍ಚಿ, ಉತ್ರಾಂ-ವೋಳ್ ಸಲೀಸ್ ಕರ್‍ಚೆಂ ಪ್ರೇತನ್ ಕೆಲ್ಲೆಂ ದಿಸೊನ್ ಯೆತಾ. ತರಿಪುಣ್ ಕವನಾಂಚಿ ಜಡಾಯ್ ಕಾಂಯ್ ಉಣಿ ಜಾಂವ್ಕ್ ನಾ.

’ಮೋಗ್’ ಮ್ಹಳ್ಳ್ಯಾ ಚಾಲ್ತ್ಯಾ ವಿಶ್ಯಾ ಥಾವ್ನ್ ಮಾತ್ಸೊ ಮೆಕ್ಳೊ ಜಾವ್ನ್ ಹ್ಯಾ ಸಂಗ್ರಹಾಂತ್ ಎಚ್ಚೆಮ್ ಚಡಿತ್ ಆಟವ್ ಕರ್ಚೆಂ, ಗುಂಡಾಯೆಕ್ ದೆಂವ್ಚೆಂ ಪ್ರೇತನ್ ಕರ್ತಾ. ಸಂಗ್ರಹಾಂತ್ ’ಕವಿ’ ಏಕ್ ಪ್ರಮುಕ್ ವಿಶಯ್. ಕವಿ ಜಾಲ್ಲ್ಯಾಚಿ ಗತ್ ಕಸಲಿ ಮ್ಹಳ್ಳೆಂ ಗುಂಡಾಯೆಂತ್ ತೊ ತರ್ಕ್ ಕರ್ತಾ. ಹರ್ಶೆಂಚೆಬರಿ ತಾಚೊ ಸಾಮಾಜಿಕ್ ಹುಸ್ಕೊ ಪರತ್ ಜಾಹೀರ್ ಜಾಲಾ. ಆಪ್ಲ್ಯಾ ಭಂವ್ತಿಂ ಘಡ್ಚೆ ಮಾರ್-ಫಾರ್, ದೊಂಬಿ, ಅನ್ನ್ಯಾಯ್, ಅತ್ತ್ಯಾಚಾರ್ ಇತ್ಯಾದಿಂಕ್ ಪಳೆವ್ನ್ ಕವಿ ಕಿತ್ಲೊ ಕ್ರೋದ್‌ಯಿ ವೆಕ್ತ್ ಕರ್‍ತಾ, ಪುಣ್ ವ್ಯಂಗ್ಯ್ ರಿತಿಂ;

’ಚಾರ್ ಮಾರ್ಗಾರ್ ಉಗ್ತೊ ಜಾಗೊ ಆಸಾ 
ಕೋಣ್ ಪೂತ್ ನಾ ಹಾಂಗಾ 
ಆಮ್ಕಾಂ ವಿಚಾರ್ತಾ 
ತಾಚೆರ್ ಆಮ್ಚೊ ತಂಬು ಮಾರ್ಯಾಂ
ಯೆಯಾ ಆಮಿ ಫೆಸ್ತ್ ಕರುಂಯಾಂ’ (ಯೆಯಾ ಫೆಸ್ತ್ ಕರ್‍ಯಾಂ’)

’ಬಾಮುಣಾಂಚೆಂ ಚೆಡುಂ’ ಹ್ಯಾ ಸಂಗ್ರಹಾಂತ್ಲಿ ಪ್ರಮುಕ್ ಆನಿ ಪರಿಣಾಮ್‌ಕಾರಿ ಪ್ರತಿಮಾ.

ಕವಿ ಏಕ್ ಪಾತ್ರ್:

ಎಕಾ ಕವಿನ್ ದೋನ್ ರಿತಿಂನಿ ಎಕೆ ಸ್ಥಿತೆಕ್ ಸ್ಪಂದನ್ ಕರ್‍ಯೆತ್. ಪಯ್ಲ್ಯಾನ್ ಪಯ್ಸಾ-ಪಯ್ಸ್ ರಾವೊನ್ ವಸ್ತುನಿಶ್ಟ್ (Objective) ಜಾವ್ಯೆತ್ ವಾ ತೆ ಸ್ಥಿತೆ ಭಿತರ್ ರಿಗೊನ್ ವೆಕ್ತಿನಿಶ್ಟ್ (Subjective) ಚಿತ್ರಣ್ ದಿವ್ಯೆತ್. ದೊನ್‌ಯೀ ರಿತಿಂಕ್ ತಾಚೆಂ ತಾಚೆಂ ಮೋಲ್ ಆಸಾ. ಪುಣ್ ಎಚ್ಚೆಮಾಚ್ಯಾ ಚಡ್ತಾವ್ ಕವನಾಂನಿ ತೊ ಸ್ಥಿತೆ ಭಿತರ್ ವಚೊನ್ ಅಪುಣ್ಂಚ್ ಏಕ್ ಪಾತ್ರ್ ಜಾಂವ್ಚೆಂ ಆಮಿ ಪಳಯ್ತಾಂವ್.

ಚಲ್ಯಾಂಕ್ ಚತ್ರಾಯ್ ಸಂಗ್ರಹಾಂತ್ಲ್ಯಾ ’ಕಲ್ವಂತಾಂಚೆಂ ಕೀರ್‍ತನ್’ ಕವನಾಂತ್ ತೊ ಕಲ್ವಂತಾಚೆ ಸ್ಥಿತೆ ಭಿತರ್ ಪ್ರವೇಶ್ ಕರ್‍ತಾ:

’ಖಾಣಾ ದಿಲ್ಯಾಂಯ್ ಪೊಟಾಕ್ ಭುಕ್ ದೀ..
ಗಜ್ಡಿ ದಿಲ್ಯಾಯ್ ದೊಳ್ಯಾಂಕ್ ನೀದ್ ದೀ..’

ಎಕಾ ಕಲ್ವಂತಾಕ್ ಸರ್ವ್ ಆಸೊನ್‌ಯಿ ಶೂನ್ಯ್ ಭಗಾಪ್ ಉದೆಲಾಂ ತೆಂ ಕವಿನ್ ತೆ ಸ್ಥಿತೆ ಭಿತರ್ ರಾವೊನ್ ಪಳೆಲಾಂ. ತಶೆಂ ಮ್ಹಣ್ ಸರ್‍ವ್ ಕಲ್ವಂತಾಂಚಿ ಮನೋಸ್ಥಿತಿ ಅಶಿಚ್‌ಗೀ ಜಾಂವ್ಕ್‌ಯಿ ಪುರೊ. ಹಾಂಗಾ ಕವಿಚಿ ದೀಶ್ಟ್ subjective ಮ್ಹಳ್ಳೆಂ ಆಮಿ ಸಮ್ಜೊಂಕ್ ಜಾಯ್.

ತಸಲೆಚ್ ಶಯ್ಲೆಚೆಂ ಏಕ್ ಕವನ್ ಆಮ್ಕಾಂ ಕಯ್ದ್ಯಾಚ್ಯೊ ಕವಿಆ ಸಂಗ್ರಹಾಂತ್‌ಯಿ ಮೆಳ್ತಾ:

’ಕಾಂಕ್ಣಾಂ ಜಬ್ಬೊರ್ ವಾ ಹಾತ್ ನಿಬೊರ್
ಕಾತಿಂಕ್ ಚೀರ್‍ನ್ ತುಟ್ತಾನಾ ಫುಟ್ತಾತ್ 
ದುಖಾಂ ದೊಳ್ಯಾಂ ಖಾಂಚಿಂನಿ’ (’ಕಾಂಕ್ಣಾಂ ಗಲ್ಲೆಂತ್’)

ಕವಿ ಹಾಂಗಾಚ್ಯಾ ಕಾಂಕ್ಣಾಂ ಗಲ್ಲೆಂತ್ ಪ್ರವೇಶ್ ಘೆತಾ. ಥಂಯ್ಚೆ ಉಮಾಳೆ, ಕಳ್ವಳೆ ಭೋವ್‌ಚ್ ವೆಯಕ್ತಿಕ್ ರಿತಿನ್, ಏಕ್ ಪಾತ್ರ್ ಕಸೊ ಜಾವ್ನ್ ಪಳೆತಾ. ಹಾಂಗಾ ಕಾತಿಂಕ್ ಚೀರ್‍ನ್ ತುಟ್ಚಿಂ ಕಾಂಕ್ಣಾಂ ಫುಟ್ಚೆ ಸವೆಂ ಸ್ವಪ್ಣಾಂಯಿ ತುಟ್ತಾತ್, ಫುಡಾರಾಚ್ಯೊ ಕಾಂಯ್ ಥೊಡ್ಯೊ ಆಶಾಯೀ ತಿರ್‍ಕುಟ್ ಕರ್‍ತಾತ್. ಕವಿ subjective ದೆಕುನ್ ತಾಚೆ ಕಳ್ವಳೆ ಸಬಾವಿಕ್.

’ಬಾಮುಣಾಂಚೆಂ ಚೆಡುಂ’ ಸಂಗ್ರಹಾಂತ್ಲ್ಯಾ ’ಸಯ್ರೆ’ ಕವನಾಂತ್‌ಯಿ ಏಕ್ ವೆವಸ್ತಾ ಆಸಾ; ಚೆಡ್ವಾಕ್ ಕಾಜಾರ್ ಕರ್ನ್ ದೀಂವ್ಕ್ ಆಸ್ಚ್ಯಾ ಕುಟ್ಮಾಚಿ ವೆವಸ್ತಾ! ಥಂಯ್ಚೆ ಅಕ್ಲಾಸ್, ಕಳ್ವಳೆ, ಗಳ್ಚೆ ದುಖಾಂ ಪಾವ್ಳೆ, ಅಧುರಿಂಚ್ ಉರ್ಚಿಂ ಸ್ವಪ್ಣಾಂ ಸರ್ವ್ ಕವಿ ಏಕ್ ಪಾತ್ರ್ ಕಸೊ ಜಾವ್ನ್ ದೆಕ್ತಾ. ಯೇನಾತ್‌ಲ್ಲ್ಯಾ ಸಯ್ರ್ಯಾಂ ಖಾತಿರ್ ಕಸಲಿ ಸರ್ವ್ ತಯಾರಾಯ್ ಚಲ್ತಾ ತಾಚೆಂ ಚಿತ್ರಣ್ ದಿತಾ. ಪುಣ್ ಅಕೇರಿಕ್ ’ಬಾಯ್ ಮಾತ್ರ್ ಅಜೂನ್ ರಡ್ತಾ ಚಿಂತುನ್ ಯೇನಾತ್‌ಲ್ಲ್ಯಾ ಸಯ್ರ್ಯಾಂಕ್, ಭಿತರ್ಲ್ಯಾ ಕುಡಾಂತ್’, ಹಾಂಗಾಚೊ ವ್ಹಡ್ ವಿಪರ್‍ಯಾಸ್ ವಾ ’ಐರನಿ!’

ಹಾಂವೆಂ ಹಾಂಗಾ ಪ್ರಾತಿನಿದಿಕ್ ಕವನಾಂ ಮಾತ್ರ್ ಘೆತ್ಲ್ಯಾಂತ್. ಪುಣ್ ಖಂಡಿತ್ ಹ್ಯಾ ವಿಶಯಾ ಲಗ್ತಿ ಕವನಾಂ ಸಬಾರ್ ಆಸಾತ್. ಎಚ್ಚೆಮ್ ಸಂಯ್ಬಾನ್ ಸೂಕ್ಶ್ಮ್ ಜಾಲ್ಲ್ಯಾನ್ ವೆವಸ್ತೆ ಭಿತರ್ ತಿಳುನ್ ಸ್ಪಂದನ್ ಕರ್‍ಚೆಂ ತಾಕಾ ಅನಿವಾರ್‍ಯ್ ಜಾಲಾಂ.

ಸಂಘರ್ಷ್: ಸಂಘರ್ಷ್ ಅಪ್ರೂಪ್ ಕವಿತಾ ರಚ್ನೆಕ್ ಕಾರಣ್ ಜಾತಾ ತೆಂ ಖಂಡಿತ್. ಅನ್‌ಎಕೆ ರಿತಿಂ ಪಳೆಂವ್ಚೆಂ ತರ್ ಸಂಘರ್ಷ್ ಕವಿ, ವಾಚ್ಪ್ಯಾಕ್ ಚಡಿತ್ ಚಿಂತ್ಪಾಕ್ ಲಾಯ್ತಾ. ಧ್ಯಾನಾಕ್ ಇಡೆಂ ಕರ್ನ್ ದಿತಾ. ಎಚ್ಚೆಮಾಚ್ಯಾ ಕವನಾಂನಿ ಸಂಘರ್ಷ್:ಏಕ್ ಪ್ರಮುಕ್ ವಿಶಯ್. ತೆಲ್ತ್ಯಾ ಮೊಗಾವಿಶಿಂ ಸುರು ಕರ್ನ್, ಜಾಣ್ತ್ಯಾ ಮೊಗಾವಿಶಿಂ ನಿಯಾಳುನ್, ಉಪ್ರಾಂತ್ ಅಪ್ಲಿ ದೀಶ್ಟ್ ಚಡಿತ್ ವಿಶಾಲ್ ಕರ್ನ್ ಸಂಸಾರಾಂತ್ ಚಲ್ಚ್ಯಾ ವಿವಿದ್ ಘಡಾವಳಿಂಕ್ ಸ್ಪಂದನ್ ಕರ್ಚೆ ವಾಟೆರ್ ಹಾಂಗಾಚ್ಯಾ ಕವಿಥಂಯ್ ಘಡೊನ್ ಆಯ್ಲಾ ತೊ ಸಂಘರ್ಷ್:ದೆಕ್ಯೆತ್. ದೆಕುನ್ಂಚ್ ಪಯ್ಲ್ಯಾ ಕವಿತಾ ಸಂಗ್ರಹಾಂತ್ ಹೊ ಸಂಘರ್ಷ್ ತಿತ್ಲೊ ದಿಶ್ಟಿಕ್ ಪಡಾನಾ. ದುಸ್ರ್ಯಾ ಆನಿ ತಿಸ್ರ್ಯಾ ಸಂಗ್ರಹಾಂತ್ ಕವಿ ಸಂಘರ್ಷ್ ವಾಪಾರ್ನ್ ಉತ್ರಾಂಚೆ ಘೆಟೆ ಕರ್‍ತಾ.

ಆಯ್ಚ್ಯಾ ಕಾಳಾರ್ ಪ್ರಾಯೆಸ್ತಾಂನಿ ಸೊಸ್ಚೆ ಕಳ್ವಳೆ, ಎಕ್ಸುರ್‌ಪಣ್ ಕವಿ ಥಂಯ್ ಎಕೆ ರಿತಿಚೊ ಸಂಘರ್ಷ್ ಉಭ್ಜಯ್ತಾ. ಪ್ರಾಯೆಸ್ತಾಂಕ್ ಆಸ್ರ್ಯಾವಿಣೆಂ ಹೆರ್ ಚಡಿತ್ ಆಪ್ಲ್ಯಾಪಣಾಚಿ ಭದ್ರಾತಿ ಕಿತ್ಯಾಕ್ ಮೆಳೊಂಕ್ ನಜೊ? ಸಂಸಾರಾಂತ್ ಆಜ್ ಪ್ರಾಯೆಸ್ತಾಂಚೆ ಆಸ್ರೆ ಚಡೊನ್ಂಚ್ ಆಸಾತ್ ಶಿವಾಯ್ ಉಣೆಂ ಜಾಯ್ನಾಂತ್. ಹಾಚೊ ಅರ್‍ತ್ ಕಿತೆಂ? ಪ್ರಾಯೆಸ್ತ್ ಸಮಾಜಿಕ್ ಏಕ್ ’ವೊಜೆಂ’ ಶಿವಾಯ್ ಆದಾರ್ ನ್ಹಂಯ್? ಹೊಚ್ ಕವಿ ಥಂಯ್ ’ಮಾಯಾಮೊಗಾಚ್ಯಾ’ ಆಸ್ರ್ಯಾಕ್ ಕವಿನ್ ’ಪಿಂಜ್ರೊ’ (ಬಾಮುಣಾಂಚೆಂ ಚೆಡುಂ) ಮ್ಹಳ್ಳೆಂ ನಾಂವ್ ದಿಲಾಂ ತೆಂ ತಾಚೆ ಥಂಯ್ ಘಡ್ಚ್ಯಾ ಸಂಘರ್ಷಾಚೊ ಪರಿಣಾಮ್‌ಚ್ ಸಯ್.

’ಬಾಮುಣಾಂಚೆಂ ಚೆಡುಂ’ ಕವನಾಂತ್ ವೆಗ್ಳೆಚ್ ರಿತಿಚೊ ಸಂಘರ್ಷ್ ದಿಸೊನ್ ಯೆತಾ: ’ಸೆಜಾರ್ ನಾ, ಬಜಾರ್ ನಾ, ಘರ್, ಇಸ್ಕೊಲ್, ತುಳ್‌ಶೆ ಕಾಟೆಂ. ಗಾಂವಾರ್ ಸಗ್ಳೊ ಅಜ್ಯಾಪ್ ಹೆಂ ಘಡ್ಲೆಂ ತರ್‌ಯಿ ಕಶೆಂ?’

ಪುರೋಹಿತ್‌ಶಾಹಿ ಚೆಡ್ವಾಕ್ ಪುರುಶ್ ಪ್ರದಾನ್ ವೆವಸ್ತೆನ್ ಘರ್, ಇಸ್ಕೊಲ್ ಆನಿ ತುಳ್‌ಶೆ ಕಾಟ್ಯಾ ಮದೆಂಚ್ ಫಿಛಾರ್ ಕೆಲಾಂ. ಉಸ್ವಾಸ್ ಬಾಂದುನ್ ಮೊರೊಂಕ್ ತೆಂಕ್‌ಲ್ಲ್ಯಾ ಚೆಡ್ವಾನ್ ಅತ್ವಿಚ್ ವಾಟ್ ಧರ್ಲ್ಯಾ. ಸೆಜಾರ್, ಬಜಾರ್ ನಾಸ್ತಾಂಚ್ ತಾಚೊ ಗರ್ಬ್ ಭರ್ಲಾ. ’ಕೋಣ್ ಹಡ್ಬ್ಯಾಚೆಂ ಕಾಮ್ ಹೆಂ?’ ಮ್ಹಳ್ಳ್ಯಾ ಕ್ರೋದಾನ್ ಗಾಂವ್ ಸಗ್ಳೊ (ಪುರುಶ್ ಪ್ರದಾನ್ ಗಾಂವ್!) ಪೆಟ್ಲಾ. ವೆವಸ್ತೆಚೊ ಸಂಘರ್ಷ್.

ಹಾಂಗಾ ಕವಿಥಂಯ್ ಘಡ್ಲಾ ತೊ ಸಂಘರ್ಷ್ - ಪುರುಶಾ ತಿತ್ಲೆಂಚ್ ಸ್ವಾತಂತ್ರ್ ಸ್ತ್ರೀಯೆಕ್ ಮೆಳಾನಾ ಕಿತ್ಯಾಕ್? ಚಲಿಯೆನ್ ’ಆಡ್ ವಾಟ್’ ಧರ್ಚ್ಯಾಕ್ ಪುರೋಹಿತ್‌ಶಾಹಿ ಪುರುಶ್ ಪ್ರದಾನ್ ಸಮಾಜ್‌ಚ್ಕಾರಾಣ್ ತೆಂ ಒಪುನ್ ಘೆಂವ್ಕ್ ಕಿತ್ಯಾಕ್ ತಿ ಸಮಾಜ್ ತಯಾರ್ ನಾ? ಶಿತ್ ವಚೊನ್ ಪೇಜ್ ಜಾಲ್ಲ್ಯಾ ಮಾಗಿರ್ ಚಡ್ಪಡ್ಚೆಂ ಕಸಲ್ಯಾ ಫಾಯ್ದ್ಯಾಚೆಂ? ಅಜೂನ್‌ಯಿ ಸ್ತ್ರೀಯೆಕ್ ಆಪ್ಲ್ಯಾ ಬರಾಬರ್ ಪಳೆಂವ್ಕ್ ಇನ್ಕಾರ್ ಕರ್ಚೆ ಪುರುಶ್ ಪ್ರದಾನ್ ಸಮಾಜಿ ವಯ್ರ್ ಕೆಲ್ಲೊ ವಿಮರ್ಸೊ ಹಿ ಕವಿತಾ, ’ಬಾಮುಣಾಂಚೆಂ ಚೆಡುಂ’. ದೆಕುನ್ಂಚ್ ಜಾಂವ್ಕ್ ಪುರೊ ’ಕಯ್ದ್ಯಾಚ್ಯೊ ಕವಿತಾ’ ಸಂಗ್ರಹಾಂತ್ ’ಸ್ತ್ರೀಪಣಾ’ಚೊ ಸಂಬ್ರಮ್ ದಿಸ್ತಾ.

ಸೂಕ್ಶ್ಮ್ ನದರ್: ಕವಿಕ್ ಸೂಕ್ಶ್ಮ್ ನದರ್ ಚಡಿತ್ ಗರ್ಜೆಚಿ. ಕವಿ ಕಾಳ್ಜಾಂತ್ ಉಮಾಳೆ ಉಟೊನ್ ಆಯಿಲ್ಲೆಬರಿಚ್ ದೊಳ್ಯಾಂನಿ ಸೊದ್ನಾಂ ಕರುಂಕ್ ಆಸಾತ್. ಆಪ್ಲ್ಯಾ ಭೊಂವ್ತಿಂ ಘಡ್ಚ್ಯಾ ಘಡಿತಾಂ, ಮನ್ಶ್ಯಾಂ ಸವೆಂ ಸ್ಪಂದನ್ ಜಾಯ್ಜೆ ತರ್ ತಾಚಿ ದೀಶ್ಟ್ ಖರಿಚ್ ಸೂಕ್ಶ್ಮ್ ಜಾಯ್ಜೆ. ತಸಲೆ ಸೂಕ್ಶ್ಮ್ ದಿಶ್ಟಿಚೊ ಏಕ್ ಕವಿ ಎಚ್ಚೆಮ್.

’ವೊಂಟಾಂಕ್ ಲಾಯಿಲ್ಲೊ ಉಜೊ ಪಾಲ್ವೊನ್
ಥಕ್‌ಲ್ಲೆ ಗಾಡಿಯೆ ಸಾಂಕ್ಯಾರ್ ಖರ್ಶೆತಾನಾ
ಸಾಂಜ್ ತೆಂಕ್ತಾ ಶ್ಹೆರಾಂತ್’ (ಶ್ಹೆರಾಂತ್ಲಿ ಸಾಂಜ್’ - ಚಲ್ಯಾಂಕ್ ಚತ್ರಾಯ್)

ಗುರ್ವಾರ್ ಗಾಡಿಯೊ ಕಿತ್ಯಾಕ್ ಖರ್ಶೆತಾತ್? ಸವಾಲ್ ಘಾಲ್ಯಾರ್ ಜಾಪ್ ಝಳ್ಕತಾ. ಸರ್ವ್ ಪುರಾಸಣೆನ್ ಥಕ್‌ಲ್ಲ್ಯಾ ಜೀವಿಂಕ್ ಗರ್ಬಾಂತ್ ಭರ್ನ್ ಗಾಡಿ ಚಮ್ಕತಾ. ತ್ಯಾ ಉಟ್ಟಾರೆ ಲೊಕಾಚೊ ಭವ್ಯ್ ರೂಪಕ್ ಜಾತಾ ’ಗುರ್ವಾರ್ ಗಾಡಿ’. ಮುಂಬಯ್ಚೆ ಲೋಕಲ್ ಗಾಡಿಯೆರ್ ಸಾಂಜೆಚೆಂ ಪಯ್ಣ್ ಕೆಲ್ಲ್ಯಾಂಕ್ ಗುರ್ವಾರ್ ಗಾಡಿಯೊ ಖರ್‍ಶೆಂವ್ಚೆಂ ಖರೆಂಚ್ ದಿಶ್ಟಿಕ್ ಸಾಂಪ್ಡಾಶೆಂ ಕರ್‍ಚೆಂ ಕವನ್. ಕವಿಚಿ ಸೂಕ್ಶ್ಮ್ ನದರ್ ನಕ್ಕಿ!

ಅತೃಪ್ತ್ ಸ್ತ್ರೀಯೆಚೆ ಆಟೆವಿಟೆ ಎಕ್ಟಾಂಯ್ ಕೆಲ್ಲಿ ಕವಿತಾ ’ಯೇರೆ ಬೊನಾ’ (ಬಾಮುಣಾಂಚೆಂ ಚೆಡುಂ). ಘೊವ್, ಭುರ್ಗಿಂ ಅಸೊನ್‌ಯಿ ಬೊನಾಚೆರ್ ತಿ ಭುಲ್ಲ್ಯಾ. ’ಖಬ್ರೆ ಭಾಯ್ರ್ ಸುರಾತಾಂತ್ ಚಾಮ್ಡಿಂ ಸೊಡುಯಾಂ’ ಮ್ಹಣ್ ಬೊನಾಚೆರ್ ಭುಲ್ ಘಾಲುಂಕ್ ಪ್ರೇತನ್ ಕರ್‍ಚೆ ಸ್ತ್ರೀಯೆಚೆ ’ಅತ್ರೆಗ್’ ಕವಿಚೆ ಸೂಕ್ಶ್ಮ್ ನದ್ರೆಕ್ ಸಾಂಪಡ್ಲ್ಯಾತ್.

’ಶಿತಾಚ್ಯಾ ಹರ್ ಘಾಸಾಂತ್‌ಗೊ 
ಸ್ವಾದ್ ತುಜ್ಯಾ ಹಾತಾಚೊ
ಆಮೊರೆಚ್ಯಾ ಘಾಂಟಿಂತ್‌ಗೊ ನಾಗ್
ತುಜ್ಯಾ ಪಾಚ್ವ್ಯಾ ಕಾಂಕ್ಣಾಂಚೊ
ಮೆಜಾ ಕೊನ್ಶಾರ್ ತುಟೊನ್ ಪಡ್‌ಲ್ಲೊ
ಬಾಜ್ವೆ ಬುತಾಂವ್ ತುಜೊ
ಸಾಕ್ಶೆಕ್ ಉರ್‍ಲ್ಯಾ ಆಳ್ಣಿ ಪೆಜೆ ನೀಸ್ ಮೊಡ್ಕೆ ಥಳಾಂತ್’ (’ತುಜೆವೀಣ್’ - ಕಯ್ದ್ಯಾಚ್ಯೊ ಕವಿತಾ)

ಆಪ್ಲೊ ಕಾಳ್ಜಾ ಗೊಂಡೊ ಪಯ್ಸ್ ಆಸ್ತಾನಾ ಕವಿನ್ ಭೊಗ್ಚೆ ಆಟೆವಿಟೆ ಸೂಕ್ಶ್ಮ್ ರಿತಿಂ ಉಜಾರ್ ಕರ್ಚೆಂ ಕವನ್ ಹೆಂ. ಪಾಚ್ವಿಂ ಕಾಂಕ್ಣಾಂ, ಬಾಜ್ವೆ ಬುತಾಂವ್, ಆಳ್ಣಿ ಪೆಜೆ ನೀಸ್ ಸಕ್ಕಡ್ ಕವಿಚೆ ಸೂಕ್ಶ್ಮ್ ನದ್ರೆಕ್ ಝಳ್ಕಲ್ಯಾತ್. ತಾಚ್ಯಾಕ್‌ಯಿ ಚಡ್ ಕರ್‍ನ್ ಏಕ್ ವೆಕ್ತಿ ಜರ್ ಖರೊಚ್ ಅಪ್ಲೆ ಸಾಂಗಾತಿಣೆಚೊ ಕಾಳ್ಜಾಂತ್ ಥಾವ್ನ್ ಮೋಗ್ ಕರ್‍ತಾ ತರ್ ತಿ ವೆಕ್ತಿ ಜರೂರ್ ಹೆ ಸರ್ವ್ ತಳ್ಮಳೆ, ವಳ್ವಳೆ ಜರೂರ್ ಭೊಗ್ತಾ ಮ್ಹಳ್ಳಿ ಸೂಕ್ಶ್ಮ್ ನದರ್ ಕವಿಚಿ.

ಶಯ್ಲಿ, ಭಾಸ್:

ನೀಜ್ ಕವಿ ಜಲ್ಮಾ ಥಾವ್ನ್‌ಚ್ ಕವಿ. ಕೊಣಾಯ್ಕಿ ಧಾಡಾವ್ನ್ ಪಿಕವ್ನ್ ಕವಿ ಕರ್‍ಚೆಂ ಕಶ್ಟ್. ಪುಣ್ ದುರಂತ್ ಮ್ಹಳ್ಯಾರ್ ಸಬಾರಾಂಕ್ ಅಪುಣ್ ಜಲ್ಮಾ ಥಾವ್ನ್ ಕವಿ ಮ್ಹಳ್ಳೆಂ ಕಳಾನಾಸ್ತಾಂ ವಚ್ಯೆತ್; ಆನಿ ಅಶೆಂ ಅಪ್ರೂಪ್ ತಾಲೆಂತ್ ನಶ್ಟ್ ಜಾವ್ಯೆತ್.

ಎಚ್ಚೆಮ್ ಖಂಡಿತ್ ಜಾವ್ನ್ ಜಲ್ಮಾಥಾವ್ನ್ ಕವಿ ಆನಿ ಸಮರ್‍ತ್ ಕವಿ. ದೆಕುನ್‌ಚ್ ಭಾಸ್ ತಾಚಿ ಪ್ರಮುಕ್ ಆಸ್ತ್. ಜೊಕ್ತೆ ಕವಿತೆಕ್ ಜೊಕ್ತಿಂ ಉತ್ರಾಂ ತೊ ವಾಪಾರ್ತಾ. ಎಕೆ ಕವಿತೆಚಿ ಕಾಲೆತ್ ಜರ್ ಜಿವಿಂ ಜಿವಿಂ ಉತ್ರಾಂ ಆಂವ್ಡೆತ್ ತರ್ ತೊ ಮುಲಾಜ್ ನಾಸ್ತಾಂ ತಿಂ ವಾಪರ್ಚ್ಯಾಂತ್ ಘಳಾಯ್ ಕರ್ನಾ.

’ಮಾತ್ಕುಟ್ಯಾ ರಾಂಡಾಂಚ್ಯಾ ಚಿರ್ಮುಟ್ಲೆಲ್ಯಾ ಸ್ಥನಾಂಚೆರ್
ತುಜಿ ಕವಿತಾ ವಾಚುನ್ ಹಾಂವ್‌ಗಾ ಪಿಸೊಂ ಬೋದಿಲೆರ್’ (’ಬೋದಿಲೆರ್’ - ಬಾಮುಣಾಂಚೆಂ ಚೆಡುಂ)

ಚಿರ್ಮುಟ್ಲೆಲಿಂ ಸ್ಥನಾಂ ಮ್ಹಳ್ಳ್ಯಾ ಉತ್ರಾಂನಿಂಚ್ ತ್ಯಾ ವೇಶ್ಯಾಂಚಿ ಪರಿಗತ್ ಎಕೆ ಘಡ್ಯೆ ದೊಳ್ಯಾಂ ಹುಜ್ರಿಂ ಪಾಶಾರ್ ಜಾತಾ.

ಹೆರ್ ಭಾಸಾಂಚ್ಯಾ, ವಿಶೇಸ್ ಕರ್ನ್ ಇಂಗ್ಲಿಶ್, ಕನ್ನಡ್ ಕವಿಂಚೊ ಪುಶ್ಕಳ್ ಪ್ರಭಾವ್ ಎಚ್ಚೆಮಾಚೆ ಶಯ್ಲೆಂತ್ ಭರ್ಪೂರ್ ಆಸಾ. ತಾಚಿ ಶಯ್ಲೆಂತ್ ಭರ್ಪೂರ್ ಆಸಾ. ತಾಚಿ ಶಯ್ಲಿ ನವೋದಯ್ ಆನಿ ನವ್ಯಾ ಮದ್ಲಿ. ನವ್ಯ್ ಕವಿಂ ಪ್ರಕಾರ್ ಕವಿತೆಂಕ್ ಕಾಳಿಜ್ ಆಸೊಂಕ್ ನಜೊ. ತಕ್ಲಿ ಮಾತ್ರ್ ಆಸೊಂಕ್ ಜಾಯ್. ತಶೆಂ ಮ್ಹಳ್ಯಾರ್ ಭೊಗ್ಣಾಂ ನಾಕಾತ್, ರಾಜಾಂವ್ ಪುರೊ. ತಸಲೆಂ ಕಾವ್ಯ್, ಗಣಿತ್ ಸುತ್ರಾಂ ಜಾಂವ್ಚೊ ಅಪಾಯ್ ಆಸಾ. (ನವ್ಯ್ ಸಾಹಿತ್ಯಾಂತ್ ಥೊಡ್ಯಾ ಮಟ್ಟಾಕ್ ಹೆಂ ಅನಾಹುತ್ ಘಡ್ಲಾಂ!) ಪುನ್ಯಾಕ್ ಎಚ್ಚೆಮಾಚ್ಯಾ ಕಾವ್ಯಾಕ್ ಕಾಳಿಜ್‌ಯಿ ಆಸಾ, ತಕ್ಲಿಯಿ ಆಸಾ. ತಾಚೆಂ ಕಾವ್ಯ್ ಭೋವ್ಶಾ ಕೊಂಕ್ಣೆಚ್ಯಾ ’ನವೆಂ ಲ್ಹಾರ್’ ಪ್ರಕಾರಾಂತ್ ಘಾಲ್ಯಾರ್ ತಾಕಾ ಚಡಿತ್ ಮಾನ್ ದಿಲ್ಲೆಬರಿ ಜಾತಾ ಮ್ಹಳ್ಳಿ ಅಭಿಪ್ರಾಯ್ ಮ್ಹಜಿ.ತಾಚ್ಯೊ ಗುಂಡಾಯೆಚ್ಯೊ ಜಡಾಯೆಚ್ಯೊ ಕವಿತಾ ಅಸ್ವಾದನ್ ಕರ್‍ಚೆ ಸಹೃದಯಿ ಚಡ್ ಜಾಲ್ಲ್ಯಾ ತಿತ್ಲೆಂ ಕೊಂಕ್ಣಿ ಕವಿತಾ ಶೆತಾಕ್ ಫಾಯ್ದ್ಯಾಚೆಂ.

[ಹೆಂ ವಿಮರ್ಶ್ಯಾ ಲೇಖನ್ ’ರಾಕ್ಣೊ’ ಹಾಫ್ತ್ಯಾಳ್ಯಾಚೆರ್ ಪರ್ಗಟ್ಲಾಂ]

ಲೇಖನಾಂಚಾ ಪಾನಾಕ್

ಆಧ್ಲೆ ವಿಮರ್ಶೆ: 1, 2, 3, 4

ಪಾಟಿಂ ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications