ಕವಿತಾकविताPoem
ಹಸ್ರತ್
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾದಾಯ್ಜ್ - 6
ಹಸ್ರತ್ ಜೈಪುರಿ
ನೀಜ್ ನಾಂವ್ : ಇಕ್ಬಾಲ್ ಹುಸೇಯ್ನ್.
ಜಲ್ಮ್ : 15 ಎಪ್ರಿಲ್ 1918.
ಮರಣ್ : 18 ಸೆಪ್ಟೆಂಬರ್ 1999.
ಜಲ್ಮಾಲ್ಲೊ ಗಾಂವ್ : ಜೈಪುರ್ (ರಾಜಸ್ಥಾನ್).
ವಳೊಕ್:
ಪ್ರಮುಖ್ ಪ್ರಶಸ್ತ್ಯೊ :
1966 ಇಸ್ವೆಂತ್ ’ಸೂರಜ್’ ಫಿಲ್ಮಾಕ್ ತಾಣೆ ಲಿಖ್ಲ್ಲ್ಯಾ ’ಬಹಾರೊಂ ಫೂಲ್ ಬರ್ಸಾವೊ’ ಪದಾಕ್ ಫಿಲ್ಮ್ಫೇರ್ ಪ್ರಶಸ್ತಿ.
1971 ಇಸ್ವೆಂತ್ ’ಅಂದಾಜ್’ ಫಿಲ್ಮಾಕ್ ತಾಣೆ ಲಿಖ್ಲ್ಲ್ಯಾ ’ಜಿಂದಗಿ ಏಕ್ ಸಫರ್ ಹೆ ಸುಹಾನಾ’ ಪದಾಕ್ ಫಿಲ್ಮ್ಫೇರ್ ಪ್ರಶಸ್ತಿ.
Doctorate Award World University Round Table ಪ್ರಶಸ್ಥಿ. ’ಜೋಶ್ ಮಹಿಲಾಬಾದಿ ಉರ್ದು ಕಾನ್ಫರೆನ್ಸ್ ಪ್ರಶಸ್ಥಿ’ ಡಾ|ಅಂಬೇಡ್ಕರ್ ಪ್ರಶಸ್ಥಿ - ’ಮೆರೆ ಹುಜೂರ್’ ಫಿಲ್ಮಾಂತ್ಲ್ಯಾ ತಾಚಾ’ಜನಕ್ ಜನಕ್ ತೊರಿ ಬಾಜೆ ಪಾಯಲಿಯಾಂ’ ಪದಾಕ್.
ಪರ್ಗಟ್ ಕೆಲ್ಲೊ ಸ್ವತಾಚೊ ಬೂಕ್: ಅಪ್ಲ್ಯಾ ಕವಿತಾಂ-ಗಝಲಾಂಕ್ ಜಮೊ ಕರ್ನ್ ಪರ್ಗಟ್ ಕೆಲ್ಲೊ ಬೂಕ್ ’ಅಬ್ಶಾರ್ ಇ- ಗಝಲ್’. ಹಾಣೆಂ ಪದಾಂ ಬರಯಿಲ್ಲಿಂ ಫಿಲ್ಮಾಂ: 300 ವಯ್ರ್.
ಪದಾಂ/ಕವಿತಾ/ಗಝಲಾಂ : 3000 ವಯ್ರ್.
ಸಾಹಿತಿಕ್ ಸುರ್ವಾತ್ :
1939 ಇಸ್ವೆ ಪರ್ಯಾಂತ್ ತೊ ಜೈಪುರಾಂತ್ ರಾವ್ಲೊ ಆನಿಂ ಇಂಗ್ಲಿಶ್ ಭಾಸ್ ಉಲಂವ್ಕ್ ಶಿಕ್ಲೊ. ಸೆಕಂಡರಿಚೆಂ ಶಿಕಾಪ್ ಪರ್ಯಾಂತ್ ತೊ ಶಿಕ್ಲೊ ತರ್ಯೀ ಇಂಗ್ಲಿಶಾಸವೆಂ ತಾಕಾ ತಾಚಾ ಆಬಾನ್ ಉರ್ದು ಆನಿಂ ಪರ್ಶಿಯನ್ ಭಾಸ್ಯಿ ಶಿಕಯ್ಲಿ. ತ್ಯೇ ಉಪ್ರಾಂತ್ ದೀಸ್ಪಡ್ತೊ ಗ್ರಾಸ್ ಜೊಡ್ಚಾಕ್ ಬೊಂಬೊಯ್ ಪಾವ್ಲೊ ಆನಿಂ ಬಸ್ಸಾಚೊ ಕಂಡಕ್ಟರ್ ಜಾವ್ನ್ ಕಾಮ್ ಕರಿಲಾಗ್ಲೊ. ತವಳ್ ತಾಕಾ ಮೆಳ್ಚೊ ಮಯ್ನ್ಯಾಚೊ ಸಾಂಬಾಳ್ ಇಕ್ರಾ ರುಪೈ. ತರ್ಯೀ ಆಪ್ಣಾ ಥಂಯ್ ಆಸ್ಲ್ಲ್ಯಾ ಕವಿತಾದೆಣ್ಯಾಂಕ್ ತಾಣೆಂ ಕೊನ್ಶಾಕ್ ಲೊಟಿನಾಸ್ತಾಂ, ವೇಳ್ ಕಾಡ್ನ್ ತವಳ್ ತವಳ್ ಜಾಂವ್ಚಾ ಕವಿತಾಗೋಷ್ಟಿಂನಿ ಭಾಗ್ ಘೆತಾಲೊ. ಆಕ್ ಪಾವ್ಟಿಂ ತಾಚಾ ಕವಿತಾಂ ವಾಚುನ್ ತಾಚಾ ಕವಿತಾಂಚೆರ್ ಪ್ರಭಾವಿತ್ ಜಾಲ್ಲ್ಯಾರ್ ಮ್ರಥ್ವೀರಾಜ್ ಕಪೂರ್ ಹಾಣೆಂ ಅಪ್ಲ್ಯಾ ಪುತಾಕ್ ರಾಜ್ಕಪೂರಾಕ್ ಹಾಚಿ ಶಿಫಾರಸ್ ಕೆಲ್ಲಿ.
ರಾಜ್ಕಪೂರಾನ್ ಅಪ್ಲ್ಯಾ ದುಸ್ರ್ಯಾ ಫಿಲ್ಮಾಂತ್ (1950 ಇಸ್ವೆಂತ್) ’ಬರ್ಸಾತ್’ ಪದಾಂ ಬರಂವ್ಕ್ ಏಕ್ ಆವ್ಕಾಸ್ ದಿಲೊ. ಆನಿಂ ’ಜಿಯಾ ಬೇಕರಾರ್ ಹೆ’ ಆನಿಂ ’ಮೆಂ ಜಿಂದಗಿ ಮೆ ಹರ್ದಮ್ ರೋತಾಹಿ ರಹಾ ಹುಂ’ ಮ್ಹಳ್ಳಿಂ ಪದಾಂ ಲಿಖ್ಲಿಂ ಆನಿಂ ಹಿಂ ಪದಾಂ ಇತ್ಲಿಂ ಹಿಟ್ ಜಾಲಿಂ ಮ್ಹಳ್ಯಾರ್ ಹಸ್ರತ್ ಜೈಪುರಿಚೆಂ ನಾಂವ್ ದೇಸ್ಭರ್ ಗಾಜ್ಲೆಂ.
ಕವಿತಾ ಆನಿಂ ಮೋಗ್ :
ಇಕ್ಬಾಲ್ ಹುಸೇಯ್ನಾನ್ ಕವಿತಾ ಬರಂವ್ಕ್ ಪ್ರೇರಣ್ ಘೆತ್ಲ್ಲೆಂ ಜಾವ್ನಾಸಾ ತಾಚಾ ಆಬಾ ಥಾವ್ನ್ ಮ್ಹಣ್ಜೆ ’ಫಿದಾ ಹುಸೇಯ್ನ್’ ಥಾವ್ನ್. ಅಶೆಂ ಆಪ್ಲ್ಯಾ ವೀಸ್ ವರ್ಸಾಂಚಾ ಪ್ರಾಯೆರ್ ತೊ ಕವಿತಾ ಪದಾಂ ಬರಯ್ತಾಲೊ ಮಾತ್ರ್ ನ್ಹಯ್, ಮುಶಾಯರಿ ಜಾಂವ್ಚಾ ಜಾಗ್ಯಾಂನಿ ತ್ಯೊ ವಾಚುನ್ ಸಾಂಗ್ತಾಲೊ.
ಅಶೆಂ ಅಪ್ಲ್ಯಾ ಸೆಜಾರ್ಚಾ ’ರಾಧಾ’ ಮ್ಹಳ್ಳ್ಯಾ ಎಕಾ ಹಿಂದು ಚೆಡ್ವಾಚಾ ಮೊಗಾರ್ ಪಡ್ಲೊ. ಪುಣ್ ಅಪ್ಲೊ ಮೋಗ್ ಉಚಾರುಂಕ್ ತಾಕಾ ಧಯ್ರ್ ಮೆಳ್ಳೆಂಚ್ ನಾ. ಮೊಗಾಕ್ ಜಾತ್ ಜಾಂವ್ ಧರ್ಮ್ ಜಾಂವ್ ನಾ’ ಮ್ಹಳ್ಳೆಂ ತತ್ವ್ ತೊ ಮಾಂದ್ತಾಲೊ. ಪುಣ್ ಹ್ಯಾ ತತ್ವಾಕ್ ಮಾಂದುನ್ಂಯ್ ಸಂದರ್ಭ್ ಯೆತಾನಾ ಹ್ಯಾ ತತ್ವಾಕ್ ಪಾಳುಂಕ್ ನರ್ಗೊಂವ್ಚಾ ಭಿವ್ಕುರ್ಯಾ ಸಮಾಜೆಪರಿಂಚ್ ಹೊಯೀ ಎಕ್ಲೊ. ಆಪ್ಲ್ಯಾ ಕಾಳ್ಜಾಂತ್ಲೊ ಮೋಗ್ ತಾಕಾ ಕೆದಿಂಕ್ಚ್ ರಾಧಾಲಾಗಿಂ ಉಚಾರುಂಕ್ ಸಾಧ್ಯ್ ಜಾಲೆಂನಾ. ಹ್ಯಾಚ್ ರಾಧಾಕ್ ಉದ್ದೇಶುನ್, ತಾಚೆರ್ ಆಪ್ಣಾಕ್ ಆಸ್ಚೊ ಮೋಗ್ ಉಚಾರ್ಚೆಂ ಏಕ್ ಪದ್ ತಾಣೆಂ ಲಿಖ್ಲೆಂ ’ಯೆ ಮೇರಾ ಪ್ರೇಮ್ ಪತ್ರ್ ಪಡ್ಕರ್, ಕೆ ತುಮ್ ನಾರಾಜ್ ನಾ ಹೋನಾ’ (’ಹೆಂ ಮ್ಹಜೆಂ ಮೊಗಾಚೆಂ ಕಾಗಾದ್ ವಾಚುನ್ ತುಂ ರಾಗಾರ್ ಜಾಯ್ನಾಕಾ’).
ಪುಣ್ ಹೆಂ ಕಾಗಾದ್ ತಾಚಾನ್ ದೀಂವ್ಕ್ ಸಾಧ್ಯ್ ಜಾಲೆಂ ನಾ. ಪುಣ್ ರಾಜ್ಕಪೂರಾನ್ 1964 ಇಸ್ವೆಂತ್ ಹೆಂ ಕಾಗಾದ್ ಆಪ್ಲ್ಯಾ ’ಸಂಗಮ್’ ಫಿಲ್ಮಾಂತ್ ಗಾವಯ್ಲೆಂ. ಹ್ಯಾ ಫಿಲ್ಮಾಂತ್ ರಫಿನ್ ಗಾಯ್ಲೆಲೆಂ ಪದ್ ಏಕ್ಚ್. ಆನಿಂ ಹೆಂಚ್ ಪದ್ ಸುಪರ್ ಹಿಟ್ ಜಾಲೆಂ. ರಾಜ್ಕಪೂರಾಚಾ ಫಿಲ್ಮಾಂತ್; ರಾಜ್ಕಪೂರಾಚೊ ಫಿಲ್ಮಿ ಪಂಗಡ್ ಏಕ್ದಮ್ ವೃತ್ತಿಪರ್ ಜಾವ್ನಾಸ್ಲ್ಲೊ. ಸಂಗೀತ್ಕಾರ್ ಶಂಕರ್-ಜೈಕಿಶನ್, ಸಾಹಿತ್ಕಾರ್ ಶೈಲೇಂದ್ರ್, ಹಸ್ರತ್ ಜೈಪುರಿ, ಗಾವ್ಪಿಂ ಲತಾ ಮಂಗೇಶ್ಕರ್ ಆನಿಂ ಮುಕೇಶ್. ರಾಜ್ಕಪೂರಾಚಾ ’ಬರ್ಸಾತ್’ (ಪಾವ್ಸ್) ಫಿಲ್ಮಾಕ್ ಆಪ್ಲೆಂ ಪಯ್ಲೆಂ ಪದ್ ’ಜಿಯಾ ಬೇಕರಾರ್ ಹೆ’ ತಶೆಂಚ್ ಅನ್ಯೇಕ್ ಪದ್ ’ಚೋಡ್ ಗಯೆ ಬಾಲಮ್’.
1971 ಇಸ್ವೆಂತ್ ರಾಜ್ಕಪೂರಾಚಾ ಜಿಣ್ಯೆನ್ ಏಕ್ ಅವ್ಚಿತ್ ಘುಂವ್ಡಿ ಘೆತ್ಲಿ. ಪಯ್ಲೆಂ ತಾಚಾ ಫಿಲ್ಮಾಂಕ್ ಸಂಗೀತ್ ನಿರ್ದೇಶನ್ ದಿಂವ್ಚೊ ಜೈಕಿಶನ್ ಅಂತರ್ಲೊ, ಆನಿಂ ತಾಚಿಂ ಎಕಾ ಪಾಟ್ಲ್ಯಾನ್ ಏಕ್ ಫಿಲ್ಮಾಂ ಸಲ್ವಾಲಿಂ. ತಾಚಾ ಜಿಣ್ಯೆಚೆಂ ಶ್ರೇಷ್ಟ್ ಫಿಲ್ಮ್ ’ಮೆರಾ ನಾಮ್ ಜೋಕರ್’, ’ಕಲ್ ಆಜ್ ಔರ್ ಕಲ್’. ಹ್ಯಾ ಘಡ್ಯೆ ತಾಣೆಂ ಆಪ್ಲೊ ಪಂಗಡ್ ಬದ್ಲುಂಕ್ ಯೆವ್ಜಿಲೆಂ.
ಲಕ್ಶ್ಮೀಕಾಂತ್ ಪ್ಯಾರೆಲಾಸವೆಂ ಹಸ್ರತ್ ಜೈಪುರಿಕ್ ತಾಣೆಂ ಪರತ್ ಆವ್ಕಾಸ್ ದಿಲೊ. ಅಶೆಂ ಹಸ್ರತ್ ಜೈಪುರಿನ್ ಪರತ್ ’ಸುನ್ ಸಾಯ್ಬಾ ಸುನ್’ ಆನಿಂ ’ರಾಮ್ ತೆರಿ ಗಂಗಾ ಮೈಲಿ’ ತಸಲಿಂ ಯಾದ್ಗಾರ್ ಪದಾಂ ದಿಲಿಂ. ಹಸ್ರತ್ ಜೈಪುರಿನ್ ತಿನ್ಶಾಂವಯ್ರ್ ಫಿಲ್ಮಾಂಕ್ ಪದಾಂ ಲಿಖ್ಲ್ಯಾಂತ್ ತರ್ಯೀ ತಾಚಿಂ ಪದಾಂ ಭೋವ್ ನಾಂವಾಡ್ದಿಕ್ ಜಾಲ್ಲಿಂ ರಾಜ್ಕಪೂರಾಚಾ ಫಿಲ್ಮಾಂನಿ - ’ಬರ್ಸಾತ್’, ’ಶ್ರೀ 420’, ’ಆವಾರಾ’, ’ಸಂಗಮ್’, ’ಮೆರಾ ನಾಮ್ ಜೋಕರ್’ ಹಾಂತ್ಲಿಂ ಥೊಡಿಂ.
1999 ಂತ್ ತಾಚಾ ಮರ್ಣಾವೆಳಾರ್ ಫಾಮಾದ್ ಸಂಗೀತ್ ನಿರ್ದೇಶಕ್ ನೌಶಾದ್ ಅಶೆಂ ಸಾಂಗ್ತಾ;
"ಹಸ್ರತ್ ಸಾಬ್ ಏಕ್ ಬರೊ ಮನಿಸ್ ಆನಿಂ ಬರೊ ಉರ್ದು ಕವಿ ಜಾವ್ನಾಸ್ಲ್ಲೊ. ತಾಚೆರ್ ಫಿಲ್ಮಿ-ಸಂಸಾರಾಚಾ ಸಗ್ಳ್ಯಾಂಕ್ ಅಭಿಮಾನ್ ಆನಿಂ ಮೋಗ್ ಆಸ್ಲ್ಲೊ ಆನಿಂ ತೊ ಆರ್.ಕೆ.ಸ್ಟುಡಿಯೊಚಾ ಅಖ್ರೇಚಾ ಖಾಂಬ್ಯಾಂಪಯ್ಕಿ ಎಕ್ಲೊ".
ತಕ್ಲೆನಾಂವಾಚೊ ಕವಿ :
ತ್ಯೇ ವೆಳಾಚೆ ಭೋವ್ ಫಾಮಾದ್ ಕವಿ, ಜಾಂವ್ ಹಸ್ರತ್ ಜೈಪುರಿ, ಶಕೀಲ್ ಬದಾಯುನಿ, ಶೈಲೇಂದ್ರ, ಯಾ ರಾಜ ಮೆಹ್ದಿ ಅಲಿ ಖಾನ್ ಹ್ಯಾ ಸರ್ವಾಂಕ್ ಅಪ್ಣಾಚಿ ಮ್ಹಳ್ಳಿಚ್ ಏಕ್ ಶೈಲಿ ಆಸ್ಲ್ಲಿ. ಹಾಂಕಾಂ ಕೊಣಾಕ್ಚ್ ಎಕಾಮೆಕಾಕ್ ಮಿಕ್ವೊನ್ ವೆಚಿ ಶ್ಯಾಥಿ ನಾತ್ಲ್ಲಿ. ದಾಖ್ಲೊ ಹಸ್ರತ್ ಜೈಪುರಿಚಿಂ ಮೊಗಾಚಿಂ ಪದಾಂ ತೀಂಯ್ ಫಿಲ್ಮಾಚಾ ತಕ್ಲೆನಾಂವಾಸವೆಂ, ಕಿತ್ಯಾಕ್ ಮ್ಹಳ್ಯಾರ್ ತಕ್ಲೆನಾಂವಾಚೆರ್ ಪದಾಂ ಲಿಖ್ಚೆಂ ತಿತ್ಲೆಂ ಸಲೀಸ್ ನ್ಹಯ್. ಆನಿಂ ಹಿಂದಿ ಫಿಲ್ಮಾಂತ್ ಹಿ ಸುರ್ವಾತ್ ಕರ್ನ್ ದಿಲ್ಲಿ ಹಸ್ರತ್ ಜೈಪುರಿನ್.
ಕವಿತಾ/ಪದಾಂ :
ಹಸ್ರತ್ ಜೈಪುರಿನ್ ಸಾಹಿತ್ಯಾಕ್ ಅಪ್ಣಾಚಿ ಪಿಸಾಯ್ ಮ್ಹಣ್ ಕೆದಿಂಕ್ಚ್ ಘೆಂವ್ಕ್ ನಾ. ಫಕತ್ ಹವ್ಯಾಸ್ ಜಾವ್ನ್ ತಿ ಘೆತ್ಲಿ ತರ್ಯೀ ವಿಶೇಸ್ ಮೋಗ್ ತಾಕಾ ಕವಿತಾಂಚೆರ್ ಆಸ್ಲ್ಲೊ. ತಶೆಂ ಮ್ಹಣ್ ತೊ ಕೆದಿಂಕ್ಚ್ ಅಪ್ಲಿಂ ಕವಿತಾ/ಪದಾಂಕ್ ಘೆವ್ನ್ ನಿರ್ಮಾಪಕಾಂಚಾ ಘರಾಂನಿ ಕೆದಿಂಕ್ಚ್ ಭಂವೊಂಕ್ನಾಂ. ತಾಚಾ ಕವಿತಾಂಕ್ ಅಸಲಿ ಸಕತ್ ಆಸ್ಲ್ಲಿ ಕೀ ತಾಕಾ ಸೊಧುನ್ ಫಿಲ್ಮಾಚೆ ನಿರ್ಮಾಪಕ್, ಸಂಗೀತ್ ನಿರ್ದೇಶಕ್ ಯೆತಾಲೊ. ತಾಚಿ ಶೈಲಿ ಸಾದಿ, ತಾಚಿಂ ಉತ್ರಾಂ ಸಂಪಿಂ. ತಾಚಾ ಉತ್ರಾಂ ಉತ್ರಾಂನಿ ಕವಿತಾ ಆಸ್ಲ್ಲಿಂ ಮ್ಹಣ್ತಾತ್ ತಾಕಾ ಖಾಸ್ಗೆನ್ ವಳ್ಕಾಲ್ಲೆ ಕವಿ.
ಜಶಿ ತಾಚಿ ಜಿಣಿ ಸಾದಿಗೀ ತಶೆಂ ತಾಚಿಂ ಪದಾಂಯ್ ಸಾದಿಂ ದೆಕುನ್ ಚಡ್ತಾವ್ ಸಾದೊ ಲೋಕ್ ತಾಚಾ ಪದಾಂಕ್ ವಿಶೇಸ್ ಖಾಯ್ಸ್ ಕರ್ತಾಲೊ. ತೊ ಹಿಂದಿ ಆನಿ ಉರ್ದು ಭಾಸೆವಿಶ್ಯಾಂತ್ ಅಶೆಂ ಸಾಂಗ್ತಾ; ’ಹಿಂದಿ ಆನಿಂ ಉರ್ದು ದೋನ್ ಭಾಸೊ ಕೆದಿಂಕ್ಚ್ ವೆಗ್ಳಾಚಾರ್ ಜಾಯ್ನಾ ತಸಲ್ಯೊ ಭಯ್ಣ್ಯೊ ಜಾವ್ನಾಸಾತ್, ದೆಕುನ್ ಮ್ಹಜಿಂ ಕವಿತಾ, ಪದಾಂ ಆನಿಂ ಬೂಕ್ ಹಿಂದಿ ಆನಿಂ ಉರ್ದು ಭಾಸೆಂತ್ ಆಸಾತ್’. ಪುಣ್ ಕವಿತಾ/ಪದಾಂಕ್ ಭಾಸ್ ಏಕ್ ಮಾಧ್ಯಮ್ ಮಾತ್ರ್ ಶಿವಾಯ್ ಹೆರ್ ಕಿತೆಂಚ್ ನ್ಹಯ್. ಜಾಂವ್ ಹಿಂದಿ ಯಾ ಉರ್ದು, ಪುಣ್ ಕಶೆಂ ವಿಸ್ರೊಂವ್ಚೆಂ ತಾಚಿಂ ಅಮೊಲಿಕ್ ಪದಾಂ, ಪ್ರತ್ಯೇಕ್ ಥರಾನ್ ತಾಚಿಂ ಹಿಂ ಉತ್ರಾಂ;
"ತುಂ ಮ್ಹಾಕಾ ಕಶೇಂಯ್ ವಿಸ್ರೊಂಕ್ ಸಕಾಸೊನಾಂಯ್
ವ್ಹಯ್ ತುಂ ಮ್ಹಾಕಾ ವಿಸ್ರೊಂಕ್ ಸಕಾಸೊನಾಂಯ್
ಕೆದ್ನಾಂಯ್ ತರ್ಯೀ ಮ್ಹಜೆಂ ಗೀತ್ ಆಯ್ಕತಾನಾ
ಅಪ್ಣಾಸವೆಂ ತುಂಯೀ ತೆಂ ಗೀತ್ ಗುಣ್ಗುಣ್ತಲೊಯ್"
ಕವಿತಾದಾಯ್ಜ್ - 6 . ಹಸ್ರತ್ ಜೈಪುರಿ
ಪುಣ್ ತಾಚೆಂ 1966 ಇಸ್ವೆಂತ್ಲೆಂ ’ತೀಸ್ರಿ ಕಸಮ್’ ಫಿಲ್ಮಾಂತ್ ಲಿಖ್ಲೆಲೆಂ ಪದ್, ಜ್ಯೆಂ ಹಾವೆಂ ಮ್ಹಜಾ ಬುರ್ಗ್ಯಾಪಣಾರ್ ಆಯ್ಕೊನ್ ಆಯಿಲ್ಲೆಂ ಮ್ಹಜೆಂ ಭೋವ್ ಪಸಂದೆಚೆಂ ಅಶೆಂ ಆಸಾ;
"ಸಂಸಾರ್ ರಚ್ಲೆಲ್ಯಾ,
ಕಿತೆಂ ತುಜಾ ಮತಿಂತ್ ಸುಸ್ತಾಲೆಂ
ಕಿತ್ಯಾಕ್ ಸಂಸಾರಾಕ್ ರಚ್ಲೊಯ್, ತುವೆಂ
ಕಿತ್ಯಾಕ್ ಸಂಸಾರಾಕ್ ರಚ್ಲೊಯ್
ಕಿತ್ಯಾಕ್ ರಚ್ಲ್ಯೊಯ್ ತುವೆಂ ಮಾತ್ಯೆಚೊ ಪುತ್ಳ್ಯೊ
ಧರ್ತೆಚೆರ್ ಹಿಂ ಸೊಭಿತ್ ಸೊಭಿತ್, ತೊಂಡಾಂ
ಹಿಂ ಪರ್ಜಳಿತ್ ಕಿತ್ಯಾಕ್ ರಚ್ಲೊಯ್ ತುವೆಂ ಸಂಸಾರಾಚೊ ಖೆಳ್
ಆನಿಂ ತಾಂತುಂ ಲಾಗಯ್ಲೊಯ್ ತರ್ನಾಟ್ಪಣಾಚೊ ಮೇಳ್
ವಗೊಚ್ ಬಸೊನ್ ತಮಾಸೊ ಪಳೆತಾಯ್,
ವಾ! ತುಜಿ ಮಹಿಮಾಕೀ ...ಕಿತ್ಯಾಕ್ ಸಂಸಾರಾಕ್ ರಚ್ಲೊಯ್
ತುಂ ಸಯ್ತ್ ಚಡ್ಪಡ್ಲೊಯ್ ಜಾವ್ಯೆತ್ ಮತಿಕ್ ರಚುನ್
ತುಫಾನ್ ಹೆಂ ಮೊಗಾಚೆಂ ಮತಿಂಕ್ ಲಿಪವುನ್
ಕಸ್ಲೆಂ ತರೀ ರುಪ್ಣೆಂ ಆಸ್ಯೆತ್ ತುಜಾ ದೊಳ್ಯಾಂನಿ
ದುಃಖಾಂ ಸಯ್ತ್ ಗಳ್ಳಿಂ ಜಾವ್ಯೆತ್ ತುಜಾ ದೊಳ್ಯಾಂಚಾ ಆಸ್ಡ್ಯಾಂ ಥಾವುನ್
ಸಾಂಗ್ ಕಿತೆಂ ಚಿಂತುನ್ ಪಡ್ಲೊಯ್,
ಕಿತ್ಯಾಕ್ ಮೋಗ್ ಜಾಗಯ್ಲೊಯ್ ..ಕಿತ್ಯಾಕ್ ಸಂಸಾರಾಕ್ ರಚ್ಲೊಯ್
ಮೋಗ್ ರಚುನ್ ತುವೆಂ ಜಿಯೆಂವ್ಕ್ ಶಿಕಯ್ಲೆಂಯ್
ಹಾಸೊಂಕ್ ಶಿಕಯ್ಲೆಂಯ್, ರಡೊಂಕ್ಯ್ ಶಿಕಯ್ಲೆಂಯ್
ಜಿಣ್ಯೆಚಾ ರಸ್ತ್ಯಾಚೆರ್ ಸಾಂಗಾತಿಕ್ ಮೆಳಯ್ಲೊಯ್
ಸಾಂಗಾತಿ ಮೆಳವ್ನ್ ತುವೆಂ ಸ್ವಪ್ಣಾಂ ಜಾಗಯ್ಲಿಂಯ್
ಸ್ವಪ್ಣಾಂ ಜಾಗವ್ನ್ ತುವೆಂ ಕಿತ್ಯಾಕ್ ದಿಲೊಯ್ ಅಧೇವ್ನ್ .. ಕಿತ್ಯಾಕ್ ಸಂಸಾರಾಕ್ ರಚ್ಲೊಯ್"
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.