ಕವಿತಾकविताPoem
ಕೈಫಿ
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾದಾಯ್ಜ್ - 4
ಕೈಫಿ ಆಜ್ಮಿ
ನೀಜ್ ನಾಂವ್: ಅಖ್ತರ್ ಹುಸೇಯ್ನ್ ರಿಜ್ವಿ.
ಜನನ್: ಸಾರ್ಕೊ ದೀಸ್, ಮಯ್ನೊ ಕೊಣಾಕ್ಚ್ ಕಳಿತ್ ನಾ ತರ್ಯ್ ತಾಚೆಪ್ರಕಾರ್ ತೊ 1925 ಇಸ್ವೆಂತ್ ಜಲ್ಮಾಲೊ.
ಮರಣ್: 10 ಮಾಯ್ 2002
ಜಲ್ಮಾಲ್ಲೊ ಗಾಂವ್: ಮಿಜ್ವಾನ್ [ಅಜಮ್ಘರ್ ಜಿಲ್ಲೊ - ಯು.ಪಿ.]
ಕುಟ್ಮಾಚಿ ವಳೊಕ್: ಕೈಫಿ ಆಜ್ಮಿಚಿ ಧುವ್ ಹಿಂದಿ ಫಿಲ್ಮಾಂತ್ಲಿ ಫಾಮಾದ್ ನಟಿ ಶಬನಾ ಆಜ್ಮಿ, ತಶೆಂಚ್ ಜಾಂವಯ್ ಫಾಮಾದ್ ಉರ್ದು/ಹಿಂದಿ ಕವಿ ಜಾವೆದ್ ಅಖ್ತರ್.
ವಳೊಕ್:
ಪರ್ಗಟ್ ಜಾಲ್ಲೆ ಬೂಕ್ :
’ಆಖಿರ್ ಇ-ಶಾಬ್’ ’ಜಾನ್ಕಾರ್’ ’ಆವಾರ ಸಜ್ದೆ’ ’ಪೆಂಗ್ವಿನ್’ [ತಾಚಿಂ ಇಂಗ್ಲಿಶಾಕ್ ಅಣ್ಕಾರಿತ್ ಜಾಲ್ಲಿಂ ಕವಿತಾ/ಪದಾಂಚೊ ಬೂಕ್]
1979 ಇಸ್ವೆಂತ್ ರಮನ್ ಕುಮಾರ್ ಹಾಣೆಂ ಕೈಫಿ ಆಜ್ಮಿಚಾ ಜಿಣ್ಯೆಚೆರ್ ಏಕ್ ಡೊಕ್ಯುಮೆಂಟರಿ ಫಿಲ್ಮ್ ಘಡ್ಲ್ಲೆಂ.
ಆಪ್ಣಾಯಿಲ್ಲ್ಯೊ ಪ್ರಶಸ್ತ್ಯೊ :
ಉತ್ತರ್ ಪ್ರದೇಶ್ ಸರ್ಕಾರಾಥಾವುನ್ ’ಉರ್ದು ಎಕಾಡೆಮಿ ಪ್ರಶಸ್ಥಿ’ .
’ದ ಸೋವಿಯೆಟ್ ಲ್ಯಾಂಡ್ ನೆಹ್ರು ಪ್ರಶಸ್ಥಿ’ .
’ಸಾಹಿತ್ಯ ಅಕಾಡೆಮಿ ಪ್ರಶಸ್ಥಿ’ [’ಆವಾರ ಸಜ್ದೆ’ ಬುಕಾಕ್].
ಮಹಾರಾಷ್ಟ್ರ ಸರ್ಕಾರಾಥಾವುನ್ ಉರ್ದು ಸಾಹಿತ್ಯಾಕ್ ತಾಣೆ ದಿಲ್ಲ್ಯಾ ಸೆವೆಖಾತಿರ್ ವಿಶೇಷ್ ಪ್ರಶಸ್ಥಿ.
ಆಫ್ರೋ-ಏಶಿಯನ್ ಬರವ್ಪ್ಯಾಂಚಾ ಕಮಿಟಿಥಾವುನ್ ’ಲೋಟಸ್’ ಪ್ರಶಸ್ಥಿ.
’ಗರಮ್ ಹವಾ’ ಫಿಲ್ಮಾಚಿ ಕಾಣಿಂ ಆನಿಂ ಸಂಭಾಷಣಾಂಕ್ ’ರಾಷ್ಟ್ರ್ ಪುರಸ್ಕಾರ್’ ಆನಿಂ ’ಫಿಲ್ಮ್ಫೇರ್ ಪ್ರಶಸ್ಥಿ’.
ಮಹಾರಾಷ್ಟ್ರ ಸರ್ಕಾರಾಥಾವುನ್ ’ಧ್ಯಾನೇಶ್ವರ್ ಪ್ರಶಸ್ಥಿ’ [1998].
ದೆಲ್ಲಿ ಸರ್ಕಾರಾಥಾವುನ್ ಆನಿಂ ಉರ್ದು ಎಕಾಡೆಮಿ ಥಾವುನ್ ’ಶತಮಾನಾಚಿ ಪ್ರಶಸ್ಥಿ’ [2000].
"ಪದ್ಮಶ್ರೀ" ಪ್ರಶಸ್ಥಿ.
ಬುರ್ಗ್ಯಾಪಣಾಚೆ ದೀಸ್/ಶಿಕಾಪ್ :
ಕೈಫಿ ಆಜ್ಮಿಚೊ ಬಾಪುಯ್ ಏಕ್ ತಹಶೀಲ್ದಾರ್ ಜಾವ್ನಾಸ್ಲ್ಲೊ ಆನಿಂ ಆಪ್ಲ್ಯಾ ಬುರ್ಗ್ಯಾಂಕ್ ಇಂಗ್ಲಿಶ್ ಭಾಸೆಸವೆಂ ಉಂಚ್ಲೆಂ ಶಿಕಾಪ್ ದೀಂವ್ಕ್ ಆಶೆತಾಲೊ. ಪುಣ್ ತಾಚಾ ಘರಾಣ್ಯಾಚೆ ಹೆರ್ ಮಾಲ್ಘಡೆ, ಪ್ರತ್ಯೇಕ್ ಜಾವ್ನ್ ಮಾಲ್ಘಡೊ ಭಾವ್, ಕೈಫಿ ಆಜ್ಮಿನ್ ಧಾರ್ಮಿಕ್ ಮುಖೆಲಿ ಜಾಯ್ಜಯ್ ಮ್ಹಳ್ಳ್ಯಾ ಇರಾದ್ಯಾನ್ ಹಾಚೊ ವಿರೋದ್ ಕೆಲೊ ಆನಿಂ ತಾಕಾ ಲಖ್ನೋಂತ್ ಆಸ್ಚಾ ’ಸುಲ್ತಾನ್ ಉಲ್-ಮದ್ರಾಸಿಸ್’ ಮ್ಹಳ್ಳೆ ಸೆಮಿನರಿಕ್ ಧಾಡ್ಲೊ.
ಪುಣ್ ಕೈಫಿ ಆಜ್ಮಿಚಿಂ ಚಿಂತ್ನಾಂ ಸ್ವತಂತ್ರ್ ಆಸ್ಲ್ಲಿಂ ಆನಿಂ ತಾಚೆರ್ ಹೆರಾಂನಿ ಆಪ್ಲಿಂ ಚಿಂತ್ನಾಂ ಥಾಪ್ಚಿಂ ಪಸಂದ್ ನಾತ್ಲ್ಲ್ಯಾನ್, ತಾಣೆಂ ಥಂಯ್ಚಾ ವಿಧ್ಯಾರ್ಥಿಂಕ್ ಎಕ್ಟಾಂಯ್ ಕರ್ನ್ ಏಕ್ ಸಂಘಟನ್ ಉದೆಶೆಂ ಕೆಲೆಂ ಆನಿಂ ಆಪ್ಲ್ಯಾ ಮೂಳ್ ಹಕ್ಕಾಂ ಖತಿರ್ ಚಳ್ವಳಿ ಸುರು ಕೆಲಿ. ಆನಿಂ ಸುಮಾರ್ ದೇಡ್ ವರ್ಸ್ಭರ್ ಚಲ್ಲ್ಲ್ಯಾ ಹ್ಯಾ ಚಳ್ವಳೆಕ್ ಜಯ್ತ್ ಮೆಳ್ಳೆಂ ತರ್ಯ್ ಕೈಫಿ ಆಜ್ಮಿಕ್ ಸೆಮಿನರಿ ಥಾವ್ನ್ ಕಾಡ್ಲೊ.
ಅಶೆಂ ಕೈಫಿ ಆಜ್ಮಿಕ್ ಉಂಚ್ಲೆಂ ಶಿಕಾಪ್ ಜೊಡುಂಕ್ ಸಾಧ್ಯ್ ಜಾಲೆಂನಾ. ಪುಣ್ ತೊ ಲಖ್ನೊ ಆನಿಂ ಅಲಹಾಬಾದ್ ವಿಧ್ಯಾಲಯಾಚೊ ಜಾಯ್ತ್ಯೊ ಪರಿಕ್ಶಾ ಬೊಸೊನ್ ಅರೆಬಿಕ್, ಪರ್ಶಿಯನ್ ಆನಿ ಉರ್ದು ಭಾಸೊ ಶಿಕ್ಲೊ. ಸಾಹಿತಿಕ್ ಸುರ್ವಾತ್: ತವಳ್ಚಾ Progressive Writers Movement ಹಾಣಿಂ ಕೈಫಿ ಆಜ್ಮಿಕ್ ಇಕ್ರಾ ವರ್ಸಾಂಚಾ ಪ್ರಾಯೆರ್ ಎಕಾ ಕವಿಗೋಷ್ಟಿ (ಮುಶಾಯ್ರಾ) ಕ್ ಆಪಯ್ಲೊ ಆನಿಂ ಹಾಚೆಂ ಪಯ್ಲೆಂ ’ಗಝಲ್’ ಆಯ್ಕೊನ್ ಸಗ್ಳೆ ಶೆರ್ಮೆಲೆ.
ಹಾಚಾ ಬಾಪಾಯ್ನ್ ಅಶೆಂ ಸಾಂಗ್ಲೆಂಕೀ ಹೆಂ ಗಝಲ್ ಕೈಫಿ ಆಜ್ಮಿಚಾ ವಡ್ಲ್ಯಾ ಭಾವಾನ್ ಬರಯಿಲ್ಲೆಂ ಮ್ಹಣ್. ಪುಣ್ ವಡ್ಲ್ಯಾ ಪುತಾನ್ ನೆಗಾರ್ ಕೆಲ್ಲೆಂಚ್ ತಾಣೆಂ ಕೈಫಿ ಆಜ್ಮಿಕ್ ಅಸಲೆಂಚ್ ಅನ್ಯೇಕ್ ಗಝಲ್ ಬರಂವ್ಕ್ ಉಲೊ ದಿಲೊ. ಆನಿಂ ಹೊ ಉಲೊ ಘೆವ್ನ್ ಕೈಫಿ ಆಜ್ಮಿನ್ ತಕ್ಶಣ್ ಅನ್ಯೇಕ್ ಗಝಲ್ ಬರಯ್ಲೆಂ ಆನಿಂ ತೆಂ ಗಝಲ್ ತವಳ್ಚಿ ಫಾಮಾದ್ ಗಝಲ್ ಗಾವ್ಪಿಣ್ ಬೇಗಮ್ ಅಖ್ತರ್ ಹಿಣೆಂ ಗಾಯ್ಲೆಂ.
"ಅಶೀಯ್ ಕೊಣಾಯ್ಚಾಯ್ ಜಿಣ್ಯೆಂತ್ ಇರಾರಾಯ್ ಯೇನಾಂ ಜಾಂವ್,
ಜಾಂಚೆವರ್ವಿಂ ತಾಕಾ ಹಾಸೊ ಜಾಂವ್ ವಿಳಾಪ್ ಜಾಂವ್ ಸಮಧಾನ್ ಹಾಡುಂಕ್ ಸಕಾನಾ"
ಅಶೆಂ ತೊ ಮುಶಯ್ರಾಂಕ್ ವೆತಾಲೊ ಆನಿಂ ಅಶೆಂಚ್ ಏಕ್ ಪಾವ್ಟಿಂ ಹೈದರಾಬಾದಾಕ್ ಗೆಲ್ಲೆವೆಳಾರ್ ಥಂಯ್ಸರ್ ತಾಕಾ ಶೌಕತ್ ಮ್ಹಳ್ಳ್ಯಾ ಚಲಿಯೆಚಿ ವಳೊಕ್ ಜಾಲಿ ಆನಿಂ ಥಂಯ್ಚ್ ತೊ ತಾಚಾ ಮೊಗಾರ್ ಪಡ್ಲೊ ಆನಿಂ ತಿಚೆಲಾಗಿಂಚ್ ತೊ ಕಾಜಾರ್ ಜಾಲೊ. ಶೌಕತ್ ಆಜ್ಮಿ ಉಪ್ರಾಂತ್ ಥಿಯೇಟರಾಂನಿ ನಟಿ ಜಾವ್ನ್ ಫಾಮಾದ್ ಜಾಲಿ.
ಸಾಹಿತ್ಯ್/ಕವಿತಾ :
ವಯ್ ತಾಚೊ ಕವಿತಾ ಎಕಾಚ್ ವರ್ಗಾಚೊ ಯಾ ಚಿಂತ್ಪಾಚೊ ನ್ಹಯ್. ತಾಚಾ ಕವಿತಾಂಕ್ ಅಪ್ಲೆಂಚ್ ಮ್ಹಳ್ಳಿ ಅಱತಾ ಆಸ್ಲ್ಲಿ, ವಿಶೇಷ್ ರಿತಿಚಿಂ ಭಗ್ಣಾಂ-ಉಮಾಳೆ, ಪ್ರತ್ಯೇಕ್ ಜಾವ್ನ್ ದಯಾಳ್ ಆನಿಂ ಮಾಯ್ಪಾಸಿ ಚಿಂತ್ಪಾಚಿಂ ಜಾವುನ್ ದುಭ್ಳ್ಯಾಂಚಾ ಕಷ್ಟಾಂ-ನಷ್ಟಾಂಕ್ ಸ್ಪಂದನ್ ದಿಂವ್ಚೆ ತಸಲಿಂ ಜಾವ್ನಾಸ್ಲ್ಲಿಂ. ತಾಚಿಂ ಬರ್ಯಾಂತ್ಲಿಂ ಬರಿಂ ಪದಾಂ ಹೆಚ್ ವರ್ಗಾಚಿಂ, ಚಿಂತ್ಪಾಚಿಂ ಯಾ ಪ್ರಕಾರಾಚಿಂ. ತಾಚಾ ಕವಿತಾಂ/ಪದಾಂಚಿ ಸೊಭಾಯ್ ಹಿಕೀ, ತಿಂ ಫಕತ್ ಕಾಲ್ಪನಿಕ್ ಮಾತ್ರ್ ನ್ಹಯ್ ಆಸ್ತಾಂ, ಅಪ್ಲ್ಯಾ ಭೋವ್ ವ್ಹಡ್ ಸ್ವಪ್ಣಾಚಿಂ ಜಾವುನ್ ಉರ್ದು ಕವಿತಾಶೆತಾಂಕ್ ತಾಚಿ ದೇಣ್ಗಿ ಭೋವ್ ಉಲ್ಲೇಖನೀಯ್ ಜಾವ್ನಾಸಾ.
ವೆಕ್ತಿತ್ವ್/ಚಿಂತಾಪ್ :
"ಸಾದಿ ಜಿಣಿ ಜಿಯೆವ್ನ್ ಸಾದ್ಯಾ ಮನ್ಶಾಂಚೊ ವಿಪ್ರೀತ್ ಮೋಗ್ ಕೆಲ್ಲೊ ಏಕ್ ಮಹಾನ್ ಸಾಹಿತಿ. ತೊ ಇತ್ಲೊ ಸಾದೊ ಜಾವ್ನಾಸ್ಲ್ಲೊ ಮ್ಹಳ್ಯಾರ್ ತಾಚೆಲಾಗಿಂ ಉಲಯ್ತೆಲ್ಯಾಂಕ್ ಸಯ್ತ್ ಥೊಡೆ ಪಾವ್ಟಿಂ ದುಭಾವ್ ಜಾತಾಲೊ ಖೈಂ ಹೊ ಏಕ್ ಸಾಹಿತಿಗೀ ಯಾ ನ್ಹಯ್ ಮ್ಹಳ್ಳೆಂ"
- ಅಶೆಂ ತಾಕಾ ಲಾಗ್ಸಿಲ್ಯಾನ್ ವಳ್ಕಾಲ್ಲೆ ಸಾಂಗ್ತಾತ್. ಪುಣ್ ತಾಚೆಂ ಚಿಂತಾಪ್ ಏಕ್ದಮ್ ಶೀದಾ ಆನಿಂ ಸಂಪೆಂ. ಜಾಯ್ತೆಪಾವ್ಟಿಂ ಅಪ್ಲ್ಯಾ ಹ್ಯಾ ಸವಯೆಖಾತಿರ್ ಭೆಷ್ಟಾವ್ಣಿಂ ಆನಿಂ ರಾಗ್ ತಾಣೆ ಸೊಸ್ಲಾ. ’Indian People's Theatre Association (IPTA)’ ಹಾಚೊ ಕಾರ್ಯಾಳ್ ಸಾಂದೊ ಜಾವ್ನ್, ಉಪ್ರಾಂತ್ ಅಧ್ಯಕ್ಶ್ ಜಾವ್ನ್ಯ್ ವಾವ್ರ್ ಕೆಲಾ.
1995 ಇಸ್ವೆಂತ್ ಘಡ್ಲ್ಲೆಂ ಏಕ್ ಫಿಲ್ಮ್ ’ನಸೀಮ್’. ಹೆಂ ಫಿಲ್ಮ್ 1992 ಇಸ್ವೆಚಾ ದಸೆಂಬರಾಚಾ ಸ ತಾರಿಕೆರ್ ಬಾಬ್ರಿ ಮಸ್ಜೀದ್ ಕೊಸ್ಳಾಯಿಲ್ಲ್ಯಾ ಘಡಿತಾಚೆರ್ ಆಧಾರಾನ್ ಘಡ್ಲ್ಲೆಂ ಫಿಲ್ಮ್. ಹಾಂತುಂ ಎಕಾ ಮುಸ್ಲಿಮ್ ಪ್ರಾಯೆಸ್ತಾಚೊ ಪಾತ್ರ್ ಹಾಣೆಂ ಕೆಲಾ. ತಾಣೆಂ ಜಾಯ್ತ್ಯಾ ಬರ್ಯಾ ಫಿಲ್ಮಾಕ್ ಪದಾಂ/ಕವಿತಾ/ಗಝಲಾಂ ಲಿಖ್ಲ್ಯಾಂತ್. ತಾಂತುಂ ಏಕ್ದಮ್ ಫಾಮಾದ್ ಜಾಲ್ಲೆಂ ಫಿಲ್ಮ್ - ಗುರುದತ್ತಾಚೆಂ ’ಕಾಗಜ್ ಕೆ ಪೋಲ್’ (ಕಾಗ್ದಾಚೆಂ ಫುಲ್) 1959 ಇಸ್ವೆಂತ್ ಘಡ್ಲ್ಲೆಂ ಫಿಲ್ಮ್.
ತಾಣೆಂ ಸಭಾರ್ ಫಿಲ್ಮಾಕ್ ಪದಾಂ, ಸಂಭಾಶಣ್ ಬರಯ್ಲಾಂ ತರ್ಯ್ ಕವಿತಾಸಂಸಾರಾಂತ್ ತಾಚಾ ಸಂಭಾಶಣಾಂಕ್ ನಾಂವ್ ದಿಲ್ಲೆಂ ’ಚೇತನ್ ಆನಂದ್’ ಹಾಚಾ ’ಹೀರ್ ರಾಂಜಾ’ ಫಿಲ್ಮಾನ್, ಹಾಂತ್ಲಿಂ ಹರ್ಯೆಕ್ ಸಂಭಾಶಣ್ ಪ್ರಾಸಾನ್ ಭರೊನ್ ಕವಿತಾಪರಿಂ ದಿಸ್ತಾಲೆ. 1970 ಇಸ್ವೆಂತ್ ಘಡ್ಲ್ಲೆಂ ಫಿಲ್ಮ್ ಏಕ್ ಸುಪರ್ ಹಿಟ್ ಜಾಲೆಂ ಮಾತ್ರ್ ನ್ಹಯ್ ಕೈಫಿ ಆಜ್ಮಿಚೆಂ ನಾಂವ್ ಮೊಳ್ಬಾಕ್ ಚಡ್ಲೆಂ.
ಕವಿತಾದಾಯ್ಜ್ - 4 . ಕೈಫಿ ಆಜ್ಮಿ
ತಾಚಾ ಎಕಾ ಗಝಲಾಚಿಂ ಹಿಂ ಉತ್ರಾಂ ತಾಚೆಲಾಗಿಂ ಆಸ್ಲ್ಲ್ಯಾ ಕವಿಚಿ ರುಜ್ವಾತ್;
"ಕಾಳಿಜ್ ದುಖಿಂತ್ ಝಳ್ತಾ ತರ್ ಝಳೊಂದಿ ಪುಣ್ ಧುಂವರ್ ಯೇನಾ ಜಾಂವ್
ಸಾಧ್ಯ್ ಆಸಾ ತರ್ ಹಾಚೆ ಉಪ್ರಾಂತ್ ಕಸಲೀಯ್ ಪರಿಕ್ಶಾ ನಾ ಜಾಂವ್"
1983 ಇಸ್ವೆಂತ್ ’ಅರ್ಥ್’ ಫಿಲ್ಮಾಂತ್ ಫಾಮಾದ್ ಗಝಲ್ ಗಾವ್ಪಿ ಜಗ್ಜೀತ್ ಸಿಂಘಾನ್ ಗಾಯ್ಲೆಲೆಂ ಏಕ್ ಪದ್ ಅಶೆಂ ಆಸಾ;
ತುಂ ಇತ್ಲ್ಯೊ ಅಮ್ರುಕ್ಯೊ ಹಾಸೊ ಹಾಸೊನ್ ಆಸಾಯ್
ಕಸಲಿ ದೂಖ್ ತಿ ಜಿ ತುಂ ಲಿಪವ್ನ್ ಆಸಾಯ್?
ದೊಳ್ಯಾಂನಿ ದುಃಖಾಂ, ಹಾಸೊ ವೊಂಟಾಂಚೆರ್
ಕಸಲಿ ಸ್ಥಿತಿ ತಿ ಕಸಲಿ ಧಾಖವ್ನಾಸಾಯ್?
ಜಾವ್ಯಾಂ ವೀಕ್ ಪಿಯೆತಾಂ ಪಿಯೆತಾಂ ಹ್ಯಾ ದುಖಾಂಕ್,
ಜಿಂ ಪಿಯೆಂವ್ಕ್ ವೆತಾಯ್?
ಜ್ಯಾ ಘಾಯಾಂಕ್ ವೆಳಾ ಪ್ರಕಾರ್ ಚಲಯ್ಲಾಂ
ತುಂ ಕಿತ್ಯಾಕ್ ತಾಂಕಾಂ ಚಿಡಾಂವ್ಕ್ ವೆತಾಯ್?
ಗಿಟಾಂಚೊ ಖೆಳ್, ಹೊ ನಶಿಬಾಚೊ
ಗಿಟಾಂಲಾಗಿಂಚ್ ಸಲ್ವಣಿಂ ಭೊಗುನ್ ಆಸಾಯ್?
ಕವಿತಾದಾಯ್ಜ್: 1, 2, 3
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.